ORANJESTAD- Ayera tardi a tuma lugar e caso sumario cu gerencia di NV Elmar a entabla contra di e sindicato UEA y e accionnan cu esaki ta hibando, cu según gerencia, ta perjudicando e compania di duna e servicio cu e tin cu duna.
Huez a pone ambos partido sinta un rato na mesa y discuti riba varios punto y caminda riba varios di e puntonan di discusion, a yega na un acuerdo mientras cu pa loke ta e otro puntonnan riba cual ainda no tin acuerdo, Huez a ordena ambos partido pa sinta na mesa c’un mediador, loke anteriormente UEA no kier a haci.
Tambe Huez a ordena e sindicato pa elimina tur blokeo cu tin di facilidadnan di NV Elmar loke tambe a tuma lugar mientras cu tur cos ta indica cu e caso di ayera lo kibra e impasse cu tin y cu e dos partidonan lo sinta pa yega na un acuerdo riba un contrato colectivo nobo.
SABOTAHE
Na mes momento den oranan di ayera mainta, a drenta noticia cu antisocialnan a zaag un palo di luz den Parke Arikok, cu consecuencia cu coriente a cai afor pa un parti di Santa Cruz.
E palo a wordo corta c’un machi grandi di zaag y cu a pone cu e palo a kentel y kibra bin abou, kibrando kabelnan di coriente y strobando asina e suministro di coriente den vecindario.
No por bisa cu e ta esnan den accion a haci esaki y a cu e lider sindicato Coby Geerman, a sigura na comienzo di siman cu e sindicato no ta meti den ningun accion di sabotahe.

ORANJESTAD- Politiconan di AVP y MEP ta mescos, nan ta zorg pa jena saco di nan mes. Ta increibel con hambra pa placa e politiconan di AVP y MEP ta. Na 2000 Gabinete Eman a tuma e decision di hisa e salario di minister y parlamentarionan. A disidi cu e lo ta acopla na e salario di schaal 16 plus 25%.
Asina Gabinete Eman a sigui cu e ‘lusten’ di Rapport Fowler pero no e ‘lasten’. Gabinete Eman a aproba dia 11 di augustus 2000 pa fix e salario di minister y parlamentarionan, pero e no a reglamenta formalmente esnan den schaal 16.
Na 2003 Gabinete Oduber a formaliza pa 4 topambtenaar cu nan pensioen ta basa riba e salario cu ta inclui esun di schaal 16 plus e maldito 25% di toelage cu nan ta goza di dje. E aumento drastico aki di e areglo di pensioen di algun hende jega na Gabinete Oduber a keda publica dia 23 di oktober 2003.
E ley aki ta conta solamente pa algun privilegiado escogi, esnan cu bandona servicio di gobierno cu pensioen entre october 2003 y december 2004. Nan pensioen a bira hopi mas halto cu e maximo pensioen di un ambtenaar den schaal 16. E ley aki a drenta na vigor contra conseho di Raad van Advies, cu a jama e ley aki discriminatorio.
Dia 30 di juni ultimo a keda publica un ley nobo pa complace otro grupito di funcionarionan halto di schaal 16 cu a baha cu pensioen entre 1 januari 2005 y 1 februari 2008. Pa nan ta conta tambe un pensioen gordo basa riba salario di schaal 16 plus e maldito 25% di toelage.
Di nobo a pasa e ley aki contra conseho di Raad van Advies. Atrobe Raad van Advies ta yama e ley aki discriminatorio, pasobra e ta fix e pensioen pa un grupito chikito di ambtenaar y ta lubida esnan di schaal 16 cu a baha cu pensioen prome cu 12 april 2000. RvA ta urgi gobierno pa bai CCGOA, pero esaki no a tuma lugar. Gobierno ta viola atrobe articulo 101 di LMA.

ORANJESTAD – Reunionnan recien, organisa door di Aruba Hotel and Tourism Association (AHATA), como tambe teni separadamente entre gerentenan general, e hunta di directiva di AHATA board y cu participacion di e miembrecia general na un asamblea general extraordinario, a yuda informa y fortifica esfuerso den un clima di cambio unda desaroyonan economico ta tuma lugar rapidamente. Accionnan recien ta inclui un reaccion rapido di parti di AHATA aumentando esfuersonan di mercadeo cu $1M den propagandanan regional na merca e winter benidero aki.
“Nos ta prepara pa un caida, mientras ta keda proactivo den traha di cerca cu Aruba Tourism Authority como tambe miembronan di AHATA den tuma decisionnan empresarial clave,” asina a splica AHATA su Presidente y CEO Rob Smith.
“Nos ta dependiente di e economia di merca, asina ta cu nos tin cierto realidadnan cu nos no por evita pero nos ta tuma accion pa aumenta nos esfuersonan di mercadeo.
Contrario cu otro destinacionnan den nos region cu a baha nan prijs, nos ta mantene integridad di nos producto pa asina nos por exitosamente traspasa e flunctuacion di mercado manera nos a haci den pasado caba.”
Manteniendo Aruba visible y accessible ta keda nos prioridad principal, utilasando un mescla creativo di mercadeo y cu esfuerso pa manten airlift. AHATA ta sigui boga pa e idea di un destination marketing fund, cual lo ta sostenibel y lo libera cash flow pa segura promocion continuo sin interupcion di Aruba den un mercado cu ta birando mas competitivo.
AHATA ya caba a aproba pa indjecta 1 miyon dollar adicional den mercadeo na Merca, como tambe un $150,000 mas pa e mercado Europeo.

ORANJESTAD- Na October 2009 parokia La Birgen di Fatima lo cumpli 50 Aña di existencia. Lo conmemora e hubileo aki durante un aña largo, for di oktober 2008 te oktober 2009. E conmemoracion lo ta den e lus di “Renobacion di Fe”.
Tur parokiano y amigo di nos parokia y tur catolico en general ta invita pa tuma parti na e celebracionnan durante henter e aña di hubileo. Tur esnan cu ta activo den bida di iglesia, tin un mision pa reactiva esnan cu pa un motibo of otro ta of a bira parokianonan inactivo.
E intencion ta pa durante ful un aña tur parokiano y amigonan di nos parokia sinti nan mes envolvi pa hunto nos renoba nos fe den Señor.
Pa celebra e aña di hubileo a lanta diferente comision. Cada comision ta encarga pa organisa actividadnan durante e aña. A habri e aña di Hubileo di Oro di parokia Birgen di Fatima cu un nobena cu lo culmina dia 13 di oktober den celebracion di fiesta di Birgen di Fatima patrono di misa di Dakota.
Ta logico cu durante e aña en kestion parokianonan lo demonstra nan amor pa Mama Maria. Pastoor Szpila a bendiciona e imagen di Birgen Peregrino cu lo bishita casnan di e parokianonan y nan famia. E actividad aki lo tin un duracion indefini y lo no termina ora e aña di hubileo yega na su fin.
Otro actividadnan lo ta riba tereno liturgico, cultural y deportivo. Actualmente e comisionnan ta den proceso di compila un calendario di actividadnan pa ful e aña di hubileo.
Ta spera cu e aña di hubileo di Misa Fatima lo trece gracia pa e parokia y lo yuda trece e famia grandi di e parokia hunto pa nos renoba nos fe den Señor, pa medio di Mama Maria.

ORANJESTAD- Diahuebs atardi, 2 di october 2008, a tuma lugar den Centro Deportivo Libertador Betico Croes, na Santa Cruz, e gran final di trefbal escolar categoria A y B mucha muher, organisa pa IDEFRE.
Despues cu scolnan a bataya contra otro, tanto den nan respectivo sectornan, ganadornan di cada sector a pasa pa e buelta final pa hunga pa campeon nacional di trefbal escolar.
Cada scol riba nan mes a haci un tremendo trabao, a hunga bon y e apoyo tambe di cada scol tabata tremendo.
Categoria A
Semi Final
E semi final den categoria A Sint Dominicus College a hunga contra Colegio Sagrado Curazon y Colegio Felipe B. Tromp contra Colegio Laura Wernet Paskel.
E muchanan di Colegio Sagrado Curazon a bin determina y no a duna e muchanan di Sint Dominicus un chance pa “hala rosea” y tabata pone presion constante den e wega aki.
Colegio Sagrado Curazon a sa di gana e prome set cu score di 7-0, y haci esaki tambe den di dos set y a gana cu score final di 14-0.
Di dos wega di semi final tabata entre e muchanan di Colegio Felipe B. Tromp y Colegio Laura Wernet Paskel.
Den prome set, e wega aki tabata estilo di “toma y dame” ambos ekipo a ataka otro bastante fuerte. Na final di prome set Colegio Laura Wernet Paskel a sali vencedor cu score di 6-4.
Den di dos set, Colegio Laura Wernet Paskel a hala faha mara y a ataka fuerte, caminda cu Colegio Felipe B. Tromp no tabata tin contesta.
E set a termina 8-0 na fabor di Laura Wernet Paskel cu a gana e wega aki cu score final di 14-4.
Final categoria A

ORANJESTAD- Dia 30 di september ultimo Diana Carolina Salcedo a ricibi su titulo di Master (LL.M) den Psychologia for di Universidad di Leiden. E comite di examen a felicitele cu su graduacion Cum Laude y a dirigi palabranan di elogio pa su dedicacion y perseverancia.
Diana ta ricibi su bul for di man di Mw. Dr. E.H.M. Eurelings-Bontekoe.
Diana cu su mayornan.
Despues di e parti oficial Diana hunto cu su mayornan, ruman, demas famia y invititadonan a celebra su logro den forma tradicional. Diana ta un ex-alumno di Colegio Arubano.
Su famia na Aruba tambe ta masha orguyoso cu Diana su logro y ta dese'e hopi exito den su carera.

WILLEMSTAD -- Despues ku nos selekshon U-20 di futbòl a gana su pasashi pa e siguiente buèlta den e trayekto pa yega Mundial 2009, e fin di siman aki nos ta den e di buèlta, kaminda nos selekshon mester bai enfrentá St. Kitts-Nevis i St. Vincent, aki den Stadion Ergilio Hato.
Ronnie Trouwloon, DT di nos selekshon, a mustra hopi konfiá i sigur di su muchanan, despues ku nan a hiba algun dia di práktika. Segun Ronnie nan no tabatin muchu tempu pa entrená, pasobra algun hungadó tin kompromiso ku nan ekipo den e fase di playoff di Divishon Amatùr i algun tabatin ku partisipá den e Torneo kalentamentu di Undeba, Kopa Polar. Pero e siman aki sí a logra haña tur hungadó i a probechá ku tin fakansi awor aki pa entrená mainta i atardi. Awaseru a kai poko, pero no a stroba e entrenamentunan dje selekshon. Segun Ronnie e no konosé e dos selekshonnan ku nos ta bai enfrentá, pero di loke el a tende dje hungadónan mes, tempu nan a enfrentá nan algun aña pasá den U-17 o U-15 nan ta na mas o ménos mesun nivel ku nos. Aktualmente nos ta pendiente pa algun refuerso fo’i Ulanda i esei ta den man di NAVU, segun Ronnie Trouwloon, pero di loke el a tende no ta tur hungadó por yega e siman aki, spesialmente esnan ku ta den ‘Beloofte selectie’ di Ulanda, manera John Bacuna i Igmar Jantjie. Tin otronan ku tambe ta den tapara, manera Gersinho Constancia, Shannon Carmelia, Martina i Maria, tambe tin un kiper Leito.
Nos selekshon

 WILLEMSTAD – Manera ya ta konosí e picher yu di Kòrsou, Juancarlos Sulbaran luna pasá a firma ku e ekipo profeshonal, Cincinnati Reds. Dia di e firmamentu a keda anunsiá tambe ku e hóben prospekto aki lo tin ku biaha pa Merka pa einan bai Instructional League. Huntu kuné tambe ta den kampamentu di Reds e shortstop yu di Kòrsou Mariekshon Gregorius, yu di Didi Gregorius, picher estelar di nos selekshon nashonal.
Instructional League ta un práktika un poko mas organisá na kampo di entrenamentu di Cincinnati Reds na Sarasota. Riba invitashon di e ekipo, algun hungadó ta bin tuma instrukshon serka coachnan di e ekipo. Ta hunga algun wega di práktika i tin biaha coachnan ta laga hungadónan establesé praktiká otro posishon. Aktualmente ta na Sarasota un total di alrededor di 20 picher, entre kual Juancarlos Sulbaran. Na total por tin un 50 hungadó entre nan tambe Yonder Alonso kende tabata Reds su promé ekskohensia e aña aki i nan ta spera hopi di dje.
LA PRENSA tabatin kontakto ku tata di JC Sulbaran, Jorge Sulbaran kende a bisa nos, ku tur kos ta bayendo bon ku su yu na Sarasota. “Siman pasá djabièrnè el a hasi su debut den unifòrm di Cincinnati, trahando dos inning fuerte. Apesar di a pèrmití un hit, JC a demostrá ku e por dominá na e nivel aki tambe. E úniko hit tabata di un batidó di Liga Grandi ku ta den Insrtructional League pa rehabilitá. Despues ku e batidó a foul basta lansamentu, finalmente el a haña un kambio riba skina afó pa bati hit. Esei tabata tur kos tambe ku JC a pèrmití kontra di e ekipo di Twins,” asina Jorge Sulbaran a bisa.

WILLEMSTAD – Djadumingu último e klup di baiskel ‘SMS Endurance Team’ a organisá su di sinku Kids Mountain Bike Race. E kompetensia a wòrdu di spònser pa Fedaral Management System Security N.V. i a tuma lugá na e dushi i tan bunita naturalesa di Sta. Catharina/Koraal Tabak i besindario. E kompetensia a konsistí di diferente kategoria entre 6–17 aña di edat.
Tabatin seis diferente kategoria tantu maskulino i femenino repartí di e siguiente forma; 6–7 / 8–9 / 10–11 / 12–13/ 14-15 i 16-17 aña.
E resultadonan di e kompetensia tabata lo siguiente:
Mucha hòmber 6/7 aña:
1. Rosalina, Chris Angel, SMS 12.24.93
2. Watkis Niels, Wanna 12.24.94
3. Evers, Ole, Wanna 12.36.38
Mucha muhe 6/7 aña:
1. Heyliger, Quiomy, SXC 13.12.80
2. van der Woude, Anne , Loko 13.28.18
3. Melkman, Linde, TEC 15.10.23
Mucha hòmber 8/9 aña:
1. Manuela, Diego, SMS 21.27
2. Petrona, Millard, SMS 21.36
3. Leonora, Ronald, SXC 22.45
Mucha muhé 8/9 aña:
1. Heyliger, Quiona, SXC 27.14
2. Minguel, Shena, SMS 29.55
3. Mercelina, Pamela, SMS 32.51
Mucha hòmber 10/11 aña:
1. Smit, Huib, TEC 31.02
2. Helmijr, Brandon, SXC 32.06
3. Pietersz, Keenan, SMS, 33.00
Mucha muhé 10/11 aña:
1. Quammie, Charlienne, SXC, 31.05
2. Rave, Charlotte, - 37.29
3. van der Woude, Kristie, LOKO 39.54

ARIES: Bo ta enfrentá situashonnan difísil, pero no imposibel di resolvé. Evitá di imponé bo kriterio. Bo opinion lo ser respetá. 30,17,12.

TAURO: Bo tin e bista bon pa eksplorá, inventá i krea. Sali i buska un trabou nobo i kuminsá kambia loke no ta agradábu. Kuminsá realisá kambionan. 12,50,03.

GEMINIS: No keda ketu di lokual por perhudikábu den bo bida. Tuma bo tempu pa skohe bon. E persona ku ta aparentá dushi hende, ta solamente pa probechá di bo. 15.

KANSER: Bo energia mental ta manifestá i bo kreatividat no tin límite. Purba e suerte i hinka bo mes den aventuranan. Bon dia pa pone proyektonan ku bo tin pendiente kana. 3.

LEO: Bo ta vense retonan i bo ta gana batayanan grandi den e área di bo trabou o profeshon. Buska pa drecha bo situashon finansiero na un manera responsabel. 06,31.

VIRGO: No mancha ku energia negativo e puresa di bo pensamentu, soño i deseonan. Pensa bon kiko bo ke i kiko bo ta bai hasi. 24,13,10.

LIBRA: Saturá di bo pensamentunan positivo. Tuma bo tempu di pone na marcha resolushonnan ku bo mes ta hasiendo pa algun tempu kaba. 35,18,02.

SKORPION: No eksigí tantu den asuntu di amor. Bo ta realisá pronto ku bo tabata biba den un mundu chikitu ku bo mes a krea. Laga pasado bai i habri kaminda pa futuro.

SAGITARIO: Bo ta kontinuá kresiendo den eksperensia i sabiduria. Disfrutá di e lokual bo a lucha pe. Periodo nobo ku bo a deseá asina tantu. 11,32,15.

WILLEMSTAD - No opstante tur kos, no opstante ku promé minister di Antia Emily de Jongh-Elhage ta bisa ku e tin un palabrashon ku minister Ella Vogelaar, su ministerio a anunsiá awe den un komunikado ofisial ku ta sigui ku preparashon pa introdusí e areglo di VIA, Verwijsindex Antillianen.
E kos aki no por ta bèrdat, pasobra ami tin un palabrashon ku Vogelaar, asina promé minister De Jongh-Elhage a bisa den su promé reakshon.
E areglo di VIA, manera ta konosí, ta e areglo kaminda gobièrnu ulandes ta registrá hóbennan antiano te ku 24 aña di edat ku ta kousa molèster den komunidat ulandes. Tambe ta registrá hóbennan ku a disidí ku nan no ta bai skol mas.
Gobièrnu ta mustra, ku esaki ta e úniko manera pa e mantené un grep riba e hóbennan aki, ku generalmente ta hopi ambulante i ku outoridatnan no por gara ora nan kometé algu.
Antia semper a rechasá e areglo aki. Parlamentu di Antia asta a aseptá un moshon den forma unánime, ku ta bisa ku e ta protestá kontra introdukshon di e areglo. Antia ta konsiderá e areglo aki diskriminatorio, pasobra e ta registrá solamente hóbennan antiano, siendo ku ta konosí ku tin un kantidat di otro hóben di otro nashonalidat ku ta hasi nan mes kulpabel na aktonan kontra lei.
E komunikado ofisial ku a sali awe mainta ta bisa ku e preparashonnan pa introdusí e areglo di VIA ta sigui i ku Ulanda no por warda te ora kaba ku preparashon i introdukshon di VIR, esta Verwijsindex Risicojongeren, un areglo kaminda no ta registrá solamente antiano pero tur hóben problemátiko.

WILLEMSTAD - Tin un kos teribel ta bai sosodé un dje dianan aki den prizòn Bon Futuro. Trahadónan a kue poder den prizòn. Esei ta loke vise presidente di e sindikato ku ta representá e trahadónan di prizòn STraF Deanix Martis a pronostiká den un entrevista ku Radio Nederland Wereldomroep.
E siman aki parlamentu di Antia a diskutí maneho di minister di Hustisia David Dick pa prizòn Bon Futuro. Manera ta konosí, partidonan di oposishon no tin konfiansa mas den e mandatario.
Manera LA PRENSA a informá kaba, minister Dick a sobreviví un moshon di deskonfiansa den parlamentu antiano. Staten a rechasá e moshon ku 11 voto kontra i 5 voto na fabor. Tantu Nelson Navarro di Forsa Kòrsou komo Eunice Eisden di MAN, e dos partidonan ku a entregá e moshon, tabata fuerte den nan disertashon den parlamentu, den sentido ku asin’aki kos no por sigui.
Tur dos a kuestioná severamente e insidentenan ku a tuma lugá último tempu den prison Bon Futuro. Prezunan a purba hui, a gara mayoria di nan, pero tin un prezu, Jair Leutheria ku ainda, despues di basta siman ta fugitivo. Un kantidat di ilegal ku tabata den barak pendiente nan deportashon tambe a logra hui, miéntras ku e kaso di mas grave tabata e hecho ku deskonosínan a asesiná un prezu notorio, Cornelis Walker den prizòn, pone e arma den forma demostrativo riba su pechu, sin ku te awe outoridatnan por a saka’fo ta ken ta esun òf esnan kulpabel.
Mientrastantu, tantu e plan di STraF komo e plan di EGAD pa drecha situashon den prizòn Bon Futuro ta na duda. Deanix Martis a bisa, ku e situashon den prizòn no ta kos di papia ariba. Kontrabanda di arma, telefon selular, menasa, tur ta kos ku ta na órden di dia.

WILLEMSTAD - E bishita na Islariba tabata alentador. Alentador pasobra nos por a konstatá, ku na skolnan na Saba, Statia i St. Maarten, ya kaba ta hasiendo e kambio nesesario pa muchanan kuminsá kome mas salú asina parlamentario Jacqueline Spencer a bisa, despues ku un delegashon di Staten di kua e tambe a forma parti, a regresá algun siman pasá for di un biahe di trabou na Islariba.
Anto ku tabata trata di un biahe di trabou i no un biahe di plaser, tur hende por a nota, asina e parlamentario a agregá.
E bishita a inkluí kombersashon ku un gran kantidat di instansia riba e islanan, manera Banko di Seguro Sosial, Servisio di Salú Públiko i otro instansianan di gobièrnu.
Loke a resaltá ta e hecho, ku serka tur e instansianan aki ta biba preokupashon pa e problema di peso di mas, di gordura eksesivo ku finalmente ta kondusí den mayoria kaso na un òf otro enfermedat.
Manera ta konosí, parlamentu ei Antia, den estrecho koperashon ku parlamentu di Aruba a entamá e trayekto aña pasá pa kuminsá traha seriamente riba kombatimentu di obesitas. E problema aki ta un problema serio, pasobra e ta afektá tambe nos situashon finansiero, asina presidente di parlamentu Pedro Atacho a splika ekstensamente den pasado.
Ta konosí ku algun luna pasá, Staten a instalá un komishon adhoc ku mester atendé e problema aki, ku ta un problema serio ku ta menasando salú di nos hendenan.
Ounke ku sifranan resien no ta disponibel, ta un hecho ku e problema aki ta manifestando mas i mas den nos sosiedat.

WILLEMSTAD - Eks fiskal Cor Merx ta dunando lès awor aki na tantu polis komo esnan ku ta den formashon pa bira wardadó di prezu. E denunsia aki a bin di lider di Pueblo Soberano Helmin Wiels.
Wiels a bisa ku e tin e informe aki konfirmá i ku esaki mester ta un bèrgwensa pa e aktual minister di Hustisia David Dick. Te ku dos aña pasá, Cor Merx tabata fiskal na Islariba. Pero pa motibu di tráfiko di influensia, el a malusá su funshon pa hasi sierto kosnan ku lei no ta pèrmití. Merx a laga investigá bida privá di un eks amante di dje na Islariba, algu ku a kousa bastante konmoshon na St. Maarten.
E parti mas ferfelu tabata, ku Cor Merx a tuma su retiro, e tempu ei supuestamente pa motibunan di salú. Asta el a tene un fiesta di despedida, pasobra e lo a bai bèk Ulanda. Pero Merx a kai den desgrasia, na momentu ku el a regresá St. Maarten i a bin sali na kla ku e ta persiguiendo su eks amante.
El a keda kondená pa korte, pero a haña un kastigu demasiado suave, na konsepto di Wiels, kende a denunsiá tambe ku aparentemente lo tabatin motibu pa trata e eks fiskal aki ku man di felpa. Cor Merx a haña si un periodo di prueba di 5 aña ku e no por traha komo fiskal.
Pa sorpresa di tur hende, segun Wiels a bin tuma nota resientemente, ku e eks fiskal ta trahando komo esun ku ta; duna formashon na wardadónan di prezu na Islariba. Ademas e ta enkargá ku e proyekto di formashon di polis èkstra ordinario, un proyekto konosí komo BAVPOL (Buitengewone Agent van Politie).

LONDRES – Komité Olímpiko Internashonal (KOI) lo realisá pruebanan nobo di doping riba e muestranan di sanger rekopilá den e Weganan Olímpiko di Beijing pa buska rastronan di un droga nobo.
E desishon sin presedente, anunsiá djarason, tin e propósito di buska un sustansia prohibí ku a keda detektá resientemente den e Tour di Fransia.
E muestranan di Beijing ta ser mandá pa un laboratorio di e Agensia Mundial Antidoping na Lausana, asina e bosero di KOI, Emmanuelle Moreauu a bisa.
KOi a realisá mas ku 5.000 kontròl den e weganan di Beijing. No a bisa mesora kuantu muestra lo ser analisá.
E muestranan lo ser habri i lo buska e sustansia CERA, un generashon nobo di e hormona EPO ku ta oumentá e kantidat di sèlnan kòrá den sanger.
“Esaki ta demostrá klaramente e determinashon di sero toleransia (riba doping), i ku nos lo usa tur e medionan disponibel pa gara e tramposonan”, e visepresidente di KOI, e aleman Thomas Bach, a bisa AP.
KOI ta warda e muestranan di e olimpiadanan durante ocho aña, lagando habrí e posibilidat di bolbe hasi pruebanan ora sistemanan nobo presentá.
E desishon a bini despues ku un prueba nobo di laboratorio usá pa e agensia franses anti doping a detektá CERA serka siklistanan di e Tour di Fransia. E pruebanan original i urina a presentá duda pero nan no tabata kompleto.
“E ta hopi bon. E ta permití nos frustrá esnan ku ta hasi trampa”, e hefe di e Tour di Fransia, Christian Prudhomme a bisa. “Loke nos ta hasiendo den e Tour di Fransia no a tuma lugá nunka den e deporte”.

PARIS – E lider di e agensia franses anti doping ta spera ku e investigadónan pronto lo perfekshoná un prueba pa eliminá un forma di doping ku te awor tabata imposibel pa detektá.
E agensia franses tabata den vigilansia den simannan resiente pa motibu ku ta usando un prueba nobo pa gara e siklistanan di Tour di Fransia ku a usa CERA.
E pruebanan nobo ei a deskubrí tres siklista di e kareda di 2008 ku a usa CERA – e aleman Stefan Schumacher i e italianonan Riccardo Ricco i Leonardo Piepoli. E organisadónan ta hasiendo mas pruebanan pa detektá uso di CERA serka otro kompetidornan di e Tour di e aña aki.
Pero te ainda no tin forma di gara esnan ku ta hasi transfushon di nan mes sanger, un práktika ku nan ta kere ta normal den siklismo i ku, meskos ku EPO, ta oumentá e resistensia físiko. E proseso ta di saka sanger di e atleta, ward’é i bolbe inyekt’é ora ta nesesario.
E lider di e Agensia franses anti doping, Pierre Bordry, a bisa ku e investigadónan ta trahando pa sera e porta ei.
“Nos ta buskando un prueba nobo”, Bordry a bisa AP djarason. “Nos ta trahando riba esei. Na e momento aki e no ta eksistí”.
“Nos lo logr’é”, el a agregá. “E ta un kos ku nos por hasi. E investigadónan tin ku kompletá nan trabou. Di kualke forma, nos ta hopi motivá”.

MADRID – E presidente di Federashon Internashonal di Outomobilismo (FIA), i e lider di e organismo ku ta representá e 10 ekiponan di Fórmula Unu a reuní djarason pa diskutí futuro di e deporte meimei di e krísis finansiero mundial.
Mosley a atvertí den e reunion na Niza ku Luca di Montezemolo ku e deporte lo por kore peliger si den dos aña no tin bahada drástiko di gastunan.
“Ta bisto, for di promé ku e difikultatnan ekonómiko aktual, ku Fórmula Unu ta insostenibel”, Mosley a bisa. “Di bèrdat e ta un situashon hopi serio. Si nos no por hasi esaki promé ku 2010, nos lo ta den un situashon serio”.
Mosley lo reuní ku Di Montezemolo i e otro miembronan di e Asosiashon di Ekiponan di Fórmula unu despues di e Gran Premio di China di 19 òktober, i e úniko tema di e reunion lo ta pa logra “un bahada importante i urgente di e gastunan”, mediante kambionan tékniko ku lo benefisiá tur e ekiponan sin redusí nan prestashon”.
Mosley tin outorisashon di FIA pa implementá e medidanan ku ta nesesario si e ekiponan no yega na un akuerdo. E lider dje organismo ta boga pa límite di gastunan i teknologia nobo.
“Mi ta kere ku e tempu den kua por a hasi gastunan di 100, 200, 300 mion euro pa aña a kaba, ku ta loke Fórmula Unu ta kosta e kompanianan grandi aki”, Mosley a bisa. “nos tin diferente forma di sigurá nos mes ku no ta gasta tantu plaka, pero e ta impliká kambionan formal”.

WILLEMSTAD/ Nieuwegein – Polis ulandes ta buska siudadanonan alerta pa partisipá na e programa Burgernet. Via selular, sms òf e-mail polis ta pidi pa yuda buska sospechosonan òf vehíkulonan hòrtá. Ta trata di un koperashon práktiko entre polis i e siudadano. Na Kòrsou un proyekto similar, yamá ‘orea di polis’, a frakasá kompletamente.
E programa na Ulanda a kuminsá na 2004 den e munisipio Nieuwegein komo proyekto piloto. “Den Nieuwegein nos a mira ku e hendenan no ta sinti nan mes solamente mas sigur den nan bario, pero tambe mas envolví. Nan ta sinti ku awor nan mes tambe por hasi algu na e situashon. Esaki ta partisipashon real di e siudadano”, bosero Marieke Timmermann a splika.
Habitantenan di Delft, Ede, Leeuwarden, Dantumadeel, Breukelen, Maarssen, Gouda i De Ronde Venen ku mèldu nan mes, por spera un yamada di nan kuerpo polisial entrante novèmber. E siudatnan akí ta partisipá na e prueba despues di un prueba anterior na Nieuwegein ku ta kana for di 2004. For di tempu ku siudadanonan ta tene nan orea i wowo habrí den Nieuwegein, e chèns pa gara malechornan den akshon a oumentá.
Importante ta segun Timmermann, ku siudadanonan tin kontakto direkto ku e sentral di polis i ta haña sa mes ora si tin mas informashon den e kaso òf si e akshon a terminá.

Orea di polis

Na fin di dékada 90 Kuerpo Polisial di Kòrsou tabatin algu similar kaminda siudadanonan por a alertá polis. Tabata trata di e telefònnan den un kashi blou kantu di kaminda. E asina yamá ‘orea di polis’ sinembargo no a funshoná, pasó tur hende por a mira ta ken ta yama polis. Polis a instalá e telefònnan pa siudadanonan por a yama i duna polis informashon di krímennan i tambe sospechosonan. Dor ku e telefònnan tabata instalá nèt na e sitionan kaminda e supuesto malechornan tabata rondia, tur hende tabatin miedu di usa e telefònnan. Finalmente deskonosínan a destruí kasi tur e ‘oreanan di polis’.

WILLEMSTAD – Pa di dos dia konsekutivo Universidat di Antia tabata kompletamente for di funshon. E akshon di protesta ku e studiantenan ku a inisiá ayera a kontinuá awe. Ni e Rector Magnificus Jeanne de Bruijn ni e atministradó Hugo de Franca no a presentá awe.
For di mainta tempran e studiantenan a blòkia e portanan di entrada eksigiendo presensia di Minister Omayra Leeflang. Entretantu Hunta di Supervishon di UNA a deliberá riba e situashon, i finalmente a disidí pa laga un tim di intervenshon den kaso di krísis kai den e situashon i alabes hasi un intento pa eliminá e problemanan agudo ku orario (roster) pa e midterms di otro siman.

ARBO

E servisio di ARBO a bai UNA awe pa trata na kalma e situashon i intermediá. Despues di konsulta intensivo a disidí por lo pronto pa tuma e siguiente dos medidanan pa laga trankilidat i órden regresá na UNA: Awe mainta 9’or e ekspertonan di ARBO lo a presentá riba tereno di UNA. E trahadó sosial i e sikólogonan di ARBO tin eksperensia i sa kon pa aktua den sirkunstansia yen di stress. Spesialmente awor ku a resultá ku ayera e emoshonnan a bai haltu entre e studiantenan, e tim lo start e proseso mesora despues ku nan yega na UNA pa inventarisá pa nan mes kon e situashon ta. Den e kuadro akí nan lo kuminsá skucha e studiantenan pa tende kiko nan kehonan ta. A base di loke nan haña komo input di e grupo di studiante den akshon, ARBO lo prepará un plan di akshon i ta kuminsá un tanda di deliberashon ku tur partido envolví. E intenshon ta pa e ekspertonan lokal akí ku ta bini di pafó di e universidat yuda pa trese trankilidat bèk, ya ku esei ta e mihó base pa un desaroyo positivo pa tur esnan envolví, segun ARBO.

Lorito ta yama tur hende un felis dia. Dianan ta bula. Awe mainta awa a manera menasá di kai. Esei a spanta Lorito un poko, pero nos a traha duru ku wer pa awe si nos no bolbe muha. Ta masha muhá Lorito mester a soportá den último dianan.
*********
Ta masha kos ta pasando den e dianan aki i Lorito no tin sufisiente ala pa bula bai tur kaminda. Ata Lorito a pasa banda di Jan Noorduynweg i nos a mira masha hóben sintá riba kaya. Nos no a komprondé mesora ta kiko ta pasando i hasta nos a kere ku ta plan di fakansi. Despues nos a ripará ku ta un akshon na UNA.
*********
E akshon sigur a generá hopi atenshon den komunidat. Un di e kosnan ku nos a tende ta ku porfin tin bida militante i revolushonario na UNA, algu ku a hasi falta pa masha tempu. Masha hende a spanta, pero Lorito ke bisa nan ku afó aya ta tur dia tin akshon di studiantenan. Studiantenan den moveshon ta parti di nan universidat. Hopi biaha hasta studiantenan ta tene akshonnan pa loke ta pasa den sosiedat. Nos ta spera ku ta yega dje leu ei tambe (sin infiltrashon di figuranan dudoso).
*********
E situashon na UNA ta masha doloroso i ya kaba por papia di un krísis di konfiansa masha serio. Ora tin un krísis di konfiansa, esnan ku no tin konfiansa mas mester hala un banda. T’asina e sistema ta funshoná tur kaminda. Nos ta spera ku nan tin e sabiduria nesesario pa tuma e desishonnan ku ta korekto.
*********

Merka to vota 1


Ayera tabatin e promé edishon di Merka ta Vota ku sigur a hala atenshon. Lorito mes no por duna masha opinion pa motibu di konflikto di interes. Loke si nos por bisa ta, ku e programa a demostrá ku por hasi mas programa ku profundidat na Kòrsou. Debatenan riba temanan na un forma ku ta tene kuenta ku ta den kas di hende ta drenta, mester ta posibel. Nos ta spera ku esei sigur lo por bira algu pa futuro, pasobra ta masha tema tin pa diskutí.