ORANJESTAD - Enconexion cu e conmemoracion di e di 205 anja (25 mei 1803) di descubrimento di e restonan di Santa Filomena den e Catacumbonan di St. Priscilia na Roma, diadomingo dia 25 di mei venidero, lo cuminsa un triduo na su honor na Iglesia Santa Filomena na Paradera.
E triduo aki lo tuma luga diahuebs 22 , diabiernes 23 y diasabra 24 di Mei. Ta resa e Santo Rosario di Santa Filomena pa 6.30 p.m. sigi pa Santo Sacrificio di Misa pa 7.00 p.m.
Diadomingo dia 25 di Mei lo tin Santo Sacrificio di Misa pa 5.30 p.m. Pa 5.00 p.m lo tin e Rosario di Santa FIlomena den Parke sigi despues pa un procesion.
E intencion di e misa aki ta na Honor di Mama Maria y Santa Filomena pa bendicion y guia pa miembronan y devotonan di e Confraternita Universal di Santa Filomena (23) Aruba. Y tur parokianonan.
Tambe adhunto ricibi varios potret di un conferencia cu a tuma lugar den e Catacumbonan di St. Priscilia na Roma na unda e tumba di Sta. Filomena a wordo descubri y na unda tabata presente e delegadonan di Aruba di e Confraternidad Universal di Santa Filomena.

ORANJESTAD - Dia 22 di mei di 7.30 pa 9’or anochi lo tin un anochi di informacion tocante di Reiki. Na Aruba hopi hende a yega di tende di Reiki, tin cu a sigui un of mas curso y tin hende cu a ricibi tratamento. Esnan cu a sigui un curso tin e habilidad di usa nan mannan pa yuda alivia dolor fisico, yuda nan mes of otro hende sinti mas paz interno, yuda cu un proceso di curacion, yuda kita toxico di curpa, duna un hende mas balansa den su bida.
Ademas Reiki ta yuda alivia stress. Durante e anochi di informacion lo trata topiconan manera: kico ta Reiki, con pa apliqu’e, e efectonan y algo di e historia di Reiki.
Un cursista di Reiki a duna e siguiente comentario: “Un mucha homber di ocho aña ya caba pa un aña tabatatin problema cu drumimento. Te 11’or anochi e tabata keda lanta y hopi activo. Mi a duna e mucha homber un tratamento prome cu drumi. Desde e dia ey e ta pega soño na e ora normal di drumi pa un mucha di ocho aña.”
Un otro señora a comenta: “Mi bida a bira mas profundo. Mi ta sinti cu mi tin mas forsa y otro hende tambe ta bias mi esey”.
Otro comentario ta: “Awor mi ta compronde cu no ta importante con mi bida tabata antes; y mi ta agradecido pa e regalo bunita unda mi bida a haya un comienso nobo. Un silencio profundo a drenta mi, un silencio di union.
Esnan cu kier sa mas di Reiki por acudi na e anochi di informacion. Pa mas informacion por yama Thea van der Kuyp na tel. 585-3759, cell. 567-1086 of email na theavdkuyp@yahoo.com.

 

ORANJESTAD - Stichting Arubaanse Carnaval (S.A.C.) pa medio di e comunicado aki ta recorda tur lider di grupo di Carnaval of representante cu manera palabra den e ultimo encuentro di luna di april 2008 a keda acorda cu lo reuni tur luna riba e di 3 diahuebs di luna.
Pero pa motibo cu representantenan di SAC encarga cu e encuentro cu gruponan di Carnaval ta viajanda pa Francia pa asina representa Aruba na e conferencia di Carnaval di FECC lo haci cambio riba e dia di encuentro stipula pa dia 22 di mei 2008.
E encuentro cu gruponan di Carnaval ta cambia pa diamars 20 di mei 2008 di 7:30pm te cu 9:00pm den sala Don Milo Croes na oficina di S.A.C.
Durante e encuentronan aki lo trata tur topico cu ta trata Carnaval di Aruba.
Puntonan cu ta stipula pa dialoga ta entre otro: programa di Carnaval 2009, documento pa pidi sosten financiero pa Aruba su Carnaval, facilidad pa actividadnan di Carnaval 2009, apertura di Carnaval 2009, asuntonan pendiente y otro puntonan cu lo por bini riba mesa durante e encuentro aki.
Alabez ta haci un yamada na tur esnan cu tin planea pa forma nan grupo pa asina participa den e paradanan di Aruba su Carnaval pa nan tambe ta presente pa asina keda na altura di tur e informacion cu tin rond di Aruba su Carnaval.
S.A.C. ta spera tur persona pa ta presente na tempo pa asina e encuentro aki cuminsa ytermina na e tempo stipula. Si pa cualkier motibo bo persona no por ta presente sea asina bon di informa esaki na oficina di S.A.C. of via sacaruba@hotmail.com.

ORANJESTAD - E prome siman di e proyecto “Aruba Conecta” tabata un exito rotundo den e districtonan di Oranjestad, San Nicolas y Noord caminda e participacion total a surpasa e cantidad di 200 participante na e workshopnan.
Durante e anochinan aki e participante a haya conseho practico con pa anda mihor cu stress, con pa conoce bo mes mihor y con pa biba mas conciente. Tambe a haya sa maneranan pa crea emocionnan positivo, con pa guia bo mes como persona y haci uso di bo poder interno.
E participante a haya sa con pa conoce su propio calidadnan den su bida, con pa laga pasado bai y cuminsa enfoka riba e momento cu pensamento positivo. A wordo demostra cu maske ta exsisti tanto negativismo e cambio pa positivismo ta posibel.
Den publico tabata reina un ambiente positivo. Participantenan a duna di conoce cu nan tin necesidad na mas tipo di workshop den e cuadro aki. Publico a enfoka riba e responsabilidad di cada cuidanano.
Departamentonan di Gobierno, companianan y medionan di comunicacion tambe ta responsabel pa enfoka mas riba e cosnan positivo y asina crea oportunidadnan nobo y mas positivismo den comunidad.
E mensahe final tabata cu cada acto personal di cada un di nos finalmente tin influencia riba nos dushi isla Aruba.
Departamento di Asunto Social di e forma aki ta sigi enfoka riba crecemento cu lo hiba nos hendenan na un desaroyo duradero. Alabes ta pidi comunidad di Aruba pa keda pendiente pa e proximo workshopnan den e dianan venidero.

E lo papia riba seguridad den area di Casino (Casinowezen)

ORANJESTAD - Manera ya publica na diferente ocasion, AH&SF ta organiza e Segundo Conferencia di Turismo y Seguridad den Caribe. E conferencia aki lo bai trata diferente topico, manera:
* Review of Tourism Security around the world
* Terrorism and Tourism: Responding to imminent threats
* Gangs: How to deal with them
* TOPP’s and Tourism Security (TOPP’s stands for: Tourism Oriented Policing/Protection Services)
* Casino Security
* Preventing and Responding To Hospitality Theft
* Food Safety
* How to build a risk based security program
E conferencia lo tuma lugar bou guia di Dr. Peter Tarlow, cu ta wordu considera den e mundo internacional como e experto specializa ariba e impacto di criminalidad y terrorismo ariba e industria touristico, tambe ariba e topiconan di “risk management” den “tourism and economic development”
Un di e oradornan na e conferencia aki lo ta Sr. David Shepherd, cu ta e Hefe Ejecutivo di e compania Readiness Resource Group (RRG), un compania chiquito propiedad di y maneha pa veteranonan cu ta ofrece servicio di preparacion den casonan di riesgo den area di seguridad na companianan comercial y departamentonan gubernamental atravez di analasys di tur e componentenan cu ta afecta e cliente nan habilidad pa maneha nan negoshi of projecto y ta yuda nan pa planea pa e continuidad di existencia.
Sr. Shepherd ta duna lecturanan atravez di Estados Unidos y a presenta tambe na televison entre otro na the Travel Channel, Discovery Channel, BBC, ABC, NBC, CBS y Today Weekends. Sr. Shepherd a testifica tambe dilanti di e Congreso di Estados Unidos y tambe e Senado Estado Unidense ariba topiconan manera terorismo, seguridad tecnológico di fronteranan y fraude den e mundo di tele-mercadeo.

MERKA, - E aspirante demókrata pa Presidensia di Merka, Barack Obama, ayera a bisa den entrevista na televishon ku e republikanonan mester laga su esposa Michelle Obama na pas, i konsentrá nan krítikanan riba é i riba su polítika.
“Si nan ta kere ku nan ta bai trata hasi Michelle un asuntu den e kampaña aki, nan mester tene kuidou, pasobra esaki ta inaseptabel”, e senador pa Illinois a bisa den deklarashonnan na programa “Good Morning America” di kadena di televishon nashonal ABC.
“Laga mi esposa na pas!”, Obama a señalá den mensahe direkto na su opositornan despues ku Partido Republikano di Tennessee a emití un video di kuater minüt riba “site” di Internet di YouTube, reprodusiendo komentarionan kontroversial di Michelle Obama.
A kritiká Michelle komo antipatriota pa a komentá na febrüari último: “Pa promé bia den mi bida adulto, mi ta sinti mi orguyoso di mi pais”.
Señora Obama a deklará despues ku el a referí n’e sentido síviko ku a keda spièrtá, ku kampaña demókrata ta logrando motivá.
Den su komentarionan ayera, Obama a bisa ku “Michelle ta e persona mas honesto, e mihó persona ku ami konosé. E stima e pais aki. I esnan ku ta trata hunga ku pida di su komentarionan p’e keda mal mirá, mi ta kere ku esaki ta di klase abou”.
Michelle a kompañá su esposo durante e entrevista ku ABC, i a bisa ku e merikanonan ta kla pa interesá nan mes den asuntunan i no den kosnan “ku no tin nada di aber ku mehorá bida di personanan”.

MERKA, - Hillary Clinton a bisa ayera ku su rival Barack Obama kisas ta adelantando demasiado dor di aktua komo kandidato presidensial di Partido Demókrata promé ku e elekshonnan primario finalisá.
Clinton i Obama mester konfrontá otro den vários elekshon primario, inkluyendo esnan di Kentucky i Oregon awe, pero Obama kada bia a kuminsá aktua mas komo e kandidato ku tin ku konfrontá e kandidato republikano John McCain den e elekshonnan general di novèmber.
Obama tin pensá bishitá estadonan di Iowa i Florida den kurso di e siman aki, konsiderá krusial den un elekshon.
“Bo por deklará loke bo ke, pero si bo karesé di votonan nesesario, esaki ta karesé di importansia”, Clinton a bisa ayera den entrevista via satélite ku kanal di televishon di Oregon, promé ku e akto di kampaña na Kentucky, kaminda e tin posibilidat amplio pa gana.
Obama tin te ku awor aki 1.910 delegado kontra 1.721 di Clinton.
Tin mester di 2.026 delegado pa optené nominashon den Konvenshon Nashonal Demókrata.

WILLEMSTAD – Direktiva di Curaçaose Dambond ta rekordá tur su miembronan riba un reunion general ku ta tuma lugá riba djadumingu 25 di mei.
E reunion ta kuminsá pa 3’or di atardi den edifisio di SSK na Schouwburgweg 44, banda di edifisio di APNA.

 NIJMEGEN – E tim di futbòl ulandes, NEC Nijmegen a yega na un akuerdo ku Gregory Elias.
E negoshante riku di Antia, aki lo bai spònser pa e próksimo tres añanan e ekipo aki ku mei mion euro, asina Omroep Gelderland a bin haña sa.
Elias no ta un deskonosí den e sirkuito di futbòl.
Na 1976 e tabata serka e fundamentu di J.A. van den Herik B.V. E negoshi aki di e èks presidente di Feyenoord, Jorien van den Herik. E tempu ei e tabata un di e partinan prinsipal di “Kale Leider”.
Elias tambe ta tras di e proyekto di “Antia rumbo pa Mundial”.
E mishon aki e kier trata di logra huntu ku Leen Looyen, ku ta e scout prinsipal di NEC.
Elias tambe ta un hòmber ku ta yuda karidat.
Awe NEC lo duna mas detaye di e koperashon entre nan i sr. Gregory Elias.

WILLEMSTAD – Jonathan Polonius a konektá tripel, su promé hit di wega pa empuhá dos kareda den kabes di 10 ining pa duna su ekipo Sta. Rosa Indians/Ennia un viktoria di 5-3 riba Royal Scorpions Mr. Baseball/Banco di Caribe den e wega ku a tuma lugá den Parke Tio Daou.
Jurandi Gregorie a habri pa Sta. Rosa, miéntras ku Kevin Hennep pa Royals Scorpions.
Den kabes di terser ining e ekipo Indjan ta anotá dos kareda, pero den bòm di e mesun entrada Scorpion ta kòrta anotando un kareda pa pone e skor 2-1.
Den di seis ining Indians ta anotá un kareda pa bai ariba 3-1.
Scorpions ta bin empatá e partido 3-3 ku dos kareda den bòm di oktavo ining.
Sta. Rosa ta pone su rèkòrt na 1-1 i Scorpions 0-1.
Pa Sta. Rosa: 5 kareda, 9 hit, 3 eror. Raymond Martis, 1-1, ta gana den relevo i Quincy Ascencion di 3-2.
Pa Royal Scorpions: 3 kareda, 8 hit, 0 eror. Swenton Martina, 0-1, ta pèrdè i Andley Simmons/Ferdinand Rosalia di 5-2.
Awe kampionato ta kontinuá ku Sta. Rosa Indians/Ennia kontra di Groot Kwartier Stars/Mangusá pa 19:30pm, mitar di 8 na Tio Daou Ballpark.

WILLEMSTAD - Den seno di bida familiar mester bai adaptá i tuma medida pa kontrarestá e subimentu di preis, i tambe e kosto di bida ku ta birando mas karu pa tur hende. Asina Mirtha Leetz-Cijntje, presidente di Fundashon Sentro di Dama, a splika. E mama i tata, ta esnan ku ta kontrolá e finansa di kas, señora Mirtha Leetz-Cijntje a splika, relashoná ku selebrashon internashonal di Dia di Famia.
E presidente di SEDA a splika, ku e selebrashon a bai hopi bon. E komunidat di práktika i kliente i tambe gruponan di dama a asistí na gran kantidat riba e plenchi di SEDA, miéntras ku e programa tabata hopi variá. E tema di e dia tabata ‘Molda progreso’. Ta e mesun tema na kua a dediká atenshon na dje, dia 8 di mart último, riba Dia Internashonal di hende muhé. Ta trata di un tema, ku universalmente, durante dje tres añanan benidero ta wòrdu usá pa evaluá progresonan ku ta tuma lugá riba sierto área di bida familiar. SEDA tin un aña kaba ku ta trahando riba e parti di entrada pa stimulá konsientisashon di tur e problemanan familiar ku tin den nos komunidat.
Tambe SEDA ta dediká atenshon na tur loke ku nos tin, den kultura pa loke ta trata e bida familiar, segun señora Leetz-Cijntje.
Durante dje selebrashon siman pasá, SEDA a konsentrá riba dos asuntu hopi importante. Na promé lugá a klousurá e kurso titulá ‘Tan ken mi ta’, ku shete sertifikado di mayornan hóben ku a forma parti di un grupo di 20 hende ku a inskribí. Tambe tabatin un di dos grupo di dies kursista, ku a logra ochenta porshento di asistensia. Na un manera artístiko, e grupo aki a trese dilanti, kiko tabata e partinan di mas importante di kresementu den e ocho simannan di sinku ora di lès, durante kua a dediká atenshon riba partinan di nan kurpa, mente, e parti spiritual i tambe e parti emoshonal.

WILLEMSTAD - Pa medio di un diálogo, ku mester tuma lugá entre di eks i aktual miembronan i direktiva di Horecaf, mester evitá ku e aktua sede di e sindikato ta wòrdu bendé. Eks sekretario general di Horecaf, Oscar Semerel ta hopi preokupá pa benta di e edifisio ta situá riba un bon lokalidat na Seru di Otrobanda, dilanti di e anterior Sint Thomas College. ‘E edifisio ta fásilmente alkansabel i por wòrdu bon eksplotá, den kaso ku e wòrdu drechá’, ta opinion di Semerel. Tur hende por alkansá e edifisio fásilmente.
Ademas e edifisio, ku for di aña 1977, ta sede di Horecaf, ta riba tereno propio i ta un edifisio monumental. Semerel a sigui splika, ku no ta un edifisio na kua sin mas por hasi kambionan.
Benta di e sede di Horecaf, segun e eks sekretario general di e sindikato, nunka lo no por produsí e suma ku realmente e ta bal.
Den kaso ku ta un problema tin, mester purba yega na un otro solushon, ménos esun di bende. Esaki pasobra ku tin hopi posibilidat ku e edifisio.
Segun Semerel, e ta na altura ku tin hende den seno di gerensia di hotèlnan, ku tambe ta kontra di benta di e hotèl.
Oscar Semerel entretantu a partisipá na sekretario general di Horecaf, Kenneth Valpoort, su deseo pa konhuntamente ku e interesadonan pa den forma di un diálogo, buska un solushon pa evitá benta di e edifisio. ‘Tin un otro solushon, den forma un plan maestro eksistente, ku mester a produsí sufisiente fondo pa evitá ku e organisashon ta karga ku demasiado gastu.

WILLEMSTAD – 300 Trahadó mas por haña trabou na Renaissance Hotel i esnan ku ta interesá por akudí djasabra awor na e asina yamá ‘’Job Fair’ di e hotèl. E Feria di trabou ta kuminsá 10or di mainta i ta dura te ku 6or di atardi. Esaki ta lokual, Angelo Martes, gerente di e departamentu di e Departamentu di Rekurso Humano di Renaissance Hotel a konfirmá den entrevista ku LA PRENSA.
Segun Martes, e intenshon ta pa duna oportunidat na pueblo di Kòrsou i tur hende ku ta interesá den hospitalidat, pa forma parti di e organisashon. Djasabra e interesadonan personalmente por risibí informashon i na mesun momentu por apliká pa e trabou ku nan ta deseá. Angelo Martes a sigui splika, ku durante e Feria di trabou, lo ta posibel pa solisitá pa tur posishon. ‘Riba nos website, www.renaissancecuracao.com, tin publiká tur e puestonan ku tin habrí i tur hende ta liber pa solisitá riba e vakaturanan’.
Refiriendo na e kantidat di personal ku Renaissance tin mester, Martes a bisa ku e hotèl ta den e proseso pa gradualmente yena e organisashon. Riba e kantidat di hende ku Renaissance tin kaba den servisio, e hotèl tin mester di 300 hende. Di e kantidat aki, tin mester di 100 hende pa traha den kasino.
E sobrá 200 empleadonan lo wòrdu empleá den e hotèl.
Kontestando e pregunta, pa kua tempu, e aplikantenan lo por wòrdu tumá den servisio, señor Martes a bisa ku esei ta basá riba e planifikashon aktual di e hotèl, ku Renaissance lo habri na òktober awor. Saliendo for di e punto di bista di e planifikashon ei, e selekshon pa e parti mas grandi di e vakaturanan, ta tuma lugá na yüni awor. Ta trata di prinsipalmente e posishonnan pa den kasino ku mester wòrdu yená. E hendenan ku ta bai traha den e sektor aki, lo mester sigui un kurso di un durashon di por lo ménos tres luna. Despues gradualmente, Renaissance lo kontinuá ku e proseso di tuma hende servisio, te ku luna di sèptèmber.

COLOMBIA, - Un di e damanan rebelde colombiano a hasi yamada na otro miembronan di FARC pa nan entregá nan mes, un dia despues ku e mes a entregá.
Nelly Avila Moreno, konosí komo “Karina”, a bisa ku e tabata deskonektá for di lidernan di “Fuerzas Armadas Revolucionarias de Colombia” (FARC) ya for di añanan.
E dama rebelde aki a bisa ku e grupo ta den desórden.
Avila a entregá su mes djadumingu último.
Outoridatnan a bisa ku Avila ta responsabel di masakrenan, sekuestronan i atakenan, inkluyendo morto di tata di Presidente colombiano Alvaro Uribe.
“Karina” ta ninga tur konekshon ku e asesinato.

ARIES: Asuntunan di pasado ta trese awor hopi suerte i éksito pa bo. Komuniká ku e personanan ku por yudabu haña oportunidatnan nobo pa progresá. 02,26,16.

TAURO: Bo mester tene hopi kuidou unda bo ta bai i den ki kompania. No riska den lokual ku bo ta konsiderá peligroso. Bo tin ku ta sigur den ken bo ta depositá bo konfiansa. 06.

GEMINIS: Kuidou ku engaño i traishon. No papia mas di lokual ku mester i warda bo sekretonan. Pone bo mes den kontakto ku bo famia. 35,290,19.

KANSER: Kontrolá bo karakter si bo ke mira situashonnan difísil kambia. Dediká bo mes na bo asuntunan personal. Evitá di envolví bo mes den diskushonnan pa asuntu di plaka. 10.

LEO: Enkuentro ku un hende ta nifiká hopi den bo bida i ta lagabu biba momentu inolvidabel. Bo ta bai enfrentá e bèrdat i ku ta bai nifiká un giro den bo bida. 14,02,36.

VIRGO: Mantené bu mes riba tereno sigur i desaroyá pasenshi infinito ku esnan ku ta trata di hasi kosnan imposibel. Bo alegria i personalidat ta lagabu deskartá. 25,48,31.

LIBRA: Un problema hopi personal ku tabata afektá bo nervio ta wòrdu solushoná. Bo por gosa awor di libertat ku pa tantu tempu bo a deseá. 11,05,27.

SKORPION: Hopi kuidou den asuntunan di kurason. No persiguí ni preshoná niun hende. Libra bo mes di tur tenshonnan. Hasi lo mihó ku bo ke. 07,10,40.

SAGITARIO: Hasi lokual ku ya bo a disidí. Papia e bèrdat ku bo boka. Move pa otro lugá i traha ku otro persona si bo ta konsiderá nesesario. 37,87,06.

WILLEMSTAD – “United Telecommunication Services UTS, meskos ku esei tabata e kaso den 2006 a hasi un ganashi den 2007. Si den 2006 e ganashi tabata alrededor di 25 mion florin, den 2007 e montante ainda no ta konosí ofisialmente pasobra e kompania mester kaba ku su kuenta anual, ku ta kuestion di algun siman mas”, asina direktor di e kompania Paul de Geus a konfirmá den Staten ayera.
UTS tabata wéspet di parlamentu antiano ayera pa diskutí situashon aktual di UTS i futuro implementashon di ICT den e kompania, tambe ku mira riba desaroyonan estatal ku ta na kaminda.
Miembronan di Staten a hasi bon uso di e okashon pa hasi preguntanan krítiko na gerensia di UTS ku tabata presente.
E anunsio di ganashi di parti di UTS no a bin sin mas: durante e enkuentro ayera tabatin miembro di parlamentu ku a puntra si ta intenshon pa “UTS sigui hasi ganashi di e forma aki riba lomba di pueblo”.
UTS, segun su direktor ta operando den un merkado kompetitivo. Nos no ta den un merkado monopolista. Den e merkado aki gobièrnu a stipulá regla ku nos por subi riba sierto nivel, anto UTS ta tene kuenta ku esaki, segun De Geus, referiendo na e pregunta di parlamentu kiko ta e ganashi maksimal ku ta pèrmití pa UTS hasi.
Paul de Geus a splika, ku pa kuminsá ta bon pa splika, ku e ganashi di 2006 no ta un ganashi sin mas: aki por papia mas bien di un ganashi fiskal, el a bisa.
El a splika ku UTS, for di su promé aña di eksistensia a konosé pèrdida kuantioso. Na 2003 UTS a hasi un pèrdida di 4 mion florin. Na 2004 UTS tabatin 33 mion na pèrdida, miéntras ku na 2005 tabatin un pèrdida di 54 mion florin.

WILLEMSTAD – “Kompania di telekomunikashon UTS tin mester di un 400 mion pa modernisá su infrastruktura aki na Kòrsou. UTS ta awor aki den un merkado hopi kompetitivo i komo tal no tin otro eskoho sino di sigui kompetí riba e nivel di duna e mihó servisio posibel”, asina direktor di UTS Paul de Geus a informá parlamentu ayera durante un reunion di Komishon Sentral.
Gerensia di UTS a duna un splikashon ekstenso riba su funshonamentu.
Awor aki UTS mester bai pone un infrastruktura kaminda mester yega na kada kas ku kabel di fibra óptiko.
“Kòrsou tin un 50 mil kas. E invershon ku UTS a kalkulá ku e mester bai hasi ta alrededor di 400 mion florin. No mester lubidá ku kada kas ku mester bai awor aki lo kosta UTS 9 mil florin”, asina De Geus a informá.
“Telekomunikashon”, segun De Geus, “semper a sòru pa un bon desaroyo ekonómiko di kada pais. Un pais ku no a konosé e desaroyo ei, no a konosé tampoko un desaroyo sosial ekonómiko balansa” el a splika.
Tin un relashon direkto, segun International Telecommunication Union entre e nivel di desaroyo di telekomunikashon den un pais, ku e desaroyo sosial ekonómiko dje pais ei.
Esei mes ta pone e responsabilidat riba lomba di UTS pa sòru pa un nivel di desaroyo teknológiko haltu. UTS no ke kai atras, pasobra esei lo nifiká ku desaroyo di pais tambe ta bai atras i ounke UTS no por kompetí ku e forma ku paisnan grandi ta avansando den nan teknologia, nos mester sòru pa nos no keda muchu atras tampoko, segun De Geus.

WILLEMSTAD - Ku eliminashon di siklo 3 di Enseñansa di Fundeshi, de fakto a eliminá Enseñansa di Fundeshi. Loke de fakto tin awor aki ta e skol básiko manera nos a konosé semper, den un estilo nobo.
Na palabra presidente di SITEK Sidney “Bicho” Justiana, kende ayera tardi tabata invitado di parlamentu di Antia.
Tal manera nos a informá for di ayera, parlamentu di Antia e siman aki lo profundisá riba Enseñansa di Fundeshi. Staten lo reuní ku e diferente partidonan enbolbí pa asina haña un bista mas amplio posibel riba funshonamentu di e tipo di enseñansa aki. Esaki ta den kuadro di e Lei pa Enseñansa Obligatorio ku parlamentu mester trata den un reunion públiko próksimamente.
Parlamentu resientemente a trata e proposishon di lei pa eliminá siklo 3 den Enseñansa di Fundeshi. Vários miembro sinembargo a ekspresá e deseo pa tende di esnan den vèlt kon e sistema di enseñansa aki a bin ta funshoná den práktika.
Esei tabata motibu tambe pa parlamentu tuma e desishon ku ta papia ku mas tantu partner den enseñansa posibel riba e tema aki.
Ayera tabata turno di e sindikato SITEK pa duna su punto di bista riba esaki.
Presidente di SITEK a kuminsá na remarká den su disertashon, ku e ta desilushoná pa e forma ku parlamentu ta duna “follow up” riba reunionnan ku tene riba enseñansa.
“Algun luna pasá nos tabatin por ehèmpel un reunion hopi importante riba enseñansa, pero nos no ta weta nada ku ta sosodé ku e konklushon i resultado di e reunion. Mi ke pidi atenshon pa esaki”, segun Justiana.

WILLEMSTAD - No ta Hero Brinkman ta determiná agènda di e siguiente enkuentro parlamentario triparte entre Antia, Aruba i Ulanda. Ta konhuntamente ta hasi esaki i nos ta konfia ku si Brinkman kere ku e por hasi algu kontra regla, ku presidente di e enkuentro lo atendé riba esei.
Pedro Atacho, presidente di Staten a laga komprondé bon kla, ku e no ta bai laga sirkunstansianan aki influensiá su partisipashon.
E figura Brinkman a bira un figura kontroversial, na momentu ku el a ofendé pueblonan di Antia, kalifikando nan komo un “corrupt boevennest” kaminda e mihó kos ku Ulanda por hasi ta di bende e islanan na findishi.
El a ninga di hala su palabranan bèk, ku konsekuensia ku e promé enkuentro tripartite ku tabata programá na kuminsamentu di e aña aki, no por a sigui. Parlamentu antiano a pone komo kondishon pa e di dos enkuentro si kontinuá, pa establesé regla di wega. “Nos no ta interesá den reglanan nobo adishonal, pero nos lo ta kontentu si por usa e mesun reglanan ku ta konta pa Tweede Kamer”, Atacho a duna di konosé.
Algun dia pasá, Komishon pa Asuntu Antiano i Rubiano di Tweede Kamer di Ulanda a tuma e desishon kaba ku e no tin nada kontra, a usa e mesun reglanan ku ta konta den funshonamentu di Tweede Kamer ta konta tambe pa e enkuentro Parlementair Overleg Koninkrijksrelaties – POK – ora esaki tuma lugá na luna di yüni awor.
Esaki, segun presidente di parlamentu antiano Pedro Atacho, “ta un indikashon kaba kiko por spera di parlamentu ulandes mes. E no ta antisipá ku si unabes e komishon a aprobá e petishon di Antia, ku Tweede Kamer lo disidí otro.

PARAMARIBO / WILLEMSTAD - E kòntròl 100 porshentu na aeropuerto Schiphol mester keda, pero ta nesesario si, pa e trato bira mas humano. Esei ta loke promé minister di Ulanda Jan Peter Balkenende a konkluí, despues di su bishita na e eks kolonia di Ulanda Sürnam.
Jan Peter Balkenende, huntu ku su kolega enkargá ku Asuntunan Eksterior Maxime Verhagen a bishitá Sürnam den e dianan ku a pasa. Nan a asistí na e kumbre na Latinoamerika ku mester a atendé entre otro ku e problema di pobresa na mundu.
Tabata konosí for di kuminsamentu, ku e tema di kòntròl 100 porshento na Schiphol lo a bira un tema importante durante e deliberashonnan entre e dos ministernan ulandes i gobièrnu di Sürnam.
Pa bastante tempu kaba Sürnam a bin ta kritiká e forma ku outoridatnan na Schiphol ta trata siudadanonan di Sürnam ora nan yega Ulanda. Ta komo sifuera ta asumí sin mas, ku tur Sürnam ku yega Ulanda ta bolitero òf tin droga na nan kurpa.
E kos aki ta un ofensa pa nos, anto nos ke pa e kos aki para mas lihé posibel, gobièrnu di Sürnam a reiterá na diferente okashon. Presidente dje pais Ronald Venetiaan den pasado a yega di skibi karta ofisial na gobièrnu ulandes pa hala atenshon di Ulanda ku dje forma aki simplemente no por sigui. Pero, ta parse ku no tin oido pa e problema.
E situashon ta un problema komo ku outoridatnan – no opstante presensia di un bòdiskèn – ta sigui trata e yu di Sürnam komo un kriminal i ta listra su kurpa na un manera ku no ta desente.