ORANJESTAD- Diadomingo dia 18 di mei lo tuma luger na Iglesia Anglicano na San Nicolas, e annual International AIDS Candlelight Memorial. E aña aki ta e di 25 aña cu Mundialmente e Atencion ta wordo pone riba e evento aki. E tema di e aña aki ta “Nunca Entrega, Nunca Lubida.”
Aki na Aruba Women’s Club of Aruba a organisa e evento aki durante e ultimo shete añanan. E aña aki Iglesia Anglicano, Women’s Club of Aruba y Fundacion E FARO a uni pa recorda esnan cu a fayece a causa di AIDS y tambe esnan cu ta duna apoyo y ta biba cu e enfermedad aki.
E evento aki lo Cuminsa pa 7’or di anochi na Iglesia Anglicano. “Nunca Entrega, Nunca lubida” ta corda nos cu nos no mester entrega sino continua cu e lucha contra AIDS y e Stigma y Discriminacion cu ta existi contra e personanan cu ta biba cu e Enfermedad aki.
E evento aki tambe ta ofrece e oportunidad pa haya sa mas tocante HIV/AIDS y e servicionan cu ta wordo ofrece localmente y e oportunidadnan cu tin pa uni y traha hunto den e lucha aki.
Corda cu e eror dim as grandi ta di no haci nada, solamente pasobra bo ta sinti cu loke bo por haci ta asina poco. Cu e tiki cu bo por haci bo ta haci mas di loke bo mes ta kere. Pueblo di Aruba ta keda cordialmente invita pa compaña nos diadomigo proximo pa 7’or di anochi na Iglesia Anglicano, Weg Seroe Preto #31 na San Nicolas.

ORANJESTAD – Un comision di expertonan di Direccion di Aviacion di Aruba bou guia di sr. Louis Reed, hefe di seguridad di trafico aereo di Aruba, a prepara aña pasa cuater proyecto pa reemplasa varios equipo pa garantisa e servicio di trafico aereo. E ekiponan aki tin mas cu 13 aña den servicio continuo y mester di wordo reemplasa pa asina sigura e continuidad y calidad halto den servicio.
FLIGHT DATA PROCESSORS
E proyectonan ta encera compra y instalacion di “Flight Data Processors”, un sistema nobo di procesamento di data cu diferenbte informacion di vuelo cu ta yega of sali di Aruba. Tur informacion di un plan di vuelo, notanan of otro buletinnan aeronautico destina pa Aruba ta drenta via nos sistema di satellite for di e centro di distribucion (Nadin) na Atlanta y ta wordo procesa via e sistema nobo di FDP’s y manda pa Toren di Control, Oficina di Plan di Vuelo y informacion aeronautico, Apron Management Unit, y na edificio di departamento di Aviacion Civil.
VOICE COMMUNICATION SWITHING SYSTEM
Compra y instalacion di un Voice Communication Swithing System, un sistema nobo di comunicacion na unda e canalnan di e frequencianan, telefoon, interphone, direct access lines cu otro centronan di control di trafico aereo den Caribe y Miami por wordo ehecuta individualmente for di e shete diferente posicion di trabou den Toren di Control, y Apron Management Unit y na edificio di departamento di Aviacion di Civil.
E sistema ta uno hopi moderno na unda e operador ta usa un touch screen pa haci su seleccion di frequencia pa comunica cu avionnan y tambe cu otro usuarionan cual ta mucho mas facil y rapido, y sin interferencia. E sistema aki asina wordo yama Voice Communication Swithing System (VCSS), y mescos cu e sistema di Flight Data Processors nan ta dual system y tur tin nan propio sistema di “no break power supply”.

ORANJESTAD- Nacionnan Uni a proclama e fecha di 15 di mei como dia Internacional di Famia na 1993 y tur aña ta scoge un tema pa cua ta invita organisacionnan gubernamental y no-gubernamental pa dedica atencion na dje.
E tema pa e aña aki ta: “Tata y famia: responsabilidadnan y retonan”.
E desaroyo mundial cu nos conoce na unda ambos mayor ta traha ta exigi tambe cu ambos mayor lo mester ta prepara pa guia y educa e yiunan. Nos no conoce manera antes unda diferente miembro di famia ta yuda den cuido di yiunan, ya cu cada famia tin su propio responsabilidad. E abuelonan tambe hopi bes ta ocupa of no por yuda pa guia nos muchanan.
Den algun caso ta busca hendenan di exterior pa yuda den cas y nos conoce tambe casonan unda e ruman grandi tin cu wak pa e ruman mas chikito despues di scol.
Awendia ambos mayor tin e tarea pa comparti e cuido paternal y no laga tur responsabilidad cay solamente ariba e mama mientras cu e tata tey solamente pa e parti financiero. Despues di trabou tur dos tin cu yuda cu cuido di e yiunan y si acaso e tatanan no ta suficiente prepara pa comparti e tarea, anto comunidad lo mester yuda nan segun Nacionnan Uni.
Den pasado por a constata cu e felicidad den famia tabata hopi dependiente di e lasonan entre e mama y e yiunan pero pa mas o menos binti aña e interes di e rol di e tata ta aumentando no solamente pa e parti financiero pero tambe pa e desaroyo di e yiunan.
Na diferente pais ta pone atencion ariba e apoyo di e tata pa e mama durante y despues di embaraso, cuido di baby, educacion di yiu muher y comparti paternidad.

ORANJESTAD- Parlamento di Aruba a instala un Comision Special di Obesidad cu ta consisti di mr. Juan Ady Thijsen, mr. Monica Kock y Dr. Richard Visser pa traha riba e problema alarmante cu tin na Aruba.
Ya na mei 2007 durante e reunionan di bi-partiet parlamentonan di Aruba y Antias a tuma e decision cu e comisionan permanente di Salud di parlamento di Aruba y Antias lo reuni hunto pa trata e problema di obesidad cu ta un problema grave di nos pueblo.
Riba 14 di November 2007 e comisionan di tur dos pais a sinta hunto y conclui cu e cifranan di tur dos pais ta masha alarmante.
A tuma e decision pa instala un comision di experto. E commission mester traha un plan nacional/structural.
Esaki lo ta importante pa e parlamentonan pa asina duna nan aporte den combati e problema grandi aki.
Loke ta importante ta pa bin cu un plan nacional pasobra e problema aki no por wordu soluciona dor di departamento di Salubridad Publico so.
Otro terenonan manera educacion y deporte tambe tin masha hopi efecto riba e problema aki. Deporte ta un di e mihor instrumentonan pa por baha peso. Si bo curpa, aunke bo ta gordo, ta hanja exercisio, e lo ta un curpa mas resistente.
Na januari 2008 a dicidi cu cada parlamento lo instala un comision pa obesidad pa e trabou por sigi mas lihe. Parlamento di Aruba riba 9 di mei 2008 oficialmente a instala un Comision Special Obesitas cu lo hasi e trabou pa logra yega na e plan.
E comision ta existi di mr. Juan Ady Thijsen, mr. Monica Kock y Dr. Richard Visser. Parlamento asina ta demonstrando cu e ta tuma e problema di sobre peso y obesidad na serio mirando cu 77% di nos adultonan tin sobre peso.

WILLEMSTAD – Den apénas 3 siman polis a tira dos pashènt sikiátriko agresivo ku a zuai ku kuchú den nan direkshon. Dia 23 di aprel polis a tira e hòmber J.Z. (35) riba Traiweg na Boca Sami i ayera polis a tira e hòmber L.S. (28) na Clioweg. A tira e pashèntnan sikiátriko pa motibu ku polis no por a dominá nan na un otro manera.
Dia 23 di aprel polis mester a bai Boca Sami kaminda riba kaya tabatin un hòmber agresivo ku mester a bai ku Klínika Capriles ku CEMS. Na e sitio tabatin polis ku mester a asistí e personal di CEMS pa transportá e pashènt sikiátriko agresivo. Dado momentu e pashènt a kuminsá tira e polisnan ku tayó i tambe menasá nan ku un palu di basora i un kuchú. E polisnan sin embargo no a logra desarmá e pashènt agresivo i a disidí na tira dirigí riba dje. Un bala a alkans’é na su las. Ayera atrobe polis a tira un pashènt sikiátriko agresivo. E suseso a tuma lugá na Clioweg den kareda di 13.43. E pashènt sikiátriko tabata menasá su bisiñanan ku un kuchú i ora polis a yega el a menasá nan tambe ku e kuchú. Despues ku na vários okashon e polisnan a dun’é òrdu pa pone e kuchú abou, un di e polisnan a lòs un tiru dirigí riba dje. E bala a alkans’é na e parti abou di su pia drechi.
LA PRENSA a kombersá awe ku e direktor di Skuchami, Norman Cicilia, ku a mustra riba e urgensia pa bin ku un tim di krísis mobil. “E tim akí lo ta alkansabel 24 ora pa dia i lo konsistí di polisnan èkstra ordinario ku no ta armá i nan lo ta kompañá pa un sikiater sosial. E polisnan ta di trein pa papia ku un pashènt sikiátriko agresivo te ora domin’é. P’esei mes nan no mester di arma di kandela, pasó nan ta di trein pa papia ku e pashènt i domin’é. Mi tin ku bisa ku no ta tur hende por atendé ku un hende armá ku un kuchú. Un hende armá ku un arma di kandela ta un otro situashon, pero un hende armá ku un kuchú, ta duna espasio pa papia kuné i kita e kuchú.”

WILLEMSTAD - Awe mainta ku edat di 83 aña sra. Elsa Martijn a haña su sertifikado di kòmpiuter. LA PRENSA tabata presente pa kapta e momentu bunita aki kaminda e dosente tabatin palabranan di elogio pa e dedikashon i saber di sra. Martijn. E kurso ta un kaso masha bunita ku a tuma ku patrosinio di Kámara di Komersio. E e-mail adres di Shon Elsa ta elsa.martijn@hotmail.co.uk
Pabien ku e bunita logro aki! Nos tin mas detaye i pòtrèt den nos edishon di awe.

Skina di Sorti, awe djaweps 15 di mei di 2008, ta kuminsá ku deseá tur hende un bon dia. Na di promé lugá mi ke manda e siguiente mensahe pa señor diputado Anthony Godett, despues di su tirada den Konseho Insular. Skina di Sorti, ni ningun otro kolumna ni medio no ta partisipá na elekshon. Nan no tin voto pa gana ni pèrdè. Lokual si nan tin ta influensia grandi riba e persepshon di kualke polítiko serka elektorado. Guera kontra di kualke medio pa definishon ta un akshon polítikamente bobo.
****
Un kapitalista, òf grupo spesífiko den komunidat tampoko tin voto pa gana òf pèrdè. Lokual nan tambe tin ta na su debido tempu influensia riba e forsa ku kual un polítiko òf partido polítiko por partisipá na un proseso elektoral. Nan ta sirbi komo sea finansiadó, kampañadó, aktivista òf forsa kreativo ku ta indespensabel den un proseso elektoral. Guera kontra di nan tambe pa definishon ta un akshon polítikamente bobo.
****
Elektorado no ta disidí riba kende nan ta bai vota a base di tirada di un diputado kontra di prensa, persona, kapitalista òf sindikalista. Nan ta vota a base di e resultado konkreto ku nan ta sinti di maneho ku e diputado ta hiba i òf e manera ku e diputado ta kumpli ku e persepshon ku e diputado a krea serka nan ora e tabata kampañá. Resultado elektoral pasá ta bisa sin lugá pa duda, ku e diputado no a kumpli.
****
Pasobra MAN a eliminá su mes komo un partner di koalishon pa PAR i PNP, i PAR no tabata dispuesto pa drenta un aventura ku diferente partido chikitu, FOL i su lider polítiko Anthony Godett a haña un “second chance”. E lider polítiko di FOL, personalmente tabata tin kosnan di drecha den bista di komunidat en general i su votadornan en partikular. Proseder di e diputado sinembargo no a reflehá ningun intenshon di drecha lokual komunidat i su votadornan a konsiderá komo violashon di konfiansa.

Dia 13 di yüni tur studiante mester tin nan resultado

WILLEMSTAD – Miéntras ku pruebanan kombiná a kuminsá for di e siman aki na skolnan básiko, awor tur kos ta kla pa e hóbennan den klasnan di eksamen di VSBO, HAVO i VWO kuminsá ku e pruebanan importante aki.
E promé dia di e eksamennan lo ta djabièrnè 16 di mei pa VWO i riba djaluna 19 di mei pa HAVO i VSBO. Un total di 3444 kandidatonan lo bai pasa nan eksamen den henter Antia. E periodo di durashon lo ta di kasi dos siman i lo disidí si nan lo tèrminá skol avansá ku éksito. Hopi di nan lo sigui ku nan estudio mas avansá e ora ei.
E gran mayoria di studiantenan ku ta bai pasa eksamen ta bin di VSBO. Esaki ta pa di kuater aña ku ta pasa eksamen final na VSBO.
Un total di 2493 studiante lo pasa eksamen di VSBO na Antia na 19 skol. Aña pasá e sifra aki tabata 2535.
Pa loke ta HAVO, un total di 723 studiante lo pasa eksamen awor aki kompará ku 659 na 2007 i VWO e sifra ta 228 na 2008 kompará ku 260 na 2007. E kantidat di skolnan ku nan studiantenan ta pasa eksamen ta 8.
Manera a indiká kaba, VWO lo ranka sali promé ku eksamen mañan ku e vak Ulandes. VSBO i HAVO ta kuminsá djaluna ku e mesun vak.
E periodo di eksamen lo keda será riba djabièrnè 30 di mei. E último eksamennan pa HAVO i VWO lo ta pa e vaknan di Spañó i Informátika.
E di dos periodo òf mihó konosí komo ‘hereksamen’ ta kuminsá e ora ei pa VSBO riba djaluna 16 di yüni i pa VWO i HAVO riba djamars 17 di yüni.

GRIFFITH
Prince Charles Roosevelt (57 aña)
Mihó konosí komo Chalie
A laga atras su mama Letty Griffith-Payne, rumannan Horace Griffith i Adela Rogers, Dave, Ann, Robertha Griffith, Madelene Felida i Rudney Vrutaal. Akto di entiero ta djasabra 17 mei for di Barrett Memorial Methodist Church. Bishita 1or i 3or tin un sirbishi i despues pa santana protestant Oranjestraat.

FRANCISCA
Medardo Liborio (73 aña)
Mihó konosí komo Da
A laga atras su kasá Etervina de la Rosa-Francisca, yunan Ninosca Francisca, Shermine Francinet i rumannan, Mignalda, Rignald, Norwin i sobrá yunan. Akto di entiero ta djasabra 17 mei for di El Señorial pa santana Roodeweg. Bishita 1or. Promé ku entiero tin un respòns 3or na El Señorial.

MARIANUS-MARTINA
Catharina Evelina (98 aña)
Mihó konosí komo Eva
A laga atras su yunan Hubert i Thirza Marianus, Ivonne i Isaac Coffie, Nilka i Hello Justiana, Carlos i Ivette Martina, Requilda Karel. Akto di entiero ta djasabra 17 mei for di El Señorial pa santana Roodeweg. Bishita 1or.

KOCKS
OIga Emerenciana
A laga atras su yunan Ludmila i Manuel Hart, Ephraim Kocks i nan famia, rumannan Adelaida Koeks, Antonia Goeloe, Nilda Kocks, Lucio i Oswaldo Kocks. Akto di entiero ta djabièrnè 16 mei. Bishita 1or na misa Brievengat. Promé ku entiero tin un s.s. di misa 3.30or i despues pa santana Janwe.

KOFFIE
Ronald Catalino (65 aña repentino)

BALTIMORE – Ayera e center fielder nobato di Boston Red Sox, Jonathan Van Every a debutá den Liga Grandi i tabata unu memorabel, pa e hungadó di ocho aña den Liga Menor.
El a subi den dia pa RSox i a konektá su promé hit.
Tambe e tabatin un bista hopi di aserka di un hugada ku e ta duda lo bai keda ripití.
Manny Ramirez, ku a hunga den left pa RSox ayera, ku su dreadnan i tur a realisá un di e mihó atrapadanan den último tempu i realisá un double play pa terminá e entrada, kantu di e muraya di left center field.
Ku dos koredor na base i un out, Kevin Millar, primera base di Orioles a konektá un bataso ku a parse di ta baña Ramirez. Pero Ramirez a bai atras duru i ta rèk kompleto pa kapturá e bala na punta di wante nèt riba “warning track”. El a sigui kore, subi e muraya ku tabata protehá pa kusinchi di shete pia haltu ku su pia drechi, saka su man bashí, duna un fanátiko, ku un kamiseta di Boston bistí, promé ku el a kai riba tereno.
El a tira pa e “cut-off man”, e segunda base Dustin Pedroia, kende su “relay” pa primera ta saka Aubrey Huff pa un doubleplay.
“Un gran hugada ku a salba e entrada”, asina e picher Jon Lester a bisa. “Esei ta “Manny being Manny”.
Mike Lowell, Jacoby Ellsbury i algun otro kompañero mas a bai para tras di e kámara di televishon ku tin den e dugout di RSox pa mira e repitishon entre ining.

CHICAGO – Jim Edmonds lo bai trata di rebibá su karera ku Chicago Cubs.
E outfielder veterano a pasa su eksamen físiko i a subi roster di Cubs ayera i por ta den aliniashon awe den e seri final kontra di San Diego Padres, pa ken e tabata hunga.
Edmonds tin promedio di .178 den 26 wega ku Padres a keda laga den libertat djabièrnè último. El a pasa “waivers” ayera.
“Nos tin un oportunidat pa agregá un gai ku ta un hungadó di kalidat pa un tempu i ku a hasi su dañonan den e parke aki i nos lo bai dun’é un chèns pa e drenta bèk den “groove”, asina e gerente general di Cubs Jim Hendry a bisa.
Hendry a bisa ku ta un rísiko chikí pa firma Edmonds kende dia 27 di yüni awor lo kumpli 38 aña.

Mr. Lorito (SLURP) ta yama tur hende un felis dia. Un saludo pa Don Remco ku ta pendiente di su Lorito tur dia. Tambe un saludo pa Doña Gladys ku no por sin su Lorito.
*********
Den e dianan aki nos ta na kareda djaki pa aya pa atendé diferente kos ku tin di aber ku nos trabou, pero ku sigur tin su impakto tambe riba nos produkshon. Lorito a disidí, ku e no ta laga nada stroba i ta sigui dal bai. No mas ku e pik di Lorito a lanta masha doló awe. Nos a purba ku stropi, awa ku salu i finalmente nos amigu Toni a bisa nos simplemente, dal un apel. Riba esei nos ta awor aki!
*********
Awe diputado Nini lo bai Aruba pa diferente aktividat, inkluyendo un di CAYCO i un kombersashon ku e hendenan di Meta Corp. Awe mainta nos a tuma nota di un artíkulo devastador ku a sali den e korant Diario na Aruba riba Grupo Cayco. Nos a papia ku produktor di e korant i el a bisa nos, ku e kos aki no ta masha bunita. Loke ta straña nos ta, ku e artíkulo (ku a sali for di dia 9 di mei último) no a haña ningun reakshon, ni di Cayco ni di otronan nòmber menshoná. Lorito di, laga nos keda leu for di esaki, pasobra ya kaba nos tin ku atendé ku kèts Nike den lodo!
*********
Un otro artíkulo ku a kapta nos atenshon ta, kon ta relatá ku un komersiante libanes ku ta papia ulandes i papiamentu i ku ta biba na Kòrsou, tin ròl grandi den loke ta pasando aktualmente na Libanon. E korant ulandes Twentsche Courant Tubantia ku Safi El Mir ta biba na Kòrsou, tin nashonalidat ulandes i ta papia arabir, ulandes i papiamentu. E tin 18 aña biba na Kòrsou ku 5 kompania aki. Ademas e tin un kompania na Jordaan na Amsterdam.

WILLEMSTAD – E korant mas grandi di Aruba Diario, a atvertí Aruba i Kòrsou pa aktividatnan di grupo Cayco. Awe mainta direktor/hefe di redakshon di e korant Jossy Mansur a konfirmá pa LA PRENSA na Kòrsou, ku den un edishon di e korant di nos isla bisiña, a sali un artíkulo amplio ku no ta masha bunita pa e grupo italo/argentino. Mansur a duna LA PRENSA lus bèrdè pa publiká partinan di e artíkulo siempre en kuando nos referí ku aki ta trata di un artíkulo di e korant rubiano. Remarkabel ta, ku e artíkulo a sali for di dia 9 di mei i te awe no tabatin un reakshon riba e ponensianan skèrpi ku tin den e artíkulo.
Den un artíkulo, amplio por sierto, e korant ta hasi menshon di e diskushonnan ku tabatin na Kòrsou relashoná ku desaroyo di e área di Rif. E korant ta bisa, ku e diskushonnan por poko a tumba gobièrnu di Kòrsou.
E korant ta bisa, ku diputadonan di Obranan Públiko di Kòrsou, ku ta íntimo amigu di un eks polítiko hóben arubiano, ta kontra e plannan di Meta Group i lo ta favoresé un grupo venezolano. Ta e mesun eks polítiko arubiano ku tabata promotor di e proyekto Namdar/Caribbean Cruise Line a hiba e grupo Kòrsou. E korant ta hasi menshon, ku e grupo Cayco (Gammos y Construcciones S.A.) tin su ofisinanan na Merida i Caracas. E doñonan ta originalmente desendientenan italo/argentino i nan kliente mas grandi ta PDVSA, asina e korant ta bisa. Den su investigashon, e korant ta splika, ku el a haña sa tambe ku abogado i konsehero di e grupo ta omo (tio) di e eks polítiko arubiano ku e korant ta identifiká komo Mo Diek. Tambe e korant ta bisa, ku el a haña informashon ku un eks kordinadó di e minister di Infrastruktura di Aruba tin un kontrakt di konsultant ku e grupo venezolano. E korant ta sigui bisa, ku el a kai riba diferente aspekto den e kaso aki di iregularidatnan ku tereno na Aruba, riba kua LA PRENSA lo bin bèk. Diario ta bisa, ku ta bon pa Gobièrnu di Aruba vigilá e grupo aki di serka,pa evitá ku nan ta komprometé esnan debil den komunidat di Aruba. Mester hasi meskos ku na Kòrsou, kaminda partnernan di koalishon a logra konvensé e diputado di Obranan Públiko di no drenta siegamente den e aventura ku e grupo venezolano. Diputado Anthony Godett a bisa e siman aki, ku e lo trata di pone e dos interesadonan pa e área di Rif huntu na mesa. Den e kuadro aki e diputado lo hasi un bishita awe i mañan na Aruba kaminda e lo papia tambe ku representantenan di Meta Group komo Cayco.

Kumpliendo ku e proverbio ku un hende no ta nunka grandi pa siña:

WILLEMSTAD – Awe mainta tabatin un seremonia simpel na Easy Computer den Otrobanda kaminda a presentá un sertifikado na un grupo di studiante adulto ku a pasa nan kurso di kòmpiuter ku éksito. Den nan tabatin Elsa Martijn di 83 aña di edat. 51 Aña pasá, sra. Martijn a slag komo e mihó kandidato den su klas i awe ku edat di 83 aña e ta slag pa su kurso di kompiùter.
Sra. Martijn ku awe ta un penshonado di 83 aña, ta sigur un bon ehèmpel mas pa nos komunidat. Huntu ku demas penshonado, sra. Martijn a kuminsá tuma kursonan di kòmpiuter pa penshonado na Easy Computer Colon. 51 Aña pasá sra. Martijn a slag komo e mihó alumno pa e kurso di “verkoopkunde” na e instituto “Handels-instituut St.Antonius” ku Kámara di Komersio e tempu ei a duna. Frans Vreugdenhil (den felis memoria) tabata un di e eksaminadónan. Sr. Vreugdenhil a hasi un promesa na sra. Martijn ku Kámara di Komersio lo kubri e próksimo kurso di su eskoho, debí ku el a slag ku mihó puntuashon. Aña pasá ku tabata 50 aña despues, e presidente aktual di Kámara di Komersio Ruud Thuis a tuma nota di e petishon i a kumpli ku e promesa di kubri e gastunan di kòmpiuter. Direktor sr. Roland Granville i Mènèdjer sr. ing. Rudsel Jantje i su dosente sr. Gregory Melfor di Easy Computer ta bisa, ku nan ta hopi kontentu i orguyoso ku su kursista di 83 aña ku ta sigur tambe un di e mihó kursistanan i sigur na un edat respetá asina aki. “Sra Elsa Martijn sigur ta un bon ehèmpel pa e otro penshonadonan di mes edat o mas hóben, pero mas prinsipal pa e hubentut ku ta pensa ku kurso di kòmpiuter ta difísil, no a kuminsá ainda òf no ta pa nan. Pabien ku e sertifikado di 1957 i ku e sertifikado di Easy Computer di 2008”, asina e kompania ta bisa.

WILLEMSTAD/DEN HAAG – Un montante di 4,5 mion euro ta envolví den limpiesa di asbèst riba e barku Otapan den haf di Rotterdam. For di 1999 e barku a drenta e haf ku un kantidat di 76.850 kilo di asbèst. Aña pasá a deklará e barku limpi i awe el a sali haf di Rotterdam rumbo pa Turkia, kaminda lo desmantel’é.
Na aña 1999 Otapan a drenta haf di Rotterdam i a keda te 2006. Despues e barku a sali pa Turkia pa sania. Sin embargo outoridatnan Turko a nenga di laga e barku drenta pasó tabatin muchu asbèst na bordo. Den e dokumentonan tabatin menshon di 1000 kilo, pero en realidat tabatin kasi 77 tonelada. E kapitan mester a bira bèk i bai Ulanda, kaminda aña pasá a sania e barku. A keda 850 kilo di asbèst riba e barku ku por deshasí di dje solamente ora desmantelá e barku. For di aña pasá òktober a saka e barku for di haf di Rotterdam i a mar’é na ‘s Gravendeel. For di einan lo tou e barku di 170 meter largu via Oude Maas i Nieuwe Waterweg. Djei nan, via un trayekto di tres siman, e mester yega Turkia kaminda lo desmantel’é i kita e sobrá asbèst.
Pa a sali for di e impase ku a dura for di 1999, e ministerio di Volkhuisvesting, Ruimtelijke Ordening en Milieubeheer (VROM), a sòru pa limpia e barku. Ulanda i e doño di e barku, e wèrf Turko Simsekler, a yega na un palabrashon tokante repartishon di e gastunan pa e barku a mara i keda den e haf di Rotterdam, gastunan di seguro, vigilansia i di tou. Ta trata di un montante di 240 mil euro ku Simsekler a paga di e total di 550 mil euro. Te ainda tin un kaso hudisial kanando, kaminda ta trata na kobra e doño anterior Mehikano di e barku, e montante di 4,5 mion euro.

 WILLEMSTAD – Ayera Curaçao Marriott Beach Resort and Emeral Casino durante un evento sosial a introdusí prensa ku nan inovashon di nan menú. No solamente kosnan nobo di kome a keda introdusí, pero tambe kòktelnan i biña.
Un menú nobo lo keda introdusí na tur restorant, bar, kasino i na pool. Tabata na prensa, spònsernan pa sosialisá ayera i ta e proménan pa purba e diferente kuminda i bebidanan.
E direktor di Food & Beverage, Ferry Zievinger a bisa na e okashon aki, ku komementu ta un aktividat sosial. “E promoshon aki ta otro ehèmpel di Marriott pa trese un diferente eksperensia di komementu pa pueblo di Kòrsou.”

WILLEMSTAD – Kuater hòmber, di kua dos menor di edat, a trata na roba Girobank djadumingu último. E robo a tuma lugá na e kantor prinsipal di Giro na Skalo. Gerensia di Girobank a konfirmá esaki. Sin embargo gerensia di e banko a opta pa no bai inmediatamente den publisidat ku e notisia aki pa no perhudiká e investigashon ku ta andando.
E ladronnan a drenta via di un bentana di e departamento di merkadeo i no kaminda tin sèn wardá. Ora e agente di seguridat a nota e sospechosonan riba e kámaranan di seguridat, el a notifiká outoridatnan konserní ku na nan turno a akudí rápidamente. E kámaranan a kapta entre e kuater hòmbernan dos menor di edat. E sospechosonan a bai ku tres kòmpiuter. E daño na e edifisio a keda limitá na e bentana. Polis ta investigando e kaso.

 

WILLEMSTAD - Kòrsou atrobe tin un primisia den Karibe. Djarason 14 di mei, Heineken Kòrsou a introdusí, pa promé biaha, Heineken David Extra Cold riba merkado Karibense. Ta trata aki di serbes èkstra friu for di sifon ku hasta e glas ta keda dòrná ku un bachi di eis fini, friu manera nos yunan di Kòrsou gusta. Ku e primisia aki Heineken Kòrsou, ta drenta un era nobo kaminda Heineken èkstra friu ta disponibel na tur e lugánan di dibertishon konosí den nos komunidat. The Sopranos, den Riffort Village, a keda friá pa e okashon aki na mes un temperatura ku e serbes, for di e sistema revolushonario aki, ta keda sirbí.
E públiko ku tabata presente a eksperensiá un ambiente kayente i fantástiko den un Soprano kaminda hasta tabata kai sneu.
E sistema di Heineken David Extra Cold ta un inovashon. E sistema revolushonario ta perkurá pa un kalidat haltu di serbes for di sifon. E serbes ta keda mas largu fresku debí ku henter e sistema ta ser friá. Debí na esaki tambe no ta nesesario pa spula e pipanan dor di kua e serbes ta pasa. Pa komplementá e sensashon di serbes friu den man di esun ku ta bebe e serbes Heineken a introdusí un frizer pa fria e glasnan den kua e serbes ta keda sirbí.
Ku introdukshon di Heineken David Extra Cold tur hende na Kòrsou awor por gosa di e kalidat haltu di serbes for di sifon.
“Enjoy Heineken responsibly”.

WILLEMSTAD - Ku firmamentu di e finansiamentu di e Academie Hotel, entre USONA, Gobièrnu Sentral i minister Omayra Leeflang, Kòrsou a bai un stap mas dilanti den krea oportunidat pa nos hóbennan por haña lugá pa hasi práktika den profeshonnan ku lo benefisiá nos sektor turístiko. E hotèl restourá den kurason di Punda, Hotèl Washington unda hóbennan por haña training riba tur nivel den e negoshi di Hotèl lo brinda oportunidat na 1000 studiante pa aña. E tipo di proyektonan aki ta duna hóbennan speransa real ku tin futuro pa nan den turismo. Un felisitashon ta bai na CHATA i CTDB ku a duna nan aporte na e proyekto aki i e direktiva nobo di e fundashon Academie Hotel ku mester sigui duna bida na e proyekto aki.

AMSTELVEEN/ WILLEMSTAD - E kompania di aviashon KLM a disidí, ku entrante mañan djabièrnè, e ta subi su tarifanan, komo konsekuensia di oumento di preis di petroli riba merkado mundial. Ta trata aki di e kompensashon ku pasaheronan mester paga pa kubri e oumento di preis di kombustibel ku e kompania ta usa.
Pa buelonan interkontinental tin un kompensashon ku entretantu a superá e montante di 100 euro pa buelo, asina un portabos di e kompania a anunsiá ayera.
Pa buelonan dentro di Oropa, e kompensashon pa buelo ta subi ku 4 euro te 35 euro. Den kaso di buelonan interkontinental e pasahero lo mester enfrentá un oumento di 10 euro te na e montante di 108 euro.
Pa un buelo ida i buèlta di Amsterdam pa Chicago, e pasahero mester paga no ménos ku 216 euro na kompensashon di preis di kombustibel.
Tur esaki, komo konsekuensia di e oumento sin presedente di preis di krudo riba merkado mundial.