WILLEMSTAD.- Ken no ta kòrda Henry López Sisco, ku su barèt bèrdè di banda, su bigoti i airu di militar invensibel. Esun ku a dirigí di forma espektakular e reskate di e avion sekuestrá di Aeropostal den mardugá di 31 di yüli 1984. Esun ku personalmente a tira e dos sekuestradornan mata. Ken por a pensa ku apénas 4 aña despues e lo a bira un di e personanan mas kontroversial di e pais bisiña, ora ku poko poko a kuminsá sali na kla ku e tabata embolbí den por lo ménos dos kaso di asesinato di desena di persona, kada biaha riba órden di gobièrnu mes.
Apénas kuater aña despues di su akto “heroiko” na Kòrsou, a kuminsá sali informe tokante su embolbimentu den e asina yama “Masacre de Yumare”, durante kua a asesiná desena di persona ku kuminsá ku gestionnan kontra e gobièrnu di Jaime Lusinchi. Den un operashon ku nan a yama “Operacion Aguilla III”, a laga traha un trampa pa e personanan ku tabata akshoná kontra gobièrnu di Lusinchi, dor di laga personanan den servisio di Disip infiltrá nan filanan. E “infiltradónan” a invitá e grupo di personanan pa un reunion den interior di e pais, na un sitio konosí komo Los Amparos bou di e preteksto ku ta trata di un reunion pa deliniá strategia polítiko kontra e gobièrnu di AD. Unabes na e sitio, un grupo di komando di Disip a ataká e grupo, asesinando nan tur, klaro ku eksepshon di e “infiltradónan”, kendenan a bisti un otro koló di kamisa, pa asina distinguí nan di e restu.

WILLEMSTAD.- Ounke ofisialmente nunka sali na kla e motibu prinsipal pakiko Hilertant Dominique i su kompañero Segundo Castillo a sekuestrá e avion di Aeropostal 24 aña pasá, tòg atraves di añanan a bini hopi kos dilanti ku ta duna indikashon ku ta trata aki di muchu mas di un simpel sekuestro pa haña arma i plaka pa kuminsá un rebelion na Haiti. E eksigensia di Dominique pa haña 300 mitrayùr, 300 pistol di man, etcetera, mas 3 mion di dollar tabata “puro cuenta”, segun hendenan ku por sa. Aparentemente, tur loke Hilertant tabata ke, tabata plaka ku e mester a haña di gobièrnu venezolano pa trabounan di infiltrashon i di inteligensia ku el a hasi den e kolonia dominikano i haitiano residensia e tempu ei na Venezuela.
Tur hende ta kòrda ku na final di añanan ’70 i kuminsamentu di añanan ’80 un kantidat enorme di dominikano i haitiano a bai Venezuela pa aya buska un mihó bida. Gobièrnu venezolano tabata hopi preokupá pa e “influx” enorme aki, miéntras ku gobièrnu di Baby Doc Duvalier konstantemente tabata preshoná gobièrnu venezolano pa stroba formashon di gruponan rebelde ku por a bini Haiti pa purba derok’é.
Gobièrnu di e pais bisiña mesora a akshoná su servisionan di inteligensia i pa medio di dominikano i haitianonan mes, tabata infiltrá e gruponan aki pa vigilá nan. Dominique i Castillo tur dos tabata traha pa Disip, di akuerdo ku informenan no ofisial ku LA PRENSA ta disponé di dje. Hasta ta asina ku Dominique, di akuerdo ku informenan no ofisial, pa largu tempu a sirbi komo “matón” pa e servisio aki, eliminando persona ku potensialmente por a forma un peliger pa seguridat di estado venezolano òf tabata enbolbí den insurgensha kontra gobièrnu haitiano. Na 1983 Dominique a hañ’é den problema ku su doñonan di trabou, ora ku a bin deskubrí un kampo di entrenamentu den interior di Venezuela, unda e tabata train insurgentenan haitiano. Sinembargo, e no a keda hopi tempu será. Su kaso no a presentá den korte, ya ku dia 29 di yüli 1984 el a sali Venezuela ku un visa di regreso den su pasaporte. Si e tabata un profugo di lei, lo tabata imposibel pa el a haña un visa di regreso na Venezuela, miéntras ku outoridatnan di imigrashon di Maiquetia lo a arest’é mesora.

WILLEMSTAD.- Djamars dia 29 di yüli último a rekòrdá e echo, ku 24 aña pasá dos suheto, e haitiano Hilertant Dominique i e dominikano Segundo Felix Castillo, a sekuestrá un avion di e kompania venezolano, Aeropostal, apénas algun minüt despues ku el a lanta buelo for di aeropuerto Maiquetia, rumbo pa Kòrsou. E detayenan di e apoderashon aki, atraves di añanan a keda ampliamente diskutí i analisá. Sinembargo hopi interogante a keda eksistí te dia djawe. Preguntanan ku nunka outoridatnan di Venezuela a aklará. Por ehèmpel, kon ta posibel ku e dos sekuestradornan a tabatin 4 pistol di kaliber haltu den nan posishon bordo di e avion, mas 1 galòn di gasolin? Dikon nunka a papia di aresto di trahadónan riba rampa di Maiquetia òf di Aeropostal mes ku supuestamente a pone e armanan aki bordo di e avion? Òf, di e avion di Navy merikano ku a baha na Koral Tabak den oranan di mainta di 29 di yüli ku por lo ménos 12 miembro di “Navy Seals”, ku a bini for di Panamá pa yuda solushoná e sekuestro?

E preguntanan aki, despues di e susesonan na Merka ku a haña e nòmber di 9/11, ta kobra vigensia, sigur si konsiderá ku outoridatnan Venezolano for di añanan ’70 a introdusí medidanan di seguridat stringente na aeropuertonan venezolano, en bista di e konstante sekuestronan di avion riba teritorio venezolano ku destino Cuba. Por lo ménos 3 avion venezolano sekuestrá promé ku 1984 a pasa Kòrsou promé ku nan a bai Cuba. Sekuestronan perpetrá pa miembronan di gueria venezolano ku for di añanan ’60 tabata lucha kontra e gobièrnunan demokrátikamente eligí di e pais.

Despues di kasi 9 aña ta skibi un kolumna den e prestigioso korant aki, m’a kuminsá puntra mi mes si tabata mihó pa en bes di ta kolumnista, m’a bira trahadó di sapatu. Pasobra, no ta pasa un siman, un kolumna, ku hendenan unda ku ta na mundu, ta kue e loke mi a skibi bisti, tum’é asina personal i kue bistié manera e proverbial sapatu. Ta manera un sapaté, ku kua sapatu k’e traha, ta pas “de eerste de beste” ku kue bistié. Inkreibel. Si en realidat ta sapatu mi tabata traha, masha dia lo mi a bira un magnate di sapatu. Un “Prada”, “Florscheim”, “Bali” of “Nike”.

Mi ta paga masha atenshon ora mi ta skibi mi kolumna pa mi no ofendé niun hende. Sigur pa mi no bira personal. Ora mi menshoná nòmber mes, ta pa mi indiká un persona embolbí den e sirkunstansia riba kua mi ta skibi. Ku otro palabra, e persona no ta importámi. T’e sirkunstansia ta konta. Kiko mi ta gana dor di bira personal? Ki benefisio un persona ku ta tuma e molèster di lesa mi kolumna tin, di lesa kosnan personal di otro hende? Niun. Banda di esei, m’a haña sufisiente edukashon di mi mama Shon Me i mi tata Fenton (tur dos den felis memoria!) pa sa ku den un diskushon, no ta e hende ta importante, sino e tópiko, e “issue” riba kua ta debatiendo. Un kos si! Mi no tin miedu di skohe ni señalá tópikonan ku otronan lo preferá pa laga un banda. Kolumna ku un kontenido tribi? Si. Kontroversial? No! Chupa for di dede? Hamas.

WILLEMSTAD - Un kantidat di 21 maestro di skol penshonado a wòrdu kontratá pa duna lès na skol den e aña eskolar nobo ku ta kuminsá otro siman. Esaki ta loke ku diputado di Enseñansa, Marilyn Alcalá-Wallé a informá LA PRENSA. E diputado a bisa, ku e maestronan penshoná a wòrdu kontratá tantu pa enseñansa di fundeshi komo pa skolnan avansá.
Ku e binti un dosentenan ku a baha ku penshun, pero ku atrobe ta bai para dilanti di klas entrante otro siman, e situashon aktual ta indiká, ku ora ku skol habri, te ainda tin sufisiente maestro. Segun e mandatario enkargá ku e kartera di enseñansa, ounke ku awor aki tin indikashon ku tin sufisiente dosente di skol, ta te ora ku skol habri realmente por haña un bista dje situashon den práktika. ‘Por sosodé tòg ora ku skol habri, ku pa un òf otro motibu, no ta tur maestro òf e dosentenan penshoná ta presentá na skol.
Diputado Alcalá-Wallé: ’’Den e di dos siman di ougùstùs, gobièrnu ta hasi un inventario pa determiná eksaktamente kon e situashon di e kantidat di maestronan di skol ta presis’’.
Dosentenan sürnam
Algun luna pasá gobièrnu di Kòrsou a kuminsá ku un proseso pa reklutá maestronan di skol for di Sürnam. E tempu ei, diputado Alcalá-Wallé a splika, ku gobièrnu a kuminsá ku e ehersisio aki, debí na e skarsedat agudo di maestro di skol na Kòrsou. Ademas gobièrnu a haña kanselashon di vários dosente antiano na Ulanda, ku originalmente tabata interesá pa bin Kòrsou. E oumento di salario di maestronan di skol na Ulanda i tambe mehorashon di e kondishonnan di trabou, tabata algun di e faktornan ku a kondusí na e preferensha di e maestronan di skol aki pa keda Ulanda. Esaki a pone ku Kòrsou a antisipá ku ta surgi problema ku sufisiente maestro di skol.

Si no aseptá matrimonionan homoseksual...

WILLEMSTAD – “Gobièrnu ulandes mester kuminsá aktua mas severo kontra Antia, relashoná ku su insistensia pa no rekonosé matrimonionan homoseksual”. Asina Anouskha van Miltenburg, miembro di Tweede Kamer pa CDA, a deklará na Ulanda. Van Miltenburg a referí entre otro na e persistensha di minister Omayra Leeflang relashoná ku e tópiko aki. I tambe e desishon di gobièrnu antiano pa apelá e desishon di wes ku mester duna seguro na un pareha homoseksual.
E parlamentario ulandes a enfatisá, ku inmediatamente Antia mester anulá e desishon pa apelá e kaso aki. Ademas segun e parlamentario, e ta kuestioná e hecho, ku Ulanda ofisialmente no ta atendé e posishon di Antia, enkuanto e rekonosimentu di parehanan homoseksual. “Ta entre otro tarea di minister Plasterk pa laga e bos di Ulanda resoná”, segun van Miltenburg. Minister Plasterk, ta esun ku ta boga fuertemente pa emansipashon di homoseksualidat na Ulanda i ta su tarea pa hasi esaki den tur parti Reino.
E parlamentario ta insistí, ku Antia mester rekonosé e matrimonionan homoseksual i den kaso ku e ninga esaki, Ulanda mester imponé medidanan fuerte. Entre otro van Miltenburg a menshoná e posibilidat di lo mester por kòrta den e kranchi di plaka for di Ulanda pa Antia. “Antia mester komprondé, ku e no por hunga e weganan aki”, e parlamentario a enfatisá.
A bira tempu pa kuminsá sanshoná Antia, pasobra regularmente e ta keda sin respetá e derechonan ku tin pará den e konstitushon. I den e kaso aki, ku e relashonnan di ámbos sekso, tambe tin derecho riba trato igual. Ademas, segun van Miltenburg, e posishon asumí dor di minister Leeflang ta laga homoseksualnan na Antia, sinti nan mes inkómodo.

WILLEMSTAD – SITEK a proponé gobièrnu di Kòrsou pa por lo pronto wanta e desishon pa ehekutá e kambio di maneho di transporte di skol. E direktiva di SITEK a hasi e sugerensia aki na diputado di Enseñansa, Alcalá-Wallé, durante un reunion ku a tuma lugá e siman aki. Presidente di SITEK, Sidney ‘Bicho’ Justiana a bisa LA PRENSA, ku su direktiva a mustra gobièrnu entre otro riba e hecho ku no a informá e mayornan na tempu di e desishon aki. Esaki tin komo konsekuensia ku no tabatin posibilidat pa atendé e konsekuensianan di e desishon. Den kuadro di e maneho di gobièrnu pa ekonomisá, a disidí ku entrante e aña aki ta evaluá tambe e kriterio di entrada salarial di mayor di alumnonan ku ta haña transporte pa skol di gobièrnu.
E presidente di SITEK a bisa LA PRENSA, ku su sindikato, en prinsipio ta kontra pa ekonomisá den enseñansa. “Ta p’esei pa nos, e mihó kos ta pa anulá kompletamente e maneho adaptá enkuanto transporte pa skol”. Asina e presidente di SITEK a remarká. Justiana a sigui splika ku, manera e maneho ta awor aki, lo mester hasi vários eksepshon den e kaso di e famianan, ku na e momentu aki ta bin na remarke pa e transporte. Ademas, e kambionan, debí ku e mayornan no a haña sufisiente tempu pa prosesá e desishon di gobièrnu, lo ta motibu di hopi problema. Den e kombersashon ku LA PRENSA, entre otro Justiana a menshoná e ehèmpel di un studiante di MTS bibá na Banda Abou, den kaso ku e no por haña transporte di gobièrnu mas. “E hóben aki entre otro lo no ta den posishon pa yega skol na tempu”, Justiana a enfatisá. Ademas di e ehèmpel aki, segun e presidente di SITEK, tin mas situashon problemátiko ku ta surgi, na momentu ku gobièrnu ekskluí un kantidat di mucha di skol for di e transporte di gobièrnu.

WILLEMSTAD - Finalmente un grupo di homoseksual antiano a disidí tòg na partisipá djasabra na e Parade di Gay den e gracht-nan di Amsterdam. A resultá finalmente, ku a haña sufisiente hende interesá pa partisipá na e Gay Pride. Asina e organisadó Pro Gay a partisipá awe. Anteriormente e siman aki, mas ku mitar di e partisipantenan a anulá. Segun e organisadó esaki tabata relashoná ku e krítika di minister Omayra Leeflang, riba e matrimonio entre homoseksualnan.
E homoseksualnan antiano tabata teme ku nan partisipashon lo tin konsekuenshanan fèrfelu. Entre otro, segun prensa ulandes, e homoseksualnan tabatin miedu di haña problema ku nan seguro, meskos ku e pareha lesbiano, kontra kua minister Leeflang a hasi deklarashon. Esei ta e motibu, segun e korant Trouw, ku e homoseksualnan no ke wòrdu filmá ni tampoko ta deseá pa saka nan pòtrèt ora ku nan ta riba e boto.
Pro Gay a logra konvensé algun di e homoseksualnan ku nan partisipashon lo no tin konsekuensianan negativo.
FNV Roze ta kubri parti di e gastunan, miéntras ku e organisashon ta dispuesto ainda pa traha lugá pa e boto antiano den e parada.
Presidente di Pro Gay, Frank van Dalen: “Si un grupo di antiano, arubano i srnam ke partisipá den e parada, pero ta wòrdu strobá dor di miedu, ta nos deber pa eliminá e temor ei”.
E boto antiano lo kore banda di e minister di emansipashon, Ronald Plasterk (PvdA) i e alkalde di Amsterda, Job Cohen.

ZURICH – FIFA a para riba djarason ku e klupnan mester pèrmití partisipashon di nan hungadónan menor di 23 aña na e Weganan Olímpiko di Beijing, habriendo kaminda pa e argentino Lionel Messi i e brazileronan Diego i Rafinha asistí na e torneo.
E klupnan di e hungadónan – Barcelona, Werder Bremen i Schalke – ta ninga di entregá e hungadónan bisando ku e torneo olímpiko no ta un kompetensia di FIFA i p’esei e organismo rèktòr no por obligá nan di aportá na e elementonan ei. Ta mira delantá ku awor e klupnan lo rekurí na Tribunal di Arbitrahe Deportivo, ku lo mester disidí den e próksimo dianan ya ku e torneo olímpiko di futbòl ta kuminsá 7 di ougùstùs, un dia promé ku Apertura ofisial dje weganan.
Un komishon di emergensia a konfirmá djamars e valides di e posishon ku FIFA a tuma for di un promé momento.
Slim Aloulou, wes di Tunesia ku ta forma parti di e komishon di estatuto di hungadó di FIFA, a bisa djarason ku e entrega di e hungadónan menor di 23 aña pidí pa nan selekshon ta “obligatorio pa tur e klupnan”.
“Partisipá den un Olimpiada ta un oportunidat úniko pa e deportistanan di tur e deportenan”, FIFA a bisa den un komunikado.
NO tin manera pa hustifiká pa impedí ku un hungadó menor di 23 aña ta partisipá den un kompetensia di e tipo aki si su ekipo a klasifiká su mes”.

WILLEMSTAD - E aña aki Plataforma Banda Riba den su afan pa uni tur bario di Kòrsou ta organisá un grandioso torneo di futbòl ku ta karga e nòmber “Bario T’ei Topa Bario” ku ta dediká na e strea Humphrey “Baartje” Koots ku ta un gran bolante di tur tempu, un hòmber gol òf goal getter.
For di su mucha a militá den diferente ekipo i te ku awor akí e ta moviendo den ekipo Veterano.
Humphrey Koots su promé enkuentro tabata den Deportivo Sta Rosa serka “Lilin” Hersilia kual e tabata sinta pafó riba banki ta wak wega i Deportivo Sta. Rosa no por a sera 11 hungadó i “Lilin” a tuma e kurashi di laga Humphrey Koots hunga sin karnèt pa kompletá 11 i asina gana e wega tambe.
Despues Humphrey Koots a militá den Victory Boys, Skèrpènè, SUBT i Sithoc.
Aktualmente e ta hungando den Skèrpènè Veteranos.
Hinter pueblo di Kòrsou ta keda kordialmente invitá pa bin mira e barionan di Kòrsou batayá kontra di otro den luna di ougùstùs i sèptèmber.
E gran final lo ta dia 28 di sèptèmber.
UTS Tilin, Polar, Sedreko, Pepsi Cola, Licores Maduro ta invitábu.

ARIES: Awe ta algu aventurero pa bo i ku hopi ansha di libertat. Pensa e kosnan bon. Bo ke e base di e wega di amor i al final bo ta sali pèrdí si bo no tuma e sentimentunan na serio.

TAURO: Bo palabra sabí, direkto i konvinsente ta lagábu resolvé efektivamente tur konflikto. Probechá e dia pa pone e kosnan na su lugá i aklará kosnan bruá di bo bida.

GEMINIS: Tuma e kosnan ku kalmu. Últimamente bo tabata di un banda pa otro sin tuma deskanso. Probechá lo mihó bo tempu si bo ta organisá for di tempran i mantenébu fiel na bo plannan.

KANSER: Algu ku a keda inkluso di bo pasado ta ripití pa awor bo duna e solushon. Maniá, opseshonnan ta desaparesé di bo mente. 24,11,13.

LEO: Desaroyá pasenshi. No malgastá bo energia i purba konvensé otronan. Permití ku sea ta e tempu lo dunábu e rason. 07,14,20.

VIRGO: Bo interes ta konsentrá den bo trabou, profeshon o estudio. Ta momentu di aktua i di hasi proyektonan. No tene miedu di mustra bo ideanan. 51,19,30.

LIBRA: Si bo no ta na gustu ku loke bo ta realisá, bo ta sentibu frustrá i amargá. Ta momentu di komuniká ku otronan. Buska e personanan ku ta kompartí bo ideanan. 16,07.

SKORPION: Bo imaginashon ta eksaltá pa loke ta bon momentu pa pone na marcha e proyekto. Si bo no hasi e intento, nunka bo no sa si bo a logra e éksito. 35,15,03.

SAGITARIO: Bo konfiansa, bo aparensia i bo energia renobá ta e kombinashon perfekto pa bo éksito. E ayudo familiar i amistat no ta falta. 32,42,10.

WILLEMSTAD – “Aki 10 luna mas o ménos, nos ta spera di desvelá e estatua di Wilson “Papa” Godett dilanti ofisina di pòst na Waaigat. Nos ta spera ku lo no bin diskushon eterno riba e proyekto aki tambe”, asina lider polítiko di partido Frente Obrero, alabes diputado di Infrastruktura Anthony Godett a anunsiá ayera mainta, na okashon di inougurashon di e bòrchi nobo di “Kaya Wilson ‘Papa’ Godett” na Pietermaai Smal.
Den presensia di famia, algun invitado i medionan di prensa, diputado Anthony Godett a inougurá e bòrchi di kaya nobo ku ta karga nòmber di su tata ku ta situá den Pietermaai Smal, nèt pabou di Biblioteka Públiko bieu.
“Algun luna pasá, kobardenan ku no por a sasia nan set riba mi, a disidí di hasi esei riba e bòrchi di un gran hòmber,” asina Anthony Godett a bisa. E tabata referí na e destrukshon na e bòrchi di kaya “Kaya Wilson (Papa) Godett” den Pietermaai Smal. Konsiderando e estado den kua e bòrchi aki a keda, a bira nesesario pa remplas’é pa un bòrchi nobo. Esei entretantu a tuma lugá i ayera mainta diputado señor Anthony Godett a inougurá e bòrchi aki.
Den su palabranan na e okashon ei, e mandatario a lamentá ku e deskonosínan ku a kousa destrukshon a kousa daño na komunidat.
Esnan ku kisas por a haña un bòrchi na nan honor, awor kisas mester warda un tiki mas, pasobra mester a invertí den un bòrchi ku tabat’ei kaba i tabata bon-bon.

WILLEMSTAD - E situashon di koriente na Kòrsou ta normalisando. Esei ta loke miembro di gerensia di Aqualectra Irvin Moenir Alam a anunsiá awe mainta.
Ayera Kòrsou un biaha mas tabata den perkansia kompleto, ku problemanan ku a surgi na e planta di produkshon di koriente BOO.
Un kandela ku a surgi den un dje boilernan di e planta, a pone ku Aqualectra di ripiente a hañ’é konfrontá ku hopi ménos suministro ku normalmente sa ta e kaso.
BOO ta suministrá Aqualectra tur dia un total di 22 megawòt, pero despues di e kandela, esaki a bira apénas 3 megawòt.
Esaki mes a pone ku henter dia ayera, mester a saka bario i hinka bario aden, pa loke ta suministro di koriente, asina Moenir Alam a konfirmá. E problema a manifestá su mes partikularmente durante oranan ku tin mas uso di koriente ku ta den oranan di mainta i den oranan di tramèrdia.
Un punto ferfelu ku ta bin aserka ta e hecho ku e planta di Aqualectra na Dokweg ta parsialmente den revishon, di manera ku e tampoko ta produsiendo e kantidat di megawòt nesesario.
Durante henter dia, mester a apliká e sistema aki. Awe mainta, e situashon ta mihó. Trahadónan a logra ayera nochi di pone e bòiler bèk den funshon di manera ku den kurso di awe, poulatinamente lo bai oumentá kapasidat di koriente atrobe na Kòrsou. Ya kaba ta yegando e kantidat di 10 megawòt, ku ta muchu mas ku e 3 megawòt di ayera.
Moenir Alam a bisa, ku si no sosodé nada imprevisto, e ta kere ku pa final di dia awe, e kapasidat lo ta bèk na normalidat. El a pidi diskulpa un biaha mas pa loke a sosodé, indikando ku e situashon no tabata den man di Aqualectra.

WILLEMSTAD - Caribbean Hotel Association (CHA) a kambia su nòmber pa Caribbean Hotel and Tourism Association (CHTA). E kambio ta representá un mandato pa kolektá un miembresia mas amplio den e industria turístiko Karibense akomodando asina e montante kresiente di miembronan no hotelero ku ke djòin CHTA. E kambio di nòmber tambe ta buta CHTA den mes un liña ku su asosashon miembro ku ya kaba a move den e direkshon ei, manera e asosashon di hospitalidat i turismo di Kòrsou CHATA.
Segun e Presidente nobo di CHTA Enrique De Marchena Kalucheku ku lo sinta di 2008-2010, “Esaki lo mustra nos gobièrnunan, sektor públiko i privá i tur hende den e sektor ku CHTA tin un representashon amplio di e industria turístiko i pa e motibu ei ta hunga un ròl signifikante den Karibe.”
Na e reunion general di e organisashon ku a tuma lugá 22 di yüli último un direktiva ehekutivo nobo a wòrdu skohé pa aklamashon pa traha huntu ku e presidente nobo Enrique De Marchena Kalucheku i presidente saliente Peter Odle ku lo sinta di 2008-2010.
Na ta:
Promé Vise Presidente -- Richard Doumeng, Asosashon di Hotèl i Turismo di Islanan Virgenes
Segundo Vise Presidente -- Josef Forstmayr, Asosashon di Hotèl i Turismo di Jamaica
Terser Vise Presidente -- Sherille Hughes, Asosashon di Hotèl i Turismo di Anguila
Kuarto Vise Presidente -- Haydée Rainieri, Asosashon Nashonal di Hotèl & Restorant, di Sto. Domingu

WILLEMSTAD - Un delegashon di 5 persona di Totolika a bishitá Panamá di 21 te 26 di yüli riba invitashon di gobièrnu Panameño. Esaki tabata den kuadro di e di 8 reunion di Primera Damanan di Sentro – Amérika, Belize, Panamá i Rep. Dominikana. E invitashon a bini despues ku Totolika a invitá direktor Manuel Jesus Campos di Senadis, e sekretariado ku ta atendé desabilidat, pa bin tene un diskurso di órden na un Sena di Gala di Totolika na febrüari di e aña aki.
E kumbre di “Primeras Damas” ta tuma lugá kada dos aña na un otro pais i tin kada be un otro tópiko. E biaha aki e tema tabata:
Siglo 21, rumbo pa un berdadero inklushon edukativo. E delegashon di Totolika a keda sorpresá di e trabounan ku ta wòrdu desplegá dor di e primera damanan ku kada unu a duna un presentashon ekstenso tokante e adelanto den nan pais, riba e tereno aki.
Espesialmente despues di e Tratado di Nashonnan Uní pa e derechonan di e persona ku desabilidat e trabounan a enfoká e vishon di inklushon, kaminda den tur lei i tur medida ta tene kuenta ku e mucha i persona ku desabilidat.
Komo edukashon no ta solamente un derecho, pero tambe ta duna forsa ekonómiko, ta kombatí pobresa i tambe ta redusí diferensianan, tur pais a kuminsá pone asento riba edukashon. Tur e paisnan, ku Panamá na kabes, ta lantando skolnan den tur distrikto den interior i ta kambia tur “escuelanan granja” den skolnan digno” ( di piedra )

A pidi pa eksonerá_ impuesto riba tur produkto produsí lokalmente i prinsipalmente webu

WILLEMSTAD - Ayera tabatin un reunion na Fòrti entre e representantenan di Plataforma Agrario Nashonal (PAN) i minister di Finansa Ersilia De Lannooy, minister di Asuntunan Ekonómiko Tjin-A-Sjoe i nan komitiva.
Durante e reunion a yega na algun palabrashon konkreto entre Plataforma Agrario Nashonal (PAN) i e ministernan.
Den un reunion ku por keda kalifiká komo unu positivo i di bon ambiente, Plataforma Agrario Nashonal (PAN) a pidi pa eksonerá_ impuesto, "OB" riba tur produkto ku ta keda produsí lokalmente, prinsipalmente webu i a palabrá lo siguiente:
*Tur dos minister a disidí di laga nan departamentu hasi un investigashon di leinan eksistente pa yega na posibel kambio i adaptashon di e leinan aki na fabor di e sektor agrario i pueblo en general.
*Eksplísitamente lo inkluí tur e produktonan agrario lokal den e investigashon aki.
*Koperativismo mester okupá un lugá prominente i determinante den e proseso demokrátiko di nos ekonomia.
*Ámbos minister i PAN a bai di akuerdo pa reuní denter di korto tempu
*A disidí ku gobièrnu lo evitá tur importashon di webu i otro produktonan agrario, ku ta kore riesgo di ta kontaminá ku grip di para òf otro enfermedatnan.
Relashoná ku esaki minister De Lannooy a keda ofisialmente di tuma kontakto ku su kolega minister di Salubridat sra. Omayra Leeflang.

WILLEMSTAD – Riba e wepsait di e organisashon di Little League sali un bunita artíkulo di e timnan ku a klasifiká pa e Seri Mundial na Williamsport, Pa.
Pa di seis aña konsekutivo, Pabou Little League di Willemstad di Kòrsou lo representá e region di Karibe den e Little League Baseball World Series.
Pabou Little league a bin gana 1-0 di Juan Antonio Bibiloni Little League di Yabucoa, Puerto Rico. Den e kampionato kaminda nuebe selekshon a partisipá, Pabou Little League a logra terminá ku rekòrt di 5-0 pa klasifiká pa e di 62 Little League Baseball World Series pa muchanan di 11-12 aña ku lo hunga na Williamsport di 15 pa 24 di ougùstùs 2008.
Paboa Little League a bira kampion di e Little League Baseball World Series, un biaha ora ku nan a bin gana di Conejo Valley, di California 5-2 na 2004..
Na 2005 Pabou Little League a bin pèrdè den final di West Oahu Little League di Ewa Beach, Hawaii ku skor di 7-6 den shete ining.
Pabou Little League lo ta den Little League World Series pa di shete biaha. Aña pasá nan a yega e final di e Pul Internashonal i a pèrdè 7-4 kontra di Kitasuna Little League di Tokyo, Hapon.

E ta pone tur esnan ku sostené kualke desishon personalmente responsabel: 

WILLEMSTAD – Despues di un periodo di trankilidat relativo, e situashon na Selikor a bolbe bin bèk den publisidat ku tur intensidat awor ku a bira konosí ku diputado Humphrey Davelaar a presentá un proposishon na Hunta di Komisario di Selikor pa eliminá e funshon di direktor, alabes direktor general suplente di e kompania. Por sierto ku LA PRENSA tin informashon, ku no ta tur hende den e Hunta di Komisario ta di akuerdo ku e sugerensia aki. Tin por lo ménos dos miembro ku LA PRENSA ta na altura di nan posishon ku e trabounan na e kompania a bira demasiado pa un direktor so. Di tur manera Asjes, ku a haña un nombramentu kontroversial komo direktor athuntu na e kompania, ta insistí, ku no por trese niun kambio, tanten ku e proseso den e kaso no konkluí. El a atvertí esnan ku trese kambio tòg ku e lo pone nan personalmente responsabel pa nan desishon.
T’asina ku Asjes 4 luna pasá a entamá un kaso (‘derdenverzet’) kontra e veredikto den e prosedura di fondo ku 6 trahadónan di Selikor a kuminsá kontra STIP i Selikor. Asjes mes no tabata partido den e prosedura aki. Na su opinion e veredikto di 11 di febrüari 2008 no ta konsistente i mas bien ta basá riba redashi. “Ta bon pa klarifiká ku ta den solamente un di e diferente kasonan enkuanto mi nombramentu na Selikor mi mes tabata partido i ku Korte di Hustisia a konfirmá den su veredikto di 19 di yüli 2007 ku mi nombramentu komo direktor na Selikor tabata kompletamente legal”. Segun Asjes, e proposishon di diputado Davelaar di partido Nashonal pa awor di ripiente kambia statutonan di Selikor i eliminá e funshon di e segundo direktor ta un strategia polítiko di mala fe, p’asina sera kaminda di Asjes pa por asumí un puesto den Selikor si e gana su kaso den Korte. “Ta tristu i sensurabel ku hende ta dispuesto pa sigui tapa mal maneho i inefisiensia den Selikor pa djis protehá i kuida interesnan finansiero ‘importante’ di famia i amigunan polítiko (‘friends and family’). Konstantemente Pueblo tin ku tende ku no tin plaka pa aliviá nos hendenan ku ta biba den pobresa i miseria. Sin embargo, sin eskrúpulo, ta permití Selikor si pa 12 aña largu gasta mas ku 50 mion florin di Pueblo sin tene un destaho públiko. Te awe ni diputado Davelaar ni su partido ku nan boka yen di ‘good corporate governance’ nò a bin splika Pueblo dikon, aña den aña afó, ta permití gerensia di Selikor dispidí miónes di Pueblo pa duna kontratonan lukrativo na algun kompania en bes di yuda hóbennan desempleá ku tambe por hasi mesun trabounan aki”. Asjes a alertá finalmente tantu miembronan di Hunta di Komisario di Selikor i tantu Kolegio Ehekutivo, Konseho Insular komo STIP pa no laga usa nan pa sostené e strategia polítiko di diputado Davelaar i enfátikamente el a deklará ku e lo hasi uso di tur medionan na su disposishon pa pone kada un di e kómplisenan den e strategia di mala fe aki personalmente responsabel pa nan aktonan.

WILLEMSTAD – Awe mainta presidente komisario di Curoil, Earl Balborda a presentá personalmente na Curoil, pa informá e direktor Gensley Capella, ku e mester hala un banda pa permití un investigashon independiente na e kompania. Segun informashonnan ku LA PRENSA a haña, Capella a ninga e petishon den promé instansia ayera nochi. Awe mainta a mustr’é un biaha mas riba e nesesidat imperativo, pa e no ta presente na momentu ku e investigashon na e kompania kuminsá próksimamente. E investigashonnan, dos en total, lo kuminsá mas pronto posibel.
Manera LA PRENSA a informá e siman aki, ya kaba Gobièrnu di Kòrsou den un reunion ekstraordinario djamars último, a duna instrukshon na Hunta di Komisario i STIP pa hasi un investigashon profundo na e kompania relashoná ku e kaso di dos empleado di Curoil ku tabatin un kompania ku ta bende Curoil gasoil. E kaso a haña e nòmber “toko den toko”. Gerensia di e kompania, despues di a tuma nota di e kaso, a aktua rápidamente a rais di un beslag di 1 mion dollar ku un kompania panameño a pone riba e kompania RC Holding. Curoil sinembargo no tabatin e nesesidat pa tuma mas medida kontra nan, komo ku nan mes a saka nan konklushon i retirá for di trabou. No opstante nan mes inisiativa pa retirá, e kaso a kousa un klamor masha grandi. Por sierto, ku miéntras tantu e kompania panameño a lanta e beslag despues ku a paga e 1 mion dollar.
Gobièrnu di Kòrsou, Hunta di Komisario i STIP, preshoná pa prensa i opinion públiko, no a keda ku otro alternativa, sino di kuminsá un investigashon profundo. Balborda a bisa, ku a warda e rapòrt ku Curoil mes a traha riba e kaso. Awor ku e rapòrt ta kla, a tuma nota di su kontenido ayera, a konkluí ku tin motibu pa mas investigashon den e kaso aki. Lo hasi dos investigashon. E promé ta relashoná ku e kaso spesífiko di kompra di gasoil di parti di e kompania RCM Holding. Banda di esei lo analisá tur kontrakt ku e kompania tin ku tersera. Balborda a bisa, ku aktualmente ta hasiendo e kontaktonan nesesario ku diferente kompania i posiblemente ya otro siman por kuminsá ku e investigashon. El a bisa, ku no por hasi e investigashon ku Capella na e puesto i ta p’esei a pidié hala un banda pa awor aki. Esei no ta impliká ningun kulpa òf sospecho den su direkshon. “Nos no ta “blame” niun hende ku e desishonnan ku nos a tuma. Pero nos kier pa tur kos ta mas transparente posibel i pa komunidat haña un klaridat. Konfiansa mester regresá na e kompania mas pronto posibel”, asina el a bisa. Curoil mes a anunsiá un enkuentro ku prensa awe tardi. No tabata posibel konfirmá si e konferensha di prensa lo sigui despues di e pasonan di awe.

Sheik Lorito Hopi Gas ta yama tur hende un felis dia. Awe ta e último dia di yüli i ya kaba nos ta bai drenta ougùstùs. Por sierto ayera niun 2 no a kai atrobe den e bolitanan i nos a kuminsá kere awor si ku a lubidá di pone e 2 nan den e tómbolanan. Lorito mes lo bula wak awe nochi!
****
Anto for di ora nos a tende ku tin hopi gas (no gas di bientu!) rònt di Kòrsou, nos a disidí pa buska un tùlbant grandi pa nos bisti. Pronto nos lo bira sheik, segun nos a tende Min. Pres. bisa. Nos a keda masha kontentu pero di otro banda nos ta sigur ku e storianan di Ansary lo bolbe lanta kabes! Nos ta ansioso pa tende ta kuantu gas tin i pa kuantu tempu.
****
Por ta Ulanda, un pais di gas, tambe a tende kaba ku tin gas i ta p’esei Ulanda ta tumando nos ku dos man? Poef....! Nos mester a laga un bientu bai! No wòri, pasobra nos ta den pleno aire!
****
Un saludo pa Ramon Yung ku tambe tabatin su último dia na radio awe (por lo pronto). Awe mainta el a yama ayó na su oyentenan. Yung ta traha na Vigilante, ke men no preokupá, e tin trabou. Parse ku e tin proyekto grandi na kaminda banda di Parasasa.
****
Bo a tende kaba ku parse no ta bai sigui desaroyá Wechi mas. Te awe nos ta warda konstrukshon di e mil kasnan ku Nini a primintí. Pero parse ku ta bai ta un lucha serio pa hasi e área aki unu di desaroyo komo ku ya kaba Amigunan di Tera a kuminsá mula hacha. Nos a komprondé ku pa kolmo un biná di Kòrsou a kaba di haña dos yuchi den e mondi grandi aki loke ta pone ku tin mas argumentu pa sigui konservá e área.