WASHINGTON, Merka, - E aspirante demókrata pa Kas Blanku, Barack Obama, i eks presidente di Merka Bill Clinton ayera a tene nan promé kòmbersashon fo’i dia ku Hillary Clinton a keda for di e karera presidensial di Merka.
E bosero di Barack Obama, Bill Burton, a bisa ku e senador a yama Clinton ayera mainta i nan ta’tin un charla “estupendo” di 20 minüt.
Ademas, el a indiká ku Obama ta sintié honrá ku su apoyo realisá den públiko siman pasá.
“Obama semper a kere ku Bill Clinton ta un di e lidernan grandi di e nashon aki i un di e mentenan briante. I e ta spera di mir’é den su ekipo di kampaña i risibí su konseho”, Burton a bisa.
Clinton tabata ousente pa e promé akto públiko konhunto ku Hillary Clinton i Obama na siudat di Unity, New Hampshire, djabièrnè 27 di yüni último.
Pero su bosero a indiká ku e eks presidente merikano ta interesá hasi kampaña pa Obama.
“Presidente Clinton ta sigui ta impreshoná pa senador Obama i e kampaña realisá i ta su deseo hasi kampaña p’e i kuné den lunanan benidero”, Matt McKenna a bisa, kende ta bosero di e eks mandatario.

Foto: Bill Clinton i Barack Obama 0107

Bill Clinton i Barack Obama

WILLEMSTAD - Federashon Biyar Kòrsou su Kampionato Nashonal di Ekipo pa Bola 8 ta den su kulminashon.
Despues di a inisiá dia 6 di aprel e kampionato ta yegando su fin di temporada regular. Despues di dos buèlta 6 ekipo ta luchando pa bai "Calle 6" pa saka e kuaternan ku ta bai playoff.
E posishon di tabla aktual den e fase final aki ta realmente pèrèmpèmpèn.
The Scorpions i Maishi Tigers tin mesun tantu wega ganá i pèrdí pero pa motibu di averahe di wega ganá e Skorpionnan ta na promé lugá.
CUB Sharks i The Biesheuvel Friends tambe ta den un lucha tenas pa kaba na di 3 lugá pero den kualke pifio di e dos nan ariba nan tambe ta para tras di porta pa subi e posishonnan di honor.
Pero realmente e bataya ta kayente den skina di e di 5 puesto, esaki ta e "hot seat".
Kaminda The Predators, Hoi Bao Titans i Boca Stars ta hibando un kampaña
fuerte di wega pa no pèrdè niun paso esaki por resultá ku e ekipo ta pafó di “Calle 6” i playoff. Aunke Curacao Warriors i Straigth Eight no a stòp di hasi orashon pero nan destinashon ta den man di otro.
Nan ta dependé hopi di resultadonan di e otro ekiponan.
Tur esakinan ta ingredientenan ku ta hasi e kulminashon aki unu sumamente elektrisante i ta pone kada un ekipo bai tur ku tin pa gana nan delaster enkuentronan.
Faltando 4 rònt di wega e desishon pa sa ken ta yega “Calle 6” por ta mas serka ora ku awe djamars 8'or ta bai tin 3 wega interesante.

WILLEMSTAD - Nada no a kambia den e proyekto di Jan Thiel Bay Destination Resort pero ta trata di e mesun proyekto ku a kuminsa kuné na aña 2000. Asina desaroyadó di proyekto, Eduardo Halabi, a splika. E úniko kos ku ta deseabel aktualmente ta maksimalmente 1,5 porshento di e área di naturalesa na frontera di Jan Thiel.
Na aña 2004 Jan Thiel Bay Destination Resort a tuma e tereno bèk, for di APNA, despues di a entreg’é na APNA, pasobra el a keda drumi tres aña sin ku ningun hende a hasi algu kuné. “Ketu bai ta trata di e mesun proyekto ku e mesun hende envolví”. Debí na kompromisonan, Eduardo Halabi no ta pèrmití ainda pa divulgá nòmber di e invershonistanan. Loke ku sí Halabi por indiká, ta ku ta trata di invershonistanan di bon fama mundial i ku e finansiamentu pa e proyekto ta rònt.
Ta trata di un invershon di 116 mion dollar den e hotèl i 150 mion dollar adishonal den kondominio alrededor di e hotèl.
Ademas e hotèl ta krea trabou pa mil persona dirèkt i indirekt. Banda di esei, mil persona lo haña trabou den e parti sekundario, ku ta suma un total di 2 mil persona ku lo ta empleá den e proyekto denter di 5 pa 6 aña.
Entretantu, segun e splikashon di Eduardo Halabi, a surgi un retraso den e proyekto ku ta práktikamente kla pa kuminsá, debí na e diskushonnan ku a surgi enkuanto un pidi chikí for dje ‘tereno di naturalesa’ ku e proyekto lo ta deseá di haña adishonalmente.

BOGOTA, Colombia, - E gobièrnu di Colombia ayera a konfirmá ku a outorisá entrada di dos delegado europeo pa nan tin enkuentro direkto ku Sekretariado di FARC, ku e meta pa diskutí posibel liberashon di e personanan sekuestrá.
“E dos delegadonan europeo den último dianan a drenta Colombia, i nan a pidi gobièrnu outorisashon pa desplasá bai e enkuentro direkto ei ku Sekretariado di FARC”, e sekretario di prensa di Casa de Nariño, César Mauricio Velásquez, a bisa.
E funshonario no a spesifiká si e enkuentro ya a tuma lugá, tampoko no a duna nòmber di e delegadonan.
Oranan promé, medionan lokal a indiká ku delegadonan di Fransia i di Suisa a reuní den serunan ku hefe máksimo di “Fuerzas Armadas Revolucionarias de Colombia” (FARC), Guillermo León Sáenz, alias “Alonso Cano”, òf ku miembronan di e Sekretariado di e gueria.
Esaki lo bai ta e promé kontakto ku e hefe nobo di FARC ta aseptá ku delegadonan internashonal despues di morto di e lider históriko di e gueria, “Manuel Marulanda”.
Medionan di komunikashon colombiano a bisa ku na e supuesto enkuentro aki lo a asistí Noel Saenz, delegado di Fransia, i Jean Pierre Gontard, di Suisa.
E korant El Tiempo a informá ku un fuente di Casa de Nariño (e kas di gobièrnu) a indiká ku e dos diplomátikonan lo pidi FARC pa aseptá e proposishon di un zona di enkuentro pa inisiá diálogonan relashoná ku un eventual interkambio humanitario.

PARIS, Fransia, - Ku preteksto di lucha kontra eksplotadónan ku ta faboresé imigrashon klandestino, presidente franses Nicolas Sarkozy a primintí fortalesé e arsenal legal i represivo di Union Europeo (UE) durante e seis lunanan ku Fransia lo ehersé presidensia di e bloke, kuminsando awe.
Pero e polítika aki, anunsiá den un mensahe televisá di un ora, a keda denunsiá pa kombèrtí Europa den un “bùnker separá fo’i sobrá di mundu”.
“Esnan ku no tin papel no por keda”, Sarkozy a afirmá durante un intervenshon televisá di un ora, durante kua el a detayá su metanan i a diseñá un Europa kada bia mas será pa imigrashon.
“Mi ta resistí enrikesé esnan ku ta eksplotá e miseria humano”, Sarkozy a afirmá.
“Durante añanan no ta’tin niun kòntròl, i esaki a enrikesé esnan ku ta eksplotá miseria di hendenan pober”, e lider franses a añadí.
“Fransia, òf Europa no ta bai aseptá tur miseria di mundu”, Sarkozy a bisa ayera, sitando un ekspreshon di promé minister franses Michel Rocard.
Na 1990, Rocard a bisa un frase similar, pero el a agregá ku Fransia mester “sa asumí fielmente su responsabilidat” den tema migratorio.
Segun diferente fuente, e plannan franses pa UE lo por iritá mas e paisnan latinoamerikano, ku ainda ta protestá e ekspulshon di estranheronan sin papel.

ARIES: Un persona ku poko tempu ei bo a konosé, ta buskabu, ta komuniká ku bo pa establesé lasonan hopi fuerte ku bo. Bon suerte ta iluminábu ku tur su splendor. 22,09,36.

TAURO: Deskubrí den kada momentu e enkanto spesial ku kada kos i kada persona ta enserá. Desaroyá i lo bo mira tur kos di otro perspektiva. 13,07,35.

GEMINIS: Pone atenshon na bo imágen públiko, na bo trabou, na bo profeshon. Bo salú ta mehorá notablemente. Bo ta hopi komunikativo i sumamente ekspresivo. 06,19.

KANSER: Un enkuentro ku un hende di bo pasado ta librábu for di un duda. E pas ta bolbe reina den bo bida e dia di awe, pero trabou fuerte ta perdurá. 15,03,10.

LEO: Evitá na eksplotá pa kosnan ku no tin importansia. Buska rason o rais di e problema i resolvé pa e no sigui krese. 28,01,25.

VIRGO: Awor bo tin ku lucha fuertemente pa reskatá e amor o e amistat di e hende tan spesial i pa e poder mental i astusia pa sali for di tur reto. 25,09,08.

LIBRA: Tuma un deskanso di e preokupashonnan, relahá i separá tempu pa dibertíbu. Kibra ku kosnan emoshonal ku no ta hasíbu nada bon. 13,17,29.

SKORPION: Kibra ku e kadenanan lastimá o kompashon. Hasi kontakto ku bo poder i riska tur kos. Den amor tur kosnan bon i malu ta kaba. 21,07,33.

SAGITARIO: Proponébu pa hasi di kada dia unu úniko, bo por hasi e diferensia den bida di otro persona. No stanka e miedu o desishon. 41,15,02.

WILLEMSTAD - Ku un akto seremonial simpel, Servisio di Agrikultura, Krio di Bestia i Peskeria (LVV) a hasi entrega ofisial ayera tardi di e “slipway” na piskadónan di Boca Sami. Ku e “slipway” aki, e piskadónan tin mas fasilidat pa atendé ku nan boto.
Un “slipway” ta e konstrukshon di betòn ku ta sirbi pa tantu baha e boto komo saka e boto for di laman.
Mester bisa ku tabatin un pista kaba ku tabata sirbi komo “slipway” pero tabata nesesario pa ekstendé esaki.
A ekstendé e pista ku 9 meter, segun Pablo Burgos, kolaboradó di maneho di LVV a duna di konosé.
E proyekto tabata den man di e kontratista Curacao Industrial Diving i a kosta alrededor di 150 mil florin.
En realidat piskadónan tabata hasi uso di e slipway” pa algun dia kaba, pero ayera tabatin e inougurashon ofisial.
E proyekto a ser konstruí ku un base hopi sólido: a usa plachi di heru basta fuerte komo fundeshi di e pista.
Ainda falta algun detaye pa finalisá e trabou na e “slipway”, trabounan ku lo tuma lugá riba término kòrtiku.
E piskadónan tabata kontentu ku e trabou. “Pempi” Constancia, un dje piskadónan konosí na Boca Sami tabatin palabra di elogio pa gobièrnu, pa e forma ku a atendé e proyekto.
E proyekto ta forma parti di e programa di gobièrnu di Kòrsou pa drecha playanan di piskadó aki na Kòrsou.
Manera ta konosí, resientemente a hasi entrega di e playa di piskadó na Rif, kaminda a hasi e laman mas hundu. Esaki ta pone ku piskadónan no tin nodi di warda ora awa ta haltu pa nan sali òf drenta ku nan boto.

WILLEMSTAD, - Servisio Arbeidszorg (DAZ) ta trahando duru pa eliminá e retraso ku tin den otorgamentu di pèrmit na persona i kompanianan ku a hasi un petishon pa esei. Ta bon pa bisa si, ku no tin un retraso di 3 mil petishon den dunamentu di pèrmit, asina Christina van der Biezen, hefe apuntá temporalmente enkargá ku reorganisashon di DAZ, a anunsiá ayera tardi durante un enkuentro ku prensa.
LA PRENSA resientemente a dediká hopi atenshon na e problemátika aki, tambe den relashon ku e kòntròl ku outoridatnan ta ehersiendo último tempu pa determiná si tin empresa ku ta empleado trahadó ilegal.
Christina van der Biezen, ku algun luna pasá a keda apuntá pa remplasá Randolph “Dois” Gijsbertha pa trese un kambio den e rumbo ku e servisio tabata bayendo.
Van der Biezen a bin ta traha duru riba e situashon ku el a haña, asina el a indiká.
El a bisa ku tin diferente aspekto di maneho ku e servisio ta trahando riba dje aworakí pa drecha produkshon di DAZ.
Un dje kosnan ku ta traha riba dje ta e parti di outomatisashon. Unabes ku esaki ta tras di lomba – e ta kanando den bon direkshon – lo hasi posibel pa duna servisio di otorgamentu di pèrmit muchu mas rápido.
Tambe t’asina ku DAZ ta trahando riba institushon di un “Client Service Center”. Un sentro asina’ki, segun Van der Biezen, tin bentaha tantu pa e kliente komo pa e trahadónan di DAZ mes. E ta nifiká ku e kliente ta haña servisio den un ambiente muchu mas agradabel miéntras ku pa e empleado mes, e ta nifiká un adelanto den su forma di traha.

WILLEMSTAD, - Refineria Isla ta bai tuma medida pa redusí polushon ku sigur un 30 porshentu, kompará ku loke tin aworakí. Esei abogadonan di e refineria a splika Korte ayera durante tratamentu di e kaso en kuestion.
E kaso ta kontinuashon di un lucha ku habitantenan den e área pabou di e instalashonnan aki ta hibando pa basta tempu kaba pa pone e refineria kumpli ku normanan di medio ambiente.
Anteriormente, e mesun Bijleveld aki a bisa enfátikamente ku e senario kaminda ta sera e refineria mester subi mesa komo un senario hopi serio i realista, si resultá ku Refineria Isla no por kumpli ku loke ta spera di dje i loke por sierto e mes a bai di akuerdo di lo kumpli kuné.
E kaso ayera a bolbe pone dede riba e herida, esta ku e refineria ta kousando un polushon ku ta inaseptabel.
E preshon riba Refineria Isla i riba gobièrnu di Kòrsou pa pone Refineria Isla kumpli ku stipulashonnan den su pèrmit di molèster pa loke ta norma d medio ambiente, kada dia ta birando mas grandi.
Manera nos a publiká djasabra último, sekretario di estado Ank Bijleveld a menasá entretantu ku si Kòrsou no kumpli, mester paga bèk e montante ku Hulanda a pone disponibel pa kumpra aparato pa garantisá un medio ambiente sano.
Abogado Sandra van het Veld a konfirmá den un entrevista na Radio Nederland Wereldomroep ku Isla a primintí ku e ta bai tuma medida.
Pero mester bisa ku no ta aworakí ta halando atenshon di e refineria ku kos no por sigui asina’ki, el a bisa.

AMSTERDAM / WILLEMSTAD, - Korte lo dikta sentensia mañan den e kaso ku un grupo di empresa den sektor di horeka a entamá pa eliminá e prohibishon pa huma den negoshi, un prohibishon ku por sierto a drenta na vigor awe.
“Stichting Red de kleine Horecaondernemer” a entamá e kaso aki kontra gobièrnu. E ta representá komo 300 negoshi, hopi di nan sin personal pa sirbi.
E fundashon ke pa gobièrnu hasi un eksepshon pa e tipo di negoshi aki riba e lei ku ta prohibí humamentu.
Manera nos a informá ayera kaba, den forma ekstenso i amplio, sektor di horeka a pone un fin na e periodo kaminda por a huma sin restrikshon tur kaminda.
Pa tuma despedida di e periodo aki, humadónan rònt Ulanda a probechá di vários festin chikitu ku negoshinan a organisá kaminda tur humadó por huma bai gol.
Den diferente negoshi na tur parti di e pais, tin aktividatnan kaminda esnan ku ta huma por probechá i huma manera nan haña ta bon, tanten ku por ainda.
Tin hotèl, kafetaria, sentronan kultural i sentronan di dibertishon ku ta organisando aktividat pa tuma distansia di tantu sigaria komo sigá.
Manera ta konosí, e desishon di gobièrnu ulandes pa prohibí humamentu den horeka entrante awe 1 di yüli 2008 a kai malu serka esnan ku gusta huma. Tabatin vários akshon pa purba drei e desishon bèk, pero sin éksito.
Tabatin hopi interes serka komersiantenan pa tratamentu di e kaso den Korte.

CARTAGENA, Colombia, - Seguridat fuerte ta kla na siudat colombiano di Cartagena, pa awe risibí kandidato presidensial merikano John McCain.
Mas o ménos 2.000 agente colombiano, ademas di un sifra no spesifiká di agente di seguridat merikano ya ta na sierto punto di e siudat turístiko colombiano.
Tambe e outoridatnan lokal a anunsiá instalashon di vários shen kámara di sirkuito será na lugánan públiko i restrikshon di tráfiko na sierto punto.
Ounke e programa di e polítiko merikano no ta inkluí desplasamentunan grandi n’e siudat, e medidanan di seguridat práktikamente ta inkluí e área urbano kompletu.
Segun Casa de Nariño a anunsiá, presidente di Colombia Alvaro Uribe, lo reuní awe ku e bishitante na Casa de Huéspedes Ilustres di e siudat.
Ta programá ku e senador merikano ta yega e aeropuerto Rafael Núñez huntu ku su esposa i e senadornan Joe Lieberman, demókrata independiente, i Lindsay Graham, republikano.
Un fuente a indiká ku den e enkuentro, Uribe lo eksponé na su wéspet, e supuesto logronan di su polítika di Seguridat Demokrátiko i lo insistí pa Kongreso merikano aprobá e Tratado di Komèrsio Liber (TLC) entre ámbos nashon.
E akuerdo kontrovertido aki, rechasá pa sektornan sosial colombiano, no a keda aprobá, pasobra esnan di Partido Demókrata a eksigí gobièrnu colombiano garantianan den e tema di derechonan humano.

CARTAGENA, Colombia, - Seguridat fuerte ta kla na siudat colombiano di Cartagena, pa awe risibí kandidato presidensial merikano John McCain.
Mas o ménos 2.000 agente colombiano, ademas di un sifra no spesifiká di agente di seguridat merikano ya ta na sierto punto di e siudat turístiko colombiano.
Tambe e outoridatnan lokal a anunsiá instalashon di vários shen kámara di sirkuito será na lugánan públiko i restrikshon di tráfiko na sierto punto.
Ounke e programa di e polítiko merikano no ta inkluí desplasamentunan grandi n’e siudat, e medidanan di seguridat práktikamente ta inkluí e área urbano kompletu.
Segun Casa de Nariño a anunsiá, presidente di Colombia Alvaro Uribe, lo reuní awe ku e bishitante na Casa de Huéspedes Ilustres di e siudat.
Ta programá ku e senador merikano ta yega e aeropuerto Rafael Núñez huntu ku su esposa i e senadornan Joe Lieberman, demókrata independiente, i Lindsay Graham, republikano.
Un fuente a indiká ku den e enkuentro, Uribe lo eksponé na su wéspet, e supuesto logronan di su polítika di Seguridat Demokrátiko i lo insistí pa Kongreso merikano aprobá e Tratado di Komèrsio Liber (TLC) entre ámbos nashon.
E akuerdo kontrovertido aki, rechasá pa sektornan sosial colombiano, no a keda aprobá, pasobra esnan di Partido Demókrata a eksigí gobièrnu colombiano garantianan den e tema di derechonan humano.

Avila Hotel ta invertí fuertemente den rekapasitashon di su personal

WILLEMSTAD - Maintenance supervisor di Avila Hotel sr. Stephen Pietersz (42) lo sali dia 2 di yüli próksimo pa Estádos Unídos kaminda e lo asistíí, pa un periodo di dos siman, na dos kurso riba tereno di hospitality management na e prestigioso Cornell University na Ithaca, New York.
E gastunan enbolbíí ku partisipashon di Pietersz n’e kursonan aki, lo ser parsialmente kubríí dor di Avila Hotel i e Asosashon Karibense di Hotelnan, CHA, na San Juan, Puerto Rico kual Avila Hotel ta miembro di e asosashon regional aki.
Pietersz, ku pa dies aña kaba ta enkargá ku supervishon tékniko na Hotel Avila, ta un di e sinku empleadonan ku den un periodo relativamente korto, a bin na remarke pa sigui algun kursonan spesialisá den eksterior den sektor hotelero.
Ku esaki Avila Hotel a mustra di ta dunando hopi prioridat na (re)kapasitashon di su personal, pa asina alsa nivel di su servisio, sigur awor ku e kantidat di turistanan ku ta bishitando nos isla a bin ta oumentá últimamente.

WILLEMSTAD – Durante henter e luna di yüni, OneNet ADSL huntu ku shete rebendedó di OneNet, a brinda pueblo di Kòrsou un tremendo kampaña kaminda klientenan por a gana premionan atraktivo tur siman i na final un premio grandi. E ganadó di e premio grandi aki di OneNet a bira sra. Sharmela Brooks.
Durante e kampaña aki klientenan ku a apliká pa OneNet ADSL òf pa un pakete di OneNet ku kòmpiuter na un di e shete rebendedónan di OneNet, a risibí un lòt pa gana asesorionan atraktivo tur siman. E shete rebendedónan aki ta: 3D Zone, Tapirama, Cash-Comm, Better Deals, COPACS, PConnection i Cell Access. Na final di e kampaña aki, sra. Sharmela Brook a bira e felis ganadó di e premio grandi ku ta un pakete di:
- Onenet ADSL grátis pa 6 luna
- Pakete di telefon Chippie
- ANG. 50.00 di krédito na yamada riba su Chippie pa 6 luna
Riba e pòtrèt por mira sra. Brooks, den kompania di Fayna Haseth, relashonista públiko di UTS i sr. Roy Huggins, representante di Better Deals, risibiendo su premionan.
Riba e otro foto, por mira e rebendedónan den kompania di Fayna Haseth i te na man drechi, sr. Ramsey Betorina, Channel Officer ICT di UTS.

WILLEMSTAD - Springplank ta un skol spesialmente pa alumnonan stranhero entre 12 i 18 aña. E hóbennan ta keda mas o ménos un aña na e skol akí pa siña ulandes, papiamentu i sera konosí ku e sistema síviko di Kòrsou.
E aña akí e alumnonan a tuma despedida di henter e tim presente. Riba pòrtrèt nos ta mira yùfrou Elisabeth Hollander rondoná pa su alumnonan. Yùfrou Elisabeth a traha mas tantu aña ku tur otro na e proyekto aki. Springplank ta sigui ku un tim nobo, bou di guia nobo. (Foto: Eugenio Koeiman.)

WILLEMSTAD - Resientemente SGR-Groep (Fundashon pa kuido di hende ku un limitashon i Revalidashon) a saka promé edishon di e revista "Mayor Informashon". E publikashon aki, kua ta kompletamente na Papiamentu, ta spesialmente pa mayornan i kuidadónan di klientenan di SGR-Groep.
Meta di e revista aki ta pa envolví e mayornan mihó, teniendo nan na altura di desaroyo nobo den kuido i na SGR-Groep.
Djaluna mainta señora Dulce Goedgedrag, komo patron di SGR-Groep, a risibí un eksemplar for di man di direktor general di SGR-Groep, Ed Eleonora, den presensia di gobernador Frits Goedgedrag.

WILLEMSTAD - Komishon Dia di Bandera i Fu.De.Ka. por mira bèk riba un tremendo Nochi Karibense riba Brionplein djasabra último.
E aktividat a konta ku presensia di un públiko enorme den kua e diferente gruponan ètniko biba aki na Kòrsou, e ambiente tabata unu hopi sosial.
Asin’aki a kana unu, unu pa yega e dia grandi esta djarason 2 di yüli, Dia di Bandera.
E dia ta kuminsá ku e parti ofisial mainta i for di 12or di mèrdia te 10or di anochi i lo bai tin un tremendo show variá riba Brionplein.
E dia aki ta dediká na nos dushi isla Kòrsou i su kultura. Lo bo bai tin oportunidat di tende kansionnan dediká na nos Isla i riba un pantaya grandi disfrutá di algun bunita paisahe di nos isla. Lo bai tin pòtrètnan ku lo pone un i tur rekordá.
Fu.De.Ka. kier a gradisí BAB, Amstel, Maduro & Curiel’s Bank, Licores Maduro i U.T.S. pa nan koperashon patriótiko.
Tambe tur e diferente gruponan ètniko aki na Kòrsou, nos artistanan ku a kontribuí en grande e aña aki.
Un regalo pa Kòrsou, 10 ora di show sosial/kultural kompletamente Grátis, riba Brionplein.
No tin un manera mas mihó pa sera e dia di selebrashon aki. Pueblo di Kòrsou, nos ta konta ku boso presensia !

Konkurso pa mira kua bario ta sali esun mihó den selebrashon

WILLEMSTAD – Komishon Selebrashon Dia di Bandera e aña aki a opta pa promové selebrashon di Dia di Bandera di un forma mas profundo den nos barionan. Huntu ku Servisio pa Kultura i Edukashon a logra trese un inovashon di sumo importansia.
Den e kuadro aki a skohe pa introdusí un konkurso entre barionan pa mira kua bario ta sali esun mihó den selebrashon di Dia di Bandera. Alabes ta spera ku e aktividatnan aki lo surti komo resultado ku ta alsa nivel i kalidat di selebrashon di dia di bario en general i otro eventonan kolektivo en partikular.
Manera ta konosí a bira tradishon ku despues di e aktividatnan ofisial ku ta tuma lugá riba Plasa Brion, tin algun bario ku pa algun aña ta okupando nan mes ku e tarea importante aki di brinda aktividatnan ku ta yama i kapta atenshon di un públiko grandi. Te ku awor gobièrnu tabata sostené algun di e barionan aki finansieramente.
Ta trata aki di barionan ku ta brinda aktividatnan di un karakter sosial kultural ku ta kuadra ku e evento tan importante aki. Por menshoná Fundashon Adelanto Rooi Santu (den e bario Rooi Santu), Bisiñanan Kontentu den Bònt (konsentrando den e área di Bònt / P.L. Jansenstraat-Oranjestraat), na Kas Grandi e área rondó di e kompleho deportivo i Barber Parke Himno i Bandera .
No opstante e aktividatnan aki, Komishon Selebrashon di Dia di Bandera ta di opinion ku e aktividatnan di Selebrashon di Dia di Bandera ainda ta poko; komo tal a yega na e konklushon ku mester hasi mas esfuerso pa krea otro aktividatnan espektakular rondó di e suseso tan esensial aki. Bandera ta un símbolo nashonal masha importante mes.

WILLEMSTAD – Djaweps 26 di yüni tras di lomba, KPMG a hasi donashon di e revista Nicky & Nick na 205 alumno di grupo 5 te ku 8 di Kolegio Maria Auxiliadora.
KPMG a hasi e donashon aki, pa motibu ku durante nan apertura di edifisio nobo na Emancipatie Boulevard, KPMG a adoptá e skol aki, esta Kolegio Maria Auxiliadora.
Ya KPMG a realisá vários donashon na e skol aki, manera a sòru pa e muchanan di e skol aki selebrá fiesta di Pasku ku un desayuno, fiesta di Sinterklaas, a sòru pa un “speeltuin” na e skol, mashin di kopia i tambe materialnan di skol edukativo.
Durante e fakansi ku a kaba di kuminsá, KPMG a sòru pa 205 alumno di e skol aki risibí e revista edishonnan 1 i 2 di Nicky & Nick.
Nicky & Nick ta un revista na ulandes ku historianan, kustumbernan i aktualidat ku ta biba aki na Kòrsou.
Esaki tabata motibu ku KPMG a skohe pa e revista aki ku nan meta ta edukashon di hóbennan. Nicky & Nick ta kumpli ku e metanan aki. spesialmente kaminda ku KPMG ta para pa stimulá lesamentu bou di mucha. P’esei KPMG a skohe pa e lema ‘sigui lesa den fakansi’ i a hasi donashon di e revista na e skol aki.
Riba e foto por mira Saskia Prince di KPMG hasiendo entrega na un di e alumnonan di Kolegio Maria Auxiliadora.
Riba e otro foto karanan kontentu pa ku e donashon ku KPMG a hasi djaweps 26 di yüni tras di lomba. Riba e pòtrèt por mira huntu ku e muchanan, Saskia Prince, Jelmar Simon, Valery Maria, Direktiva di Kolegio Maria Auxiliadora Marlene Kierindongo, Ilse Lobato i tambe Patricia Fuenzalida di Nicky & Nick.

W’STAD/O’STAD - Dia di Bandera di Kòrsou e aña aki tambe a keda selebrá na Aruba dor di yunan di Kòrsou bibá na Aruba.
E aña aki e konsentrashon tabata mas dirigí riba patriotismo i un biaha mas a invitá Grupo Oba pa trese bailenan Kultural den hotèlnan na Aruba, e.o. Renaissance Resort and Marketplace i Costa Linda.
Djadumingu 29 di yüni e selebrashon grandi mes a tuma lugá na San Nicolas kuminsando ku un santu sakrifisio di misa pa bendishon i protekshon pa pueblo di Kòrsou.
Seguidamente grupo Oba a wapa di misa bai e stashon di parker outo di Wema, kaminda a hisa bandera bou di himno di Kòrsou i naturalmente presentashon di grupo Oba, ku bailamentu di seú, wals i tumba.
E públiko presente a gosa un bòl i pa 25 aña di Dia di Bandera, Grupo Oba lo keda invitá pa huntu ku mas grupo di Kòrsou trese un tremendo shou.
“E públiko a keda masha kontentu i nos mes tambe a keda satisfecho ku e shou” asina Zugheila Lindeborg di Renaissance Marketplace a deklará na prensa Arubano.
Pabien na Grupo Oba i yunan di Kòrsou biba na Aruba pa un tremendo demostrashon di patriotismo.