WILLEMSTAD – Den tur e kosnan ku ta pasando den último dianan, nos tin tendensia, ku nos hóbennan ta pasando den e fase final di nan aña eskolar i ku tin eksamennan i pruebanan kordiná ku a kuminsá. Tin tambe sinembargo un otro aktividat ku sigur meresé atenshon ku ta Promé Santa Komunion. Despues di un preparashon basta largu, awe mainta un grupo grandi di mucha a risibí nan Promé Santa Komunion na misa di Santa Maria. E santu sakrifisio di misa tabata na enkargo di pastor Baak. Nos ta spera ku tur mucha i nan mayornan lo no selebrá awe so den kompania di famia i amigunan, pero pa nan korda tambe konstantemente e kompromiso ku nan a sera pa sigui un bida ehemplar i spiritual.

SAN FRANCISCO – For di komienso di nan eksistensia na 1883, e organisashon di Giants tabatin solamente shete doño prinsipal.
Ayera e doño prinsipal di San Francisco Giants, Peter Magowan, a anunsiá ku e lo retirá dia 1 di òktober 2008 na final di temporada regular.
William H. Neukom, e sosio general den e grupo di doñonan, lo remplasá Magowan komo e doño prinsipal, miéntras ku e presidente i COO Larry Baer o bira e presidente.
E kambio di doño aki mester haña aprobashon serka Major League Baseball. Esaki a keda di pasa den e próksimo reunion di doñonan di ekipo ku ta programá pa ta dianan 13 i 14 di ougùstùs awor na Washington, D.C.
Magowan ta sinti ku e ta laga e frankisia den e bon mannan di Neukom ku ta un miembro di e grupo di invershonistanan den e frankisia for di 1995.
“Mi tin realmente konfiansa ku Bill lo sòru pa tur kos. E ta bai trata di hasi e kosnan korekto pa nos fanátikonan, ku ta gana”, asina Magowan a bisa.

NEW YORK – E mènèdjer di Yankees Joe Girardi a bisa, ku Alex Rodriguez tabatin un otro bon dia i su mihó dia lo mester bini awe ora ku e MVP di Liga Amerikana lo ta riba tereno.
Rodriguez lo hunga den un wega di “extended spring” awe na e kompleho di Liga Menos na St. Petersburg, Fla., di manera ku e por haña kuater pa sinku turno na bate i hunga tersera base den e partido, kaminda e prospekto grandi di Tampa Bay David Price tambe lo aktua.
Si nada otro no presentá, Rodriguez lo ta ku Yankees na New York pa e wega di djamars kontra di Orioles.
Rodriguez no a hunga for di dia 28 di aprel na Baltimore ora ku el a leshoná su quadriceps drechi.
Yankees tin rekòrt di 6-9 den e 15 weganan ku nan a hunga sin Rodriguez.

SEATTLE – Un simpel akto di deportivismo a bira un di e kuentanan bon di e aña aki i ayera nochi e tres mucha muhénan ku a partisipá den e akto aki a keda honrá na Safeco Field promé ku e partido entre Padres di Mariners.
“Mi ta kere ku ta un honor”, asina Sara Tucholsky un di e tres mucha muhénan ku a keda honrá a bisa. “E kos aki ta ponebu un tiki nervioso, pero nos tur t’aki pa tira e promé lansamentu”.
Mallory Hioltman ku tabata hunga primera base pa e tim kontrali a pone rekòrt di honron durante di su kuater añanan na e skol.
“Mi tabata sa den ki doló e tabata. Ya ku mi mes tabatin problema ku mi rudia i mi kier a yud’é. Mi a puntra e empayer i e coachnan ku nos por a karg’é.
Holtman a tira un bista den direkshon di su kompañero di kuarto Liz Wallace i nan dos a karga Tucholsky rònt e basenan i a lag’é pisa e basenan ku su pia robes i asina Tucholsky a bin realisá su soño di a konektá un honron.
Kisas e tres mucha muhénan despues di e anochi di ayera lo sigui ku nan mes destino, pero pará riba montíkulo di Safeco Field ayera risibiendo aplouso di e asistensia ta mara nan huntu pa restu di nan bida.

SAINT LOUIS, MO., - Temple University Owls pa último bes a hunga den playoff den e Konferensha A-10 tabata na 2002.
Ayera nan a logra un triunfo di 7-6 riba Saint Louis, den e promé partido di un programa dòbel. Den e di dos partido Owls a kai vensí ku skor di 5-2.
Pero for di tempran a drenta notifikashon ku e otro ekipo ku por a stroba Temple University ku ta George Washington a kai derotá 9-8 kontra di Xavier loke a nifiká ku Owls a klasifiká kaba i un viktoria no tabta nesesario pa yega playoff.
Pero Owls ta anotá tres kareda den di kuater ining i a risibí un bon aktuashon di nan bullpen ku a tira shete ining di blankeo pa logra e triunfo di 7-6.
Ku e viktoria aki Temple University Owls ku tin rekòrt di 25-27 i 15-11 den e Konferensha A-10, aktualmente ta empatá na e di sinku lugá ku St. Bonaventure, faltando un wega pa hunga ainda. Si nan logra un triunfo mas i un derota di St. Bonaventure, esaki ta nifiká ku Temple lo por terminá na di kuater lugá.
Arschwin Asjes a drenta den di oktavo ining i ta retirá tur e seis batidónan ku el a enfrentá pa salba su di nuebe wega, kibrando e rekòrt di skol ku tabata riba nòmber di Peter Moore ku tabatin ocho wega salbá for di 1998. Ku e wega salbá aki tambe Asjes awor ta number tres riba e lista di weganan salbá di e skol.
Asjes a tira dos ining, enfrentá seis batidó i a poncha dos.
E playoff ta kuminsá djarason mèrdia na Campbell’s Fields, kaminda e ganadó lo pasa pa e finalnan di NCAA djasabra.

 
WILLEMSTAD – Direktiva di Partido Frente Obrero Liberashon 30 di Mei ku outorisashon di famia di Andruw Jones i ku sosten di Fundashon Nahambri ta organisá un misa pa e héroe Andruw Jones ku ta un ehèmpel pa hubentut lokal.
E misa ta mañan djadumingu 18 di mei pa 9’or di mainta na misa di La Birgen di Lourdes na Brievengat.
Kòrsou kompletu ta keda invitá pa ban duna sosten moral i spiritual na Andruw Jones na misa di La Birgen di Lourdes na Brievengat.

 WILLEMSTAD – Federashon di Beisbòl di Kòrsou ta anunsiá ku e kampionato 2008 di Beisbòl máksimo di Kòrsou ta keda dediká na Frank Curiel.
Franklin Isaias Curiel a nase na Aruba dia 6 di yüli 1945 i ta biba na Juan Hatoweg 143.
Frank manera tur hende ta yam’é, despues di a kaba skol na 1968 a bai traha na Biblioteka Públiko, el a bai traha na Ontwikkeling en Cultuur, ku despues a bira Fundashon Sedreko, kaminda el a traha di 1969 pa 2001.
Awe nochi pa mitar di 8 lo tin inisio di e kampionato AA ku e partido entre Sta. Maria Pirates One Net kontra di Sta. Rosa Indians/Ennia.
Un invitashon na tur fanátiko pa bin mira e apertura ku Boy Thode interpretando himno di Kòrsou.
Entrada ta fl. 5,- pa hende grandi i fl. 2,- pa mucha i 60+.

WILLEMSTAD – E famoso Kurá di RASPA ta hañando mas espasio, pa warda vehíkulonan ku polis kita for di e doño. Durante kòntròlnan di tráfiko, polis sa kita vehíkulonan for di nan doño ku no ta apto pa kore riba kareteranan públiko. E vehíkulonan akí ta bai Kurá te ora e doño drecha e vehíkulo.
Pa hopi tempu kaba tin problema ku espasio den Kurá. Konstantemente polis mester para kòntròlnan di tráfiko, pasó Kurá a yena. Den algun kaso polis sa opta pa laga un kran hiba e vehíkulo na kas di e doño ku e palabrashon ku e no ta sali riba kaya mas ku e vehíkulo. E palabrashonnan akí ta nesesario, pasó no tin otro moda di hasi, i mester kita e vehíkulo for di kaminda, ounke ku e palabrashon no ta un garantia ku e doño di e vehíkulo lo kumpli.
P’esei a bira nesesario pa kuminsá traha espasio den Kurá pa asina por warda vehíkulonan ku no por ta riba kaminda públiko. Pa traha espasio, e kompania ku ta krùsh e vehíkulonan, ta trahando duru e dianan akí. Doñonan di vehíkulo stashoná den Kurá, ku laga esaki mas ku tres luna, ta pèrdè drechi riba su propiedat. Esaki ta nifiká ku e kompania ku ta krùsh, ta liber pa saka e vehíkulo for di Kurá e hib’é bai krùsh.
Esaki sin embargo no tur bia ta den benefisio di e doño di e kran ku a transportá e vehíkulo pa Kurá. Ta asina ku miéntras e vehíkulo ta den Kurá, e doño di e kran ku a transportá e vehíkulo, tin speransa ku e lo haña su gastunan di transporte pagá. Pero na momentu ku krùsh e vehíkulo, e doño di e vehíkulo no ta bai paga e transporte mas, pasó tòg e no tin su vehíkulo mas. Den e kaso akí e doño di e kran ta pèrdè sèn pasó el a traha pòrnada.

WILLEMSTAD – Kòntròl di tráfiko dor di polis, no ta solamente pa traha prosèsverbal kontra outomobilistanan ku kibra ku regla. E kòntròlnan di polis ta pa protehá siudadanonan inosente kontra outomobilistanan iresponsabel.
Ayera durante e akshonnan di shofùrnan di bùs, polisnan ku tabata riba kaya, a nota un trùk ku tabata forma un peliger formal pa otro outomobilistanan ku tabata riba kaminda e momentu ei. Na altura di brùg Juliana, e polisnan a nota un trùk kargá ku heru. Ora a paga bon tinu, a resultá ku e trùk su baki tabata kompletamente kibrá i kasi e por a kita for di sobrá di e vehíkulo. E parti patras di e baki por poko tabata mishi ku kaya.
E shofùr di e trùk tabata transportando heru bieu i tabata na kaminda pa e tereno di HCC banda di TeleCuraçao. Esaki ta nifiká, ku e mester a subi brùg Juliana ku e vehíkulo peligroso. Tin indikashon, ku no ta promé bia ku e shofùr akí a sali riba kaya ku su trùk, ya komo ku el a duna di konosé, ku ta esaki ta su trabou.
Un biaha mas por mira kon importante ta pa polis ta riba kaya konstantemente, pa kontrolá situashonnan inaseptabel den tráfiko.

Skina di Sorti, awe djasabra 17 di mei di 2008, ta kuminsá ku deseá tur hende un bon dia. Ku diputado Anthony Godett ta rekurí na e táktika di Calimero, kaminda un hende ta krea e persepshon ku ta kòmplòt tin kontra di dje i ku e kòmplòt di prosedente di esnan privilegiá, ta algu ku nos a antisipá i básikamente a alertá pe for di dia 8 di aprel den Skina di Sorti. Ta den e mesun kolumna mi a duna di konosé di a fada di e práktika polítiko mediokre ku tabata tumando lugá.
****
E informashonnan ku mi a buska riba propio forsa i analisá, kreando mapa di e aktornan i nan sirkuito di influensia, mapa di strukturanan di personalidat i nan probabel tendensia di reakshon segun mi konosementu di tendensia di komportashon di organisashon/grupo (“organizational behaviour”) tabata mustra den direkshon di un debakel inevitabel (“onafwendbaar onheil”). Lokual ta mas molestioso i peligroso den henter e situashon polítiko ta, ku hende ku mester sa mihó tambe a kuminsá di mustra síntoma di e síndrome di “denial”.
****
Mi ta reprodusí parti grandi di e kolumna di 8 di aprel 2008, ku aki aya un opservashon adishonal.
****
Tin algun organisashon polítiko, ku ta den un direkshon outo destruktivo, pasobra algun dirigente influyente di nan a kai den e turmulina di ningamentu di e realidat (“slipstream of denial”), kaminda e persepshon ku nan ke krea a bira e realidat den kual nan ta operá. Nan a inkapasitá nan mes pa resepshon di e señalnan (te hasta esnan mas evidente) di alerta, ku nan ta riba e kaminda robes.

RIAD – Bou di preshon di Merka pa e oumentá su produkshon petrolero meimei di e subida di preisnan, Arabia saudita a bisa djabièrnè ku el a oumentá su kuotanan pa 300.000 barí pa dia, dia 10 di mei i ku esei ta sufisiente.
E minister di Petroli Ali Naimi a bisa periodistanan ku e oumento, ku tabatin komo kontesta riba petishon di klientenan, lo pone e produkshon total di e eksportadó mas grandi di mundu na 9,45 mion barí pa dia pa yüni. E titular a bisa ku Arabia Saudita ta kapas di satisfasé e nesesidatnan di tur e konsumidónan, insinuando ku solamente lo e por oumentá su produkshon komo kontesta riba e demanda.
E anunsio a koinsidí ku un bishita na e pais di e presidente merikano George W. Bush, kende a pidi oumentonan mas grandi den produkshon pa yuda pa preis di krudo baha. Bush a hasi un apelashon den forma personal na e rei Abdalá pa di dos biaha e aña aki, pero e saudínan a keda firme den nan posishon di ku nan a satisfasé e demanda kaba, asina e konsehero di seguridat nashonal di e presidente a bisa prensa.
“E ofèrta i demanda ta den balansa awor aki”, e minister di petroli saudi a bisa. “Kuantu mas Arabia Saudita mester hasi pa satisfasé e personanan ku ta kuestioná nos polítika i práktikanan petrolero?”.

SANTIAGO DE CHILE – Gobièrnu, “apsolutamente a respaldá” polis sivil i e aktual presidente di Interpol, Arturo herrera, akusá pa e presidente venezolano Hugo Chávez di violashon di derechonan humano.
“Apsolutamente nos ta respaldá e direktor di polis di investigashon, Arturo Herrera”, e minister sekretario general di gobièrnu i bosero ofisial, Francisco Vidal, a bisa den konferensha di prensa ku koresponsalnan strañero.
Chávez a kritiká Interpol i de paso Herrera, pasobra e organismo polisial ei a debilitá e intervenshon den mensahenan ku a haña den kòmpiuternan di e komandante gueriero Raul Reyes, morto den un atake kontra FARC 1 di mart.
Chávez a akusá Herrera di a partisipá na 1976 den e asina yamá “Operacion retiro de televisores”, ku di bèrdat a tuma lugá na 1978, disponé pa e diktador di e tempu ei Augusto Pinochet pa saka kadavernan di hendenan ehekutá i detenidonan ku a disparsé, pa pone nan disparsé tirando nan den laman, riu o lagunnan i eksplotá nan ku dinamit, di akuerdo ku e informashon ofisial.
Herrera, den deklarashonnan na prensa djabièrnè a bisa ku presidente Chávez ta mal informá i el a ninga “total i apsoluto kualke partisipashon den violashonnan di derechonan humano”.
Vidal a deskartá tambe sospechonan riba Herrera ku el a drenta polis na 1971, ora ainda Chile tabata goberná pa e presidente sosialista Salvador Allende.

WILLEMSTAD - Grupo Monarca ta e di kuater kompania mas grandi den konstrukshon di viviendas i apartamento na Colombia i esun mas grandi na Medellin i for di 2007 a mustra na Gobièrnu Insular su interes den desaroyá un plan turístiko na Kòrsou.
Grupo Monarca ta representá pa sr. Henry Madrid, presidente, sr. Gabriel Jaime Escobar Botero, Gerente General, sr. Enrique Acevedo, direktor tékniko.
Ta trata di un plan riba un tereno di 460.000 m2 na Plantage Jeremi ku lo konsistí di e.o. un hotèl di 200 kamber, un hotèl di apartamentu di 100 unidat, 400 Apartamentunan di luho i 400 Villas vakashonal. Di e bùngalo i e Apartamento vakashonal apr. 70 % lo wòrdu destiná pa ser di hür na turista.
Originalmente e plan lo a konsistí di 1680 unidat, pero despues ku DROV a oponé su mes kontra e kantidat aki, Grupo Monarca a disidí di adaptá e plan i baha e kantidat di unidat na 1100. Grupo Monarca su punto di salida ta, ku tur stakeholder mester por haña nan mes mas tantu ku ta posibel den e proyekto. Di e manera ei un proyekto por ta eksitoso.
E proyekto lo rekerí un invershon total di 300 mion US dollar i lo generá divisa dor ku e ta ser finansiá pa un parti supstansial ku kapital estranhero. Aki ta bon pa apuntá ku Grupo Monarca mes lo sòru pa finansiamentu di hinter e proyekto i no tin mester di ningun garantia di gobièrnu.
Tambe ta importante pa menshoná, ku segun kálkulo preliminar, e proyekto lo generá mas o ménos 1000 kupo di trabou, esta 400 durante di konstrukshon i 600 di forma permanente ora e proyekto ta kompletamente kla.

TOMSJANSEN-ROOI
Nilda Cecilia (69 aña)
Mihó konosí komo chichi
A laga atras su kasá Ascario Tomsjansen, yunan Lucette, Chardel, Julaydith Tomsjansen, Maylenne Ortela-Tomsjansen. Akto di entiero ta djamars 20 mei. Bishita 1or na El Señorial. Prom♪0 ku entiero tin un s.s. di misa 4or na misa Barber.

ELVIRA
Stenley Francisco
Akto di entiero ta djaluna 19 mei na Ulanda.

BARTON-CLEMENTINA
Maria Anastatia Holder
Akto di entiero ta djamars 20 mei 4or for di misa atventista Mundu Nobo pa santana Bottelier. Bishita 1or.

DORAN
Jullie Jeffers
A laga atras su kasá Henny Doran, mama Beryl Jeffers, rumannan Anestin Jeffers i demas rumannan, kuñánan Sandra Kip i Vola Campbell. Akto di entiero ta djasabra 17 mei for di El Tributo pa santana Brievengat. Bishita 9or-11or.

JONIS-VALERIAN
Merselita Martina
Mihó konosí komo Irma
A laga atras su yunan Ileen Jonis, Elsie i Mariso Statia-Jonis, Elna Jonis, Rignald i Ethel Jonis-Bundel, Sidney Jonis i Karin Simons, Junela i Pieter Lub-Jonis. Akto di entiero a tuma lugá den seno familiar djaweps 15 mei.

GRIFFITH
Prince Charles Roosevelt (57 aña)
Mihó konosí komo Chalie
A laga atras su mama Letty Griffith-Payne, rumannan Horace Griffith i Adela Rogers, Dave, Ann, Robertha Griffith, Madelene Felida i Rudney Vrutaal. Akto di entiero ta djasabra 17 mei for di Barrett Memorial Methodist Church. Bishita 1or i 3or tin un sirbishi i despues pa santana protestant Oranjestraat.

Mr. Lorito ta yama tur hende un felis djasabra. Danki pa tur e sosten ku nos a haña den e último dianan. Hopi no a duda den verasidat di nos informashonnan. Esnan ku a duda nos ta pordoná (pa e biaha aki). Nos a bisa na diferente okashon ku nos ròl ta pa kuestioná i duna informashon ku ta relevante pa diskushon komo korant. Den e kolumna aki tin poko mas sous, komo ku un kolumna su karakterístika ta otro. Ketu bai ainda tin hende ta pretendé di rabia ora nan lesa Lorito. Si ta pa bo rabia bo ta lesa, pon’é un banda. Abo ta felis, nos ta felis!
*********
E hecho ku PG tabata den sala ayera ora di sentensia den e kaso Schotte/LAPRENSA/BALA a hala masha atenshon. Imaginábu ku un PG ta interumpí su trabou pa e pasa wak un sentensia. Nos ta suponé ku algun hende mester a soda friu!
*********
Nos no a komprondé di kon partido MAN te awe no a duna un komentario riba e kaso Schotte. Es mas, lider di MAN tabata solidario ku Schotte (loke ta su eskoho) pero kiko e partido ta bai bisa su votadónan awor aki. Ta hopi straño, ku komo partido bo ta tene reunion pa evaluá mil i un kos, bo ta kla pa tene manifestashon i awor ku ta un kaso ku tin tendensia di mishi ku un di bo prinsipionan fundamental (MAN Limpi) si ta boca callao! Un aktitut masha remarkabel!
*********
Despues di e kaso di e siman aki pa kua LA PRENSA no a haña sosten di diferente otro medio (siendo ku pa nan tambe ta un kaso fundamental), Lorito a disidí di retirá komo miembro di Prensa Uní. Lorito no kier tende mas di e organisashon aki. Ni awor aki (e siguiente dia) ku tin un sentensia ku ta na fabor di Prensa Liber nos no a tende nada mas. Ademas masha tempu Prensa Uní no ta un organisashon dinámiko mas! Hasi nos un fabor, nos no kier niun premio mas tampoko di Prensa Uní! Saka nos for di e lista!

WILLEMSTAD – Royal Caribbean Cruise Line a skohe Kòrsou pa nukleo di su aktividatnan den e área aki. E kompania mes lo paga un estudio di faktibilidat, pa kua ya kaba a kuminsá hasi e trámitenan, asina e kompania ta bisa den un karta pa promé minister Emily de Jongh-Elhage. No tabata masha kla pa LA PRENSA, di kon e karta a bai pa e mandatario antiano, siendo ku e asuntu aki ta responsabilidat primordial di Gobièrnu di Kòrsou. LA PRENSA tin informashon, ku durante un bishita di e kompania na Kòrsou a papia ku e lider di PAR.
Segun e karta, e kompania ta hopi interesá den e desaroyonan ku tin na Kòrsou i kier ta parti di e desaroyonan aki. E karta ta bisa, ku nan kontakto ku Aruba tabata ménos agradabel i p’esei nan kier pone un klóusula den e dokumentunan na Kòrsou, pa evitá loke a pasa na Aruba. Por sinti klaramente for di e korespondensia, ku e kompania no ta at-all kontentu ku e manera ku a trata nan na e isla bisiña.
For di e karta por saka’fó, ku e kompania kier hasi tur estudio den forma aselerá i manera nos a bisa, ya kaba a anunsiá, ku e fondonan pa e diferente studionan ta disponibel. Esei ta nifiká, ku e kompania ta konvensé ku realmente Kòrsou ta un oportunidat pa nan aktividatnan, loke ta ilustrá un biaha mas, ku Kòrsou ta hañando mas i mas atenshon di invershonistanan internashonal.
Anteriormente ya kaba LA PRENSA a publiká ku e kompania ta mek riba e área di Caracasbaai pa su aktividatnan. E kompania kier hasi e área aki un sentro turístiko nobo grandi ku lo komplementá otro áreanan turístiko di Kòrsou. E karta di e siman aki ta e promé kompromiso konkreto di e kompania den e direkshon ei. Awor aki a keda na outoridatnan lokal pa duna kontesta i duna lus bèrdè pa e diferente estudionan pa finalmente kuminsá ehekutá loke e kompania di renombre aki tin na bista.

WILLEMSTAD – LA PRENSA a haña un seri di felisitashon despues di a gana e kaso den Korte ayera kontra di e polítiko/representante di Pueblo, Gerrit Schotte. Manera nos a informá, Wes a rechasá e demanda di Schotte pa e korantnan LA PRENSA i BALA rektifiká publikashonnan ku nan tabatin riba un kaso di ladronisia di su kas i e diskushon ku a surgi ku un kompania di seguro lokal riba e claim ku el a entregá.
For di despues ku e resultado di e kaso a bira konosí, ku Wes a adelantá, LA PRENSA a bin ta haña masha hopi yamada i mensahe ku a felisitá LA PRENSA pa e bon trabou.
LA PRENSA kier gradisí tur esnan ku a tuma e esfuerso pa drenta den kontakto ku nos. Nos kier pa nan sa, ku nos a apresiá esei enormemente. Nos ta sigui ku nos kompromiso pa sigui produsí loke nos ta konsiderá e korant di mihó kalidat na papiamentu.

WILLEMSTAD – EFEX 2008 ta sigur un eksibishon espektakular, presentando e último avansenan riba tereno teknológiko. LA PRENSA a tuma nota di e eksibishon aki ku a kuminsá djaweps anochi di International Trade Center (ITC). Un grupo grandi di empresa riba tereno di teknologia i esnan ku a avansá riba e tereno aki ta presentando nan produktonan. Algun di nan ku nos por menshoná por ehèmpel ta UTS ku a presentá su sistema nobo di Internèt mobil ku ta kapta nos isla kompleto i nan un velosidat di 3.6 megabit. Diferente otro empresa ta hasiendo uso di teknologia avansá komo parti di e servisio na nan klientenan, manera un MCB ku ta moviendo mas i mas den Internèt banking.
Ekspertonan a koinsidí ayera, ku Kòrsou sigur ta siguiendo e desaroyonan global di serka. Loke falta ta e konsenshi serka empresanan ku si bo no ta konektá ku mundu lo bo keda atras.
E apertura tabata na enkargo di minister Maurice Adriaens (Tráfiko i Komunikashon) ku den último lunanan a bira un defensor fuerte di e konsepto pa Antia i Kòrsou sigui hasi uso di teknologia avansá. E mandatario ta bogando pa mas hende haña aseso na teknologia i ta poniendo preshon pa baha tarifanan. E minister ta hañando hopi apresio tur kaminda pa su aserkamentu moderno i inovativo.
EFEX 2008 ta tuma lugá kada dos aña. E eksibishon lo ta habrí ainda awe di 6’or pa 11’or di anochi. Mañan lo ta un dia kompleto ku ta di 11’or di mainta pa 11’or di anochi.

WILLEMSTAD – Gobièrnu di Kòrsou a bai di akuerdo pa reuní ku e sindikato di Transporte Uní (STU) djaluna awor. Esei a pone un fin pa awor aki na e akshonnan di ayera na diferente parti di Kòrsou di parti di shofùrnan di bùs. E shofùrnan di bùs ku a reuní na sede di BTG, a sostené e desishon pa posponé e akshonnan despues di un dia agitá ayera.
Gobièrnu di Kòrsou a lamentá, ku kosnan mester a yega dje leu ei. Segun Gobièrnu, a tende di petishon pa reuní via via, pero no a aserká gobièrnu via di e kanalnan ofisial. Segun e splikashon di gobièrnu, djadumingu último Gobièrnu di Kòrsou a anunsiá algun alternativa pa aliviá e grupo di ménos rekurso relashoná ku subida di preis di kombustibel.
Entre otro a anunsiá tambe ku ta subi tarifa basá riba petishon di sindikato di shofùrnan di bùs. No opstante e petishon, di e propio sindikato na desèmber di 2007, pa oumentá tarifa, e sindikato den transkurso di siman ku a pasa a inisiá diferente akshon ku a intensivá awe.
Ayera shofùrnan di bùs a blòkia algun karetera ku a opstakulisá entradanan na diferente sitio. E blokeonan a bai den diferente forma por ehèmpel, pone bùsnan chikí blòkia kareteranan i shofùrnan di bùs a sinta abou stroba outo di pasa. Tambe na altura di parada di bus na Otrobanda a tira piedra i webu i tambe intentonan pa sende tayer i palèt na kandela. Shofùrnan di bùs a intentá na blòkia entre otro e siguiente kareteranan ku ta Seru Grandi, EEG-Weg, Cubaweg, Palu Blanku, Krusada na Schottegatweg Zuid i Noord, Oranjestraat, Grebelliniweg na altura di Wimco, Bahada di brùg Juliana, Waaigat, Krusada Pater Eeuwensweg na altura di Holiday Beach Hotel, Aeropuerto di Kòrsou.

WILLEMSTAD – Dia 15 i 16 di mei a tuma lugá e konferensha di turismo ‘Curaçao Challenge’ kaminda representantenan di e industria biahero ulandes i representantenan di industria di turismo di Kòrsou a diskutí e importansia di e merkado ulandes pa Kòrsou su turismo, kon mantené e popularidat di Kòrsou bou di e turista biahero ulandes i e mihó manera pa konhuntamente enfrentá e retonan relashoná ku e desaroyo riba término kòrtiku i largu.
E Curaçao Challenge aki ta un inisiativa di Ofisina di Turismo i a wòrdu organisá den koperashon ku CHATA i otro stakeholders den turismo.
Den e grupo di representantenan for di Ulanda ta figurá personanan prominente den e mundu di operadó tòp di Ulanda, operadó spesialisá i kompanianan aéreo. E grupo, banda di e oradornan, a konsistí di Martin Does (Does Travel), Mark Boekhoudt (Maduro), Marianne Romijn (Kras), Steven van der Heiden en Manfred Lahey (TUI), Rob Bremer (Silverjet) Hans Ritman (Martinair) Welmer Blom (KLM) Mike van Snek (Kuoni) Natasja Eshuijs (Travel Trend) Jan Lokhoff i Theo de Reus (Reisrevue), Rene Brouwer (BrouwerBetist) i Hans Bommer (Van der Valk).
E konferensha a wòrdu moderá pa sr. Jan Lokhoff, e redaktor en hefe di e revista prominente di turismo, Reisrevue. E orador prinsipal tabata señor Steven van der Heiden ku ta CEO di e kompania TUI Nederland. Otro oradornan durante e mainta tabata sra. Evita Nita, Direktor General di CTB, diputado di Turismo, sr. Eugène Rhuggenaath, sr. Don Werdekker di CHATA, sra. Brenda Benjamin, direktor di Merkadeo di CTB, minister di Tráfiko Aéreo, sr. Maurice Adriaens i sr. Kees van der Most, direktor di e büró di investigashon NBTC-Nipo na Ulanda.