ORANJESTAD- Awe merdia Corte den Prome Instancia lo trata e caso sumario cu gerencia di NV Elmar a inicia contra di e sindicato UEA, caminda lo pidi Corte pa ordena e sindicato pa elimina e blokeada cu el a pone dilanti di e edificionan di Elmar, cu no ta permiti ningun hende drenta of sali di e lugarnan aki.
Tambe gerencia lo a entrega keho contra di e sindicato pa actonan di vandalismo y sabotahe caminda Elmar lo ta desea pa Corte impone un multa contra di e sindicato si dado caso e tipo di actonan aki sigui tuma lugar.

ORANJESTAD - Ministro di Finanza y Asunto Economico ta informa cu lo tin un cambio den e prijs di productonan petrolero entrante 8 di oktober 2008.
Gasolin unleaded-premium lo costa 256,6 cent pa liter, un aumento di 9,3 cent. Gasoil LS Valero lo bira 216,7 cent pa liter cu ta un rebaho di 9,0 cent. Kerosin lo costa 224,7 cent pa liter cu ta un aumento di 2,7 cent.
E rebaho ariba tarifa di accijns pa absorba e prijsnan di benta over di e periodo di mei 2007 lo keda manteni.

Riba topico aki lo ser elabora den XV Annual Business Dinner di KvK

ORANJESTAD – E tema di cambio di clima merece haya mas atencion cu loke el a haya te awor, pa e simple motibo cu no ta algo cu ta toca otro parti di mundo so, sino nos tambe. Ora nos tende cu na diferente parti di mundo ski resortnan tin mas y mas problema cu falta di sneeuw durante temporada di invierno a consecuencia di “global warming”, esey por zona manera loque na hulandes yama un “ver van mijn bed-show”.
Ora nos tende cu e nivel di lama por bay subi considerablemente y cu esey tin
consecuencia grandi pa un pais manera Hulanda, nos por pensa cu esey ta problema di Hulanda cu parcialmente ta bao nivel di lama caba. Nan lo mester haci algo pa sobrevivi y conociendo e pueblo hulandes nan lo no keda sinta cu braza cruza tampoco.
Pero nos ta realiza acaso cu no ta na Hulanda so nivel di lama ta subi? Ki consecuencia esey por tin pa nos? Nos ta lubida talvez cu gran parti di e urbanizacion na Aruba a tuma lugar den e lugarnan mas abao, cu anteriormente tabata saliña? No ta pornada semper tin problema den cierto bario cada biaha
cu tin yobida fuerte! Si nivel di lama subi un metro, esaki lo tin consecuencia grave pa nos playanan y pa un gran parti di e zonanan urbaniza mas abao cerca di lama, di Malmok te na Sero Colorado!.
Aparte di e nivel di lama cu por bay subi drasticamente, henter mundo por bay sinti cambio di clima, cu por encera yobida excesivo den area cu no conoce esey, o al contrario secura severo den lugarnan cu yobida stabil. Aruba ta poniendo tur su fichanan riba turismo, pero con nos por ta sigur di cu nos ta bay

A priminti Afl. 105,==, pero nan ta haya mucho menos. Gobierno ta hunga triki !

ORANJESTAD - Nos tabata preocupa cu Gabinete Oduber lo bay malusa un frase cu nan a pone den protocol di indexering contra di pensionadonan. Nos a tende mucho vez di Promer Minister Oduber cu “gobernacion ta un triki”, cu “eleccion ta un cos, pero gobernacion ta otro”, “there are many ways to skin a cat”. Awe nos ta mira cu OPPA y SDA mester bay corte pa busca un derecho cu nan tin.
Tur expresionan cu Promer Minister Oduber ta haci cu orguyo con e por gara hende cara abo, pesey nos tabata preocupa cu frase cu a pone tras di e areglo cu pesiondonan den e protocol lo worde malusa. Dicho hecho, esey ta sosodiendo awe.
Mientras cu tur hende a pensa y tabata tin derecho di pensa cu 4’or di marduga despues di 7 siman di lucha y sacrificio cu gobierno no lo hunga wega cu pueblo, mucho menos cu nos pensionadonan awe ta resulta cu atrobe a demonstra e abilidad di “triki”.
Lider di AVP, mr. Mike Eman ta lamenta locual gobierno ta haciendo cu e pensionadonan. Mike Eman como lider parlamentario a tuma contacto cu OPPA pa haya sa kico exactamente ta locual ta sosediendo.
Ta resulta cu durante e siete simannan cu OPPA, conhuntamente cu e sindicatonan den accion a hiba deliberacionnan cu Gobierno pa adaptacion di salario y pensioen en conexionn cu costo di bida cu a subi barbaramente y durante siete anja no tabata tin ahustacion ni di salario ni di pensioen, OPPA ta sinti cu pensionadonan no a worde trata husto.
Gobierno a haci uso di e sistema pa calcula e pensioen y asina a resulta cu cada persona a haya un otro montante te hasta tin pensionado cu no a haya nada como indexering of a haya masha tiki mes. OPPA a protesta contra e manera con gobierno a trata su pensionadonan y a palabra un ke otro cu e otro miembronan di SDA, cu conhuntamente cu OPPA ta haciendo lo maximo pa logra pa tur pensionado haya e Af.105.- , cuminsando 1 di januari 2008. Awor nan mester hiba gobierno corte pa coregi e forma di “triki” aki cu gobierno ta aplicando.

ORANJESTAD- Servicio di Impuesto ta participa cu otro siman e ta cuminsa duna ayudo pa yena e formulario di declaracion di inkomstenbelasting 2007.
Campaña
E aña aki mescos cu e añanan anterior, Servicio di Impuesto ta organisa un campaña pa yuda tur persona cu mester di asistencia cu yenamento di e formulario di declaracion di inkomstenbelasting. E campaña aki lo cuminsa dia 13 di october proximo y lo continua te cu dia 1 di november 2008. Pa e campaña aki, Servicio di Impuesto ta invita e pensionadonan y e personanan cu no tin un entrada di mas cu Afl. 50.000,- pa aña. Si ta trata di pareha casa, e limite di entrada ta Afl. 100.000,-.
Alabes, manera custumber, e campaña no ta pa persona cu tin negoshi of cu ta traha riba su mes por ehempel: doño di taxi/tourbus, compania di construccion, restaurant/snacktruck, oficina di administracion, peluquero etc., debi cu e grupo aki tin hopi mas rekisito administrativo y fiscal pa cumpli cu ne y ta miho pa un consehero yuda e personanan aki si acaso nan mes no por yena e formulario.
Pues, e cliente cu no tin negoshi of cu no ta traha riba su mes ta bon bini durante e luna di october aki.
Servicio di Impuesto lo duna ayudo na YMCA na San Nicolas, Club Don Bosco na Noord y na su oficina principal na Camacuri (edificio D banda di local unda ta busca number di auto). Servicio di Impuesto lo duna ayudo tur dia den siman for di 8:30 mainta te cu 3:30 atardi non stop. Alabes lo duna ayudo diasabra, dia 25 di october, na YMCA San Nicolas y na Servicio di Impuesto na Camacuri y dia 1 di november 2008 na Club Don Bosco na Noord y na Servicio di Impuesto na Camacuri.

WILLEMSTAD - Medidanan pa baha gastu no a keda ehekutá, pero mas bien ta papia di ‘haalbaarheid’ di esaki den presupuesto 2009. Ku otro palabra no a ehekutá medidanan pa baha gastu, segun miembro di Konseho Insular Gregory Damoen (Forsa Kòrsou).
Pa loke ta trata asuntunan di salario i sosial di teritorio insular di Kòrsou a oumentá konsiderablemente ku 25% den último 4 aña, asina un nota di maneho di e presupuesto 2009 ta indiká. Esaki ta un oumento di 11 mion kompará ku 2008. E oumento di 25% ta okashoná prinsipalmente pa oumento di salarionan i indexering, partikularmente den sektor di enseñansa. Gobièrnu ta kere ku pa añanan benidero e por pone un paro den esaki tumando e medidanan nesesario riba tereno di struktura estatal.
Damoen ta kere den un plan, pakete di retiro boluntario kaminda ta bin ku insentivonan atraktivo. Gobièrnu mes ta pensa den retiro natural dor di penshun miéntras lo no remplasá kada persona, pero esaki no ta sufisiente pa frena e kresementu den oumento.
A reservá un suma di 287,5 mion riba presupuesto pa gastunan di personal kompará ku 276 e aña aki. Huntu ku servisionan ku tambe a subi ku 18,7 mion, esakinan ta e pòstnan di mas haltu riba presupuesto.
Mester di otro plan, mester hasi e aparato mas chikitu na un manera responsabel. Pa kuminsá mester kita esnan ku ta na kas pòrnada, servisionan uniformá ta yen di e kasonan aki.
Mester stòp di tuma amigunan polítiko i drai nan bèk…laga investigá kon leu por atendé ku esnan ku a keda tumá den servisio di un forma ilegal no por sinta man krusá asina.

BOSTON – E Meanan Kòrá di Boston den un tiru a eliminá e 100 viktorianan di Los Angeles Angels pa yega e Seri pa Titulo den Liga Amerikana.
Awor nan lo enfrentá Rays di Tampa Bay, ku tabatin e pió rekòrt di liga mayor den temporada regular, pero ku di repente a siña komportá nan mes komo veteranonan den posttemporada.
Den kuater wega so, Boston Red Sox a pone ku e shen triunfonan di Angelinos den kampaña regular no a sirbi pa mashá kos. Ora ta papia di playoff, Boston ta e tim pa derotá.
Jason Bay a slais na plato pa e kareda di triunfo, despues di un hit di Jed Lowrie, ora tabatin dos out den di nuebe inin, pa Boston, kampion defensor di Seri Mundial, superá e angelinonan 3-2 i sigurá e triunfo den e di kuater wega di e Seri di Divishon.
Red Sox ta avansá pa e Seri di Título pa di kuater biaha den seis temporada.
Boston ku a bira kampion tambe na 2004, lo tin e chèns di buska su di tres título den sinku aña, si e logra superá Rays, den un seri mihó di shete, ku ta kuminsá djabièrnè na Tampa Bay.
“Nos a kaba di derotá un ekipo fenomenal. Nos ta bai enfrentá un otro”, e manager di Boston, Terry Francona a bisa. “Lo ta emoshonante, nos ta ansioso pa hunga, pero pa awor aki nos mester di un deskanso”.
Boston tin rekòrt di 31-16 na òktober for di tempu ku Siglo 21 a kuminsá, i den e dos okashonnan ku nan a gana e Seri Mundial, nan a kuminsá playoff ku un suip riba Angels.

SANTO DOMINGO – E relevista dominikano Carlos Mármol a sufri un aksidente di outo djamars mardugá den kua no tabatin heridonan di konsiderashon, asina e hungadó mes a informá.
“Danki na Dios a protehá nos i e saku di airu ku mi ta hopi bon di salú. Solamente mi tin un hinchá chikí na mi frenta i un kòrtá, ku no mester kose”, Mármol a bisa via e-mail.
E relevista di Cubs a Repúblika Dominikano djaluna atardi 6”or for di Merka despues ku su tim a keda eliminá pa Dodgers den playoff di Liga nashonal.
E aksidente a tuma lugá dos’or di mardugá na Bonao, su pueblo natal na 70km nort di e kapital, kaminda un trùk a dal den esun ku Mármol tabata huntu ku un amigu i un primu.
“Pa prekoushon nan a hasi diferente tèst ku mi na kurpa i mi no tin niun leshon i m’a sali e mesun dia”, el a komentá.
Sin embargo, tabatin kontradikshonnan relashoná ku e heridanan ku e picher a sufri.
Segun Jose Serra, representante di Cubs na Repúblika Dominikana, Mármol a haña shete ganchu na su frenta pa sera e herida ku el a sufri.
“Nos tin notisia ku Carlos ta bon i ku el a sali bon di e aksidente, ku eksepshon di e shete ganchu ku el a haña na su frenta”, Serra a duna di konosé.
Mármol a tira 82 wega ku Cubs e temporada aki i tabatin marka di 2-4 i 2.69 di efektividat.

FILADELFIA – Charlie Manuel, a keda den dùgout, mirando e selebrashon d e título di divishon di Phillies. Ora e selebrashon di e peloteronan a bai bèk den tereno, e manager a disidí di sinta den un stul grandi di su ofisina.
Ryan Howard, Jimmy Rollins i inkluso Chase Utley, normalmente sereno, a fiesta den grandi, bañando su mes ku zjampaña i serbes dilanti e fanátikonan, ku a selebrá na òrdu den áwaseru, despues di a logra e pasashi pa e Seri di Título.
Algun di e fanátikonan ei a kuminsá grita den koro: “Charlie” na diferente okashon.
Finalmente, e fanátikonan di Phillies, difísil di komplasé, a duna un muestra di kariño na Manuel. Ounke e manager ta preferá ku su hungadónan ta haña tur mérito, el a respondé e koro ku tabata tende for di tribuna i el a sali den tereno, kaminda un gritamentu a start.
Manuel, kende no ta gusta papia den públiko, a tuma mikrofon i a primintí na e siudat aki, ansioso pa un título deportivo, ku Phillies lo tin un mihó aktuashon ku den e playoff di 2007, ora nan a ser bari pa Colorado den e Seri di Divishon.
Ta un echo ku el a superá e aktuashon ei kaba. El a superá Milwaukee den kuater wega i a pasa pa e Seri di Titulo di Liga Nashonal pa promé biaha den 15 aña.
Phillies ta enfrentá Dodgers di Los Angeles pa e pasashi pa Seri Mundial. E promé wega lo ta djaweps. E logro aki ta superá loke hopi krítiko a konsiderá ku tabata posibel ku Phillies bou di direkshon di Manuel.

NASHVILLE, Tennessee, - E krísis ekonómiko tabata e protagonista na Belmont University na Nashville (Tennessee), kaminda e dos kandidatonan pa Kas Blanku, Barack Obama i John McCain, a bolbe konfrontá otro den e di dos debate presidensial.
Apesar ku e kandidatonan tabata trata hasi chansa ku e asistentenan, e relashon entre ámbos tabata klaramente tenso i no a duna otro alivio.
Mitar di e debate a trata e krísis ekonómiko.
Tantu e demókrata Obama komo e republikano McCain a afirmá ku nan ta komprondé e “frustrashon” di e siudadanonan.
P’esei, ámbos kandidato a lansa un ‘bateria di proposishon’ pa sania e ekonomia merikano, e défisit, e desempleo i e debe nashonal di mas o ménos 10 bion dollar (7.35 bion euro).
Den e di dos atake entre e kandidatonan tabata ke fomentá spontaneidat. Sin embargo, e debate tabata un ripitishon di atakenan mutuo i di proposishonnan.
No opstante, ámbos kandidato a kontestá e 80 votantenan “indesiso” di e estado di Tennessee presente n’e lugá, kendenan a keda eligí pa e enkuestador Gallup, i nan a kontestá algun di seis mion pregunta ku e votantenan a formulá atrabes di MySpace.
E moderador Tom Brokaw a eligí e temanan pa trata inkluí no solamente ekonomia sino, ademas, temanan di polítika eksterior.
McCain a defendé su mes den ekonomia
E krísis ekonómiko ta hasiendo daño den e kampaña di McCain.

WILLEMSTAD - Federashon Biyar Kòrsou a sigui ku su aktividatnan i e evento na turno tabata bola 9 Tour no. 3. A partisipá 41 hungadó ku a duna en general bon nivel di wega.
Importante ta pa Febiko ku e torneonan individual a krese na partisipante i esaki ta un empuhe pa sigui organisá mas di e torneonan aki. Tambe ta di importansia ku vários nòmber nobo ta aparesé den e último 10 finalistanan, pues kos ta birando serio últimamente. E dos hungadónan ku a sobresalí i dominá den e promé parti di e skema den buèlta di ganadó tabata e no. 1 rankea Johnny Hellmund ku a gana respektivamente Rocherson Maria 7 pa 5, Salim Kuzi 7 pa 3 i Raymond Magdalena 7 pa 6. E otro ta William Ochoa ku a gana Nelly Zimmerman 7 pa 1, David Prins 7 pa 5, Juan van Doorn 7 pa 4 i Bryan Farah 7 pa 1. Riba su ruta pa un puesto respetá Ochoa a gana dos grandi esta Prins i Farah. Den e parti abou Bryan Landskind un di e topnan di Kòrsou ta gana Millan Capriles 7 - 0, Irving Gonzalez 7 pa 2 i Anthony Wever 7 pa 6. E no. 2 rankea Michael Arvelo ta enfrenta y gana Victor Savoie (kanades) 7 pa 5, Eugene Martis 7 pa 5 i Afmad" Steven" Ibrahim 7 pa 4.
E klèsh entre e kuaternan pa e puesto di honor a bai ku skor igual 7 pa 5, Hellmund a gana Ochoa i Arvelo a gana Landskind. Den e partido pa pasa dirèkt pa final, no ta tin kompetensha, Hellmund a demostrá klase i a gana Arvelo 8 pa 3.
Den buèlta di pèrdèdó a tèrminá empatá na puesto 9, Joshua Harkelijn, Isidro Noor, Joaquin Virginie i Raymond Magdalena. Empatá na di 7 lugá, Afmad Ibrahim i Victor Savoie. Na puesto 5, Bryan Farah i William Ochoa. Den buèlta di pèrdèdó Anthony Wever a bin duru i esei a keda demostrá den e resultadonan di su partidonan hunga. E ta gana Noor, Ibrahim i Landskind ku skor igual 6 pa 0. Lagando Landskind na puesto 4. Den e enkuentro pa mira ta ken ta bai final Michael Arvelo ta duna tur ku e tin pa para e racha di Anthony Wever i ta gan’é 8 pa 2, lagando e na puesto tres.

ARIES: Bo ta hopi sigur di loke bo ta hasi i bisa. Bo palabra tin poder i ta yega na orea di otronan ku tin interes. Bo ta risibí muestra di agradesimentu. 13,01,49.

TAURO: Ta tempu di praktiká pasenshi, ya ku bo ta hopi eksigente hasta pa ku bo mes. Abo nunka sa loke bo ta deseá. Mantené bo via di komunikashon habrí. 09,11,15.

GEMINIS: Ta tempu di dera e pasado huntu ku tur lo negativo ku por pasa ku bo i kuminsá di nobo ku tur loke ya bo a ponébu pa hasi. 12,08,19.

KANSER: Kuida bo finansa, trabou i plaka. Ser mas konsiente di bo gastunan i evitá komplikashonnan di futuro. Pone di akuerdo ku bo pareha o sosio promé di invertí. 37,15.

LEO: Eksaltá bo bon kalidatnan dunando lo mihó di bo. Pone atenshon, pone bo pia firme, ya ku bo ta algu pèrdí i soñadó. Fomentá union entre bo sernan kerí. 09,33,21.

VIRGO: Konseho pa bo awe ta, pa bai ku kuidou ku personanan ku ta primintí hopi. No depositá bo konfiansa den esun ku no ta meresé. 31.45.02.

LIBRA: Suerte ta di bo parti awe i tur kos ta bira mas fásil di realisá. Aseptá ayudo i tur kos lo ta mas dibertido. Bo tin e habilidat awe pa hasi kambionan. 08,10,04.

SKORPION: Biba e bida plenamente sin kompleho ni miedu ku ta limitábu. Mudansa, biahe, kambionan, ta impliká movimentunan den bo bida. 23,14,50.

SAGITARIO: Tene fe, habri milagernan i bo ta mira bo soñonan bira realidat. Bo sensibilidat ta hasi músika i bo bon lektura ainda mas. 20,16,07.

WILLEMSTAD - Minister di Hustisia David Dick a bolbe haña un oportunidat pa sigui traha. E mandatario, ayera a sobreviví un moshon di deskonfiansa den parlamentu antiano. Staten a rechasá e moshon ku 11 voto kontra i 5 voto na fabor, votonan di Eunice Eisden, Rignaal Fransisca, Dwigno Puriel, Glenn Camelia i Nelson Navarro. Di e forma aki a yega un fin tambe na e reunion pa diskutí maneho di hustisia, ku enfoke partikular riba maneho di e mandatario pa prizòn Bon Futuro. Partido MAN i Forsa Kòrsou a uni forsa den e intento pa manda e mandatario kas, intento sinembargo ku no a prosperá.
Tantu Nelson Navarro di Forsa Kòrsou komo Eunice Eisden di MAN tabata fuerte den nan disertashon ayera den parlamentu.
Tur dos a kuestioná severamente e insidentenan ku a tuma lugá último tempu den prizòn Bon Futuro.
Algun prezu a purba hui, a gara mayoria di nan, pero tin un prezu, Jair Leutheria ku ainda, despues di basta siman ta fugitivo. Un kantidat di ilegal ku tabata den barak pendiente nan deportashon tambe a logra hui, miéntras ku e kaso di mas grave tabata e hecho ku deskonosínan a asesiná un prezu notorio, Cornelis Walker den prizòn sin ku por a sak’afó te ainda, ta ken ta esun òf esnan kulpabel.
Navarro a mustra ku su frakshon ta konsiente ku e kartera di hustisia ta un kartera difísil. Nos ta konsiente tambe ku tin hopi problema pa solushoná den e kadena hudisial.
“P’esei nos a bisa anteriormente ku nos ta duna e minister benefisio di duda. Nos a dun’é chèns pa bin ku un maneho ku ta garantisá mas siguridat en general den nos pais, tantu siguridat den komunidat komo siguridat den prizòn mes.

WILLEMSTAD - Baha un minister di Hustisia, pasobra tin problema den prizòn, no tin niun sentido.
“Si nos subi e kaminda di kore ku un minister di hustisia, ki ora ku tin problema den prizòn, anto nos mester pone un mandatario disponibel pa kada luna, o sea ku nos mester di 12 minister di Hustisia pa aña. E kos aki no tin niun sentido,” asina Marlon Jamaloodin, miembro di frakshon di PAR den parlamentu antiano a bisa, durante e reunion di parlamentu ayera pa trata maneho di minister David Dick pa prizòn Bon Futuro.
Ta konosí, ku e problemanan di prizòn Bon Futuro no ta data di awe. E kaso di tiroteo ku konsekuensia fatal den prizòn no ta e promé, pero di 5 kaso di e índole aki.
Kasonan di huida tambe a tuma lugá na diferente okashon den pasado. Mester bisa ku e situashon aki ta bai bèk vários aña, inkluso for di tempu ku e aktual presidente di Staten Pedro Atacho tabata minister di Hustisia. Atacho asta a pone su kartera na disposishon di partido, mirando e situashon ku tabata parse sin salida e momentu ei.
Jamaloodin a aksentuá e situashon difísil ku un minister di Hustisia ta haña aden, ku e situashon na Bon Futuro.
Jamaloodin asta a puntra minister Dick durante e reunion di ayera si tin sentido pa sigui invertí den e prizòn.
Mirando e struktura eksistente, mirando e problemanan físiko ku e edifisio ta konfrontando, ta surgi e pregunta si ta bale la pena pa sigui invertí, segun Jamaloodin. Jamaloodin a indiká klaramente ku e ta kere ku ta mihó yega na konstrukshon di un prizòn nobo.

WILLEMSTAD - Loke koalishon mester hasi, ta asumí su responsabilidat pa gobernashon di e pais aki. No ta pòrnada ta paga kada miembro di Konseho Insular 8 mil florin pa luna, ta pa e hasi su trabou.
Esei ta punto di bista di lider di frakshon di partido MAN den Konseho Insular ingeniero Charles Cooper.
Cooper a duna su komentario relashoná ku e reunion di Konseho Insular siman pasá djabièrnè ku no a sigui. E reunion di Konseho Insular pa diskutí maneho di diputado di Struktura Estatal Zita Jesus-Leito riba e forma ku e ta atendé ku SEI no a sigui mas.
E tema sentral mester a bira loke oposishon a kalifiká komo maneho intransparente i no konfiabel di e aktual mandatario.
Partidonan di koalishon no a presentá pa firma lista di presensia, di manera ku no tabatin quorum pa e reunion sigui.
Segun Dennis Jackson, partidonan di koalishon no a presentá, pasobra e asuntu aki a para bira un kos ridíkulo.
“Oposishon a pidi un reunion apénas un siman promé, pa diskutí maneho di SEI den kua diputado Zita Jesus-Leito tabata sentral.
Oposishon a presentá un moshon ku koalishon a rechasá. Apénas un siman despues ta bolbe pidi un reunion ku e mesun tema. Laga nos ta serio si den gobernashon,” Jackson a bisa. Segun e lider di frakshon di PAR den Konseho Insular, ta bisto ku partidonan di oposishon ke bòikòt gobernashon di pais.
Charles Cooper sinembargo ta di otro opinion. El a bisa ku koalishon a keda sin presentá, dunando muestra kon iresponsabel nan por ta.

WILLEMSTAD - Loke koalishon mester hasi, ta asumí su responsabilidat pa gobernashon di e pais aki. No ta pòrnada ta paga kada miembro di Konseho Insular 8 mil florin pa luna, ta pa e hasi su trabou.
Esei ta punto di bista di lider di frakshon di partido MAN den Konseho Insular ingeniero Charles Cooper.
Cooper a duna su komentario relashoná ku e reunion di Konseho Insular siman pasá djabièrnè ku no a sigui. E reunion di Konseho Insular pa diskutí maneho di diputado di Struktura Estatal Zita Jesus-Leito riba e forma ku e ta atendé ku SEI no a sigui mas.
E tema sentral mester a bira loke oposishon a kalifiká komo maneho intransparente i no konfiabel di e aktual mandatario.
Partidonan di koalishon no a presentá pa firma lista di presensia, di manera ku no tabatin quorum pa e reunion sigui.
Segun Dennis Jackson, partidonan di koalishon no a presentá, pasobra e asuntu aki a para bira un kos ridíkulo.
“Oposishon a pidi un reunion apénas un siman promé, pa diskutí maneho di SEI den kua diputado Zita Jesus-Leito tabata sentral.
Oposishon a presentá un moshon ku koalishon a rechasá. Apénas un siman despues ta bolbe pidi un reunion ku e mesun tema. Laga nos ta serio si den gobernashon,” Jackson a bisa. Segun e lider di frakshon di PAR den Konseho Insular, ta bisto ku partidonan di oposishon ke bòikòt gobernashon di pais.
Charles Cooper sinembargo ta di otro opinion. El a bisa ku koalishon a keda sin presentá, dunando muestra kon iresponsabel nan por ta.

WILLEMSTAD - Sin intervenshon di ni un solo miembro di parlamentu, Staten ayera, ku un kambio den Kódigo Penal di Antia, a aprobá e proposishon di lei ku pa kombatí e fenómeno pornografia di mucha den un reunion públiko.
Frakshon di PAR, partikularmente minister di Enseñansa, Omayra Leeflang, semper tabata na fabor di e legislashon nesesario pa bringa e fenómeno aki i for di aña 2004 a entregá e proposishon di kambio al respekto. Leeflang ta kere, ku tur mucha te ku 18 aña tin derechi riba e pida protekshon aki. Ta trata di un proposishon di lei ku tabata den preparashon pa algun tempu kaba.
Jacqueline Spencer di frakshon di PAR a rekonosé ku mester pone un fin na e situashon kaminda e tipo di kosnan aki ta sigui tuma lugá sin ku por tuma niun akshon kontra nan. El a anunsiá tratamentu di e lei aki den Staten for di promé ku parlamentu a bai ku resès na yüli último.
E lei ta papia di un kastigu pa esun ku hasi su mes kulpabel na poseé, manehá, baha for di Internèt òf distribuí material pornográfiko i e ta papia tambe di un periodo di 4 aña di prizòn máksimo. Anteriormente esaki no tabata kastigabel pa lei. Pa esun ku tuma esaki hasi komo kustumber, tin asta un kastigu di prizòn di 6 aña maksimal òf un but di 100 mil florin.
E lei ademas ta proponé un ampliashon di medida kontra aktonan inmoral ku mucha. Awor aki tin un kastigu di 8 aña di prizòn kontra esaki.

BERLIN – Samuel Peter a kita e faha di Konseho Mundial di Bòkseo for di man di Vitali Klitschko i a sali na kareda for di esenario, djaluna, durante un konferensha di prensa pa promové e pelea entre nan dos pa e título peso pisá.
E dos bòksdónan – konsiderá kampion pa CMB – tabata posa promé ku e pelea, mirando otr di un forma desafiante i tur dos ku e faha tené. Peter, riba indikashon di su treiner Stacy McKinley, a kita e faha despues for di Klitschk, kende a keda boka habri.
“Loke ta pasa aki ta un show”, Klitschko a bisa, kende ta enfrentá Peter djasabra, den 02 World Arena di e kapital aleman. “E pelea di bèrdat lo ta den rin”.
E nigeriano Peter tabata supuestamente molestiá pa e echo di ku bon parti di e konferensha a tuma lugá na aleman. Klitschko ta ukraniano i e ta papia e idioma ei bon. Peter a kontestá e poko preguntanan ku nan a hasié na ingles, den su idioma natal nigeriano.
Dino Duva, e promotor merikano di Peter, a ekspresá su desgustu.
“Mi ta poko molestiá ku tur hende ta papia na aleman”, Duva a bisa. “Mi no kier a bringa na Alemania. Pero e kadena aleman RTL a paga e kantidat di plaka mas haltu i p’esei nos ta aki”.
Klitschko ku 35-2 ku 34 nòkout tabata for di rin for di 2004, ora el a gana den ocho rònt di Danny Williams. E ukraniano di 37 aña a pèrdè e título di CMB na 2005, despues ku el a renunsiá un pelea, ora el a kibra un múskulo na su rudia drechi.

WILLEMSTAD/ DEN HAAG – E siman akí a kuminsá na Ulanda un kampaña pa atvertí outomobilistanan riba e riesgo di manehá un vehíkulo bou di influensia di remedi. Pa motibu ku tur aña tin desena di morto den tráfiko dor di uso di remedi, e ministerio di Verkeer en Waterstaat a introdusí e kampaña.
Segun e ministerio, hopi outomobilista sa ku ta peligroso pa manehá un vehíkulo bou di influensia di remedi, pero tòg ta hasié. Na ofisinanan di dòkter i na botikanan tin foyetonan disponibel ku den futuro mester trese kambio den e aktitut peligroso akí. Tambe ta informá outomobilistanan via di poster, aviso i propaganda na radio emisoranan tokante e peliger di remedi den tráfiko.
Diferente investigashon a indiká, ku na Ulanda mil herido grave i desena di morto ta kai dor ku outomobilistanan a usa remedi. Espesialmente remedinan pa drumi, kalmante i remedinan kontra depresividat ta kondusí na un oumento di riesgo pa aksidentenan di tráfiko. Di kada dies outomobilista, unu ta bou di influensia di remedi segun e ministerio di Verkeer en Waterstaat.
E kampaña ta un inisiativa di e ministerio menshoná konhunto ku esun di Salubridat, Bienestar i deporte i e Instituto Ulandes pa uso responsabel di remedi (DGV). Banda di dòkternan di kas i botikarionan ta partisipá tambe e Centraal Bureau Rijbewijzen (CBR), Veilig Verkeer Nederland i ANWB.

WILLEMSTAD – Ministerio Públiko a anunsiá ayera ku entrante dia 15 di òktober próksimo ta kuminsá kontrolá vehíkulonan ku glas di plak. Sinembargo O.M. no a stipulá e fecha akí konhuntamente ku polis.
Polis no por a duna masha informashon awe tokante di e kòntròlnan pasó ta ayera nan mes a haña e informashon for di O.M. E fecha tabata stipulá dor di O.M. mes i esaki a pone ku polis no tabatin kontesta awe pa prensa. Awe mainta e departamentu di komunikashon tabatin nan man yen ku yamadanan di medionan di komunikashon relashoná ku e kòntròlnan. Polis no por a duna ningun detaye ya komo ku no tabatin nada konkreto prepará.
Entrante dia 15 awor tur outomobilista mester tene kuenta ku nan por haña nan den un kòntròl. Polis lo kontrolá si e glasnan dilanti di plak ta laga 70% di lus penetrá. Esaki ta nifiká ku e felm di protekshon ta pèrmití pa wanta solamente 30% di lus di dia. Ta bin aserka ku no ta pèrmití pa plak na e winshil. Ta pèrmití pa plak e glasnan di patras 100%.