ORANJESTAD - A base di peticion den nos comunidad unda cu aña pasa e Grupo “Love & Light” a organisa un seminario The Secret Meets Aruba, unda cu un sala yen yen a presencia e DVD y tambe haya oportunidad pa descuti y haci pregunta na e panelistanan cu ta personanan conoci den nos comunidad, cu ta haci uso di e intrumento y flisofia di the secret. Grupo L& L ta organizando diaranson 18 di Juni proximo un seminario titula E ley di atraccion den accion “ cuminsando pa 7.30 or di anochi na cas di Cultura.
The secret ta un DVD cu a bira sumamente famoso full rond di mundo pa su contenido asina profundo. Grupo Love and Light tambe kier comparti e journey (e biahe ) y e proceso pa asina comparti cu comunidad tur e beneficio, sabiduría y conocemento di un ley cu ta asina formidabel y cu nos kier brinda e oportunidad pa e yega na conocemento di tur cu tin interes pe.
Love and Light ta consisti di personanan cu ta haci meditacion, visualisacion, practica spiritualidad cu e meta final di: comparti positivismo cu otro, nos comunidad y tambe traha na cambio positivo di mentalidad pa asina atrae bienestar, salud, abundancia den tur sentido di palabra pa Aruba.
HISTORIA CORTICO
Pa hopi tempo e secreto a wordo descubri, scondi y e la wordo suprimi, pero por medio di e pelicula aki e ta wordo revela.
Un cantidad di personan excepcional a jega di descubri e secreto aki caba y a usa esaki y nan a bira personanan conoci y grandi. Algun di nan ta: Plato, Leonardo Da Vinci, Hugo, Beethoven, Lincoln, Edison, Einstein, Marther Luther King y Ghandi.

ORANJESTAD- Diadomingo mainta 8 di juni lo tin un concierto di e coro Mélange, bao guia di Maybelline Arends-Croes y di e conocido guitarista Ivan Jansen cu su cuarteto.
E concierto aki ta bao di auspicio di Circulo Arubano Pro Arte y ta tuma lugar na Holiday Inn Hotel, las Palmas Ballroom, cuminsando pa 11’or di mainta.
Mélange ta un coro di adulto cu a ser lanta na Augustus 1994. E miembronan di coro a scohe e nomber Mélange como cu a uni dos coro existente, esta Fuga y Cristal, pa forma e grupo Mélange.
E coro ta canta regularmente durante celebracion eucaristico na Misa den weekend y tambe pa Pasco di Nacemento, Pasco grandi y otro dianan di fiesta di iglesia tambe. Últimamente nan a canta un Misa completo, tanto pa e apertura di e celebracion di e Aña di Hubileo di obispado di Antiyas/Aruba, como pa e celebracion principal na Aruba riba 4 di mei ultimo.
Ademas nan ta canta na actividadnan social y cultural. Mélange a yega di saca un cd ‘religioso’ titula”Duna Amor” cu canticanan di bon mensahe (inspirational songs), tambe algun single cu grabacionnan pa Pasco of otro temporada di aña.
E guitarista Arubiano Ivan Jansen, ta hopi conoci pa su diferente conciertonan, tanto clasico como di jazz y tambe pa e bunita cd-nan cu el a yega di saca, esta Con Alma I, Con Alma II y Versatility. Ultimamente el a saca un cd nobo titula ’Jazz at the Links’ riba cual e ta toca cu su cuarteto.
E cuarteto ta consisti di Ivan na guitara; Franklin Granadillo, trompet; Roy Croes na baho y Richard Holmond na bateria. E cuarteto aki di cual mayoria di e musiconan a sigui nan estudio na e prestigioso Berklee College of Music na Boston, ta toca na “Windows on Aruba” na Divi Links.

ORANJESTAD- SETAR ta recorda tur abonado cu si pa un of otro motibo e number, nomber of adres di e cliente no ta corecto actualmente den buki di telefoon 2008, cu por haci e cambionan necesario prome cu e edicion di 2009 sali publica.
Ainda tin chens pa esnan cu ta desea di haci cambionan pa hasi esaki prome cu dia 19 di Juli 2008.
Ta hopi importante pa sa cu e nomber di e abonado y e number di telefoon lo sali publica den buki telefoon 2009, manera e ta registra den e data base di SETAR.
Pa cambio di nomber of adres, por pasa na cualkier Teleshop. Viuda of viudonan por haci cambio di nomber gratis na momento di presenta e “akta di fayesimento” (overlijdingsakte).
Pa por haci cambio den nomber mester presenta un copia di registro civil (no mas bieu cu 6 luna) y pa negoshinan mester presenta copia di registracion di Camara di Comercio pa negoshi (max 6 luna bieu).
Huntu cu e papelnan menciona ta rekeri un identidad valido (paspoort of rijbewijs di Aruba, Antiyas Hulandes of Hulanda). Lo publica e “roepnummer” so den buki di telefoon 2009 si e cliente tin un PBX-schakeling of sistema di Direct Inward Dialing (DID).
Si e abonado ta desea pa nan number di telefon cellular tambe aparece den e buki di telefoon 2009, SETAR ta pidi pa porfabor haci e aplicacion na tempo ya cu e ultimo dia pa haci cambio of haci e number di telefon uno “unlisted” (no registra) tambe ta dia 19 di Juli 2008.
Pa mas informacion por yama 114, fax e informacion pa nr. 582-1501 na atencion di Sra. Mary Feliciana of manda un e-mail na customercare@setar.aw

ORANJESTAD- Biblioteca Nacional Aruba ta bai haci un inventario di su coleccion na juli proximo. Biblioteca ta den proceso di pasa e informacion for di e sistema actual pa un otro sistema di automatisacion.
Actualmente ta evalua hunto cu DIA diferente pakete di software pa biblioteca tanto na Hulanda como na Merca. Anticipando e cambio aki biblioteca mester tene un inventario pa asina mas tanto posibel haci e sistema actual limpi.
Pa e motibo aki ta tene un periodo boetevrij pa mas tur buki por drenta bek. Ful luna di juni te cu dia 11 di juli por entrega buki sin paga but.
No ta cobra but
Tur miembro di biblioteca por entrega e bukinan cu a fia pero no a entrega na e tempo stipula sin paga but pasobra biblioteca no ta cobra durante e luna di juni. No ta importa si e bukinan ta lat un siman, un luna of kizas mas.
En especial biblioteca ta spera tur studiante di Mavo/Havo/VWO pa entrega nan bukinan pa otro alumno tambe por lesa nan den e proximo aña escolar.
Biblioteca ta spera di por conta riba e cooperacion di tur su miembronan pa entrega buki durante e periodo ya indica.
Por entrega buki tanto na Playa como na San Nicolas. Biblioteca na Playa ta habri 3 anochi den siman te 8’or, dialuna, diarason y diabierna. Biblioteca na San Nicolas ta habri te 8’or di anochi dos biaha pa siman, diamars y diahuebs.
Inventario
Biblioteca su orario ta sigui normal durante vakantie grandi. Cu excepcion cu biblioteca na Playa lo ta sera por completo pa inventario di dia 14 di juli pa dia 28 di juli.
Biblioteca na San Nicolas ta keda habri normal durante vakantie grandi.

ORANJESTAD - Ora cu nos kier logra algo den bida nos tur tin cu planea pasobra nos no tin e recursonan financiero pa haci tur loke nos ta desea di haci den nos bida. Aruba como isla tambe tin cu haci esaki.
Dor di esaki desde januari di e aña aki e proceso Nos Aruba 2025 a cuminsa pa determina e vision pa Aruba te cu aña 2025 cual ta aporta na un desaroyo di Aruba duradero. Den un forma participativo cu participacion di sector di gobierno, priva, organizacionan no gubernamental y comunidad en general lo formula un vision pa Aruba te cu aña 2025.
Un di e resultado di e proceso aki ta pa traha un plan nacional integral strategico pa Aruba. E methodologia cu ta wordo usa ta uno participativo y cu ta enfatisa e parti positivo di bida, e ta analiza kico ta bay bon.
E método aki ta wordo usa door di haci preguntanan positivo na diferente miembronan den e comunidad.
Como parti di e proceso aki 54 persona di diferente sector y disciplina a ricibi training pa por guía e proceso aki. Puntonan interesante di e training aki ta pa nos wak cua ta e posibel forsanan mundial, internacional, regional y na Aruba cu tin influencia riba desaroyo duradero, esta riba e tereno social, tecnologia, economia, medio ambiente y politica.
Ademas, kico ta e consecuencianan di e forsanan aki ariba Aruba su futuro. Por ehemplo, un forsa global cua tin influencia riba nos economia ta e prijs di petróleo.
E prijs di petróleo ta determina e prijs di gasolin. Tambe e balor di e dollar Americano tin influencia riba nos economía ya cu e economía di Aruba ta depende di un gran parti di e turismo Americano cu ta paga cu dollar na Aruba.

EINDHOVEN, Ulanda – Ruud van Nistelrooy a anotá den su kòmbèk den e selekshon ulandes, pero Dinamarka a kue un empate kontra e ekipo oraño djaweps den un wega amistoso dilanti Eurokopa.
Ulanda a arma bon hugadanan den atake, pero a faya den kaba kos i el a mustra fayonan den su defensa, ku a pèrmití Christian Poulsen empatá na di 56.
E delanteronan ulandes a kombiná bon pa yega te na e aria rival, pero kada bia a desperdisiá chèns ora ku nan mester a superá e kiper Jesper Christiansen.
“Nos mester sòru pa nos hinka mas gol i tur kos lo ta bon”, e kapitan dje ekipo, e kiper Edwin van der Sar a bisa.
Van Nistelrooyy al ménos a demostrá ku e no a pèrdè e magia di hinka gol ora el a kompletá e mihó sekuensia di e wega ku su di 31 gol den 60 wega ku e selekshon. E hugada a envolví tres strea di Real Madrid: Wesley Sneijder a pasa e bala pa Arjen Robben, kende su pase a ser rematá den forma perfekto pa Van Nistelrooy.
Ulanda ta den e “grupo di morto” di Eurokopa, huntu ku Italia, Fransia i Rumania.

--
E abogado Joseph Tacopina, na su yegada na airopuerto Flumicino na Roma.

YOUXIAN, China, - China a evakuá mas o ménos 200.000 persona for di un área menasá pa inundashonnan pegá ku episentro di e temblor di e luna aki na provinsia di Sichuan, agensia estatal di notisia chines Xinhua a informá awe.
Polisnan a rekoré e pueblo di Youxian, situá pegá ku e siudat di Mianyang, ku a keda devastá pa e temblor di 12 di mei último, gritando “evakuá! evakuá!” atrabes di megafon.
E pueblo tabata parse bashí, ku negoshinan será i niun hende den edifisionan di bibienda, miéntras e agentenan tabata buska e hendenan ku tabata keda den e tèntnan improvisá lantá kantu di riu Fu.
A duna òrdu na e habitantenan di Youxian pa nan bai e zonanan mas haltu di e kolinanan ku ta rondoná e pueblo.
Miéntras tantu, mas ku shen sòldá tabata koba kanalnan den un intento pa redusí e preshon riba e riu serkano, blòkiá pa lòsmentu di tera, pa evitá ku e riunan ta desbordá i inundá e áreanan alrededor.
“No sa kuantu tempu mester keda aya riba. Ta dependé di e situashon di e dikenan”, un ofisial di polis a bisa Reuters, kende no kier a identifiká su mes.
E sifra ofisial di morto pa e temblor ta 68.858 persona i ta ferwagt ku esaki lo oumentá, ya ku ainda tin 18.616 hende pèrdí.
E outoridatnan a bisa ku mas ku 30 riu blòkiá por desbordá, inundando pueblonan i kampamentunan di refugiado.

MERKA, - Den su intento pa alkansá e nominashon demókrata den e karera pa Kas Blanku, Hillary Clinton ta preparando su último ofensiva pa awe, djasabra, ora Partido Demókrata disidí kiko lo hasi ku e delegadonan di Florida i Michigan.
Pasobra e estadonan aki a adelantá nan elekshonnan primario, i Partido Demókrata a disidí kastigá nan i laga nan keda sin delegado (185, Florida i 128, Michigan).
Den un di nan Obama ni sikiera ta aparesé riba e papelnan i na Florida niun a hasi kampaña.
Sin embargo, Clinton a gana na ámbos estado i awor e ke pa tene kuenta ku e delegadonan aki, pasobra sin nan lo por kaba ku su soño di yega Kas Blanku na novèmber 2008.
“Kada voto ta konta!”, ta e lema nobo di su kampaña.
Su siguidónan inkluso a organisá un manifestashon pa awe djasabra, ku e meta pa pone preshon riba Komité di Regla di Partido Demókrata, ku tin ku tuma un desishon.
Márgen pèrtá
Apesar di e preshon, e posibilidatnan di Hillary Clinton ta kada bia mas redusí.
E abogadonan di Partido Demókrata a atvertí e Komité ku solamente tin outoridat pa konta mitar di e delegadonan, pero no tur.
Esaki ta laga e eks Promé Dama sin márgen pa kombatí, pasobra ya e no por alkansá Obama.
Mañan, djadumingu 1 di yüni, ta tene elekshonnan na Puerto Rico (63 delegado den wega) i Clinton ta spera ku e por gana einan.

WILLEMSTAD - Durante di e mas resien enkuentro di e miembronan afiliá na e Asosashon di doño di Pòmpnan di gasolin, COPDA, e propietarionan di pòmp a repasá e problemanan aktual, ku ta relashoná ku e preis di energia. ‘E desaroyo ei ta afektá nos tambe fuertemente’, asina Norman Perry di e Asosashon, COPDA a deklará.
Ademas di e preis, e miembronan di COPDA a diskutí tambe riba e aspekto di falta di transparensha. Esaki ta stroba e proseso pa yega na e preis real, segun e splikashon di Norman Perry.
Den e kuadro aki, señor Perry a remarká, ku kisas un di e motibunan por a kondusí na lantamentu di un Asosashon nobo, ta hecho ku tin hende ku tin otro interes, i ku probablemente nan no ta di akuerdo ku COPDA.
Perry a mustra riba e hecho, ku a lanta COPDA for di luna di mei di aña 1956. ‘Esei ta nifiká ku COPDA ta un di e Asosashonnan di hopi aña ku ta eksistí na Kòrsou. ‘Den mayoria kaso, loke e interesnan ku e Asosashon ta boga p’e, ta kuadra tambe ku interes di e komunidat, e presidente di COPDA a garantisá.
Preokupashon
Pa loke ta trata e Asosashon nobo di operadó di pòmp di gasolin, Asogas, esaki ta indiká di a lanta for di den seno di operadónan preokupá. “E miembronan no ta afiliá na niun otro organisashon di operadó di pòmp”.
Un di e metanan ta, pa uni e pensamentunan pa enfrentá e retonan, den kuadro di e preshon ku e sektor aki ta konfrontá relashoná ku e oumento di gastunan di energia.

ARIES: Niun hende tin poder riba bo. Bo ta logra bo soñonan di restrukturá bo bida nobo. Bo ta logra kambia tur loke bo no ta gusta den bo. 49,15,35.

TAURO: Bo ta sali for di sombranan i bo ta yega den lus i bo ambiente ta wòrdu purifiká. Traha mas riba e intelektual i spiritual. 10,22,03.

GEMINIS: Tuma bo tempu den tur kos. Siña biba mas relahá. Bo no por kumpli ku tur kos ku mundu tin aden pa kumpli ku e ser mas importante ku ta abo mes. 50,43,12.

KANSER: Amor ta sorprendébu ora mes no a spera i den e lugá mas sorpresivo. Tene semper presente ku amor ta na kaminda pa bo. 19,04,02.

LEO: Tur bo talentonan skondí ta sali na kla i e biaha aki rekonosé pa hopi. Bo fe ta fortalesé i bo ta orientá pa bo propio interior. 01,20,09.

VIRGO: Tur kosnan pretu i skur di ayera ta torna radiante, kla i bunita. Plaka no ta faltábu pa por haña poder di yuda otro persona. 33,26,17.

LIBRA: Bo bos a wòrdu skuchá. Sigui defendé loke bo ta kere ta hustu i korekto. Tin hopi kos ku no ta kumbiníbu i hopi di loke bo ta anhelá ta wòrdu realisá. 05,38,24.

SKORPION: Bo ta sintíbu awor doño di bo bida i di bo destino. Ekspandé bo frontera intelektual i spiritual. Bo tin deseo di un mundu nobo i interesnan nobo. 30,04,14.

SAGITARIO: Ya bo no ta amargá ni frustrá mas ora bo tin ku enfrentá retonan, opstákulo i ora kosnan no ta sali manera bo a spera. 02,47,05.

WILLEMSTAD – “Gobièrnu di Kòrsou no ta bai ekspandé e kantidat di pèrmit di bus ku tin awor aki na Kòrsou. Mi ta wardando konseho di nos departamentu hurídiko AJZ riba esaki”, asina diputado Anthony Godett a anunsiá.
Diputado Anthony Godett, kende ta e diputado responsabel pa transporte públiko aki na Kòrsou, a indiká tambe, ku esaki ta parti di e proseso pa yega na un restrukturashon profundo i kompleto di e sektor aki.
Awor aki Kòrsou tin 400 bus, 200 shofùr ouksiliar koriente bus i 200 taksi ta kore rònt. Esaki, banda di e kompania di konvoi ABC ku tambe tin un kantidat di konvoi koriendo diariamente riba nos isla.
Mester ta evidente pa tur hende ku nos ta papiando aki di un kantidat eksesivo di medio di transporte, e diputado a bisa.
El a mustra ku loke ta esensial awor aki ta pa yega na un mihó organisashon di transporte públiko.
Transporte públiko, asina el a bisa, ta den un proseso di reorganisashon. T’asina ku gobièrnu entretantu a duna lus bèrdè na e dokumento ku ta kontené un vishon kon transporte públiko mester bira den futuro ( e asina yamá “visiedocument”).
Basá riba esaki, a repartí entretantu e dokumento pa tur partner enbolbí pa den dos luna di tempu, nan duna nan opinion. Originalmente tabata intenshon pa duna espasio te fin di yüli, pero mirando e desaroyonan di último dianan, posiblemente lo bai kòrta den e periodo aki pa aselerá e proseso di reorganisashon.

WILLEMSTAD - E akshon di shofùrnan di bùs durante e siman ku ta finalisando aki, no a keda sin konsekuensia. Dos reunion públiko di Konseho Insular ku tabata programá e siman aki a keda kanselá i di skùif pa e luna entrante, esta yüni.
No ta un sekreto ku partidonan di oposishon a bin ta pidi reunion públiko riba un base basta regular. Konsekuensia hopi biaha ta, ku e reunion no por kaba riba e mesun dia – generalmente ta suspendé un reunion ku a kuminsá 9’or di mainta den kareda di 9’or pa 10’or di anochi – i ta pasa pa un fecha nobo.
Esei tabata e kaso por ehèmpel ku vários reunion di último simannan, ku konsekuensia ku kontinuashon di e reunionnan aki ta bin topa otro despues.
Djaweps último tabatin kontinuashon di e reunion públiko pa atendé ku futuro di Refineria Isla. E reunion tabata programá pa traimèrdia. Gezaghèber a habri e reunion pero a ser’é mesora bèk. Kiko tabata e motibu na e momentu ei no tabata masha kla pero despues a bin resultá ku e desishon tabatin ke ber ku e situashon di tenshon riba nos isla. Shofùrnan di bus tabata den akshon mester a vigilá e situashon di minüt pa minüt pa tuma e medidanan adekuá, asina ku esei tabata nesesario.
A posponé e reunion te dia 12 di yüni 2008. Ayera djabièrnè, tambe tabatin kontinuashon di un reunion ku a kuminsá anteriormente, esta e reunion pa diskutí e medidanan ku gobièrnu a tuma pa suavisá e impakto di oumento di preis di kombustibel pa e gruponan mas vulnerabel den komunidat. Manera ta konosí, gobièrnu a anunsiá ku e ta subi ònderstant, penshun di behes i tambe sueldo mínimo, pero partidonan di oposishon a konsiderá ku esei no ta sufisiente i ta un gota riba e famoso plachi kayente.

WILLEMSTAD – “Koperashon mester bin di tur dos banda. Koperashon ta un tráfiko di dos direkshon”, asina sekretario di estado enkargá ku asuntunan fiskal Alex Rosaria a bisa, relashoná ku e último desaroyonan riba tereno fiskal.
Resientemente e mandatario tabata na Ulanda kaminda el a papia ku representantenan di Union Oropeo. T’asina ku a papia ku representantenan di Komishon Oropeo pa 4 pais oropeo kita nòmber di Antia for di e lista pretu ku ta akusá paisnan di ta evitá pagamentu di belasting den forma adekuá i di ta forma un paraiso fiskal. E paisnan aki ta Polonia, Gresia, Italia i Portugal.
Ketu bai, segun Rosaria ta eksistí e persepshon ku Antia ta konstituí un paraiso fiskal i lo ta kompetí na un manera inhustu kontra otro paisnan ku kua e tin bon relashon. Antia a bin ta bringa fuertemente kontra e impreshon aki pa basta dia kaba. Esei mes ta un dje motibunan di kon Antia ta serando kombenio fiskal ku mas tantu pais na mundu, di akuerdo ku Alex Rosaria.
Hustamente den e mesun kuadro aki, Antia resientemente a sinta ku e pais Emiratonan Arabir Uni pa sera un tratado fiskal. Pero despues di 4 dia na mesa, no a konkluí e deliberashonnan. Segun Rosaria, e sistema ku paisnan arabir ta usa pa un tratado fiskal tòg ta otro for di paisnan oksidental. A palabra ku ta sinta na un di dos okashon, pa asina weta si por haña otro.
Resientemente e parlamentario di frakshon di SP Ronald van Raak a hasi un denunsia den e direkshon aki. Kompanianan grandi ku ta gana hopi plaka na Antia, mester realisá ku nan mester kontribuí na pais. Nan no por sigui gana tur plaka di mundu, miéntras ku situashon sosial na Antia ta motibu di hopi prekupashon, Van Raak, bosero pa Antia di Socialistische Partij a anunsiá. Un ponensia ku e sekretario di Estado a rechasá enérgikamente tambe. El a bisa ku no mester lubidá ku e konsepto paraiso fiskal ta un kos relativo. Pa Merka por ehèmpel, el a bisa, Ulanda ta un paraiso fiskal.

WILLEMSTAD – “E hecho ku gobièrnu a laga e konvoinan ku ta kore ku turista, konosí komo “tourwagen” transportá pasahero kontra pago ta konstituí un akto ilegal. Esaki ta violá nos leinan di transporte públiko”, asina lider di e partido Pueblo Soberano Helmin Wiels a denunsiá.
Ayera, komo un método pa kontrarestá e akshon di shofùrnan di bùs, gobièrnu a kuminsá ofresé esnan ku ta trafiká diariamente ku bùs e posibilidat di usa e konvoinan chikitu aki pa yega nan destino.
No ta tur hende a keda kontentu ku esaki. Shofùrnan di bùs, ku a nota ku pasaheronan tabata hasiendo bon uso di e transporte alternativo aki, a disidí di yama outoridat pa denunsiá un akto ku segun nan ta kontra lei.
Outoridatnan ku a presentá na e sitio en bèrdat a konfirmá ku loke tabata pasando no ta kuadra ku lei, esta ku un “tourwagen” no por transportá pasahero kontra pago. Esaki no ta posibel, segun e pèrmit ku nan tin.
A duna instrukshon e ora ei na e pasaheronan pa nan baha i e vehíkulo mester a bai sin pasahero.
Un ratu despues, un situashon similar a presentá pero e biaha aki e shofùrnan di bùs mes a obligá e pasaheronan di e “tourwagen” pa baha.
“E situashon aki a kondusí na mas tenshon durante e dia di ayera, un kos ku realmente no tabata nesesario”, segun Wiels a trese dilanti.
El a mustra ku un vehíkulo ku ta transportá turista no tin mag, pa lei, di transportá pasahero kontra pago. Manera ta konosí, e “tourwagen” den mayoria kaso ta forma parti di un pakete ku e turista ta kumpra, den kua ta inkluí por ehèmpel un rekorido riba nos isla ku un guia.

AMSTERDAM/ WILLEMSTAD - Un entiero segun e sistema konvenshonal, ta birando un kos impagabel na Ulanda. Mas i mas ulandes ta skohe pa ora nan muri pa nan famia apliká kremashon. Pa haña un idea: un kèlder na Ulanda tin biaha ta kosta te 6 mil euro!
Un investigashon ku e kompania di seguro di entiero ulandes DELA a laga hasi a trese na kla ku den 65 porshentu di kaso, e ulandes ta evaluá kiko ta gastunan di su entiero i kiko ta mas kumbiniente, ku ta dera segun e sistema normal, òf ta pasa pa kremashon.
Gastunan di kèlder último 5 aña a subi ku no ménos ku 50 porshento.
Siudadanonan, asina e informe ta sigui bisa, ta iritá nan mes na e gastunan haltu aki, pero tambe na e diferensha tin biaha hopi grandi ku ta eksistí entre e diferente agensianan funerario.
Un ehèmpel konkreto: na Ameland bo ta paga pa un boka pa e periodo di 20 aña 495 euro, miéntras ku na Lisse esaki ta kostabu 6065 euro.
Mester bisa ku na Kòrsou tambe tin un tendensia kresiente di hendenan ku ta preferá kremashon riba un entiero konvenshonal, ounke mester bisa ku esei no ta basa riba e motibu ku ta konta na Ulanda.
Un boka na Kòrsou sigur no ta dje karu manera na Ulanda, pero kremashon di otro banda ta nifiká hopi ménos gastu i ta ser konsiderá por lo general un entiero mas efisiente.

SYDNEY – FIFA a retirá e suspenshon internashonal ku tabata pisa riba Irak djaweps, dor di kua e pais ei lo por hunga djadumingu kontra Oustralia pa eliminatorio mundial.
Djamars FIFA a suspendé e kampion di Asia pa motibu di e metementu di e gobièrnu den asuntunan di futbòl di e pais ei, despues ku el a disolvé e komité olímpiko nashonal i tur e federashonnan deportivo.
E suspenshon a ser revoká temporalmente nèt ocho ora promé ku mei anochi, ora di Sydney, e fecha límite ku FIFA a imponé, despues ku e organismo a haña dokumentonan di outoridatnan irakí splikando e situashon.
“E suspenshon a ser kitá, e partido lo hunga”, Blatter a bisa.
“FIFA a risibí un karta di e sekretario general di konseho di minister di Repúblika di Rak, konfirmando ku IFA (federashon irakí di futbòl) a ser ‘ekskluí’ di e dekreto anterior, por lo tantu restablesiendo e òrdu legal di e asosiashon irakí i di su lidernan, ku lo kontinuá ku nan aktividatnan paden i pafó di Irak te na e elekshon”, FIFA a informá den un komunikado.
Sin embargo, FIFA a bisa ku lo tene mas reunion ku outoridatnan irakí na Zurich i ku e kastigu por bolbe ser imponé si nan no kumpli ku sierto kondishonnan.
“E karta aki ta un paso positivo, pero e no ta kontestá tur e prekupashonnan di FIFA kompletamente riba e intentonan di e gobièrnu pa kontrolá e federashonnan irakí i e komité olímpiko nashonal di Irak”, FIFA a indiká.

ROMA – Bolsa di balor di Milan tanten a suspendé e kompra benta di akshonnan di Roma, meimei di informenan di ku e magnate merikano George Soros tabata na punto di kumpra e klup italiano di futbòl.
E akshonnan di Roma tabatin programá pa oumentá16% promé ku apertura di e bolsa, loke a obligá pa suspendé e benta promé ku e kampanaso inisial. E kompra benta di akshonnan ta keda suspendé outomátikamente si nan subi o baha mas di 10% den su kotisashon.
Asina a reanudá e transakshonnan, e preis di e akshonnan di Roma a subi 14,29% te na 2.11 dòler. Un informe djarason den e korant New York Post a indiká ku e abogado di New York, Joseph Tacopina tabata na punto di kumpra Roma ku e respaldo ekonómiko di Soros.
Tacopina a yega Roma djaweps i a saka su potrèt na airopuerto ku un bufanda di e klup.

 WILLEMSTAD - Multipost Antilles situá na Kòrsou i su organisashon ruman Project Support Curaçao a opsekiá Stichting Vormingscemtrum voor Jeugdwelzijnswerk (SVJ) un suma di ANG. 10.000,00.
Multipost ta konosí prinsipalmente pa su aktividatnan riba tereno di Datacard, prent i mail. Resientemente nan ta aktivo tambe riba e merkado di mashin di kopia i fax. Project Support Curaçao ta e motor tras di torneo anual di futbòl Kopa Chippie-Polar. Tur dos empresa ta sosialmente masha liga ku nos isla i e bienestar di su habitantenan.
SVJ ta un fundashon ku tin komo meta organisá i ehekutá aktividatnan di formashon i treinen pa hóben i guiadó/edukadónan di hóben. Pa realisá e meta ariba menshoná medionan pa komuniká bon i efektivo ta di suma importansia. Multipost i Project Support a komprondé e nesesidat i a hasi un gesto na komunidat en general i na e hubentut en partikular.
SVJ ta masha kontentu i agradesido ku e donashon ku a kondusí na un sistema di nètwerk ku ADSL, konekshon di Internèt i realisashon di un sentral di telefòn nobo.
Riba pòtrèt: Rene Daantje Multipost ta hasi entrega di e chèk di ANG 10.000,00 na un kolaboradó di SVJ.

WILLEMSTAD – Polis a detené e hóben C.M. di 17 aña di edat, sospechá di ta envolví den un insidente ku a kousa morto di Rayen Malasia. E víktima tabata riba un skuter, ora shofùr di e outo den kua C.M. tabata sintá, a dal den e skuter intenshonalmente. Malasia a muri despues di kasi 3 luna.
E suseso a tuma lugá dia 4 di novèmber 2007. E anochi ei tabatin un problema entre dos grupo di hóben, na altura di e establesimentu Dupont na Sta. Maria. Dado momentu e víktima i un otro hóben a subi un skuter i bai for di e sitio. Na altura di Alivio pa Pueblo riba Rooseveltweg, shofùr di un vehíkulo a dal den e parti patras di e skuter riba kua e víktima tabata. Despues di e choke e shofùr a sigui kore ku e skuter pegá bou di e outo. Segun informashon ku polis a risibí, e shofùr di e outo tabata pertenesé na e grupo di hóben ku tabatin problema ku e grupo di e víktima Malasia algun ratu promé. E víktima Malasia a muri dia 31 di yanüari di e aña akí. Komo ku el a muri despues di 30 dia ku e aksidente a tuma lugá, no a registr’é komo morto di tráfiko. Esaki ta un regla internashonal.
Polis a kuminsá investigá e kaso for di momentu ku e aksidente a tuma lugá, pero no a logra na detené niun sospechoso. Tin indikashon ku e outo ku tabata envolví lo tabata na un garashi i ku polis a haña sa esaki. A base di e informashon akí polis a sigui investigá i a yega na e sospechoso C.M. Na momentu ku polis a deten’é, e tabata na skol.

WILLEMSTAD – Un patruya di Wardakosta a interseptá un Go-Fast na altura di Fuikbaai ku un lote di 162 kilo di koka. E tripulante ku tabata konsistí di tres persona a logra bula for di e boto i kore drenta mondi. Ku e lote akí wardakosta ta konfiská un total di 268 kilo di koka e siman akí.
E suseso a tuma lugá den kareda di mitar di tres awe mardugá. Wardakosta a informá ku e patruya a nota un boto ku no tabata iluminá den laman na altura di Fuikbaai. Mes ora a kuminsá un persiguishon kaminda e tripulashon di e boto a logra yega kosta. Einan nan a baha for di e boto i subi tera, kaminda nan a kore drenta mondi i desaparesé. Despues di un investigashon dor di e efektivonan di Wardakosta, a lokalisá 6 bulto ku tabata kontené droga. Finalmente a resultá ku ta trata di 162 kilo di koka. Wardakosta a tou e Go-Fast i hib’é Parera kaminda e investigashon lo sigui.
Anteriormente e siman akí tambe Wardakosta a konfiská un lote di 124 kilo di koka. Durante e akshon a detené un hòmber i dos dama yu di Kòrsou ku tabata den un outo na altura di Tera Kòrá. Den e outo tabatin 123 kilo di koka. Un ratu despues a detené dos hòmber venesolano i a konfiská 1 kilo mas di koka den un kas na Groot Kwartier. Relashoná ku e kaso akí polis a detené djaweps último dos hòmber kolombiano den nan kas na Sta. Rosaweg i Souax.