WILLEMSTAD – Awe ta hasi eksaktamente 35 aña, ku diferente persona i organisashon a bin huntu pa lanta loke nan a yama e tempu ei un banko pa e hende humilde i trahadó. 35 Aña a pasa i awe Banco di Caribe ta un konsepto den nos komunidat. For di awe mainta a kuminsá e selebrashonnan na e ofisina prinsipal di e banko i su sukursalnan, pero e fiesta mes ta bai sinti awe tardi ku e tradishonal bolo grandi di Banco di Caribe, siguí pa un konsierto popular. E aktividat lo tuma lugá riba e lugá di parker na Saliña. Riba e pòtrèt por mira, kon awe mainta tabata deleitá klientenan ku ambiente musikal na e ofisina prinsipal na Saliña. LA PRENSA ta deseá staf i personal di Banco di Caribe masha pabien ku e bunita logro aki.

WILLEMSTAD – E bònt di shofùrnan di bùs chikí ta atvertí tur pasahero, pa shofùrnan ku tòg a kuminsá kobra e tarifa nobo. Segun STU, ora un shofùr kobr’é e tarifa nobo, e pasahero mester eksigí di e shofùr, pa e mustra e ‘bekendmaking’ di gobièrnu. Si e shofùr no tin e anunsio ofisial di e oumento, e pasahero no mester paga e tarifa nobo.
LA PRENSA a risibí diferente reklamo di pasaheronan ku mester a paga e tarifa nobo di bùs chikí ku gobièrnu a aprobá resientemente. Tabatin un kaso kaminda un shofùr lo a kobra un tarifa hopi haltu. Esaki ounke ku STU a anunsiá, ku shofùrnan di bùs chikí no ke un oumento di tarifa. E sekretario di STU, Giovanni de Caster, a bisa LA PRENSA, ku nan a palabrá ku nan miembronan pa no kobra e tarifa nobo. “Ta p’esei nos ke pa gobièrnu anulá e oumento akí mas lihé posibel, pa evitá ku sierto shofùr ta kobra un tarifa mas haltu ku e otronan. Mi tin ku bisa, ku loke ta pasando tòg ta un bon sistema pa e kliente haña sa kua shofùr ta di buena fe i kua ta di mala fe.”
Mas aleu de Caster a bisa, ku kasi 80% di e 400 shofùrnan ta afiliá na STU i ta sostené e akshon. “Durante e akshonnan nos a palabrá, ku e shofùrnan ku no ta partisipá na e akshon, pa nan tuma liber i keda kas. Di e manera akí nos a evitá ku lo tabatin shofùr ku si lo a keda traha normal.”

BEVERLY HILLS, CALIF., - Mike Piazza a disidí di retirá despues di 16 temporada den Liga Grandi, kaminda e tabata un di e mihó kèchernan batidó den historia di beisbòl.
“Despues di a diskutí e opshonnan ku mi kasá, famia i agente, mi a sinti ku a yega tempu pa un otro kapítulo den mi bida”, asina el a bisa den un komunikado ayera ku a keda emití dor di su agente Dan Lozano. “Tabata un gran karera i awe mi ta bai sin lástima”.
“Mi sa ku e dia aki tabata pa bini i durante di e último dos añanan mi a kuminsá prepará mi mes. Mi a duna tur kos ku mi tabatin i laga tur kos riba tereno”.
Piazza di 39 aña tabatin promedio di .279 ku 8 honron i 44 kareda empuhá temporada pasá ku Oakland Athletics komo batidó designá. El a bira agente liber i no a bolbe firma.
E no tabata disponibel pa diskutí su desishon di akuerdo ku Josh Goldberg ku ta e bosero di Lozano.
Los Angeles Dodgers a firm’é for di e draft di 1988 den e di 62 buèlta.
Piazza a hunga den 12 All-Star Team di kual 10 konsekutivo kuminsando for di 1993.
“E tabata un di e batidónan ku por a kambia un wega ku un swing. Sigur ku e tabata un di e kèchernan ku tabata bati mas mihó di nos tempu i por ta di tur tempu”, asina Tom Glavine, ku tabata kompañero den Mets huntu ku Piazza, a bisa.
Piazza a tèrminá su karera ku promedio di .308, ku 427 honron i 1335 kareda empuhá, hungando pa Dodgers di 1992-98, ku Marlins na 1998, ku Mets di 1998-2005, ku San Diego na 2006 i Oakland na 2007.

PORT ST. LUCIE, FLA., - Pedro Martinez ta mustra ku e ta kla pa regresá Mets, pero e ta hasiendo esaki ku un kurason pisá.
Despues di a enfrentá peloteronan di Liga Menor djaluna na Tradition Field, Martinez tabata entusiasmá i preokupá den un entrevista ekstenso.
E ta pa habri un wega ku e klup na fin di luna i tambe hopi preokupá pa su tata ku ta malu, I ta bisa ku e kier ta ku su famia loke ta pone ku e por retirá tempran, posiblemente na final di e temporada aki.
“E situashon di mi tata ta pisa riba mi i mi famia”, asina Martinez a bisa, referiendo na e kanser di selebre ku su tata Pablo di 78 aña ta sufriendo di dje. “Mi no ta huntu ku nan. Mi a realisá ku aña pasá i e aña aki mi no tabata huntu ku mi famia, mi mayornan. Esei lo pone ku mi por retirá mas tempran ku hende ta kere. Despues di e temporada aki lo mi bai kas serka mi famia i pensa riba dje i tuma un desishon”
Hasta ku e preokupashon aki Martinez di 36 aña tabata ansioso pa regresá ku Mets despues ku el a tira 4-1/3 di ining den un wega di “extended spring” kontra di peloteronan di Liga Menor di St. Louis Cardinals.
Martinez a papia ku e gerente general di Mets, Omar Minaya despues di wega i a keda instruí pa e biaha pa Atlanta pa tira un seshon di bullpen.
El a bisa, ku e i Minaya a papia i el a keda di habri un wega di e seri kontra di Marlins ku ta kuminsá djaluna awor, pero nada no ta definitivo.

Skina di Sorti, awe djarason 21 di mei di 2008, ta kuminsá ku deseá tur hende un bon dia. Den e kolumna aki, tur pero tur partido ku a duna motibu pa opservashon kritiko tabata opheto di kolumnanan skèrpi i na okashon te hasta mi a hasi denunsia di akshonamentu kontra di integridat personal i òf profeshonal. PAR, PNP, MAN, FOL, FK, PS, DP i algun miembro di nan den forma individual a keda adresá den kurso di tempu. Algun a skohe pa saka benefisio for di nos opservashonnan, miéntras otro a kai den e trampa di ninga bèrdat i algun te hasta a opta pa ataká e mensahero.
****
For di promé ku a forma e aktual Bestuurscollege mi a atvertí pa e konsekuensia di un aliansa pa un solo ophetivo di parti di PAR i PNP (pasa e “slotverklaring”) ku riba término lo a afektá interes general mas ku e “slotverklaring” su presunto benefishinan. Un di miembro di PAR ku mi a topa algun tempu pasá, a aseptá ku mi atvertensia tabata na su lugá i ku tempu a duna mi rason.
****
Mi a atvertí ku un koalishon di apénas 11 miembro (probá komo un riesgo polítiko grandi), no ta motibu pa kere ku nos lo bai haña mas stabilidat den gobernashon di Kòrsou. Pero miembronan di e koalishon a deklará nan konvikshon ku e koalishon lo ta esun ku lo bai sinta despues di e próksimo elekshon, komo e promé koalishon di mayoria pa sostené e promé gabinete di Kòrsou. Si esaki, esta kumpli ku lokual a keda deklará, ta un ophetivo di PAR i PNP, ta bira sumamente difísil pa nan ehersé influensia riba e renchi di mas suak den e kadena, pa lokual ta aplikashon di reglanan di bon gobernashon.

WILLEMSTAD – Parlamentu di Antia a aprobá pa voto general, kambio di lei pa desentralisá tareanan i responsabilidat di Departamentu di Labor pa teritorionan insular.
Pa motibu ku mester kambia ERNA, Tweede Kamer di Ulanda mester aprobá e kambio di lei aki tambe.
Minister di Labor, Elvis Tjin A Sjoe a bisa durante e reunion públiko di Parlamentu ayera, ku e ta spera ku e kambio di lei keda aprobá pa Kamer dentro di tres luna, ya asina esaki por drenta na vigor.
E Minister a bisa, ku e islanan ta reklamando for di 2002 ku e Departamentu di Labor mester wòrdu desentralisá pa asina bira mas efektivo den nan inspekshon i solushoná konfliktonan di labor. E islanan ta ekipá ku e personal nesesario i Gobièrnu Sentral lo proveé entrenamentu di personal i material ku nan mester pa hasi nan trabou.
A firma un protokòl ku e teritorionan insular ku ta garantisá e posishon legal di e empleadonan. Tambe a establesé un unidat di kordinashon pa supervisá ku tur kos ta bai bon. Ku e desentralisashon, islanan lo ta responsabel pa implementá leinan i regulashonnan laboral eksistente, miéntras ku e Minister ta keda responsabel pa legislashon i supervishon.

MERKA / LONDON, - Futuro di krudo merikano a marka awe un máksimo históriko di 130,30 dollar pa barí, respaldá pa un dollar debil i preokupashon riba e suministro.
Miéntras tantu, tabata negoshá e krudo Brent di London na 129,55 dollar pa barí.

MERKA, - Barack Obama ayera a alkansá un hit importante pa bira e kandidato presidensial demókrata na Merka, pero su rival Hillary Clinton a ninga retirá.
Obama a sigurá dilanti su simpatisantenan ku e ta hopi serka di alkansá nominashon di Partido Demókrata.
El a hasi su afirmashonnan na momentu ku proyekshonnan ta dun’é viktoria kla den e elekshonnan primario na Oregon, apesar ku na Kentucky el a keda derotá ampliamente pa su kontrinkante senador Hillary Clinton.
E dos kandidatonan aki a repartí viktorianan den e elekshonnan primario ayera: Obama a gana kómodamente na Oregon i Clinton a gana na Kentucky, loke lo duna Obama mayoria den delegado eligí den e prolongá bataya elektoral estado pa estado.
E senador pa Illinois ta spera ku esaki ta suponé inisio di fin di e kampaña largu, i a pone su atenshon riba un posibel konfrontashon ku republikano John McCain den e elekshonnan general di novèmber.
Obama a tene su diskurso dilanti un grupo grandi di simpatisante. Sin embargo, e no a hasié na Oregon, kaminda a vota via e-mail.
E bia aki el a skohe Iowa, kaminda el a logra su promé viktoria den e karera pa nominashon demókrata 3 di yanüari último.
“Nos a regresá Iowa ku un mayoria di delegado eligí pa pueblo merikano i boso a pone nos na alkanse di e nominashon presidensial demókrata na Merka”, Obama a bisa meimei di gritunan den un enkuentro polítiko na sentro di Des Moines, kapital di e estado.

WILLEMSTAD - Jacco Swart direktor general di N.E.C. a presentá un aliansa ku lo dura 3 aña entre e partnernan: N.E.C., Fundashon Bon Intenshon i Nederlands Antilliaanse Voetbal Unie (NAVU).
Ku e kombenio aki 3 pa 5 futbolista talentoso di Kòrsou entre e edat di 14 pa 20 aña ta haña e oportunidat pa desaroyá nan mes na e skol di futbòl N.E.C., ku e meta final pa bira un profeshonal.
N.E.C. ta brinda e hóbennan aki un famia kaminda nan por hospedá serka dje. Tambe N.E.C. ta sòru pa un estudio ku ta kuadra ku kada hóben i tambe lo duna nan e guia sosial nesesario.
Meta di e di dos parti di e kombenio ta pa medio di e yudansa ku N.E.C. ta duna mehorá e struktura di futbòl na Kòrsou.
Pa hasi esaki posibel un entrenadó di N.E.C. lo bin Kòrsou tur aña pa algun siman i lo duna un man na e futbòl Antiano.
Un otro parti importante di e aliansa ta patrosinio di e parti dilanti di e kamiseta di N.E.C. pa tur tim di N.E.C.
E patrosinio kamiseta tin komo meta pa duna yunan di Kòrsou bibá na Ulanda e sintimentu di orguyo i di otro banda krea un imágen positivo di Kòrsou na Ulanda.
Gobièrnu Ulandes tin hopi atenshon i interes pa e aliansa aki.
Minister Presidènt Jan Peter Balkenende a felisitá e tres partnernan den e proyekto aki pa medio di un karta.
El a skibi entre otro: “Durante mi bishita na Kòrsou mi a tuma nota personalmente kuantu futbolista talentoso tin riba e isla. Ta importante pa e hóbennan aki haña oportunidat di desaroyá loke nan ta bon den dje. Ekselensia no ta bai sin invershon. N.E.C. huntu ku su partnernan lo perkurá pa talentonan hóben di Kòrsou haña mas i mihó oportunidat pa desaroyá nan mes. Abo a demostrá kuantu forsa positivo tin skondí den futbòl. Abo a demostrá ku futbòl ta uní hende ku otro. I abo a demostrá ku nos ta yega leu huntu si nos respetá i sostené otro.”

WILLEMSTAD - Djabièrnè 16 di mei direktiva di NAVU a biaha pa e isla di Boneiru pa reuní ku direktiva di FFB i tambe ku e klupnan afiliá na FFB.
Alabes a tene un reunion di direktiva di NAVU den kual a nombrá e dos kandidatonan di Boneiru komo miembro di direktiva.
Señor Ferdinand Bernabela, aktual presidente di Federashon Futbòl Boneiru (FFB), a ser nombrá vise presidente i señor Uti Melaan, eligí komo miembro no kualitativo, a bira segundo sekretario di NAVU.
Djabièrnè atardi direktiva di NAVU a reuní ku direktiva di FFB pa despues anochi bishitá e wega di kampionato entre Real Rincon i Juventus ku a terminá den un empate 0-0 dilanti un bon públiko, riba 600 fanátiko di futbòl, i den un tremendo ambiente ku músika.
Djasabra mainta direktiva di NAVU a reuní ku tur e klupnan afiliá na FFB pa tende nan remarkenan i duna nan sugerensia pa e aktual kampionato por desaroyá mas mihó posibel i terminá na tempu pa e klupnan ku sali kampion i sup kampion por partisipá den e kampionato Antiano ku mester tuma lugá na luna di ougùstùs próksimo.
E reunionnan a tuma lugá den un harmonia total i e relashon tantu na Boneiru mes komo ku NAVU a bira trankil i a normalisá atrobe.
Un danki ta bai na FFB i tur e nuebe klupnan afiliá. Nan por sigui konta ku e sosten di NAVU.

ALBERTO-BENITA
Johanita Nicasia (89 aña)
Mihó konosí komo Yo òf Nini
A laga atras su yunan Hubert i Seferina Schoobaar-Helder, Saida Schoobaar, Mitha Vink-Benita i Hans Vink, Edna Overman-Alberto i Vionel Overman, Ifna, Stella, Raymond, Ronald Alberto. Akto di entiero ta djasabra 24 di mei. Bishita 1or na misa Steenrijk. Promé ku entiero tin un s.s. di misa i despues pa santana Memorial Park.

JANSEN
Dennis Macario
A laga atras su partner Isolda La Croes, yunan Sueyenne Jansen, Dennis Jansen i Janice Sendar, Tariq La Croes, rumannan Harold Jansen i Soraida Justiana, Elfride i Irene Jansen-Janze, Vivien i Oswin Eleonora-Jansen, Richenel i ai-Khim Jansen-Lim, Diane Jacobus i Cesar Jacoba, Gilbert Jacobus, Elmer Jacobus i Louisa Rogers, Beatrix Jansen-Villareal. Akto di entiero ta djaweps 22 di mei for di El Consolador pa santana Sta. Maria. Bishita 12or. Promé ku entiero tin un s.s. di misa na misa Sta. Maria.

CURIEL
Francisco Solano
Mihó konosí komo Chico di Aero Cargo
A laga atras su kasá Erania Curiel, yunan Jeffrey Curiel, Mirtha Faneiten i nan yunan, rumannan Benifacio Curiel, Eustacho Gracia, Johan i Marlen Gracia, Victor i Sylvia Lopez. Akto di entiero ta djaweps 22 mei for di El Consolador pa santana Sta. Maria. Bishita 9or. Tin un respòns 10.30or na El Consolador.

BRANDT
Johannes Hendricus Antonius (96 aña)
A laga atras su yunan Lili i Ben Brandt-Fanoy, Mieke i Bert Brandt-van der Kroef, ñetunan Theo Brandt, Hans i Marian Brandt, René i Barbara Brandt, Ben i Marja Brandt, Rob i Yvette Brandt. Akto di entiero lo wñrdu anunsiá despues

DURANGO, Mexico, - 8 Persona a muri den un konfrontashon entre supuesto gruponan rival di narkotrafikante na estado di Durango, situá nortost di Mexico.
Prokuraduria General di Hustisia di e estado (PGJE) a informá ku a registrá e echonan ayera mardugá na munisipio di Vicente Guerrero, situá 80 kilometer di e siudat di Durango.
Segun e promé vershonnan, e tiroteo a dura kuater ora, ounke fuentenan ofisial di Durango a konfirmá ku e konfrontashon a dura 40 minüt.
Na e lugá a desmantelá 12 vehíkulo, armanan di poder haltu, kartuchanan, i unifòrmnan di kamuflahe.
No a identifiká identidat di e viktimanan, i outoridatnan no a informá riba presensia di heridonan.
Durango ta un estado kaminda no ta eksistí refuersonan di Ehérsito i polisnan federal, den e inisiativa lansá pa Gobièrnu kontra krímen organisá, ounke despues di e konfrontashonnan trupanan a trasladá bai n’e zona, pa yuda den operativonan di búskeda.
P’e violensia inkontrolabel ku ta tumando lugá na diferente region di Mexico, Presidente mèksikano Felipe Calderón a sigurá ku e lucha kontra krímen organisá “ta serio!”
Pa loke ta trata e aña aki, mas ku 1.000 persona a muri debí n’e konfrontashonnan entre supuesto gruponan di narkotrafikante i forsanan federal.
Na Ciudad Juárez, na frontera ku Merka, e presensia militar ya tin mas ku un luna einan, pero no por a logra frena e nivel di violensia.

Mr. prof. dr. Lorito ta yama tur hende un felis djarason. Ta masha kos tin di konta. Ketu bai nos ta hañando pabien for di diferente fuente pa loke ta trata e kaso den Korte. Ta bon pa Lorito ripití, ku e kaso no ta kontra e persona en kuestion, pero mas bien riba e márgen ku medionan tin pa publiká (denunsiá) kosnan ku ta bon pa públiko sa. Esei ta esensia di e kaso!
*********
Shon Gerrit a sulfurá ayera den Konseho Insular. Nos a tuma nota di su deklarashonnan (nos mes a skucha nan!) i nos ke bisa, ku nos sigur no ta den ningun kòmplòt pa tacha nòmber di niun hende!
*********
Nos a haña diferente opinion i komentario for di un gran kantidat di sírkulo. Remarkabel ta, kon hende a biba ku e kaso, tantu di tòp di nos komunidat komo e hende den funshonnan mas abou (por sierto pa nos tur ta igual). Nos ta señalá e aspekto aki, pa mustra ku e kaso aki sigur a haña atenshon tur kaminda. Nos no tin masha espasio awe, pero mañan nos lo reprodusí diferente di e komentarionan ku nos a haña i nos lo publiká sin nòmber pa protehá esnan ku a komentá.
*********
Miéntras tantu preis di krudo merikano pa entregá riba término a marka awe un máksimo históriko di 130,30 dollar pa barí, respaldá pa un dollar debil i preokupashon riba e suministro. Miéntras tantu, tabata negoshá e krudo Brent di London na 129,55 dollar pa barí. Na Kòrsou ketu bai nos ta kere nos por skapa. Shonnan, un biaha mas, kuminsá ahustá, pasobra no tin moda di hasi!

WILLEMSTAD – Informashonnan ku LA PRENSA a haña ta bisa, ku Kuerpo di Boluntario di Kòrsou a rehabilitá 4 ofisial ku a “rebeldiá” i ku konsekuentemente tabata suspendé. A anunsiá ku lo rehabilitá nan djadumingu último durante lèsnan na VKC, segun nos informantenan.
Segun nos fuentenan, Gobièrnu di Antia, den e kaso aki Promé Minister ku ta responsabel pa VKC, a duna òrdu pa pone e ofisialnan aki bèk den posishon. Ta trata di e ofisialnan Soemantha, Gibbes, Middelhof i Elias.
LA PRENSA a publiká aña pasá riba e problemanan interno serio ku a surgi den seno di e organisashon. A pone Gobièrnu na altura di e situashon, miéntras ku mando di VKC mes a disidí di pone diferente di e hefenan aki un banda. A anunsiá tambe, ku lo bai hasi denunsia na Ministerio Públiko. Kosnan no a yega dje leu ei awor ku a disidí pa rehabilitá e kuater ofisialnan aki.
Miéntras tantu LA PRENSA a haña informashon, ku a nombra tambe un mènèdjer di kambio pa VKC. E persona ku lo fungi komo un tipo di konsehero (konsultant) den e kaso aki ta Anibal Maduro. Gobièrnu a duna instrukshon pa duna Maduro tur koperashon den kuadro di su esfuerso.
VKC mester di un análisis profundo, sigur despues di loke a pasa den último añanan. Nos informantenan a bisa, ku e telefon na VKC ta kòrtá i e parke di vehíkulo ta den kondishon pésimo. E relatonan finansiero di 2006 i 2007 no ta aprobá, loke ta pone ku Gobièrnu a bisa bon kla, ku lo no bin fondo disponibel te ora e relatonan aki ta kla. A traha un rapòrt tambe riba funshonamentu di VKC ku sinembargo te awe no a mira lus di dia.

WILLEMSTAD – Lider di MAN Charles Cooper ta haña, ku e mester a duna sosten den Korte na su miembro Gerrit Schotte. “E ta un miembro prominente di nos partido, mi mester t’ei p’e”, asina Cooper a bisa LA PRENSA den su promé deklarashonnan riba e kaso den Korte.
Manera nos a informá, Schotte a pèrdè e kaso di rektifikashon ku el a kuminsá den Korte kontra LA PRENSA i BALA.
Loke a hala atenshon durante tratamentu di e kaso, tabata presensia di lider di e partido Cooper i otro miembronan di e partido, tantu durante tratamentu di e kaso komo e veredikto di djabièrnè último. Es mas, den Korte por a mira ku Cooper tabata duna sosten aktivo na Schotte ku anotashonnan (“kattebelletje”) ku e tabata manda for di patras di sala pa Schotte.
Cooper a bisa, ku Schotte tin un libertat individual pa bai Korte. “E mes a informá nos for di kuminsamentu di e kaso riba e problema ku a surgi ku e kompania di seguro. Ora ku e kaso a kuminsá, nos a disidí ku nos mester t’ei, komo ku e ta miembro prominente di e partido”, asina Cooper a bisa. Den e elekshonnan di aña pasá, Schotte tabata e di dos vote-getter mas grandi di e partido blou.
Riba e pregunta ki relashon e tin ku Schotte, Cooper a bisa ku Schotte ta un amigu di dje. “Nos a traha huntu den Bestuurscollege i un tradishon ta, ku tur hende ku mi traha kuné, mi ta konsiderá mi amigu, meskos ku por ehèmpel Nelson Pierre”, asina el a bisa.

WILLEMSTAD – E gruponan Cayco i Meta Corporation a ekspresá e disponibilidat ayera pa studia e posibilidat di koperashon pa loke ta trata desaroyo di e área di Rif. Nan a hasi esei den un enkuentro aki na Kòrsou ku diputado Anthony Godett di Infrastruktura.
Meta Corporation tabata representá pa Eduardo de Veer i Angelo Martes i grupo Cayco pa Julio Marcoli i Oscar Helmeyer. Diputado Anthony Godett tabata kompañá na e reunion pa Giselle N. Hollander, sekretario interino di gobièrnu di Kòrsou i Leslie Kuwas kolaboradó di diputado Godett.
Diputado Godett a bisa, despues di e reunion ku a hasi diferente palabrashon, despues ku tantu Cayco komo Meta Corporation a mustra nan disponibilidat pa eksplorá posibilidatnan pa den koperashon mutuo desaroyá e área rondó di Rif.
A palabrá, ku pa awe lo tuma lugá na Aruba un reunion relashoná ku e koperashon entre e dos gruponan. Banda di esei a disidí, ku denter di un periodo di dos (2) siman partidonan enbolbí lo presentá na Gobièrnu di Kòrsou un dokumento ku ta relashoná ku resultado di e negosiashonnan.
Diputado Godett a bisa, ku e ta optimista ku e dos partidonan lo haña otro den desaroyo di e área aki. Por sierto ku na final di e reunion a surgi un insidente chikí pa kua e diputado mester a intervení rápidamente. Segun e diputado, tabata trata di un malkomprondementu ku a plakia mesora. E no kier a duna kousa di e insidente.

DUESSELDORF, Alemania – Juan Ignacio Chela djamars a derotá Wayne Odenik i Argentina a parti honor den su duelonan singel kontra Merka pa Kopa Mundial pa ekipo di tènis.
Chela a gana 7-5, 6-1 riba Odesnik, miéntras ku e argentino Guillermo Cañas a pèrdè 7-6, 6-4 kontra e merikano James Blake.
E seri pa Grupo Kòrá entre Merka i Argentina, kampion defensor, lo keda disidí awe den e partido di dòbel. E argentinonan mester gana e partido aki pa no keda eliminá.
Argentina a kai 2-1 djamars kontra Suesia, ora Chela a kue e úniko punto di e tim suramerikano den su wega kontra Thomas Johansson.
Suesia a bari Repúblika Cheko pa saka un bentaha inalkansabel den e seri ei i keda na punta di e Grupo Kòrá. Robin Soderling a dal Tomas Berdych i Johansson a superá Michael Tabara.
Suesia i Repúblika Cheko ta hunga e dòbel awe.
Merka a gana Repúblika Cheko djaluna 2-1.
Den Grupo Blou, Alemania i Spaña a gana e promé weganan singel kontra Italia i Rusia, respektivamente.
E aleman Philipp Kohlschreiber a gana 6-2, 7-6 di Potito Starace i e spañó David Ferrer a vense Mijail Youzhny.
Alemania a dal Spaña 2-1 i Rusia a vense Italia den e promé serinan di Grupo Blou.
E ocho timnan ta parti den dos grupo i e torneo ta hunga un sistema nobo. Kada seri ta konsistí di dos wega individual i un dòbel parti riba dos dia, loke ta garantisá ku e ekiponan lo mira akshon tur e dianan di e etapa di tur kontra tur. E ganadónan di kada grupo lo topa den e final di djasabra.

WILLEMSTAD/NEW YORK – Tur 23 mil polis uniformá di New York lo haña un oumento di 9.73%. E oumento ta ku forsa retro aktivo for di ougùstùs 2004 te ku yüli 2006. E polisnan nobo ku a drenta servisio despues di yüli tin ku entregá 10 di nan 20 dianan di vakashon durante un periodo di 5 aña.
E salarionan di e polisnan nobo, Rookies, a subi di $25,100 te ku $35,881. Esaki despues di un desishon anunsiá dor di un pènel arbitrario di e Estado. Un desishon ku por stimulá e esfuersonan, pa reklutá polisnan nobo. Un pènel arbitrario di tres miembro di e Public Employment Relations Board, a honra e oumentonan. E oumento di mas haltu ta di $59,588 pa $65,382. Bou di e ‘Rookie’ nan bieu, e oumento a subi te $32,700 despues di 6 luna. Entrante yüli, tur Rookie, nobo i bieu, lo gana $35,881.
Ounke e Patrolmen’s Benevolent Association a bisa di tabata altamente sorpresá ku e subida tabata mas ku loke otro sindikatonan uniformá a logra, su representante den e pènel arbitrario a nenga na firma e desishon, ku tabata aprobá dor di 2 di 3 tres miembronan. E otro dos miembronan tabata un representante di e alkalde i un representante imparsial.
E presidente di e bònt PBA, Patrick Lynch a bisa, ku ounke nan ta satisfecho ku e oumento, tòg nan ta desapuntá ku e no a bai sufisiente leu pa hasi nan pago kompetitivo ku otro departamentunan di polis.

WILLEMSTAD – Playstation 3, X-box 360 i WII, ta algun wega di kòmpiuter ku ta kontené material venenoso. Esaki ta loke un investigashon di Greenpeace a duna komo resultado. Den algun di nan tabatin kímiko, ku Komishon Oropeo ya a prohibí pa usa den ko’i hunga.
Weganan di kòmpiuter no ta kai bou di ko’i hunga, pero segun Greenpeace nan ta sumamente popular bou di mucha. Pa e motibu akí Greenpeace ta urgí e produktornan di weganan di kòmpiuter pa hasi nan produktonan liber di venenu. Tur e tres weganan di kòmpiuter ku Greenpeace a tèst tabatin venenu den e material. Ounke ku e tèst a indiká tambe, ku e fabrikantenan no ta usa e material venenoso den sierto partinan. Remarkabel ta, ku kada marka ta traha otro partinan di e weganan si material venenoso. Greenpeace ta bisa, ku e tèst a demostrá, ku ya por traha kasi tur e partinan di e weganan ku material ku no ta venenoso. E lider di kampaña ‘materialnan venenoso’ di Greenpeace Ulanda, Kim Schoppink, a bisa ku Sony, Microsoft i Nintendo mester stòp di hunga wega i sòru pa pone weganan di kòmpiuter sin material venenoso riba merkado.
Den tur e tres markanan a lokalisá hopi di e kímiko ‘broom’, ku ta usa den e material ku mester tarda e proseso di pega kandela. E material akí ta sòru, ku ora e mashin haña un korto sirkuito, e no ta pega kandela mes ora. E konsentrashonnan mas haltu tabata den Playstation 3 i WII. E investigashon a proba tambe ku e X-box 360 i e Playstation 3 tabata kontené konsentrashonnan haltu di loke nan ta yama ‘weekmakers’, un kímiko ku ta prohibí den ko’i hunga. Weekmakers ta stroba hormonanan den kurpa di hende. E tipo DEHP ta stroba e desaroyo seksual di hende i di mamíferonan.

WILLEMSTAD - Riba djarason 4 di yüni próksimo e restorant Franses-Suiso Bistro Le Clochard den kolaborashon ku personalidat di radio Jacques Visser ta tene un sena pa rekoudá fondo (fundraising diner) kombiná ku un findishi pa dos bon kousa. E rekoudashon ta bai pa Fundashon Casa Cuna su kasnan pa mucha i Fundashon Kontakto.
Por sierto, e sena pa rekoudá fondo aki lo tin e kalidat, servisio i ambiente ku tin kustumber di dje na Bistro Le Clochard. Huntu ku kòki mayó Piet van Ham a hinka un menú spesial den otro ku lo wòrdu sirbí ku e mihó biñanan. Muzik “live” lo ta na enkargo di Gino Coelho i Conny Fikse & Friends. Durante di e anochi aki biahenan spesial, salidanan partikular, obranan di arte i otro artíkulonan balioso lo wòrdu poné riba findishi.
Ta pa di dos bia ku Bistro Le Clochard ta organisá un sena pa rekoudá fondo. E promé sena na aña 2007 tabata kompletamente agotá i ku un rekoudashon di Nafl. 30.000,- un éksito grandioso.
Pa e motibu aki Bistro Le Clochard ta konsehá tur esnan interesá pa reservá nan lugá lihé pa un mesa di kuater, seis òf ocho persona.
Lugánan paden di e restorant ta kosta Nafl. 175,- pa persona i riba terasa ta kosta Nafl. 200,- pa persona.
E anochi ta kuminsá 7or ku un bebida di bon biní riba e plenchi dilanti di e Bistro i pa 7or i 45 e sena i e findishi ta kuminsá.
Pa mas informashon i reservashon: