ORANJESTAD- E miembronan cu a atende e conferencia di Junior Chamber International na Panama a regresa Aruba bek hopi satisfecho.
Durante e siman na Panama nan a haci uso di tur oportunidad cu a presenta. Asina nan a sera conoci di cerca cu e cultura y e historia di Panama. Asina tambe nan a mira di cerca e Panama Canal y por tawata testigo di tur e barcunan cu tawata pasa dor di e canal aki.
Tambe nan a bishita e trade show y a hanja un experencia directo di productonan local orgullo di e paisnan bisina.
Un oportunidad grandi cu e miembronan a haya ta di atende hopi seminario den diferente ramo: manera e parti di gerencia: empresa manera empresa di famia ta empresa cu ta dura, bo envase, brain mapping, lidernan local: pensa global, actua local, den campo di liderzagco a presenta e siguiente training: planifacion strategico, actitud di un campeon, tick-tock: sacando lo mehor di e 1440 minuutnan den un dia, e spiel di un lider, den e campo emresarial a presenta: unlock “to do”, conoce bo mes, sea excelente y keda excelente, comunicacion interno, prepara bo empresa pa participa den eventonan internacional, e rompecabeza di exito, e secreto di lenguaje corporal, administracion di tempo, franchise: oportunidad di negoshi, psicologia di felicidad, ban cambia e mundo, crisis management, etc.
JCI tambe a organisa un programa especial pa e first-timers, dus pa esnan cu ta atende nan prome conferencia. A duna nan un mainta di informashon y despues a saca algun nomber di participantenan, kendenan a hanja e oportunidad di kana ful un dia cu un di e personan importante di direktiva.

 
ORANJESTAD- Directiva di e Organisacion di Enfermeronan di Aruba ta recorda tur miembro, dunado di cuido, docente y pensionadonan riba e reunion general cu lo tuma lugar awe nochi den e facilidad di ATIA cuminsando pa 7’or di anochi.
Un reunion sumamente importante y cu e fin pa trece cambio den e structura di e organisacion. A bira tempo pa para hunto cu ODEA pa logra e cambionan desea. Pa varios aña e trahadornan den cuido, y den cuido social ta sinti cu nan no ta representa den ODEA. Ya caba a haci cambio den e estatutonan pa nan por participa!
Actual proposicion ta pa incorpora tambe e studiantenan den e organisacion pa nan por cuminsa reuni y intercambia riba nan future profesion. No ta descarta e vos di esnan cu a sirbi nos comunidad den enfermeria pa hopi aña, esta e pensionadonan. Laga nos bin hunto den e facilidad di ATIA awe nochi y haci e prome paso na cambio, rumbo na un era nobo. E directive nobo di ODEA tin hopi reto su dilanti.
Participacion na e Conferencia di Caribbean Nurses Organization na Guadeloupe den luna di juli e aña aki pa asegura Aruba como CEDE di e Conferencia na 2010. Preparacion y ehecucion di activiadnan relaciona cu e celebracion di 20 aña di existencia di ODEA. Dialoga y intercambia cu Gobierno pa un representacion di enfermeria den cuido di salud primario. Esaki ta djies algun di e retonan cu e directiva nobo lo enfrenta.

Cada professional den enfermeria ta posee un fuente di conocimento cu nan ta aplica den practica di cuido di salud. Den e sentido aki nos ta posee un potencial humano y nos tin e capacidad pa desaroya esaki.

ORANJESTAD- E curso “CRUZA E BRUG SIN MIEDO” ta un curso sumamente valioso pa studiantenan haci e cambio grandi di scol basico pa scol secundario. E curso ta na promer lugar pa studiantenan di 6de klas.
Sinembargo tur aña tin studiantenan di 5de klas cu ta participa pa nan por cuminsa practica den 6de klas con nan mester studia pa ta super bon prepara ora yega e momento pa bai di 6de klas pa Ciclo Basico.
Den e siguiente parti nos lo papia tocante e balornan di e curso pa e studiantenan.
E curso “CRUZA E BRUG SIN MIEDO” ta consisti di e siguiente temanan of capitulonan:
Introduccion
Crea un Actitud Mental Positivo
Cruza e Brug (Di Scol Basico pa Ciclo Basico)
“Mind Mapping”
Motivacion pa Studia
Concentracion
Con Sigui Les
Studieplanning & Time-Management
Clausura y Evaluacion
Algun di e puntonan na cual cu hopi atencion ta wordo dedica na dje ta:
prepara e studiante den un ambiente agradable, trankil, expresivo pa e bira conciente di e diferente puntonan cu e mester tene cuenta cun’e ora e drenta e prome aña di Ciclo Basico
traha cu un optimismo pedagogico continuo caminda cu e studiante ta siña pa
kere mucho mas den su potencial y su inteligencia
aumenta su self-esteem (autoestima)
crea e confianza necesario pa e por tin e mayor exito posibel den Ciclo Basico
kita e miedo existente pa e scol nobo, e diferente maestronan/maestranan nobo, vaknan nobo (por ehempel wiskunde, ASW, N & T etc.), e sistema di duna les, e cantidad di studiantenan, studiantenan (mas) grandi na e scol, e “peer-pressure” etc.

ORANJESTAD- Diabierna atardi, lider di AVP, mr. Mike Eman, parlamentario Mike de Meza y drs. Paul Croes di departamento relacionnan exterior tabata tin encuentro cu Wyclef Jean, musico di origen Hatiano. Aunke cu Wyclef, manera e ta conosi artisticamente, ta un cantante di Hip Hop mundialmente reconosi, e combersacion cu esnan lider di AVP, mr. Mike Eman y miembronan di e delegacion tabata riba e tema di desaroyo di Hiati.
Wyclef ta hopi conosi y conosi rond di mundo banda di su musica pa su projecto, Yéle Haiti, cu ta un fundacion cu ta otorga beca na muchanan Hatiano cu no tin manera pa bay scol. Tambe e fundacion ta yuda di projectonan di vital importancia pa combati pobresa na su pais natal.
Wyclef Jean a nace na Croix-des-Bouquets, Haiti, y a emigra cu su famia na Brooklyn, New York tempo cu e tabata tin 9 aña, y despues pa New Jersey. Wyclef despues cu e la bira mundialmente famoso como parti di e grupo "Fugees" y depsues tambe ariba su mes na unda entre otro e la hasi un projecto cu otro artista cu tin masha interes den trabounan humanitario, Shakira. Maske cu Wyclef a goza di hopi fama mundial, nunca a lubida di unda e la bin. Mirando cu na su isla natal tin hopi pobresa, e la sinti cu e no por bira lomba pa su pais.
Lider di AVP, mr. Mike Eman tanto den su funccion como vice-presidente di Cristianan Democrata Internacional IDC, secretario adjunto area Caribe di ODCA y como Parlamentario di Aruba a tuma hopi iniciativa pa atende cu problema di pobresa y desaroyo di Haiti. Tanto cu Minister di Relacionnan Exterior di Hulanda, Maxime Verhagen, Minister di Ajudo pa Desaroyo y Co-operacion, Bert Koenders y e Minister anterior di cartera aki, Agnes van Ardenne, e lider di fraccion di AVP, mr. Mike Eman a infatisa den carta y reunionan pa mas atencion pa Haiti di parti di Reino Hulandes y Union Europeo. Cu miembro di Tweede Kamer pa CDA, Kathleen Ferrrier, encarga cu e topico di ajudo pa desaroyo tambe mr. Eman a traha hunto pa enfoca riba e nececidad pa solidaridad di parti di mundo pa Haiti.

LONDON, Inglatera, - Rob Knox, un aktor di 18 aña, kende tabata figurá den e reparto di próksimo pelíkula di Harry Potter, a hink’é mata djasabra último den un pelea na salida for di un bar na London.
Segun polisnan, a detené un sospechoso di 21 aña.
Ku e asesinato nobo aki, 14 hóben a muri violentamente pa loke ta trata e aña aki.

WILLEMSTAD - Den siman tras di lomba a tuma lugá e di 8 Torneo di Bowling Fares Dou dediká na e legendario bowler Fares Daou (Q.E.P.D) na Tropical 3000 na Zeelandia.
Mas ku 92 bowler a partisipá den 4 dia di kompetensia.
E kompetensia a konsistí di 46 ekipo di 2 bowler kada unu.
Ayera e playoff a tuma lugá ku e 12 ekiponan ku a bowl mihó den e promé tres dianan di kompetensia. Mester bisa ku e kompetensia tabata hopi tight ku hopi suspenso.
Un públiko grandi a mira e final entre e ekiponan di Ali Hammoud/Keyla Franco i Jamel Lionarons/Diego Jimez.
E partido tabata tight te den e delaster “frame” pero e ekipo di Jamel Lionares i Diego Jimez a sabi di gana e partido ku un skor di 200-168.
E resultado final tabata lo siguiente:
Promé lugá: Yamel Liononars/Diego Jimenez
Dos lugá: Kayla Franco/Ali Hammoud
Terser lugá: Quincy Marchena/Ricardo St. Jago
Kuarto lugá: Janet v/d Ree/PatsyDijkhuizen
Sinko Luga: Ronny Winklaar/Roberto Servage.
E organisadó i tur partisipante kier a gradisí e spònsernan ku a hasi e kompetensia realidat.

MIANYANG, China, - China a plania awe eksplotá ku dinamit akumulashonnan di entre otro barankanan, ruinanan, ku ta formando un “lago di temblor” peligroso, ku e speransa di evitá un desaster nobo, dos siman despues ku un temblor a isolá e provinsia di Sichuan.
E kálkulo ofisial di morto pa e temblor di 12 di mei último, awor ta mas ku 60.000, pero ta hopi probabel ku e sifra aki lo por oumentá, pues a konta ku mas o ménos 30.000 persona ainda ta pèrdí.
E Promé Minister chines, Wen Jiabao, ta kere ku e sifra lo superá 80.000.
E kontesta inisial frenétiko di reskate ta birando friu, meimei di un bataya duru kontra naturalesa, miseria i un malkontentu ku siguramente lo bai keda pa basta tempu.
Sòldánan chines ku 10 kilo di dinamit kada un a yega awe e lago Tangjiashan, un di e mas ku dies ku a keda formá pa e temblor, pa asina eksplotá nan, agensia di notisia Xinhua a bisa, miéntras a pronostiká áwaserunan i bientunan fuerte.
E barera di e lago tabata den peliger di kòlèps, pasobra nivel di e awa tabata subi dos meter mas djasabra último.
“E lago tin awor aki mas ku 129 mion kúbiko meter di awa i lo por kousa un inundashon devastador si e barera kòlèps”, Xinhua a bisa.
Ku yegada di temporada di áwaseru, míles di persona ku ta biba parti pabou di e lago a evakuá nan pa prekoushon.
Mianyang, un siudat serkano n’e áreanan mas gòlpiá pa e temblor, a regresá na un sorto di normalidat. Negoshinan a habrí i peatonnan tabata yenando kayanan.

HENGELO - Despues di a gana e kompetensia ku e tim di relevo na Puerto Rico, Churandy Martina a biaha pa Ulanda, pa defendé su título na e FBK Games (Hengelo).
Djasabra 24 di mei e atleta olímpiko, Churandy Martina, a kore e kompetensia aki, kaminda el a mustra mundu ku ketu bai e ta den e tòp internashonal di Atletismo.
El a logra di gana e distansia di 200m ku un tempu formidabel di 20.50 sec, ku un kontra bientu di kasi 2m/s.
Churandy Martina for di komienso di dia tabata hopi trankil i bo no por a bisa esei di e otro atletanan. Su kontrinkantenan tabata kana bai bini den hotèl i nan tabata mustra nervioso durante di kalentamentu, miéntras ku Martina tabata hari ora ku kámara bin riba dje. E tabata sa ku e ta den bon kondishon pa gana.
E ganadó di 800m huntu ku e organisadó di FBK Games, Ellen van Lange a bisa dilanti di kámaranan di Fisheye Media Productions ku danki na Arkefly por a bini Ulanda na último momento, ku Churandy Martina ta e gran faborito i ku e ta kontentu ku el a skohé pa kompetí aki na Hengelo.
El a bisa, ku e stadion lo bira loko si Martina mester gana.
Churandy Martina no a haña ni chèns pa kore su buèlta di honor. Tur kaminda e mester a para pa duna firma i saka pòtrèt kaminda e taabta hasi esaki ku un sonrisa riba su kara.
E kompetensia tabata dediká na e sra. Fanny Blankers-Koen, mama di dos yu, ku a logra di gana 4 medaya di oro na e Weganan Olímpiko di London 1984.

WILLEMSTAD - Un di e asuntunan, ku segun diputado Rhuggenaath, por a kousa malkontentu serka STU, ta e hecho ku Gobièrnu a pidi pa komprobá ku e shofùrnan di bùs ta registrá na Kámara di Komersio i ku nan por demostrá nan miembresia. Pero, esaki ta nesesario pa komprobá ku e shofùrnan ta representá e sektor ku nan ta bisa ku nan ta representá. No ta trata aki di algu di falta di rèspèt. Ta simplemente un práktika di bon gobernashon. Ademas segun Rhuggenaath, mester tene kuenta tambe ku hurídikamente, e partido ku kua bo ta firma un protokòl, di representashon i diálogo, ta representá e grupo ku nan ta bisa ku nan ta representá. “Esei ta un paso ku nos mester tuma, pa yega na e protokòl, pasobra STU den e kaso aki ta pidi pa nan ta e úniko representashon di e bùsnan chikí i tambe pa nan ta envolví i partisipá den tur tomo di desishon ku ta relashoná ku e sektor aki”. “Pa un trato eksklusivo asina, mester ta komprendibel, dikon Gobièrnu konhuntamente ku e sindikato mester enkaminá e proseso, pa determiná ku STU ta representá e gremio aki”.
Ademas, segun Rhuggenaath, Gobièrnu a ofresé STU e servisionan di e ofisina di mediadó di Gobièrnu, pa den kaso ku mester finalisá ún ke otro, promé ku firma e protokòl.
Mas aleu, a indiká ku por a antisipá e malkontentu di e shofùrnan di bùs. “Pasobra nan no a haña inmediatamente, manera nan a pidi, en todo kaso un supsidio pa loke ta kombustibel”. Rhuggenaath a referí na e petishon di e sindikato pa e shofùrnan di bùs pa e karchi di swaip, pa nan haña bòn di diesel pa kumpra gasoil na un manera supsidiá. Tambe, segun e diputado e sindikato a spera di firma un protokòl, ku el a manda pa Gobièrnu djabièrnè último. Sinembargo no tabata e palabrashon pa djabièrnè firma un protokòl ku e sindikato, segun Rhuggenaath. “E palabrashon tabata ku djabièrnè Gobièrnu ta reakshoná por eskrito riba e proposishonnan di e sindikato. Tambe tin e palabrashon ku djarason awor, Gobièrnu ta reuní ku STU.

ARIES: No permití ku niun hende ta hunga ku bo sentimentunan. Eksigí splikashonnan ku bo tin relashoná ku trabou o profeshon. 37,01,05.

TAURO: Mantenébu den komunikashon ku bo famia ku ta den estranheria. Ofresé bo ayudo si esei ta posibel, ekonómikamente. Un hende hopi yegá di bo ta pidi bo kompania. 18.

GEMINIS: Iluminá bu ku e lus di bèrdat. No envolví bo mes ku stranhero. Ser mensahero di pas i gana e atmirashon di tur hende. 06,20,08.

KANSER: Lucha pa bo ideal, bo soño, bo futuro. Ser perseverante den tur kos den bida. Pensa si bo ta meresé lo mihó pa bo por logra nan. 28,05,11.

LEO: E momentu ta ideal pa biaha i ekspandé ainda mas bo horizonte. No ta importá si ta serka o leu, shelu o tera, bai den e aventura di eksplorá mundu nobo. 02,18,07.

VIRGO: Kuida bo kurpa ku algu sagrado. Di abo ta dependé di ku bo ta mantenébu den bon salú òf ku ta sea falta di bo atenshon. 05,12,14.

LIBRA: Pone tur bo empeño pa bo sobresalí den tur loke bo ta hasi, ku sin duda algun lo bo logra. Trabou ta e karta di bo éksito. 11,45,17.

SKORPION: Ponebu di akuerdo ku bo pareha den tur kos, ta kumbiníbu. Sede i pidi tempu pa tur dos por eksponé nan ideanan. 09,15,33.

SAGITARIO: Desaroyá dósis masivo di pasenshi pa ku un famia, yu o amigu ku no ta parse di ta masha bon. Biba e ku e realidat di momento. 49,03,10.

SAO PAULO, Brazil, - Mas ku un mion di homoseksual i transseksual a desfilá ayera na siudat brasileño di Sao Pualo, den un marcha di ‘gay’ ku a keda kalifiká komo esun mayó di mundu, pa pidi pa pone fin na violensia i diskriminashon.
DJ-nan tabata toka muzik riba trùknan ku tabata kore bai bin na e avenida prinsipal di e siudat, kaminda tin hopi raskashelu, miéntras e multitut tabata baila i selebrá riba un dia kaluroso i ku hopi solo, algun di nan ku peluka, maskarada of trahenan di Karnaval bistí.
“Mi no ta sufri e prehuisionan pasobra normalmente mi ta hopi diskreto, pero awe mi ta bibando e momentu. Aki, na sentro di Sao Paulo, awe, mundu kompletu ta hasiendo loke nan ke”, Junior Antenor, di 21 aña, a bisa, kende ta’tin un trahe platiá ku blanku di angel ku halanan bistí.
Segun testigunan, e evento a atraé mas o ménos 1 mion partisipante.
Polisnan no kier a ofresé un sifra ofisial, pero un agente n’e lugá a kalkulá ku mas ku 3 mion persona a partisipá.
E Asosiashon di Desfile di Gay, Biseksual i Transgénero di Sao Paulo a bisa ku mas ku 5 mion persona a partisipá.
Ta trata di e di 12 aña ku ta realisá e desfile.
Outoridatnan di Sao Paulo i empresa petrolero brasileño Petrobras a apoyá e evento, ku a bira un fuente importante di entrada pa e siudat i pa turismo.
Aña pasá, den un bishita na Brazil, e pais ku mayó poblashon katóliko di mundu, Papa Benedicto XVI a reuní algu ménos ku 1 mion di persona, ora el a deklará kontra homoseksualidat i a pidi pa reforsá balornan di famia tradishonal.

WILLEMSTAD – “Antia no ke pa e kompania KLM imponé e tarifa èkstra ku e ta bai kuminsá kobra pasaheronan entrante 1 di yüli awor. Esaki lo ta un sla formal pa turismo”, asina minister di Telekomunikashon Maurice Adriaens a informá gobièrnu ulandes. Antia – ku por sierto tin sosten tambe di Aruba den e lucha aki – ke a eksonerá e dos paisnan aki di e impuesto aki, di no ménos ku 45 euro riba kada buelo.
Antia i Aruba ta pidiendo splikashon serka gobièrnu ulandes di e impuesto aki, ku nan ta yama ofisialmente “tickettaks”. E impuesto aki lo perhudiká no solamente e fluho di turismo for di Ulanda pa e islanan aki, pero alabes lo perhudiká e tráfiko di famia entre Ulanda, Antia i Aruba, partikularmente esnan ku un pòtmòni chikí.
Minister di Telekomunikashon di Aruba Edison Briesen a pidi gobièrnu ulandes pa pone e asuntu aki riba agènda di e negosiashonnan riba aviashon, un enkuentro ku minister di Telekomunikashon di Ulanda Camiel Eurlings lo tene dia 14 di yüni awor na Aruba.
“E medida lo ta desastroso i no mag sigui. E lo afektá nos den mas di un aspekto. E medida aki lo mishi fuertemente ku interesnan ekonómiko i di turismo di e islanan aki,” asina e karta ku Briesen a manda i ku a resultá den prensa, ta bisa.
Presidente direktor di KLM Peter Hartman a reakshoná mesora riba e karta aki ku ta protestá kontra e impuesto menshoná.

WILLEMSTAD - Pa desèmber 2008, Refineria Isla mester kumpli ku eksigensianan ku ta para den su pèrmitnan pa loke ta limitashon di polushon di Kòrsou. No tin diskushon: gobièrnu di Kòrsou mester sòru pa esei, asina sekretario di Estado enkargá ku Relashon den Reino Ank Bijleveld a bisa despues di a firma e protokòl pa ehekushon di e Inisiativa Sosial Ekonómiko (SEI) djabièrnè último.
Tal manera nos a informá kaba, tin 237 mion florin disponibel pa 118 proyekto. Di e montante aki, Ulanda a pone 60.6 mion. Un dje proyektonan ku durante firmamentu di e protokòl, Bijleveld a enfatisá riba dje ta e provishonnan ku a pone den e trayekto di SEI pa atendé ku e problemátika di Refineria Isla. “Ami mes a insistí riba esaki”, segun Bijleveld.
“Mi ta haña ta importante pa atendé e problemanan ekonómiko, sosial i finansiero di e isla. Ulanda ke invertí den e pais nobo. Mester weta e akuerdo komo un maneho ku ta sostené e desaroyo nobo. SEI ta un trayekto ku ta pertenesé na e trayekto estatal i den esaki e problemanan di Refineria Isla mester haña atenshon,” sekretario di Estado Bijleveld a bisa.
Bijleveld a bisa, ku e ta kontentu ku tin un aspekto di vital importansia ku a hinka den e trayekto di SEI, ku ta e problemátika di Refineria Isla. Riba tèrmino kòrtiku e refineria mester kumpli ku normanan ku ta limitá polushon di nos isla, segun e mandatario.

WILLEMSTAD - Parlamentu di tantu Antia komo Aruba ta hopi preokupá pa e ambiente di rasismo kresiente ku ta reinando na Ulanda kontra antiano i arubiano.
Parlamentu ei Antia i Aruba ta rechasá tambe e forma ku Ulanda a bin ta atendé ku antiano i rubiano.
E preokupashon aki a bin dilanti durante e enkuentro bipartit entre parlamento di Aruba i esun di Antia siman pasá.
Manera ta konosí, parlamentu di Aruba i di Antia a reuní siman pasá na St. Maarten den un kumbre bipartit pa diskutí un kantidat di punto.
Entre e puntonan aki tabatin tambe e prekupashon ku ta reina ku atraves di vários medida i akshon, Ulanda ta tumando un aktitut ku pa Antia i Aruba ta inaseptabel.
Na kuminsamentu di yüni awor, e dos parlamentonan aki lo reuní ku un delegashon parlamentario ulandes.
E intenshon ta, pa durante e enkuentro aki ku e delegashon ulandes, pone Ulanda na altura di e preokupashon aki ku ta reina.
Pero for di awor, e respektivo parlamentonan di Antia i di Aruba a tuma posishon den esaki. Nos ta rechasá e aktitut di Ulanda i “medidanan diskriminatorio” enérgikamente, asina e dos parlamentonan ta bisa.
Un dje puntonan konkreto ku Antia i Aruba tin hopi problema kuné, ta introdukshon di e asina yamá “Verwijsindex Antillianen”, konosí tambe komo VIA.
Mester bisa ku e VIA a subi mesa, despues ku tabatin intentonan den pasado pa eks minister Rita Verdonk pa introdusí e lei ku ta permití Ulanda manda tur hóben antiano problemátiko bèk Antia.

WILLEMSTAD – “STU ta bou di impreshon, ku gobièrnu ke tuma e sindikato hasi. Anto STU no ta aseptá esei”, asina bosero di e sindikato Andres Everitz a bisa, relashoná ku último desaroyonan den fin di siman.
E sindikato ta na mesa ku gobièrnu relashoná ku e konflikto riba oumento di preis di kombustibel.
E konflikto aki, manera ya ta ampliamente konosí, a kondusí na un paralisashon di transporte públiko algun siman pasá, un situashon ku a okashoná bastante molèster pa komunidat.
Partidonan a bai di akuerdo finalmente pa sinta na mesa pa weta atraves di negosiashon, kon por yega na un solushon ku ta aseptabel pa tur dos banda.
A palabrá, ku e sindikato lo entregá su pakete di eksigensia i su alternativanan riba e oumento aki, miéntras ku gobièrnu lo duna un kontesta riba esaki pa partidonan sigui deliberá na mesa.
Gobièrnu lo mester a manda su reakshon djabièrnè último, pero segun Andres Everitz, e reakshon no a drenta djabièrnè manera palabrá.
Nos a sinta warda i nos a bin konstatá, ku ta e mail ku gobièrnu a keda di manda, a drenta djasabra mardugá kuartu pasá di diesdos. “Ya esei no ta djabièrnè mas”, segun Everitz a reklamá.
El a mustra ku pa sorpresa di e sindikato, ora a kere ku ta un reakshon ofisial lo a drenta, gobièrnu ta manda pidi e sindikato un kantidat di kos ku e sindikato no ta mira e importansia awor aki.”

WILLEMSTAD - Den kuadro di e ekshibishon “Freeports of the Caribbean: Curaçao and Statia in the 18th and 19th century” NAAM ta organisá den kooperashon ku UNA, for dia 27 di mei te i ku 1e di yüli un serie di 5 charla.
Pa tene e charlanan ei a pidi personanan ku resientemente a hasi investigashon tokante bida na siglo 18 i siglo 19 na Kòrsou i St. Eustatius, tempu di komersio liber i lucha pa libertat, di héroe, di shimaron (katibunan ku a hui) i pirata. Entre e konferensistanan tin sra. dr. Linda Rupert (Estádos Unídos) i sr. Grant Gilmore (St. Eustatius).
Ta dediká atenshon tambe na e hayasgonan den kurason di Willemstad i na Oranjestad i na e plakatnan di e tempu ei. E promé charla di e sosiólogo i historiador dr. Linda Rupert ta tuma lugá djamars 27 di mei i ta karga e título "A Messy Trade in Chocolate" / Komersio sushi di chukulati. (Ingles i Papiamentu) E demanda kresiente na Europa pa chukulati na siglo 18 a trese un kontrabanda vigoroso di pipita di kòkou entre Venezuela i Kòrsou. Den esaki hòmber i muhénan di desendensia afrikano tabatin un papel klave, i te awor nan ròl no ta konosí.
E charlanan ta djaweps 29 di mei. Dr. Jerzy Gawronski ta papia di Mapanan i Skèrfnan di Willemstad” den kua atenshon tokante e investigashon arkeológiko resien den kayanan di Punda i importansia di e mapa kultural históriko digital.
Charla ta tuma lugá den biblioteka di e edifisio di NAAM na Johan van Walbeeckplein 13, i ta kuminsá 19:00 PM. E otro 3 charlanan ta djamars 10 di yüni, e arkeólogo di Statia, Dr. Grant Gilmore lo papia tokante “Blue beads, Afro-Caribbean wares, tumblers commodities to freedom?” . 17 juni, tin drs. Charles do Rego ku su ‘Ideanan di Libertat e Independensia, 24 yüni tin e charla ‘Geen bassen, violen en gitaar na negen uur op straat’, di publisista Marjo Nederlof. Ta klousura di 1 di yüli ku artista Tirso Martha, kende a instalá e eksposishon Freeports of the Caribbean. E lo papia riba ‘Reskate di Memoria: Uso di Arte i Siensia pa rekonstruí nos pasado’. Pa mas informashon Liza Franciscio, naamna@onenet.an, telefon 4621933/34.

Konekshon enseñansa i merkado laboral mester di mas atenshon

WILLEMSTAD -Djabièrnè di 23 di mei Kolegio Ehekutivo a tene un konferensha bon bishitá, kaminda a trata entre otro e tópiko di falta di kordinashon di e kampo di enseñansa i merkado laboral, ku ta trese diferente inkumbiniensia den ámbos kampo.
Durante e konferensha a nota un interes sorprendentemente grandi di diferente banda pa kontribuí pa mehorá sinkronisashon di enseñansa i merkado laboral. Despues di a elaborá ampliamente riba e struktura di VSBO i tur e sektornan i e kuater nivelnan ku SBO ta brinda i e fishinan ku studiantenan ta wòrdu prepará pe, a yega despues di diskushon na e konklushon, ku pa lokual ta trata e asina yamá ”stage” den e kuríkulo di skolnan sekundario, mester yega na mihó definishon di e diferente tiponan di stage/ temporada pa e studiante praktiká, di moda ku ora e tèrminá su estudio, e ta mihó prepará pa asumí un enkargo riba e merkado laboral. Kompanianan mester por mira e benefisio di e forsa laboral di e studiante, lokual na e momentonan aki por lo general no ta e kaso.
Alabes ta nesesario pa ámbos kampo esta di enseñansa i merkado laboral yega na akuerdonan mas mihó pa definí kua kompania ta apto pa fungi komo “leerbedrijf” i alabes apuntá “”leermeesters” ku ta pasa un proseso di formashon kòrtiku, di moda ku nan por instruí e studiantenan den práktika, di moda ku e studiantenan por kumpli ku e tarea ku nan a risibí di skol den práktika. E sugerensia a wòrdu lansá dor di tantu e kampo di enseñansa komo di komersio pa gobièrnu pensa riba insentivonan pa krea un base mas sólido pa atendé ku e strukturashon di e aspekto di stage.

Konklushon di konferensha pa sinkronisá enseñansa i merkado laboral

WILLEMSTAD - Despues di e konferensha pa sinkronisá enseñansa i merkado laboral mas lihé posibel, por konkluí ku no por pèrdè tempu mas i mester reorganisá e instituto FEFFIK mas pronto posibel. Kisas e mihó struktura pa FEFFIK ta un skol sekundario públiko en bes di un instituto independiente, kaminda ta resultá ku ta masha difísil pa realisá kambionan riba término korto den e struktura aktual.
Ku kambionan den SBO ta nesesario pa por bai ku desaroyonan ta un realidat. Di e otro banda tambe tin un otro realidat. E realidat di nesesidat di merkado laboral pa un kantidat respetá di forsa laboral ku ta na horizonte pa motibu di kresementu ekonómiko. Esaki ta trese peliger pa e fenómeno di “groenplukkerij”, esta kompanianan ku ta haña nan mes forsa di saka studiantenan for di bankinan di skol sin e kalifikashon nesesario. Esaki ta trese kuné nesesidat pa introdukshon mas prominente di e konsepto di “werkend leren”, esta traha un kantidat di dia i asistí na skol un o dos biaha pa siman, di moda ku e studiante por kaba forma su mes, en todo kaso pa lokual ta trata e formashon básiko. E konsepto aki ta solisitá un pensamentu nobo i dinámiko den e kampo di enseñansa, esta “flexicurity” den enseñansa, di moda ku riba término korto por abastesé merkado laboral ku forsanan lokal pa yena vakaturanan. Ku e término aki ta referí na fleksibilidat den enseñansa sin kita e seguridat di formashon básiko na alumnonan.

WILLEMSTAD - Curaçao Airport Partners (CAP) e fin di siman aki a anunsiá e resultadonan di e enkuesta ku ta tene bou di pasaheronan na aeropuerto Hato. En general ta mustra un oumento den satisfakshon pa ku e servisio ku e diferente organisashonnan i kompanianan ta brinda na pasaheronan. E enkuesta ta un enkuesta di e entidat internashonal Airport Council International (ACI) i ta tuma lugá tur luna i ta presentá e resultadonan kada kuartal.
E enkuesta ta hasi un distinshon entre pasaheronan ku ta bula pa destinashonnan doméstiko (Aruba i otro islanan di Antia) i pasaheronan ku ta bula pa destinashonnan internashonal. Ta midi 36 kriterio kual nan ta enserá entre otro satisfakshon en general pa ku aeropuerto, disposishon di fasilidatnan komersial i nan kalidat kompará ku preis, limpiesa, servisio na bali di check-in i servisio en general, tempu di espera pa screen, rapides di entrega di maleta, kòntròl di duana i ambiente di aeropuerto.
Kompará ku e último kuartal di 2007 den e promé kuartal di 2008 kada un di e 36 kriterionan a skor mas haltu bou di e pasaheronan ku ta biaha pa un destinashon doméstiko. E oumento di e skor total di tur e kriterionan tabata 9½ % mas haltu ku e skor total di e último kuartal di 2007.
Pa loke ta trata e pasaheronan ku ta biaha pa un destinashon internashonal 27 di e 36 kriterio a skor mas haltu kompará ku e último kuartal di 2007. E oumento den e skor total ta un oumento minimal di 1%, pero kompará ku e di tres kuartal di 2007 e ta 2.8%. Durante e di dos i di tres kuartal di 2007 e skor total tabata konosé un bahada. No opstante e hecho ku awor, for di e di tres kuartal di 2007, por konstatá un kresementu CAP huntu ku e otro entidatnan na aeropuerto tin trabou di sigui hasi pa logra un kresementu mas grandi den e satisfakshon bou di e pasaheronan ku ta bula pa destinashonnan internashonal.