WILLEMSTAD – “Despues di inventarisá i kategorisá diferente punto di atenshon di diferente retonan den enseñansa, djaweps último huntu ku 9 direktivanan di skol den enseñansa di fundeshi, a disidí ku mester di métodonan ku mester ta disponibel na papiamentu i a tuma medida relámpago pa instruí Fundashon Planifikashon di Idioma pa produsí den forma aselerá métodonan na papiamentu”, asina diputado Alcalá-Wallé a duna di konosé. Banda di esei a palabrá ku pa loke ta trata materialnan lo sinta ku Fundashon Material Pa Skol pa wak den ki grado por duna kontenido na produkshon di mas buki.
Manera konosí, ora a inventarisá e problema den enseñansa di fundeshi a disidí, ku si e método no bini pa mei próksimo, direktiva ta hañ’é obligá na siña e mucha lesa na un manera responsabel ku no ta den idioma materno, pasobra no a haña e materialnan primintí. Manera direktora di Direktiva di Skolnan Katóliko a bisa: ‘als het niet kan zoals het moet, dan moet het zoals het kan’. Simplemente no tin material i pa e motibu ei a tuma e desishon pa den grupo 3 pa kuminsá lesa i skirbi na ulandes, pasobra no por stroba e muchanan den nan desaroyo. Segun e direktiva no tin otro opshon.
No a produsí e partinan di e material provisorio ni no a bini e método nobo i moderno pa siña e mucha lesa i skibi den su propio idioma. E método primintí pa duna ulandes komo idioma straño tampoko a keda produsí. Esaki a pone ku skolnan tin 4 aña ta purba adaptá i desaroyá material nan mes segun nan mes wisio. Direktiva a sigui midi i evaluá i a yega na e konklushon ku e situashon aki no por sigui asina mas. “Si nos no por duna skolnan e hèrmèntnan básiko, no por eksigí di nan pa nan hasi milager.” Pues a disidí ku entrante ougùstùs ta usa e métodonan di papiamentu ku si ta disponibel pa grupo 1 i 2 i lo mester pone disponibel métodonan pa kubri e proseso di alfabetisashon di mucha for di grupo 3 bai ariba. No tin esaki na papiamentu, pues ta hasié na ulandes, paso no por stagna e proseso básiko di alfabetisashon pa motibu ku no tin material den nos mes idioma. Na ulandes tin mas ku un método trahá dor di profeshonal pa por duna e maestro un guia den alfabetisashon di e mucha.

WILLEMSTAD - Ayera UTS a lansa su di tres generashon di broadband Internet network mobil, e asina yamá UTS 3G Mobile Internet. E servisio aki ta basa riba e teknologia di e sistema di telekomunikashon mobil universal, Universal Mobile Telecommunications System (UMTS). Kompará ku e promé generashon di teknologia análogo i e segundo generashon di teknologia digital, e di tres generashon di mobil ta ofresé libertat di mobilidat i akseso na speed hopi haltu.
Ku introdukshon di e ret konfiabel i inovativo 3G, UTS komo esun promé den Karibe, awor ta ofresé su klientenan konekshon di Internet riba nan laptop ku ta kubri henter e isla. Den e fase di introdukshon, e speed di konekshon ta yega 3.6 megabait pa sekònde lo ta disponibel mesora, miéntras un konekshon di 7.2 megabait pa sekònde lo keda ofresé riba tèrmino korto.
Pa haña akseso na UTS 3G Internet, klientenan mester inskribí pa e servisio. Djis konektá un modem den e USB port di e laptop, ta posibel pa konfigurá i konektá. For di e punto ei e kliente lo eksperensiá libertat di konekshon Internet tur ora i tur kaminda. UTS a anunsiá ku e ta ofresé preisnan di introdukshon atraktivo ku lo ta bálido te 15 ougùstùs próksimo.
UTS 3G ta ofresé solushonnan pa negoshi komo tambe personal. Esaki ta spesialmente un solushon pa esnan ku ta move konstantemente riba e isla. Hasta ta posibel pa haña akseso na e kompania su filenan i transferí esakinan for di ofisina. UMTS ta proveé servisionan mobil pa move di un punta pa otro sin pèrdè konekshon.

LOS ANGELES, California, - E pelíkula ku e direktor merikano Oliver Stone lo realisá riba bida i presidensia di George W. Bush lo estrená na Merka promé ku e elekshonnan presidensial di 4 di novèmber benidero, fuentenan di estudio Lionsgate a informá.
E estreno di “W” riba pantayanan merikano ta programá pa 17 di òktober.
Kuminsamentu di e filmashonnan lo kuminsá djaluna awó na estado di Louisiana.
Josh Brolin (“No Country for Old Men”) lo bai tin e ròl prinsipal.
Elizabeth Banks lo bai ta Laura Bush; James Cromwell ta eks Presidente George Herbert Walker Bush; i Ellen Burstyn lo bai ta Barbara Bush, esposa di eks Presidente tata di George W. Bush.
Oliver Stone a gana tres premio Oscar (dos pa “Platoon” i un otro pa “Born on the Fourth of July”.
Na 1995 el a filma un pelíkula riba eks Presidente republikano Richard Nixon, kende mester a renunsiá pa motibu di e skandal konosí komo Watergate.
Su pelíkula “JFK: Open Case” a bai riba e atentado kontra Presidente John F. Kennedy.

Foto: George W. Bush 1005

Na òktober lo estrená pelíkula riba bida i presidensia di Presidente di Merka, George W. Bush.

Foto: Portada pelikula riba Bush 1005

Portada di revista Entertainment Weekly ta mustra e promé “look” di Oliver Stone su kontroversial pelíkula “W”, ku aktor Josh Brolin i aktris Elizabeth Banks interpretando e ròl di Presidente Bush i Promé Dama Laura Bush.

PUERTO MONTT, Chile, - E volkan chileño Chaitén ta drentando den un fase krítiko kumpliendo ayera un siman di aktividat intenso, ku a fòrsa evakuashon di mas ku 6.000 persona i e di dos bishita n’e zona di Presidente di Chile Michelle Bachelet fo’i dia ku e volkan a drenta den erupshon.
E shinishinan saká p’e volkan, situá sùit di e pais i inkluso a alkansá kapital di Argentina, tin un alèrta máksimo di outoridatnan chileño i tambe di esnan di e pais bisiña, p’e desaster ambiental provoká na vários pueblo i siudatnan.
Bachelet a reuní ku volkanólogonan i Ministernan na Puerto Pontt, ubiká nort di Chaitén, pa sa di e desaroyonan di e volkan, pa despues anunsiá un seri di medida.
Chile, ku tin e di dos kadena volkániko mas grandi i di mayó aktividat na mundu, despues di Indonesia, tin mas ku 2.000 volkan, di kua mas o ménos 500 a keda klasifiká pa ekspertonan komo potensialmente aktivo.

Foto: Chaiten volkan 1005

Helikòpter militar, man drechi, ta bula banda di humanan i shinishinan produsí p’e erupshon di volkan Chaitén na Chile.

WILLEMSTAD – Hopi t’esnan ku a ward’é i porfin el a pisa suela di Kòrsou. E modelo nobis nobis di Hyundai a kaba di yega. Un outo super ekonómiko, espasioso i luhoso manera nos klientenan a kustumbrá.
E chikitin luhoso di Hyundai aki ta remplasá Hyundai Atos. Modelo i-10, un super modelo, ta un “five-seater hatchback”, ku su motor di gasolin di 1.1 liter optenibel ku 5 spit manual o 4 spit outomátiko. i-10 ta duna bo un máksimo di 66.7PS forsa di kabai na 5500rpm. Su tayonan sin chup ta sòru pa un preshon di airu abou dunando bo un eksperensia di kore suave i plasentero.
Di su parti paden no papia mes, e modelo aki ta figurá sufisiente espasio pa kuater á sinku adulto sinta hopi konfortabel. E ta ekipá ku air-conditioning, seat belts, tilt stearing wheel, mac reems i hopi mas. E lombanan di stul patras ta dobla, kreando asina sufisiente espasio den baul na ora di mudansa o kualke piknik.
E i-10 aki sea den su forma GL o GLS ta un berdadero luho di outo ekonómiko. Su diseño atraktivo i simpel, pero tambe su astusia riba kaminda ta hasié e outo perfekto pa esnan ku ta kore hopi. Ku su midínan di 3.565mm (largu) x 1.595mm (hanchu) x 1.550mm (haltu) i un base di wil di 2.380 mm largu, e ta un bon eskoho pa tur famia i e mihó eskoho pa kompanianan di “autorijschool”, “car rentals”, pòst i otronan ku ta hasi entrega konstante.
Hyundai i-10, ku su “i” di inspirashon, ta e di dos di e seri “i” di Hyundai. Den un palabra e outo di momentu a yega i e t’ei pa keda.

WILLEMSTAD - Forsa Kòrsou ta sumamente preokupá ku e situashon energétiko riba nos isla aki. Segun deklarashonnan ku Nelson Navarro, lider di Forsa Kòrsou a hasi, el a remarká, ku na vários okashon su partido a manda diferente proposishon pa gobièrnu kon pa atendé ku e krísis energétiko. Pero, segun Navarro, su partido no ta haña ningun reakshon di gobièrnu, i ta konstatá ku komishonnan ta wòrdu instituí i ku nan ta rekomendá asuntunan ku den pasado a wòrdu menshoná kaba i ku porfin ta wòrdu implementá. “No tin urgensia di parti di e gobièrnu aki pa atendé e situashon aki. Pa basta tempu kaba nos a antisipá e krísis energétiko aki. Pero no a tuma medidanan ku mester a wòrdu tumá ni tampoko sugerensianan ku a bin dilanti, no a tené kuenta kuné.” Komo ehèmpel, Navarro a menshoná e hecho, ku pa basta tempu kaba, Forsa Kòrsou a proponé un plan pa na Kòrsou hasi uso di energia alternativa. Esaki pasobra nos ta disponé di bientu, solo, laman na Kòrsou, ku ta tur e elementonan nesesario pa na un manera adekuá, atendé ku e krísis aki. “Pero nos a ripará ku no tin oido pa e sugerensianan aki”.
Segun Navarro, awor ku e plan a wòrdu anunsiá, unda ku gasolin i tambe awa i koriente lo bira ímpagabel, pa e pueblo aki, rápidamente mester implementá algu pa aliviá e pueblo.

ARIES: Probechá pa pone bo mes den kontakto ku e personanan ku ta leu. Komuniká tur loke ku bo tin den mente. 11,19,35.

TAURO; Alehábu di tur kosnan negativo. Pone bo mente briante pensa riba algu konstruktivo. Tur invershon ta laga ganashi sustansial pa bo. 31,04,50.

GEMINIS: Bo ta imponé i bria manera nunka ántes. Nada ni niun hende por daña bo beis, bo dia briante i espektakular no tin mag di kambia. 18,25,24.

KANSER: Bo ta haña ku e momentu aki ta mas benefisioso pa bo sali dilanti. Bo ta rekonosé e berdadero balor den bo bida. 10,02,23.

LEO: Bo ta awor den bo mihó momentu pa kumpli ku bo metanan ku ta retrasá. Hasi sin miedu pa bo logra bo soñonan, ya ku bo tin tur e energia nesesario. 06,30,14.

VIRGO: Bo ta organisá i bo ta tuma e kosnan na serio, si bo ta deseá na mira bo ingreso ekonómiko multipliká. Un hende hopi serka di bo ta orientábu. 44,02,11.

LIBRA: No sigui pensa mas i hasi e areglonan pa biaha awor. Ta momentu di hasi eksitante aventuranan. Tin hende ku por konsehábu den e kaminda korekto. 28,14,39.

SKORPION: Bo ta librá den kurpa i alma di tur loke ta atras o ta deprimíbu. Dios ta bendishonábu rikamente. Un persona ta librabu di ataduranan emoshonal. 03,26,15.

SAGITARIO: Bo kas i bo matrimonio ta wòrdu iluminá e dianan aki. E apoyo ku bo ta buska bo ta haña den un persona ku no ta faltabu i ta yenabu ku inspirashon pa sali dilanti.

WILLEMSTAD – “A yega momentu pa kasinonan na Kòrsou kuminsá kumpli ku lei. No ta bai tolerá mas ku gobièrnu no tin influensia riba e mundu di kasino aki. Tur kasino a haña un periodo di mas o ménos 2 luna – e ta varia di kasino pa kasino – pa regla nan lisensia definitivo di operashon”, asina Reynold Nivillac, direktor di Gaming Control Board a enfatisá.
Pa basta tempu kaba gobièrnu, pa medio di Gaming Control Board (GCB) ta tratando di establesé un situashon di legalidat kompleto den e mundu di hungamentu di plaka.
Mester bisa, ku ta ku e meta ei por sierto, a lanta tambe GCB algun aña pasá, un entidat ku mester sòru pa tur esnan ku ta dediká nan mes na wega di hazar manera ta yam’é, kumpli tambe ku reglanan stipulá pa esei.
Pa un periodo basta largu kaba kasinonan ta operando a base di un lisensia temporal i GCB a indiká den pasado ku e situashon aki no por kontinuá pa tempu largu mas.
“A yega momentu ku mester regla e situashon aki anto e momentu ei a yega awor”, segun Nivillac. Tur kasino a haña un karta den kua ta informá nan ku nan tin solamente un periodo definí pa kaba di regla nan pèrmit di operashon definitivo.
Tin asta un kasino ku a haña dos siman di tempu pa hasi esaki. Ta trata aki di un kasino – Nivillac no kier a menshoná nòmber – ku no a hasi niun intento nunka pa pidi pèrmit.
A laga doño di e pèrmit aki komprondé, ku si e no kumpli, ta laga sera e kasino den forma inmediato. Nivillac a atmití ku el a nota ku entretantu tin trámitenan a kuminsá tuma lugá di parti di e kasino ei, pa e haña su pèrmit.

WILLEMSTAD – “E gobièrnu ku tin awor aki pa Kòrsou, no ta funshoná. Kòrsou mester di un gobièrnu ku ta goberná. No un gobièrnu ku ta djis atministrá”, asina lider di MAN Charles Cooper a reakshoná riba e anunsio di gobièrnu ku ta bai oumentá preis di produktonan petrolero.
Cooper tabata referí aki na e anunsio ku entrante djaluna awor 12 di mei, preis di gasolin lo subi ku 20 sèn pa liter. Esei ta e promé oumento. Gasolin dia 1 di yüni lo bolbe oumentá ku 20 sèn, pa yega na total 40 sèn pa liter. Preis di disel, lo subi djaluna awor ku 20 sèn, e lo subi dia 1 di yüni ku 20 sèn mas pa finalmente 1 di yüli lo subi atrobe ku 30 sèn.
“E meta ta, pa pone preis di energia na nivel di preis di merkado”, asina diputado Davelaar a splika.
Direktor di Aqualectra Anthon Casperson a anunsiá ku preis di awa i koriente tambe lo subi entrante 26 di mei benidero.
T’asina ku for di febrüari, e kompania a hasi un petishon na Bestuurscollege a adaptá preis di awa i koriente.
E petishon riba mesa ta pa oumentá tarifa di koriente ku 19 porshento, miéntras ku awa lo subi ku 8 porshento.
Pa Charles Cooper, esaki ta muestra ku Kòrsou tin un gobièrnu ku no sa kiko ta nifiká goberná.
“Loke gobièrnu di Kòrsou a hasi ta simplemente pasa e oumento di preis di krudo over pa pueblo, laga pueblo paga. Aparentemente no a pensa ku por tin mas alternativa ku esei ku ta nifiká mesora un alivio pa pueblo,” Cooper a bisa.

WILLEMSTAD – “Lo ta bon pa Ulanda yega na palabrashon riba término kòrtiku ku e islanan di Antia kon e tin pensa di kaba di atendé e asuntu di debe”.
Esei ta konvikshon di presidente di College financieel toezicht (Cft) Hans Weitenberg despues di a bishitá e islanan antiano.
Kolegio pa Supervishon Finansiero a ser instituí aña pasá pa supervisá situashon finansiero di e islanan chikitu, e asina yamá islanan BES ku ta Boneiru, Saba i Statia.
E islanan ke bira un munisipio spesial di Ulanda i nan a yega na e palabrashon ku dentro di 3 aña nan presupuesto lo ta kompletamente balansá.
Weitenberg a bisa, ku e proseso ei ta kanando na satisfakshon, “pero tin hopi kos pa hasi ainda,” segun el a añadí mesora.
Den e dianan ku a pasa, e kolegio a bishitá e islanan aki pa di dos biaha. E bishita tabata den kuadro tambe di esfuersonan ku mester kristalisá den futuro pa yega na ehekushon di presupuesto 2008 i preparashon pa yega na un presupuesto 2009.
Segun Hans Weitenberg, Kolegio di Supervishon Finansiero a konstatá, ku e islanan a gasta ménos plaka den e promé kuartal di e aña aki. Segun Weitenberg sinembargo, ounke ku e por parse un desaroyo positivo, tabatin motibu pakiko e islanan no a gasta mas tantu plaka.
“Ami ta kere ku e islanan tabata asina drùk ku formulashon di presupuesto 2008 ku nan no tabatin tempu pa atendé e parti di ehekushon manera mester ta. Konkretamente esaki ta nifiká, ku tabatin kuentanan ku a keda drumi, ku e islanan no a paga i ku di tur manera, lo mester paga den futuro. Simplemente tabatin ménos tempu pa aktividatnan regular di gobernashon. Nos ta tene kuenta ku e loke a keda drumi, lo mester keda pagá tòg den futuro,” Weitenberg a duna di konosé.

AMSTERDAM/ WILLEMSTAD - E agensia di notisia ANP mester paga Hans Melchers, tata di Claudia Melchers kende a bira víktima di sekuestro na 2005 un montante di 10 mil euro daño perhuisio pa publikashon ku el a hasi, insinuando ku e famia lo ta metí den trafikashon di droga. Ademas ANP mester pone un rektifikashon den e korant De Telegraaf.
Esei ta resultado di un kaso den korte di apelashon ku Hans Melchers a entamá kontra e agensia di notisia.
Na sèptèmber 2005, un grupo di yu di Kòrsou, Lorenzo Moenir Alam, Izaan Moenir Alam, Patricio Wawoe, Quentin Woi-Long-Sing, ku koperashon di Rouellar Rog a sekuestrá Claudia Melchers, yu muhé di e komersiante magnate Hans Melchers.
Loke tabata notabel den e kaso aki tabata e hecho, ku e sekuestradornan – kontrali na loke ta kustumber – no a pidi un suma di reskate, pero a pidi un reskate den forma di 300 kilo di kokaina.
E kaso manera nos a relatá ampliamente den pasado kaba, a finalisá ku detenshon di tur esnan kulpabel, sin ku famia Melchers a kumpli ku e reskate.
ANP a publiká un artíkulo dia 15 di sèptèmber 2005 ku e kabes: “Sekuestro di Melchers kasi sigur ta trafikashon den droga”.
Hans Melchers mesora a entamá un kaso den korte kontra ANP pasobra el a konsiderá ku e artíkulo a daña su bon nòmber i reputashon.
Korte den promé instansia na Amsterdam a konsiderá anteriormente ku e publikashon no tabata ofensivo i ku e tabata kompletamente legal.

WILLEMSTAD - Hero Brinkman, miembro di Partij voor de Vrijheid den Tweede Kamer ta haña ku Ulanda no mester paga e debe nashonal di Antia ku ta suma e montante di komo 5 mil mion florin. Promé ku Ulanda saka un sèn pretu, mester tin garantia ku no tin korupshon mas den mundu polítiko riba e islanan aki.
Brinkman, ku a hasi e komentario aki den un entrevista na Radio Nederland Wereldomroep a splika ku tin kos ku ta masha lógiko, pero ku aparentemente polítikonan di Antia no ke komprondé.
E pagadó di belasting ulandes, no ta sinta ta warda pa usa su plaka ku el a traha duru p’e pa paga debe di un pais manera Antia. De fakto, bo por konsider’é komo un premiashon pa mal maneho, pa maneho di korupshon, Brinkman a bisa.
E miembro di PVV a splika ku e ta masha konsiente di loke ela yama e “realidat polítiko” na Ulanda, indikando ku e sa ku su partido no tin masha influensia den e proseso demokrátiko di tumamentu di desishon. PVV manera ta konosí ta un parti ku masha tiki asiento den Tweede Kamer i komo tal, e no ta forma parti di koalishon tampoko.
Mi no por bringa e asuntu di korupshon aki mediante poder polítiko, ta p’esei mes mi ta purba di pone preshon di e forma aki, Brinkman a bisa, referiendo na su deklarashonnan ofensivo kontra polítikonan di Antia.
Partij voor de Vrijheid a informá for di basta siman pasá kaba ku e ta bin ku un informe ofisial di aktonan di korupshon riba e islanan di Antia, un informe ku mester keda kla den transkurso di e luna aki.

WILLEMSTAD - Djadumingu awor 11 di mei Kas di Kultura ta invitá tur mama di Kòrsou na un fiesta pa mama na Kiosko Plasa Brion na Awasá Otrobanda. For di 6or lo tin un fiesta kultural pa tur mama ku hasi akto di presensia.
Riba e atardi aki Kas di Kultura ta regalá tur esnan ku ta mama un programa kultural variá. Lo tin presentashon di kaha di òrgel Zulia, Grupo Hóben Stripan ku poesia pa mama i Duo Gleva ku bunita kantika di alabansa.
Grupo di baile folklóriko Memoria di Kòrsou lo trese un bukèt surtí di baile pa tur mama, miéntras ku Harmonia i Kueru lo pone tur mama balia i kanta di alegria.
Kas di Kultura ta invitá tur yu pa trese nan mama Plasa Brion djadumingu awor atardi di 6or pa 9or.
Kultura di mama ta nos patrimonio i Kas di Kultura ta honra esaki ku un grandioso fiesta riba Plasa Brion.
Bini ku bo mama, bini ku mama di bo yunan.
Kas di Kultura ta invitá bu.

WILLEMSTAD - Entrante djaluna awor 12 di mei, tráfiko den Punda lo kambia. Tráfiko biniendo for di Abraham de Veerstraat ku destino Punda, por kore manera ántes dilanti di Waaigat pa drenta sentro di siudat.
Manera ta konosí, debí na e trabounan di renobashon di De Ruyterkade/Theaterstraat, tabata nesesario kambia direkshon di tráfiko.
Trabounan den sentro di siudat ta avansando di tal forma, ku ta posibel awor aki pa habri e kaya dilanti Waaigat atrobe. For di djaluna awor, tráfiko por kore riba e kaya aki drenta Punda. Pa sali for di Punda por lora na Marshe Nobo manera kustumber, pasa De Ruyterkade kaminda e tin dos opshon.
Por sali for di Punda koriendo e ruta di ántes, esta atraves di De Ruyterkade i sali for di Punda. Un di dos posibilidat ta pa kore riba De Ruyterkade drenta Van Speykstraat (pabou di San Pedro Supermarket), sali riba Pietermaai i sali for di Punda atraves di Kaya Wilson Papa Godett.
Ta bon pa apuntá, ku hopi hende no ta konsiente di e di dos posibilidat aki, esta di pasa atraves di Van Speykstraat, via Pietermaai drenta Kaya Wilson Papa Godett i sali for di Punda. Ta rekomendabel sinembargo pa hasi uso di e ruta aki, sigur ora ku tráfiko ta kongestioná den sentro di siudat, partikularmente den oranan di mèrdia i atardi.
Servisio pa Obra Públiko (DOW) ta pidi koperashon di outomobilistanan pa asina tráfiko den sentro di siudat por move mas rápido i efisiente. Ta falta algun luna pa e trabounan den Punda ta kompletamente tras di lomba.

WILLEMSTAD – Un grupo di 19 prezu di Bon Futuro a risibí un sertifikado ICDL. E International Computer Driving Licence akí, nan a optené despues ku nan a sigui un kurso ku Bon Futuro a organisá den kuadro di resosialisashon. Na e entrega di e sertifikadonan tabata presente minister di Hustisia David Dick ku personalmente a entregá e sertifikadonan na e detenidonan.

WILLEMSTAD/DEN HAAG – E lusnan chikí di baiskel ku ta sende paga ta prohibí na Ulanda. Un siklista tin mag di usa e lus si, pero e no tin mag di program’é pa e sende paga. Na Ulanda Konseho di Alto Komisarionan di Polis kier a asta prohibí uso di e lus.
Aña pasá tabatin masha konmoshon ora e Konseho di Alto Komisarionan di Polis a anunsiá, ku nan lo bin ku reglanan nobo pa uso di e lusnan. Asta e menasa ku lo traha prosèsverbal pa e siklistanan ku pega e lusnan na nan paña òf tas ora nan ta kore baiskel. Minister enkargá ku tráfiko, Camile Eurlings a laga hasi un investigashon riba e posibel peligernan ku e lusnan por kousa. Den un karta pa Tweede Kamer, Eurlings a skibi ku e ta amplia e reglamentashon pa uso di e lusnan akí. “Uso di e lusnan akí na kurpa di e siklista no tin peliger partikular kuné pa seguridat di tráfiko”, Eurlings a bisa. Sin embargo e aspekto di sende paga si tin su desbentahanan. Pa e motibu akí lo no permití esaki. Eurlings no a splika kiko ta e desbentahanan ora e lus ta sende paga.
E bònt di siklistanan a reakshoná ku húbilo riba e notisia. Segun e bònt, e lusnan di baiskel antikuá, ta kibra muchu lihé ora e baiskelnan ta stashoná den rèki. E rèkinan ta muchu pèrtá i e baiskelnan ta riba otro. E bònt ta bisa ku e oumento di siklistanan ku tin lus ora nan ta kore baiskel, ta debí na e lusnan chikí akí.

WAWOE
Richinel Anthony (repentino)
A laga atras su tata Harry Martina i famia, tata di kriansa Cerilio Hersisia, yunan Richeline Wawoe, Shuvurny Pieters, rumannan Kenneth Wawoe, Iraida Stasia, Almira Martina, Mairis Hersisia, Myrlene Maduro-
Bernadina, Shenayra, Raisa, Damaris, Elderd, Cerill Bernadina. Akto di entiero ta djamars 13 di mei 4or for di misa Z-Bonam pa santana Sta. Rosa. Bishita 1or.

EMILIA
Fransisca Maria (90 aña)
Mihó konosí komo Tina
A laga atras su yunan Lucio, Selsa, Ciryl Emilia, ñetunan Herbert Emilia, Boy Meriana, Edsel i Edseline Ricardo tur ku nan famia. Akto di entiero ta djaluna 12 di mei 11or for di El Tributo pa santana Sta. Maria. Promé ku entiero 10.30or tin un respòns na El Tributo. Bishita 9or.

RAFAELA
Maria Asuncion
A laga atras su yu Anthony Rafaela, ñetunan Nathaniel i Tanisha Rafaela, suegra Mirelva Rafaela-Martines, rumannan Dominico Paula, Alice Cijntje, Edgar, Guillermo, Oswin, Maritza Rafaela. Akto di entiero ta djamars 13 di mei for di El Señorial pa santana Memorial Park. Bishita 1or. MARTINA

Maritza Blasia (repentino)
A laga atras su rumannan Erwin, James, Norden Martina, Marjorie Alfonso-Martina, subrino(a)nan Anita, Dyana, Marjorie, Jose Maria Alfonso, Steavany Henriette, Nucksin Martina, Duaynie Martina, Natahly Martina i rumannan. Akto di entiero ta djamars 13 di mei for di El Señorial pa santana Barber. Bishita 9or-11or. Promé ku entiero tin un s.s. di misa na misa Barber.

WILLEMSTAD - Transparensha Musikal esaki ta tema di e workshop ku e músiko internashonal Kurasoleño, Leo Davelaar lo duna (gratuitamente) na tantu kantantenan komo músikonan.
Den pasado Leo Davelaar a kompañá diferente artistanan grandi manera: Percy Sledge i Oscar Harris. Tambe el a kompañá diferente artistanan internashonal manera Toni Scherman, Ced Ride, Maruja Boogard (esakinan ta djis di algun di e tantísimo produkshonnan ku el a partisipá na dje).
Durante su estudio di músika general, pòp i arte na Ulanda, el a haña oportunidat pa sigui diferente kursonan manera ‘segunda indexering’, ‘vocal coaching’ i ‘koor techniek’. Tambe e tabata toka i tambe dirigí diferente proyektonan musical grandi na Ulanda, manera entre otro Sound of Diversity – crossover group, un grupo di kantantenan talentoso ku ta krusa diferente estilo. Rotterdam Mass Choir – un koro di mas ku 75 hóbennan for di e área di Rotterdam kantando muzik urban gospel i hopi mas.
Na e momentonan aki Leo ta na Kòrsou i bou di e lema: ‘It’s not music that can change the world but what’s done with music that can.’, e lo bai duna algun workshop pa di e forma aki duna un aporte na nos kultura musikal.
Aparte di e workshopnan ku e lo bai duna na Boneiru 14 di mei i tambe na prizòn, Leo lo tene dos workshop general (pa kantantenan i Músikonan) anto unu espesífikamente pa pianistanan:
E Workshop general lo tuma lugá riba 16 i 17 di mei próksimo, di 19:00 te ku 22:00 ‘or.

WILLEMSTAD – 40 Kaya den besindario di Oost Jongbloed, Liverpool, Bonam, Zuid Bonam i Kirindongo Abou, ayera a haña nòmbernan di baluartenan musikal. Den un evento históriko ku a tuma lugá ayera den Curaçao Festival Center, den kua a ofisialisá e nombramentu aki den presensia di 9 baluarte ku si ta na bida i mandatario i famianan. Un seremonia impreshonante den kua sigur lo pèrkurá pa tira lus riba esnan ku en bèrdat a destaká riba tereno farandulero. Un programa kompleto presentá pa e komishon ku a keda enkargá ku e nombramentu aki pa trese historia bibu di esnan ku a keda nombrá.
Di e 40 baluartenan ku a keda nombrá, 9 ta na bida i ku tabata presente na e okashon spesial den Festival Center. E baluartenan ku a ku a haña nombramentu pa nòmber di kaya ta Gabriel “Gachichi” Archangel Martis, Danillo “Denny” Plantijn, Juan Camelia, Eruimidez “Kimu” Candelaria, Gilbert “Gibi” Djaoen, Vivienne Frans, Nemensio “Chi” Domitilia, Eleazar “Chal” Atalita, Hendrik Ewald van Velzen, Ernst “Augusto” Gressmann, Clovis Bazur, Newburn Patricks, Edwin Thomasa, Stenlly Cornelia, Mirugia Winterdal-Elisabeth, Jose “Djo” Casseres, Florencio “Lou” Martina, Dominico Herrera, Louis “Lucho Carelli” Zschusschen, Oswin Henriquez, Franklin “Peng’ de Windt, Macario “Macaay” Prudencia, Felix Juliana, Anselmus “Boy” Dap, Cornelis Felicia, Mafalda Minguel-Salsbach, Ludwig Samson, Fortunato van Aanholt, Oswald Specht, Julian Alejandro Frans, Wilfrido Valeriaan, Gilberto “Beti” Doran, Edgar “Gachi” Supriano, Andres Snijder, Hubert Fernandez, Leonard “Leo” Renaud, George Willems, Raymond “Boy” Brion, San Bamasito Papa Anita i Petronillia “Petoi” Coco.

WILLEMSTAD - Esaki ta e nuebe di e 40 baluartenan musikal ku a keda honrá durante un seremonia durante kua a nombra kayanan Oost Jongbloed, Liverpool, Bonam, Zuid Bonam i Kirindongo Abou. Un seremonia impreshonante ku a tuma lugá den Curaçao Festival Center ku mandatario- i famianan tabata presente. Ku aktuashon musikal di orkesta bou di direkshon di “El Toro” Colina pa interpretá algun kansion di esnan ku a keda nombrá. Riba e foto por mira despues di desvelo di e bòrchinan ku e nuebe baluartenan kendenan a risibí e onor aki na bida huntu ku mandatarionan lokal.