Skina di Sorti, awe djaluna 6 di òktober di 2008, ta kuminsá ku deseá un i tur un bon dia. Un fenómeno di maneho tin 3 karakterístika deskriptivo ku ta direkshon (inmobil, krese, disminui), dinámika (velosidat ku kual e kambionan den direkshon ta tuma lugá; aselerá, marginal, konsistente) i dimenshon (grandura, forsa, impakto).
****
Ku gobièrnu no tabata tin informashon riba dimenshon i dinámika di e krísis finansiero global ta algu ku por diskutí riba dje. Pero ku gobièrnu tabata totalmente robes riba direkshon si ta algu ku no por aseptá. E indikashonnan tabata tei i e úniko senario ku gobièrnu a brasa tabata esun di mas optimista i irealista.
****
Gobiernu den su mensahe na komunidat a prediká “rozengeur en maneschijn”, miéntras ku un pais ku no tin rekurso (no a krea reserva pa por kontrarestá ningun atversidat) ta obligá di tene kuenta ku e senario ku mas impakto i mester prepará pa esnan ku ta mas probabel. Bo maneho mester ta unu di prepará pa lo peor i deseá lo mihó (“plan for the worst and hope for the best”). Nos realidat ta unu di “bloed, zweet en tranen”. Ta un situashon ku ta rekerí di un aserkamentu di krísis.
****
Klaru ku un Banko Sentral tin di komuniká ku e koutela i reserva nesesario. E tin di kuida pa no surgi un situashon di pániko kaminda hende ta kore bai saka nan plaka for di banko. Laga mi ta kla i konkreto den mi asertashon ku nos no tin problema pa lokual ta nos struktura finansiero. Nos bankonan ta sólido. Nos problemanan ta ku e implikashon ekonómiko di e problemanan riba nivel global. Nos pais ta un “taker”, esta e no tin ningun influensia riba e merkadonan global, pero si ta sinti e konsekuensia di moveshon di e respektivo merkadonan.

 

LAS VEGAS – Na e siudat kaminda suerte ta tur kos. O.J. Simpson a ser deklará kulpabel, i 13 tabata su number di mala suerte den un kaso ku tabatin kambionan inesperá.
Simpson a keda kondená pa un robo ku arma ku a tuma lugá 13 di sèptèmber i a ser deklará riba e di 13 aniversario di su apsolushon pa un asesinato na Los Angeles. E hurado di su kaso na Las Vegas a deliberá 13 ora despues di un huisio di 13 dia.
Djabièrnè anochi, ora e úniko kos ku tabata skucha tabata e yoramentu di e ruman muhé di e eks strea di NFL, e lusnan di korte a paga.
E guardianan a sende lusnan di seguridat i a grita tur hende pa nan keda na nan lugá. Solamente e wes muhé tabata sa loke ta pasando, tabata diesun’or di anochi i e lusnan di e edifisio a paga outomátikamente.
Sim,pson, di 61 aña i un dje streanan di Salòn di Fama, a ser deklará kulpabel pa sekuestro, robo armá i 10 otro akusashon pa a reuní sinku hòmber i drenta den un kamber di un hotèl kasino di Las Vegas kaminda e grupo a hòrta diferente kos, plakat i fotonanan mas ku un aña pasá. E investigadónan a afirmá ku dos dje hòmbernan tabata armá, un di esnan impliká a afirmá ku Simpson mes a pidié pa e bai ku un pistol.
Asina ku el a ser deklará kulpabel a pone bui riba dje i a sak’é di korte huntu ku e otro akusado, Clarence “C.J.” Stewart. Tur dos lo por haña un kastigu di asta bida largu.

 

WILLEMSTAD – Gobièrnu di Sürnam awe a prohibí tur produkto di lechi fo’i China pa drenta e pais aki. Esaki despues ku a sali un atvertensia mundial riba posibel lechi kontaminá prosedente di China.
Ministerio di Salubridat ta buskando intensivamente riba merkado di lokal na Sürnam pa presensia di kualke produkto di lechi di China. E promé ku mas outoridatnan ta poniendo atenshon riba dje ta ‘Milky Evaporated Milk’ kual China e identifiká komo un di esnan kontaminá ku “melamina”, un kímiko ku ta usa pa produkshon di plèstik.
Gobièrnu a saka un boletin urgente ordenando pa supermerkadonan saka tur produkto di lechi di China for nan rèkinan.
E problema ku lechi kontaminá na China ta konosí for di 14 di sèptèmber despues ku kuater persona a muri i mas ku 54 mil beibi a bira malu.

 

WILLEMSTAD – Resientemente American Women’s Club Curaçao (AWC) a hasi un donashon di 10 dikshonario papiamentu-inglés na Biblioteka Públiko di Kòrsou.
“Nos ta kere ku ta esensial ku e hubentut di Kòrsou por papia ingles p’asina nan por kompetí den e komunidat global,” asina Laura Smallie di AWC a bisa. “Nos a skohe pa hasi un donashon di e dikshonarionan aki pa asina nan por ta na disposishon di un i tur.”
Tabata Rayna van Gijs Bakker i Viola Segredo Statia ku a tuma e 10 dikshonarionan aki na nòmber di Biblioteka Publiko. Otro miembronan di AWC ku tabata presentá na e okashon spesial aki tabata Heather d’Abreu de Paulo, Presidente i Tina Vermeulen Laison Officer, huntu ku señora Smallie.
E donashon aki ta parti di e programa “Dikshonarionan pa Skol” di Jong Bonaire ku a yuda move e fundashon mas serka di su ophetivo di 500 dikshonario ku lo keda opsekiá na diferente skolnan.
“Si nos logra e ophetivo di
repartí 500 dikshonario, un donante anónimo na Merka lo kontribuí ku 20.000 dollar na Jong Bonaire,” asina Rene Hakkenberg, presidente di e organisashon aki a bisa.



Riba e foto d.r.p.d. Laura Smallie (AWC), Tina Vermeulen (AWC), Heather D’Abreu de Paulo (AWC), Viola Segredo Statia (Biblioteka Públiko), Rayna van Gijs Bakker (Biblioteka Públiko).

 

Awe ketu bai e tópiko di dia i preokupashon di bèrdat ta, e reseshon finansiero global i e menasa ku esei tin pa nos tambe na Kòrsou. Maske ku hopi di nos no ta sintiendo realmente den nos bida personal ku tin un problema; lo ta bon tòg pa tuma e informashonnan ku ta biniendo nos direkshon debidamente na serio. Tur esaki miéntras ku pa hopi hende henter e tópiko di situashon finansiero mundial i su relashon ku nos ta unu sumamente difísil pa asta hendenan ku mester ta envolví komprondé eksaktamente.
Lo tabata mas fásil pa bisa ku e preokupashon ei ta asuntu di gobièrnu i ku si kos bira malu malu, lo pone gobièrnu responsabel, pasobra ta nan trabou pa sòru pa nos pais no tin problema.
Maske esei tambe ta bèrdat, ta keda tòg ku tur hende ku ta tuma su mes na serio mester buska pa haña sa mas di kiko ke men un situashon finansiero mundial den pèrtá i kiko ta un reseshon.

Ta responsabilidat di tur hende pa tuma akshon, samsam banda di gobièrnu, instansianan konserní i esnan ku ta tuma desishonnan internashonal riba kua nos no por tin niun influensia.
Kuminsá na buska informashon pa bo mes sa i komprondé. No konfia ni kere sin mas komentarionan riba kiko ta bèrdat òf no di e situashon finansiero aktual. Tin asina tantu opinion ku mi a tende den siman pasá kaminda ku mi a asombrá mi mes ku no tin rektifikashon di informashonnan ku por hinka un hende ku sigui nan den problema real serio. Konsiente ku finalmente ta abo mes i bo so, ta responsabel pa loke pasabu; mi ta tribi na bini ku un simpel sugerensia:

 

WILLEMSTAD - Djasabra último Banco di Caribe a tene su dia di informashon pa Hipotek. Klientenan a sá di probechá di e dia aki pa asina tuma tur informashon relashoná ku un hipotek pa e kas di nan soño.
E kampaña di hipotek di Banco di Caribe ta ofresébo, un interes kuminsando na 6.5%, 100% finansiamentu posibel, oportunidat di paga bo hipotek bèk den 30 aña, un pakete di seguro masha kompetitivo plùs un luna grátis di prima. Posibilidat di finansiamentu pa tur kosto adishonal relashoná ku hipotek i un chèns úniko di gana ANG 35.000 na yanüari 2009. Ta bon hasi menshon ku e kampaña aki ta bálido te ku 20 di desèmber próksimo.
Riba kombinashon di foto por mira e tim dinámiko di Banco di Caribe ku djasabra último a pèrkurá pa tur hende a yega un tiki mas serka na e realisashon di e kas di nan soño.

 

WILLEMSTAD – Djasabra anochi tabatin apertura di Dia di Banda Abou ku a tuma lugá na Santa Cruz na kas di Jenny Flounia. Pa e apertura aki Rudy Rooi, presidente Komishon Banda Abou, a ekspresá nan alegria di por tin un dia asina ku otro barionan por a tuma pa nan tambe tin nan dia. Komo bario ku un aktividat insentivo ku kada aña ta krese mas i mas ta demostrá riba e importansia pa selebrá ademas di krea un ambiente úniko pa ku e dia aki. Durante e seremonia di apertura tabatin orashon di pastor Norwin Josepa, ku a mustra e balor agregá no solamente di e dia, pero di e pueblo di Banda Abou pa e rekonosementu di personanan klave ku ta sali for di e parti di e isla aki.
Di su banda diputado di kultura Marilyn Alcalá-Wallé a bisa ku ta bon pa Banda Abou sigui tene na e tradishon aki i pa sigui krese kada aña di nobo. Diputado Alcalá-Wallé tabatin na su enkargo pa entrega di sertifikado na organisashon i persona ku a destaká riba tereno sosial. Entre nan tambe Maduro & Curiel’s Bank NV a risibí rekonosimentu pa nan 35 aña den Banda Abou.
A duna homenahe na tres baluarte, kendenan ta srs. Monte, di Big Boss Lottery; Maria di Prizòn Bon Futuro i Martha, otro komersiante eksitoso. Pa e okashon aki Komishon Banda Abou a invitá Boy Antion di Boneiru i su ekipo for di Boneiru. Djasabra anochi tabatin animashon musikal di Típiko Kòmpèr.

 

WILLEMSTAD – “Chapo”, e konsepto nobo den mundu di drecha outo. Ta trata di un garashi kaminda bo mes por bai drecha bo outo. E konsepto aki ta unu di “hasié bo mes” ta ofresé servisio di lokalidat i hèrmènt pa e doño òf kualke persona por hür pa drecha outo. E konsepto aki ta duna un kontribushon na personanan ku nan mes ke hasi nan servisionan riba nan outo òf drecha nan outo, pero ku no tin un espasio pa traha riba nan vehíkulo. E garashi di “Chapo” ta ofresé espasio pa kualke trabou riba bo outo, ademas di kambia zeta i otro piesanan na bo outo. Tambe e tin un lokalidat spesial pa kambia tire di bou outo.
“Chapo” ta ofresé servisio di hür hèrmènt pa traha e trabou ku bo mester traha riba bo outo. Siman pasá tabatin apertura di e garashi aki na Heintjekoolweg 7 na Noord Roosendaal.

WILLEMSTAD – Si Sehos risibí e plaka di personanan sin seguro ku a haña tratamentu na hospital di gobièrnu, Sehos lo paga pa basha edifisio di St. Thomas abou. Esei ta loke presidente di e Hunta di Supervishon Eric Garcia a bisa LA PRENSA awe mainta.
For di siman pasá djamars, e asuntu di edifisio di St. Thomas a bin den diskushon pa e peliger ku e ta forma pa bishitantenan di Sehos, meskos tambe pa e hospital mes. Den esaki diputado Anthony Godett a reakshoná, mustrando di a risibí un petishon di gerensia di Sehos, kua petishon ta serka AJZ i Domein pa konseho. Den mesun rosea diputado Godett a mustra ku si Sehos tin e kantidat di plaka aki, nan mes lo por paga pa basha e edifisio abou. E kantidat di plaka ku tin mester ta 800 mil florin, di kua gobièrnu lo mester mira for di unda lo tin ku paga esaki. Diputado Godett ta konsiderá, ku riba e tereno aki lo mester bin e hospital nobo i lo por resultá bon pa Sehos mes na promé lugá.
Garcia a afirmá awe mainta, ku no ta korekto pa basha un edifisio abou ku no ta di bo, ya ku ainda no a pasa e derechi di erfpacht pa gerensia di Sehos. Banda di esaki Garcia a indiká, ku lo ta bon pa gobièrnu kuminsá paga e suma di debe ku nan tin atrasá di ‘niet verzekerenden”, ku ta e personanan ku a haña tratamentu na Sehos ku no tin manera pa paga. Aki ta trata di dos grupo, kua e promé ta ilegal òf turistanan ku a haña tratamentu, miéntras ku e otro grupo ta esnan lokal ku no tin un entrada òf no tin un karchi pa kubri e gastunan di tratamentu. Garcia a splika, ku tin un disputa tokante e pago aki i for di tempu di eks diputado Charles Cooper tin palabrashonnan ku no a kumplí ku nan. Garcia a bisa ku e disputa ta entre Gobièrnu Sentral i Insular, ku ta purba di skùif sierto di e responsabilidat aki for di nan kurpa. Gobièrnu Sentral ta mustra ku e grupo di persona ilegal i turista no ta su kompetensia, pero di Gobièrnu Insular, ya ku e personanan aki a drenta Teritorio Insular di Kòrsou. I ora ta trata ilegal ta Gobièrnu Insular ta esun responsabel ku tin ilegalnan ta drenta. Pues Gobièrnu Sentral ta kere, ku mester laga Gobièrnu Insular paga. Pa e motibu aki ta wardando riba un sentensia di korte ku mester mustra ken lo tin ku paga e debe aki na Sehos. Segun Garcia, e debe aki ta sigui krese i ta mas ku dies aña ta luchando ku e tema aki. Ta kalkulá, ku e debe aki ta surpasá mas di 3 mion florin.

STOCKHOLM, Suesia, - E aleman Herald zur Hausen i e fransesnan Francoise Barré-Sinoussi i Luc Montagnier ta e ganadónan di Premio Nobel di Medisina 2008.
Hausen a keda premiá pa deskubrí e vírùs di papiloma humano, motibu prinsipal di kanser na boka di matris.
Miéntras ku e fransesnan Barré-Sinoussi i Montagnier a keda premiá pa nan investigashonnan riba e vírùs di HIV ku ta kousa AIDS.
E anunsio di e premio di Medisina, realisá na Stockholm, Suesia, i transmití direkto pa e página web di Fundashon Nobel, ta esun promé, i den dianan benidero lo anunsiá esnan premiá den e otro kategorianan.
Dia 10 di desèmber lo bai tin entrega di premio Nobel, aniversario di morto di su fundadó, Alfred Nobel, inventor di dinamit.
Alfred Nobel a krea e galardonnan den Medisina, Físika, Kímiko, Literatura i Pas, miéntras ku e di seis, esun di Ekonomia, a keda establesé na 1968 pa Banko Sentral Sueko.
Despues di e anunsio ken ta esnan ku a gana premio Nobel di Medisina, djamars lo anunsiá esun di Físika, Kímiko (djarason), Literatura (djaweps), Pas (djabièrnè), Ekonomia (djaluna 13 di òktober).

Foto: Francoise Barre-Sinoussi 0610

Francoise Barré-Sinoussi, ko-deskubridó di vírùs di HIV.

Foto: Luc Montagnier 0610

Luc Montagnier, sientífiko franses ku a deskubrí e vírùs di HIV huntu ku e tambe franses Francoise Barré-Sinoussi.

PENSO
Marlene Candida
A laga atras Arline Pirotto-Henriquez, Maureen Hu-A-Ng-Henriquez. Akto di entiero ta tuma lugá djamars 7 òktober na Oss, Ulanda.

KIP
Eduardo Narciso
A laga atras su yunan, kasá Teresita Kip-Llanes i yunan. Kremashon a tuma lugá den seno familiar

DE WINDT
Erwin Filomeno (repentino)
Mihó konosí komo Papichi òf Win
A laga atras su kasá Aivris de Windt-Rosalina, mama Johanna de Windt, yunan Jessica i Karyl Felipa-de Windt, Cliffard i Lisette de Windt-Martijn, Janice de Windt, yu di kriansa Marlon Moreno i famia. Akto di entiero ta djamars 8 òktober for di misa Gr. Kwartier pa santana El Consolador. Bishita 9or. Promé ku entiero tin un s.s. di misa 11or.

SALOMÉ-ALEXANDER
Rosanna Virgen
Mihó konosí komo rosa
A laga atras su yunan Mirella Salomé, Randall Salomé i Brenda Knigth, Rinia Salomé i Louis van Rijthoven, Dayanara Felomina i Diangelo Cathlin, yu di kriansa Ilse Alexander, esposo Wilfrido Salomé. Akto di entiero ta djamars 7 òktober for di misa Janwe pa santana Janwe. Bishita 1or. Promé ku entiero tin un s.s. di misa 3.30or.

MERCELINA
Augusto Roberto
Mihó konosí komo Shon Gu
A laga atras su yunan Sigfried, Nelson, Benita, Jessy, August, Hendrich Mercelina. Akto di entiero ta djarason 8 di òktober for di misa Sta. Rosa pa santana Sta. Rosa. Bishita 1or. Promé ku entiero tin un s.s. di misa.

Lorito ta yama tur hende un felis djaluna. Esta un djaluna. Awa a kai i tòg tabata “hot”. Un saludo pa Marvis ku a yama nos pa splika nos di kon nos no a haña kuminda di para e aña aki. Nos a komprondé masha bon ku nos no a komportá dje bon ei! Por ta otro aña si!
****
Ai, ai, ai! Nos a tende ku banda di e wega Bingo Blinko tin awor aki un wega ku yama Bula Bala. Hendenan ku ta wak TV tur dia a bisa nos ku ta masha remarkabel ku a salta diferente front-page impaktante di korant. Lorito di ku e no kier ta den e kosnan ei, pero di otro banda e mester kumpli ku su fiel lesadónan. E wega nobo, riba instrukshon di hefe direkto, yama Bula Bala! Danki Dios Lorito su wega preferí yama Bula Leu!
****
Ata otro wega mas! Un wega pa pone pòrtrèt di un kos ku a frakasá ku masha hende mes. Ora wak bon ta pòrtrèt di aña pasá. Masha hende a bisa nos ku e kos no a bai bon te pa hasi komo si fuera e tabata un éksito. Ta ki yama e wega ei anto? Buladeifi?
****
Nos kier a manda saludo pa dos famia ku a lanta awe den tristesa profundo. Tráfiko di Kòrsou ta sigui insigur i prinsipalmente ora awa kai, nos tur mester ta mas kouteloso. Algun hende tabata ranka awe mainta riba kaminda muhá ku Dios di ta basta. Pasikiko? Ni skol no tin pa hasi asina tantu beheit riba kaminda!
****
Un saludo pa nos amigu Pop ku pèrdida di su yu muhé. Pop aki ta un hende di tur hende i ta ku hopi tristesa nos a tuma nota di loke a pasa. Outoridatnan a hasi e doló mas grandi ora ku a midi ku dos midí. Nos no ta komprondé tin biaha ta kon e tipo di kosnan aki ta pasa.

WILLEMSTAD – Mas o ménos 40 dòkter, spesialista i fisioterapista ta na kareda awor ku Eilandsontvanger a laga pone beslag riba e fondonan ku nan tin di haña di Banko di Seguro Soshal (SVB). Ounke tin indikashon ku e beslag tin di aber ku e veredikto ku dòkternan di kas a gana resientemente kontra Gobièrnu di Antia, tantu SVB komo Gobièrnu ta desmentí esei. Nan ta alegá ku Eilandsontvanger ta independiente den su kobransa. Loke si por a pasa ta, ku Eilandsontvanger a tuma nota (den prensa) ku entre otro dòkternan di kas lo mester kobra den kareda di 7 mion florin a base di e veredikto aki. Komo ku tin diferente dòkter di kas, spesialista i fisioterapista tin kuentanan astronómiko habrí di belasting, Eilandsontvanger a intervení pa haña su parti di e “bolo” aki.
E situashon di tal manera ku diferente dòkter, speshalista i fisioterapista no por kumpli awor aki komo ku nan no tin sufisiente fondo. Hustamente awor ku nan ta wardando pa SVB paga nan, nan lo no haña nan fondonan. Esei a hinka diferente di nan den problema. Algun di e dòkternan di kas enbolbí a pidi un reunion urgente di nan Asosashon pa e siman aki. Direktor di SVB, Philip Martis a konfirmá e beslag awe mainta, indikando ku SVB no por hasi nada den e kaso aki. Ta te na momentu ku e spesialistanan, dòkternan di kas i fisioterapistanan yega na un akuerdo ku Eilandsontvanger lo por paga loke mester paga òf e diferensha di loke a kumbiní. “Promé ku esei nos no por hasi nada”, asina Martis a bisa rechasando e idea ku SVB ta tras di e akshon aki.

 

WILLEMSTAD – No tin nesesidat pa tuma medida kontra lechi i produktonan di lechi kontaminá for di China na Kòrsou. Asina un bosero di Inspekshon pa Protekshon di Salú a bisa LA PRENSA awe mainta relashoná ku e desishon di outoridatnan di Sürnam. Gobièrnu di Sürnam a prohibí importashon di produktonan di lechi for di China entrante awe.
Inspekshon di Protekshon di Salú ta sintá ku e situashon ku su medidanan ta konta pa tur isla antiano komo ku ainda Antia ta kai bou di un régimen. Pa loke ta trata Kòrsou, GGD (ku ta un entidat insular) a hasi diferente sondeo i a determiná ku e kantidat di produkto di lechi for di China importá na Kòrsou ta mínimo.
Loke si a pasa ta ku Duana a wanta un kònteiner ku produkto for di China, pero despues ku a determiná ku no tabata trata di produktonan dañino a kita e embargo riba e kònteiner. Outoridatnan antiano di tur manera ta sigui vigilá e situashon di serka, asina nan a garantisá awe. Un di e produktonan ku nan ta vigilando ta un tipo di mangel chines ku lo ta kontaminá. Te awor aki no a konstatá e mangel aki riba merkado lokal.

Sürnam

Gobièrnu di Sürnam a prohibí entrante awe importashon di tur produkto di lechi fo’i China. Esaki despues ku a sali un atvertensia mundial riba posibel lechi kontaminá prosedente di China. Ministerio di Salubridat ta buskando intensivamente riba merkado di lokal na Sürnam pa presensia di kualke produkto di lechi di China. E promé ku mas outoridatnan ta poniendo atenshon riba dje ta ‘Milky Evaporated Milk’ kual China e identifiká komo un di esnan kontaminá ku “melamina”, un kímiko ku ta usa pa produkshon di plèstik. Gobièrnu di Sürnam a saka un boletin urgente ordenando pa supermerkadonan saka tur produkto di lechi di China for nan rèkinan. E problema ku lechi kontaminá na China ta konosí for di 14 di sèptèmber despues ku kuater beibi a muri i mas ku 54 mil mucha a bira malu.

WILLEMSTAD – Refineria Isla lo paga pa e trabounan pa move e estatua di Doktor Moises Frumencio da Gosta Gomez na un lugá mas prominente riba Plenchi Gomez. Awor aki e estatua ta muchu tapá tras di tènt i ramanan di mata. “Nos héroe nashonal meresé un lugá mas mihó”, asina Alex Rosaria ku a enkabesá e trabounan pa rekordá 100 aña, Doktor ta bisa. Awor ku e parti finansiero ta kla, pronto trabounan ta kuminsá pa move e estatua di mr. dr. Moises Frumencio da Costa Gomez (Dòktor) riba Plenchi Gomez.
Rosaria, ku ta sekretario di Estado pa Partido Nashonal, a entregá Teritorio Insular di Kòrsou un petishon pa move e estatua di Dòktor i pone esaki na un lugá muchu mas prominente riba Plenchi Gomez. Den e petishon a trese dilanti, ku aktualmente e estatua ta muchu skondí tras di tèntnan i ramanan di mata i ku nos héroe nashonal meresé un lugá muchu mas prominente riba e plenchi ku ta karga su nòmber. E ekipo ku ta bai ehekutá e proyekto aki ta konsistí di entre otro DROV, DOW i DMO. Banda di move e estatua, tambe lo hasi e área rondó di e estatua muchu mas atraktivo i digno. E proyekto aki ta kuadra den e plan ku a traha pa konmemorá 100 Aña Dòktor.
“Mi ta kontentu, ku porfin trabounan por kuminsá i di loke mi a mira, no solamente e estatua sino hinter e plenchi ta bai keda tremendo. Pero finalmente e importansia di e proyekto ta ku nos ta duna honor i balor na un héroe, un hòmber ku inkansablemente a lucha pa nos dignidat,” sr. Rosaria a deklará. Refinería Isla BV a pone e plaka disponibel pa e proyekto aki na Fundashon da Costa Gomez ku ta presidí pa Edsel “Papy” Jesurun. E finansiamentu di hinter e proyekto aki pues lo kore via di e Fundashon, asina Rosaria a splika.

WILLEMSTAD – CEMS ta bai splika pueblo di Bándabou kon e parti operashonal di e servisio di ambulans ta hinká den otro. E anochi di informashon ta relashoná ku reklamo di habitantenan di Bándabou relashoná ku e pòst di ambulans na Barber.
Na diferente okashon den pasado i tambe resientemente, e pòst di ambulans na Barber tabata punto di diskushon bou di habitantenan di Bándabou. Na vários okashon tabatin reklamo ku e pòst ta será i ku no tin ambulans stand-by. Pa aklará e reklamonan akí CEMS a disidí ku lo informá e habitantenan eksaktamente kon CEMS ta operá. E anochi di informashon mester trese klaridat i trankilidat bou di e habitantenan. E enkuentro ta tuma lugá mañan anochi di 7‘or pa 9‘or na Biblioteka Públiko na Barber enfrente di e pòmp di gasolin.
CEMS tabata den notisia tambe den fin di siman ora un di nan vehíkulonan a resultá envolví den un aksidente. No ta konosí kua di e partidonan tabatin falta. No mas ku siman pasá un ambulans di CEMS tabata envolví den un aksidente. Den e kaso akí tampoko ta konosí ken tabatin falta.

 

DEN HAAG / WILLEMSTAD - Ulanda ta preokupá pa e gran kantidat di arma ku Venezuela ta kumprando serka Rusia. Un portabos di minister di Relashon Eksterior di Ulanda Maxime Verhagen a bisa esaki den entrevista ku Radio Nederland Wereldomroep.
Segun e korant ulandes De Telegraaf, Ulanda entretantu a imponé un bòikòt di arma kontra Venezuela, pero e bosero di Verhagen a rechasá esaki enérgikamente.
“Pa Ulanda por hasi un kos asin’aki, mester tin un desishon di un organisashon internashonal manera Nashonnan Uní òf Union Oropeo. Un desishon asina simplemente no ta eksistí,” asina e bosero a agregá.
Segun e portabos, Verhagen a anunsiá aña pasá kaba de Tweede Kamer ku e lo wak den forma “krítiko” ora Venezuela hasi petishon nobo pa kompra di arma na Ulanda.
Banda di kompra di arma na Rusia, un otro faktor ku tambe ta hungando un papel ta e tenshon ku a krese den region di Karibe.
T’asina ku ora Venezuela hasi petishon pa kompra di arma na Ulanda, ta Ministerio di Asuntunan Ekonómiko ta esun ku ta duna pèrmit di eksportashon, miéntras ku Ministerio di Asuntunan Eksterior ta duna un konseho polítiko.
Venezuela a yega di kumpra ekipo anteriormente na Ulanda. Tabata trata aki di ekipo elektróniko di e kompania Thales pa marina venezolano.
Verhagen por sierto a enfatisá loke el a yama e bon relashon amikal ku ta eksistí entre Caracas i Den Haag.

AMSTERDAM / WILLEMSTAD - Mas o ménos dos shen hende djasabra anochi a rekòrdá pa di 16 biaha e tragedia ku a tuma lugá dia 4 di òktober 1992 ora un avion di karga di e tipo Boeing di e kompania israelí El Al a bora den e edifisionan di flèt Groeneberg I Kleine Kruitberg.
Na e okashon ei 43 persona a pèrdè nan bida, entre nan vários antiano.
Pa di promé biaha den e 16 añanan aki e konmemorashon a tuma lugá sin representashon di gobièrnu federal ulandes. E organisashon a bisa di a preferá un konmemorashon mas simpel, ménos grandi i ménos formal ku e añanan anterior.
Famianan di víktima, bisiña, invitado i otronan ku tabata interesá, a reuní djasabra atardi na e Groeiend Monument, “e palu ku a mira tur kos”, ku nan a kombertí den e monumento di konmemorashon.
Den kareda di mitar di shete, esnan presente a tene un minüt di silensio, despues di kua tabatin ponementu di krans na e monumento di konmemorashon.
Freek Ossel, wethouder di Amsterdam a tene un diskurso kòrtiku.
El a bisa djasabra último, di ke bolbe para ketu na loke el a yama e “tragedia teribel” aki.
Nos ta rekòrdá awe loke a sosodé, pero en realidat nos ta kòrda riba e víktimanan tur dia di nobo. Pone oloshi para ketu ta bira un kos difísil, ni maske kuantu gana bo tin pa hasi esei.
Nos mester sigui padilanti. Ta e ferdrit grandi aki nos ta rekòrdá awe,” Ossel a bisa.

WILLEMSTAD - Ounke e efektonan di e krísis finansiero mundial no a afektá nos ainda di tal forma ku esaki ta eksigí pa tuma medida, tin nubianan pretu si ta kologá riba nos desaroyo ekonómiko.
“Mas lihé ku nos mes ta kere, nos lo sinti ku kresementu ekonómiko ta bai baha, konsekuentemente afektando e desaroyo asina positivo ku nos a konosé último dos, tres añanan,” asina presidente direktor di Banko Sentral dr Emsley Tromp a pronostiká.
Siman pasá, Banko Sentral di Antia a duna un splikashon amplio riba e krísis ku a surgi den merkado finansiero merikano pero ku entretantu a ekspandé pa un gran parti di mundu.
LA PRENSA a informá den forma ekstenso siman pasá, kon Banko Sentral ta evaluá e situashon. Manera nos a indiká anteriormente, e krísis di krédito na Merka, te ainda no a afektá nos pais den forma grave. E punto ferfelu ta sinembargo, ku niun hende por pronostiká kon grandi e krísis aki lo bira. Banko Sentral entretantu a manda un enkuesta pa institutonan finansiero di nos pais, pa nan indiká kon nan situashon finansiero ta na e momentu aki i si nan a sinti efekto kaba di e krísis finansiero.
Presidente direktor di Banko Sentral a splika, ku orígen di e krísis finansiero a kuminsá den sektor di “real estate, pero despues a afektá tur instituto finansiero di e pais. Te ainda situashon no ta motibu pa bati alarma, Tromp a bisa.
Pero tin un menasa mas serio, el a atvertí.

WILLEMSTAD - Minister di Hustisia David Dick ta enfrentá un moshon di deskonfiansa na momentu ku parlamentu antiano reuní mañan atardi pa diskutí maneho di hustisia, ku enfoke partikular riba maneho di e mandatario pa prison Bon Futuro. Partido MAN i Forsa Kòrsou a uni forsa den e intento pa manda e mandatario kas. E moshon di deskonfiansa aki ta e último gota, paso awor si no por sigui mas den e forma aki segun e dos partidonan.
“Mester tin un hende ku ta keda finalmente responsabel pa prizòn Bon Futuro”, asina Eunice Eisden, miembro di frakshon di MAN a bisa, relashoná ku loke a sosodé último dianan den e instituto.
Algun prezu a purba hui, a gara mayoria di nan pero tin un prezu ku ainda, despues di basta siman ta fugitivo. Un kantidat di ilegal ku tabata den barak pendiente nan deportashon tambe a logra hui, miéntras ku e kaso di mas grave tabata e hecho ku deskonosínan a asesiná un prezu notorio, Cornelis Walker den prizòn sin ku por a saka’fo te ainda, ta ken ta esun òf esnan kulpabel.
Frakshon di MAN a uni forsa ku frakshon di Forsa Kòrsou pa pidi un reunion públiko di Staten pa diskutí e situashon na prizòn Bon Futuro.
Por sierto ku e dos frakshonnan aki no a keda niun tiki kontentu, ora nan a tuma nota ku a fiha e reunion pa e siman aki. Nan a konsiderá, ku e kaso tin un karakter di urgensia kuné.
“Nos ta konsiderá e situashon basta serio, p’esei nos a pidi un reunion di urgensia. Nos no a ferwagt ku e minister lo a tira e reunion asina leu, simplemente hasiendo uso di reglanan formalista di tene reunion dentro di dos siman. Pa nos e situashon ta alarmante i nos a ferwagt ku e reunion lo a tuma lugá den algun dia,” asina Eisden a bisa na e okashon ei.