ORANJESTAD - Directiva di Centro di Bario Tanki Lender ta aserca pueblo di Tanki Leendert pa nan Plan Vacacional 2008.
Meta di e Plan Vacacional ta pa ofrese nos muchanan entre 6 pa 12 aña di Tanki Leendert y becindario, un siman di diverticion y distraccion na un manera educacional,informativo y recreativo. E programa vacacional di Centro di Bario Tanki Leendert lo ta di 28 di juli pa 1 di augustus.
Di dialuna pa diabierne for di 8.00 am pa 12.30 pm na Centro di Bario Tanki Lender.Adulto y hobenan boluntario lo prepara,sándwich, cuminda y refresco ect, pa e muchanan aki. Nos ta limita na mucha, esun cu bini prome ta haya lugar prome. Cantidad di mucha cu nos por tuma ta 50 mucha. Inscripcion ta solamente fl 60,00 pa mucha, dos ruman ta fl 110,00. Centro di Bario Tanki Leendert ta ofrese e Muchanan,Hamburger, Hotdog, Pastechi, Patatoe strings, Aroz con pollo, Pizza y BBQ. Centro di Bario Tanki Leendert ta conta riba cooperacion di mayornan pa cu e muchanan, nan plan Vacacional.
Ultimo dia di inscripcion ta 24 di juli na Centro di Bario di 6’or pa 8’or.

POS CHIQUITO – Programa radial di AVP, diadomingo ultimo, a wordo transmiti for di cas di famia Croes na Pos Chiquito. Un famia cu a wordo lanta pa difunto Everaldo Croes, mihor conosi como Buchi y Avelina Croes.
Na total e famia ta consisti di 13 jiu. Mike Eman a kere cu esaki ta e programa adecua pa duna un reconosimento na un di e jiunan. Yolanda, banda di ta maestra, tabata tambe un candidato ariba lista di AVP y a cumpli 60 aña. Presente pa e occasion aki tabata varios di su rumanan y su mama. Mike Eman, den nomber di partido AVPa regala Yolanda, cariñosamente jama Greta pa su rumanan, un boto di bela miniatura.
Esaki ta un regalo simbolico pa Yolanda, ja cu ariba e mesun dia cu Yolanda ta hasi aña, nan ta recorda tambe nacimento di nan tata, Buchi, cu ja a bay laga nan. Buchi, na bida tabata un piscador cu tabata pasa dianan ariba lama ta pisca. Un trabou cu a juda sostene y lanta su famia grandi. E boto miniatura ta un replica di e botonan cu antes tabata wordo usa pa pisca.
Segun Mike Eman, ta chistoso pa nan ta jama AVP partido di famia Eman, pero tin mas integrante di e famia Croes aki cu tabata ariba lista di AVP cu Eman mas. E ruman di mas jong, Desiree Vermeulen tambe a hiba palabra. E la conta cone tabata ta lanta cu un ruman manera Yolanda. Segun Desiree, e candidato ariba lista di AVP mas recien di e famia aki, cu Yolanda semper tabata un bon ruman y a juda lanta tur su rumanan for di tempran.
Mike Eman y Desiree a sigui elabora ariba e dificultadnan cu nos enseñansa ta pasando aden y nos comunidad en general. E atencion cu Aruba su sociedad mester no tey mas y e sosten cu hubentud mester no ta evidente.

ORANJESTAD- SETAR e compania number 1 den telecommunicacion na Aruba ta celebrando 5 aña como un compania NV y e aña aki a bolbe trece e campaña SETAR di bo tambe bek.
En connecion cu esaki SETAR ta introduciendo diferente ofertanan unda un y tur cu ta biba na Aruba por gosa di dje.
Special pa e periodo di vakantie cu ya ta andando caba, te cu dia 31 di augustus 2008, SETAR ta anuncia un campaña nobo di SMS unda cu tur hende cu manda un SMS cu e palabra SETAR pa 221 tin chens di gana un siman gratis na yamada. Cada mensahe pa 221 costa 50 cen.
Tur siman riba diahuebs SETAR lo saca un ganador unda cu e cliente ganador por haci tanto yamadanan local y international pa un 1 siman largo gratis (te na un maximo di Afl. 300,-).
E campaña aki ta pa tur cliente di SETAR cu un celular prepaid of postpaid.
Tambe SETAR ta recorda tur cliente riba e “weekend specialsnan” cu tin tur fin di siman, riba yamadanan, SMS, MMS, Ringtones o f otro servicionan di SETAR.
Diadomingo dia 20 di juli 2008 e bus di SETAR di Bo Tambe lo recori un di e districtonan di Aruba na unda e team di SETAR lo ta repartiendo premionan na tur clientenan di SETAR ganadornan cu nan sticker riba nan cas na un caminda visibel.
Keda pendiente cu SETAR tin mas oferta y sorpresa pa tur hende na caminda.

A no ser cu AZV mes a manda e patient afor

ORANJESTAD- Ministerio a tuma nota cu ainda ta socede cu personanan cu ta biaha pa exterior pa por ehempel vacantie, NO ta sera un seguro di biahe (reisverzekering) pa cubri gastonan di malesa den exterior.
Como cu AZV NO ta cubri gastonan di malesa den exterior, e persona lo mester carga tur e gastonan ey! Hopi bez lo trata di gastonan bastante halto, cu lo por hinca e persona of un famia completo den problema grandi.
Sin e minimo idea pa haci propaganda, pero mas bien pa adverti y proteha nos biaheronan, nos kier enfatisa e importancia di ta bon cubri den caso cu topa cu malesa durante bo estadia y vacantie den exterior.
Averiguando cu e unico compania di seguro cu ta ofrece e asina yama “ELVIA-Reisverzekering”, nos a wordo informa cu e aseguro aki ta costa entre Afls. 8,00 y Afls. 11.00 pa persona/pa dia, no importa e cantidad di dianan, mas “poliskosten” Afls. 12,50.
Muchanan bao di 5 aña di edad ta wordo cubri gratuitamente.
Ta consehabel pa e biahero ta bon cubri durante su vacantie, pa despues e no hañe confronta cu gastonan cu por a wordo cubri dor di e aseguro.
Pa conoce e condicionnan y beneficionnan, y pa sera e aseguro por acudi na Boogaard Assurantiën den Paardenbaaistraat, panord di DOW.
Ministerio ta desea tur biahero un feliz biaha y un vacantie placentero y saludable.

WILLEMSTAD – “Niun hende no por pone regla pa nos. Nos ta papia pa nos mes i nos lo sigui papia pa nos mes”, asina lider di Pueblo Soberano Helmin Wiels a bisa despues di a tende resultado di forma no ofisial di e reunion di partido MAN pa loke ta trata su evaluashon di partisipashon na Aliansa Patriótiko.
Wiels a bisa, ku Aliansa Patriótiko tin sigur un luna sin reuni. Mas aleu el a bisa, ku e lo no partisipá na e farándula aki, kaminda no a reuní internamente tokante e tópiko. Den Aliansa Patriótiko ya tin un kódigo di kondukta, pues Wiels no ta komprondé ta di kiko ta papiando. Ademas t’asina, ku e i su partido ta liber di papia na nòmber di su partido den kualke okashon i pues no por pone regla pa esaki. Den Aliansa ta un bosero ta apuntá, ora ta sali den medionan di komunikashon. E sigur lo no diskutí e posishon di MAN den prensa, ya ku e no a tende nada ofisial.
Lider polítiko di MAN Charles Cooper a bisa entre otro, ku su miembronan a dun’é mandato pa kontinuá ku e aliansa, pero bou di kondishonnan estrikto, entre otro unidat di pensamentu i kódigo di kondukta i si tin un miembro no kumpli kun’é, esaki lo keda sanshoná. Esaki por nifiká, ku ta saka e miembro (partido) for di e aliansa, asina Cooper a bisa awe mainta. Si e partido no sali òf no tin konsenso riba esaki, partido MAN lo saka su konklushon e ora ei. Cooper a bisa tambe, ku eksternamente ta hasiendo hopi esfuerso pa kibra e aliansa. No mester lubidá ku tin mas aliansa, refiriendo na e aliansa di koalishon ku tambe tin hopi problema interno.

BUENOS AIRES, Argentina, - Argentina ayera a senk den e pió krísis polítiko di último añanan, despues ku Senado a rechasá, ku e voto klave di e vise presidente di e nashon, un polémika den e impuestonan agríkola ku e gobièrnu peronista ta buskando reafirmá su poder.
E úniko reakshon ofisial a yega na final di dia, ora e dama presidente Cristina Fernández de Kirchner indirektamente a referí na e situashon, i a sigurá ku esnan ku no ta komprendé e polítika di apoyo p’e interesnan popular, ku nan ta bisa di defendé, “algun dia nan lo komprendé”.
E sorpresivo frakaso ofisialista pa aprobá e norma, ku por a elevá e impuestonan di e eksportashonnan mionario di soya pa finansiá e kresiente gastu públiko i kontené e inflashon, ta un gòlpi duru pa e dama presidente, kritiká pa un agresivo estilo di gestion.
Despues di 18 ora di debate tenso, e vise presidente argentino i kende alabes ta presidente di Senado, Julio Cobos, inesperadamente a disidí bira lomba pa presidente Fernández de Kirchner, i vota den oranan di mardugá kontra e norma tributario, provokando un votashon den e Kámara alta ku e gobièrnu a pensa ku e tabata ganá.
“E presidente ta bai komprendé. Mi no por kompañ’é. Mi ta aktuando konforme mi konvikshonnan”, un nervioso Julio Cobos a bisa, kende a surgi di e opositor Unión Cívica Radical, a uni ku e peronismo, pa integrá e fórmula ku a gana e elekshonnan presidensial di òktober último.

LIMA, Perú, - E komediante mèksikano Roberto Gómez Bolaño, kreadó di e personahe “Chavo del Ocho” i su inseparabel kompañera esposa Florinda Meza, resientemente ta’tin reunion ku presidente peruano, Alan García, durante kua nan a hari, nan a kanta den un ambiente informal.
Presidente García a kalifiká e artista mèksikano, di 79 aña, i konosí tambe pa su beinam di “Chespirito”, komo un ikono latinoamerikano, un ídolo popular di humor, i el a gradisié pa a pone hopi peruano hari durante hopi aña.
Roberto Gómez Bolaños i su esposa Florinda, kende a popularisá e dama ku mal beis “Doña Florinda” den e seri di televishon “El Chavo del Ocho”, emití na Amérika Latina kompletu, a keda risibí pa e mandatario peruano den un salon di Palasio di Gobièrnu di Lima.
Durante kasi un ora e anfitrion i su invitadonan a dialogá riba diferente tema.
“Chespirito’ i su esposa a splika e orígen di e personahenan ku nan a interpretá i e kontenidonan ku tabata emití n’e públiko.
E artistanan mèksikano aki a bisa ku nan tabata buskando pa dibertí e televidentenan i no hasi daño na niun hende”.
Tambe nan a papia di muzik latinoamerikano i di ópera, loke a animá “Doña Florinda” mustra su faseta kasi deskonosí di amante di ópera, i el a kuminsá kanta akapela “Nessun Dorma” di ópera Turandot, di Giácomo Puccini.

WILLEMSTAD – Miéntras ku awe parlamento ta trata e oumento di sueldo mínimo, Asosashon di Komèrsio i Industria, VBC, ta insistí riba su alèrta, ku e oumento di 15 porshento no mester tuma lugá sin mas. Si esaki tuma lugá tòg, denter di algun e efektonan di un oumento lo no ta riparabel mas pa e kobradó di sueldo mínimo. Asina presidente di VBC, Bas Kooyman a splika.

‘Ta hopi importante pa sa, ku VBC no ta kontra di subida di sueldo mínimo. Nos ta kere ku en bèrdat gastunan na Kòrsou a subi barbaramente i ku mester bin un kompensashon’. Asina Kooyman a bisa, indikando sinembargo ku e pregunta grandi ta, kon haltu e kompensashon pa sueldo mínimo mester bira i den ki forma e mester wòrdu introdusí.
VBC ta mustra riba e hecho, ku na komienso di e aña aki kaba tabatin un adaptashon di 3 porshento pa kompensá e subida di gastu nan di aña 2007. Ademas, segun Kooyman, gobièrnu ta usa e argumentu ku Fondo Monetario Internashonal, IMF, tambe a sugerí ku mester subi e sueldo mínimo. En bèrdat IMF a sugerí esei, pero segun Bas Kooyman, IMF no a menshoná e montante i a bisa ku esaki mester bai den kordinashon ku e partnernan sosial.
Nada di gobièrnu
VBC komo partner sosial no a tende nada di gobièrnu, ni tampoko a wòrdu konsultá relashoná ku e asuntu di oumento di sueldo mínimo. VBC ta lamentá ku parlamentu di Antia, ta disidí unilateralmente pa Kòrsou. ‘Miéntras ku gobièrnu di Kòrsou a proponé 5 porshentu di oumento i Banko Sentral 8 porshentu. ‘Nos no tin problema ku ningun altura di oumentu, pero sí ku e hecho ku medidanan no ta wòrdu kompañá ku otro medidanan ku por hasi, e efektonan negativo ménos. ‘Si no tuma e otro pasonan riba término kòrtiku, esnan ku ta haña 15 porshentu èkstra, aki seis luna lo no por komprondé dikon nan no por hasi ménos ku nan sèn’.

WILLEMSTAD – Den kuadro di oumento di e sueldo mínimo ta nesesario pa introdusí tambe un programa di konsientisashon pa e trahadónan ku ta kobra e salario aki. Esaki ta e posishon di e sindikato Boneco, ku ta representá trahadónan den e sektor komersial. Den kombersashon ku Erwin Koense, sekretario di Boneco, el a splika e importansia pa motivá e klase trahadó, ku biba un tiki mas modesto.’Ta importante pa e trahadó realisá ku e no mester biba pafó di su forsa’. Segun Koense, relashoná ku e último desaroyonan relashoná ku oumento di sueldo mínimo.
Segun Koense, pa Boneco ta importante pa un trahadó tin tur kos, pero mester tene kuenta ku e realidat. Den e kuadro aki mester realisá ku tin asuntunan, manera edukashon i formashon ku tin mas prioridat. E hende no mester tin mas tantu, pero ta mas tantu, segun Koense.
Koense a mustra riba e loke el a kalifiká komo ‘kompetensia’ den komunidat ku:’’pasobra abo tin esaki, ami mester tin esaya’’’, pa pasa otro na kaminda.
Pero e realidat ta ku un hende mester perkurá pa e ‘ta’ mas hende.
Den e kuadro aki ta importante pa e trahadó por kumpli ku e presupuesto ku e tin. I no mester ta asina ku ta biba di un dia pa otro. Òf ku ora ku ta yegando fin di luna, e loke ku minimalmente e trahadó ta risibí na sueldo mínimo a wòrdu gastá kaba na entre otro bòn di dies luna òf pago di interesnan altu na fiadónan di plaka.’Mester introdusí un proseso di konsientisashon pa informá i laga e trahadó biba di akuerdo ku su entrada modesto’, Koense a insistí.

WILLEMSTAD – Partido Frente Obrero Liberashon 30 di Mei ta rekordá tur mucha i hóben entre 5 pa 18 aña di barionan di Kanga, Dein, Buena Vista, Kura Piedra, Seru Fortuna, Sta Maria, Montaña Abou, Roi Santu i bisindario ku e tradishonal plan di vakashon konosé bo isla i biba bo kultura konhuntamente ku Fundashon Kontra Kriminalidat i Pobresa ta ranka sali djaluna awor 21 di yüli te ku 8 di ougùstùs próksimo.
E plan di vakashon ta den kuadro pa sigui pone un tiki mas atenshon riba e mucha i hóbennan den e último simannan di fakansi di moda ku e gruponan di enfokenan menshoná ta haña stimulashon sano, Kultural/Sosial, Informativo/Edukativo, Deportivo/Kompetivó i ku e meta pa kita muchanan for di kaya den fakansi i evitá ku esakinan ta envolví nan mes den aktividat negativo dor di bishita diferente sitionan históriko, empresa/industria lokal i lugánan atraktivo na Kòrsou.
Pa partisipá den e plan di vakashon 2008 organisa pa Frente Obrero Liberashon 30 di Mei i Fundashon Kontra Kriminalidat i Pobresa e partisipante tin ku kontribuí ku FL 25,-- i esaki ta inkluí gastunan di T-shirt - Transpòrt – Entrada di lugánan – bebida - fruta i kuminda fresku prepará tur dia dor di kòkinan profeshonal di Frente Obrero.
Te na e momentunan aki tin algun lugá mas pa inskripshon i djasabra 19 yüli pa 4’or di atardi e Komishon Organisadó ta sera inskripshon pa loke ta trata plan di vakashon 2008.
Frente Obrero Liberashon 30 di Mei ta hasi un apelashon riba tur mayor, pa laga boso yu (nan) bin konosé su isla i biba su kultura ku Frente Obrero Liberashon 30 di Mei.
Lo tin lidernan responsabel pa atendé i guia e muchanan.
Pa mas informashon i inskripshon tokante plan di vakashon Frente Obrero Liberashon 30 di Mei por tuma kontakto ku sr. Juniël Carolina na Cell. 562-6501 / Almir Godett na Cell. 523-4335 òf djasabra awor na Sede di Frente Obrero na Kanga.
E plan di vakashon 2008 lo wòrdu organisá den diferente kategoria i di e programanan manera: Den deporte/ Obra di man /Ques / Drama /Músika/ Baile i asina tambe eduká i informá e partisipantenan riba e aktividatnan ariba menshoná.

ARIES: Niun hende no por disminuí bo entusiasmo i bo deseonan di pasa bon. Preparábu mental i spiritualmente pa disfrutá lo máksimo. 16,29,41.

TAURO: Ser sosiabel tantu riba plano familiar komo profeshonal. Di trata di dominá otronan awor no ta duna resultado. Ser franko, pero sin heridá otronan. 12,33,05.

GEMINIS: Union familiar ta kombertí en parti importante pa bo stabilidat emoshonal i esun di bo sernan. Den bo kas awor ta e lugá di reunion i fiesta. 07,12,22.

KANSER: Siña eksperensianan agradabel komo esnan desagradabel. Loke ta susediendo den bida ta, ku bo mester madurá. Ta hopi importante pa por disfrutá di pas spiritual. 12.

LEO: Bo energia ta multipliká. Bo no tin ku pidi bo pareha nada. Den bosnan tur kos lo ta hopi armonioso na ora di traha plannan. 08,13,29.

VIRGO: Gradua ku honor na skol di bida. Bo mester hasi hustisia den bo stail di bida. Kambia bo bida i bo ta yega e momentu di mira realidatnan. 17,01,08.

LIBRA: Pone mayor atenshon na bo aparensia personal, pero bo dulsura i sensibilidat lo ta ingredientenan ku ta duna toke spesial na bo personalidat nobo. 04,03,06.

SKORPION: Trata di dominá otronan, solamente ta trese frustrashon. Laga ku kada kual ta tuma nan kaminda. Abo por solamente konsehá. 05,15,32.

SAGITARIO: Hasi awor en adelanto tur loke ta bin na bo mente, pa no ta un plan solamente, sino ku nan ta bira realidat. Bo ta riska i ke purba tur kos. 09,13,04.

WILLEMSTAD - Hospital St. Elisabeth (SEHOS) a aserká gobièrnu di Kòrsou, spesífikamente diputado enkargá ku Salú Públiko, Humphrey Davelaar ku e petishon pa realisá un biaha pa Cuba, en buska di personal kualifiká pa e unidat di Kuido Intensivo di e hospital. Esei ta loke diputado Davelaar mes a anunsiá ayera durante un enkuentro ku prensa. Ku situashon den e unidat di Kuido Intensivo na Hospital St. Elisabeth ta krítiko, no ta kos di awor aki. Na diferente okashon den pasado resien, SEHOS a bati bèl pa mustra riba esaki.
Algun luna pasá, hospital mester a manda un atvertensia durante un siman largu di fiesta ku tabata aserkando pa tur hende bai ku koutela den tráfiko, hustamente pa evitá aksidentenan grave ku mester di kuido spesialisá.
Tabatin tambe den pasado diferente kaso kaminda gobièrnu di Kòrsou mester a intervení, pa manda pashènt afó, pasobra no tabatin espasio mas den unidat di Kuido Intensivo. E problema ta ku Kuido Intensivo no por proveé kuido na mas tantu hende ku e kantidat di kama ku e tin awor aki. Por pone mas kama aserka, pero no por haña e enfermera kualifiká pa traha den e unidat aki.
Direktor médiko di SEHOS dr. Douglas Pinedo a splika e situashon aki detayadamente algun siman pasá. E problema di falta di personal kualifiká, asina el a splika ta un problema mundial. “Bo no ta haña e tipo di hendenan aki fásil. Ni maske bo ta dispuesto pa paga un salario hopi faborabel, no ta haña e tipo di hende spesialisá aki”, el a bisa.

WILLEMSTAD – “Sentral di Sindikatonan di Kòrsou ta kontentu ku e desishon di parlamentu pa aprobá un oumento di sueldo mínimo ku 15 porshento.
Nos ta kontentu, pero nos lo tabata hopi mas kontentu si e oumento tabata mas haltu. Nos ta kere den un oumento di 35 porshento”, asina Alcides Cova a deklará komo reakshon riba e desishon di parlamentu djarason último. Cova a bisa ku e ta satisfecho pasobra no ta awor aki, pero basta aña kaba e sentral sindikal a bin ta mustra ku sueldo mínimo no por keda simplemente na adaptashon di kosto di bida so.
Awor aki t’asina, ku tur aña na yanüari, gobièrnu ta adaptá sueldo mínimo na oumento di kosto di bida. Alcides Cova a bisa ku e tin apresio pa parlamentario Faroe Metry, ku no a laga e asuntu aki keda na promesa so, pero a hasi su trabou manera mester ta.
“El a para duru, no opstante preshon ku tabatin bini di tur banda riba dje. Anto nos sa ku ta hopi preshon tabatin,” asina Cova a señalá.
Alcides Cova ta kere ku nivel di bida a bira asina karu, ku ta un oumento supstansial mester bin, pa pone esun ku ta kobra solamente sueldo mínimo den un posishon ku e por kumpli ku su nesesidatnan.
Anto a base di un kalkulo ku SSK a hasi den pasado, e oumento awor aki mester ta 35 porshento pa e tin mas sentido, segun Cova.
El a rekonosé ku probablemente tin sektornan ku ta kuminsá grita mesora, den sentido ku ta un peso ku nos no por karga awor aki. Pero ku un ekonomia ku ta kresiendo, ku un situashon general ku ta bayendo den bon direkshon, ta kuantu mas mester warda? Probablemente nunka lo ta e bon momentu pa hasi un kos asin’aki, el a agregá.

WILLEMSTAD - Si no tin un kòntròl efektivo i debido, e lei di sueldo mínimo ku parlamentu a aprobá djarason último, lo no produsí e resultado ku tur hende ta spera. Esei tabata loke vários miembro den parlamentu, durante tratamentu di e lei en kuestion a atvertí.
E lei, ounke un lei pa Antia, de fakto ta konta solamente pa Kòrsou. E islanan chikí Boneiru, Saba i Statia ta kai direktamente bou di Ulanda i lo regla nan asuntu nan mes. St. Maarten dos aña pasá a adaptá su sueldo mínimo di manera ku e no tin nesesidat di hasi uso di e lei aki. Pero manera indiká anteriormente, Erno Labega di St. Maarten sinembargo a rekòrdá gobièrnu, ku ounke esei ta bèrdat, e isla no a regla ainda ku esnan ku ta kobra sueldo mínimo so, no tin nodi di paga belasting.
Dwigno Puriel di frakshon di MAN a bisa ku su partido semper tabata na fabor di un oumento di sueldo mínimo. Pero el a mustra tambe ku sin un control efektivo, e benefisio di e lei aki ta bai pèrdí pa e trahadó.
E mesun mensahe a bin di parlamentario Glenn Camelia di partido Forsa Kòrsou. Getmar Caldera di frakshon di Frente Obrero tambe a bisa di ta sostené e proposishon, pero e tambe a mustra riba e nesesidat di un bon control.
Palabranan similar a bin di parlamentario Glenn Sulvaran, pero di e propio inisiadó di e lei Faroe Metry. Metry a mustra ademas ku e ta spera ku e lei aki lo ta un estímulo pa gobièrnu bin ku e medidanan adishonal ku ta nesesario pa e lei por funshoná ainda mihó.

DEN HAAG / WILLEMSTAD - E impuesto èkstra ku entrante 1 di yüli ta konta pa buelonan na i forma di Oropa, no ta kontra leinan oropeo. Tampoko e ta kontra leinan internashonal manera e tratado di aviashon di Chicago, asina korte a konkluí ayera den un kaso hudisial. Na mart gruponan di interes a entamá un kaso den korte pasobra nan ta konsiderá ku e impuesto èkstra aki ta dañino pa e sektor di biahamentu. Korte sinembargo a dikta ku e impuesto no ta algu ilegal.
Barin, ku ta un asosashon di kompanianan di aviashon, aeropuerto di Maastricht i e kompania Ryanair a apelá e kaso ku a sirbi na mart aki, pero ayera korte di apelashon a konfirmá e sentensia.
E impuesto ta 11.25 euro pa un pasashi ku ta kubri un distansha di te ku 2500 kilometer. Tur loke ta un distansia mas largu, ta bira 45 euro pa pasashi. Sektor di aviashon semper a protestá kontra e medida aki.
Manera nos a informá kaba, introdukshon di e impuesto èkstra aki di 45 euro pa biahamentu tin su efekto kaba pa e kompania di aviashon mas grandi di Ulanda, KLM.
Introdukshon di e impuesto lo tin un efekto desastroso riba nos kompania i nos partisipashon den e kombinashon ku Air France. Nos a ripara kaba ku doloroso e kos aki ta, asina Peter Hartman a bisa.
El a anunsiá ku e ta kere ku pa fin di aña, e kompania lo ripará ku e kantidat di pasahero a baha ku 500 mil te un mion hende. E medida aki lo tin su efekto indudablemente tambe pa e tráfiko di pasahero entre Oropa (spesífikamente Ulanda) i Antia. Tantu minister di Telekomunikashon di Antia komo di Aruba, respektivamente Maurice Adriaens i Edison Briesen a manda un karta algun siman pasá pa protesta kontra introdukshon di e medida, pero gobièrnu ulandes a rechasá e protesta.

WILLEMSTAD, - Beisbòl na nivel di klase-A, ta kontinuá ku vários partido interesante.
Wikènt pasá parke di Tio Doau komo Parke Tata Beaumont tabata bon bishitá den tantu e enkuentronan di djasabra komo djadumingu.
Fanátikonan ku ta simpatisá ku e ekiponan na nivel di klase-A, ta disfrutá di e partidonan di nan ekipo faborito.
Mester remarká ku Banda Abou City su fanatikada tampoko no a keda atras i ta presentá na gran eskala pa animá na ekipo.
Weganan wikènt ta:
Djasabra 19 di yüli.
Pa 14:30 na Bonam:
Wildcats-Manhattan Blue Jays
Pa 14:30, na Tio Daou:
Sta. Maria Pirates/Chippie-Bonam Bears
Djadumingu 20 di yüli.
Pa 10:30 na Bonam:
Gr. Kwartier Stars/Mangusá-Sta. Maria Pirates/Chippie
Pa 10:30, Tio Daou:
Real Athletics-Banda Abou City
Pa 14:30, na Bonam:
Manhattan Blue Jays-Cur. Yankees
Pa 14:30, na Tio Daou:
Wildcats/Fatum/Kambes-Bonam Bears
E wega entre Real Athletics i Wildcats/Fatrum/Kambes ta bálido pa e di dos buèlta.
Fanátikonan tur ta keda invitá pa presensiá e enkuentronan aki.

WILLEMSTAD/ GELDERLAND – Un sistema nobo di gps ta indiká e sitio eksakto kaminda tur polis na pia ta, durante un aktividat grandi ku hopi públiko. Di e manera akí e polis no mester splika mas ku e ta pará banda di un palu grandi òf un outo koló pretu.
E kuerpo polisial di Noord i Oost Gelderland ta bai eksperimentá ku e sistema akí durante e eventonan grandi ‘de Zwarte Cross’ ku ta tuma lugá dia 25, 26 i 27 di yüli próksimo na Lichtenvoorde. Bosero di e kuerpo, Andrea Jansen a bisa, ku e tereno di ‘de Zwarte Cross’ ta enormemente grandi. “Nos ta spera 100 mil bishitante i durante un aktividat grandi asina e ta bira fèrfelu pa e pòst di komando keda ku bista riba henter e tereno.”
Pa e sistema funshoná lo duna tur polis un aparato chikí ku konstantemente ta indiká unda nan ta kanando. “E sistema no ta kompletamente nobo pa polis, pasó aktualmente tur vehíkulo di polis tin un sistema di gps. Awor nos lo por sigui e polis na pia tambe. Den e sentral di polis nos por sigui via di un karta digital tur vehíkulo di polis i awor tambe tur polis na pia”, Jansen a sigui splika.
Anteriormente, ora tabatin ku duna asistensia durante eventonan grandi, e polis mester a splika kaminda e ta pará. “Banda di un kaminda smal na man drechi dilanti un palu diki, ta difísil pa splika. Awor ora mester duna asistensia por wak mes ora kua polis ta mas serka di e sitio. E sistema ta funshoná via un ‘dish’ ku ta instalá riba e vehíkulo di komando di polis. Via satélite e informashon ta pasa rápidamente i indiká kaminda e polisnan ta pará”, Jansen a splika.

WILLEMSTAD/ DEN HAAG – Agreshon di detenidonan kontra wardadónan di prezu ta un problema grandi na Ulanda. Muchu wardadó di prezu ta eksponé na agreshon ku ta bin tambe di parti di nan mes koleganan. Inspekshon di Labor a kontrolá dirigí den prizònnan i klínikanan di tbs kaminda 4 di kada 10 empleado tin problema ku strès regularmente.
Inspekshon di Labor a bisa ku e investigashon no ta representativo. A kontrolá 31 di e 79 prizònnan i klínikanan di tbs. Sigur 25% di e personal den e institutonan akí tabatin problema ku yamamentu afó, tèr òf insulto, sea diario òf semanal. Di kada 6 trahadó tabatin 1 ku tur dia òf tur siman mester soportá menasa verbal òf intimidashon. E agreshon ta prinsipalmente di parti di e detenidonan, pero intimidashon dor di koleganan òf shèfnan tambe ta tuma lugá.
Inspekshon di Labor a bisa, ku ta desepshonante ku hopi di e institutonan ku nan a kontrolá no ta hasi sufisiente pa kontra arestá e agreshon. Akí ta trata di dos tersera parti di e 23 prizònnan bishitá i 4 di kada 5 klínika di tbs. A kontrolá tambe na 3 sentro pa detenshon i ekstradishon di gulidónan di bolita, pero einan no tabatin reklamo.
Sekretario di Estado pa Hustisia Nebahat Albayrak a yama e sifranan preokupante. E ta di akuerdo ku Inspekshon di Labor, ku mester tuma medidanan èkstra pa atendé ku e agreshon. Lo traha un plan di maneho ku ta bai pa Tweede Kamer despues di reseso. Aña pasá kaba Albayrak a tuma medida pa mengua e agreshon, pero esaki no a resultá, segun el a splika.

WILLEMSTAD – Kasi tur e sospechosonan ku polis a detené últimamente ta detené ainda. Mayoria di nan a presentá dilanti di wes komisario ayera i djarason i a prolongá nan detenshon. Entretantu a detené e sospechoso mayó den e kaso di sekuestro ku a tuma lugá dia 10 di yüli último.
Polis a informá entretantu di detenshon di e hòmber kolombiano J.M., ku a tuma lugá ayera mèrdia den un kas na Monteverde. Ta konsiderá e sospechoso komo esun ku a traha e plan pa e sekuestro di e komersiante Walid Ghazal Omeis. Ku su detenshon polis ta bisa, ku e kaso akí ta kasi kompletamente solushoná. Pa loke ta trata e kaso di asesinato di e komersiante Daryanani, polis ta kere ku nan tin e sospechoso mayó tambe detené. Esaki ta nifiká ku e kaso akí tambe ta práktikamente solushoná.
Tambe polis ta kere ku nan a solushoná tambe e kaso di asesinato di Pim Timmermans. Esaki ta e kaso ku a tuma lugá den Penstraat. Finalmente tin e kaso tambe di tiroteo ku a tuma lugá na Oosterbeekstraat. Den e kaso akí tambe polis a detené diferente sospechoso.

WILLEMSTAD - E relato di 2007 di Banko Sentral di Antia ta papia palabra kla: ta difísil pa sera Refineria Isla, manera algun grupo a bin ta pretendé. E impakto ekonómiko i banda di dje e “spin off” di e kompania ta asina grandi, ku ta difísil pa haña otro aktividat ekonómiko pa remplas’é na e momentunan aki.
Un bista den e relato anulá di Banko Sentral di Antia ta duna indikashon konkreto, ku e aktividatnan di refinahe ta nifiká 10 porshento di ekonomia di Kòrsou. Si konta ku ekonomia di Kòrsou tabatin un volúmen di 7 mil mion florin den 2007, por konkluí, ku e entrada di divisa pa Kòrsou for di e refineria ta 10 porshento di 7 mil mion florin ku ta 700 mion florin riba un base anual. Den esei no a konta ainda e impakto ku e Refineria tin pa otro aktividatnan ekonómiko i e aspektonan di empleo.
Presidente di Banko Sentral, Emsley Tromp a bisa awe mainta, ku tin un aspekto mas ku no ta tene kuenta kuné. Refineria Isla ta un sentro di transferensha di konosementu teknológiko. E refineria ta usa e konosementunan mas moderno ku tin riba tur tereno i esei ta traspasá pa hendenan lokal ku ta haña mas i mas konosementu. No mester supestimá e parti ei, segun dr. Tromp a bisa.
Un di e gruponan ku a bin ta insistí pa sera e Refineria (entre otro pa motibunan ambiental) ta Movementu Solushon Isla. Segun e organisashon a bin ta splika, ku e invershonnan ku kier hasi den e Refineria por hasi algu otro ku e suma grandi aki. E grupo ta boga pa desmentelá aktividatnan di refinahe na Schottegat i riba término mas largu krea un área di turismo i divershon grandísimo