Gobierno di MEP ta pidi Rudy Lampe pa tin pasenshi

ORANJESTAD- Con por ta posibel cu den un pais desaroya manera Aruba tin politiconan ignorante – pa no bisa bobo - y te hasta instancianan renombra cu ta carece di vision pa loke ta e desaroyo economico di nos pais? E pregunta aki ta bin den mente ora nos mester scucha declaracionnan di e lider di RED, esta sr. Rudy Lampe y tambe di Camara di Comercio cu no tin un ‘benul of flauw idee’ kico tabata intencion di nos Ministro Presidente sr. Nelson Oduber na momento cu su persona a firma un Memorandum of Understanding (MOU) cu e compania China International Intellectech Company (C.I.I.C.) y esaki pa loke ta e contactonan comercial cu den futuro lo mester wordo estableci cu e pais gigante aki.
Nos Minister President Nelson Oduber siguramente ta un homber responsabel cu den pasado caba a trece logronan grandi pa nos pais, manera e Plan Sasaki cu despues a resulta e vehiculo principal pa desaroyo grandi di nos turismo, e introduccion di nos himno y bandera, e re-apertura di e refineria na San Nicolas, e schrapmento di e fecha di Independencia 1996 for di den Statuut, e reduccion di 100 miyon dollar di debenan di garantia (SACE), e independisacion di e companianan estatal Arubus N.V., APA N.V., WEB N.V., Setar N.V., e compra di Elmar N.V. y diahuebs ultimo e firmamento di e acuerdo cu Merca pa loke ta Pre clearance. Tur esakinan ta logronan grandi cu atraves di añanan a resulta den exitonan total y cu ningun hende por kita for di sr. Nelson Oduber. Pa loke ta varios di e logronan aki nos por a scucha den pasado nos opositornan politico declara cu ‘NO POR’, ‘NO TA FACTIBEL’, pero cu despues a keda demonstra cu nan tur a wordo converti den realidadnan exitoso.

ORANJESTAD- Ayera tardi Gobierno di Hulanda hunto cu Gobierno di Aruba, a emiti un comunicado di prensa riba e posibel nombracion di Dato Steenhuis como Procurador General di Aruba y cu ta bisa lo siguiente:
“E ausencia largo di e Procurador general actual di Aruba tabata motibo pa hiba conversacionnan cu señor Dato Steenhuis tocante e posibilidad pa e asumi e funcion di ontstentenis PG.
Durante e conversacionnan a resulta cu e areglo di pensioen di señor Steenhuis (fpu) no ta permiti señor Steenhuis pa, riba termino corto, asumi e posicion aki. Aruba y Hulanda ta deliberando riba alternativa.”
Te aki e participacion comun aki, caminda Steenhuis no por ta disponibel pa fungi como PG como reemplazante tempora la Therese Fernandez Pedra, kende ta malo na cas.

 
Ladronnan a horta quimico sumamente peligroso pa hende y animal

ORANJESTAD- Pa medio di un comunicado di prensa cu a wordo emiti cu caracter di urgencia ayera tardi, Cuerpo Policial hunto cu Ministerio Publico ta bati alarma pa un situacion sumamente peligroso y delicado.
Un situacion cu a wordo crea pa anti socialnan cu a hinca nan propio bida y di otronan den peliger.
E comunicado ta mustra cu dia 16 di mei 2008, desconocirnan a kibra y drenta horta na un ‘petshop’ na Kibaima, cual kiebro y ladronicia a wordo denuncia na autoridadnan policial, cu ainda ta investigando e caso aki.
For di e articulonan cu a wordo horta for di Kibaima Petshop, e antisocialnan ladron aki a bai cu boternan di quimiconan sumamente peligroso.
E quimiconan aki ta forma un peliger pa bida di tanto animal como hende, si nan no wordo cuida y warda y cuida na e forma indica.
E material aki ta sumamente dañino y ta forma un peliger serio pa habitantenan di cualkier cas caminda a pone e quimiconan aki, of a sconde nan.
Mirando e seriedad di e situacion aki, Cuerpo Policial y Ministerio Publico ta haci un apelacion riba esnan cu a bai cu esakinan, pa avisa autoridadnan competente pa bin busca e material aki, ya cu esnan cu tin nan, ta expone su mes na un situacion serio cu por ta hasta mortal.
Ta trata aki di e suguiente material quimico:
- Oxyterracydine
- Broiler Max
- Triton 100
- Aquildemytile
Autoridadnan ta haci un apelacion riba cualkier ciudadano cu por sa na unda e quimiconan aki ta warda of benta, pa avisa polis pa asina por bai busca esakinan y evita un situacion serio prome cu e presenta.

Parlamentario Zulay van Poppel-Marquez ta propone

ORANJESTAD– Den su comunicado di prensa Parlamentario Zulay van Poppel-Marquez ta reflexiona riba consecuensianan di nos lifestyle insaludabel, y e ta comparti su pensamento cu nos comunidad.
Laga nos para keto un rato serca e consequensianan di e malesanan cronico como resultado di un estilo di bida insaludabel:
a. E placer di bida ta baha pa e pacient y su costonan di bida relaciona cu e malesa ta subi.
b. Productividad di e paciente como empleado den un empresa o organisacion ta baha.
c. E miembronan di famia cu tin cu cuida pa e pacient ta haya un carga emocional extra.
d. E gastonan di uitkering loonderving di SVB pa dianan malo ta aumenta.
e E gastonan medico cu AZV tin cu cubri tambe ta aumenta.
f. Nos economia, nos comunidad y tur su miembronan ta sinti y paga pa e consequencianan menciona.
CAMPAÑA NACIONAL
Aruba mester bai pertenece otrobe na e miho paisnan riba tereno di salubridad den e continente mericano. Con nos ta bai haci esaki. Parlamentario Zulay van Poppel-Marquez ta papia di nos pasobra esaki no ta un responsabilidad di gobierno so. Berdad ta cu nos Constitucion ta indica den Articulo V23 promer inciso cu Gobierno ta tuma precaucion pa promove salubridad publico. Vab Poppel-Marquez ta cita: ”De regering treft maatregelen ter bevordering van de volksgezondheid.” Pero e cifranan ta indica cu e salud di cada un di nos como cuidadano di e pais Aruba ta depende en gran parte di nos estilo di bida y esey kier men cu ta cada uno di nos ta den prome luga responsabel pa nos propio salud. Bo salud ta di bo, cuid’e.

WILLEMSTAD – Un hende a mara un plachi di heru na pia di un kachó, kousando un doló inmenso serka e pober animal. Ku hopi esfuerso i ku e pia na laira e tabata kana i buska kuminda pa su pùpinan. No opstante esfuersonan di Dierenbescherming, pa konsientisá siudadanonan riba trato di animal, tòg tin hende ta sigui hasi nan mes kulpabel na maltrato di bestia. Aña pasá Dierenbescherming mester a eliminá algun mil kachó, ku nan doño a deshasí di nan. Entretantu tin un kampaña di sterilisashon ku mester evitá ku mas kachó no deseá ta nase. Ta bon pa tur hende tuma nota di e kampaña akí.

Skina di Sorti, awe djasabra 24 di mei di 2008, ta kuminsá ku deseá tur hende un bon dia. Pa supstansiá mi ponensia di ayera lo siguiente. Den oposishon PAR i PNP a pone e manera ku diferente nombramentu a tuma lugá un punto serio ku mester a atendé ku e urgensia nesesario. Entre tantu e asuntu a pèrdè importansia, pasobra ya no ta kestion di kiko ta bon òf malu, pero kestion di kiko ta polítikamente kunbiniente.
****
For di tempu ku honorabel miembronan di Konseho Insular a trata e asuntu di oumento di nan kondishon di trabou, mi a apuntá, ku den seno di koalishon tabata tin diferente miembro ku tabata spera i deseá ku un otro miembro di koalishon ku no ta nan, lo a yuda pasa e areglo. Na e okashon ei mi a hasi menshon di algu ku ta reflehá un mentalidat di gai bibu. Unu di trata di kue hende kabes abou, ku ta mal pero mal plamá den sektornan di komunidat.
****
Rondó di algun polítiko ku posishon klave den gobernashon tin hendenan ku a internalisá e filosofia ku Machiavelli ta prediká den su obra “The Prince”. Pues di krea e persepshon ku bo ta sirbi un interes mas ayá, miéntras loke bo ta hasi ta buska bo benefisio. Tuma bon nota ku mi ta skirbi “algun polítiko”, pues mas di un. No ta un fayo di pen, pero un formulashon konsiente, serio i duru. Mi ta bini bèk riba esaki na su debido tempu.
****
Pa lokual ta e situashon sosio ekonómiko di pais, mi ke duna gobernantenan den serio konsiderashon pa stòp di papia di un futuro alentador. Ku e desaroyo den preis di krudo i e falta di rekursonan ku nos ta disponé di dje (riba término korto) pa atendé ku e impakto dje desaroyo global, e klase sosial mas vulnerabel lo bira mas grandi. No mester trata di krea e persepshon falsu serka nan ku nan situashon ta bai mehorá.

...Ku edishon britániko HELLO!...

INGLATERA, - E benta eksklusivo na revista HELLO! di e kasamentu di siman pasá djasabra, di Peter Phillips, nietu di Reina Elizabeth II, i e canadiense Autumn Kelly, djarason último tabata opheto di krítikanan fuerte na Inglatera.
Peter Phillips ta yu hòmber di prensès Anne i di kapitan Mark Phillips, i promé nietu di Reina Elizabeth II, ku a kaba di kasa siman pasá, i kende ta solamente e di diesun den linea pa subi trono.
Pero e benta eksklusivo di su kasamentu a pone, entre otro, e diputado liberal Norman Lamb, rabia masha tantu.
Segun Lamb, e loke ku a sosodé ta un “ekibokashon” ku por terminá hasi daño n’e monarkia.
“Pasobra esaki ta ‘disminuí’ e monarkia, segun wowonan di e siudadanonan. Si ke mantené e institushon i rèspèt di pueblo, tin ku evitá kombèrtí e monarkia den merkansia manera ora ta okurí ku e hendenan famoso di futbòl”, Lamb a bisa, sitá pa vespertino Evening Standard, ku den un editorial tambe ta kalifiká e loke ku a okurí komo “eror real”.
Den tèrminonan paresido e diputado laborista Ian Gibson a ekspresá, ku segun e, “e públiko britániko ta spera di e Reina ku e ta te ariba aya, i no ta ferwagt ku su pòtrèt ta sali publiká den HELLO! E Reina no ta esposa di un futbolista”.
Un funshonario di Palasio di Buckingham a bisa e vespertino ku un kos asina’ki lo tabata inimaginabel algun aña pasá, i a ekspresá su deseo ku e ta spera ku esaki lo no ripití mas.

...Un di nan a kuminsá ku relashon sentimental ku yu hòmber di eks Presidente Carlos Menem...

ARGENTINA, - E famoso ohochi griego, Victoria i Stefanía Xipolitakis, e dianan aki ta preparando nan promé CD.
Por rekòrdá kon Vicky i Stefa, manera nan amistatnan íntimo ta yama nan, a bira famoso den Palermo Hollywood Hotel, e programa ku ta keda emití pa Canal 9 di Argentina.
Den e dianan aki nan a bira mas konosí, ora nan tabata riba pantaya di tur programa di espektákulo i tambe páginanan di revistanan mas rekonosé, ora a anunsiá públikamente relashon sentimental di un di e ohochinan ku Carlitos Nair Mesa Menem, yu hòmber di eks Presidente argentino Carlos Menem.
E reaparishon di e ohochi griego den medionan di komunikashon a pone ku un kompania diskográfiko a proponé nan, pa prepará nan promé CD.
E rumannan muhé aki no kier a pèrdè e oportunidat di lansa nan mes komo kantante.
Djaluna último a graba e promé kansion di e CD titulá ¡Qué manera de menear! ku un ritmo di reggaeton, ku nan mes a komponé huntu ku nan mama.
Tambe e rumannan ohochi aki a kaba di graba nan di dos kansion titulá “A mover la pelvis” durante kua por skucha nan huntu ku Tota Santillán, eks pareha di enemigu di e ohochinan aki, Fernanda Vives.

Foto: Un di pia ohochi griego 2405

Riba e pòtrèt aki por mira un di e pianan ohochi griego.

MIAMI, Florida, - E prekandidato demókrata pa presidensia merikano, Barack Obama, rekonosiendo ku ta eksistí hamber n’e kontinente suramerikano, a probechá durante un almuerso ku “Fundación Cubano Americano”, e organisashon mas antiguo di eksilio cubano, pa splika ku si e bira Presidente di Merka su polítika relashoná ku Amérika Latina lo bai ta entre otro defendé derecho di Bogotá pa kombatí “Fuerzas Armadas Revolucionarias de Colombia” (FARC) den kualke sirkunstansia.
El a sigurá ku su Gobièrnu lo por rekuperá liderazgo n’e hemisferio i tambe a bisa di ta kapas di fomentá libertat religioso, demokrasia outéntiko, seguridat i lucha kontra pobresa na paisnan sùit di Merka. Pues esaki, Obama a añadí, lo benefisiá e nashon.
Riba e kaso di polítika relashoná ku Cuba, Obama a afirmá dilanti un públiko anticastrista ku komo Presidente e lo mantené embargo ekonómiko kontra Cuba. Tambe el a bisa ku si Cuba dal pasonan signifikativo pa demokrasia kuminsando libra tur presu polítiko, nos lo kuminsá normalisá e relashonnan. Esaki lo impulsá un kambio real na Cuba, mediante un diplomasia fuerte, inteligente i ku prinsipionan.
“No tin mihó embahadornan ku e cubanonan-merikano. Ta p’esei ami inmediatamente lo pèrmití biahenan sin restrikshon di famianan pa bai Cuba. Ta tempu pa laga cubanonan-merikano mira nan mama, mayornan, rumannan”, Obama a bisa.

WILLEMSTAD – Den nan afan pa mustra ku e proseso estatal ta riba bon kaminda tur e Gobièrnunan ku a partisipá na e Kumbre Polítiko e siman aki a pone e konseho importante di eksperto un banda. Aparentemente nan tabatin miedu di pèrdè kara ante e públiko ku ta ansioso pa sa kon e proseso ta kana.
Manera LA PRENSA a informá for di djaweps último, e ekspertonan ku e grupo di Direkshon Polítiko a konsultá a bisa bon kla ku no ta bai keda kla ku e proseso promé ku yanüari 2011. Den e kaso mas ekstremo hasta a menshoná 2012 i 2013. LA PRENSA a bai buska mas informashon riba e punto importante aki i nos a haña sa ku enbèrdat Stichting Overheidsaccountantsbureau (SOAB) a hasi un análisis di e situashon manera e ta kanando aktualmente. SOAB a haña e enkargo pa hasi e análisis na mart último i e ofisina independiente a raportá na aprel. SOAB a raportá siman pasá pero no opstante su análisis ku ta mustra ku tempu ta nos peor enemigu, gobernantenan a skohe pa laga e análisis di eksperto aki un banda. Fuentenan di e Grupo di Direkshon Polítiko a konfirmá pa LA PRENSA ku enbèrdat e análisis di SOAB ta unu masha fuerte i konkreto den sentido ku tin hopi trabou di hasi i tempu ta krap.
Remarkabel ta ku direktor di SOAB Geomaly Martes ta presidente di e Komishon di Desmantelashon di Antia. Martes a bisa anteriormente e aña aki ku e no ta kere ku tin problema pa téknikamente alkansá desèmber awor. Pero el a atvertí ku si e proseso ta téknikamente kla mes, anto ainda falta e parti di tumamentu di desishon polítiko riba kua e gruponan di trabou tékniko no tin grep.

Lorito ta yama tur hende un felis djasabra. Un otro luna ta yegando na su fin di manera ku nos ta pone 5 luna di 2008 nos tras. Asina lihé kosnan ta bayendo. Nos a bisa un kolega di nos ayera ku si nos sigui konta asina aki, aki poko dia lo ta 2020.
****
Lorito no a gusta e manera ku e Kumbre Polítiko di e siman aki a bai. Lógikamente ta keda na kada hende pa nan asumí nan responsabilidat pa loke nan ta hasiendo. Pero nos ta sinti falta di un splikashon mas simpel ku tur hende por komprondé. Pa nos mes ku aña aden aña afó a move den e materia, e terminologia ta unu masha kompliká. Kon a para pa e hende ku ta ansioso pa tende na plaka chikí ta kiko ta pasando.
****
Un biaha mas nos ta sinti falta di un kampaña di informashon ku palabranan komun i ku pueblo ta komprondé. Aki nan nos no ta papia di un korant ku tur hende ta pone un banda keda sin lesa. Nos a bisa i nos no ta kansa di ripití ku e punto aki ta masha fundamental den e proseso ku ta tumando lugá. Di e hopi kosnan ku a bisa den oranan di mardugá djabièrnè mainta un di e poko kosnan ku Lorito a komprondé ta: “Mòru, bondia!”
****
E mihó editorial riba e deliberashonnan di e siman aki tabata di The Daily Herald publiká awe mainta. Un editorial sinsero, franko i honesto. Un di e konklushonnan di e korant ku tabata un reportero speshal na Kòrsou na ITC ta bisa asina aki. “By now it should be very clear to all that our leaders have been underestimating not only the magnitude of the unfinished business at hand, but the island territory’s capacity in terms of availability of experienced manpower to execute the tasks at hand in a timely and efficient manner”.

ROMA, Italia, - E dama Minister di Igualdat di Oportunidat di Italia, Mara Carfagna, di 33 aña, no sa kon kita for di su perfil komo modelo profeshonal.
Konvoká pa revista Interviu, e dama funshonario sensual aki a sali sunú riba portada di e revista.
E finalista di sertámen di Miss Italia a aparesé sin paña i sin kartera, Interviu a deskribí.
Carfagna, kende ta poseé un beyesa indiskutibel, a demostrá ku e por desempeñá perfektamente dos ròl na mesun momentu: esun di modelo i esun di Minister.
E dama aki ta e mesun persona ku algun tempu pasá a pone matrimonio di Promé Minister di Italia, Silvio Berlusconi, tambaliá.
Impreshoná pa su beyesa, e multimionario aki a deklará ku, di su parti, e lo kasa ku Carfagna i inkluso hib’é te fin di mundu.
E konfeshon aki a pone ku esposa di e magnate aki, mediante un karta na un korant nashonal, a eksigí su esposo pa pidié despensa públikamente.
E dama Minister di Gobièrnu di Berlusconi ta lisensiá den Derecho i durante un tempu e tabata traha komo modelo profeshonal.
E resientemente nombrá dama Minister pa Igualdat di Oportunidat den Gobièrnu di Berlusconi, tambe ta diplomá den Piano i Danza Klásiko.
Ademas durante un tempu, el a traha komo modelo profeshonal.
Alabes el a partisipá den konkurso di Miss Italia na 1997, te ku el a keda eligí pa huradonan den e finalistanan.

DE LIMA-JOB
Genoveva Evarista (87 aña)
A laga atras su kasá Andries de Lima, yunan Reginald i Stella de Lima-willems, Errol i Else de Lima-Jacobs, Diana, Mae, Rudsel de Lima. Akto di entiero ta djaluna 26 mei for di misa Sta. Familia pa santana Roodeweg. Promé ku entiero tin un s.s. di misa. Bishita 9or.

DE PALM-PELGRIM
Adelaida
A laga atras su yunan Maria Elsbeth, Aura Lourents, Eddy i Poppy de Palm, Agnes, Edna, Vilma, Rudy de Palm, Karel i Genevieve de Palm, Ermita i Gilbert Welhous tur ku nan yunan. Akto di entiero ta djamars 27 mei for di misa Steenrijk pa santana Bethania. Bishita 1or-3.30or. Promé ku entiero tin un s.s. di misa.

GORDON
Berthram Leroy (trágiko)
Mihó konosí komo Botcheim Jackson
A laga atras su kasá Judeskha Gordon, yunan Judeline, Brianlee, Viridiene Gordon, rumannan Roos, John Gordon, Ann Dongen, Vilma Petronilia, Billy Gordon, Eldrick.

WALTER
Hendrik Veronica (67 aña)
A laga atras su yunan Gilbert, Verelon, Mirella Walter, rumannan Francisca Coupain, Cesar, Norma, Urving, Roxane Walter, Stella Walter i Hipolito Isabella, Donald Walter i Nodith Vrutaal, Jessica Walter i Jhon Simmons, Siegfried Walter i Inaida Theodora, Wayne Walter i Magda Bazoer, Carlos i Silvia Water, Mayra i Gilbert Kip, Sidney Walter i Mirella Maduro. Akto di entiero ta tuma lugá na Ulanda.

MARQUES-FERREIRA
Jaime Alberto (69 aña)
Mihó konosí komo Jimmy òf mener Ferreira ku tabata direktor di Scheepvaartschool Alonso di Ojeda

WILLEMSTAD – Konseho di Konsulta (Raad van Advies) a gana su lugá den nos sistema estatal. Gobièrnu i Parlamentu ta tene kuenta debidamente ku e konsehonan di e órgano importante aki. Esei ta opinion di e vise-presidente di e órgano Frank Kunneman ku a elaborá e siman aki riba kon lo bai duna atenshon na e selebrashon di 60 aniversario di e entidat. Konseho di Konsulta ta kumpli 6 dékada dia 31 di mei awor. E tema di e konmemorashon di e aniversario aki ta “Outonomia i Solidaridat”.
Prof. Kunneman a bisa ku un aspekto ku e konseho ta bai tene kuenta ku ne ta e hechu ku ta pidiendo mas i mas transparensha di e tipo di institutonan aki. Konseho di Konsulta no por pone e eksigenshanan aki un banda i mester tene kuenta ku nos sosiedat tambe ta sigui evolushoná. “Nos ta haña ku den un demokrasia moderno ku ta garantisá transparensha i konsehonan di kalidat, ku mester duna públiko mas informashon. Nos ta hasi esei ku lansamentu di un wepsait durante e seminario di dia 26 di mei awor. E wepsait ta destiná pa strukturalmente duna públiko informashon riba nos trabounan”, asina Kunneman a bisa.
Konseho di Konsulta ta un órgano independiente (Institushon Superior di Estado) ankrá den Staatsregeling van de Nederlandse Antillen (Konstitushon di Antia Hulandes). Konseho di Konsulta ta konsehá Gobièrnu tokante entre otro proyektonan di lei, ku Gobernador ke someté na aprobashon di Parlamento, proyektonan di lei ku Parlamento a presentá na Gobernador pa ratifikashon (e asina yamá lei-inisiativa), dekretonan gubernamental konteniendo medidanan general i tambe proyektonan di lei di reino i medidanan general di Gobièrnu di reino. E órgano ta deliberá riba un proyekto di lei pa finalmente yega na un konseho. Durante e deliberashon ta konsentrá riba kòntròl di kalidat di legislashon i ta diskutí aspektonan di maneho, aspektonan hurídiko i tékniko di e proyekto presentá na Konseho di Konsulta.

WILLEMSTAD – Curaçao Aiport Partners no ta rekonosé su mes den e komunikado di prensa ku minister Maurice Adriaens a laga publiká e siman aki riba e kondishonnan na Aeropuerto Hato, prinsipalmente pa loke ta trata e baño i bankinan. Bosero di CAP, Etienne van der Horst a bisa, ku no ta asina ku no tin banki na aeropuerto. Tin banki entre otro den e sala di check-in. “Mi a bisa sr. Francisco (Departamentu di Aviashon) ku kisas tin hende ku ta di opinion, ku no tin sufisiente banki, pero no por bisa ku no tin banki. Francisco a puntra, si tin e posibilidat pa pone mas banki i mi a bisa ku nos lo no por pone mas banki den e sala di check-in pa nos no okashoná un agloromashon di hende ku ta opstakulisá e proseso di check-in. Mi a remarká ku kisas por pone algun banki adishonal pafó di e sala di check-in”. Mas aleu Van der Horst a bisa, ku pa loke ta trata e bañonan, el a informá Francisco, ku ya kaba CAP tin den su plan pa e aña aki pa kuminsá pone mosaiko den e bañonan. E proyekto aki lo kuminsá den transkurso di e aña aki”, asina Van der Horst a bisa.

WILLEMSTAD – Ayera Prensès Maxima a entregá ayera dos Appeltje van Oranje na organisashonnan antiano. Un di nan a bai pa e proyekto “Alfabetisashon i Edukashon di Adulto di Fundashon Pro Alfa. E otro a bai pa e proyekto Mangazina di Rei-Museo den Aire Liber di Boneiru. E premio ta konsistí di un eskultura di un apel oraño i un suma di 15 mil euro. Na Kas di Antia nan a selebrá for di den siman antisipando entrega di e premio aki. Riba e pòrtrètnan, kortesia di Kas di Antia/Pevry Press, por mira momentu ku ta kòrta bolo na Den Haag.

WILLEMSTAD – Lider di MAN Charles Cooper a lansa un proposishon pa bende Refineria Isla i Bullenbaai pa solushoná e efekto di subida di preis di petrolio. E dirigente polítiko a kuminsá un krusada pa splika e proposishon di su partido na diferente medio i tambe pa oirganisashonnan sosial den komunidat. Cooper ta bisa, ku ta trata aki di un proposishon ku no por duda den dje. “E ta posibel i faktibel. Ademas mas tempu pasa, mas posibilidat nos lo pèrdè”, asina Cooper, ku por sierto ta den servisio di Refineria Isla, ta bisa. E no ta konsiderá ku tin un konflikto di interes pa propagá benta di e Refineria. “Ta algu ku nos mester diskutí i yega na konklushonnan rápido riba dje. No por warda te ora tin sufisiente kapasidat di refinahe di petroli den nos área. Awor ta e momentu”, asina Cooper a bisa.
E dirigente políiko a splika, ku Kòrsou tin un propiedat kual ta e refineria di Kòrsou, huntu ku e terminal di almasenahe na Bullenbaai. “Tur kos ta indiká, ku benta di e refineria huntu ku Bullenbaai, nos por haña por lo ménos 1.600.000.000 dollar (2.900.000.000 Nafls.) komo pueblo, nos mester konsentrá tur energia den e trayekto pa bende e refineria i e terminal na Bullenbaai mas lihé posibel. E suma aki no ta chupá for di nos dùim. E sifra aki ta bini for di estudio ku Refineria Kòrsou NV a laga hasi dor di e firma ABN-AMRO resientemente. Tambe estudio i komparashon ku ekspertonan di MAN a hasi ta sostené e balor aki di nos refineria huntu ku e terminal di Bullenbaai”, asina Cooper a bisa.

WILLEMSTAD – “Antia ta duna hopi balor na e enkuentro tripartit di parlamentonan di Reino. Den pasado a keda proba ku e enkuentronan aki por ta di hopi balor i benefisio pa nos pais. Un ehèmpel konkreto di esaki ta e forma ku a atendé ku e benefishinan ku e deliberashonnan rondó di BRK tabatin pa nos”, asina Pedro Atacho, presidente di parlamentu antiano a duna di konosé.
Den e dianan ku a pasa i te ainda tabatin hopi diskushon relashoná ku e enkuentro parlamentario entre Antia, Aruba i Ulanda ku ta programá pa tuma lugá otro luna.
E enkuentro aki, ku a haña e nòmber di Parlementair Overleg Koninkrijksrelaties (POK) ta un plataforma ekselente pa diskutí asuntunan di interes mutuo. E enkuentronan aki a bin ta tuma lugá ku frekuensia i den forma eksitoso den e añanan tras di lomba, pero e aña aki a konosé un desaroyo ménos faborabel.
Aktuashon di un solo parlamentario ulandes, den e kaso aki Hero Brinkman di Partij voor de Vrijheid a okashoná un estorbo grave den e relashon parlamentario entre Antia i Ulanda.
Brinkman a kalifiká e islanan komo un “nèshi di ladron, un set di hende korupto” ku ta sigui parasitá riba Ulanda. Ora a pidié pa e hala su palabranan bèk, Brinkman a ninga di hasi esei, loke a pone ku e promé enkuentro di POK na kuminsamentu di e aña aki no por a sigui.
E di dos enkuentro ta na final di yüni awor. Parlamentu antiano a pone bon kla, ku e no ta bai aseptá ofensa di niun parlamentario ulandes mas i a pidi pa laga e mesun reglanan di komportashon ku ta konta pa reunionnan di Tweede Kamer, konta tambe pa e enkuentro di POK, algu ku parlamentu ulandes a bai di akuerdo kuné algun dia pasá.

AMSTERDAM/ WILLEMSTAD – “Den un intento pa aktua mas efektivo kontra kriminalnan, partikularmente kontra esnan ku ta kometé atrako, polis na Amsterdam a habri un sait riba Internèt, pa asina por publiká pòtrèt di esnan ku nan ta buska komo sospechoso di atrako. Esaki ta un manera mas efektivo pa traha”, segun hefe di kuerpo polisial Bernard Welten.
E aña aki polis a detené 108 atrakadó, pero e kantidat di kaso di atrako tabata mas tantu. Den e promé dos lunanan di e aña aki, tabatin 120 kaso di atrako. Na mart i aprel di e aña aki e kantidat a baha te na 70.
Segun Welten e bahada aki tin di aber ku un aserkamentu nobo, mas intensivo.
“E kos aki ta un bahada drástiko, mi ta hopi kontentu pa esei,” Welten a bisa.
Na Amsterdam West e bahada ta mas drástiko ku otro kaminda.
Na yanüari e kantidat di atrako tabata 26, na aprel a registrá 7 kaso so.
Polis a sinkronisá e esfuersonan di e distritonan na otro i ke enbolbí tantu siudadanonan komo komersiantenan mas tantu den prevenshon di atrako. “Bario tambe mester koperá, en bes di laga tur kos den man di polis”, Welten a remarká.
Motibu pa e aserkamentu nobo aki ta un la di atrako ku a tuma lugá fin di aña pasá i kuminsamentu di e aña aki. Welten a bisa ku e ke mantené e aserkamentu nobo aki pa sobrá dje aña aki. “Lo mi sigui, tanten ku tin motibu pa esei”, el a bisa.

WILLEMSTAD - Miembro di parlamentu pa frakshon di PAR, Marlon Jamaloodin ta kere, ku mester ta hopi kouteloso ku e forma ku ta atendé ku institutonan serio i di peso den nos komunidat. Den e kuadro ei, Jamaloodin ta haña ku mester wak diskushon rondó di MOT masha bon mes.
Miembro di frakshon di MAN ingeniero Dwigno Puriel resientemente a manda un karta pa minister di Finansa drs. Ersilia de Lannooy, den kua e ta puntra kiko ta pasando internamente na Meldpunt Ongebruikelijke Transacties, MOT. E informashon ku nos frakshon a haña ta indiká ku lo tin problemanan interno ku ta afektando funshonamentu tambe di e entidat aki, asina Puriel a splika den su karta.
MOT ta e sentro kaminda entidatnan finansiero por mèldu kualke transakshon straño i/òf dudoso ku nan haña nan konfrontá kuné. Si ántes MOT tabata dirigí spesífikamente riba banko i entidatnan finansiero so, awendia a keda probá, ku transakshonnan dudoso por tuma lugá na kualke establesimentu komersial.
Esei mes ta motibu ku resientemente minister di Finansa a anunsiá, ku ta intenshon di inkorporá mas establesimentu komersial den e lei aki. Un di e entidatnan ku – pa straño ku e por zona – no tabata kai bou di e lei aki ta kasinonan. Ta intenshon pa hinka nan tambe den e lei ku ta reglamentá funshonamentu di MOT.
MOT aktualmente ta bou di direkshon di Kenneth Dambruck.
Segun Dwigno Puriel, último tempu tabatin basta publikashon ku a duna e impreshon ku ke krea un imágen hopi positivo di MOT. Di otro banda, asina el a señalá, por a tende otro sonidonan ta sali, anto di hendenan ku ta hopi pega ku e organisashon.