WILLEMSTAD -- Ainda gobièrnu di Kòrsou no a tuma desishon si ta bai duna e kompania di aviashon American Airlines garantia, pa asina e kompania mantené e dos vuelonan diario ku e tin entre Miami i Kòrsou, asina Billy Jonckheer di Chata a duna di konosé.
Aktualmente tin un komishon di airlift konsistiendo di entre otro Chata, CTB, Curaçao Airport Holding i Curaçao Airport Partners ku ta deliberando. Si nos tuma desishon ku no ta duna garantia mester karga e konsekuensia di e bahada di merkado merikano, ku ta unu hopi importante. Na Washington kaminda sr. Jonckheer a sali resientemente, tur isla den Karibe a konfrimá ku kompanianan di aviashon ta pidi garantia den e situashon di preis di petroleo aktual.
Asina sr. Jonckheer reakshoná riba deklarashonnan di minister di Telekomunikashon ku a bisa for di Bahamas ku American Airlines a pidi un suma, pero e ta kere ku no ta prudente pa duna e suma, pasobra si algu bai malu gobièrnu ta pèrdè su plaka. Adriaens a bisa, ku gobièrnu ta na mesa ainda, pasobra e vuelonan ta yen pues de fakto no ta prudente pa baha e kantidat di vuelonan. Mas aleu e Minister a bisa, ku Inselair ku tin intenshon pa kuminsá bula e destinashon lo haña tur sosten nesesario di parti di gobièrnu, p’asina aliviá e bahada di vuelonan di American Airlines for di merkado merikano. Adriaens ta kere, ku mester wak merkadonan nobo manera Brazil i Mexico.
Di su banda sr. Jonckheer a bisa, ku e industria merikano a proba su mes, ta un industria ku a generá 700 mion na divisa. Mester tene masha kuidou na tomo di desishon, pero mester tuma un desishon mas lihé posibel, ya ku American a duna un deadline di promé di ougùstùs, p’asina nan tambe por planea nan vuelonan riba e destinashon. Mester tene kuenta ku gastunan pa e destinashon ta haltísimo i esei nos mester wak. Motibu prinsipal ta gastunan pa kompanianan di aviashon manera Air Traffic Control i Aeropuerto. Si nos kier turismo komo prioridat, mester evaluá esakinan, ya ku e krísis ta pa henter Karibe. No mester lubidá, ku nos tin ku prepará pa otro merkadonan tambe kaminda nan tin destinashon si ta dispuesto pa traha ku nan. Ta trata aki di un negoshi refiriendo na e disponibilidat di gobièrnu pa yuda Inselair. Ta Kòrsou mester sali mihó benefisiá. Inselair ta un kompania antiano importante ku ta bula na nos interes. Un biaha mas, nos mester wak kiko ta sali Kòrsou mas benefisioso, kual sea e kompania ku nos kier yuda.

WILLEMSTAD – Si minister pa Asuntunan Ekonómiko i di Labor, Elvis Tjin Asjoe no por kumpli ku parlamentu di Antia riba adaptashon di sueldo mínimo, e lo mester saka su konklushon. Asina lider di UPB Ramonsito Booi a bisa relashoná ku e diskushonnan ku lo kuminsá awe den parlamentu di Antia riba e inisiativa di lei pa adaptá sueldo mínimo ku 15 porshento. E reunion públiko di Staten pa kua a pidi Staten pa bin bèk for di fakansi a keda di kuminsá den kareda di 3’or.
Booi a bisa, ku e minister di UPB a basa su opinion riba su responsabilidat kaminda Banko Sentral ta dun’é sierto indikashon kon mester atendé ku e punto di oumento di sueldo mínimo ku 15%, ku ta un punto hopi delikado pa ekonomia i kon pa mantené ritmo di ekonomia. Minister Tjin Asjoe sinembargo ta insistiendo riba un adaptashon di sueldo mínimo den fase. “E minister, kargando su responsabilidat, ta pidi koutela i ta bisa ku e lo no stroba. Pero e mes ta preferá e proposishon di Banko Sentral pa oumento di 8% den fase i evaluá i ahustá esaki. Esaki ta loke e, esta Tjin Asjoe, ta para p’e. Finalmente den polítika ta Parlamento ta manda i si e bira un punto di prinsipio pa e minister, esaki lo mester saka su konklushon”, asina Booi a deklará. Por lo demas e minister a indiká sufisientemente kla, ku e no ta bai stroba implementashon di e oumento di 15%. Pues esaki lo no mester ta un problema, segun Booi. Booi a bisa, ku komo isla, Boneiru ta para tras di e oumento. “Pero mester bisa ku tin sierto areglonan den negosiashonnan ku Ulanda i basá riba esei e ta kere ku ekonomia ta di isla i kada isla lo mester skohe e tempu i ora ku e ta haña ta apropiá pa trese e kambionan aki den su ekonomia”.

WILLEMSTAD – Pa motibu di e mesun leshon leve, ku Churandy Martina tin i riba konseho di dòkter, Churandy Martina i su tim, a disidí awe di no partisipá tampoko na e Golden League di Paris.
Otro siman lo hasi un otro chèkup médiko pa wak si e por bai Stockholm i Monaco manera tabata planifiká.

NEW YORK – Un flai di sakrifisio di e shortstop di Rangers, Michael Young a pone ku Liga Amerikana a logra nan di 12 triunfo konsekutivo riba Liga Nashonal ayera den e último All-Star Game den Yankee Stadium di 85 aña.
E wega a kuminsá djamars anochi i a bin terminá 37 minüt pa 2 di mardugá di djarason ora ku Justin Morneau a slaid seif na home riba e bataso di Young. E partido a dura 4 ora i 50 minüt.
Ta bon ku e partido a terminá ya ku niun di dos tim no tabatin picher mas den nan bullpen.
Liga Nashonal promé ku wega a haña un “pep talk” serka e èks shortstop, miembro di Salon di Fama, Ernie Banks.
Morneau a habri e di 15 ining ku un sensio kontra di e picher pèrdèdó Brad Lidge. Despues di un out Dionner Navarro tambe a konektá di hit. J.D. Drew ta risibí base por bola pa yena base.
Michael Young ta konektá flai pa right ku Corey Hart a realisá un tiru basta fuerte pa home ku a bòns na dos okashon i un tiki banda di e liña di primera.
E kècher Brain McCann a trata un “sweep tag”, pero Morneau su pia drechi a drenta promé na home i e chief empayer Derryl Cousins a dekretá seif i Liga Amerikana por a sali selebrá.
“E bataso tabata un tiki profundo p’ami. Mi a trata di realisá un tiru mas serka posibel”, asina e right fielder Corey Hart a bisa.
Ku e viktoria aki Liga Amerikana awor tin rèkòrt di 6-0 for di dia ku e viktoria ta determiná “home field advantage” den Seri Mundial i rèkòrt di 10-0 i un wega empatá for di 1996.

NEW Y ORK – Bob Gibson tabatin un smail riba su kara ora ku e tabata zuai e miles di fanátikonan ku tabata pará kantu di kaminda i sakando pòtrèt di e miembronan di Salon di Fama ku tabata pasa den kayanan di Manhattan promé ku e wega di ayera.
Yogi Berra, George Brett i algun 40 otro miembro di Salon di Fama tabata sintá patras den algun pickup lombrá durante di e proseshon ku a dura dos ora.
Bob Feller ta kòrda e promé wega di All-Star ku a tuma lugá den Yankee Stadium na 1939. komo un hóben di 20 aña Feller a tira 3-2/3 di ining pa konservá e viktoria di Liga Amerikana.
Hank Aaron ku tambe tabata den e parada a kombertí su rekuerdonan den Yankee Stadium.
Yogi Berra i Whitey Ford tabata sintá huntu.
Robin Young i Paul Molitor tambe a kore huntu kòrdando nan dianan den Milwaukee Brewers.
Goose Gossage i Dick Williams tambe a haña nan aplousonan.
Sigur tabatin hopi hende pa saka pòtrèt di e èks peloteronan aki durante di e ruta.

WILLEMSTAD, E konosido Jack Warner, kende ta presidente di Caribbean Football Union i alabes vise presidente di FIFA ayera a yega Kòrsou.
E lo permanesé na Kòrsou pa solamente algun dia, p‘asina hasi e anunsio ofisial di e kampionato di futbòl Karibense ku ta inisiá e aña aki na Kòrsou.
E personahe aki a wòrdu bon risibí pa representantenan di NAVU i di Digicel Kòrsou.
El a bisa di ta masha kontentu di por ta presente na Kòrsou pa un okashon asina importante.
Awe mainta Digicel Kòrsou huntu ku NAVU i CFU lo sinta huntu durante un konferensha di prensa pa por anunsiá e kampionato ku e aña aki ta start sali e luna aki ainda.
Por apresiá momento ku Jack Warner a yega ayera na aeropuerto.

WILLEMSTAD - Ku satisfakshon BONECO, e sindikato ku ta representá trahadónan den sektor di komersio a tuma nota di último desaroyonan relashoná ku oumento di salario mínimo. Segun Erwin Koense, presidente di BONECO, e ta kontentu ku awor a lo ménos nos parlamentarionan ta lanta for di soño i ta bira kara pa e klase trahadó. ‘Pasobra den BONECO nos no ta wak solamente e hendenan ku ta traha den komersio, pero tambe e grupo grandi di hende ku ta duna servisio.
Koense a splika, ku BONECO ta sigui e desaroyo enkuanto salario mínimo hopi di aserka. Den seno di direktiva i delegadonan a analisá e tópiko.
Refiriendo na e sueldo mínimo, Koense a splika, ku ta trata aki di un pago ku doño di trabou ta duna minimalmente na un trahadó. Boneco ta insistí sinembargo, ku tan pronto posibel mester mester yega na un momentu ku por determiná kiko un trahadó tin mester pa por eksistí komo hende.
Mas aleu Koense a sigui bisa, ku tin dos interpretashon di salario mínimo, un ta e pago mínimo di sueldo i e otro ta e derecho di eksistensia di e trahadó. E bosero di BONECO a sigui bisa ku mester sali for di un realidat ku e trahadó no ta traha pa e so, pero e tin un ambiente sosial, unda ku su miembronan di famia tambe ta kompartí den esaki’. Tin doño di trabou ku no ta realisá esaki, pero tin si ku ta duna balor na e balor humano, Koense a bisa.
Ademas e kosto di bida a bira asina altu i esun di mas di debil ta haña e sla di mas duru. Na hopi okashon, doñonan di trabou ke deshasí di e responsabilidat pa realisá kiko un trahadó tin mester minimalmente pa e por biba, segun Koense.

Despues di 6 luna e trahadó lo no ripará mas ku el a haña oumento!

WILLEMSTAD – Miéntras ku awe parlamento ta trata e oumento di sueldo mínimo, Asosashon di Komèrsio i Industria, VBC, ta insistí riba su alèrta, ku e oumento di 15 porshento no mester tuma lugá sin mas. Si esaki tuma lugá tòg, denter di algun e efektonan di un oumento lo no ta riparabel mas pa e kobradó di sueldo mínimo. Asina presidente di VBC, Bas Kooyman a splika.

‘Ta hopi importante pa sa, ku VBC no ta kontra di subida di sueldo mínimo. Nos ta kere ku en bèrdat gastunan na Kòrsou a subi barbaramente i ku mester bin un kompensashon’. Asina Kooyman a bisa, indikando sinembargo ku e pregunta grandi ta, kon haltu e kompensashon pa sueldo mínimo mester bira i den ki forma e mester wòrdu introdusí.
VBC ta mustra riba e hecho, ku na komienso di e aña aki kaba tabatin un adaptashon di 3 porshento pa kompensá e subida di gastu nan di aña 2007. Ademas, segun Kooyman, gobièrnu ta usa e argumentu ku Fondo Monetario Internashonal, IMF, tambe a sugerí ku mester subi e sueldo mínimo. En bèrdat IMF a sugerí esei, pero segun Bas Kooyman, IMF no a menshoná e montante i a bisa ku esaki mester bai den kordinashon ku e partnernan sosial.
Nada di gobièrnu
VBC komo partner sosial no a tende nada di gobièrnu, ni tampoko a wòrdu konsultá relashoná ku e asuntu di oumento di sueldo mínimo. VBC ta lamentá ku parlamentu di Antia, ta disidí unilateralmente pa Kòrsou. ‘Miéntras ku gobièrnu di Kòrsou a proponé 5 porshentu di oumento i Banko Sentral 8 porshentu. ‘Nos no tin problema ku ningun altura di oumentu, pero sí ku e hecho ku medidanan no ta wòrdu kompañá ku otro medidanan ku por hasi, e efektonan negativo ménos. ‘Si no tuma e otro pasonan riba término kòrtiku, esnan ku ta haña 15 porshentu èkstra, aki seis luna lo no por komprondé dikon nan no por hasi ménos ku nan sèn’.

WILLEMSTAD - Diputado Humphrey Davelaar a atendé e problemátiko di falta di likides di CEMS den Bestuurscollege. Davelaar a haña aprobashon di Bestuurscollege pa gobièrnu paga salario di trahadónan di CEMS, fin di yüli. Pa loke ta trata e pago pa ougùstùs i sèptèmber, e diputado a informá e direktor Sharlon Melfor, ku e ta trahando riba esei tambe.
Den e kuadro ei e ta sperando pa e ouditorio keda kla, pa e bai bèk Bestuurscollege pa nan analisá e konsehonan pa tuma un desishon struktural pa futuro di kuido di ambulans na Kòrsou.
Melfor a ekspresá su satisfakshon pa e forma ku gobièrnu ta atendé ku e problema di CEMS i ta buskando un solushon.
Den un kombersashon ekstenso ku LA PRENSA, Sharlon Melfor a splika ta kon e situashon finansiero di CEMS a desaroyá último añanan. E orígen dje problema ta sintá den e diferenshanan di tarifa ku tin entre di teritorio insular i SVB. Na aña 2000 gobièrnu a independisá servisio di ambulans. El a hasi esei bou di e struktura di tarifa. Gobièrnu a stipulá tarifa pa ambulans ku ta 915 florin pa karedanan di emergensia i 458 florin pa karedanan di pedido. Na aña 2000 Gobièrnu Sentral riba proposishon di SVB, a stipulá su propio tarifa. Esei ta 138 florin pa un asina yamá ‘bestelrit’ i 275 florin pa un kareda di emergensia. Relashoná ku e desishon aki CEMS a kere ku e por haña rason den korte. Konsekuentemente CEMS a entamá un kaso kontra di SVB, ku a bai resultá den korte superior.

WILLEMSTAD – Federashon di Beisbòl di Kòrsou tin un reunion general ekstraordinario awe nochi pa 7’or den sala di reunion na SSK
Delegadonan pa e reunion mester yena e dokumento di apoderashon firmá pa miembronan di direktiva di e respektivo ekiponan miembro.
Direktiva di FeBeKo ta konta ku presensia di su miembronan.

ARIES: Bo prioridat awor ta ser komplasé. Ta un di e dianan pa mimábu, baña dushi asina i estrená bistí bunita i bai un salon di beyesa. 15,32,07.

TAURO: No pone bo amor na prueba. Ta eksistí na e momentunan aki instabilidat den bo relashonnan. Evitá kosnan desafiante di bo pareha. 06,04,33.

GEMINIS: Ya bo sa loke bo ke, unda bo ke yega i kon kosnan lo sigui bai. Bo ta dibertí awor i superá opstákulonan i resolvé problemanan. 18,25,26.

KANSER: Bo ta sinti bo mes ku deseo di selebrá bida. Hasi tur lo posibel pa libra bo mes di e lokual ku ta molestiábu. Kibra ku rutina. 25,12,09.

LEO: Sali, dibertí i kompartí e dianan aki. Tur loke ta relashoná ku bo bida sosial ta agradabel. Envolví bo mes den aktividatnan na aire liber i mantené bo plan di dieta i ehersisio.

VIRGO: Ounke bo tin hopi kompromiso, no ta falta e energia nesesario pa logra loke bo ta proponé. Bo ta rekuperando di enfermedat i bo ta rekobrá bo energia rápidamente.

LIBRA: Bo pashon i deseonan ta hopi fuerte i ta eksigí hopi di bo pareha. No proboká guera. Abo na bo manera di komportá por hiba e mensahe kiboká. 27,13,02.

SKORPION: Algu ku ta parse stanká, ta kobra bida nobo i ta lanta bo interes di nobo pa realisá esei. Nan ta sosodé den e tempu planiá, pero poko poko. 31,08,25.

SAGITARIO: No laga ku personanan pesimista ta kita bo aspirashonnan. Bo tin tur kos na bo fabor pa triunfá, den e momento presente. 04,08,30.

WILLEMSTAD - Asosashon di Komersio i Industria VBC no tin nada kontra un oumento di sueldo mínimo. Pero manera nos a bisa na numeroso okashon kaba, e oumento aki mester ta kompañá ku medidanan pa drecha nos posishon kompetitivo i nos klima di invershon.
Bas Kooyman, presidente di VBC a ripití e posishon aki, na bispu di tratamentu di e lei pa oumentá sueldo mínimo ku 15 porshento.
Manera e kartanan ta riba mesa, e oumento aki lo pasa parlamentu den kurso di awe.
Segun Bas Kooyman, na e okashonnan aki semper ta bon pa para ketu ki efekto un medida asin’aki lo por tin pa pais i pa su ekonomia.
“Mi ta kere ku nos tur ta di akuerdo ku otro, ku loke nos ke hasi ta yuda esnan den mas nesesidat. Pero nos mester paga tinu pa nos no ta tumando akshonnan ku al final lo perhudiká hustamente esnan ku nos ke yuda awor aki,” Kooyman a bisa.
El a rekòrdá ku na momentu ku subi kosto di hasi negoshi pa komersio, esaki tin su reperkushon pa esnan ku no tin un trabou fiho, pero e tin konsekuensia tambe pa esnan ku no tin trabou mes.
Fondo Monetario Internashonal, resientemente a konstatá ku ekonomia di Kòrsou ta bayendo bon, pero ku mester tene kuenta pa tuma desishonnan ku por stroba e desaroyo aki. FMI a bisa ku e no tin problema ku un oumento di sueldo mínimo, pero ku gobièrnu den esaki mester sinta huntu ku partnernan sosial pa yega na un pakete di medida balansa.
“Nos ta lamentá ku te awe, gobièrnu no a hasi esaki. No a aserká nos i otro partnernan pa diskutí e kondishonnan bou di kua ta oumentá sueldo mínimo. Esei ta di lamentá, pasobra nos ta kere ku bo mester kompañá un desishon asin’aki ku otro medidanan ku ta drecha nos posishon kompetitivo di pais,” segun e presidente di VBC.

WILLEMSTAD - Nos a tende semper krítika for di diferente ángulo, ku nos ekonomia no por karga un oumento di sueldo mínimo ku 15 porshento awor aki. Pero un análisis ta mustra ku e oumento aki ta representá apénas 0.7 porshento di e total di 3.5 porshento di kresementu di nos ekonomia.
Esei lider di frakshon di Partido Nashonal di Pueblo den Staten mr. Faroe Metry a bisa durante un konferensha di prensa ayera tardi.
Partido Nashonal a konvoká e enkuentro ku prensa, pa enfatisá ku e proposishon pa un oumento di sueldo mínimo a originá serka e partido bèrdè.
Manera nos a informá ayera kaba, awe tardi parlamentu antiano, no opstante ku awor aki tin reses, lo bin huntu pa kaba di atendé i aprobá e lei ku ta regla sueldo mínimo. Tur frakshon entretantu ta para tras di e oumento di sueldo mínimo ku 15 porshento, asina inisiadó di e proyekto di lei Faroe Metry a bisa.
Segun Faroe Metry, dado momentu a parse manera partidonan di koalishon kier a kue e proposishon tene, pero enfátikamente, asina el a mustra, Partido Nashonal a bisa ku e lei ta di parlamento.
El a originá den parlamentu, e lo terminá den parlamento, Metry a indiká. Ku sosten di tur isla i tur frakshon den Staten e lei aki, segun Metry mester pasa.
E parlamentario a bisa ku e no a konsiderá nesesario pa bai tras di e konseho di Banko Sentral pasobra e tabata sigur ku e lo haña sosten pa e 15 porshento.
Na Kòrsou tin komo 8 mil hende ku ta kobrando sueldo mínimo.

NIJMEGEN/WILLEMSTAD - Pa un total di 438 partisipante na e Vierdaagse di Nijmegen, e promé dia di kaminata, tòg a resultá nèt di mas. E kantidat aki a kai afó na kaminda, debí na kansansio i blar na pia, asina e organisadónan a anunsiá ayera nochi.
E Vierdaagse, e kaminata ku ta tuma lugá tur aña na Nijmegen i ku ta hala miles i miles di hende, djamars mardugá a ranka sali e aña aki ku mas di 39 mil hende. Kòrsou tambe, huntu ku otro islanan di Antia – manera tur aña – ta partisipando na e evento aki.
E promé partisipantenan a sali awe mainta 4’or pa un kaminata den Betuwe.
Originalmente tabatin 43.450 hende ku a inskribí pa partisipá, pero un kuater mil i piku finalmente a legumai e idea tòg. Segun e organisashon, ta normal si tur aña ku un 10 porshento di esnan ku inskribí, ta kai afó na último momentu. E organisashon ta haña esei tòg algu di lamentá.
E organisadónan a papia di un promé dia ku a kana den forma maravioso. E partisipantenan por a konta riba un tremendo wer, ku a keda fresku i alabes tabata seku. Esei mes a pone ku mayoria di esnan ku a kana, tabata for di tempran bèk na kuminsamentu.
Krus Kòrá tabatin un dia basta trankil.
Tradishonalmente tin partisipante di e islanan di Antia atrobe.
Manera LA PRENSA a informá ayera kaba, di Kòrsou tin entre otro Rensley Victoria, kende a bisa ku su partisipashon tin mas aden ku simplemente kana so. El a bisa, ku e ke hala atenshon di mas tantu hende posibel riba e situashonnan difísil na Kòrsou, entre otro ku gruponan vulnerabel, esnan di ménos rekurso, hendenan ku un desabilidat físiko i mental i otro situashonnan ku meresé atenshon.

WILLEMSTAD - Un total di 32 mil outomobilista ainda mester paga number di outo pa e di dos mitar di 2008. Pago por kuminsá for di e último siman di yüli, asina hefe di Eilandsontvanger Errol Goeloe a konfirmá.
Produkshon di plachi di number e aña aki a bai ku bastante difikultat.
Manera ta konosí, na kuminsamentu di aña a surgi e problema ku e koló i e konfigurashon di plachi di number tabata asina kompliká, ku e ta hasi kòntròl masha difísil. Prinsipalmente den oranan di anochi ta bira práktikamente imposibel desifrá e plachi di number.
Outoridatnan a reklamá, tur hende tabata di akuerdo ku otro ku e plachi di number no ta un kos práktiko.
Esei mes tabata motibu ku finalmente a desaprobá uso di e plachi i a tuma e desishon ku e plachinan di 2007 mes ta keda na vigor pa 2008. E plachi di kòntròl ku tabata destiná pa henter 2008 a ser usá pa e promé parti di 2008. A disidí tambe, ku ta laga traha steker pa e di dos mitar di e aña aki.
Pero aki tambe a surgi difikultat, pasobra a resultá ku e kompanianan ku a inskribí pa traha e steker, no tabata kumpli ku e spesifikashonnan kompleto manera deskribí den e “bestek”, ku konsekuensia ku mester a desaprobá tur kos atrobe.
A hasi un destaho públiko di nobo, awor e stekernan lo t’ei den e di tres siman di yüli. Ta laga traha 74 mil steker.
Esaki ta nifiká ku den e último siman di yüli, kuminsando di 29, por kuminsá paga number pa e di dos mitar di 2008 na e lugánan di kustumber. Esun ku paga, mesora ta risibí su steker.

WILLEMSTAD/ ROTTERDAM – Tantu e detenidonan komo e wardadónan di prezu den e prizòn di Bijlmer ta mal kontentu ku e maneho nobo. Mas ora den sèl será i ménos ora pa hasi deporte. Prezunan ku no tin nada di hasi, ta bira molestioso i ta kousa tenshon segun e wardadónan di prezu.
Ounke e trankilidat den e Instituto Penitensiario Over-Amstel ta bèk, tòg e prezunan i nan wardadónan no ta di akuerdo ku e régimen nobo. Último simannan e prezunan a protestá kontra e maneho i a nenga di drenta nan sèl bèk despues di a kaba di kue airu. E wardadónan di prezu a splika, ku nan ta preokupá pa nan seguridat i a atvertí ku e situashon por eskalá un momentu pa otro. E motibu di e tenshonnan tabata introdukshon di e régimen di modestia. Entrante 1 di yüni a adaptá e programa di den dia igual ku e normanan lokal pa tur prizòn. Esaki a nifiká den práktika ku e prezunan mester pasa mas tantu tempu den nan sèl i ku tin ménos tempu pa kue airu, rekreá i partisipá na aktividatnan òf programanan di resosialisashon.
E medidanan di ekonomisashon akí ta data for di 2004 i mayoria prizòn a implementá nan hopi tempu pasá kaba, miéntras ku e prizòn di Bijlmer a warda mucha largu pa hasi esaki. Awor ku mester a kuminsá implementá e régimen nobo, esaki a kousa hopi malkontentu. Lo tabata mihó si for di e tempu, gradualmente a introdusí e medidanan, un representante di e bònt pa wardadónan di prezu a bisa. Segun el a splika, Bijlmer su prizòn tin tiki personal pa por karga un programa nobo pa den dia. Tambe e fecha 1 di yüni tabata un poko fèrfelu, ya ku semper den temporada di fakansi e okupashon ta opstákulo.

WILLEMSTAD – E depósitonan den kua D.O.W. ta warda vürwèrk aktualmente riba Seru Loraweg ta bai stòp di eksistí. Aktualmente D.O.W. a anunsiá un destaho públiko pa konstrukshon di fasilidatnan nobo pa den futuro warda vürwèrk.
Ya ta hopi aña kaba ku e kondishon di e kasitanan a deteriorá di tal forma ku a bira iresponsabel pa warda vürwèrk den nan. Na diferente okashon tabatin pregunta di miembronan di Konseho Insular i di Parlamento enkuanto e situashon peligroso na Seru Loraweg. Algun tempu pasá a kuminsá prepará un pida tereno na Chinchó kaminda lo mester a konstruí e depósitonan nobo pa vürwèrk. Pa motibunan deskonosí e trabounan di preparashon a para. Tin indikashon ku tabatin problema ku pèrmit pa konstruí na e sitio.
Sinembargo D.O.W. a sigui ku e prosedura pa yega na un kruithuis nobo kaminda mester por warda vürwèrk entrante próksimo aña. Tin indikashon ku e aña akí ta último bia ku lo usa e depósitonan riba Seru Loraweg.

WILLEMSTAD – Minister di Tráfiko i Komunikashon di Antia Maurice Adriaens ta hañando elogio regional pa su inisiativa pa introdusí Caribbean Internet Exchange na Kòrsou.
“Miéntras otro islanan den Karibe a bin ta papia so, e Minister di Antia aki den korto tempu a bin i ta bai hasié realidat”; asina Ian Blanchard ku ta presidente di CANTO a bisa den kuadro di establesementu di Caribbean Internet Exchange (CAR-IX) na Kòrsou. Riba invitashon di sekretario general di CANTO durante su bishita di trabou último na Trinidad, Minister di Tráfiko i Telekomunikashon a hasi su presentashon durante un sekshon spesial enfrente kasi tur e Ministernan enkargá ku Telekomunikashon den Karibe. Aktualmente CANTO (e asosashon di operadornan di telekomunikashon den Karibe) ta teniendo su di 24 kongreso anual na Bahamas.
Durante su presentashon, minister Adriaens a elaborá riba diferente trayektonan di ICT i telekomunikashon ku ta kanando na Antia. Maske kon chikí Antia ta i maske kon limitá nos ta na fondo i hende, ku vishon i kreatividat nos ta bringa duru pa no keda atras. Ehemplo nan klave den esaki ta e proyekto di laptop pa nos muchanan i esun di Internet Exchange. Ámbos a haña hopi akohida i esun di laptop hasta a wòrdu menshoná den e relato último di CANTO.
Den un sekshon spesial, Job Witteman, direktor di Amsterdam Internet Exchange (esun mas grandi di Europa) ku ta yuda buta CAR-IX den operashon, a duna un presentashon amplio riba e materia aki i di e forma aki atraé otro organisashon nan pa sera kombenio ku CAR-IX. Miéntras preis di tur kos ta subiendo na Kòrsou, nos a logra baha esun di Internèt i duna mas hende i sigur esnan ku ménos rekurso oportunidat di haña konekshon ku Internèt. Di e forma aki e gobièrnu aktual via Minister Adriaens ta trahando riba un di e puntonan di akshon proklamá dor di Nashonnan Uní. Pa ICT nos tin plannan riba mesa kla pa wòrdu butá den operashon. Den esakinan sektor komersial ta hunga un ròl importante i huntu ku mi tim nos lo logra. Ta kuestion di tempu.

WILLEMSTAD -- Miéntras ku ni Gobièrnu di Kòrsou ni Servisio di Asuntunan Ekonómiko (DEZ) ta dunando komentario, e krítika di parti di sektor komersial-empresarial riba e desishon unilateral pa redusí márgen di ganashi riba preis di webu ta sigui ku tur intensidat. Awe ta Asosashon di Komersio i Industria (VBC) ta bisa ku e desishon di SUVECU, e Asosiashon di Supermerkadonan di Kòrsou, pa stòp ku benta di webu komo reakshon riba e desishon unilateral di gobièrnu di Kòrsou pa redusí e márgen riba webu di 11% pa 5% por konta ku su aprobashon kompleto. “Si gobièrnu ta kere ku unilateralmente e por redusí e márgennan di webu i otro produktonan ku empresarionan ta bende den un tempu ku ta asuntu di oumento di “cost of doing business” (gastu fiho) tin, anto ta e gobièrnu ei mes mester indiká ken lo ta dispuesto pa trese e produktonan ei riba merkado. E káos sosial ku por ta resultá for di esei opviamente ta keda na kuenta di e gobièrnu”, asina presidente di VBC Bas Kooyman ta bisa.
Segun Kooyman, Gobièrnu mester realisá ku empresarionan en prinsipio no ta institushonnan filantrópiko. “Empresarionan ta ser konfrontá ku un lista di gastu manera salario i sueldo, primanan di seguro sosial, impuesto, koriente i awa, gastu di transpòrt, gastu di finansiamentu i interes, depresiashon (edifisio i ekipo) etc. Tur e gastunan aki mester keda kubrí dor di e márgen òf ganashi brutu. Si esei no ta logra kuenta ta kaba i e empresario lo pone un paro na su aktividatnan ku tur e konsekuensia sosial di esaki (e.o. desempleo, destrukshon di kapital, redukshon di servisio na públiko). Ta altamente di lamentá ku gobièrnu (lesa mandatarionan i gobernantenan polítiko) pa rasonnan populista ta lansa gritunan ku pueblo no por soportá mas subida di preis, pero ku nan mes no ta dispuesto pa realmente hasi algu na esei. Ta di kon gobièrnu mester kobra 2 biaha impuesto riba benta (OB) riba webu? Di kon no ta hasi nada ku e promesa ku lo abolí derechinan di importashon i kobransa dòbel di OB riba gasolin pa di e moda ei baha e subida di preis di produktonan? Mesun kos pa loke ta anulashon di akumulashon di OB i redukshon di tarifanan di impuesto riba ganashi (winstbelasting) i impuesto riba entrada (inkomstenbelasting) pa asina kompensá parsialmente ku mantenshon di forsa di kompra di klase medio. Ta masha fásil, pero sumamente hipókrita pa (unilateralmente) karga e gastunan riba empresarionan en bes di wak internamente serka bo mes. Un biaha mas mester enfatisá ku empresarionan lokal no por hasi apsolutamente nada kontra preis di produktonan ku riba merkado internashonal ta subi. Ta gobièrnu ta esun ku pa medio di rekoudashon (prosentual) di derechi di importashon i OB ta probechá mas tantu di e subida di preis (miónes di florin na èkstra entrada) i komo tal ta den e posishon pa kompensá e konsumidó. Te na e momentu aki nada no a sali di esei. Un bèrgwensa.

WILLEMSTAD – Gobièrnu lo hasi su parti, pero komunidat tambe mester karga su responsabilidat. “No tin un fórmula mágiko pa atendé e situashon ku nos ta den”, asina Partido Nashonal a bisa den un konferensha di prensa ayera, splikando ku na su manera por atendé e krísis di energia i su konsekuensianan pa nos isla.
E partido ta di opinion, ku parti di e entradanan èkstra ku gobièrnu lo bai haña di OB i Akseins dor di subidanan di preis mester bai bèk pa pueblo. Un di e posibilidatnan ta, ku ta kita un schakel den e OB riba gasolin. Si resultá ku basá riba kalkulashonnan eksakto e entrada èkstra o sea e meeropbrengst ku gobièrnu lo bai risibí dor di oumentonan di preis ta igual o ta surpasá e loke gobièrnu lo pèrdè o sea e derving, e ora ei PNP ta di opinion, ku mester por kita un schakel di OB riba gasolin, asina lider di e partido Ersilia de Lannooy ku ta tambe minister di Finansa a duna di konosé. Den e konferensha di prensa, sekretario di Estado, Alex Rosaria a para ketu na diferente forma kon por amplia nos ekonomia pa medio di tratadonan internashonal. Meta di esaki ta, pa krea mas kuponan di trabou, loke ta nifiká mas entrada pa kada kas di famia, di moda ku nan por karga e oumentonan di preis riba merkado lokal un tiki mas mihó.
Pa loke ta trata medidanan na nivel sentral ku por yuda aliviá e impakto di e oumento di preis konstante, PNP a splika e posibilidat pa kita un schakel di OB riba gasolin. Un kalkulashon preliminar ta mustra, ku gobièrnu lo pèrdè mas o ménos 11 mion pa aña. Segun PNP si aki ratu basá riba kalkulashonnan eksakto di e sifranan di 2007 resultá ku e loke gobièrnu ta bai risibí na entrada èkstra dor di e subidanan di preis ta igual o mas ku 11 mion mester por konsiderá pa kita un schakel riba e preis di gasolin. Esaki lo nifiká un redukshon di e preis di gasolin di mas ku 9 sèn pa liter. Banda e posibilidat di kita un schakel, segun PNP tambe por konsiderá pa baha OB riba sierto produktonan di primera nesesidat i subi’é riba otro produktonan di luho, manera sigaria i alkohòl. Esaki segun PNP, ta un di e medidanan konkreto ku por garantisá ku aki ratu tur hende por sobreviví dor ku nan por kumpra e produktonan básiko di primera nesesidat.