Algun di e obranan lo wordo exhibi den Scol di Arte na San Nicolas

ORANJESTAD - AHATA su comicion di medio ambiente por wak atras riba un di 7 Competencia di Obra y Arte Recicla como uno hopi exitoso. Rond di 620 persona a bay wak e competencia na nos Biblioteca Nacional O’stad y hopi tawata esnan cu a keda impresiona cu e creatividad di e participantenan. A rifa diferente premio entre e bishitantenan y e sigiente personan por tuma contacto cu AHATA na tel; 582-2607 pa reclama nan premio.
Prome premio: un celular di Digicel Sra. Maria Dirks,
Di dos premio: un executive travel bag Sr. Rudi Lampe,
Di tres premio: un trip pa De Palm Island pa 2 persona Sra. Vanessa Rumnit,
Di cuatro premio: un regalo di Coconut Trading Sra. Alexandra van der Meer,
Di cinco premio: un regalo di Coconut Trading Sra. Mary Baarh.
E aña aki 13 scol, 8 hotel/grupo y 19 individual (amateur y profesional) a participa. A traha un total di 133 obra.
Tur participante a haya un certificado y e ganadornan a haya diferente premio duna door di tur nos sponsornan. Un danki special ta bay na tur nos sponsornan, ya cu sin nan aporte e competencia aki no tawata posibel. Un danki grandi na Biblioteca Nacional cu tur aña ta yuda nos cu nan sala, AHATA, De Palm Tours, Divi Aruba Phoenix Beach Resort, The Links, Matthews na Casa del Mar, Aruba Adventures, The Mill, Taco Bell, Red Sail Sports, Holiday Inn, Coconut Trading, Bucuti Beach Resort, La Cabana Beach and Racquet Club, Tropical Bottling Company, Renaissance Beach Resort, ATCO, Burger King, Amsterdam Manor, Manchebo Beach Resort, Digicel y Valero.

ORANJESTAD - Dia 26 di mei a sali publica den e matutino Diario, un articulo cu a hiba como titulo” Fuerte indicacion cu como nuebe maestro di CKV a haya carta di retiro”. Ministerio di Enseñansa ta duna algun informacion mas cla tocante e topico aki.
Tempo di innovacion di enseñansa AVO a bin cu e proposicion pa duna un materia cu ta combina y integra 4 disciplina esta musica, baile, drama y obranan di man den un solo materia esta Culturele en Kunstzinnige vorming: CKV.
E decision aki a trece cu’ne cu mester a haci varios cambio, por ehempel esun cu ta duna musica no necesariamente por pinta en todo caso e no tin e cualificacion cu ta rekeri pa por duna e materia ey.
P’esey IPA a haña dos encargo. Uno pa traha un programa pa docentenan cu ya tin un disciplina caba pa por prepara nan mes pa duna CKV. Na di dos lugar cuminsa cu un tweede graads opleiding pa CKV.
Algun studiante cu ta siguiendo e ultimo aña di e estudio di CKV a haña oportunidad di duna les den nos scolnan secundario pa falta di profesionalnan di cierto disciplina manera drama y musica. Awor tin studiante cu a termina nan estudio y cu esaki nos por tin mas profesional cualifica pa e materia aki.
Contrario na loke e articulo di dia 27 di mei 2007 ta menciona e materia a bira un materia cu por pasa examen den dje, locual antes no tabata e caso. Aki por ripara cu hustamente awor ta duna e balor nan e materia CKV meskos cu e otro materianan di examen manera matematica y idioma.
Aña pasa algun scol a split e klasnan den dos ora nan mester a duna e materia. Di e forma ey a redobla e cantidad di ora disponible pa e materia CKV contrario na tur otro materianan, locual no ta cuadra cu nos leynan vigente. Inspeccion di Enseñansa a señala e falta aki na comienso di aña escolar y a pone directiva di scolnan secundario directamente na altura cu pa otro aña escolar 2008-2009 mester cumpli cu loke ley ta prescribi.

ORANJESTAD- Recientemente e crucero Disney Magic a bishita Aruba pa prome bes y a trece como 2700 pasahero Aruba. Mientras cu e muchanan por a gosa di entrenimiento di un mago y un artista den trahamento di decoracion cu blaas, ariba e barco tabata tuma luga e ceremonia di intercambio di plakaat.
Señor Kitty Rojer hefe di Aruba Cruise Tourism a haci entrega di un plakaat na nomber di Gobierno di Aruba y señor Sherwin Ras a entrega un plakaat na nomber di Aruba Ports Authority. Representantenan di S.E.L. Maduro & Sons, SEL Maduro Shipping y SEL Maduro Travel y de Palm Tours tambe a haci entrega di un recuerdo na e capitan y alto oficialnan di e crucero Disney Magic.
E invitadonan local a haya un recorido ariba e crucero luhoso cu a cuminsa su viahe na Port Canaveral, pasa Panama Canal y termina su trip na California.
Disney Magic lo regresa Aruba na Augustus prioximo.

ORANJESTAD - Directiva di CAPA ta informa tur su socionan cu su Reunion General anual di 2008 ta tuma lugar awe diaranzon 28 mei 2008 pa 7.30 di anochi. E lugar ta sede di SEPPA na Hato.
E dianan aki tur socio a ricibi tur informacion cu relatonan pa e reunion General di 2008. E miembronan di CAPA, kendenan no a ricibi su revista cu e diferente informacionnan personal por pasa na oficina di SEPPA, na HATO of yama Telnr 583.8859 y puntra pa un dirigente di CAPA.
Esnan cu a ricibi e informacionnan, por ripara e cambio, cu CAPA ta pasando aden. E revista tin hopi informacion di nos cooperativa, con e situacion ta actualmente, nos problemanan, con CAPA a crece e ultimo añanan y hopi mas.
Un biaha mas directiva di CAPA ta notifica tur socio cu nan presencia na e Reunion General di diaranzon awor, dia 28 mei 2008, ta altamente aprecia, ya cu cada punto di agenda ta di sumo importancia, pero mas importante ta cu esnan presente lo ta parti di e decisionnan cu lo cay durante e reunion aki.
E punto clave cu conhuntamente nos mester bay tuma un decision ariba dje, ta e reparticion di ganashi, cual a ser alcanza durante 2007. Directiva di CAPA lo trece un proposicion al respecto pa discuti y despues pasa esaki pa aprobacion di Reunion General, esaki di acuerdo cu nos statutonan.
Directiva CAPA, ademas di duna tur informacion, lo purba di contesta tur pregunta di socionan na e mihor forma. Sugerencianan pa mihoracion di nos organización tambe ta bonbini e anochi aki. P’esey na e reunion di 28 mei 2008, Directiva di CAPA ta spera un asistencia grandi di su miembronan cual ta esencial pa nos cooperativa por sigui haci su trabao manera debe ser. Un asistencia grandi lo duna e Directiva un sosten grandi pa e por sigui haci su trabaonan na bienestar di miembrecia di CAPA.

Segun Aruba Cruise Tourism 

Temporada halto di crucero a termina cu un total di 498.259 pasahero

ORANJESTAD - E temporada halto di crucero 2007 – 2008 di october 2007 pa april 2008 ta tras di lomba y mester constata cu tawata un temporada hopi activo cu movecion di turistanan crucero ariba nos isla.
Companianan di excursion y taxistanan tabatin man yen di trabou haciendo recoridonan rond di nos isla cerando e turistanan conoci cu nos bunita y dushi Aruba.
Cayanan den centro di ciudad y nos beachnan tawata aglomera cu turistanan crucero cu tawata ansioso pa disfruta di Aruba su hospitalidad y amabilidad.
E ehecutivonan den relacion publico na Aruba Cruise Tourism a ricibi comentarionan positivo y esey ta duna nos un siguransa cu lo tin un porcentahe halto di turistanan crucero cu lo bolbe bishita nos isla den un futuro cercano.
E temporada halto di crucero 2007 – 2008 a produci un total di 248 bishita di barconan crucero cu un total di 498.259 pasahero.
Aruba ta keda mantene su averahe di alrededor di 500,000 pasahero pa e temporada halto cual ta hopi significante y di hopi importancia pa Aruba su economia, apesar di tur e desaroyonan cu e mundo di crucero ta pasando aden pa motibo di e prijs halto di combustibel.
Aruba Cruise Tourism ta kere fervientemente cu Aruba lo keda un di e destinacionnan crucero mas gusta den Caribe y cu e demanda di e turismo crucero pa Aruba lo sigui aumenta mas y mas den futuro.
Tambe ACT kier a gradici tur esnan cu di un of otro manera a contribui na engrandece nos turismo crucero pa e temporada cu a termina y ta spera cu tur hende lo sigui cu e bon trabou durante henter aña.

WILLEMSTAD - Minister di Tráfiko i Komunikashon, Maurice Adriaens ta haña masha remarkabel ku UTS no ta ofresé e rebaho di tarifa di Internèt na tur su klientenan. E klientenan ku tin un kontrakt kaba, su tarifa ta wòrdu redusí solamente si nan firma un kontrakt nobo.
UTS a informá minister Adriaens, ku e no ta haña nesesario pa duna un splikashon di e tarifanan fiho riba e tráfiko di telefòn.
Segun Adriaens, e diskushon tokante di e kontrakt ta un diskushon hurídiko. UTS a bisa e minister, ku ora ku e tin kontrakt ku un kliente, no ta sin mas UTS por redusí e tarifa. Esaki, pasobra kisas tòg e kliente ta deseá na mantené e tarifa karu. Ta p’esei e kliente mes mester bisa UTS ku e ta deseá di haña e tarifa barata. No ta posibel pa UTS duna e kliente e tarifa barata outomátikamente.
Pa minister Adriaens, esaki ta situashon un poko straño. “Pero kisas hudisialmente nan tin rason”, asina Adriaens a remarká.
Di tur manera e punto di bista di UTS ta, ku tur hende ku tin un kontrakt nobo òf ta bai haña un kontrakt nobo, den kaso ku e ta deseá por haña e tarifa nobo.
Pa solushoná e diskrepansia aki, minister Adriaens ta opiná ku tin diferente posibilidat. “Mi a hasi mi sugerensianan na UTS i mi ta spera ku nan a tene kuenta ku nan”.
Riba e pregunta si UTS a kontestá e minister kaba riba e pregunta dikon e ‘tarifanan fiho’, mester bira mas karu, Adriaens a kontestá ku nò. ‘UTS ta argumentá ku esei no ta nesesario, pero esei ta nan opinion’. Adriaens a remarká ku segun Raad, ku e mester duna e splikashon. Ta p’esei e minister a palabrá ku UTS, ku ora ku e direktor, Paul de Geus regresá Kòrsou, ku tan pronto posibel lo sinta na mesa ku Büró Telecommunicatie i Post, pa duna un klaridat riba e struktura di e gastunan di UTS. Despues di e enkuentro ei, un desishon definitivo por kai, enkuanto oumento di e tarifanan, Adriaens a indiká.

WILLEMSTAD – Den fin di siman, e direktor general di Krus Kòrá di Ulanda, Kees Breedeveld, den fin di siman tabata na Kòrsou, relashoná ku un reorganisashon grandi ku ta pendiente pa tuma lugá na Ulanda. Krus Kòrá di Antia i Aruba, ta forma parti di e di Krus Kòrá di Ulanda. Por spera ku e situashon aki lo keda mantené, despues ku e kambionan struktural wòrdu konkretisá.
Reorganisashon
Na promé instante, djabièrnè anochi e hefe grandi di Krus Kòrá di Ulanda a splika e miembronan di direktiva di e seis islanan kiko e reorganisashon ta enserá. E tin di haber prinsipalmente ku e situashon na Ulanda. ‘Aktualmente Krus Kòrá ta konsistí di un Asosashon na kua tin diferente Krus Kòrá afiliá. Kada departamentu lokal tin su propio statutonan. Den e esei ta bai bin un kambio. Pa por funshoná mas efisiente i transparente’. Esaki ta e informashon ku Ingrid Jansen, mènèdjer di programa di Krus Kòrá di Antia i Aruba, a duna LA PRENSA.
E situashon riba e seis islanan antiano ta diferente kompará ku Ulanda, segun Jansen. Nan tin otro responsabilidat. Tòg e islanan ta wòrdu envolví, pasobra nan ta forma parti di Krus Kòrá di Ulanda. Un di metanan di e bishita di e hefe di Krus Kòrá di Ulanda, tabata pa konhuntamente wak kon por forma un eksepshon pa Antia i Aruba den e reorganisashon aki.
Djasabra tabatin un enkuentro mas grandi, ku e mesun miembronan. Ademas a asistí voluntarionan di Krus Kòrá, kende a diskutí ku señor Breedeveld, tokante di e reorganisashon.

WASHINGTON, Merka, - Bosero di Kas Blanku, Scott McClellan, a kritiká su eks hefe Presidente di Merka George W. Bush, den un buki nobo, den kua ademas e ta kuestioná e guera na Irak, Prensa merikano a informá.
Den e buki “What Happened: Inside the Bush White House and Washington’s Culture of Deception” (Kiko a pasa: den Kas Blanku di Bush i Kultura di Engaño di Washington), e eks Sekretario di Prensa merikano tambe a kuestioná reakshon presidensial pa orkan Katrina na 2005, argumentando ku Bush a pasa “e promé siman den estado di nengashon”.
McClellan, di 40 aña, a skibi ku na momentunan ku Bush ainda ta na poder, e pueblo merikano ya a konkluí ku e “desishon di invadí Irak tabata un eror stratégiko serio”.
E buki di McClellan lo ta optenibel den librerianan di Merka siman benidero.

Foto: Scott McClellan 2805

Scott McClellan, eks Sekretario di Prensa merikano.

Skina di Sorti, awe djarason 28 di mei di 2008, ta kuminsá ku deseá tur hende un bon dia. Laga mi kuminsá na splika e diferensia fundamental den filosofia tras di gobernashon demokrátiko (filosofia di Socrates ta ku mas tantu hende posibel mester sinti nan mes representá den e proseso di gobernashon) i esun despótiko (filosofia di Plato ta ku esnan mas sabi ta goberná i demas ta sigui). Den e sistema di gobernashon demokrátiko, regla i prosedura t’ei pa por kumpli ku e aspekto di partisipashon.
****
Den e sistema di gobernashon demokrátiko, partisipashon (“doing things right”) ta prevalesé riba e lokual ta wòrdu hasí (“doing the right things”). Kon algu ta wòrdu determiná (“doing things right”) ta prevalesé riba kiko ta wòrdu hasí (“doing the right things”). Esei kier men, ku si lokual wòrdu hasí no a tuma lugá den un forma ku ta preskribí, e mester deskart’é. Punto!
****
Sin esfuerso pa yega na partisipashon masal den e proseso di tomo di desishon, no ta relevante si eventualmente e lokual wòrdu hasí ta e eskoho rashonalmente mas mihó (“the right thing to do”). Falta di transparensia i limitashon di partisipashon den e proseso di tomo di desishon (“doing things right”) ta violashon di e prinsipio di bon gobernashon den e sistema demokrátiko.
****
Mi ke denunsiá ku nos ta desviando leu pero masha leu mes for di e prinsipio di bon gobernashon, a ménos ku a disidí di bandoná e sistema di gobernashon demokrátiko durante di e proseso estatal. Un proseso kaminda ta pisando derechonan demokrátiko fundamental violentamente ku pia. Ta tumando “voorschot” riba akuerdonan polítiko i konsekuentemente ta pone representashon di pueblo (Parlamento i Konseho Insular) dilanti di “voldongen feiten”.

WILLEMSTAD – E yuana aki a disidí di sali buska kuminda den libertat di naturalesa ku tur riesgo ku esei ta trese kuné. Na un dado momentu el a disidí pa pose pa un pòtrèt, asumiendo ku e sakadó di pòtrèt no gusta un bon sòpi di yuana. Lástimamente ku último simannan mas i mas di e animalnan aki ta sali buska nan kuminda di tur dia i ta kore riesgo grandi den áreanan kaminda hende ta biba i trafiká. E kantidat di yuana morto riba kaminda, trapá pa vehíkulonan, ta oumentando dia pa dia mas. Yuana ta parti di naturalesa. Don Yuana, sigui pose numa! (foto Mariano Heyden)

WILLEMSTAD – E aventuranan rondó di e kas di Marazul ta kontinuá. Despues ku e ganadó di e kas, Joëlla Smiet, a haña yabi di e kas i porfin por a drenta aden, a resultá ku deskonosínan a usa e kas i laga e tualèt tur shushi na fekalia. E premionan di Onenet i TDS ku el a gana, tampoko e no a risibí ainda.
LA PRENSA a trata na drenta den kontakto ku Smiet pa haña un komentario riba e vershonnan akí, pero esaki no ta logrando pa basta dia. Informashonnan ku LA PRENSA a optené di un fuente yegá na Marazul, a splika ku Smiet a yega kontentu ku su yabi den su man, pero a keda sumamente mal kontentu ora el a drenta den e kas pa promé bia. Segun e fuente, Smiet lo a enkontrá e tualèt tur shushi na fekalia di hende. Tambe por a nota ku tabatin un bentana kibrá na kurpa di e kas. Mas aleu LA PRENSA a komprondé di e fuente, ku enbèrdat tabatin hende den e kas na sigur un okashon. E hendenan ei sin embargo no tabata den kompania di Smiet. Esaki ta indiká, ku esunnan ku tabatin e yabi di e kas, pendiente pa entreg’é na Smiet, a hasi uso di e kas sin Smiet su pèrmit.
Un investigashon di LA PRENSA a konkluí, ku te ainda Smiet no a risibí e otro premionan ku el a gana tampoko. Ta trata akí di un abono riba TDS pa un aña largu i tambe un abono di Onenet pa un aña. Di parti di Lover’s, LA PRENSA a komprondé, ku Smiet a pasa tuma su promé baki di eiskrim. Esaki e lo sigui hasi un bia pa luna durante e próksimo 11 lunanan. LA PRENSA lo sigui trata na drenta den kontakto ku e ganadó di e kas di Marazul pa wak kiko a pasa eksaktamente den su kas. Intentonan pa haña un komentario di Tele-Kòrsou ku a organisá e konkurso no a duna resultado. E direktor di e planta ta den eksterior.

WILLEMSTAD – Ministerio Públiko tin un montante di alrededor di mei mion florin na prosèsverbal ku e por kobra. E montante akí ta representá prosèsverbalnan ku polis a parti durante kòntròlnan den e último sinku lunanan di e aña akí.
No mas ku ayera, LA PRENSA a informá, ku polis no ta kumpliendo ku e kantidat di 1000 prosèsverbal pa luna ku Ministerio Públiko ta deseá. Sin embargo e 900 mil florin pa aña ku Ministerio Públiko a bisa di ke kobra, si polis kumpli ku e mil prosèsverbalnan, si ta alkansabel. Den 5 luna polis a akumulá sigur mei mion florin na prosèsverbal. E kálkulo di 900 mil florin pa aña ku Ministerio Públiko a hasi na 2006, ta basá riba un kantidat di 1000 prosèsverbal pa luna multipliká ku un average di 75 florin but/transakshon. Den LA PRENSA di ayera nos a multipliká e 3770 prosèsverbalnan ku polis a parti e aña akí, ku e average di 75 florin i a yega na un montante di 282.750 florin. Awe LA PRENSA ta presentá un konteo basá riba e montantenan real pa e diferente infrakshonnan ku polis a sanshoná.
E tarifanan, segun e informashonnan ku LA PRENSA ta disponé di dje aktualmente ta:
75 florin pa stür sin faha di seguridat bistí,
150 florin pa pasa den lus kòrá,
400 florin pa stür un vehíkulo sin seguro pagá,
150 florin pa stür sin prueba ku e vehíkulo ta di kùr,

WILLEMSTAD – Shofùrnan di bùs lo disidí awe tardi kiko ta e pasonan ku nan lo bai tuma, despues ku nan kaba di reuní ku Bestuurscollege. Riba mesa awe tin un protokòl, den kua Gobièrnu a pone algun punto ku el a primintí di atendé. A base di e kontestanan ku e shofùrnan haña awe tardi, nan lo saka nan konklushon.
Ya ta konosí kaba ku Gobièrnu a remarká ku STU no ta un sindikato ku ta representá shofùrnan di bùs. Segun Gobièrnu, STU ta un asosashon, i esei ta un otro kos for di un sindikato. Mas aleu Gobièrnu ta di opinion ku no por negoshá ku un asosashon pasó no tin klaridat ta ken nan ta representá. Gobièrnu ta alegá ku e no sa sigur ku e asosashon ta papia na nòmber di tur 400 shofùr di bùs ku tin un pèrmit. Pa e motibu akí no por hasi niun palabrashon konkreto pasó no tin garantia ku tur 400 shofùr di bùs ta pará tras di e akshonnan di STU. Den un komentario Gobièrnu a bisa ku tin 400 shofùr ku tin un pèrmit, pero tin 400 shofùr ousiliar tambe. Di e 800 personanan akí, ta mas o ménos 200 so STU a logra aktivá te ainda. Parse ku durante e último reunion no tabatin ni 100 shofùr. Tur esaki ta motibunan pa Gobièrnu a eksihí un kopia di inskripshon di Kámara di Komersio, pa asina sa ta ku ken ta negoshando, i tambe pa sa ta na nòmber di ken STU ta negoshá.

WILLEMSTAD – E komersiante Nanik Daryanani a muri asfiksiá. Esaki ta resultado di outopsia di lei ku Ministerio Públiko a laga hasi riba e restunan mortal. Polis a konfirmá ku djadumingu último a haña Daryanani morto den su negoshi. E tabata drumí riba e promé piso den su negoshi, ku un kusinchi mará ku waya di koriente na su kara. E víktima tabata doño di un negoshi den Bloksteeg, kaminda por a hasi uso di fasilidatnan di Internet. Djadumingu den kareda di kuartu pa un, famianan di e defuntu a lokalisá e kurpa sin bida. Mes ora polis a kuminsá ku un investigashon, hasiendo uso di loke nan a haña na e sitio di krímen. For di promé instante tabata remarkabel, ku na porta di e establesimentu ainda e yabi tabata kologá den e slòt. Entretantu ta konfirmá ku e víktima no tabatin heridanan di hinká ni di arma di kandela. E kusinchi ku tabata mará riba su kara, a fungi komo arma pa a asesiná e víktima.
Miéntras tantu famianan di Daryanani a organisá un despedida ku lo tuma lugá mañan na Alameda. Ayera e famianan a reuní ku Dowtown Management Organization (DMO) pa organisá e seremonia di honor pa Nanik Daryanani na Wilhelmina Park. Despues di e atrako/asesinato di Nanik Daryanani, tur famia a uni i pone man huntu pa organisá entiero i e seremonia di honor den un tempu rekòrt. Famianan a risibí hopi yudansa di tur banda, pa por a logra esaki. “Nos ta hopi kontentu ku tur e koperashonnan ku nos a haña di hopi hende i hasta klientenan di mi tata su negoshi. E desaroyonan di último dia ta demostrá ku nos tata tabata hopi stimá”, asina e yunan a bisa.

ARIES: No envolví bo mes den hopi kos alabes, ya ku bo por pèrdè fásilmente e kòntròl di e situashon i un bon oportunidat. Kuida bo mes di hipókritanan. 11,20,15.

TAURO; Bo salú semper ta importante pa bo, pero awor bo tin ku pone mas atenshon. Limitábu na hasi kosnan ku ta esensialmente nesesario. Tuma bo tempu pa deskansá. 16,08,03.

GEMINIS: Bo intenshonnan den amor pa awor no ta di stabilidat i bo no por mantené un relashon serio. Bo kreatividat ta eksaltá, pero bo ta karesé di direkshon i propósito. 19.

KANSER: Lo espiritual den bo ta sakudí. E organisashon religioso ku bo ta pertenesé na dje ta sufri kambionan, p’esei ta surgi un revaluashon di bo kreensia religioso. 21,08,06.

LEO: Bo tin ku traha un poko mas pa logra loke bo ta proponé. Tempu ta kombertí awor den aliado. Un proseso ku bo ta deseá pa terminá pronto, ta alargá. 06,29,04.

VIRGO: Romanse i trabou ta uni. Bo konosé un persona ku ta hasíbu pensa e kosnan dos biaha. Amor ta rondonábu. 14,03,07.

LIBRA: Kosnan por kompliká, pero bo no ta duna pa vensé. Kuida bo salú emoshonal hopi. Pone atenshon na bo kurason. 22,01,39.

SKORPION: Konsentrá den loke ku ta hasíbu felis i bo ta wòrdu komplasé pa bo por krea e kondishonnan di bida ku ta satisfasébu. 45,05,18.

SAGITARIO: E dia ta ekselente pa sali di e rutina diario i disfrutá di biahe kòrtiku. Kuida bo salú emoshonal. Establesé limitenan i sobre todo, establesé prioridatnan den bo bida. 33.

WILLEMSTAD - Pa diputado di Kultura Marilyn Alcalá-Wallé e ultimo palabra definitivamente no ta bisá ainda. E mandatario ta konsiderá, ku tin mas ku un opshon riba mesa. Pero un bista realístiko ta indiká ku e opshon mas probabel awor aki ta di mantené Sentro Pro Arte kaminda e ta aktualmente, esta na Schouwburgweg.
E istoria di Sentro Pro Arte ta konosí. E lucha básikamente ta entre Fundashon Sentro Pro Arte, kende tin e sentro aktualmente bou di su maneho i e komishon ku ta lucha pa manera nan mes a bisa, reskatá Sentro Pro Arte pa pueblo atrobe.
E komishon ta akusá e fundashon di a laga e edifisio kai den un deterioro serio i ku nan no ta hasiendo nada pa e kousa kultural di Kòrsou.
Ainda ta fresku den memoria di tur hende, kon aña pasá e artista/lokutor/animador Gilbert Sparen a kuminsá ku un wèlga di hamber pa eksigí pa gobièrnu mantené Sentro Pro Arte na e sitio ku e ta awor aki i pa restourá e edifisio atrobe.
E problema prinsipal di e edifisio aktual ta e hecho, ku su bodega ta yena ku awa konstantemente. Pero a bin sali na kla, ku e edifisio di SSK tabata konfrontá e mesun problema i ku a logra solushoná esaki.
Despues di e wèlga di hamber di Sparen, a instalá un komishon ku mester a bai studia e 3 posibilidatnan ku tin, esta, traha un teater nashonal den área di Rif, traha un teater nashonal na kabes di Skalo òf mantené Sentro Pro Arte na Schouwburgweg.

WILLEMSTAD - E mihó kos ku Kòrsou por hasi ta, di mantené neutralidat den tur konflikto regional i internashonal ku surgi. Ta esei semper tabata nos forsa. Ta esei a pone nos sobrebibí. Semper nos a mantené e punto di salida aki te ku awor, ku e insidente di e avion di guera merikano ku lanta for di nos teritorio bai provoká Venezuela.
Esei tabata mensahe di lider di frakshon di Niun Paso Atras den Konseho Insular ayera.
Konseho Insular a kuminsá debatí – riba petishon di partidonan di oposishon – riba e insidente ku a tuma lugá algun siman pasá, kaminda un avion F-16 di e base militar merikano establesé na Kòrsou Forward Operation Location (FOL) a drenta espasio aéreo venezolano, algu ku a okashoná hopi indignashon i desgustu serka gobièrnu venezolano. E asuntu ainda no a yega na un fin.
Nelson Pierre a rekòrdá ku den pasado, ki ora ku el a haña chèns, e tabata referí na e nesesidat pa tene kuenta ku siguridat di estado.
Awor aki, e asuntu a haña un derivado ku yama krísis alimentisio, el a haña un otro ku yama krísis energétiko i su rais ta sinta den e diferente movementunan sosial revolushonario den nos region, asina el a bisa.
E lider di Niun Paso Atras a referí na un parti di istoria, kaminda Merka a trata di ehersé su influensia riba desaroyo interno di Colombia.
“Ta bon pa nos pone e asuntu den konteksto”, asina el a bisa.

WILLEMSTAD - Lider di Partido Demokrat Norbert George, kende alabes ta lider di frakshon dje partido aki den Konseho Insular ke sa, kon a para ku e asuntu di nombramentu di un direktor na e kompania Dokmaatschappij. Pa basta tempu kaba ta reinando un silensio, anto nos ke sa kiko ta pasando, el a bisa.
Nombramentu di un direktor na Dok, manera ya ta konosí, a bira un asuntu sumamente kontroversial.
Despues di un proseso di solisitut transparente, Franklin “Chebu” Sluis a sali e mihó kandidato. Pero, e diputado polítikamente responsabel pa e kompania Eugène Rhuggenaath a bisa, ku bou di niun sirkunstansia e lo no pèrmití pa nombra Sluis komo direktor, mirando su pasado ku hustisia.
Sluis tabata enbolbí den un kaso froudulento di importashon di outo pa kua el a haña kondena tambe di korte. Pa Rhuggenaath, esaki ta un kos serio i basá riba e aspekto di integridat, e no ta dispuesto pa aseptá kandidatura di Sluis.
E asuntu aki a yega na tal ekstremo, ku Rhuggenaath a pone su puesto den partido PAR na diskushon. Si nombra Sluis tòg, Rhuggenaath ta tuma su retiro, el a menasá.
E asuntu for di e momentu ei a keda ketu, te ku algun tempu pasá ku a papia di un posibel solushon, den forma di un direktor interino pa un periodo definí. E direktor interino aki mester sòru pa e kambio nesesario den funshonamentu di e astiero.
Pero a bolbe surgi un silensio. Anto esaki ta preokupando lider di Partido Demokrat Norbert George. George a bisa, ku CDM mester di un direktor. Diputado Rhuggenaath a kologá su futuro polítiko na e nombramentu aki, pero nos no a tende mas kiko a pasa.

WILLEMSTAD - Diputado di Infrastruktura Anthony Godett ta optimista. Ounke el a bisa enfátikamente ku e no ta enbolbí den deliberashonnan entre Cayco Group i Meta Corporation, kosnan ta pintando den bo direkshon, ku nan lo por haña otro den un plan pa konhuntamente desaroyá e área di Rif.
Siman pasá, e dos gruponan a reuní ku diputado Anthony Godett den forma orientativo pa sondiá e posibilidat pa traha huntu riba desaroyo di Rif.
Tantu grupo Cayco, komo Meta Corporation a ekspresá e deseo serio pa desaroyá e área di Rif. Nan a presentá nan plannan na gobièrnu kaba, tratando di konvensé gobièrnu di nan intenshon serio.
Anteriormente tabatin bastante diskushon rondó di e asuntu aki. Tabatin vershonnan insistente ku diputado Anthony Godett, lo ta faboresé grupo Cayco, grupo ku a bisa ku e ta kla pa kuminsá traha mesora.
Pero e mandatario a desmentí esaki, bisando ku e no ta na fabor di ni Meta Corporation, ni grupo Cayco. “Ami ta na fabor di un desaroyo sano di área di Rif, na bienestar di Kòrsou”, segun e mandatario a enfatisá.
Siman pasá, despues di a reuní ku diputado Godett, e dos gruponan a bai Aruba kaminda nan a reuní nan dos pa sigui sondiá e posibilidat di traha huntu.
Komo un figura importante di un dje gruponan no tabata presente, a disidí ku lo tene un reunion mas pa sigui diskutí e asuntu aki.
Ounke e no kier a bai den masha detaye, e diputado a bisa ku e promé reunion a bai positivo. “Partidonan ta na mesa, anto esei ta importante”, el a bisa.

LOS ANGELES – E outfielder yu di Kòrsou ku ta hungando den Los Angeles Dodgers aktualmente, lo bai pèrdè entre kuater pa seis siman despues ku el a operá su rudia drechi eksitosamente ayera.
Jones ku tabatin un komienso malu e temporada aki ku promedio di .167 ku 2 honron i 7 kareda empuhá despues ku el a firma un kontrakt di dos aña ku Dodgers, a subi DL for di djasabra último.
“Nan a feks loke nan tabatin mester a feks den e rudia”, asina mènèdjer Joe Torre a bisa promé ku e wega entre Dodgers i Cubs ayera. “E siguiente dia òf algu despues lo e kuminsá mesora ku rehabilitashon ku e tin di bai hasi”.
Torre a agregá, ku no tabatin dañonan adishonal ku nan a bin haña na e rudia durante di e operashon.