Encuanto obligacion di formacion social(sociale vormingsplicht)

ORANJESTAD - Durante estadia di e delegacion di Parlamento di Aruba, consistiendo di Presidente Parlamento, Mervin Wyatt Ras, sr. Ady Thijsen en sra. Jacqueline Bastien, nan a haya un presentacion di e Minister di Enseñanza Antiano, sra. Omaira Leeflang encuanto e obligacion di formacion social (Sociale Vormingsplicht) y tambe cambio di nan ley di enseñanza obligatorio.
Durante e presentacion na cual e delegacion Hulandes tambe tabata presente a intercambia encuanto hobennan cu ta dropout, en total 350 pa aña y e forma cu mester a rek e edad di enseñanza obligatorio pa asina haci possible cu hobennan di 16 pa 18 aña ta ser oblige pa keda na skol of tin algo di haci y cu nan y nan mayornan ta responsabel pa esaki.
Aunke segun e minister esaki ta un medida drastico tog a tuma e decision pa Antias mes por carga responsabilidad pa su hobennan y nan futuro. Esaki lo preveni tambe cu hobennan ta bai sin mas Hulanda.
Nan ta traha cu leerplicht ambtenaarnan pa control y a registra tur hoben pa asina tin bista ariba nan. Pa e hobennan cu ta asina dificil cu no ta fit den e facilidadnan cu tin ta haci uzo di e barco unda hobennan por sina cierto habilidadnan basico.

Di Sr. Jorge Ridderstaat pa e Coleccion Nacional.

ORANJESTAD- Shete aña largo señor Jorge Ridderstaat, economista, a studia historia di e compania di petroleo LAGO Oil and Transport Company na Aruba.
Mayoria di su tempo liber e tabata investiga e compania aki cu a cambia rumbo socioeconomico di Aruba.
Cu un perseverancia grandi y un mente investigador fuerte señor Ridderstaat a pasa den tur literatura relevante pa por a produci e buki “The LAGO Story: The compelling story of an oil company on the island of Aruba”. Riba portret por mira Sra. Astrid Britten, contento cu e obra bunita den su man, den compania cu e autor y un colega di Dept. Arubiana, Sr. J. Koolman.

ORANJESTAD- Na prome lugar ta desea di expresa palabranan di danki na tur hende y instancia cu a aporta na e bunita re-apertura di e espacio cultural aki. Tambe ta haci mesora uzo di e oportunidad pa confirma cu a ricibi hopi palabranan di felicitacion ariba con nechi e lugar a keda.
Como cu diariamente ta drenta preguntanan ariba e actividadnan/cursonan/lesnan cu tin pa ofrece, por menciona e.o. Scol di Baile Diana Antonette cu p.e. Klassiek, Hip Hop, Ballet, Streetdance, Pilatus, Art Factory cu Pintamento, Candy Werleman cu cosemento, Sharon Pui cu Zumba, Seed of Life cu Baile, Frensel cu Salsa, Rudy Leysner cu yoga.
Un otro profesional cu lo bay contribui tambe na formacion cultural di San Nicolas y becindario cu lesnan di piano ta Armand Simon.
Por ultimo ta informa cu tur hende ta bon bini pa drop in un rato, pa un bishita, pa tira un bista o pa yama Sonia Giromus na 5849168 kende lo ta eynan especialmente den oranan di merdia/atardi.

Esfuerzo dirigi ariba continuacion di POK

ORANJESTAD- Den e ultimo dianan Presidium di Parlementair Overleg a reuni. E presuidium ta consisti di e presidentenan di Parlamento di Antias y Aruba, Presidente di e comision Hulandes di Asuntonan Antiano y Arubiano di Eerste y Tweede Kamer, e Presidentenan di e comisionnan na Antias y Aruba encarga cu asuntonan di Reino y griffiernan.
E miembronan ta mira interes di POK y nan a expresa e deseo pa e encuentro aki lo mester continua. Despues di e problemanan di januari Presidium ta spera di tin un bon deliberacion. Den e tempo aki cu Reino ta prepara pa cambionan grandi di structura estatal, delegacionnan ta haya importante cu nan ta na altura di nan pensamento y opinionnan. E reunionnan ta parcialmente dirigi pa yega na comprendimiento parcialmente tambe pa pone nan mes na altura di opinionnan encuanto asuntonan di interes comun.
E presidium ta haya di suma importancia pa mantene e forma respetuoso den cual e delegacion Parlamentario a delibera te cu awor pa futuro. Sinembargo presidium ta di opinion cu no ta necasario pa introduci reglanan nobo of regla di comportacion pa locual ta trata e reunion di POK. Locual si ta wordo pidi enfaticamente dor di e delegacion di Antias ta e deseo pa e reunion na Hulanda tene lugar a base di e reglamento di orden di Hulanda of den otro palabra segun e reglanan usual y vigente na Parlamento Hulandes. Pa motibo cu e reglanan di reglamento di ordo no ta valido pa e POK e deseo aki lo wordo presenta na Hulanda cu e peticion pa laga e POK tambe cai bou di e reglanan di reglamento di ordo. Den e caso cu Tweede Kamer bai di acuerdo cu e peticion ariba menciona lo mester ta posibel pa e POK tambe cai bou di e reglanan di Reglamento di Ordo. Den e caso cu Tweede Kamer bai di acuerdo cu e peticion ariba menciona lo mester ta posibel pa e Pok overleg por tuma lugar na luna di juni.

WASHINGTON, Merka, - Presidente di Merka George W. Bush ayera a presentá un defensa enérgiko di su prioridatnan na Amérika Latina dor di kalifiká e reformanan di e Gobièrnu nobo di Cuba komo “gestonan bashí” i ora el a pone preshon na fabor di inisiativanan ambisioso pa Mexico i Colombia ku ta konfrontá skrutinio di e demókratanan den Kongreso.
Bush a pronunsiá su promé diskurso amplio riba Amérika Latina fo’i dia ku el a biaha bai e region na mart di aña pasá.
Pa esaki el a skohe e konferensia anual na Washington organisá pa Konseho di Amérika na sede di Departamento di Estado, un grupo prekomersial ku ta promové lasonan estrecho entre Merka i Amérika Latina.
Den un aparente intento di definí su legado riba e region na momentunan ku final di su tèrmino ta aserkando, Bush a defendé su konservadurismo alabando e nesesidat di “hustisia sosial” kompañá ku komersio liber i kondishonamentu di e programanan merikano di asistensia n’e reformanan di merkado liber.
Presidente Bush, persona hopi impopular n’e region, siertamente lo laga su susesor ku un kontinente dividí riba kon lidia ku Washington.
Algun pais, manera Mexico i Colombia, a sera relashonnan estrecho ku Washington, miéntras ku otronan, manera Venezuela i Bolivia, ku forsa ta kritiká e polítikanan merikano.
E palabranan mas fuerte di diskurso di Bush tabata pa Gobièrnu nobo di Raúl Castro na Cuba. I el a ripití su opinion di ku e polítika merikano pa loke ta trata e isla aki no mester kambia, òf Gobièrnu cubano promé mester libra e presunan polítiko i ofresé mas libertat polítiko.

WILLEMSTAD- Fundashon Sedreko a haña e instalashon deportivo den e bario di Dominguito konosí komo “Vèlt di Dok” serka Curaçao Drydock Company Inc. pa manehá. A kuminsá mesora ku e trabounan pa pone e tereno den un kondishon aseptabel pa por práktika deporte atrobe riba dje konsiderando ku e tereno a bai hopi atras e último añanan. A limpia, egalisá i marka e tereno.
Fundashon Sedreko a tuma e desishon di enkargá e organisashon di futbòl di Dominguito ku ta S.V. Centro Dominguito ku e maneho diario dje instalashon.
E desishon aki ta debí ku Fundashon Sedreko a nota hopi seriedat i entusiasmo serka dirigentenan di Centro Dominguito kendenan ta trahando fuerte ku nan tim den divishon máksimo i tambe ku e hóbennan dje bario.
Sr. Udemar, “Shonma” Isidora flamante presidente di e organisashon di futbòl di Dominguito ta realmente hopi kontentu ku e yudansa di Fundashon Sedreko i e desishon pa enkargá Centro Dominguito ku maneho dje instalashon.
Ta e deseo di e presidente di Centro Dominguito ku pronto lo por organisá riba e instalashon aktividatnan deportivo manera ántes.
“Nos ta hopi gradesido na Fundashon Sedreko, i nos lo apresiá otro spònsernan sigur dje bario ku ta dispuesto pa yuda nos pone e instalashon bèk den kondishon optimal”, sr. Isidora ta splika.
E presidente a deklará ku tabatin un kambio formal kaba. E tereno tabata un mondi, pero awor ta hungando futbòl atrobe riba dje.

BEIJING – E vlam olímpiko a yega awe e kumbre di Mount Everest. Televishon chines a mustra imágennan di e ekipo alpino ku tabata hisa e antorcha olímpiko huntu ku bandera di China i di e movementu olímpiko riba e tòp di e seru mas haltu na mundu.
“Un mundu, un soño,” asina e kapitan di e ekipo, Nyima Cering a grita, miéntras ku e antorcha tabata wòrdu sendé promé ku el a subi e último trapi pa yega e kumbre. “Nos a yega ku e antorcha na dak di mundu.”
E ekipo ku ta konsistí di 19 miembro a sali e último kampamentu kuater ora promé ku solo a sali awe i a yega banda di 9or di mainta e punto mas haltu di mundu ku ta 8850 meter riba nivel di laman.
E subida riba Mount Everest ta representá e akto mas espektakular ku e organisadónan di e Olimpiada i ta spera ku esaki ta kombèrtí den e marka pa nan ambishon pa e weganan ku ta kuminsá na ougùstùs.
Sinembargo, e akto aki a wòrdu kritiká for di inisio di planiashon, ya ku tin e krísis ku Tibet den kual region Mount Everest ta keda tambe.
E organisadónan di Weganan Olímpiko na Beijing ta spera, ku e imágen di e antorcha riba e punto mas haltu di mundu ta laga pa olvido e protestanan ku a marka e trayektoria internashonal di e vlam.


Momentu ku e ekipo di alpino a yega e kumbre di Mount Everest ku e antorcha olímpiko.

ZURICH – Argentina a logra mantené e promé lugá riba e klasifikashon mundial di selekshon di FIFA. No tabatin ningun kambio for di e último klasifikashon i Mexico a kai ku un puesto.
E selekshon argentino tabatin 1520 punto riba e klasifikashon sigui pa Brazil na di dos lugá.
Italia, Spaña, Alemania, Repúblika Cheka, Fransia, Gresia, Portugal i Ulanda ta kompletá den e órden ei e 10 promé selekshonnan di mundu segun FIFA.
Mexico ta e promé ekipo latino riba e lista na number 17 sigui pa Colombia ku a mantené su puesto 19, Paraguay a subi di 26 pa 24.
Merka ta number 21 riba e klasifikashon mundial aki.

CONCORD – E eks astro di Fórmula 1, e piloto kolombiano, Juan Pablo Montoya a optené su mihó resultado te ainda pa loke ta Nascar durante e kareda di Talladega, unda ku el a finalisá na di dos lugá.
Awor aki e ta serando konosí ku su hefe nobo di ekipo, Jimmy Elledge. Despues di a pasa un tempu huntu durante e seshonnan di práktika e siman aki, Elledge a bin komprondé, ki aspektonan tékniko e outo di Montoya mester pa e por tin e mesun éksito den Nascar ku den Fórmula 1.
“E último dianan tabata promé biaha ku nos tabatin e oportunidat pa traha huntu i entrená huntu. Diferente piloto ta respondé riba faktornan distinto i ora bo traha hopi ku un piloto bo ta kere ku tur ta meskos. Di tur manera tabata bon pa hasi kambio i komprondé Montoya mas mihó,” asina Elledge a bisa.
Montoya tabata na e di 12 lugá riba e klasifikashon general, danki na e di dos lugá na Talladega. E fin di siman aki el a finalisá na di 32 lugá na Richmond i awor a kai na e di 16 puesto i ta eliminá for di e búskeda pa e título.
Montoya a bisa ku ainda su ekipo ta leu di ta un aspirante legítimo pa e titulo.
Ni Montoya ni Elledge no ta kere ku nan ta entre e 12 mihónan. “Awor aki tin entre 13 pa 15 ekipo ku ta sufisiente kompetitivo pa gana i nos no ta entre esaki nan,” Elledge a bisa.
“Jimmy ta bon i e ta siñando. Nos mester di algu diferente na e outo pa mehorá i nos no ta intento na esaki,” Montoya a deklará.

TOKIO - E ekipo hapones Super Aguri a retirá e siman aki for di e kampionato mundial di Fórmula 1 pa motibu di problemanan tékniko.
"Mi a partisipá den e kampionato durante dos aña i kuater luna," asina e presidente di e ekipo, Aguri Suzuki a bisa. "Mi ta lamentá di tin ku informá, ku e ekipo lo stòp ku su aktividatnan for di awe."
Super Aguri tabatin kombersashon djabièrnè ku nan spònser Honda na Tokio Super Aguri, pa diskutí e futuro di e ekipo, pero no por a logra haña solushon pa e problemanan.
E ekipo no tabatin akseso na e sirkuito di e Gran Premio di Turkia ku ta keda realisá e fin di siman aki na Istanbul.
E futuro di e ekipo tabata na duda, for di momentu ku dos proposishon di kompra a frakasá di parti di e grupo britániko Magma Group i di e firma Weigl Group.
"Ora ku nos no por a yega na un akuerdo ku Magma, mi tabata sa ku lo tabata difísil pa sigui," asina Suzuki a bisa, e mes un eks piloto di Fórmula 1.
Suzuki ta alegá, ku na momentu ku nan sosio SS United Oil & Gas Co a kibra e kontrakt, a resultá den pèrdida den apoyo finansiero i a laga ekipo den pèrtá ekonómiko.
E ekipo fundá pa Suzuki den 2005, apénas tin kuater punto den 41 kareda. Temporada pasá e ekipo a finalisá na di nuebe lugá entre e 10 ekiponan.

WILLEMSTAD - Awe mèrdia 12’or i 1’or Bestuurscollege lo tuma desishon riba e oumento di gasolin i gasoil i a planiá pa anunsiá esaki 3’or den un rueda di prensa. Manera anunsiá dos luna pasá, lo bai introdusí e oumento di 40 sèn pa gasoil den fase i 20 sèn pa gasolin.
Direktor di Curoil Capella ya a anunsiá ku nan no por warda mas i hasta t’asina ku e preis mundial lo a oumentá 70 sèn pa diesel.
Diputado Davelaar a bisa enfátikamente ku adaptashon di tarifa ta inevitabel. A instituí un komishon di energia ku a haña 4 siman pa bini ku alternativa, pero mientrastantu esaki a bira 6 siman. A haña rapòrt di komishon miksto i ta studiando alternativanan.
Nos a komprondé ku e komishon a proponé entre otro pa bini ku kampaña di konsientisashon pa spar i tambe pa supsidiá transporte públiko. A tuma tempu pa wak tur esakinan i a pidi mas informashon pa analisá komo tambe a papia ku stakeholders. A base di informashon ku haña, a presentá un karta di Curoil na BC kaminda a tuma nota di e kontenido. Basá riba mas informashon por bai over na tomo di desishon i tambe medidanan ku a wòrdu proponé.
Oumento di tarifanan ta inevitabel, ya ku esaki ta dependé di desaroyonan internashonal.
Kompanianan ku ta produsí e derivadonan a base di esei ta stipulá preisnan i benta, e realidat ei nos tin nos dilanti, asina e diputado a sigui bisa, pero no kier a divulgá mas informashon, ya ku ainda e tomo di desishon mester a kai den Bestuurscollege.

ARIES: Pensa e kosnan bon ku bo ta bai bisa i hasi, ya ku bo por heridá sentimentunan di bo ser kerí fásilmente. Tin hopi sperando loke bo tin ku bisa riba un situashon familiar. 13.

TAURO: Bo deseo di sali di e rutina diario ta enfatisá awe. Biahenan kòrtiku ta masha benefisioso i tambe un bon lektura i un bon wega ta hiba bo mente na lugá distinto sin sali for di kas.

GEMINIS: Ta momentu di revisá bo aktitutnan, sentimentunan i e forma den kua bo ta mira mundu ku ta rondonábu. Ahustá bo estilo i forma di biba pa pone kosnan kla. 05,45,03.

KANSER: Ta difísil skonde o mantené apartá bo bida privá. Bo relashonnan di trabou agradabel si bo ta kuida i bo no tin hopi konfiansa ku bo kompañeronan. 05,10,16.

LEO: Esun ku ta kritikábu i no ta aseptábu manera bo ta, no por yama nan bo amigu. Bo no tin ku aparentá loke bo no ta, pa otronan aseptábu. 22,01,19.

VIRGO: Bo amigunan ta hopi importante pa bo, ya ku bo ta brinda nan bo ayudo i e apoyo ku nan tin mester. Tene pasenshi. 07,02,13.

LIBRA: Di organisá i embeyesé bo kas o bo kuarto ta riba agènda. Bo bon gustu por ta no ta di akuerdo ku bo presupuesto. 03,46,25.

SKORPION: Bo disposishon di ayudo i koperashon ta envolví den proyektonan i aktividatnan hopi positivo i agradabel. Bo mester ekspresá mas bo emoshonnan. 15,20,19.

SAGITARIO: Bo ta buska i bo mesté awor di apoyo i e seguridat ku por brindabu bo pareha. Na e mesun manera bo ta ofresé e mesun kos. 09,27,32.

WILLEMSTAD - E mesun miembro di parlamentu pa frakshon di MAN Eunice Eisden, kende a pidi un reunion di Komishon Sentral di Staten pa trata e asina yamá “Baseline study” riba kriminalidat, a pidi ayera pa posponé e reunion pa e por prepará mihó. E ke haña kopia ofisial di e rapòrt i tuma nota di e kontestanan ku minister di Hustisia David Dick a duna riba su preguntanan.
“E forma ku minister Dick ta tratando parlamentu – no solamente den e kaso aki – un falta di rèspèt kompleto”, asina Eisden a duna di konosé.
Dia 26 di aprel, Eunice Eisden a manda un karta pa presidente di parlamentu ku tabata kontené un seri di pregunta dirigí na minister David Dick, relashoná ku e rapòrt riba situashon di kriminalidat di nos pais.
Riba e mesun fecha, esta 26 di aprel e parlamentario a manda un di dos karta pa presidente di parlamentu den kua e ta pidi pa tene un reunion di Komishon Sentral den kua minister Dick lo mester bin duna splikashon riba e mesun tema aki. Dia 29 di aprel, presidente di parlamentu a informá miembronan di Staten ku e rapòrt ta na nan disposishon i ku nan por tuma nota di su kontenido den forma konfidensial.
Dia 5 di mei, presidente di parlamentu a manda un karta den kua e ta rekòrdá e minister menshoná riba e preguntanan di parlamentario Eisden, esta ku e ke haña un kontesta promé ku e reunion di Komishon Sentral.
Dia 7 di mei, esta ayera, parlamentario Eisden mes a manda un karta den kua e ta bolbe urgí minister di Hustisia pa kontestá su preguntanan i pa manda informá parlamentu si e rapòrt finalmente ta konfidensial òf no.

WILLEMSTAD – “E islanan chikitu Boneiru, Saba i Statia a gasta ménos plaka den e promé kuater lunanan di e aña aki, ku tabata originalmente planiá. Pero esaki no ta niun motibu pa húbilo”, asina Hans Weitenberg a deklará durante un enkuentro ku prensa ayera.
Hans Weitenberg ta presidente di College financieel toezicht, e Kolegio di Supervishon. Den e dianan ku a pasa, e kolegio a bishitá e islanan aki pa di dos biaha.
E bishita tabata den kuadro tambe di esfuersonan ku mester kristalisá den futuro pa yega na ehekushon di presupuesto 2008 i preparashon pa yega na un presupuesto 2009.
Segun Hans Weitenberg, e hecho ku e islanan a gasta ménos plaka den e promé kuartal di e aña aki, por parse bon notisia, pero ku en realidat mester wak e asuntu aki masha bon.
Segun Weitenberg, tabatin motibu pakiko e islanan no a gasta mas tantu plaka.
“Ami ta kere ku e islanan tabata asina drùk ku formulashon di presupuesto 2008 ku nan no tabatin tempu pa atendé e parti di ehekushon manera mester ta. Konkretamente esaki ta nifiká, ku tabatin kuentanan ku a keda drumi, ku e islanan no a paga i ku di tur manera, lo mester paga den futuro. Simplemente tabatin ménos tempu pa aktividatnan regular di gobernashon. Nos ta tene kuenta ku e loke a keda drumi, lo mester keda paga tòg den futuro,” Weitenberg a duna di konosé.
Un dje kosnan ku ta preokupá e kolegio, ta e hecho ku kuentanan anual ainda ta un problema den maneho finansiero di e islanan aki.

WILLEMSTAD - Mayornan di muchanan ku ta bayendo Vespucci College a tuma e desishon, ku nan ta hiba gobièrnu ulandes, spesífikamente sekretario di Estado Van Bijsterveldt (di Enseñansa) korte. Meta di e kaso aki ta pa garantisá ku nan yunan ta sigui pasa eksamen final normal na Kòrsou i ku nan no mester bai te Ulanda pa hasi esaki.
Vespucci College, un skol orientá riba muchanan ulandes, ta duna enseñansa avansá. E tin mas o ménos 200 mucha.
E alumnonan aki ta por parte muchanan di mayornan ku ta temporalmente stashoná na Kòrsou manera por ehèmpel di hendenan di marina ulandes, por parte muchanan di hendenan lokal.
T’asina ku for di aña 2001 e muchanan aki ta pasa eksamen ulandes na nivel di VMBO, HAVO i VWO atraves di un konstrukshon spesial ku a traha.
E konstrukshon aki ta den koperashon ku Ministerio di Enseñansa ulandes. E muchanan, unabes nan kaba tin tambe un diploma ulandes. E konstrukshon ta den koperashon tambe ku Montessori College na Nijmegen, Ulanda.
“E konstrukshon aki a bin ta funshoná ekselente”, asina Bob Brinkhof, rector di Vespucci College a duna di konosé.
E úniko diferensha ta, asina el a bisa, ku pa sierto tipo di eksamen mester a tene kuenta ku e diferensha di ora ku Ulanda den forma separá. “Di e forma aki nos tabata evitá ku e alumnonan ta haña informashon adelantá di parti di Ulanda”, Brinkhof a bisa.
Despues di 6 aña, Van Bijsterveldt a para e kombenio aki na yüli 2007.

WILLEMSTAD - Presidente di parlamentu antiano Pedro Atacho ta para ‘riba ku mester ta posibel apliká e mesun reglanan di komportashon ku ta konta pa reunion di Tweede Kamer na Ulanda, pa e enkuentro parlamentario tripartite entre Antia, Ulanda i Aruba. Pero Wilibrord van Beek, presidente di e delegashon parlamentario ulandes no kier a bai mas leu, di primintí ku e lo pone e petishon aki na huisio di parlamentu ulandes.
Esei básikamente ta resultado di e reunion di Presidio, ku a tuma lugá den e dianan tras di lomba. Wilibrord van Beek, Pedro Atacho i Mervin Wyatt-Ras, e último aki presidente di parlamentu di Aruba durante un konferensha di prensa ayera a bisa ku e enkuentro di Presidio a bai den un bon esfera relashoná ku e intenshon pa reuní na luna di yüni awor.
Tur tres a ekspresá e deseo pa e reunion di POK, Parlementair Overleg Koninkrijkrelaties sigui otro luna.
Esaki, relashoná ku e virtual kontroversia ku a surgi rondó di e siguiente enkuentro parlamentario aki.
Presidente di parlamentu antiano Pedro Atacho anteriormente a bisa enfátikamente ku Staten lo partisipá na Parlementair Overleg Koninkrijksrelaties (POK) basta establesé adelantá kiko ta e reglanan na kua kada pais partisipante mester tene nan mes na dje. Un dje kosnan ku mester ta bon kla ta, ku presidente di e enkuentro mester por aktua si dado momentu kos sali for di man.
Ulanda sinembargo a rechasá siman pasá e eksigensia di Atacho. Wilibrord van Beek a bisa, ku e no ta sinti nada pa bai establesé regla pa un enkuentro asin’aki.

CRAWFORD, Texas, - E último bia ku yu muhé di un Presidente di Merka aktivo a kasa tabata na yüni 1971.
E tempu ei Presidente merikano Richard Nixon su yu muhé Patricia a kasa i esaki tabata un akontesimentu públiko i polítiko kompletu.
Retransmití bibu i direkto for di Kas Blanku, e kasamentu a konta ku asistensia di 400 invitado i 600 periodista.
Presidente Nixon inkluso tabata preokupá unda mester pone kámaranan di televishon i su yu muhé tabata okupá portada di revista Life.
Djasabra awó, kosnan ta bai ta hopi diferente ora Jenna Bush, di 26 aña, bisa “si, mi ke” riba altar.
Lo no bai tin kámaranan públiko.
E lista di invitado p’e kasamentu di un di e yunan ohochi di George W. Bush i Laura Bush, i e frei Henry Hager ta konsistí di mas o ménos 200 persona, mas ku mitar ta famianan, i e esenario lo bai ta e teranan di Crawford, e rancho kaminda famia Bush sa keda.
Seremonia privá
E famia a disidí, riba deseo di Jenna, pa realisá e kasamentu un kuestion di perfil abou i, prinsipalmente, privá, i Kas Blanku a anunsiá ku solamente lo fasilitá e medionan di komunikashon un pòtrèt di e akontesimentu.
E desishon inisialmente ta faboresé un Presidente ku popularidat mas abou den historia, i lo no bai mir’é ku bon wowo si invertí sèn di e kontribuyentenan den un seremonia demasiado karu den tempu di guera i krísis ekonómiko.

WILLEMSTAD – TNT di Antia Ulandes ta introdusí na Kòrsou un aventura nobo. For di 2002 e organisashon di TNT ta un sosio aktivo di Nashonnan Uní su “World Food Programme”(WFP), ku ta e agensia pa e programa mas grandi di yudansa di pa ayudo humanitario.
TNT di Antia Ulandes pa di promé bes lo partisipá den e magnífiko programa aki dor di organisá un kanamentu ku ta hiba di number “Fight Hunger Walk The World 2008”.
Koperando bo ta kontribuí di lucha kontra di hamber i esnan ménos fortuná ku ta biba aki na Kòrsou, ya ku tur e kontribushon lo keda usá lokalmente.
E kanamentu lo ta dia 1 di yüni 2008 i lo kuminsá na Maduro Plaza, na Dokweg 19 pa 6’or di mainta. Tin dos distansia, unu di 5km i un otro di 10km.
Preis di karchi ta fl. 15,- ku ta inkluí un t-shirt i un kòpi kayente di sòpi.
Karchinan ta disponibel for di dia 28 di aprel último. Yama na telefonnan 733-1595 òf na telefon 733-1597.
Tambe via e e-mail Customerservice@tntdc.com
Tambe por haña karchinan na Koko Loko, Mensing Caminda i e ofisina di TNT na Maduro Plaza.

WILLEMSTAD - Minister di Tráfiko i Komunikashon ir. Maurice Adriaens i un delegashon ta aktualmente na Trinidad pa un bishita di trabou. E meta di e biahe ta pa haña informashon i interkambiá di konosementu kon por hasi mihó uzo di ICT pa komunidat den su totalidat. Ta ampliamente konosí ku den Karibe e islanan di Trinidad i Tobago tin basta konosementu i eksperensia riba e área aki.
Primeramente e delegashon a bishitá University of the West Indies (UWI). Na e universidat di renombre aki, Profesor Copeland, Dr. Mallalieu i su tim di e fakultat di ingenieria a duna un splikashon amplio kon UWI ta envolví riba diferente área di ICT pa sektor gubernamental, sektor komersial i komunidat en general. Diferente spesialista di UWI a interkambiá i duna ehemplonan klave kon a inkorporá ICT den edukashon, hustisia, salubridat públiko, pero tambe a ilustrá kon UWI ta traha huntu ku e sektor komersial pa desaroyá instrumento nan di ICT ku ta benefisiá komunidat di Trinidad. Tambe e posishon liderato ku gobièrnu mester tuma, ròl di sektor komersial i alabes esun di e regulador di telekomunikashon tabata punto di diskushon. Un bon sinergia i union entre e partner nan aki lo resultá den benefisio pa e komunidat, komersio i gobièrnu mes.
E profesor nan Sankat i Kochhar, ámbos dekano di UWI a mustra nan interes pa bini Kòrsou pa mustra e posibilidat di estudio ku UWI ta brinda riba nivel di “bachelor, master” i tambe “post graduate”. No sea kua fakultat, for di esun di lei te esun di agrikultura, ICT ta forma parti integral di tur. Maske Trinidad ta riku nan petroli i gas, nan ta mira ICT komo un instrumento pa krea posibilidat nan nobo pa nan pais. “New vision, new industry, new wealth” (vishon nobo, industria nobo, rikesa nobo) profesor Copeland a terminá bisando.

WILLEMSTAD - Siman pasá pa ta mas eksakto dia 30 di aprel i 1 di mei último WIMCO a presentá su famoso Nintendo WII Tournament na e famoso Food Festival ku ta tuma lugá anualmente na Asiento.
Na e okashon aki hopi tabata e muchanan ku a gana vários premio manera entre otro MP4 players i tambe radio portabel. Di parti di Wimco ta bai un pabien na i tur.
Un pabien tambe ta bai na e seis ganadónan ku a gana un aña kompleto di produktonan di PEPSI. E ganadónan tabata Darren Profas, David Hernandez, Travis Vinck, Shadrach Gijsbertha, Poyu Fung, Hensley Thode i Alexander Hernandez. E premio grandi a bai pa Sherbert Isenia ku a gana un WII Console di balor di NAFls. 725.00.
Riba pòtrèt tur e ganadónan huntu ku sr. Henriquez i sra. Lupita Fingal di WIMCO, tambe sr. Allan Maduro di PEPSI.