WILLEMSTAD / NASHVILLE – Awe mainta preparashonnan tabata sigui pa e di dos debate entre e kandidatonan di Merka John McCain (republikano) i Barack Obama (demokrat) den loke por ta un konfrontashon desisivo pa e elekshonnan presidenshal di dia 4 di novèmber awor. Ta e penúltimo debate entre e dos kandidatonan. E próksimo i último lo ta dia 15 di òktober awor. Nos tin mas detaye riba e debate aki i e espektativanan den e sekshon internashonal di nos edishon di awe. (Foto: AP/J. David Ake).

WILLEMSTAD – “Tarifanan di Internèt por baha un tiki mas, miéntras ku ta diskutiendo riba e tarifa di telefon fiho ku segun UTS mester subi di 18 pa 30 florin pa luna”. Asina minister di Telekomunikashon Maurice Adriaens a bisa riba preguntanan durante un konferensha di prensa ayera tardi. Pa loke ta trata tarifanan di Internèt, e Minister a bisa, di ta bastante satisfecho, pero ku nos mester ta realístiko ku un kambio ta bini den fase i no por baha e tarifanan den un tiru.
Tabatin preisnan di 300 florin pa 1MB ku a baha te na 145 i awor a alkansá 99 florin. E preisnan aki lo sigui baha. Segun e minister, manera baha preis, e kantidat di kliente ta sigui subi i e kompania lo haña mas entrada. Mesun diskushon tabatin tempu a habri merkado pa selular. Tabatin 4000 hende ku un telefon selular pagando 1,20 pa minüt. Ora a habri merkado a bisa ku esaki lo ta final di e kompania i awor nos ta mira tarifanan di 40 pa 50 sèn pa minüt. E Minister ta mira e mesun desaroyo ta bai tuma lugá riba tereno di Internèt. “Nos lo mira un oumento sigur di e 10.000 abonadonan ku aktualmente ta hasi uso di broadband ku lo oumentá ku 70%, miéntras e entrada ta subi ku 7 biaha mas tantu. Meta tabata semper pa promé ku fin di otro aña e tarifa ta 60 florin, ku ta rasonabel”, asina e minister a bisa.
Pa loke ta trata telefon fiho e Minister a bisa ku djabièrnè último tabatin un buèlta di diskushon ku UTS kaminda ekspertonan di UTS huntu ku ekspertonan di Bureau Telecommunicatie a diskutí riba e motibunan ku UTS tin pa subi e tarifa. A papia henter un dia riba e materia pa wak si por haña otro. Pa e minister ta mas importante pa mas pronto posibel fiha un tarifa, pasobra di bèrdat manera e ta, ta muchu abou ya pa 20 aña. Si por yega na un bon argumentashon por aprobá e oumentu aki. Segun e minister, no por supsidiá telefon, pasobra tin pèrdida riba selular. Kada unu mester ta riba su mes. Ke men mester tin bon argumentu. Si ta usa mesun liña, mester splet e gastunan. Mester tin e tipo di diskushonnan aki pa yega na un preis hustu. Laga nos warda riba e argumentashon”, asina e minister a konkluí.

WILLEMSTAD - Djabièrnè último tabata motibu pa fiesta na edifisio prinsipal di Banco di Caribe. Nos héroe nashonal Churandy Martina a bishitá su patrosinadó nobo i a risibí un resepshon enorme serka tantu gerensia i empleadonan di banko.
“For di dia ku nos a kologá e banner grandi di Banco di Caribe riba ámbos banda di nos toren, ya kaba nos a komprometé nos mes ku Churandy. Tabata falta djis e detayenan, pa esei mester a warda e propio Churandy Martina yega Kòrsou, pues finalmente Banco di Caribe ta uni su mes na Churandy su prestigioso partnernan i esaki ta un satisfakshon enorme”, asina Jetha Römer ehekutivo di merkadeo a komentá djabièrnè último durante Churandy su bishita.
Tabata algu pasa di tres’or di atardi ku klientenan den banko a keda sorpresá pa e bishita di Churandy Martina.
Banco di Caribe a pèrkurá pa tur su empleadonan tabata uniformá den un t-shirt di e ‘di dos’ hòmber mas lihé na mundu, naturalmente tabata tin oportunidat di risibí firma i tambe saka potrèt ku e atleta.
“Nos ta komprometé ku e siguiente fase den Churandy su preparashon i entrenamentu; e meta ta London 2012. Churandy Martina ta símbolo di perseveransha, motivashon kontinuo, speransa pa futuro i ‘un soño realisá’, pues Banco di Caribe ta sinti ku nos por identifiká nos mes ku Churandy su logro i ta nos máksimo deseo pa e ta un ehèmpel pa hubentut.....di Caribe!”, asina Sr. Dito de Kort a finalisá.

WILLEMSTAD - For di 12 di sèptèmber 2008 e nòmber di Churandy Martina ta registrá na Bureau Intellectuele Eigendom (BIE).
Dor di registrashon di nòmber di e atleta tòp aki, tersera personanan no por hasi uso di su nòmber komo un marka òf di un otro manera pa promoshona un produkto òf servisio sin su pèrmit.
Nòmber di Churandy Martina no por wòrdu usá por ehèmpel pa joyas, paña, sapatu, pèchi, artíkulonan deportivo, kos di bebe, aktividatnan deportivo òf kultural sin su outorisashon.
Registrashon di nòmber di Churandy Martina na BIE ta un regalo hasi dor di bufete di abogado Van de Laarschot & Associates, abogadonan eksklusivo di NAOC pa e aña Olímpiko aki.
Durante di un sena bon presentá dor di restorant Omundo, organisá dor di NAOC djasabra último, Paul van de Laarschot, partner di e bufete di abogado, a hasi entrega di e sertifikado na Churandy Martina.

-0-0-

Riba e pòtrèt di man robes pa man drechi: Paul van de Laarschot (partner di Van de Laarschot & Associates), Junior Millerson (presidente di NAOC), Churandy Martina, Valerie P. Maria (abogado na Van de Laarschot & Associates)

WILLEMSTAD - Durante e Weganan Olímpiko, kaminda Churandy Martina a pone Kòrsou grandi grandi riba mapa mundial, klientenan di Chippie a haña e oportunidat pa manda mensahe di sosten i apoyo pa Churandy na 8585 i asina gana un ‘meet and greet’ ku Churandy Martina pa kortesia di Chippie i Bistro Le Clochard.
Chippie, komo patrosinadó eksklusivo di e atleta estelar, Churandy Martina, aparte di tur e tremendo kampañanan ku tabatin, a pone e number di mensahe 8585 disponibel durante Weganan Olímpiko, pa asina klientenan drenta den kontakto ku Churandy, mandando nan SMS di apoyo i sosten.
Dos bunita mensahe a ser skohé i e ganadónan por a ‘Meet’ i ‘Greet’ Churandy Martina pa un tremendo lùnch na e prestigioso Bistro Le Clochard aya na Riffort.
Sra. Clara Deane i sra. Xiomara Sanchez a manda bunita mensahe pa Churandy Martina i nan ta bisa lo siguiente:
Clara: ‘Churandy, Beijing ta duna bròns, plata i oro, Kòrsou ta duna bo djamanta, platina i hopi amor. Pabien i bendishon’.
Xiomara: ‘Churandy, ku oro i sin oro, bo a sa di a uni bo pueblo di dia i nochi, bo ta bal mas ku e medaya di oro’.
Sra. Deane i sra. Sanchez a pasa un mèrdia masha ameno den kompania di Churandy Martina. Nan por a hiba un kombersashon konteniendo tur tipo di tópiko ku Churandy, miéntras ku nan tabata saboriá un tremendo lùnch ku nan por a kis na Bistro Le Clochard. Despues nan por a saka pòtrèt huntu ku e atleta estelar i tuma su firma.

NASHVILLE, Tennessee, Merka, - E kandidatonan presidensial e demókrata Barack Obama i e republikano John McCain atrobe ta konfrontá otro awe nochi den nan penúltimo debate, e bia aki tipo di foro, den e lucha pa sera e trato ku votantenan indesisivo, partikularmente na estadonan klave i riku den votonan elektoral.
E evento ta tuma lugá na Belmont University na Nashville, Tennessee, i lo bai trata e krísis finansiero ku ainda no a tèrminá.
Despues ku e plan di reskate finansiero di 700.000 mion dollar a bira lei, e merkadonan finansiero di mundu kompletu ta sigui sinti e efektonan.
Na Merka e índise industrial Dow Jones a pèrdè kasi 370 punto.
E debate di awe ta tipo di foro ku algun pregunta di e públiko.
Ta suponé ku esaki lo benefisiá McCain, kende usualmente ta sinti su mes mas kómodo ku e tipo aki di foro.
Esaki ta e penúltimo oportunidat durante kua e aspirantenan lo eksponé nan mes dilanti miónes di televidente pakiko kada unu ta kapasitá pa asumí liderazgo di e pais meimei di un krísis ekonómiko ku su moveshonnan, i di e guera na Irak.
McCain ta yegando e enkuentro di awe ku vários enkuesta den su kontra, no solamente nashonal sino na estadonan klave, refleho, segun e analistanan, di e krísis finansiero i loke hopi hende ta konsiderá un pober maneho di su kampaña den e promé etapanan di e negosiashon di Kongreso ku finalmente a produsí e lei di reskate.

BOSTON – Curt Schilling ta pa regresá Boston RSox otro aña den e di dos mitar.
E picher derecho di RSox ku a realisá un operashon na su skouder dia 23 di yüni a bisa den un entrevista ku e revista The Sporting News ku e lo por bai purba pa picha na 2009 bou di bon sirkunstansianan.
“Lo mi no bai bini bèk pa un temporada kompletu. Esei mi sa. Si mi disidí di bini bèk lo mi traha pa yega einan. Pa 1 di mei lo mi laga e tim sa ku lo mi kier picha den e di dos mitar”, asina el a bisa.
“Lo mi tin di pasa luna di yüni den Liganan Menor pa trata di picha bèk. Lo mi por trata di yuda e tim yega Seri Mundial. Tur esaki ta si mi ta bon di salú i ku mi por picha manera promé ku mi operá e skouder na inisio di temporada 2007”.
Te ainda Schilling ta bisa ku retiru ta un fuerte posibilidat.
“Si mi tin di tuma un desishon awe lo mi retirá”, asina e ta bisa.
Dr. Craig Morgan ku a realisá e operashon a bisa algun ora despues di e operashon ku Schilling lo por tira un bala dentro di kuater luna i for di riba montíkulo dentro di shete luna, pues pa final di yanüari.
Schilling lo kumpli 42 aña otro luna i a firma pa solamente 2008 pa 8 mion dollar. E no a picha e temporada ku a kaba i no ta kontentu kon kosnan a bai.

NEW YORK – Ku CC Sabathia parse lo kier keda California, A.J. Burnett lo tin restu di pais pa por skohe afó.
Burnett a keda di sali for di e último dos añanan di su kontrakt i 24 mion dollar ku BJays.
Manera Sabathia, Burnett lo no kier keda henter invierno sin sa unda e lo picha na 2009.
“Si e sali for di su kontrakt lo ta un algu ku e lo no bai tuma henter invierno pa pensa ariba”, asina su agente Darek Braunecker a bisa ayera.
Yankees ku tin mester di un picher prinsipal ta kere ku Burnett ta hopi atraktivo. Mas ku Sabathia parse ku ta faboresiendo un ekipo di California kaminda el a nase.
Pues kiko Burnett ta bisa di Yankees, kontra ken e tabatin rekòrt di 3-1 ku un era di 1.64 e temporada ku a kaba.
“E lo no bai eliminá nan for di su lista di e timnan ku e ta konsiderá”, asina Braunecker a bisa di e picher di 31 aña, kende e temporada ku a kaba tabatin rekòrt di 18-10 ku un era di 4.07 i den su karera e ta di 87-76 ku un era di 3.81.

ARIES: Pordonábu bo falta i bo erornan. Disidí bo suerte eskohiendo e lokual ku ta brindabu felisidat, mas di loke bo por duna. 27,06,11.

TAURO: Bo palabra ta hopi kla i konvinsente. Ponebu den kontakto ku loke realmente ta bale la pena. Komunikábu ku Dios pa unda tin konflikto reina pas. 04,26.

GEMINIS: Habri bo mente i kurason. Resa i meditá. Habri bo wowonan, rekonosé i lo posibel pa kambia o mehorá e kaminda ku bo a faya. 17,09,04.

KANSER: Un sekreto familiar ta sali na kla. Tene hopi kuidou ku loke bo ta bisa. Ounke bo mente ta dibertibu, ta responsabel di bo parti pa pone bo trabou na marcha. 14.

LEO: Relahá bo mes, pone un toke di humor na bo bida. Pa e momentu dediká na opservá i bo por pone den práktika o siña otronan mas di loke bo a siña. 01,34,05.

VIRGO: Permití ku bo imaginashon ta bula libremente i kanalisá e energia kreativo pa medio di loke bo ta hasi. No imponé límite. 16,49,24.

LIBRA: Konsentrábu den e kosnan ku ta dunábu felisidat outéntiko i desbordá e energia positivo, pero bo dudanan di bo yalusí por hasi daño. 05,13,22.

SKORPION: No envolví bo mes den un triángulo amoroso, ya ku unda tin tres ta sobra unu. Bo ta ta apsorbá tur kos rondó di bo. 30,04,25.

SAGITARIO: Bo ta sobra energia pa logra loke bo ta deseá. Kuida bo mes di no lanta yalusí den bo pareha pa bo no hañabu sin kompania. 50,43,20.

WILLEMSTAD – “Telekomunikashon lo kuminsá selebrá dia 16 di òktober awor 100 aña di eksistensia aki na Antia. Mirando e kantidat di aktividat ku lo forma parti i konsiderando ku kada isla di Antia lo ke kontribuí den e selebrashon aki, a disidí ku e selebrashon lo ta durante un aña”, asina minister di Telekomunikashon ingeniero Maurice Adriaens a anunsiá ayera.
E mandatario a splika ku e selebrashon ta importante tambe, mirando e importansha di telekomunikashon den bida di tur hende riba e mundu aki. El a mustra ku telekomunikashon a kue un desaroyo aselerá ku introdukshon di telefon selular riba merkado lokal.
“Awendia tur hende tin selular, tin asta tin dos tres di e aparatonan aki pega na nan kurpa, sea kual sea e motibu. E ta ilustrá di tur manera kon importante esaki a bira. Tin hende ta bisabo mes ku sin nan selular, nan ta sinti nan mes inkómodo,” asina e minister a splika.
Ela bisa ku e ta antisipá e mesun desaroyo ku Internèt, partikularmente ku “broadband internet”. Internet ta desaroyando den forma inkreibel.
“Awendia bo no por imaginábu ku un mucha ta kaba skol i ta bai sigui ku su estudio avansá, anto nunka ela mishi ku un kòmpiuter. Pió ainda: pa esnan ku ta bai sigui studia na Ulanda por ehèmpel, ta masha normal ku e ta haña tur materia atraves di kòmpiuter. Ta un laptop e ta haña su dilanti i ta a base di esei e ta sigui lès,” segun minister Adriaens.

WILLEMSTAD – “Nos no a bòikòt e reunion di djabièrnè último. Nos sa ku e reunion mester tuma lugá un dia tòg. Pero ta inaseptabel ku oposishon ta kue gobernashon di e pais aki komo rehen asina tantu biaha”, asina miembro di frakshon di PAR den Konseho Insular drs. Dennis Jackson a bisa, komo reakshon riba loke a sosodé djabièrnè último.
Tal manera LA PRENSA a informá kaba, e reunion di Konseho Insular pa diskutí maneho di diputado di Struktura Estatal Zita Jesus- Leito riba e forma ku e ta atendé ku SEI no a sigui mas.
E tema sentral mester a bira loke oposishon a kalifiká komo maneho intransparente i no konfiabel di e aktual mandatario.
Partidonan di koalishon no a presentá pa firma lista di presensia, di manera ku no tabatin quorum pa e reunion sigui. Motibu direkto pa e reunion ta ekspreshonnan di e diputado, den sentido ku ámtenarnan lo no tin sufisiente kapasidat pa skibi i ehekutá e trayekto aki, ekspreshonnan pa kua partidonan di oposishon a tuma e diputado masha na malu.
Partidonan di oposishon ademas ta haña ku e trayekto no ta kanando manera mester ta. Apénas dos siman pasá, Konseho Insular tabatin un reunion públiko, kaminda a trata e trayekto SEI, pero kaminda e énfasis tabata, a lo ménos, segun oposishon e mal intenshon di Bestuurscollege di Kòrsou pa duna un solo konsultent tur trabou di SEI, pa e montante di 1.5 mion florin.
Partidonan di oposishon a presentá un moshon di deskonfiansa kontra e diputado menshoná, pero koalishon a rechasá e moshon aki ku e mayoria mínimo di 11 voto kontra i 10 voto na fabor. Segun Dennis Jackson, partidonan di koalishon no a presentá, pasobra e asuntu aki a para bira un kos ridíkulo.

WILLEMSTAD - E asosashon di hospitalidat i turismo di Kòrsou CHATA lo investigá e kaso di un trahadó di un restorant ku a haña su retiro, simplemente pasobra el a ekspresá su mes na papiamentu durante ora ku e tabata na trabou.
E kaso aki a sosodé na Kontiki Beach Resort ku ta keda pariba e hotèl Breezes i den serkania di Curacao Seaquarium.
Ta trata aki di un dama yu di Kòrsou ku a biba basta aña di Ulanda. E dama ta dominá ulandes, pero a konsiderá un kos apsurdo ku e mester papia ulandes ku su koleganan ku tambe ta yu di Kòrsou, den un establesimentu situá na Kòrsou.
Gerensia di e hotèl sinembargo ta para’riba ku el a duna instrukshon ku no ta papia papiamentu durante ora di trabou, pasobra esei lo ta ferfelu i ta molestiá e wéspetnan.
E dama tabata den su periodo di prueba na e hotèl i esei a fasilitá e gerente pa dun’é retiro inmediato.
Reportadamente no ta solamente e asuntu di papia papiamentu durante ora di trabou a hunga un ròl, pero tambe e hecho ku e dama aki aparentemente lo a fungi komo refugio pa trahadónan ku tabatin komentario i reklamo na e hotèl.
Billy Jonckheer, miembro di direktiva di CHATA a lamentá loke a sosodé. Jonckheer mes no tabata masha bon na altura di loke a sosodé komo ku el a kaba di regresá for di eksterior.
Pero hecho ta, ku di loke mi a komprondé, e kos aki no ta aseptabel, asina el a duna di konosé.

WILLEMSTAD - Miembro di parlamentu Ineke van Gent di partido GroenLinks ta haña ku a papia hopi tempu largu riba kiko mester hasi ku Refineria Isla.
“Mi ta kere ku a papia sufisiente. No por sigui papia pa semper. Si no por solushoná e problema di salú di hende, anto mester sera Refineria Isla. Nos kana a yena i nos ta haña ku no por sigui eksponé salú di hende na peliger,” asina Van Gent a deklará den entrevista ku Radio Nederland Wereldomroep.
Durante tratamentu di presupuesto di Antia i Aruba na fin di òktober awor, Van Gent lo trese e punto aki dilanti. Van Gent ademas ke pa instituí un fondo pa deporte na Antia i Aruba. El a bisa esaki, den kuadro di e hazañanan di Churandy Martina na China durante Weganan Olímpiko. Mester ta posibel pa hóbennan ku talento ta okupá nan mes den forma profeshonal ku deporte pa asina oumentá e chèns ku antianonan tambe ta logra medaya durante Weganan Olímpiko, el a bisa.
Ineke van Gent e luna aki lo mantené un weblog pa Radio Nederland Wereldomroep i den esaki e ta duna un bista tras di telon kon e tin pensá di haña aprobashon pa su ideanan den parlamentu.
Van Gent a bisa ku e ta spera di bèrdat ku a eliminá tur opstákulo pa e Konferensha di Mesa Rondó ku ta programa pa tuma lugá na desèmber awor, manera sekretario di Estado Ank Bijleveld resientemente a anunsiá. Ä bira tempu pa nos yega na palabrashonnan nobo kon ta sigui kana. Durante rekonstrukshon, tienda ta keda habrí,” asina el a bisa.

WILLEMSTAD/ AMSTERDAM - Partij van de Arbeid, PvdA a pidi atenshon di gobièrnu pa un fenómeno ku e ta konsiderá preokupante i peligroso. E partido ke pa Inspekshon di Salu hasi un investigashon di un organisashon ku ta tene asina yama “hiv healings” durante kua ta deklará pashèntnan ku a kontraé e enfermedat AIDS, ku nan lo ta kura.
PvdA a bati bèl, despues ku anteriormente gobièrnu munisipal di Amsterdam i e organisashon ku ta sali na defensa di homoseksual COC a hasi esaki.
Miembro di PvdA Khadija Arib a señalá esaki djasabra último i a anunsiá kaba ku e lo manda invitá minister di Salú Públiko Ab Klink pa e bin duna kuenta i rason den Tweede Kamer.
Meskos ku wethouder Freek Ossel di Amsterdam komo Dennis Boutkan ku ta presidente di COC, Arib ta bisa ku e tin miedu ku e situashon aki por ta un menasa pa salú públiko pasobra e organisadónan ta deklará e pashènt komo un hende ku a kura di AIDS.
Esaki por nifiká ku e pashènt no ta buska tratamentu médiko mas I ta hiba un bida seksual normal, ku tur konsekuensia ku esaki por tin pa komunidat, ela bisa.
E tratamentunan aki ta prinsipalmente konosí i popular den komunidatnan antiano, afrikano i sürnam na Ulanda.
Ariba bisa ku ta trata aki di un grupo vulnerabel, ku ya kaba tin basta difikultat pa haña akseso na kuido médiko.

 

Telefon pa Mucha i Hóben 918 den un aña a risibí 5030 yamada

WILLEMSTAD - For di yanüari 2007 e Telefon pa Mucha i Hóben 918 a wòrdu operashonalisá dor di Stichting Kinderbescherming Curaçao ku ayudo finansiero di Teritorio Insular di Kòrsou. Den aña 2007 e Telefon pa Mucha i Hóben a risibí 5030 yamada for di nos mucha i hóbennan.
E yamada pa 918 ta grátis i anónimo i e ta brinda nos mucha i hóbennan komprenshon i sosten pa ku e difikultatnan o otro asuntunan ku nan ta pasa aden diariamente. Tin un sistema di registrashon den kual entre otro ta registrá tópiko di yamada, edat di e mucha o hóben ku ta yama i sorto di yudansa manera informashon o konseho ku a duna e yamadó.
For di e sifranan akumulá durante 2007 te ku sèptèmber 2008 nos por dedusí ku nos mucha i hóbennan tin un nesesidat enorme pa informashon, konseho i guia den nan bida diario. Teniendo kuenta ku sifranan di CBS i e kantidat i kalidat di kasonan ku mensualmente ta mèldu na Stichting Kinderbescherming Curaçao, nan ta konstatá ku tin un grupo di mucha i hóben aun mas grandi, ku diariamente ta konfrontando retonan fastioso sin niun klase di sosten o konosementu di e posibilidatnan di yudansa ku nos isla tin pa brinda nan.
Pa por hasi mucha i hóben mas konsiente di e posibilidatnan aki Stichting Kinderbescherming Curaçao ta bai enkaminá un enkuesta di forma intensivo bou di nos mucha i hóbennan p’asina nan sera konosí mas ainda ku 918, Telefon pa Mucha i Hóben i ku tur posibilidat ku 918 por brinda nan na momentonan ku nan por ta sinta ku un preokupashon o problema i mester di un hende pa papia kuné i ku ta dispuesto pa skucha.

Wardakosta lo tin kòntròl severo entre Kòrsou i Boneiru

WILLEMSTAD - Wardakosta di Antia i Aruba huntu ku CITRO ta pone énfasis riba seguridat i prevenshon pa ora ta bai laman. Motibu p’esaki ta e Regatta di Boneiru kual ta tuma lugá di 5 pa 11 di òktober. Durante e dianan akí lo tin hopi boto, barku, yate, PWC (persona water craft), etcetera ta bai laman rumbo pa Boneiru pa sea partisipá o presensiá aktividatnan na Boneiru.
CITRO ku Wardakosta ta trata na yega ku mensahe di seguridat riba laman serka mas tantu hende posibel. E palabra kardinal ta PREVENSHON. Manera tur hende sa, e dicho bieu ta bisa ku “.. prevení ta mihó ku kura ..”.
Kuminsá na kuminsamentu, pues pasa na Haven Veiligheids Inspectie, ántes Havenkantoor..” asina señores Gouverneur di Wardakosta i Evertsz di CITRO ta atvertí. T’einan ta e kaminda ku ta haña informashon, yena tur papel, kumpli ku tur rekisitonan tantu di boto komo asuntunan di vaarbewijs. Na HVI ta duna lista ku rekesitonan tokante seguridat i por haña treining pa por hal vaarbewijs. Hasiendo esaki ta e kaminda pa prevenshon! Kòrda bon, ta responsabilidat di kapitan pa tur hende na bordo ta safe i pa si algu sosedé pa hasi tur posibel pa por salba nan! I si bo no ta Kapitan, pero miembro di çrew’na bordo, òf solamente invitado, tambe ta bo responsabilidat pa sòru di sa kiko tin na bordo pa por subi laman na un manera safe. Buska pa sa kiko doño di boto i/òf Kapitan tin prepará, i tira un bista riba wepsait di CITRO, http://www.citro.org kaminda tin rekomendashonnan balioso. Tin kosnan ku mester anto tin kosnan ku ta wòrdu rekomendá èkstra.

WILLEMSTAD – Pais Kòrsou, e Kòrsou ku su status Outónomo den Reino, lo no tin kastigu di morto. Asina ta para den e konsepto di konstitushon ku Gobièrnu di Kòrsou a entregá na Konseho Insular i ku lo ta punto di diskushon den Konseho Insular otro siman. Kontrali na loke hopi hende ta pensa awor aki, e Kódigo Penal di Antia ta kontené kastigu di morto, ounke no ta apliká e kastigu aki pa algun dékada kaba. Tabatin algun kaso violento i kruel kaminda parti di komunidat a pidi pa kastigu di morto, pero nos Korte no a bai tras di e petishonnan aki. E kastigu máksimo ku ta imponé awor aki na Antia ta bida largu.
Por sierto ku si imponé pena di morto mes, e pregunta ta, si esei lo pasa konsiderashon di Hoge Raad ku ta e instansia hudisial mas haltu den reino ulandes. Den Karibe tin un diskushon amplio riba e tema aki, kaminda diferente pais ke ehekutá kastigu di morto (via di pal’i horka) siendo ku Privy Council ku sede na Londen ku ta e Hoge Raad pa e paisnan di Karibe ku tin laso ku Gran Bretanja ta kontra. P’esei diferente pais a lanta nan mes Korte di Hustisia di Karibe (Caribbean Court of Justice) di kua wes Bob Wit di Antia ta forma parti aktualmente.
Segun e proposishon pa un konstitushon di kua LA PRENSA tin un kopia lo prohibí den artíkulo 96 di e konstitushon nobo ehekushon di pena di morto. Segun e splikashon, tantu nashonalmente komo internashonalmente ta konsiderá kastigu di morto “algu inhumano”, asina e splikashon ta bisa.

WILLEMSTAD – Palabranan fuerte a kai ayera ora ku a yama bonbiní na un grupo nobo di aspirant polis. Inspektornan Lint i Rommy a bisa e studiantenan nobo bon kla, ku pueblo tin hopi espektativa di su polisnan. “Si bo no por traha pa pueblo, anto no bira polis”, asina nan a yama e studiantenan bonbiní. Nan a menshoná komo ehèmpel un reklamo ku tin pa basta tempu ku ora ku polisnan ta bahando warda i tin un kaso pa atendé, ku nan no ta Sali, pasobra ta warda e otro grupo ku tin warda yega. “E mentalidat ei mester kambia”, asina nan a bisa e studiantenan polis.
Nan a bisa, ku studia pa polis ta rekerí hopi tempu i sakrifisio, tin biaha te den oranan di mardugá. Pueblo di su banda tambe ta rekerí polisnan ku ta traha na su protekshon di seguridat.
Remarkabel den e grupo nobo di polis aspirante ta e kantidat di dama ku e mèldu e biaha aki. En total 15 polis aspirante a kuminsá e formashon pa polis ayera na Landelijk Politie Opleidingsinstituut (LPO). Nan lo kuminsá ku e estudio Basis Politie Opleiding.
Despues di terminá nan estudio komo polis, e agente polisialnan aki ta destiná pa Kuerpo Polisial Kòrsou i Kuerpo Polisial Sint Maarten, Saba i Sint Eustatius. Durante un seremonia ku a tuma lugá den kantina di LPO, Hoofd Opleiding di LPO den kompania di su tim di maneho i demás kolaboradónan a risibí e 15 koleganan nobo aki.
Despues di e seremonia ku spich di Hoofd Opleiding i Chef Initiële Opleiding, a sigui introdukshon ofisial di e koleganan nobo i a sera konosí ku e otro aspirantnan den Basis Politie Opleiding, dosentenan i tur trahadó di LPO.

 

WILLEMSTAD – E elekshonnan presidenshal ku lo tuma lugá dia 4 di novèmber awor na Merka ta generando hopi interes rònt mundu i poko poko na Kòrsou tambe. Partisipashon pa promé bes den historia di un kandidato presidenshal pretu a pone ku e interes ta birando mas grandi ainda. Un i tur ta koinsidí ku aki ta trata
Un grupo di profeshonal a pone kabesnan huntu pa produsí un seri di programa na televishon dediká na e próksimo elekshonnan na Merka. Ademas ke informá pueblo di Kòrsou riba loke ta pasando den e pais tan poderoso aki ku por tin su reperkushonnan pa Kòrsou. Responsabel pa e inisiativa aki ta un tim konsistiendo di Raymond Begina, John Fayad, Mariano Heyden, Roland Ignacio, Erwin Raphaëla, Alex Rosaria i Franklin “Chebu” Sluis. Lo sigui amplia ku esfuersonan pa embolbí mas suidadano di Kòrsou, kendenan por aportá ku nan partisipashon aktivo. Ta e deseo ferviente pa logra studiantenan di Universidat Nashonal di Antia sigui e programanan na televishon òf sea bishitá e enkuentronan aki djòin ku nan opinion. Tambe e grupo di inisiativa aki ta konta ku partisipashon di lidernan prominente den nos komunidat, eksperto i spesialistanan riba áreanan manera polítika, ekonomia i finansa.
Lo trata di tur manera pa embolbí demas medionan di prensa, esta periodista i komentaristanan di radio, korant i televishon pa nan tambe tin un papel aktivo den e programa aki. Ademas lo duna tur espasio i koperashon na radio-emisoranan ku ke transmití òf kubri partinan di e programanan aki. Ya for di un prinsipio tabatin radio-emisoranan ku a dediká bastante atenshon na e tema di elekshonnan na Merka i a logra krea e interes nesesario serka e públiko di Kòrsou. Radio Direct “Jachim Pinedo”, Z’86 “Orlando Cuales” den Tertulia i Radio Hoyer atraves Etienne Rosario i Angelo Virginie, kendenan ku fervor sa komentá desaroyo di e elekshonnan aki na Merka.