Lo lansa prome vuelo for di Aruba pa Panama na December proximo

ORANJESTAD - Despues di a traha e fundeshi hunto cu Aruba Airport Authority (AAA), Aruba Hotel and Tourism Association (AHATA) y Aruba Tourism Authority (ATA) ta sigui cu nan trabou pa solidifica lasonan cu Copa Airlines na momento cu esaki ta preparando pa ofrece Aruba un gateway nobo atravez di Panama.
Copa, e aerolinea nacional di Panama, lo cuminsa bula pa Aruba na 15 di december proximo, habriendo asina un ruta directo pa Aruba cu conexion for di Buenos Aires y Cordoba, Argentina, como tambe Chile, Peru, Colombia y Brazil.
“Semper a existi un demanda pa Aruba su producto turistico di calidad for di paisnan latino americano, pero no tur ora tabata existi rutanan aereo conviniente pa biaha.
Nos a cultiva un laso cu Copa pa asina cumpli cu e necesidad y yuda diversifica mas ainda mercado turistico pa Aruba,” asina ta splica presidente y CEO di AHATA Rob Smith.
“Nos esfuerso y trabou continuo lo yuda sigura tanto e inicio di e ruta nobo aki, como tambe su exito continuo riba termino largo.”
NEGOCIACION
A cuminsa discusion cu Copa Airlines hopi aña atras, pero tabata te recientemente a haya enfoke atrobe na momento cu AHATA a invita top ehecutivonan di Copa pa un “site inspection” di nos facilidadnan di airport y resort, como tambe reuni cu ehecutivonan di turismo di Aruba.
E combersacionnan aki tabata e chispa pa negosacionnan relampago avansa y culmina dunando fruta cu programacion di vuelonan, cual lo ser ofreci cuater biaha pa siman for di december benidero caba.

Subrayando nan compromiso cu eventonan cultural

ORANJESTAD- Ta trata aki di un di e eventonan musical clasico di mas importante den e region Caribense. Nos ta referi aki na e “Aruba Piano Festival” cu a cuminsa na aña 2006 y cu a sa di crece bira un di e festivalnan masha popular den e region aki, pa su programa unico, pa e calidad di e musiconan participante na e evento y pa e cantidad di hende interesa den e arte di musica.
E aña aki e evento lo tuma lugar entre dianan 22 y 28 di september 2008 y pa por haci e evento posibel e organisacion ta conta cu algun patrosinador. Orguyosamente R.E. Yrausquin & Sons por anuncia di ta un di e patrosinadornan principal di e evento aki.
Recientemente e gerente general di e compania agencia di autonan di e marca prestigioso Ford y Mitsubishi a firma e acuerdo cu e organisadornan, pa asina afirma nan compromiso serio y duradero cu organisacionnan cu ta traha na bienestar y progreso di cultura di nos pais.

ORANJESTAD- Diabierna atardi a tuma luga na Garage Cordia e tradicional entrega di scholarship check na becadonan di Aruba Scholarship Foundation.
Clyde Harms, President di ASF a recorda cu ta net 20 aña pasa e prome beca a wordu otorga na apenas un studiante.
E aña aki 10 candidato ta ricibi beca pa un total di casi 50 mil dollar. Clyde Harms a remarca tambe cu tin dos candidato mas pa ricibi beca e aña aki pero ainda tur nan documentonan no a bin cla pa ASF haci un desicion final riba nan peticion.
Aki ta sigui nomber di e becadonan y e scol cu nan ta asisti.
Miami Dade Community College: Dijkhoff, Maylin D.; Zaïra Pourier. Johnson and Wales University: Denyse A. Fingal. Florida Memorial University: Taneisha M. Tromp. University of Central Florida (Undergraduate): Jeffrey R. Williams; Gumbs, Victor; Crystal Marlin. (Graduate): Darysse Croes; Erwin Gurion; Roella Gurion
E aña aki ASF tabatin e primicia di entrega e prome beca di Sabina Berlinski Memorial Scholarship cu Sr. Milton Berlinski a establece na memoria di su mama difunto.
Sr. Gilbert Berlinski, ruman di Milton a haci e entrega na Srta. Maylin Dijkhoff.
Clyde Harms a manda un palabra di gratitud pa Sr. Milton Berlinski y el a expresa e deseo pa otronan cu tin e recursonan pa sigui ehempel di Milton y honra un ser stima cu un beca na nan memoria.
MENOS APLICACION
Contestando un pregunta di un periodista presente, Clyde Harms a admiti cu ultimo añanan tin menos aplicacion pa beca. E ta atribui esaki na dos factor: Pa di prome, Universidad di Aruba ta ofrece un opcion cu mayoria di hende por paga sin ayudo di ASF.

Otmar Oduber di AVP ta haya cu Gobierno di MEP tin cu bai cas

ORANJESTAD- “Na momento c’un Gobierno, pa di dos periodo di gobernacion sigui, no por cumpli cu su programa di gobernacion ya laga pueblo di Aruba na caya, no ta keda nada otro cu entrega poder bek na pueblo y permiti pueblo eligi un Gobierno nobo.
Un Gobierno nobo cu lo tin solucion. Un Gobierno nobo cu lo alivia e spiral negativo di inflacion, di pobreza y di descuido di nos hendenan. Un Gobierno nobo cu por cumpli cu pueblo, cu por percura pa trece solucion pa pueblo, riba asuntonan cu ta rekeri solucion rapido.
Gabinete Oduber III y IV a faya barbaramente cu pueblo, mescos cu a sosode cu e gobiernonan di Nel tanto e prome como di dos, ya cu nunca MEP logra di ehecuta su plan di gobernacion, y duna pueblo e futuro briyante, of prosperidad cu tanto el a priminti.
Dado momento, un gobernante responsabel, un politico cu ta respeta su integridad, tin cu saca su conclusion, sigur ora cu nunca nan a cumpli cu pueblo,” Otmar Oduber, miembro di Parlamento di fraccion di AVP ta mustra.
E parlamentario a sigui mustra cu pais Aruba ta den un decadencia riba tur tereno. Pueblo ta victima di un gobierno sin piedad, gobernantenan cu no tin vision y cu no tin solucion pa problemanan cu ta afectando bida di comunidad tur dia.
“Minister Presidente Oduber a bai un seminario riba crisis di energia, y su unico aporte den e seminario aki, ta di bisa tur hende, cu prijs di petroleo ta sigui subi.
Ningun sugerencia, ningun alternativa, y loke ta mas tristo, Nel no a presenta ningun perspectiva pa pueblo por sinti cu su gobierno lo atende y busca un solucion pa alivia e peso grandi aki riba schouder di nos hendenan.

Balansa den desaroyo economico y bienestar social
ORANJESTAD- Dialuna lider di AVP, Mike Eman lo ta un presentador den un panel na un conferencia social-economico internacional di e organisacion SASE na Universidad di Costa Rica, San Jose. Eman a worde invita pa e conferencia dor di e sociologo mundialmente conoci Profesor Amitai Etzion y profesor internacionalmente conoci tambe Prof. Jose Perez Adan.
E lider di AVP, Mike Eman ta worde reconoci pa su desaroyo di e tema di buskeda di un realidad social husto den un desaroyo economico. E enfoke y atencion cu e a duna den e cuadra aki na avansa e pensamento comunitario na Aruba y den region pa forma parti di manehonan di paisnan ta worde concidera importante den un mundo caminda norma, valornan y cohesion social den paisnan ta bao di presion di e desaroyo mundial.
Durante e symposium riba comunitarismo na Aruba organisa pa AVP, FESCA y Fundacion Digna Lacle-Herrera e oradornan invita di e mundo comunitario a keda impresiona cu Eman su introduccion caminda e a pone un relacion entre gratitud e e espirito comunitario basa riba su propio experiencia di bida. Encurasha Prof. Amitai Etzioni e lider di AVP, Mike Eman a tuma e reto pa profundisa e tema aki for di un experiencia individual pa un theoria general sosteni pa literatura y investigacionnan riba e tema.
Pa explora e interaccion entre teoria y practica politico e conferencia a busca personan cu di desaroyo intelectual y academiconan cu ta combinda nan careranan cu servicio publico.
Na e conferencia lo figura central Óscar Arias Sánchez, recipiente di Premio Nobel y presidente actual di Costa Rica, como un representante destaca di e tradicion aki pa duna e discurso inaugural di e conferencia. SASE a invita un grupo di politiconan conoci latinoamericano cu cu enfoke similar na Arias cu ta duna prioridad na desaroyo di pensamento riba un base profesional y scientifico pa uni nan mes cu e invitado como panelista y expositornan den e mesanan di presentacion. Den e cuadra aki Mike Eman ta forma parti di e presentadoranan riba e tema comunitario den buskeda di un balnsa husto den desaroyo economico y bienestar social di pueblo

WILLEMSTAD -- Despues ku e komishon miksto ku mester duna rekomendashonnan pa loke ta trata Karnaval 2009 a duna gobièrnu su relato final, awor ta na Bestuurscollege pa tuma desishon pa loke ta trata entre otro organisashon, ruta i tambe finansiamentu. Mas aleu tabatin aspektonan di salú i tambe evaluashon di e Karnaval di Bándabou.
Pa loke ta trata organisashon di Karnaval diputado enkargá Marilyn Alcalá-Wallé a duna di konosé ku tin 4 grupo interesá pa organisá Karnaval 2009 ku ta e organisadónan Fudeka, Milly Hart (Sweet Sugar), Armando Huerta i Geraldine Archer. Tin desishonnan ku ainda gobièrnu mester tuma miéntras ku riba diferente punto ya gobièrnu a tuma desishon.
Un di e rekomendashonnan ku e komishon miksto a duna gobièrnu ta ku mester konsentrá Karnaval den un par di dia, pero ya gobièrnu a disidí ku esaki no ta posibel i lo keda mantené e periodo eksistente. Otro proposishon tambe tabata pa wak si por organisá Karnaval despues di kuaresma manera den otro paisnan den region, pero tambe ta algu ku ya Bestuurscollege a disidí ku lo mantené e periodo promé ku kuaresma. Ainda tin algun punto ku no ta kla ku lo mester tuma desishon riba dje entre otro ken ta bai organisá karnaval 2009. E komishon a hasi hopi sugerensha di rutanan ku ta posibel for di Jan Noorduynweg kaba na Brionplein, rutanan alternativo ku ta kuminsá na Aqualectra i kaba na Jan Noorduynweg. E preferensha di e grupo ta Cubaweg, Jan Noorduynweg kaba na Rif òf Waaigat. Mester ta bon kla ku ora bai tuma desishon pa otro añanan e ruta mester ta fiho pa añanan ku ta bini, p’esei a hasi evaluashon di e ruta. Pa loke ta trata organisashon a pidi servisio konserní di tur instansha ku a inskribí i duna un konseho kua ta e mihó organisashon, i e siman aki ta haña kontesta di e servisio. E parti finansiero mester ta riba merkado liber, kompanianan ku ta duna supsidio, despues ta bini bèk riba dje.

CARACAS, Venezuela, - E presidente di Venezuela, Hugo Chávez, den su biahe di e siman aki a primintí ku e lo brasa e Rei di Spaña, pero el a insistí ku e lo no sera su boka, ocho luna despues ku rei Juan Carlos I a bis’é “pakiko bo no ta sera bo boka?” den pleno kumbre iberoamerikano.
Ámbos pais a konfrontá un bataya diplomátiko despues di e insidente ku a okurí na Chile durante e pleno deliberashonnan di e hefenan di estado i di gobièrnu, ora Chávez repetidamente a kritiká e eks presidente spañó José María Aznar i a interumpí un diskurso di e presidente José Luis Rodríguez Zapatero.
“Ku gusto lo mi brasa e Rei, pero bo sa bon-bon, Juan Carlos, ku mi no ta bai keda ketu”, Chávez a bisa sonreí durante su programa semanal di radio i televishon “Aló presidente”.
“Nos lo sigui papia pa un mundu hustu i igual”, e lider venezolano a puntualisá.
Sin embargo, i ounke e enkuentro entre ámbos mandatario a keda konfirmá promé pa Spaña, Chávez a bisa ku ainda ta tratando kordiná e reunion den e agèndanan yen di tarea.
Chávez lo realisá un gira ku lo hib’é na Rusia, Bielorrusia, Portugal i Spaña entre djaluna i djabièrnè.
E presidente venezolano a splika ku e no a kontestá e Rei durante e kumbre, pasobra e no skuch’é, i ounke den prinsipio el a mustra di ta iritá, despues el a uni n’e chistenan ku tabata sirkulá relashoná ku esaki.

WILLEMSTAD - Digicel, e patrosinador orguyoso di futbòl Karibense siman pasá a anunsiá ofisialmente e torneo “Digicel Caribbean Championship 2008” durante un konferensha di prensa tené den Marriott Resort na Kòrsou.
E enkuentronan di futbòl lo tuma lugá dianan 27, 30 i 31 di yüli próksimo den stadion Ergilio Hato.
E timnan di Antia Ulandes, Dominica i Grenada lo enfrentá otro.
Digicel ta masha kontentu di por ta e patrosinador ofisial di Caribbean Football Union i spesialmente ku e inisio di e kampionato Karibense aki ta presisamente na Kòrsou.
Pa por perkurá ku e propio muchanan lokal ta den ambiente total di futbòl, a disidí di organisá un evento spesialmente pa e hóbennan.
E evento konosí komo e “Kids Clinic” a sa di konta ku no ménos di 75 mucha ku a haña chèns di siña i tende tepnan balioso di hungadónan di e tim nashonal di Kòrsou.
E timnan di muchanan presente durante e evento tabata Undeba, Tera Kòrá, Quick 60, Excellence, Mahuma, Scherpenheuvel, Dept Moreno, Genesis Boys, Centro Dominguito, Willemstad i Jong Colombia.
A brua e hungadónan di tur e timnan den otro, hasiendo asina ku tur a hunga ku otro. Pues en bes di ta rival riba vèlt, nan tabata trein ku miembronan di otro ekipo.
Mester menshoná, ku ta for di 9’or di mainta kaba a reuní ku tur e muchanan riba vèlt.
Un total di 12 lider tabata presente pa asina bou guia di Etienne Sillie por a duna e “Kids Clinic” aki na tur e muchanan.

ARIES: No bai konta otronan di bo bida, pa bo no laga emoshonnan atras. Pensa bon loke bo ta papia promé di aktua. Esun ku ta atakábu ta pasobra e mester di ayudo i amor.

TAURO: Ta presentá bo oportunidatnan nobo di progresá i oumentá bo ingreso. Probechá pa pone na marcha e kosnan ku bo a laga pendiente. 15,48,26.

GEMINIS: Bo ta wòrdu inspirá pa buska lokual ta skondé, di e misterio ku ta enserá bida. Bo emoshonnan ta intensifiká, atrayendo na bo hende poderoso. 31,21,05.

KANSER: Dominá bo ira, kurashi, yalusí. No tormentá bo mes ni bo pareha ku ideanan apsurdo ku ta eksistí den bo imaginashon. 42,40,09.

LEO: Deseonan di hasi algu nobo den relashon ku bo bienestar ta enfatisá. Un plan nobo di ehersisio lo no ta malu. Probechá e dianan aki pa hasi algu pa bo mes. 32,08,21.

VIRGO: Kuminsá mira e kambionan den bo bida ku pa tantu tempu bo a deseá. Bo famia i esnan ku semper a bisa presente den bo bida, ta uni mas ku bo. 26,13,19.

LIBRA: Bo tin ideanan briante ku bo famia, bo kas, lugá kaminda bo ta traha. Bisa sí na e ideanan ku bo tin den mente. Bo tin lus bèrdè pa dekorá i kambia kosnan den bo kas.

SKORPION: Bo ta risibí e dia hopi positivo awe. Probechá na hasi algun proyektonan. E momentu ta ideal pa un kòrtá di kabei nobo. 36,03,10.

SAGITARIO: Lansa bo mes den aventura awe. Den amor ta ideal i lo ta hopi agradabel. E amor ta multipliká. 04,07,13.

DEN HAAG/WILLEMSTAD - Si tende tur e komentarionan, remarkenan i gritunan for di prinsipalmente huki finansiero, oumento di edat di penshun aki na Antia ta bira un kos inevitabel.
Ta e úniko manera ku por evitá ku e fondo di penshun prinsipal APNA (pero tambe otro fondonan di penshun) ta haña nan den problema, asina drs. Philip Martis, direktor di Banko di Seguro Sosial (SVB) a duna di konosé.
Algun aña pasa, Gobièrnu Sentral a instituí un komishon di eksperto pa studia e materia aki i presentá rekomendashon. E komishon aki ku a haña e nòmber Komishon Fortifikashon Fondo di Penshun tabata basta kla den su rekomendashon: si sigui asin’aki, e fondo ta hañ’é tardi òf tempran den problema finansiero i konsekuentemente ta rekomendabel pa – banda di otro medidanan – oumentá edat di esun ku ta baha ku penshun.
Resientemente, Fondo Monetario Internashonal ku tabata di bishita na Antia, tambe a ekspresá su mes den palabranan similar, mustrando ku edat di penshun mester oumentá pa asina mantené un kantidat di hende sufisiente ku ta kontribuí na e fondo.
Na Ulanda, gobièrnu ya ta kanando e trayekto aki dia bieu. Si na Ulanda e edat pa baha ku penshun awor aki ta 65 aña i tabata papiando di hasi e edat aki 67 aña, minister Piet Hein Donner di Asuntunan Sosial a lansa e idea ku a pone hopi hende para ketu: e ke subi edat di penshun te na 70 aña.
Donner a presentá e idea aki den un entrevista ku el a hasi den e korant ulandes De Telegraaf den fin di siman ku a pasa. El a bisa, ku tur kos ta mustra ku asta si subi edat di penshun te na 67 aña, ainda esaki no ta sufisiente pa akapará e efekto di hendenan ku ta birando bieu na un ritmo hopi mas lihé.

WILLEMSTAD - Tin un lus na horizonte pa Fundashon Duna Lus. A lo ménos, si mester konsiderá e último desaroyonan ku a bin ta tuma lugá.
Den e dianan tras di lomba, diputado di Salú Públiko Humphrey Davelaar a reuní ku partidonan enbolbí i ta parse ku tin speransa ku tòg por skapa e sentro di parto aki.
Kraamkliniek Rio Canario ta pasando momentunan sumamente difísil ku realmente ta menasando su eksistensia.
E esensia di e problema ta e hecho ku e fundashon no por a kumpli ku su kompromisonan a pone ku e edifisio na Rio Canario awor aki ta na benta. Pa kolmo, pa motibunan te ainda ku no ta masha kla, e fundashon mes a firma ku e ta dispuesto pa tuma distansha di e edifisio.
Konsekuensha tabata ku trahadónan di e sentro tabata na punto algun dia pasá di risibí nan karta di retiro, komo ku no tabata parse ku tin otro salida.
Diputado Humphrey Davelaar a reuní resientemente ku tur e aktornan enbolbí. A reuní na promé lugá separadamente ku e sindikato CBV, despues a reuní tambe separadamente ku e parteranan.
Despues, segun e mandatario el a reuní ku tur e dos partidonan aki huntu ku direktiva di e fundashon.
A palabrá algun punto ku mester kumpli kuné pa e proseso por sigui kana pa weta si por salba e sentro ainda.
A palabrá entre otro ku Fundashon Duna Lus lo manda un karta pa gobièrnu den kua e ta bisa eksplísitamente ku e fundashon ta dispuesto i tin interes ainda pa kumpra e edifisio.

WILLEMSTAD - Gobièrnu di Kòrsou tin debido atenshon pa maneho finansiero di teritorio insular di Kòrsou. Definitivamente no t’asina ku gobièrnu ta hibando un maneho ku kasi por kalifiká komo “kon ku para keda”, asina diputado di Finansa Mike Wllem a reakshoná riba e seri di akusashon di Asosashon di Komersio i Industria VBC.
Den su mas resiente edishon di Newsletter, VBC ta habri afó formalmente kontra gobièrnu pa loke ta su maneho finansiero.
Sitando rapòrt di Kontrolaria General di Antia (ARNA), Asosashon di Komersio i Industria VBC ta bisa ku e no por yega na otro konklushon ku atministrashon, maneho i responsabilisashon finansiero di gobièrnu di Kòrsou, básikamente ta un kos kaótiko.
Den e komentario, VBC ta mustra ku dia 29 di mei 2008, Algemene Rekenkamer Nederlandse Antillen, ARNA a ofresé su konklushonnan tokante e kuenta anual 2001 di teritorio insular di Kòrsou na presidente i miembronan di Konseho Insular di Kòrsou.
E rapòrt di ARNA ta mustra ku na promé lugá kompromisonan, gastunan i entradanan di teritorio insular, pa un gran parti no a sosodé konforme presupuesto aprobá di Kòrsou ni tampoko konforme otro stipulashonnan legal.
E rapòrt ta señalá tambe ku maneho finansiero ainda no ta na òrdu.
Responsabilisashon finansiero no ta sosodé di akuerdo ku reglanan preskribí.
E responsabilisashon no ta duna un refleho di e maneho finansiero ku a hiba. VBC ta bisa ku e konklushonnan di ARNA i su opinion final ta frankamente bisá bergonsoso.

ROTTERDAM/WILLEMSTAD - Esmee Ronde, un damita di 24 aña di edat, a keda koroná komo e Reino di Zomerkarnaval di Rotterdam ayera anochi. Ku esaki, Rotterdam tin awor su di 24 reina di karnaval.
Ku esaki el a duna tambe señal pa inisio di e evento ku ta hala mas tantu hende na e siudat di Rotterdam.
Esmee Ronde, djasabra awor lo enkabesá e parada ku ta pasa den kayanan di Rotterdam. Komo embahador di karnaval, un aña largu e ta representá e aktividat aki.
Un dje kosnan ku a bira tradishon kaba ta, ku otro aña na febrüari, Esmee Ronde lo ta na Kòrsou pa partisipashon den Gran Marcha di karnaval.
Tabatin en total 7 kandidato pa e sertámen aki, kuater a bai final. Esmee Ronde ta bira susesor di Marcie de Jongh di 27 aña prosedente di Amsterdam.
Karnaval di Rotterdam tur aña ta atraé sentenares di mil hende ku ta bai para wak e parada. Meskos ku na Kòrsou, tin tènt ku kuminda, músika i basta ambiente. Generalmente ta sera e aktividat ku aktuashon di algun artista di renombre, manera aña pasá, ora Jose Albert “El Canario” a duna un shou tur afó.

WILLEMSTAD - Diputado enkargá ku Struktura Estatal Zita Jesus-Leito ta hopi optimista pa e konferensha di mesa rondó ku ta programá pa tuma lugá dia 15 di desèmber awor. Tur kos ta indiká, ku mayoria lei ku nos mester tin kla, lo ta kla tambe, asina e mandatario a sigurá.
T’asina ku dia 15 desèmber 2008 lo mester tin henter e pakete di lei kla pa drenta pais Kòrsou kuné. E dia ei lo tene e Konferensha di Mesa Rondó.
Riba tereno hurídiko mester tin kuater lei kla, segun e diputado.
Ta trata na promé lugá di e lei ku ta regla funshonamentu di Korte di Hustisia, na di dos lugá e lei ku ta regla funshonamentu di Ministerio Públiko i Prokurador General, e lei ku ta regla funshonamentu di polis ku manera tur hende sa tabata den diskushon resientemente i finalmente e lei ku ta regla institushon di e Raad voor Rechtshandhaving, ku ta e konseho ku mester atendé e kalidat di nos leinan.
Ora 15 di desèmber yega, e kuater leinan aki mester ta kla, segun e diputado.
Tambe t’asina ku mester tin leinan kla riba e área finansiero, ku ta e lei ku ta regla e aspekto di supervishon finansiero i huntu kuné, saneamentu di debe di Antia.
Finalmente tin e lei ku mester kaba di atendé nos konstitushon.
Konstitushon pa pais Kòrsou ta den proseso basta tempu kaba. Manera ta konosí, un komishon presidí pa mr. Gilbert de Windt a traha riba e promé konsepto, un konsepto ku a presentá na komunidat di Kòrsou, mediante seshonnan den sentro di bario rònt Kòrsou i mediante dos presentashon den World Trade Center.

WILLEMSTAD – Un total di 21 pregunta e miembro di Konseho Insular Hensley Koeiman a manda pa Bestuurscollege, enkuanto e estado di e kasitanan riba Seru Loraweg kaminda ta warda vürwèrk. Koeiman ta miembro MAN. Anteriormente un parlamentario di PAR tambe a hasi parlamentu un kantidat di pregunta.
Koeiman a bisa, ku pa basta tempu kaba e ‘kruithuis’ situá na Seru Loraweg no ta kumpli ku eksigensianan di seguridat. En todo kaso e no ta kumpli ku e ‘E.V. ontplofbare stoffen’. “Segun mi a komprondé mas o ménos un 7 aña pasá un kompania a traha un rapòrt di e situashon alarmante aki i a entregá esaki via di Gezaghèber na Bestuurscollege di Kòrsou. E titulo di e rapòrt parse ta ‘Brandveiligheid kruithuis’. E kruithuis ántes tabata situá den un sorto di dam pa a yuda protehá e espasio rondó di dje na momentu di un eksploshon. Dor di desaroyonan ku a tuma lugá último añanan, no por papia di un dam mas einan. Ta bin aserka ku dor di e plannan di parselashon no ta kumpli ke e eksigensianan pa ku distansia. Tin sierto periodo ku tin vários kònteiner pará den e kurá di kruithuis kaminda tin vürwèrk aden. Esaki sigur ta e kaso den e lunanan di novèmber i desèmber. Segun informashonnan ku mi a saka for di medionan di komunikashon, aña pasá a importá 29 kònteiner di 40 pia. Esaki tabata representá mas o ménos 430.000 kilo di vürwèrk. Esaki fuera di loke tabatin depositá den e kruithuis.”

WILLEMSTAD/ ORANJESTAD – E polis di St. Maarten ku a tira riba su kolega femenino siman pasá, no ta detené. Minister di Hustisia David Dick ta pendiente pa un splikashon di parti di Prokurador General Dick Piar i ta spera ku a sigui tur prosedura korektamente. Asina el a bisa durante un entrevista ku The Daily Herald.
Minister Dick ta interesá den e manera ku a hiba e prosedura, pa no detené e polis, pa asina e tin sigur ku a trata e polis meskos ku lo a trata kualke otro hende. “Mester apliká trato igual pa tur hende, pero den e kaso akí por tabatin motibunan pa un trato diferente.”
Entretantu awe lo tin un enkuentro entre polis i Ministerio Públiko di St. Maarten. Fiskal Mayó Taco Stein a nenga na duna komentario enkuanto e kaso, indikando na Daily Herald, ku ya rumornan ta sirkulando tur kaminda i e lo no añadí mas na e rumornan. Tin vershon di un triángulo amoroso, kaminda e polis di inisial C. lo a tira riba su kolega P. ku kua e tin un relashon. E suseso a tuma lugá despues ku el a haña sa ku P. tabata ku un otro hòmber.
Entretantu tin indikashon, ku C. lo ta na Kòrsou pa tratamentu sikiátriko. Tin vershon ku el a biaha riba su mes pa un chekeo médiko.

WILLEMSTAD/ LIMBURG – Un dama a pèrdè su barika di 9 siman, despues ku Tim di Aresto a drenta den e kas pa arestá su kasá. E polisnan a usa un eksplosivo ku ta produsí hopi lus pa desorientá e sospechoso. E dama a splika ku e eksplosivo a spant’é.
E suseso a tuma lugá dia 24 di yüni último den e bario Herten na Limburg. Aktualmente polis di Herten ta pendiente pa investigá e kaso, pa wak si bèrdat e entrada hudisial a pone ku e dama di 32 aña di edat a haña komplikashon ku su embaraso i pèrdè su barika. Reshèrshi te ainda ta pendiente di un keho ofisial di e dama. E dama su ginekólogo ta bisa ku e vershon ta korekto.

Kòrsou

Akí na Kòrsou tabatin algun aña pasá un kaso, kaminda un mama a deklará ku polisnan di e tim di aresto a trapa riba su yuchi ku tabata drumi riba kama huntu kuné. E polisnan a kibra e bentana di kamber i a drenta paden. Segun e dama, nan a subi riba e kama pa detené su pareha. Na e momentu ei nan lo a trapa riba e yuchi. No ta konosí kon e kaso a kaba i ku si tabatin un investigashon.
Resientemente tabatin e kaso di famia Claret, kaminda polisnan di 0-Toleransia a drenta den nan kas pa buska arma di kandela i droga. E tata a entregá un keho, debí na e trouma ku e suseso a laga atras serka su dos yunan. Nan resultadonan di skol a bai atras despues di e suseso.
Anteriormente tabatin tambe un kaso tambe, kaminda e tim di aresto a kibra un porta di glas pa nan por a drenta den un kas. Meskos ku den hopi otro kaso, polis a paga e gastunan pa drecha e porta. Tin indikashon ku sa tin kaso, kaminda no ta drecha e daña material ku e polisnan okashoná. Den un kaso ku a tuma lugá algun aña pasá den e bario Sukasa, polis a keda hopi tempu sin drecha e daña okashoná na un kas, despues di un tiroteo entre dos polis. E balanan a alkansá un bentana i un meter di koriente. Den e muraya di kas tambe a keda diferente impakto di bala. No ta konosí si finalmente a drecha e daño. Durante e tiramentu e doño di kas ku tabata pará den e bentana a risibí un bala den su kurason. Milagrosamente el a skapa di e herida. E polisnan no tabata sa ku ta kolega nan ta.

Lo paga skol òf entregá hóben konsiente laptop pa aña eskolar nobo!

WILLEMSTAD – Fundashon Konsiente den kuadro di su trabounan di konsientisashon di komunidat tin e siman aki un Reto Eskolar Konsiente. Esaki ta un reto konsiente pa duna hóbennan ku ta na HAVO/VWO, IFE òf na UNA i ku ta sufisientemente konsiente pa sa kon importante baimentu di skol ta, un man pa traha riba nan futuro. E reto aki ta únikamente pa e hóben studiante ku tin fondonan limitá loke ta hasi difísil pa e por paga su skol i yega na loke mester pa skol.
E siman aki ku ta di djaluna 21 di yüli te ku djadumingu awor 28 di yüli, 24.00, por apliká riba www.konsiente.com pa bin na remarke pa haña sea aña eskolar 2008/2009 kompletamente pagá òf un laptop pa por hasi tareanan di skol manera mester ta. Tantu mayor òf representante legal di e hóben òf e hóben mes por apliká.
Presidente di Fundashon Konsiente, Reyna Joe a splika, ku tin informashon konkreto ku pa hopi mayor ku ta traha ta difísil pa sera e sèn pa paga skol òf pa kumpra algun kos ku ta hopi nesesario pa e yu ku ke bai skol hasi esaki tambe sin niun doló di kabes. “Ta bon konosí ku tin vários mayor ku ta traha duru i hasi esfuerso, pero debí na situashonnan aktual i ku ta komprendibel, tin e reto pa wak kon ta saka sòm pa por paga loke mester pa nan yu haña un bon formashon pa e por hasi un karera den futuro”.

WILLEMSTAD – Mañan promé Minister Emily de Jongh-Elhage lo sali pa Panamá riba invitashon di Presidensia di Panamá, despacho Primera Dama. E Primera Dama di Panamá ta awor aki sra. Vivian Fernández de Torrijos.
Sra. De Jongh-Elhage lo ta orador dia 24 di yüli próksimo na e di VIII Konferensha di Primera Damanan di Sentro Amérika, Belize, Panamá i Repúblika Dominikana. Tema di e konferensha aki lo ta “Integrashon di personanan ku limitashon den komunidat”.
E invitashon aki a originá durante di e último Konferensha ku e konosí Asosashon di mayornan di personanan ku un desabilidat mental (Totolika) a organisá febrüari último. E konferensha aki ta tin e titulo “Labor pe e persona ku tin un limitashon” Durante dje konferensha aki e presidente di e organisashon di Panamá “Cooperación Técnica Internacional Secretaría Nacional de Discapacidad - SENADIS” a ekstendé e invitashon na nos Promé Minister. Tambe sra. de Jongh-Elhage lo hasi un bishita di trabou serka e presidente di Panamá, Martin Torrijos. Asosashon Totolika tin un delegashon di 5 persona presidí pa sra. Aminta Sprockel ku lo biaha dia 22 di yüli próksimo pa Panamá pa partisipá na e konferensha aki. Premier Emily de Jongh-Elhage lo ta kompañá pa e Hefe di Protokòl di Relashon ku eksterior Kenneth de Haseth.

WILLEMSTAD – Miembro di gerensia di CPA, Agustin Diaz ta bisa ku ta opvio ku e megapir nobo mester bin na Caracasbaai. Es mas, einan tin dos megapir kaba ku den pasado a demostrá nan derechi di eksistensia, asina Diaz a bisa den un entrevista na radio awe mainta. Diaz a referí na e diskushon ku a lanta kabes riba konstrukshon di un megapir nobo pa akomodá barkunan di turista. Si ta DMO, e organisashon di komersiantenan den Sentro di Punda, e megapir nobo lo bin den Punda. E promé megapir ta na Rif den Otrobanda. Otro sugerensianan ku tin ta, pa pone e megapir na Boka Sami. Tin algun sektor ku hasta ke mira e megapir nobo na Bándabou.
Di tur manera, lòs for di unda e megapir lo bin, e gastunan total lo ta den kareda di 86 mion florin. E promé megapir a kosta 28 mion florin. Diaz a bisa, ku pa pone e megapir na Caracasbaai no mester hasi dje tantu gastunan ei. Ya kaba e kompania Royal Caribbean Cruise Line a ekspresá interes serio pa desaroyá e área di Caracasbaai den un área turístiko, kaminda no solamente botonan (grandi) di turista lo mara, pero lo desaroyá e área tambe den un sentro turístiko eksklusivo. Diaz ta bisa, ku por yega na e mesun akuerdo ku e kompania a yega na Sint Maarten, kaminda di un banda a sòru pa akomodashon di e área, pero di otro banda e kompania a komprometé su mes pa trese den kareda di 750 mil pasahero di barku di turista pa e isla.
Diaz a bisa, ku e proyekto aki lo tin un impakto makroekonómiko masha grandi i tambe un “spin-off” grandi pa diferente sektor. “Imaginábu taksinan yen i hasta taksinan akuátiko ku turista”, asina Diaz a bisa. E miembro di gerensia di CPA a rechasá e pensamentu ku un megapir na Caracasbaai lo bai pone mas preshon riba tráfiko. Segun Diaz, e barkunan ta yega despues di e ora ku ta kongestioná den e área aki di hendenan ku ta bai traha. Nan ta bai tambe for di Kòrsou por lo general promé ku e áreanan ta kongestioná di hendenan ku ta regresá nan kas for di trabou.
Por sierto ku e preshon di tráfiko den e área aki tabata punto di diskushon tambe durante di e presentashon di e proyekto di parselashon di APNA pa konstruí kas na proyekto Damasco. Ta masha moveshon di proyekto tin den e área aki na e momentunan aki.
Direktor di APNA, Phillip Römer a pidi atenshon pa e situashon di tráfiko. Römer a atmití, ku e kongestiamentu di tráfiko por stroba sierto desaroyonan den e área aki. “Mester bin un alternativa pa esaki mas pronto posibel. Si no por konstruí un karetera ku lo kore kantu di kosta, ku ta konektá Jan Thiel ku Bapor Kibrá òf un karetera ku ta pasa di Kaya Damasco i sali na Koral Specht, anto ta Caracasbaaiweg mes mester hancha ku dos kareda mas pa outo”, asina Römer a bisa.