Skina di Sorti, awe djarason 23 di yüli di 2008, ta kuminsá ku deseá tur hende un bon dia. Tin sierto kosnan ku ta parse bon pero ku en realidat ta ménos sensato i sigur no e mihó kos pa hasi. Un gobièrnu ku ta konsiente di su meta, ku ta mehorashon kontinuo di nivel di bida di komunidat, mester pone ophetivonan (segun e prinsipio di “smart targets”) a base di kual e por midi progreso den realisashon di e meta. Mi ta keda mira e HDI (“human development index”) komo un bon fuente di inspirashon pa esaki.
****
Kresementu ekonómiko riba su mes no ta un indikashon di progreso den realisashon di meta di gobernashon (a ménos ku esei ta e lokual e koalishon di turno a pone komo meta). Na momentu ku bo tin kresementu ekonómiko i esaki resultá den mehoramentu di nivel di bida di un grupito, bo tin di papia te hasta di un gobernashon defisiente. Na momentu ku kresementu ekonómiko no ta resultando den satisfakshon di algun inkomodidat di e masa (den dje esnan mas vulnerabel), gobièrnu mester ta masha “terughoudend” den su ekspreshon riba e kresementu realisá.
****
Si e masa ta sinti ku su kondishon di bida a deteriorá den sentido ku nivel di seguridat ta ménos, medio ambiente ta ménos, akseso na kuido médiko ta mas difísil, akseso na merkado di labor mas difísil i forsa di kompra ta deteriorá gobièrnu tin di splika dikon kos a bira ménos en bes di profilá realisashon di bon trabou di gobernashon. Semehante profilamentu ta kousa rabia serka esnan ku no a sinti ku nan situashon a mehorá.

AMSTERDAM / WILLEMSTAD – Un enkuesta hasí resientemente na Ulanda a indiká ku mayoria hende ta haña ku kastigunan pa violashon seksual ta muchu abou den e pais. E enkuesta ku tabata un pregunta di dia presentá na 2.300 persona di kua 90 porshento ta di opinion ku kastigunan pa violashon seksual ta muchu abou den e pais.
Espesialmente reakshonnan riba dos veredikto resien na Ulanda ta indiká esaki. Generalmente tin e impreshon ku wesnan ulandes ta duna muchu atenshon na sirkunstansha personal ku ta suavisá e akto di e kriminal. ‘Mester tin mas atenshon pa e delito i e kastigu’, asina un di e partisipantenan na e enkuesta a bisa.
Un hungadó di futbòl profeshonal di BV Veendam a haña e aña aki dos aña i mei di kastigu, pasobra el a violá un muhé aleman di 56 aña di edat, na aña 2006 riba e isla Borkum. E futbolista a pèrsiguí e hende muhé riba un baiskel i despues a dal’é ku un bòter den su kabes benta abou. E señora a kai heridá for di su baiskel i a lucha ku e futbolista pero despues el a bisa den Korte ku el a stòp di resistí ku miedu ku e hòmber lo a mat’é. 57 porshento di partisipantenan na e enkuesta no ta di akuerdo ku e sentensia abou aki. Mayoria ta haña ku pa e violashon seksual mester a duna un kastigu di dies aña òf mas den prizòn. Sigur si tene na kuenta ku ta trata aki di un deportista profeshonal ku ta hopi atmirá.

JERUSALEM, - E aspirante demókrata pa Kas Blanku, Barack Obama, awe a primintí un firme apoyo pa Israel durante un bishita na Jerusalem.
Obama a bisa ku si e keda eligí komo presidente di Merka, e lo traha pa reanimá e proseso di pas na Medio Oriente.
E senador pa Illinois a reuní ku e minister di Defensa di Israel, Ehud Barak, i ku e lider di oposishon di derecha, Benjamin Netanyahu, den un etapa nobo di su gira pa mehorá su kredensialnan den polítika eksterior.
Benjamin Netanyahu, un eks promé minister israelí, a bisa ku e senador merikano a primintí nunka daña e seguridat di Israel, i ku ámbos tabata di akuerdo pa evitá ku Iran lo por bira un potensia nuklear.
Despues e lo reuní ku presidente Shimon Peres; e minister di Asuntunan Eksterior, Tzipi Livni; i e promé minister Ehud Olmert, kende lo por sali for di su kargo p’e investigashon riba korupshon.
“Lo mi kompartí algun di mi ideanan. E idea mas importante pa reafirmá p’ami ta, e relashon históriko i spesial entre Merka i Israel, ku no por kibr’é”, Obama a bisa, ora el a yega Israel ayera nochi.
Barack Obama, kende ta konfrontá su rival republikano, John McCain, den e elekshonnan presidensial di novèmber benidero, tin ku lucha pa superá e deskonfiansa entre algun israelí i e votantenan hudiu na Merka riba e fòrsa di su kompromiso ku Israel.
Pero tambe el a desanimá e dirigentenan palestino ora luna pasá el a bisa ku Jerusalem mester bira e kapital di Israel.

WILLEMSTAD – Un total di 91 studiante ku a sali ayera pa Ulanda, a yega Schiphol pa nan kontinuá nan biahe pa Rotterdam. E grupo di studiante aki a bai kompañá pa diputado Marilyn Alcala-Walle huntu ku direktor di SSC Jonathan Jukema. Na nan yegada e delegashon a keda risibí pa e minister plenipotensiario Mavis Brooks-Salmon i Magda Rafael di SSC Ulanda. Minister Brooks-Salmon na nòmber di Kas di Antia a duna e studiantenan bonbiní den su diskurso. Durante henter e siman e studiantenan lo risibí informashon i guia di tur loke ta e preparashon pa nan akomodashon na Ulanda. Durante e preparashon lo atendé nan asuntu di kuenta di banko, siña konosé kamber i tambe otro asuntunan ku tin pendiente. Durante nan periodo di estudio nan lo keda guiá pa e personal di SSC Utrecht. Riba e foto por mira reportahe di nan yegada na Schiphol.

WILLEMSTAD – Plataforma Agrario Nashonal ta para pa eliminá tur OB riba produktonan produsí lokalmente, di manera ku ta evitá preis haltu pa e pueblo. Esaki tabata deklarashon di Eugene Godfried na LA PRENSA awe mainta relashoná ku e solushon ku a yega ayera entre e krísis di supermerkado i gobièrnu. Godfried ta mustra, ku ta imposibel por a konstatá awor ku ta un fayo a keda kometé i ku awor ta krea e solushon, pero no ta sigui mira e interes di pueblo mas leu ainda. Den su kombersashon ekstenso ku Manuel Bareto, produktor di webu i Joel da Silva de Gois di SuVeCu a hasi ku awor ku tin relashon estrecho entre e tres organisashonnan aki.
Godfried ta amplia, mustrando ku mester ban spera e reakshon di minister di Finansa riba nan petishon pa un kombersashon, pa mustra riba e importansia pa eliminá tur OB riba produktonan agrario produsí lokalmente, di manera ku no solamente ta stimulá agrikultura, pero tambe garantisá produktonan di kalidat haltu. Riba e asuntu di webu no mester pèrmití importashon di esaki sin mas, konsiderando na e peliger di grip di para ku tin den regio. E falta di kòntròl den otro paisnan lo por tin konsekuensia, si mester pèrmití importashon di e tipo di produktonan aki.
Godfried ta afirmá, ku PAN ta karga e vishon pa mira adelanto den produkshon agrario i pa alimentashon responsabel keda poné riba merkado. Tur loke ta lokalmente produsí tin e garantia di kòntròl, miéntras ku produktonan importá no tin e kòntròl manera mester tin. Mester sali atvertensia den kua pa tene kuenta ku produktonan for di eksterior ku por ta peligroso pa e komunidat.

VLIJT-TRINIDAD
Asteria
Mihó konosí komo Chechi Machi òf Mai
A laga atras su yunan Emerita St. Jago, Emilia i Sukhdev Singh-vlijt, Toribio Vlijt, Victor i Brigitte Vlijt, Romualdo i Margriet Vlijt-Helmijr, Edson i Catharine Vlijt, Isolia i Raoul Alias-vlijt, Cynthia i M’hamed Moukri-Vlijt, Marilyn Vlijt, Hensly i Marianne Vlijt-Cox, Frensly i Grace Vlijt-Ledder, Nadira Leesly tur ku nan famia. Akto di entiero ta djaweps 24 yüli for di El Tributo. Bishita 9or. 10.30or tin un respòns na El Tributo.

DOS SANTOS VIEIRA
Rosa
Mihó konosí komo Rosita Modista
A laga atras su yunan maria Custodia Dos Santos, Maria Ilda Dos Santos Cappadona, Elvira Dos Santos Pereira, Antonia Dos Santos. Akto di entiero ta djadumingu 27 yüli for di misa Suffisant pa santana Sta. Maria. Bishita 1or-3or.

JONES
Marvis Altagracia Karin (49 aña)
Mihó konosí komo Marvis ku a traha na General Catering, Franky’s Catering, Winnie’s Catering, Ma’s Catering
A laga atras su mama Ines Agatha Jone-Jacobs, yunan Milda Jones, Sandra Shermila Jones, rumannan Gloria, Irene, Edwin, Marian, Adriana, Arnold, Sandra Jones, Alfred i AirineJones, Evelin i Ronald van Egmond, Graciela Jones, Delano Cairo. Akto di entiero lo tuma lugá djasabra 26 di yüli na Ulanda.

ROOIJER
Gilberto Maximo
Mihó konosí komo Tooy
A laga atras su kasá Edna Roojer-Willems, yunan Hensley Rooijer i Dominique Sandberg, Gilbert Roioijer i Saskia van den Velden, ñetunan Shaquille, Thirza, Raphy, Norah, suegra Virginia Willems. Akto di entiero ta djasabra 26 yüli. Bishita 9or-11or na El Consolador. Tin un respòns. Kremashon ta tuma lugá den seno familiar.

ROMA – Djamars polis a arestá shete persona di un grupo mafioso ku a trata di kumpra e klup di futbòl Lazio ku plaka labá.
Tres persona ta sigui fugitivo den un investigashon ku a envolví nuebe italiano i un húngaro, kendenan a trata di kumpra e klup ku plaka ku a bini di aktividatnan ilegal di e klan Casalesi di e ‘camorra’ (mafia) napolitano, asina polis romano a bisa den un komunikado.
Un dje fugitivonan ta e eks delantero di e selekshon italiano Giorgio Chinaglia, kende nan ta kere a hui pa Merka dos aña pasá, ora a ordená su detenshon bou di akusashon di ekstorshon i tráfiko di influensia den Lazio, asina e ofisial di polis Gianluca Campana a bisa.
Chinaglia, kende a hunga pa Lazio na 1974, tempu e klup a gana su promé título, i despues tabata su presidente, ta akusá di a trata di influenshá e preisnan di e akshonnan di e institushon ilegalmente, asina fiskalnan a bisa na 2006.
Nan ta akus’é di a trata di tumba e presidente aktual, Claudio Lotito, ora el a publiká e notisia falsu di ku un grupo di invershonistanan húngaro ta trata di bira e akshonista ku ta kontrolá e klup.
E akshonnan di Lazio ta riba e bolsa di Milan.
Na e momento ei, Chinaglia a rechasá e akusashonnan den entrevistanan ku prensa italiano. E òrdu di detenshon djamars ta pone aserka labamentu di plaka huntu ku e otro akusashonnan.
Segun polis, e investigashon ku a kondusí na e detenshonnan djamars a revelá ku e fondonan pa kumpra e klup ta bini di e mafiosonan Casalesi, kendenan a trata di laba e plaka via transferensianan na bankonan strañero.

Lorito ta yama tur hende un felis djarason. Awe si ta awe. Ta kon ta hasi? Ya kaba fakansi ta den su fase final. Hopi hende ya kaba a kuminsá regresá.
*********
Lorito a komprondé, ku e aña aki a gasta den kareda di 50 mion florin na fakansi. Si bo lesa kuantu divisa a kumpra den yüni so, ku ta 49.8 mion florin, ya bo sa di kiko nos ta papiando. Ainda nos no a konta yüli aserka. Ménos mal ku nos divisanan ta na un sifra rèkòrt di 1.951 mion florin, loke ta nifiká e gastamentu di divisa pa awor aki no tin reperkushon pa nos reservanan. Bo ta kòrda e tempu ainda ku mester a restringí gastamentu di divisa ku medidanan fuerte? Anto ainda tin hende ku sa mihó, manera ekonomistanan, ta sigui pretendé ku kos no ta bayendo bon! Lebumai nos!
*********
Si bo tende un ekonomista dirigí un programa na radio, bo ta haña e impreshon, ku ta hende negativo so ta yama. E mesun hendenan ku tabata yama den e programa aya, awor a haña un otro programa pa nan yama. Nos ta kere, ku komo ekonomista, bo mester bisa e kosnan manera nan ta. Ademas ki dia ta invitá hendenan ku ta pensa otro? A para bira den diferente programa, ku polítikonan aktivo ta presentá ku nan ta invitá esnan ku ta kontra so. Nunka bo ta tende e hendenan ku ta pro tal kos. Bon radio ta nifiká, bon balansa di programa. Un kos bon di e programa: e mener ta papia hopi eduká si!
*********
Nos a tende pida di Nelson P. tambe ayera na radio. Si bo tende Nelson papia awe, ta manera ku e tin solushon pa tur kos. Mira e kaso di Cuba. Awe e ta kritiká e situashon di trahadónan kubano, pero e tabata den e posishon envidiabel pa e kòrta e eksesonan ku tabata tuma lugá na Dòk huntu ku su primu Farley ku el a pone na e puesto. Falta di determinashon (pa nos no bisa algu otro) a pone ku el a tete, tete i tete i kosnan a sigui mesun kos. Ademas e netwerk na Dòk tabata mas poderoso kuné. Ta mesun netwerk ku tabata pone aviso grandi den su revista i ku a haña distinshonnan prestigioso den pasado di e mesun revista.

WILLEMSTAD – Partido PAR ta sigui pone preshon pa lider di Democraat Norbert George duna klaridat den e akusashonnan ku el lansa den direkshon di Raad van Advies. “E no mester bòltu e situashon”, asina miembro di Konseho Insular Remco Gomez ta bisa.
E ta splika, ku dia 12 di yüli 2008, Konsehal Norbert George di DP a lanta akusashon i insinuashon den direkshon di Gobièrnu Sentral i Raad van Advies, kaminda el a bisa di tin prueba ku Gobièrnu Sentral a manda Raad van Advies kambia un konseho na fabor di Gobièrnu. Den mes rosea Konsehal George a bisa ku e ta bini denter di un siman ku e lo presentá pruebanan al respekto. Minister Presidènt a reta Konsehal George pa no warda te ora esun siman ei pasa, sino presentá mesora ku e pruebanan.
“A pasa kasi dos siman i te awe sr. George no por presentá ku pruebanan ku el a primintí.
Sr. George ta zuai ku papel na televishon i awor ke bòltu e asuntu i hasi komo si fuera ku ta Minister Presidènt mester bini ku prueba ku gobièrnu no a manda RvA kambia un konseho na fabor di gobièrnu. Sr. George ke brua asuntu, pasobra a hink’é den un huki i e no sa kon pa saka su kurpa i awor ata sr. George ta na kareda. Ta sr. George a bisa di tin prueba ku Gobièrnu Sentral a mete den asuntu di Raad van Advies. Un instituto íntegro den nos komunidat ku semper a gosa di rèspèt di un i tur. Awor, pasobra sr. George no por haña su mes den e konseho di Raad van Advies, awor sr. George ta kuestioná integridat dje órgano aki. E situashon aki ta unu hopi serio! Pues un biaha mas nos ta pidi sr. George pa stòp di zuai ku yen di papel den un intento pa krea konfushon i duna nos e pruebanan ku tantu el a bisa ku e tin. No ta hustu pa un Konsehal ta purba tacha integridat di un instituto manera Raad van Advies, ta sigui tilda i tira kos den laira; purbando pa krea un ambiente i esfera ku tin kos ku no ta bai bon den e órgano aki , un órgano ku nos tur ta karga i respetá! Òf akaso ta esei mes ta e intenshon di sr. George! Promé sr. George eksigí e konseho di Raad van Advies, awor ku e konseho no a sali manera e tabata ke, manera un mucha malkriá el a kuminsá tira ku lodo. E akusashon i insinuashon aki ta unu serio. Pues awor ta ora pa sr. George stòp di hasi wega ku asuntunan serio i presentá e pruebanan di loke el a akusá Gobièrnu Sentral i RvA di dje!”, asina Gomez ta bisa.

WILLEMSTAD – Outoridatnan a detené awe mainta un trahadó di un fábrika di limonada lokal, komo un di e sospechosonan prinsipal den e kaso rasial ku a tuma lugá dia 26 di yüni último den Nieuwestraat den Punda. E hòmber tin antesedentenan kriminal i tabata será kaba den pasado den Bon Futuro.
Awe mainta outoridatnan a hasi dos entrada den e área di Buena Vista i Juan Hato. Einan a detené e hòmber Junel Francisca di 36 aña di edat, relashoná ku e kaso aki ku a kousa un konmoshon enorme den nos komunidat i a plama tambe pa komunidat internashonal. Outoridatnan no ta ekskluí mas detenshon. Durante e entradanan awe mainta a bai ku diferente artíkulo i opheto. LA PRENSA tin entendí, ku un di e kosnan ku investigadónan a bai kuné ta un kòmpiuter. For di e kòmpiuter aki outoridatnan ta trata di destilá si tabatin apoyo (polítiko) pa e insidente serio ku a tuma lugá dia 26 di yüni último parti anochi i si e akto tabata parti di un instigashon organisá. Informashonnan ku LA PRENSA a haña ta bisa, ku e tim spesial ku ta trahando riba e kaso tin man yen di pa analisá loke a pasa. Mañan ta hasi 4 siman ku e kaso aki a tuma lugá. E investigadónan a analisá un seri di imágen i pòtrèt i a trata di konopá tur kos na otro, pa hasi e promé detenshon posibel. Den e kaso aki e tim spesial kier tabatin e garantia, ku na momentu ku pasa pa detenshon, ku e detenshon lo pasa tambe e kriterio di wes komisario ku ta huzga e detenshonnan aki. Nan no kier kore e riesgo pa pasa pa detenshon mesora, ku e konsekuensia ku e sospechonan no ta sufisiente argumentá i mester laga e sospechoso(nan) bai. Outoridatnan no ta dunando masha informashon mas kiko por spera, pero un bosero di polis a bisa, ku no ta ekskluí e posibilidat di mas detenshon. E bosero a bisa, ku e hòmber ta un di e sospechosonan prinsipal di loke a pasa. Manera LA PRENSA a informá, den e kaso aki, un grupo di hende a drenta parti anochi serka di 12’or den e área, kaminda por lo general ulandesnan oropeo ta frekuentá i nan a kousa un insidente serio. Un di nan a pasa man pa un opheto i a heridá e hóben Moreno kuné riba su kabes. Tabatin informashon den promé instante, ku tabata trata di un piedra, despues a bisa ku ta un klenku, pero LA PRENSA tin informashon, ku e herida den e kaso aki tabata kousá pa un di e krùknan di e bar. Moreno a keda basta dia den hospital pa tratamentu di e herida serio ku el a haña na su kráneo. E siman aki el a hasi su promé aparishon públiko for di despues di e kaso durante presentashon di e buki “De Antillen en Ik” ku John Leerdam den Teater Luna Blou.

WILLEMSTAD – Den e parke di La Sonrisa ta tumando lugá e Kampionato di Karibe di Little League.
Na e kampionato aki un total di 9 pais ta partisipando.
E paisnan aki a keda repartí den dos pul.
Pul A ta konsistí di: Bermuda, Puerto Rico, St. Maarten, Jamaica i Repúblika Dominikana.
Pul B ta konsistí di: US Virgin Islands, Aruba, Kòrsou i Boneiru.
Djadumingu último a hunga e promé dos partidonan.
Puerto Rico ta zona Bermuda 37-0 i St. Maarten tambe ku skor grandi di 18-2 riba Jamaica.
Djaluna den un bon partido, Puerto Rico ta gana di Repúblika Dominikana 3-2.
Aruba ta gana 3-0 di US Virgin Islands, St. Maarten 14-4 riba Bermuda i Kòrsou 10-0 riba Boneiru.
Ayera e kampionato a kontinuá ku Repúblika Dominikana 10-0 riba Bermuda.
Den un wega ku no tabata apto pa esnan ku kurason debil den èkstra ining den di 7 ining, Kòrsou ta logra triunfo di 3-2 riba Aruba.
Puerto Rico ta zona Jamaica 23-5 i den un otro bon partido Boneiru ta bini djatras pa gana 8-7 di US Virgin Islands.
Kòrsou ta hunga mañan atardi mitar di 2 kontra di US Virgin Islands.

WILLEMSTAD – E kaso di atrako ku a tuma lugá ayera nochi riba Cubaweg, a laga un víktima gravemente heridá. E hòmber E.D. di 61 aña di edat aktualmente ta interná den un situashon krítiko den hòspital, segun polis a informá.
Tabata ayera nochi den kareda di 19.50 ora polis a risibí notifikashon di un atrako na un kantor di number riba Cubaweg. Ora polis a yega na e sitio nan a lokalisá e víktima ku tabatin un herida di bala na su barika. Segun investigashon ku polis a hasi na e sitio, e hòmber a hañ’é sorprendé dor di un atrakadó ku a eksihí plaka. Ounke polis no ta informá detaye di e suseso, tin indikashon ku e víktima a duna e atrakadó sèn, pero esaki a haña ku e tabata muchu tiki. Seguidamente e lo mester a reklamá e víktima ku e plaka ta tiki pa despues tir’é.
E kaso akí ta e di dos den apénas 1 luna, kaminda atrakadónan ta skohe kantor di number pa atraká. Resientemente un dama bendedó di number a bira víktima di un atrakadó. Den e kaso akí a detené algun hóben entre 15 i 17 aña sospechá di a tira e atrako. E atrakadó a tira riba e dama ku un arma di kandela i a herid’é na altura di su pechu.

DENVER – Manera e alineashon di ayera nochi tabata, e mènedjer di Dodgers, Joe Torre, no ta kla ainda pa saka Andruw Jones for di e alineashon.
Pero Juan Pierre ta hopi mas adelantá di su skèdjel pa regresá alineashon ora ku awe e ta kuminsá ku rehabilitashon di su rudia robes den weganan di Liga Menor. E por ta bèk ku e tim grandi pa fin di siman.
Matt Kemp i Andre Ethier ta produsiendo na kabes di e alineashon, i ta mustra ku Jones lo por ta for di alineashon.
Jones a “struggle’ durante di luna di aprel i mei i Torre tabatin pasenshi bisando ku Dodgers tin mester di Jones su bate si nan kier gana e aña aki. Despues ku Jones a regresá for di un operashon na su rudia dos siman pasá, Torre tabatin pasenshi, pèrmitiendo Jones rehabilitá den weganan.
Ku e “trading deadline” aserkando Dodgers ta mirando chèns pa tuma liderato di e divishon i no por pèrdè tempu.
Pero Torre kier duna e coachnan nobo di bateo un oportunidat pa yega na un konklushon riba Jones.
“Te ainda ta tempran”, asina Torre a bisa. “Tantu Donnie (Don Mattingly) ku Jeff Pentland ta trahando riba kosnan spesífiko. Ta un kos pa bo praktiká i un otro kos pa hunga den wega i pone e kos den práktika. Mi no ta kere ku tabatin sufisiente tempu pa tur kos ta kla”.
Mattingly tin sinku dia ta trahando komo “full-time” coach di bateo pa Dodgers.
Pentland ta e instruktor di bateo di Liganan Menor i a traha ku Jones durante ku e tabata na Las Vegas, sukursal AAA i tambe durante di e pousa di All-Star Game. Ámbos persona a rekonstruí Jones su “stance” i swing, enfatisando riba balansa i keda atras.

WILLEMSTAD - Basta lágrima tabatin ayera tardi, na momentu ku e promé grupo di bekado pa e aña aki tabata na punto di abordá e avion di KLM, rumbo pa Ulanda pa sigui nan estudio avansá.
Tabatin e esenanan tradishonal di tur aña, di mama i tata tumando despedida di nan yu(nan).
Notabel ta si, ku vários studiante a duna di konosé di ke regresá Kòrsou, unabes ku nan finalisá nan estudio. Manera ta konosí, esei ta un dje dolónan ku gobièrnu ta sinta kuné i tur aña, na momentu di tuma despedida, ta enfatisá serka e hóbennan aki e importansia di bini bèk i bin yuda konstruí pais.
Por sierto ku durante e Passaat Recruitment Days ku a tuma lugá na mei último tambe a resaltá ku tin hopi hóben ku ke regresá, pero si ke e garantia riba un bon trabou i alohamentu.
Un kantidat di en total 370 studiante ta biahando e siman aki pa Ulanda pa sigui ku nan estudio. Stichting Studiefinanciering Curaçao a prepará e hóbennan aki manera kustumber, dunando diferente seshon di informashon. Algun siman pasá tabatin e seshon tradishonal kaminda un kantidat di instansia manera duana, polis i e kompania KLM a duna informashon ekstenso na e studiantenan.
Pa motibunan logístiko, e studiantenan lo bai den tres buelo ku e kompania KLM. E kompania lo no bula ku e avion jumbo manera a bira tradishon pa hopi aña kaba.
Por sierto ku aña pasá, ya kaba tabatin un kambio, pasobra estudiantenan a biaha den dos grupo. E aña aki, nan lo biaha den 3 grupo.

AMSTERDAM/WILLEMSTAD - Na Ulanda, nan a disidí ku ta stòp di stimulá hende muhé pa kontrolá nan pechunan regularmente, pa weta si nan por tin señal di kanser. Ekspertonan a konkluí, ku e método ei no ta asina efektivo, asina Koningin Wilhelmina Fonds, KWF a anunsiá.
KWF a konfirmá un informe den e sentido aki ku a sali den e korant ulandes De Volkskrant.
Ta konosí, ku pa hopi aña kaba, aki na Kòrsou tambe organisashonnan ku ta bringa e enfermedat aki, manera Prinses Wilhelmina Fonds den forma sistemátiko a bin ta rekomendá hende muhé pa kontrolá nan pechunan regularmente.
E punto di salida semper tabata ku asina sinti un pipita, ta rekomendabel a laga dòkter wak ta kiko e ta, pasobra e por ta indikashon di e promé señalnan di kanser na pechu. Kanser na pechu ta un dje enfermedatnan teribel ku tur aña ta pone hopi hende muhé pèrdè un òf mas pechu, esta si nan ta na tempu a lo ménos.
P’esei semper e rekomendashon tabata pa kontrolá regularmente, bou di e lema “kanser ta kurabel, basta bo ta na tempu.”
Awor KWF sinembargo tin otro pensamentu. KWF ta bisa ku a keda proba ku saminashon di pechu no ta kondusí na mesun morto pa aña. Asta e por tin konsekuensia negativo, segun Koningin Wihelmina Fonds.
A keda probá, segun KWF ku hende muhé ku ta saminá nan pechu ta bai dòkter ku mas frekuensia i ta keda someté na operashon, ku despues hopi biaha ta resultá di no tabata nesesario.

WILLEMSTAD - Antia ta apelá e sentensia di korte ku a dikta ku un pareha homoseksual ku a kasa na Ulanda, tin mes derechi na Antia i na Aruba ku kualke pareha.
E kos aki p’ami, ta un kuestion di prinsipio, asina minister di Salú Públiko Omayra Leeflang a deklará.
Ta trata di e kaso konosí kaminda un pareha lesbiana kier a hasi uso di Bureau Ziektekostenverzekering, BZV. Un dama kier a sigurá su partner i nan yunan na ofisina di BZV pa gastunan médiko. Riba rekomendashon di minister di Salú Públiko, BZV a ninga di aseptá e miembresia aki, riba kua e pareha a disidí di skohe kaminda di korte.
E argumento di BZV tabata ku un matrimonio di e mesun sekso, no ta ser aseptá den nos komunidat.
Korte, klaramente a pensa otro i a dikta ku debidamente BZV tin e deber di sigurá e pareha pa gastu médiko.
Ta konosí kaba di pasado, ku Omayra Leeflang, semper tabata kontra matrimonio di e mesun sekso. Den pasado tabatin e kaso ku a hunga prinsipalmente na Aruba pa kua e mandatario antiano tabatin e mesun pensamentu i punto di salida.
Pa minister Leeflang, e kaso ta un kaso di prinsipio. El a mustra ku na Antia nos no konosé matrimonio di e mesun sekso. Segun e definishon pa Antia, un matrimonio na Antia ta monogamo i heteroseksual, ku ta nifiká ku un matrimonio ta entre un hòmber i un muhé. Un muhé tampoko por tin mas ku un hòmber komo kasá, un hòmber tampoko por ta kasá ku mas muhé.

WILLEMSTAD - Supermerkadonan na Kòrsou entrante awe ta bende webu di galiña atrobe. Esaki ta resultado di kombersashon ku a tuma lugá ayera tardi entre representantenan di asosashon di supermerkadonan SUVECU i gobièrnu di Kòrsou.
A klarifiká e malentendimentu ku a surgi di manera ku nos por sigui normalmente ku nos aktividatnan di bendementu di webu, asina Joel da Silva Gois, presidente di SUVECU a deklará.
Kòrsou a keda pa mas ku un siman sin un dje produktonan di mas solisitá den kada kas di famia, ku ta webu. Ta konosí ku ta usa webu den preparashon di un gran kantidat di kuminda i kos di boka dushi.
Esensia di e problema tabata e desishon di Departamentu pa Asuntunan Ekonómiko (DEZ) pa redusí e márgen di ganashi di e supermerkado den benta di webu di 11 te na 5 porshento.
Pa supermerkadonan, esaki a resultá inaseptabel. Di mes, e márgen di 11 porshento no ta kos di kanta makamba, p’esei e desishon di gobièrnu tabata inaseptabel pa nos, Da Silva Gois a indiká.
Despues di algu mas ku un siman ku Kòrsou a keda práktikamente sin webu di galiña, ayera partidonan a sinta na mesa i a yega na un entendimentu. E hecho ku e diputado responsabel pa e kartera ekonómiko Eugène Rhuggenaath no tabata na Kòrsou (e tabata na Ulanda den kuadro di un bishita di trabou) a pone ku kos a tarda un poko.
DEZ a rekonosé, segun Da Silva Gois, ku el a hasi un kalkulashon robes di e preis, ku konsekuensia ku e preis di benta a resultá demasiado abou.

WILLEMSTAD - E negosiashonnan entre Ulanda i Kòrsou pa yega na un struktura estatal nobo, hopi biaha ta kana difísil i ta fuerte, asina diputado Zita Jesus-Leito, enkargá ku Struktura Estatal a bisa den un entrevista ku a sali publiká den e korant ulandes De Telegraaf awe.Jesus-Leito ta negoshá pa Kòrsou riba tereno estatal. Manera ta ampliamente konosí, Kòrsou ta luchando awor aki pa optené su status komo pais Outónomo den Reino. “E kos aki no ta fásil. Pero nos no ta entregá. Nos ta dispuesto pa duna tur kos pa yega na e pais Kòrsou nobo,” asina e diputado a bisa tekstualmente. Ayera e delegashon di Kòrsou a duna informashon amplio na prensa riba e deliberashonnan estatal. Den un seshon na Banko Sentral di Antia a kontesta tur pregunta relevante ku prensa tin pa loke ta trata e proseso aki.
Manera ta konosí, anteriormente e luna aki e deliberashonnan entre Ulanda i Antia pa yega na funshonamentu di kuerponan polisial pa e entidatnan nobo, a frakasá. Kòrsou, St. Maarten i Ulanda no por a haña otro riba e lei ku mester regla organisashon di kuerponan polisial pa Kòrsou, St. Maarten i e islanan chikitu. Si anteriormente tabatin problema, pasobra Ulanda tabata ke un solo kuerpo polisial, finalmente ta papiando riba un solo kuerpo pa kada isla. Pero Ulanda ta haña ku mester regla sierto kosnan den un kuerpo komun, anto Kòrsou i St. Maarten tin opheshon kontra esaki. Algun siman pasá sekretario di Estado, Ank Bijleveld a reuní ku delegashon di Kòrsou, di St. Maarten i di Gobièrnu Sentral.

ARIES: No kontrolá, laga ku e persona ku bo ta stima ta ku bo pa amor i no pa obligashon o deber di humildat. Esun ku realmente ta bal no tin ku preokupá. 20,01,37.

TAURO: Bo mundu di amistat ta enrikesé. Bo selekshon di sosionan ta hopi asertá, loke ta hibábu na triunfo den tur negoshi real. 41,32,39.

GEMINIS: Bo ta awor e gran representante di romanse i divershon i bo ta logra pa rekuperá tur kosnan ku tabata negativo i hasi nan positivo. 16,05,14.

KANSER: Bo mundu sentimental ta distinto awor. Duna bo bida matrimonial un segundo oportunidat, papia di kurason pa kurason. Buska e bèrdat. 38,04,27.

LEO: Libra bo mes di kustumber i leinan kaduká, ku ya no tin ningun vigensia den e mundu aktual. Eksigí loke bo ta meresé, balorá bo mes, hasi bo mes karu. 12,49,35.

VIRGO: Ku bo bos a wòrdu tendé i bo mensahe respetá. Tur labor ku arte ta hopi benefisiá pa bo lus oumentá i bria kada dia mas. 09,14,07.

LIBRA: A yega bo momentu di prosperidat. Sali for di lokual ku bo ta sinti bo mes será. Awor bo ta bai logra bo soñonan ku tabata mustra imposibel. 15,39,08.

SKORPION: Bo tin bo impulsividat awor bou di kòntròl i no lagabu wòrdu deslumbrá pa palabranan bunita, espesialmente den e área di amor. 03,13,22.

SAGITARIO: Tuma e batuta i dirigí bo propio orkesta. No sinta spera pa nada ni niun hende. E espiritualidat ta atkirí un enorme importansha pa bo. 40,13,02.

WILLEMSTAD - Djasabra 2 di ougùstùs na SDK for di 10’or di mainta te ku 4’or di atardi Òinki di Girobank ta invitá tur mucha bin práktika deporte kuné en konekshon di selebrashon di su kumpleaño.
Gerente di merkadeo i relashonista públiko di Girobank Mariela Romero a bisa ku e dia aki ta bai ta mas grandi ku e selebrashon di aña pasa na Parke Tropikal.
T-shirt i karchi
Mariela ta sigui splika ku entrante djarason dia 23 di yüli tur mucha ku tin kuenta di Òinki por pasa tuma na t-shirt i karchi di entrada.
Por hasi esaki na ofisina di Scharloo, Janwe, Sta. Maria, Colon òf Zuikertuin.
Kòrda bin ku e delaster statement di e kuenta Òinki i un identifikashon bálido.
Esnan ku no tin kuenta por habri un kuenta i nan tambe ta haña nan t-shirt i karchi di entrada.
Tur mucha sin eksepshon ku ta den e sistema di spar por haña un t shirt.
Pa honra e espíritu di tim ku ta karakterisá Weganan Olímpiko, na weganan di Òinki e mucha tambe por traha su tim i bin e weganan djasabra dia 2 di ougùstùs.
"E por forma un tim di te ku 4 amigu(a). Úniko kos ku tur miembro di e tim mester ta miembro di e sistema di spar Òinki. Si e mucha no ta den e sistema di spar, e por habri su kuenta na kualke un di e ofisinanan di Girobank.
Hopi regalo i premio
Djasabra dia 2 di ougùstùs e mucha mester presentá ku e t-shirt bisti i su karchi di entrada. Yena e datonan kompleto di e mucha riba e karchi i depositá esaki den un buzon grandi ku tin na entrada i tin chèns di gana premionan atraktivo entre otro bala firma outéntiko di Jair Jurrjens.