WILLEMSTAD -- Promé minister di Antia Emily de Jongh-Elhage a pidi miembro di Konseho Insular Norbert George pa no warda te fin di siman pa presentá dokumentonan ku ta prueba su alegashon ku tin dos konseho di Raad van Advies ku ta desviá fundamentalmente for di esun ku a keda publiká. Si sr. George tin e dokumentonan e mester saka nan awe mes, asina Promé Minister a reakshoná riba e reto di George ku ta pidi Promé Minister pa desmentí ku George lo a bisa ku denter di un siman lo e bini ku un konsepto di Raad van Advies. George a enfatisá, ku ta e konflikto di interes di un miembro di e Raad van Advies, esta sr. Kunneman, ta loke el a mustra riba dje. Si Promé Minister no hasi esaki, lo e publiká e dokumentonan al respekto djabièrnè awor, asina George a bisa. Promé Minister a bisa klaramente, ku e no ta desmentí, pasobra ta loke sr. George a deklará públikamente. Awor kier hasi komo si fuera ta e posishon di sr. Kunneman ta e úniko ku a papia riba dje.
George a bisa, ku el a tende Promé Minister papia na diferente radio, bisando ku ta e a bisa di lo bini ku konsepto di e Konseho di Raad van Advies pa prueba loke el a bisa. “Mi ta desmentí esaki kategórikamente”, asina George a enfatisá. Loke nos a bin ta trese dilanti ta e konflikto di interes di e miembro Kunneman den Raad van Advies, pasobra esaki ta inkompatibel pe funshon ku Kunneman ta okupá. E asuntu ku denter di un siman lo mi bin ku prueba tampoko ta bèrdat, pasobra hamas i nunka lo no kita for di bista ku su promé responsabilidat ta Konseho Insular, ta einan e mester trese su puntonan dilanti ku ta fundamental asina, George a sigui bisa.

WILLEMSTAD – Curaçao Chess Players’ Foundation lo bai tin su workshop riba djaweps 24 di yüli den kuadro di e leyenda di ahedres Bobby Fisher ku a bin fayesé na komienso di e aña aki.
E workshop di Ahedres lo tuma lugá den Sentro di Bario Janwé pa 5’or di atardi.
Inskripshon pa e workshop aki por tuma lugá serka di sr. Alvin Smith na telefon 666-7166 òf sr. Fabio Mensing na telefon 515-4651.
Tur hende lo por inskribí grátis ounke ku bo no ta bai partisipá na e Curaçao Chess Festival 2008.
Ounke ku bo por inskribí riba e fecha di e workshop mes ta deseoso pa inskribí tempran mirando e kantidat di asientonan ku tin pa e workshop.
E Gran Maestro Joel Benjamin di Merka lo duna e workshop aki i tambe lo bai diskutí algun di e weganan memorabel d Bobby Fisher.
E wega simultaneo ku a keda propagandá lo tuma lugá riba djabièrnè 25 di yüli dor di e Gran Maestro Larry Christansen di Merka i lo tuma lugá awor den Sentro di Bario Janwé i ta kuminsá pa 6’or di atardi.
Aki tambe e partisipantenan ta keda invitá pa inskribí serka di e organisadónan di manera ku e organisashon por kana mas soepel. Si tin mas lugá por inskribí te ainda na komienso di e evento.
Djarason 23 di yüli ta un dia liber, kaminda por landa i bishitá playa, kaminda e partisipantenan lo por kombersá ku otro. Tambe riba e fecha aki e ahedresistanan ferviente lo por hunga un torneo blitz.

WASHINGTON – Presidente George W. Bush a duna e delegashon olímpiko di Merka ku lo partisipá den e Weganan di Beijing un despedida entusiasmá i a urgí nan djaluna pa bira e proménan, ounke atento ku na mes momento nan lo ta “embahadornan di libertat” serka China i restu di mundu.
Bush tin planiá pa ta presente den e seremonia di apertura, meskos tambe riba e promé dianan di e kompetensianan di 8 pa 24 di ougùstùs.
Djaluna, den hardin di Kas Blanku, Bush a enkabesá un akto huntu ku dos dozein di atletanan ku lo kompetí na Beijing i a bisa ku e ta “ansioso” pa presensiá algun dje pruebanan.
“Mi ta deseá masha tantu pa saludá nos atletanan, i mi ke kompartí e alegria di nan triunfonan”, el a deklará.
Gruponan defensor di derechonan humano a pidi Bush pa bòikotiá e seremonia inougural komo gesto di desaprobashon pa e represhon na Tibet.
Pero Kas Blanku a argumentá ku e weganan ta un kompetensia deportivo den kua polítika no mester intervení i ku e mandatario lo atendé e temanan di derechonan humano i libertat religioso serka outoridatnan chines den e konteksto apropiá.
Apart di su mensahe na e atletanan riba nan responsabilidat na Beijing, Bush a transmití tambe un mensahe sutil pa China.
“Boso lo ta e kanal di e balornan mas apresiá di nos pais”, Bush a bisa. “Komo embahadornan di libertat, boso lo representá e amor pa libertat ku tin na Merka, i e balor ku nos ta duna derechonan humano i e dignidat di e ser humano na e demas atletanan i na e pueblo di China”.

MOSKU, Rusia, - E presidente di Venezuela, Hugo Chávez, lo firma akuerdonan pa kompra di arma, durante e bishita ku a kuminsá awe na Mosku, algun desishon ku probablemente lo oumentá e tenshon entre Rusia i Merka.
Presidente Chávez lo usa su reunionnan ku e presidente ruso, Dmitry Medvedev, i e promé minister Vladimir Putin, pa realisá su imágen komo un di e krítikonan prinsipal di Merka, ku ta konsiderá e pais merikano aki komo un atversario feros.
“Mi tin hopi speransa ku nos lo bai ta kapas pa sigui konstruí nos aliansa stratégiko”, e presidente venezolano a bisa e periodistanan ora el a aterisá na Mosku.
E akuerdonan lo garantisá e soberania di Venezuela, menasá pa Merka.
Presidente Chávez ta deseá re-armá e Ehérsito di Venezuela ku misilnan, tankinan i supmarinonan ruso, i a gasta miónes di dollar den kompra di avionnan di guera, helikòpternan i fusilnan.
Fuentenan no identifiká di un unidat fabrikante di arma na Rusia a bisa e korant Kommersant, ku Hugo Chávez ainda no a disidí kua arma e ke kumpra.
E oposishon ruso p’e plan merikano pa pone un eskudo antimisil na vários pais di ost di Europa i e ekspanshon di OTAN na Ukrania i Georgia a daña e relashonnan entre Mosku i Washington den último añanan.
Di su banda, e presidente di Venezuela a akusá Merka di a planifiká un gòlpi di Estado den su kontra na aña 2002.

WILLEMSTAD,- Siman pasá Digicel a anunsiá ofisialmente e torneo “Digicel Caribbean Championship 2008” den un forma masha spesial i profeshonal i ku a duna Kòrsou masha atenshon den prensa internashonal.
Ta pa promé bes ku Digicel Group a opta pa lansa e evenemento aki pafó di un di nan merkadonan di mas grandi manera Jamaica i Trinidad.
Ta p’esei, e forma úniko kon Kòrsou a anunsiá e evento futbolístiko grandi aki a kousa masha impakto.
Entretantu karchinan di entrada pa e eventonan aki a sali riba merkado kaba i e demanda ta grandi.
Digicel a anunsiá na mes momento ku a kuminsá mesora ku un kampaña di SMS na unda ku klientenan por manda un SMS ku e paisnan Antia, Dominica òf Grenada ku chèns di gana un pasashi, estadia, hotèl i tíket di entrada pagá pa bai mira e final di Digicel Caribbean Championship te na Jamaica.
Kada SMS ta kosta solamente 50 sèn.
Mirando e forma kon e tim nashonal ta preparando, lo por spera sigur ku e biaha aki si Antia lo bai yega leu den e kampionato aki. Ta p’esei mes e apoyo di nos pueblo ta di masha importansia.
Mester menshoná ku Digicel a perkurá pa un kantidat di premio i sorpresa durante kada wega di futbòl den Stadion Ergilio Hato.
Lo bai tin premionan manera selular, krédito pa hasi yamada i hasta sèn kèsh. Tur esaki pa esnan ku kumpra un entrada i bai apoyá nan tim preferí den stadion.
Karchinan a sali na inisio di e siman aki i ta na benta na Digicel, na SDK, na “4th of July” Bar na Banda Abou, Beep Beep na Rio Canario i Brievengat i tambe na Vanddis na Marie Pampoen.

NEW YORK, Merka, - E tormenta tropikal Dolly awe mainta trempan a fortalesé ligeramente riba awanan kayente di wèst di Golfo di Mexico pa e frontera entre Texas i Mexico, Sentro Nashonal di Orkan di Merka (CNH) a bisa den su último relato.
CNH a bisa ku ainda ta ferwagt ku Dolly lo por bira un orkan promé ku e mishi ku tera dentro di próksimo 24 òf 36 ora.
E modelonan klimátiko ta mustra ku e tormenta ta avansando wèst di e Golfo i lo mishi ku tera mañan na algun lugá pegá ku e kosta di Texas-Mexico.
Atvertensia di orkan a drenta na vigor pa kosta di Texas i pa kosta nortost di Mexico.

Foto: Dolly 2207

Imágen di satélite emití pa NOAA ta mustra e tormenta tropikal Dolly aserkando kostanan di Texas i Mexico awe.

WILLEMSTAD - Djasabra 2 di ougùstùs na SDK for di 10’or di mainta te ku 4’or di atardi Òinki di Girobank ta invitá tur mucha bin práktika deporte kuné en konekshon di selebrashon di su kumpleaño.
Gerente di merkadeo i relashonista públiko di Girobank Mariela Romero a bisa ku e dia aki ta bai ta mas grandi ku e selebrashon di aña pasa na Parke Tropikal.
T-shirt i karchi
Mariela ta sigui splika ku entrante djarason dia 23 di yüli tur mucha ku tin kuenta di Òinki por pasa tuma na t-shirt i karchi di entrada.
Por hasi esaki na ofisina di Scharloo, Janwe, Sta. Maria, Colon òf Zuikertuin.
Kòrda bin ku e delaster statement di e kuenta Òinki i un identifikashon bálido.
Esnan ku no tin kuenta por habri un kuenta i nan tambe ta haña nan t-shirt i karchi di entrada.
Tur mucha sin eksepshon ku ta den e sistema di spar por haña un t shirt.
Pa honra e espíritu di tim ku ta karakterisá Weganan Olímpiko, na weganan di Òinki e mucha tambe por traha su tim i bin e weganan djasabra dia 2 di ougùstùs.
"E por forma un tim di te ku 4 amigu(a). Úniko kos ku tur miembro di e tim mester ta miembro di e sistema di spar Òinki. Si e mucha no ta den e sistema di spar, e por habri su kuenta na kualke un di e ofisinanan di Girobank.
Hopi regalo i premio
Djasabra dia 2 di ougùstùs e mucha mester presentá ku e t-shirt bisti i su karchi di entrada. Yena e datonan kompleto di e mucha riba e karchi i depositá esaki den un buzon grandi ku tin na entrada i tin chèns di gana premionan atraktivo entre otro bala firma outéntiko di Jair Jurrjens.

ARIES: Manifestá bo energia pa medio di arte. Eksplorá terenonan nobo bon sea den músiko, dibuho, kanto. No tira bo talentonan den olvido. 46,03,12.

TAURO: Bo ta kana den e kaminda di prosperidat. Negoshinan ta floresé i ku nan bo stabilidat. Solamente miedu pa triunfá por detenébu. 06,18,37.

GEMINIS: Bo aktitut di problemanan ta kambia. Ya bo no ta víktima di nada ni bo no ta permití ku nan ta manipulábu emoshonalmente. 3,25,10.

KANSER: Kuida bo kuentanan bankario bon. Últimamente bo ta gastando sin kòntròl i lo bo por kousa problemanan si bo no kontrolá nan na tempu. 18,40,13.

LEO: Bo ta generoso pa ku bo sernan kerí, manera nan tin mester. Envolví bo mes den aktividatnan karitativo. Awor bo ta orientando lo espiritual. 01,17,09.

VIRGO: Sigui kultivá triunfonan. Nunka bo no ta falta ken pa dunábu su ayudo den momentunan ku bo tin mester. Bo no por keha awor di bo suerte. 05,11,02.

LIBRA: No hasi nada bou di preshon o lihé. Tuma bo tempu den tur kos. Amor i amistat ta bisa hopi. Habri bo kurason i lag’é konosébu mihó. 22,12,48.

SKORPION: Algu den loke hasta awor ku bo a kere ku ta bèrdat, ta revelá komo un mentira tristu. No deprimí, pa no ta un señal di ku bo ta lanta di e realidat. 19,50,56.

SAGITARIO: Traha parti di bo tempu liber pa pone na òrdu bo kuentanan i pa hasi e tempu bo pago ku ta kontribuí na bo pas mental. 31,26,40.

WILLEMSTAD - Partido MAN ta haña ku mester demokratisá e proseso estatal ku ta kanando awor aki. Ta komo si fuera gobièrnu a sekuestrá e proseso aki ku en realidat mester ta den man di Konseho Insular. Ku e meta pa yega na un aserkamentu entre e partidonan konserní, partido MAN a kuminsá buska kontakto ku partido PAR.
E intenshon ta pa kuminsá ku partido PAR, pero e meta ta pa aserka tur partido, segun Mayra Coffie. Presidente di partido MAN ta konvensí ku por yega na otro, el a agregá.
No ta un sekreto ku partido MAN a manifestá su desakuerdo pa e trayekto estatal ku Kòrsou ta kanando ya pa basta tempu kaba.
Na diferente okashon den pasado partido MAN – partikularmente su eksponentenan den Konseho Insular – a boga fuertemente pa para e proseso te ora partidonan haña otro riba un liña.
MAN no ta di akuerdo ku e trayekto aki. MAN ta haña ku Kòrsou i Antia ta lagando tur kos den man di Ulanda i ta sakrifikando outonomia ku pais a lucha p’e mas di 50 aña pasá.
“Manera kosnan ta bayendo, no por sigui”, asina Coffie a indiká. El a bisa ku a yega momentu berdaderamente pa demokratisá e proseso estatal.
Pa demokratisá e proseso, bo mester para tur kos. Mester fris e proseso, pa asina duna espasio a evaluá i reflekshoná riba loke ta pasando.
“Nos ta kere ku bo mester laga tur ekspertonan lokal bin huntu, laga nan analisá e situashon i bin ku proposishon kon ta sigui,” Coffie a bisa.

WILLEMSTAD - Partido Antia Restrukturá, no tin problema interno pa motibu di e situashon rondó di Dokmaatschappij.
“Bo por tin bo mes pensamentu, pero den partido nos tin un palabrashon ku tur hende ta sigui liña di e partido,” e lider dje partido hel a afirmá.
Ketu bai tin un kantidat di konhetura rondó di nombramentu di un direktor nobo pa Curaçaose Dokmaatchappij (CDM).
Ta konosí, ku e diputado responsabel pa e kompania aki Eugène Rhuggenaath, a pone un posishon klarito riba mesa, esta ku e kandidato mas fuerte te ku awor no ta aseptabel p’e debí na su pasado ku ta manchá ku un kondena di korte pa aktonan kontra lei ku el a kometé.
Banda di esei, Rhuggenaath ta haña, ku e kandidato aki no ta disponé di e konosementu nesesario di mundu naviero.
Rhuggenaath a ripití e posishon aki na diferente okashon den pasado i ketu bai ta para riba su punto ku e ta konsiderá un punto di prinsipio.
Esei mes a lanta un kantidat di rumor di supuesto krísis den e partido hel, komo konsekuensia di e posishon asumí pa Rhuggenaath.
T’asina, ku Rhuggenaath a indiká bon kla, ku si nombra e kandidato, Franklin “Chebu” Sluis tòg komo direktor di e kompania, e ta saka su konklushon.
Rhuggenaath mes a lansa un proposishon pa sali for di e impase aki. El a proponé pa nombra un direktor interino ku e tarea spesífiko pa trese e kambionan nesesario den e kompania i pone e empresa aki riba e kaminda di progreso i kresementu atrobe. E direktor interino aki lo mester keda pa un tempu definí, despues di kua ta nombra un direktor definitivo.

ZWIJNDRECHT/WILLEMSTAD - Un dama di 33 aña di edat a rabia asina tantu durante un pleitu ku su partner, ku el a basha esaki ku awa kayente. E kaso a sosodé ayera na Zwijndrecht.
E hòmber, di 29 aña di edat, lógikamente a sufri kemadura serio na su kurpa i a ser transportá ku urgensia pa hospital kaminda el a keda interná.
Na hospital polis a detené e dama en kuestion.
E dama a konta polis, ku e i su amigu konstantemente tabata pleita ku otro. E pleitu di mas resien aparentemente tabata nèt e gota di mas, ku a pone ku el a kometé e akto.
E dama ta detené, miéntras ku e víktima ta tratando di rekuperá di su heridanan.

WILLEMSTAD - “Tabata nesesario pa oumento salario mínimo. Mi ta kontentu tambe ku e 15 porshento. Pero ta importante pa nos hasi kos struktura. Ki dia ta yega na un maneho pa sueldo mínimo?” asina miembro di Staten pa frakshon di MAN Rignaal “Jean” Fransisca a puntra, durante tratamentu di e lei pa oumentá sueldo mínimo.
Staten siman pasá a aprobá e proyekto di lei ku ta oumentá sueldo mínimo ku 15 porshento.
E disertashon di Fransisca tabatin hopi similaridat ku e filosofia di e moshon di parlamentario Ramonsito Booi ku parlamentu a aprobá ku ta bisa entre otro ku den tres luna di tempu, gobièrnu mester yega na stipulashon di e norma a base di kua ta fiha sueldo mínimo. Awor aki a subi esaki ku 15 porshento, pero e pregunta ta ku esei ta sufisiente, Booi a puntra.
E moshon di Booi a bini, asina e mes a splika, pasobra el a sinti nesesidat pa atendé algun aspekto mas ku tin di aber ku stipulashon di e oumento di sueldo mínimo.
Den e moshon, Booi ta proponé pa fiha e punto di salda pa stipulá sueldo mínimo, pero kaminda ta mara e sueldo mínimo tambe na e norma kiko un hende minimalmente mester, pa e por sobreviví, e asina yamá “bestaansminimum”.
Fransisca ta di akuerdo tambe ku e punto di salida aki.
El a bisa, ku e no por komprondé pakiko e kos a kana asina, ku mester a manda yama Staten for resès pa trata e oumento di sueldo mínimo.
“Awor mi no ke pa komprondé mi malu: nos di frakshon di MAN a bin e reunion ku masha plaser. Ku plaser nos ta sostené tambe kada proyekto na fabor di e klase trahadó, e klase humilde ku ta gana ménos. No ta esei ta e punto. Nos ta sinti falta di inisiativa di gobièrnu den esaki,” el a bisa.

BELGRADO, Sarajevo, - Radovan Karadzic, supuesto kriminal di guera serbio-bosnio, arestá na Serbia ayera, ku identidat falsu tabata biba i traha na Belgrado, outoridatnan serbio a informá den un rueda di prensa awe.
Ora a arest’é den un bùs pegá ku Belgrado, Karadzic ta’tin un dokumento di identidat falsu ku e nòmber di Dragan Dabic.
Miéntras outoridatnan tabata busk’é durante mas ku 12 aña, Karadzic tabata traha na un konsultorio di remedi alternativo na e kapital serbio.
E outoridatnan serbio den e rueda di prensa awe a mustra un pòtrèt ku e aspekto aktual di Karadzic, riba kua e lider serbio-bosnio ta aparesé irekonosibel ku un barba largu blanku i hopi delegá.
E Hustisia serbio ta kla pa manda e supuesto kriminal di guera pa Tribunal Penal Internashonal pa eks Yugoslavia, asina e fiskal spesial serbio Vladimir Vukcevic a anunsiá.
E fiskal a splika prensa na Belgrado ku ya a kuminsá ku e prosedimentu pa ekstradishon di Karadzic.
E minister di Eksterior serbio, Vuk Jeremic, a afirmá ku e detenshon ta demostrá e importansia ku Belgrado ta duna pa un futuro entrada (pa bira miembro) den Union Europeo.
“Nos ke ta un piedra angular pa pas. Nos ke traha pa stabilidat regional”, Jeremic a bisa.
Lidernan i polítikonan a felisitá e gobièrnu di Belgrado pa kaptura di e supuesto kriminal di guera.
E detenshon di e eks lider serbio-bosnio ta demostrá “e gran boluntat” di gobièrnu serbio despues di e último elekshonnan, Javier Solana, responsabel di Diplomasia europeo, a afirmá.

WILLEMSTAD/ ORANJESTAD – Polis na Kòrsou a detené un polis di St. Maarten ku a tira riba su kolega femenino siman pasá. E polis di fam C. a bin Kòrsou pa tratamentu médiko despues ku e tiroteo a tuma lugá na St. Maarten. Ayera a detené na Kòrsou.
Tin indikashon, ku pa falta di bon komunikashon no a hasi e detenshon mas lihé. Despues di e tiroteo e polis a keda kana rònt durante 1 siman. Minsiter David Dick a anunsiá anteriormente, ku e lo pidi Prokurador General Dick Piar un splikashon i ta spera ku a atendé ku e polis segun instrukshonnan. Dick a bisa, ku mester trata e polis meskos ku lo a trata kualke hende ku a tira riba un otro.
E tiroteo segun rumornan ku ta sirkulá tin di aber ku un relashon amoroso ku e polis C. tabatin ku su kolega P. Tin indikashon ku C. a haña sa ku P. tabatin relashon ku un otro hòmber. Siman pasá C. a bai na kas di su kolega P., kaminda el a lòs un tiru riba e porta di kas. Niun hende no a resultá heridá den e kaso akí.
Despues ku e suseso a tuma lugá, e hefenan di C. no a atendé kuné i el a keda den libertat. Dado momentu e lo a biaha pa Kòrsou pa risibí tratamentu médiko. Ora esaki a bira konosí, su mes koleganan na St. Maarten lo a komentá e echo ku el a keda den libertat. E hefe interino di polis na St. Maarten, Richard Panneflek, ta bisa ku el a tuma e medidanan nesesario pa evitá ku erornan di komunikashon similar no ta tuma lugá mas den futuro.

WILLEMSTAD – E sindikato ku ta representá wardadónan di prezu a bolbe bati alarma. Despues ku wes a ordená pa un prezu sinta su kastigu kaminda e no tin molèster di huma di sigaria, e sindikato ta kere ku a yega e momentu pa drecha e parti di seguridat tambe.
E vise presidente di S.Tr.A.F, Deanix Martis a bisa, ku for di aña pasá a traha un plan di seguridat pero a keda sin implement’é. “Mi ta spera ku awor ku e detenido a gana su kaso, awor ta bai implementá e plan di seguridat. E plan akí ta tantu pa e detenidonan komo pa e wardadónan di prezu. Tin te na e momentunan akí dos detenido ku a muri asesiná i niun hende no sa ainda ta kon e kos a tuma lugá i ta ken a hasié. Mirando e sospechosonan ku ta arestando último dianan i mirando e krímennan ku ta sospechá nan di dje, por spera ku e tenshon den prizòn lo lanta un ora pa otro.”
Martis a bisa, ku S.Tr.A.F ta para pa seguridat for di 2006 i ta keda insistí riba esei. Entretantu ta 2008 i no mester keda bira pa tuma akshon. “Mando di prizòn i gobièrnu mester hasi algu awor i no mañan, pasó e veredikto di wes siman pasá a papia palabra kla. Struktura Estatal ta hopi importante, pero e kriminalnan no ta sinta warda e Kòrsou nobo. Nan ta dal bai ku nan krímennan”, Martis a bisa.

WILLEMSTAD/DEN HAAG – For di aña pasá e kantidat di krímen na Ulanda no a baha mas. Despues ku un bahada struktural a manifestá su mes for di 2002, e kantidat di krímennan den 2007 a keda mes tantu ku na 2006. Polis a registrá aña pasá 1.2 mion krímen.
Kasi mitar di e krímennan kometé na 2007 a tuma lugá den e 25 munisipionan mas grandi di Ulanda. Ta trata di 541 mil kaso. Kompará ku 2002 esaki ta un redukshon di 18%. Na Utrecht e kantidat di krímen a baha for di 2002 mas ku tur kaminda. Esaki tabata pa kada 1000 habitante: di 268 na 2002 pa 162 na 2007. Ku esaki Utrecht no ta e siudat kaminda tin mas krímen ta tuma lugá pa kada 1000 habitante. Awor ta Amsterdam a tuma e posishon for di Utrecht.
Kriminalnan ta kometé 170 krímen pa kada 1000 habitante. Na Eindhoven, Maastricht i Rotterdam e kantidat di insidentenan kriminal na 2007 tabata relativamente haltu. Mas ku mitar di tur e insidentenan ta trata ladronisia. Tòg e kantidat di ladronisia a baha fuerte. Na 2007 tabatin 250 mil kaso di ladronisia ménos ku na 2002 ku tabata e aña ku un pik.
Otro krímennan ku tambe ta tuma lugá ku frekuensia ta destrukshon, violensia i krímennan di tráfiko. Entre 2002 i 2007 e tipo di krímennan akí a subi.

WILLEMSTAD – “Turismo no ta kamber so, pero e eksperensia ku e turista ta haña di e lugá ku e ta bishitá. Esei ta e mensahe ku sra. Yvette Raveneau di Amigunan di Tera a ekspresá durante e kaminata eksitoso ku tabatin djadumingu último den e área di Jan Thiel. E organisashon ta bisa, ku entre 500 pa 600 hende a presentá na e kaminata organisá pa Amigu di Tera i Fundashon Desaroyo Marie Pampun i Bisendario (FDMPB). A forma 7 grupo ku a sera konosí ku e área aki guiá pa ekspertonan riba diferente tereno. Tur partisipante por a mira ku nan mes wowo kiko nos isla i su habitantenan lo bai pèrdè ora kita e mondi i paisahe bunita i partikular di Jan Thiel. Tambe nan por a konstatá, ku atrobe nos pueblo lo pèrdè aksesibilidat na kosta i gran parti di e rutanan ku ta pasa den e área di naturalesa di Jan Thiel. Den su diskurso sra. Raveneau a mustra riba uzo di áreanan destiná pa turismo. “Turismo no ta kamber so, turismo ta un eksperensia pa turista. Diariamente turista i habitante di nos isla ta kana keiru relahá i gosa den e área di Jan Thiel. Esaki tambe ta turismo. Sin e área di naturalesa aki, lo keda edifisio so i asina e atrakshon ta bai pèrdí pa turismo”, asina e aktivista ambiental a bisa.
El a splika, ku dilanti di kosta di Jan Thiel a sobra e delaster pida di ref di koral di bon kalidat entre Blauw i Caracasbaai. Konstrukshon i uzo di playa nobo ta kontribuí na nan destrukshon. For di un seritu partisipantenan por a opservá konstrukshon di kas rònt di e laguna. E proyekto nobo planeá di hotèl i bùngalo na Jan Thiel lo kontribuí na enkarselá e laguna ku su naturalesa. Ta parse ku gobièrnu ke pèrmití konstrukshon di hotèl na Seru Spañó, na e otro banda di e laguna i atrobe den área di konservashon. Esaki lo kaba choka i mata bida den e laguna di Jan Thiel. Partisipantenan na e kaminata a keda masha indigná pa tende e notisia aki. Masha hopi partisipante a ekspresá nan aporte pa e akshon pa reskatá Jan Thiel su naturalesa tantu riba tera, komo den laguna i den laman i a enfatisá ku mester kontinuá ku e lucha aki te na final.

WILLEMSTAD – Minister di Asuntunan Ekonómiko Elvis Tjin A Sjoe a garantisá ku tur pòmp di gasolin lo ta bon kontrolá, pa di e forma ei protehá interes di konsumidónan. “Mirando desaroyonan mundial di preis di petroli ku tin konsekuensia direkto riba preis di gasolin lokal, mi a instruí Direktorado di Asuntunan Ekonómiko, pa hasi un kòntròl dirigí, riba tur Pòmpstation ku e meta pa IJk delaster un unidat di Gasolin”, asina e minister a anunsiá.
E minister ta splika, ku den e kuadro aki e Sekshon di IJkwezen, ku ta un dependensia di Direktorado di Asuntunan Ekonómiko di Antia a inisiá den luna di yüni 2008 ku IJkmentu di tur e Pòmpstationnan na Kòrsou. Tin un kantidat di 29 pòmpstation ku ta hasi uso di 519 unidat di kombustibel (regular, super, diesel i kerosin). “E hecho ku nos ta realisando e trabou aki ku presishon i ahustá kada unidat di kombustibel (dispenser) na Sero, ta pa garantisá ku lo no tin ningun desviashon den entrega di kantidat di kombustibel i sigurá e konsumidó ku e ta risibí eksaktamente lokual e ta paga pe. Ta bon pa menshoná ku nos lo implementá un sistema nobo di kontrolá tur pòmpstation ku un frekuensia di tres biaha pa aña. (kada kuater luna). Despues ku e pòmpstation c.q. e unidatnan di kombustibel (regular, super, diesel i kerosin) wòrdu ahustá i ta funshoná konforme lei, e pòmpstation konserní lo risibí un sertifikado di aprobashon. Riba e sertifikado di aprobashon lo bin tur e unidatnan di kombustibel ku ta kumpli ku lokual ta stipulá den e dekreto menshoná den publikashon P.B. 1956 no.75 artíkulo 18. E sertifikado ku tin un valides di kuater luna, mester ta aloká na un lugá visibel pa tur kliente ku ta hasi uso di e pòmpstation”, asina e minister ta bisa.

WILLEMSTAD – No opstante e hecho ku ta studiantenan di arkeologia di Universidat di Leiden ta hasiendo trabounan sientífiko den e área di Santa Barbara, finalmente e material lo keda di Kòrsou. Esei ta sali na kla for di e aktividatnan ku ta tumando lugá aktualmente.
T’asina ku studiantenan di arkeologia di Universidat di Leiden ta koba den tera na oria di Spaanse Water bou di guia di e dosentenan di arkeologia dr. Menno Hoogland i su esposa prof. Corinne Hofman, pa wak si nan por haña señal di bida di esnan ku tabata aki promé ku yegada di e spañónan. Santa Barbara Plantation a wanta poko ku hole 8 i 9 di e kancha di gòlf di klase mundial, den besindario di Hyatt Regency Curaçao Hotel den konstrukshon, te ora ku e ekskavashonnan aki ta tras di lomba.
Anteriormente kaba e arkeólogonan Jay Haviser i Ep Broersta i tambe Elis Juliana i miembronan di e grupo di trabou di eksplorashon arkeológiko di e fundashon NAAM (Nationaal Archeologisch Antropologisch Museum) a hasi investigashon den e mesun área pa buska resto di bida na oria di Spaanse Water. Den un eksplorashon preparatorio aña pasá dr. Hoogland a konkluí kaba ku hopi a bai pèrdí pa motibu di eroshon i hopi vegetashon; tòg e ta konsiderá e sitio komo di balor arkeológiko partikular. Santa Barbara Plantation i universidat di Leiden huntu a finansiá e investigashon nobo aki.
Riba enkargo di Santa Barbara Plantation komo doño di tereno i ku un pèrmit di Ofisina di Monumento di DROV, meimei di yüni último e tim di universidat di Leiden a kuminsá marka algun pida tereno di un pa un meter ku nan a eksplorá pida pa pida. Tur loke nan ta saka di posibel balor, nan ta sefta, spula i seka promé ku nan bai ku na e sentro di formashon hubenil na Santa Rosa kaminda ta surti i registrá kada piesa. Por lo tantu nan a haña 25 diferente tipo di kokolishi, resto di kuminda i di artefakto simpel. Ademas, banda di kolekshonnan grandi di resto di kokolishi di karko, nan a haña tambe sobrá di sitionan kaminda nan a sende kandela i algun indikashon di bohio simpel. Por lo pronto ta presumí ku e hendenan e tempu ei no tabata biba na e sitio, pero ku nan tabata bin di otro parti di Kòrsou òf hasta ku nan tabata prosedente di otro pais i isla den serkania.

WILLEMSTAD – Siman pasá Abogado-General di Antia mr. A.C. van der Schans a hura 8 tripulante di e barku Hr.Ms. Van Speijk i 11 kolaborador di Wardakosta di Antia i Aruba komo polis ekstra ordinario di Antia. E status di polis ekstra ordinario ta enserá, ku e personanan aki lo haña tareanan pa detektá violashonnan di lei i di supervishon den awanan di Antia. E barku Hr. Ms.Van Speijk por hasi tareanan di Wardakosta den forma independiente den awanan teritorial antiano. Esei ta nifiká, ku e barku por aktua den e zona di 12 mia for di kosta kontra transportenan di droga, imigrashon ilegal i violashon di reglanan di medio ambiente i piskamentu. E militarnan a sigui un kurso amplio, den kua a dediká atenshon pa e sistema estatal aktual, trahamentu di un prosèsverbal i legislashon ku ta relevante. Riba e pòtrètnan por mira e momentu ku e komandante di Hr.Ms. Van Speijk, teniente kapitan Peter Kwant ta hura. Tambe por mira Abogado General den kompania di e militarnan i e kolaboradónan di Wardakosta ku a presta huramentu.