Parlamentario Zulay van Poppel-Marquez ta propone

ORANJESTAD– Den su comunicado di prensa Parlamentario Zulay van Poppel-Marquez ta reflexiona riba consecuensianan di nos lifestyle insaludabel, y e ta comparti su pensamento cu nos comunidad.
Laga nos para keto un rato serca e consequensianan di e malesanan cronico como resultado di un estilo di bida insaludabel:
a. E placer di bida ta baha pa e pacient y su costonan di bida relaciona cu e malesa ta subi.
b. Productividad di e paciente como empleado den un empresa o organisacion ta baha.
c. E miembronan di famia cu tin cu cuida pa e pacient ta haya un carga emocional extra.
d. E gastonan di uitkering loonderving di SVB pa dianan malo ta aumenta.
e E gastonan medico cu AZV tin cu cubri tambe ta aumenta.
f. Nos economia, nos comunidad y tur su miembronan ta sinti y paga pa e consequencianan menciona.
CAMPAÑA NACIONAL
Aruba mester bai pertenece otrobe na e miho paisnan riba tereno di salubridad den e continente mericano. Con nos ta bai haci esaki. Parlamentario Zulay van Poppel-Marquez ta papia di nos pasobra esaki no ta un responsabilidad di gobierno so. Berdad ta cu nos Constitucion ta indica den Articulo V23 promer inciso cu Gobierno ta tuma precaucion pa promove salubridad publico. Vab Poppel-Marquez ta cita: ”De regering treft maatregelen ter bevordering van de volksgezondheid.” Pero e cifranan ta indica cu e salud di cada un di nos como cuidadano di e pais Aruba ta depende en gran parte di nos estilo di bida y esey kier men cu ta cada uno di nos ta den prome luga responsabel pa nos propio salud. Bo salud ta di bo, cuid’e.

Ban duna cooperacion
Cuater baki ta destina pa limpiesa di e barionan indica

ORANJESTAD- Comision Waste- Rec, esta “Waste – management & Recycling Environmental Committee” hunto cu e comunidad di Esso Heigths, Nijhoffstraat, Weg Kust Batterij, Kust Battereij y de Vuyst ta tene un limpiesa den nan bario diasabra awo, 24 di mei (8 – 12 or).
Pa e evenemento aki e compania Mourik ta pone 4 baki disponibel den cual e habitantenan di e barionan indica por deposita e sushi cu nan a recoge pafo di nan cura.
E bakinan no ta destina pa tira sushi di cas aden, manera stoof, wasmashin, zinc etc.
Pa dicho articulo lo tin e posibilidad pa deshaci di nan otro siman, dia 31 di mei den e mesun barionan ya menciona.
Ta di compronde cu tin interes di e otro barionan pa deshaci di nan sushi di cas/desperdicio. Un sugerencia ta pa vocifera esaki na un di e personanan aki abou menciona y lo busca un alternativa pa esaki haya su debido oido.
E meta ta pa na un manera eficiente y efectivo haci bario di Esso Heigths, Nijhoffstraat, Weg Kust Batterij, Kust Batterij y de Vuyst limpi.
Nos mision ta pa e habitantenan sinti nan mes responsabel pa limpiesa di nan bario y cu orguyo bisa: Nos bario ta keda limpi – limpi, paden y pafo di nos cura.
Di bo tambe?
Waste-Rec lo lucha pa promove bario sano y limpi cu e tema: “Promove un comunidad sano y limpi”, pa medio di Maneho di desperdicio y Reciclahe, lo cual ta parti di e solucion pa proteha y preserva nos medio ambiente.
Pa mas informacion por tuma contacto cu Sandra Wilson, na 5844694 / 5606033 y Gloria Richardson na 5846965 / 7342150, Shirley Illidge – Hilman na 7302612 of Theresita de Graaf na 7486844.

Donny Rasmijn di partido AVP ...Reconstruccion di nos pais ta prioridad pa AVP 

ORANJESTAD- Donny Rasmijn di partido AVP ta comenta cu nos pais a bin ta hayando un golpi fuerte durante e ultimo 7 añanan bou gobernacion di partido MEP. Nos hendenan a bin ta sufriendo un perdida gigantesco di poder di compra durante e gobernacion impopular di partido MEP.
Cu e ingreso cu nos pais tin nos mester ta hopi bon para den sector di educacion, social, hudicial, infrastructura, medico y medio ambiente, Rasmijn ta duna di conoce.
Den sector di educacion por ripara cu mas mucha ta drop out for di scol y mayoria vez ta dor di problemanan social. Pa e cantidad di problemanan aki nos mester pensa den pone trahadornan social y muy probablemente psicologonan na nos scolnan.
Riba tereno hudicial nos pais ta pasando den su peor momentonan. No tin suficiente polis, dunando malhechornan hopi espacio pa comete delincuencia.
Tambe politica a infiltra den nos sistema hudicial unda cu ta depende ken bo ta bo ta wordo persegui dor di Ministerio Publico of no.
Den infrastructura ningun desaroyo of solucion tin riba mesa pa e crecemento den vivienda y pa careteranan cu ta necesario pasobra e poblacion ta sigui crece. Mantenimiento di careteranan y proyectonan chikito so ta tumando lugar. E tan necesario “Vierbaanseweg” ainda no a duna luz mientras cu e trafico na Aruba ta keda tranca. Mudamento di waf grandi pa Barcadera tambe ta para pasobra diferente ministernan a haci acuerdonan cu diferente companianan y awor nan mes ta bringa otro pa wak ken ta haya e contract.

ORANJESTAD- Lesamento ta un instrumento pa e mucha explora y cera conoci cu mundo. Un mucha cu lanta den un ambiente cu ta stimul'e pa lesa, tin hopi mas chens di desaroya interes den lesamento.
Lesamento ta yuda e mucha haña un bista di ken e mes ta. Mucha mes ta gusta buki. Tin biaha e mester un man pa yega na e buki di su gusto. Lesamento ta mas cu descifra palabra den un texto. E ta un actividad cu ta: duna placer, stimula fantasia, yuda maneha emocion, relaha.
Meta di e proyecto: brinda famianan un herment di sosten pa reviva e interes pa lesa of fortifica esaki. Pensamento: 1. crea un momento di trankilidad pa e mucha(su mente) tuma despedida di e dia yen di actividad.
2. lesa pa e mucha prome cu e bay drumi ta fortifica e contacto intimo entre e mayor y su yiu.
3. stimula un cultura di lesamento.
FORMA DI TRAHA
1. dos biaha den un siman, riba diamars y diahuebs un lesado ta bishita cas.
2. Orario ta entre 6-8 p.m
3. Cada bishita ta dura 30 minuut.
4. e siman prome, e lesado ta presenta su mes y ta palabra un ke otro cu mayor.
5. Mayor mes ta difini e espacio den cas unda ta lesa.
6. E intencion ta pa despues mayor mes tuma lesamento prome cu drumi over.
7. Por aplica pa participa dor di yena e formulario di inscripcion.
8. Por entrega e formulario na Biclioteca Nacional na Oranjestad y San Nicolas.
Pues tur mayor cu ta interesa por pasa Diasabra na Van Dorp dakota pa informacion. Lesamento ta esencial, ban stimula nos yiunan pa lesa foi chikito.

WILLEMSTAD – E sindikato STrAF tin derechi pa representá wardadónan di prezu den Bon Futuro. Esaki ta loke un hurista a konkluí den un konseho pa minister di Hustisia David Dick. Dick a laga e hurista traha e konseho despues ku ABVO a insistí riba esaki.
LA PRENSA a komprondé for di un fuente, ku ta for di 2006, ora ku e sindikato STrAF a drenta Bon Futuro, ku ABVO a kuestioná presensia di STrAF. ABVO lo tabata di opinion, ku sindikato STrAF su statutonan tabata duna solamente espasio pa representashon di trahadónan den fiskalia, i konsekuentemente STrAF no por a representá niun wardadó di prezu. Pa haña klaridat riba esaki, ABVO lo a pidi minister di Hustisia David Dick pa laga studia e statutonan di STrAF, pa asina yega na un konklushon. LA PRENSA a komprondé ku un hurista a hasi esaki i a konkluí ku debidamente e statutonan di STrAF ta pèrmití pa representá trahadónan den Bon Futuro.
LA PRENSA su fuente a indiká, ku e sindikato STrAF lo ta di opinion awor, ku a pèrdè masha hopi tempu balioso den pasado diskutiendo i awor tòg ta resultá ku nan ta pèrmití pa representá e trahadónan. LA PRENSA a komprondé tambe, ku ABVO no tabata ke sinta na mesa ku STrAF, pasó ABVO no tabata rekonosé e sindikato. Dor di esaki tabata difísil pa traha na bienestar di e empleadonan di Bon Futuro. Parse ku STrAF ta di opinion, ku for di e tempu ei por a hasi hopi kos di un otro manera, si no tabatin e problema akí ku a originá serka ABVO. Finalmente STrAF lo tabata ke pa ABVO públikamente rekonosé nan komo sindikato awor ku e konseho ta konosí. Parse ku STrAF a keda straño, ku minister Dick a keda ketu despues ku el a risibí e informashon akí i ta spera ku e lo publiká esaki.

 

WILLEMSTAD – Pronto lo bai drecha e fasilidatnan sanitario na aeropuerto di Kòrsou. Banda di esei lo pone tambe bankinan parti pafó di e edifisio. Esei ta loke minister Maurice Adriaens a anunsiá despues ku el a bishitá e kompleho. A base di reklamonan ku el a haña enkuanto e bañonan i fasilidat pa sinta na Aeropuerto Hato, e minister ku ta enkargá entre otro ku aviashon mes a bai tuma nota di e situashon. Mirando e situashon ku ta reina na Aeropuerto inmediatamente e mandatario a instruí Siegfried Fransisco (Direktor di Departamentu di Aviashon) pa tuma kontakto ku esnan enkargá pa laga drecha e situashon. “Ta imposibel ku un aeropuerto di kaliber internashonal ta tene bañonan no limpi i no tin lugá pa sinta. Un aeropuerto mester brinda fasilidat adekuá pa sinta i sigur serka nos na Kòrsou, un lugá pa skonde solo òf áwaseru ora bo ta warda pafó,” asina minister Adriaens a bisa. Den kuadro di esaki Fransisco i Etienne van der Horst (CAP) a hiba kòmbersashon i palabrá ku riba tèrmino korto CAP lo laga drecha e bañonan poniendo mosaiko.Di e forma aki por tene esakinan mas limpi i higiéniko, segun Sr. Van der Horst. Tambe a palabrá ku denter di poko CAP lo laga pone bankinan parti pafó di e edifisio. Minister Adriaens a bisa ku e ta kontentu ku resultado di e kòmbersashon i ta spera ku CAP lo aktua pronto manera palabrá. Riba e pòrtrèt por mira kondishon aktual di un di e bañonan na nos aeropuerto. (Foto eksklusivo: LA PRENSA)

DAVIE, FLA., - Djaluna Juan Carlos Sulbaran a tira su último partido di temporada, ganando un wega di semi final di e torneo estatal di Florida ku skor di 11-6.
Juan Carlos a tira kuater ining fuerte durante kual el a permití únikamente 1 hit, kual tabata un honron solitario.
Den di sinku ining el a konfrontá problema, ora ku el a haña blar i mester a bandoná partido ku bentaha di 9-3.
Djamars anochi American Heritage High School a logra un triunfo di 8-2 riba Fort Pierce pa titulá kampion di e estado di Florida. Nan a keda nominá e High School number unu di Merka.
Juan Carlos tabata klave den e éksito di American Heritage. Su tremendo aktuashon i liderazgo a hiba a tim pa promé biaha na e título estatal.
-Juan Carlos a terminá komo Picher Kampion di Broward County ku rèkòrt di 11-0. E no a pèrdè niun wega for di dia ku el a yega Merka na ougùstùs último.
-El a keda nominá pa e premio All Broward County Sportsmen, komo un di e mihó deportistanan di e kondado di Broward. Djaweps 22 di mei e lo risibí su premio.
-Selekshoná den e All Star Team di Florida. Djabièrnè 23 di mei Juan Carlos lo habri e All-Star Game aki pichando pa South Florida.
-Nominá entre e mihó 120 peloteronan di skol na Merka
-El a keda nombrá den Sport Illustrated Top 100, rankeá na di 27 lugá entre e mihó 100 prospektonan di Merka.
Juan Carlos a keda di bini Kòrsou dia 26 di mei awor ora ku skol a kaba pa forma parti di e selekshon di NabaFe ku ta preparando pa partisipá na Haarlemse Honkbal Week na Ulanda.

Skina di Sorti, awe djabièrnè 23 di mei di 2008, ta kuminsá ku deseá tur hende un bon dia. Tin un bòm polítiko, ku destinashon Antia, ta formando den seno di Tweede Kamer, spesífikamente den frakshon di PVV di Geert Wilders, ku pa Kòrsou lo por bai kousa un tsunami polítiko. E insitashon (“directe aanleiding”) ta e kontroversia rondó di Hero Brinkman di PVV i Parlamento antiano.
****
E kontraversianan ku e polítiko ulandes Hero Brinkman di PVV ta na punto di kue un buèlta bastante serio. Segun esnan ku tin akseso na NRC (bo por subi nan website) por a lesa, e kontraversial polítiko Hero Brinkman di PVV tin intenshon di presentá un lista ku nòmber di 37 polítiko antiano ku ta metí ku korupshon. Presentá un lista ku nòmber di hende, ku e kalifikashon di involukrashon ku korupshon no ta algu ku un hende ta hasi sin por supstansiá esaki.
****
Esnan ku ta den e wega di korupshon òf ta move den e sirkuitonan aki, no por tuma e informashon for di NRC komo djis un blòf polítiko. Esnan ku ta bon informá ku e baiben den sirkuito polítiko ulandes sa ku miembronan di Tweede Kamer i sigur esnan ku ta forma parti di sierto komishonnan ta wòrdu informá riba entre otro integridat di gobernashon na Antia.
****
Meskos ku ta sosodé rònt mundu, e ministernan konserní mes ta mantené nan mes na informe general (sin menshoná nòmber), pero ku diverso miembro ta hasi uso di nan konekshonnan pa haña e detayenan di un òf otro informe.

No tin klaridat si esaki ta konta pa Kòrsou tambe

WILLEMSTAD – Poko poko pero sigur e periodo di vakashon ta aserkando. Skolnan ta drentando den último luna i ku esaki vários ta esnan ku ta preparando nan plannan di vakashon. Tin ta hasi vakashon den nan mes pais, pero otronan lo biaha pa nos islanan bisiña, pa Europa òf pa Merka.
Pa esnan ku ta biaha pa Merka via di Miami ku American Airlines, entrante 15 di yüni e kompania di aviashon aki lo bai kuminsá kobra èkstra pa maleta, pa asina kontrarestá e subida drástiko den preis di petroli i ku esaki fuel di avion tambe.
Un servisio ku den pasado no tabata kosta pasaheronan nada, awor tin ku bai paga pa esaki. Ta trata di e medida ku American Airlines ta bai implementá kuminsando 15 di yüni próksimo, nèt promé ku e periodo drùk di zomer. Pa e promé maleta ku un pasahero trese pa ‘check in’ e mester paga 15 dollar i pa e di dos maleta 25 dollar. Mas ku tres maleta ta paga 100 dollar i seis òf mas maleta ta paga 200 dollar. Ekipahe ku ta bai na man no mester paga nada (ainda?).
American Airlines a tuma e medidanan drástiko aki, ku no a kai den muchu bon tera na Merka, komo pasonan pa keda viabel den e merkado instabil di aviashon. “Nos a haña nos fòrsá di tuma e medidanan aki pa motibu di un situashon ekstraordinario.”
Otro pasonan ku American Airlines lo tuma ta di kòrta e kantidat di buelonan doméstiko i kita vários mil empleado for di trabou.

CARACAS, Venezuela, - “Interpol (Polisnan Internashonal), komo organismo polisial, no tin niun kredibilidat pa su kontradikshonnan i pa e interes ku tin den sirbi komo instrumènt di Gobièrnu colombiano i di Gobièrnu merikano”, Embahador di Ecuador na Venezuela, René Vargas Pazzos, a bisa.
“Mi ta di akuerdo ku pensamentu di Presidente di Venezuela, Hugo Chávez, den sentido ku ta studiando e posibilidat pa determiná si nos ta sigui ta miembronan di e polisnan internashonal ei”, el a argumentá.
E diplomátiko a ofresé su deklarashonnan ayera na Asamblea Nashonal, kaminda el a akudí pa risibí un proyekto di akuerdo aprobá pa Parlamento den konmemorashon di e di 186 aniversario di “Batalla de Pichincha”.
Ora a puntr’é riba e importansia ku ecuatorianonan ta duna n’e mensahenan enkontrá den e supuesto kòmpiuternan di komandante tòp di FARC, Raúl Reyes, asesiná 1 di mart último pa Ehérsito colombiano, el a indiká ku “pa mi pais e dokumentonan aki no tin niun balor”.
El a ripití ku pa Gobièrnu ecuatoriano e supuesto dokumentonan no tin interes den nan orígen personal.
“Niun hende por sigurá ku a enkontrá e mensahenan eiden!”, e Embahador di Ecuador na Venezuela a señalá.

Foto: Rene Vargas Pazzos 2305

René Vargas Pazzos, Embahador di Ecuador na Venezuela.

NEW YORK – Ora ta trata di e asombroso Mike Tyson, tur hende tin un opinion. Lo e pasa pa historia komo un dje pesonan pisá grandi o komo un pèrdida di talento? Akaso su aktonan pafó di rin a pone un sombra riba su aktuashon den rin?
Kiko ekspertonan ta bisa di dje:
Pa motibu di kon e kosnan a kaba p’e i pa motibu dje sirko ku su bida tabata pafó di rin, probablemente historia lo rekòrdá Tyson komo un personalidat karismátiko ku a kaba den un era partikularmente debil di e kategoria pisá. E ta un inhustisia: Den su momento kulminante e tabata un peso pisá talentoso kende su poder i velosidat tabata e únikonan entre e mihónan i na mi opinion, lo poné den e promé 10 di historia, asina William Dettlof di Ring Magazine a opiná.
Tempu Tyson tabata hóben e tabata un bòksdó ekselente. Pa mala suerte, e parti ei di su historia a haña un sombra pa loke a bini despues. Esei tabata opinion di Thomas Hauser, Secondsout.com.
E punto mas grandi di Tyson ta ku tur hende sa ken e ta. Esei ta asina pasobra el a eksplotá den bòkseo (ku nòkout riba su promé 19 rivalnan, un dozein den promé rònt) i el a bira e kampion mas hóben di historia di peso pisá, despues el a drenta sosiedat i finalmente el a satisfasé esnan ku no gust’é ora el a sufri nòkout na man di rivalnan di ménos nivel den su último dos peleanan. Esei Michael Hirsley, eks kolumnista di bòkseo di Chicago Trinube a bisa di dje.

BOGOTA, Colombia, - E senador opositor Piedad Córdoba, di kende hustisia colombiano lo investigá pa supuesto vínkulo ku gueria di FARC, a sigurá ayera nochi ku e no ta sinti temor p’e anunsio, i e lo sigui buska liberashon di e rehennan den poder di FARC.
“Mi no ta stòp ku mi trabou na fabor di e akuerdo humanitario. Lo mi spera ku serenidat investigashon di mi wes natural ku ta Korte Supremo di Hustisia. Mi ta sigui traha komo fasilitadó di e akuerdo, i mi no tin miedu di e investigashon”, Córdoba a señalá den un akto públiko na Cali (sùit).
Ayera, fiskal general Mario Iguarán a anunsiá ku lo kuminsá ku investigashonnan, despues di su bishita na Washington, i a papia riba lokenan a enkontrá den kòmpiuternan di number dos di FARC, Raúl Reyes, kende a muri durante atake di militarnan colombiano kontra su kampamentu situá na nort di Ecuador na luna di mart último.
“No ta straña mi ku despues di mi aktuashonnan na Kumbre di Pueblonan tené na Lima siman pasá, mi sa di e tipo di anunsionan aki”, Córdoba a enfatisá, ora el a kalifiká e anunsio komo “otro kortina di huma” pa skonde vínkulonan di polítikonan afektá pa Gobièrnu ku paramilitarnan di ultraderecha.
Senador Córdoba i Presidente venezolano Hugo Chávez a gestioná frente FARC, riba enkargo di Presidente di Colombia Alvaro Uribe, un plan pa logra liberashon di mas o ménos 39 rehen den poder di gueria di FARC, entre nan e dama polítiko colombiano-franses Ingrid Betancourt.

Lorito ta yama tur hende un felis djabièrnè. Siman a pasa masha lihé. Danki Dios ta basta kos ku a pasa ku a tene nos bon konektá!
****
Lorito su alanan ta kansá, pasobra nos a bula te den oranan di mardugá riba ITC. Anke e karchi tabata bisa ku kos lo kaba 3 P.M. finalmente kos a bai kaba te den kareda di 3 A.M. Masha diskushon tabatin, palabranan duru a kai, stulnan ku a skùif pa bandoná reunion, diskushon fuerte entre hende muhé (Lorito no ta gusta niun diskushon entre muhé i nos a bula limpi hala leu!), i danki Dios na final tabatin un sonrisa maske ta fòrsá aki aya. Algun hende sinembargo tabata manera “boer (boerin) met de beruchte kiespijn”.
****
Lorito ta kere ku Sarah ku un strategia ala Betico Croes a kue tur hende for di base. Sarah sigur a resultá ganador di e diskushonnan ku a kaba den ora di mardugá, por sierto un ponensha ku otronan tambe a kompartí ku nos. Sarah a hunga e wega masha bon mes! Nos ta kere ku e no tabatin otro alternativa, pasobra si e no a sali vensedó, Sint Maarten lo no a haña status outónomo nunka mas. Nos ta sigui insistí ku e isla no meresé un status outónomo, pa motibu di su limitashonnan. Pero karakter di su hendenan ta pone ku nos tin hopi apresio pa nan, maske tin biaha nan ta diskriminá nos!

(foto lorito)

E hende ku mas a gana kurason di nos ayera tabata Doña Ank. Doña Ank a dal un shimis tropikal masha bunita ku a laga nos masha babuká. Esta bunita no! Nos a haña gana di bai “happy hour” ku ne, basta e bisti e shimis ei! El a lusi banda di e trahenan (demasiado) steif di Emily, Zus, Zita, Lisa, Sarah i otronan.

WILLEMSTAD – E karchi tabata bisa, ku 3or di atardi lo tabatin un konferensha di prensa relashoná ku e deliberashonnan estatal di e siman di ayera. A resultá sinembargo, ku e konferensha di prensa a tuma lugá 3or di mardugá, despues di un seshon di frustrashon konstante, palabranan duru i hasta menasa di bandoná mesa di negosashon. E promé frase pa prensa tabata: “Mòru, bon dia” komo ku ya kaba un dia nobo a habri. E deliberashonnan di ayera a pone hopi kòrda riba e deliberashonnan na Spaansche Hof ku a kaba den e famoso (segun otronan notorio) Slotverklaring na novèmber 2006. Ayera tabata mesun kos loke ta ilustrá komplisidat di e materia. Es mas, tin impreshon ku tur partido na mesa a balotá e deliberashonnan i tabata demasiado optimista. Despues di 15 ora sinembargo, huma blanku a sali for di e pipanan di International Trade Center, indikando ku a yega na un konsènsus. Un konsènsus un poko kompliká, ku mester di hopi espasio pa splika den e próksimo dianan.
Prinsipalmente Sint Maarten i su lider di delegashon Sarah Wescot-Williams a hunga un papel primordial den e deliberashonnan di ayera. Na diferente okashon sra. Wescot-Williams a pone preshon enorme riba e deliberashonnan i hasta a menasá di bandoná negosashonnan. Na un dado momentu sra. Wescot-Williams a bisa, ku mester laga e deliberashonnan pa loke nan ta i a sali for di sala, pero sekretario di Estado Ank Bijleveld, ku a hañ’é konfrontá ku un débakel serio di e negosashonnan, a bai su tras pa pidi’é rekonsiderá.

 WILLEMSTAD – Nèt promé ku nos a bai imprenta awe, polis a informá ku a logra identifiká e restunan mortal ku a haña dia 17 di mei último na Fèlt Salu. Ta trata di e hòmber Alejandro Rignald Blancheville, nasé na Kòrsou dia 11 di yanüari 1965. E investigashon den e kaso ta sigui. Manera LA PRENSA a informá, e hòmber tabatin un sla na e parti patras di su kabes ku por ta relashoná ku un kaida òf un opheto ku a dal e kuné.

WILLEMSTAD / DEN HAAG – Polis ulandes a entregá aña pasá 251.591 sospechoso na Ministerio Públiko. Esaki ta 8.500 mas tantu ku na 2006. E oumento ta sintá prinsipalmente den sospechosonan di destrukshon, strobamentu di òrdu públiko, violensia kontra persona i krímen den tráfiko.
Sin embargo e kantidat di sospechosonan ta 4.000 ménos ku a palabrá, pero esaki tabata debí ku na 2005 bahada ku no a nivelá kompletamente ainda. Públiko den mayoria kaso ta satisfecho ku e kontakto ku polis. Tambe públiko ta evaluá e disponibilidat di polis mas mihó ku a palabrá. Loke si ta laga di deseá ta ku polis no tabata alkansabel via nan number 0900-8844: solamente 12 di e 26 kuerponan a logra pa kontestá 80% di e yamadanan denter di 20 sekònde. Loke si públiko ta kontentu kuné ta e kalidat di e servisio via telefòn. Pa loke ta trata yamadanan via e number di alarma 1-1-2 kasi tur e 26 kuerponan a alkansá e norma nobo pa kontestá 90% di e yamadanan den 10 sekònde.
E datonan akí ta publiká den e Relato Anual di Polis Ulandes 2007, ku e ministernan Ter Horst (Asuntunan Interior i Relashonnan di Reino) i Hirsch Ballin (Hustisia) a manda pa Tweede Kamer. Den e relato tin skibí ki kontribushon polis, huntu ku ministerio públiko, munisipionan i organisashonnan sosial, a duna na baha kriminalidat i molèster. E Gabinete ta hasi un esfuerso pa baha esaki ku 25% den 2010 kompará ku 2002.

WILLEMSTAD – Tur polis na Antia por a vota djarason pa un direktiva nobo di e bònt NAPB. E elekshon no tabata pa un presidente nobo, sino mas bien pa yena e lugánan ku mester a bira bashí, dor ku miembronan nan periodo a pasa.
E miembronan na Kòrsou ku a postulá nan mes pa un puesto den e direktiva i a haña un puesto fiho, tabata Balthus Lie-A-Tjam (217 voto), Erwin Jansen, (151), Luisandro Cijntje (145), Eithel Geertruida (143), Soraida Cicilia (145), Anthony Emerenciana (139), Elvis Juliana (133), i Jose Joseph (126). E último dosnan a bira miembro suplente.
Pa miembro di kongreso e polisnan a eligí na Kòrsou: E. Andrea (92 voto), S. Angel-Bryan (111), E. Ayala (71), J. Brug-Oleana (114), F. Daal (73), S. Goilo (92), G. Isabella (104), R. Isidora (85), R. Manuel (60), C. Martha (80), J. Obispa (65), L. Privania (110), G. Rozalina ((91), M. Sophia (94), R. Sprock (57), R. Troncon (89) i E. Wilson (51 voto). Na St.Maarten a eligí John Carl (71 voto) i Rogers Carleyle V. (31 voto) komo miembro di kongreso pa representá miembronan di Kuerpo Polisial di St. Maarten, Saba i St. Eustatius. Komo úniko miembro na Boneiru a skohe A. Braaf ku 31 voto).

WILLEMSTAD - Na Curaçao Sea Aquarium riba 3 mei 2008, mama “Dory” a duna lus na un bunita i saludabel puppy despues di un embaraso di mas òf ménos 11½ luna. E puppy ku ta muhé a haña e nòmber di “Mapuche”. Tantu e mama Dory i su yu ta bon di salú.
Nan dos a wòrdu separá for di e otro leonnan di laman pa un área ku tin un pida playa chikitu, pasobra e puppy no por landa ainda. Di e manera aki nan no ta wòrdu molestiá dor di e otro leonnan di laman.
E tata ku ta “Nemo” no ta yuda den kuido di e yu. E puppy lo bebe lechi di su mama durante mas off menos 1 aña largu. Pero for di mas òf ménos 4 luna e lo kuminsá siña kome piská. E ta drumi hopi i de bes en kuando por mir’é ta purba kana rònt i ta eksplorá e playa.

WILLEMSTAD - Resientemente Curacao Lions Club tabata di bishita na Peter Stuyvesant College, kaminda nan a hasi entrega di dos "cooler" pa e skol. E kantidat di alumno di skol a subi konsiderablemente (surpasando e kantidat di 1000) i ku esaki a hasi donashon di 2 cooler pa por aliviá alumnonan.
Riba e pòtrèt por mira rector di e skol, sr. Sille huntu ku consierge, alumnonan i presidente di Curacao Lions Club, Heidi Foendoe.
Tambe e Lions Club a hasi un donashon na Guiding Angels. E organisashon aki ta entrená kachónan ku mañan Dios ke lo bai fungi komo bista i man drechi di personanan ku un desabilidat visual. E organisashon aki ta e promé i úniko organisashon ku ta entrená e asina yamá: blindengeleidenhonden.
Ya pa hopi tempu kaba Fundashon Pro Bista ta hasi su máksimo pa yega na esakinan pero e kachónan aki ta hopi kostoso. Partikularmente e entrenamentu i mantenshon di e animalnan aki.
E organisashon Guiding Angels a pone su mes disponibel pa yuda entrená e kachónan aki sin ningun gastu adishonal i ta hasi esaki den nan tempu liber. Bista ta un di e proyektonan kardinal di Lions i ku esaki nan tambe kier yuda kontribuí ku esaki hasiendo un donashon na e organisashon pa yuda ku e gastunan di mantenshon di e presioso animalnan aki.
Riba e pòtrèt por mira un par di e voluntarionan ku ta entrená e kachónan.

WILLEMSTAD - Biblioteka Públiko Kòrsou a risibí 22 eksemplar di e promé buki di Kuifje tradusí na papiamentu. For di awe públiko por pasa fia E asuntu di florisol. Por reservá Kuifje tambe via nos katálogo digital riba www.bibliotekapubliko.an.Riba pòtrèt por mira sra. Lianne Leonora, hefe di sekshon Antilliana/Caribiana, sra. Marisela Croes, representante di un di e spònsernan Rocargo i direktor di Biblioteka Públiko sr. Peter Steenbakkers (sumamentu kontentu komo fiel lesadó di Kuifje). Biblioteka Públiko ta invitá un i tur pa bin lesa òf fia Kuifje na papiamentu.