ORANJESTAD - Rotary Club of Aruba a logra recauda 265 mil florin durante Fiesta Rotaria 2008, bao guia di e presiente saliente Sr. Bert Kamsteeg.
Recientemente Rotary a hasi entrega oficial di e checknan na e instancianan cu a cualifica e biaha aki pa donacion.
Un total di 19 instancia, representa pa nan presidente of coordinador, a ricibi check for di man di Sr. Bert Kamsteeg. Nan ta: Fundacion Centro pa nos Grandinan Kibrahacha, YMCA of Aruba, Social Fund Colegio, Scouting Aruba, Arubaanse Padvinders-gilde, Demoley, Fundacion Hende Muher den Dificultad, Rainbow Girls Scouts, Edmond Harms Foundation, Fundacion pa Nos Muchanan, Funari, Fundacion Respetami, Fundacion Telefon pa Hubentud, FEPO, FADA, SAMBA, Fundacion Autismo Aruba, Animal Rights Aruba, Dakota Skol di Deporte.
Tur esaknan ta instancianan cu ta hasi hopi pa e comunidad di Aruba y ta yuda di hende grandi te mucha chiquito.
Rotary ta contento di por contribui y asina yuda nos instancianan di Aruba pa asina na nan turno, yuda esnan cu mas tin mester den nos comunidad. Un danki grandi ta bai na henter pueblo di Aruba cu a pone nan confianza un biaha mas den Rotary. Aruba Danki!

A haci donacion pa trabou balioso di Search and Rescue (SARFA)

ORANJESTAD - Diadomingo ultimo 29 di juni 2008, dia di piscado, Fundacion Centro di Pesca Hadicurari, na nomber di tur piscado, a haci un donacion na Search and Rescue Aruba (SARFA). Tabata sr. Gilbert Rasmijn, presidente, y Pierry Croes, tesorero, representando e directiva di fundacion Centro di Pesca Hadicurari, acompaña pa Minister di Cultura y asunto di pesca, sr. Ramon Lee, cu a haci entrega oficial di e check na nomber di tur piscado.
Di parti di Search and Rescue tabata sr. Clifford Rosa a ricibi e check dilanti di e publico presente cualnan a aplaudi SARFA pa su bon trabou.
A haci nota tambe cu tabata riba conseho di SARFA cu a busca e uniform oranje briyante cu Hadicurari a introduci pa su piscadonan.
E color oranje ta e color cu mas ta resalta contra e colo blou di nos lama, haciendo esaki mas facil pa detecta riba distancia den caso di emergencia. Centro di Pesca Hadicurari ta trata di concientisa tur piscado riba e importancia di preparacion preventivo pa emergencia riba lama. E miembronan di directiva a menciona na e ocasion, con tin boto crioyo di pisca, cu riba conseho di SARFA tambe, a pinta e parti ariba di nan boto oranje pa asina den caso di emergencia por detecta esaki di mas leu. Algo di aplaudi y encurasha.
CONSEHONAN PA SEGURIDAD RIBA LAMA
Un di e consehonan di SARFA, a esnan cu ta sali riba lama, cual a keda emfatisa ta: semper percura pa un persona riba tera tin informacion di e boto. Den un forma facil pa corda, SARFA ta recomenda esnan na tera,pa tin semper disponibel e siguiente informacion di e boto cu ta sali:

Ultimo tempo nos por a mira cu por fin nos comunidad ta duna nos schutternan e respet y honor cu nan ta merece. Y cu hopi emocion mi a mira algun di e poconan cu ainda ta cu nos marcha manteniendo paso manera cu nan tabata haci mas di mey siglo pasa. Mi a reconoce varios di nan cu mi ta corda como solda di tempo cu mi tabata mucha y awe mi tambe ta duna nan e honor cu nan merece.
Tin un persona hopi special cu mi kier honra awe, 4 di Juli, dia di Independencia di Merca. E no a sirbi den schutterij, pero ela sirbi su patria natal. Mi ruman Harold Harms, conoci como Hato, a nace na New York. Na cuminsamento di 1945,prome cu guera a caba na Europa, el a wordoyama pa raporta na ehercito Americano na Puerto Rico. Nos famia tabata masha preocupa. Nos a tende cu hopi di e soldanan Puertoriqueño cu un tempa tabata staciona n’Aruba a wordo manda pa frente di guera na Europa y den Pacifico. Berdad, guera na Europa tabata cabando, y nos tabata sigur cu pa ora cu Hato siña usa un rifle, ya Aliadonan lo tin victoria aya. E guera na Pacifico si tabata den full swing y tabata presenta un peliger grandi. E idea cu un di nos famia lo por bay bringa na lugarnan manera Iwo Jima of Guadalcanal y perde su bida den guera contra Japon a siña nos haci hopi oracion.
Pero historia militar di Hato no ta inclui tanto suspension ni peliger. Cu un haltura di 6’4” Hato tabata un bon basketballista cu a hunga den e ekipo Caribe B. Por cierto, e tabatin e record di 36 punto den un wega. Pa suerte di Hato, e oficial di e grupo cu Hato a cayaden tabata e coach di basketball. Ora cu el a mira Hato hunga el a asign’e un posicion den Polis Militar pa Hato tin tur tempo posibel pa practica. Hato ta prome pa confesa cu e misionnan mas peligroso cu el a haya como militar ta di saca soldanan burachi for di e bordelonan na San Juan. Hato a hunga bon, y den tres luna Hato a bira sergeant di tres strepi. Su ekipo a gana e campeonato di militarnan Americano na Puerto Rico y Hato a wordo selecta pa bay Merca den e ekipo di Puerto Rico Military All Stars. Entre tanto, guera a caba na Europa, Japon tambe a pidi paz y gobierno Americano a cuminsa diminui su ehercito. Hato a haya chens di skohe pa bay bek Aruba of bay Florida hunga cu e ekipo All Stars pero tambe keda un aña mas den ehercito. Hato a scohe Aruba.Hato su historia ta un indicacion di e nivel haltu di basketball cu Aruba a conoce e tempo ey.

ORANJESTAD - Departamento di Labor y Investigacion ta pone tur dunador di trabou y empleado na altura di e cambio di su maneho den casonan di petishon pa retiro di un trahador cu a yega edad di penshun. E cambionan aki a bira necesario door di sentencia di Huez y tambe un mocion cu a wordo aproba den Parlamento y cu gobierno ta ejecutando awor.
Den tur caso cu ta trata un contrato laboral pa tempo indefini y cu kier termina e contrato laboral aki, mester pidi permiso na director di Dpto di Labor y Investigashon pa hasi esaki.
Tin biaha sa pasa tambe cu den un contrato laboral pa tempo indefini asina e dunador di trabou ta pone un clausula cu na momento cu e trahador jega e edad di penshun, e contrato automaticamente ta disolve, pues ta termina.
Huez ta considera un contrato laboral cu e clausula aki un contrato pa tempo defini (ya cu e contrato laboral ta stop cu e edad di penshun) y cu un contrato asina no ta cuadra cu e sistema limitativo di ley pa contratonan pa tempo defini segun articulo 1613x di nos Codigo Civil. Den e articulo aki te menciona limitativamente den cua casonan por usa un contrato pa tempo defini y edad di penshun no ta un di nan.
Pa es motibo aki e clausula aki riba menciona no ta valido, loke ta pone cu si un dunador di trabou kier termina e contrato laboral a base di e hecho cu e empleado a jega su edad di penshun y apesar di e hecho cu a cumbini esaki cu e empleado, e dunador di trabou mester pidi permiso pa esaki na director di Dpto. di Labor y Investigashon.
Den un caso caminda mester duna permiso pa retiro a base cu e empleado a jega su edad di penshun director di Dpto. di Labor y Investigashon di awo pa dilantie generalmente lo duna permiso si e dunador di trabou por demostra (por ehempel a base di un revishon medico –ojetivo- di e empleado) cu e empleado en cuestion, mentalmente ni fisicamente ta capas pa hasi su trabou mas. Claramente e empleado ta liber pa trese pruebanan en contra di esaki (por ehempel un declarashon medico).

ORANJESTAD- Corte den Prome Instancia ayera mainta, a mustra Ministerio Publico, cu uso di microfono scondi den caso di droga conoci como Domino, ta ilegal y e pruebanan no ta aceptabel.
Un di e acusadonan den e caso aki, ta e conoci comerciante Luis Mansur kende ayera mainta tambe a presenta pa scucha sentencia di Huez contra di su persona.
Huez prome di a informa su decision, a dirigi su mes na Ministerio Publico, mustrando cu tur e pruebanan haya pa medio di microfono scondi, ta inaceptable ya cu ta un violacion directo riba privacidad di esnan envolvi y pa colmo, ningun momento Ministerio Publico a avisa cu nan ta bai haci uso di microfono, manera ley ta prescribi.
Huez a mustra cu tabatin suficiente tempo pa por a avisa y haya permiso pa haci uso di e strategia aki, pero Ministerio Publico a neglisha esaki y pa Huez esaki ta inceptabel y pruebanan cu a ser haya a base di e metodo aki, ta inaceptable.
CAMBIO GRANDI
Esaki a pone cu e exigencianan di Fiscal contra di e acusadonan a cambia formalmente y den varios caso e acusadonan a mira nan castigo di prison wordo reduci formalmente.
Un di acusadonan mayor, esta Mercado Ochoa, contra kende Fiscal a exigi 12 aña di prison, dor di e fayo di e mesun institucion aki, e castigo a keda reduci te na 5 aña di prison, cu ta un reduccion di 7 aña.
Y mesora aki ta lanta otro situacion un tiki confuso, ya cu den caso di e comerciante Luis Mansur, Fiscal a exigi un castigo di prison di 10 aña durante tratamento di e caso, y awor dor di e violacion cometi, Huez a reduci e castigo di Mansur cu solamente tres aña, mientras cu a spera cu e lo haya e mesun reduccion cu Mercado Ochoa di shete aña, anto e ora e lo mester a sinta solamente tres aña di prison.

ORANJESTAD- Fuentenan fededigno a informa La Prensa Aruba, cu dos Minister cu ta forma parti di e Conseho di Minister di Gabinete Oduber IV, lo no regresa den politica y cu nan a aplica pa otra no funcionnan laboral.
Un din an lo a solicita pa drenta servicio di Gobierno mientras cu tin un otro cu a aplica pa drenta servicio di un empresa publico pero e fuente no kier a confirma nomber di e mandatarionan aki.
Hecho ta cu e prome cu a anuncia su retiro como politico tabata e propio lider Nel Oduber pero mientras tanto el a ser pidi pa bin bek ya cu ta den su persona so nan ta mira cu e partido geel lo por minimalisa e perdida grandi cu tur hende ta sigur cu e partido lo hiba den proximo eleccion.
Otro Ministger cu for di dos anja pasa a anuncia su retiro y cu mester a drenta na vigor dia prome di November awor, tabata Minister Rudy Croes, kende hasta a anuncia cu e lo nombra su sucesor tanto como Minister como e puesto riba lista pero poco ta kere cu e lo retira y e tambe lo a duna di conoce cu e lo keda den politica.
Pa algun tempo tambe ta circulando e informe cu Minister Nilo Swaen lo a aplica na varios institucion priva y cu definitivamente e lo no bin bek den politica otro anja ora cu su periodo como Minister termina.
Minister Edison Briesen y tambe Booshi Wever tambe a yega di duna indicacion cu esaki lo ta nan ultimo periodo como mandatario y como politico y cu nan tin intention serio di bandona politica despues di 8 anja gobernando e pais.
E fuente tampoco kier a revela e posibel empresa of departamentocaminda e mandatarionan lo a solicita pero a menciona cu den un caso ta trata di un institucion bancario.

WILLEMSTAD – Komersiantenan di diferente pais den region tin problema pa haña un visa ora nan ke bin Kòrsou pa hasi kompra den Zona Liber. Segun e presidente di Frezacur, Xerxes ‘Checo’ Nepomuceno, na diferente embahada e ulandesnan ta hasi difisil ora mester duna e komersiantenan un visa.
Nepomuceno a splika LA PRENSA, ku komersiantenan prosedente di Jamaika, Colombia i Sto. Domingo ta pasa den masha trastorno promé ku nan haña un visa pa bin kumpra den Zona Liber. “E manera ku Ulanda ta atendé ku dunamentu di visa na e komersiantenan ta stroba nos ekonomia enormemente. ta manera ku Ulanda no ke duna nos chèns pa para riba nos pia. Nos ta hasiendo tur nos esfuerso pa atraé kliente pa bin kumpra serka nos, pero e embahadanan ulandes no ta koperá niun tiki. Ultimo ei tabatin un kaso di un komersiante di Haiti ku tin 25 aña ta bin Kòrsou. Despues ku el a manda su pasaporte i su plaka pa e embahada na Sto. Domingo, nan a keda ku su pasaporte kasi 3 luna. Despues nan a mand’é bèk sin su visa. El a pèrdè su sèn tambe”, Nepomuceno a sklama.
Mas aleu Nepomuceno a splika, ku nos ta un pais ku mester hasi negoshi ku paisnan den Caribe, pero di e manera akí ta stroba e komersiantenan di bin Kòrsou. “Loke ta pasa e ora ei ta, ku e komersiantenan akí ta bai entre otro Panamá pa nan hasi na kompranan, pasó nan por bai ku un visa di turista. Ta p’esei nos tambe mester eliminá e asuntu di visa i laga tur hende drenta i paga pa un visa di turista na aeropuerto. E ulandesnan ta hasi manera ta prostituta e komersiantenan di Colombia i Sto. Domingo ta. Nan ta kere, ku e hendenan akí ta bin Kòrsou pa traha den prostitushon i ta nenga nan un visa.”

BOGOTA, Colombia, - E gobièrnu di Alvaro Uribe a divulgá un video di e operashon militar ku a tèrminá den liberashon di e eks kandidata presidensial Ingrid Betancourt i di 14 hende sekuestrá di rebeldenan “Fuerzas Armadas Revolucionarias de Colombia” (FARC).
E grabashon aki, di tiki minüt, i grabá den un kampo habrí, por opservá personanan armá i e rehennan, kendenan nan mannan tabata mará ku sinta blanku di plèstik.
Un di e personanan sekuestrá tabata papia den kámara di e sòldánan kendenan a hasi komo sifuera ta periodista nan ta.
Tambe por a apresiá e momentu ora e rehennan tabata drenta den e helikòpter i tambe por a mira e húbilo ora nan a haña sa ku ta trata di un operativo di liberashon.
E presentashon di e material oudiovisual a keda realisá oranan despues ku a kuminsá sirkulá informashonnan ku ta pone na duda outensidat di e reskate efektuá pa Ehérsito di Colombia.
Di akuerdo ku un emisora di radio suizo, ku no a identifiká su fuente, e liberashon di e rehennan tabata resultado di un pago mionario na e grupo gueriero FARC.
Pero tantu gobièrnu colombiano, gobièrnu franses i e propio Ingrid Betancourt a ninga e vershon aki.
Durante e presentashon di e video, e minister di Defensa di Colombia, Juan Manuel Santos, a bolbe ninga kualke soborno.
“Tur e informashonnan ei ta apsolutamente falsu! E no tin niun fundamentu. Nos no sa di unda i pakiko e informashon aki ta sali. No a paga ni un solo sèn!”, e minister colombiano a indiká.

WILLEMSTAD – Ora bo mira e pòtrèt aki lo bo kere mesora ku direktor general di Maduro & Curiels’Bank, Lionel “Chicú” Capriles a lesa e storianan di e último dianan rondó di patia den korant i a bai reservá su lote. Pero nada di esei ta bèrdat. Loke a pasa ta, ku Capriles a hasi entrega di un kariño na su amigunan di e barku venezolano ku ta keda nèt dilanti di ofisina prinsipal di Maduro & Curiel's Bank den Punda. MCB a regalá tur su amigunan di barku venezolano situá na Sha i Lio Caprileskade un pèchi luluis luluis en konekshon ku e fecha di Independensia di Venezuela. Ku e gesto aki, MCB ke mustra su apresio na komunidat venezolano i alabes hasi un kariño ku su bisiñanan di barku venezolano. MCB i Kòrsou kompleto ta deseá tur venezolano un felis Dia di Venezuela. (foto MCB)

Skina di Sorti, awe djasabra 5 di yüli di 2008, ta kuminsá ku deseá tur hende un bon dia. Akshon humano ta wòrdu determiná pa e forsanan ku ta motivá e ser. Ta p’esei e “mindset” di hende ta un faktor ku un strategista ta dediká hopi atenshon na dje. Tumando e tendensianan di akshonamentu den e kuenka di mando polítiko di Kòrsou na kuenta, kambio signifikante no ta probabel. Karga ku mi pa mi splika un biaha mas ta dikon mi ta kere ku kosnan ta kana manera nan ta kana.
****
Si tras di kada akshon tin un pensamentu (bibá sea konsiente òf nò) i tras di e pensamentu tin un teoria òf hipótesis (atrobe sea ku e ta bibá konsiente òf nò), e mas resien akshonnan ta konfirmá ku en bes di ta akshoná den kuadro di un plan stratégiko propio, nos ta reakshonando riba impulso di otronan. Si por ehèmpel tabatin kestion di akshonamentu basa riba prinsipionan fuerte, hopi kos no por a pasa.
****
Hopi ta pretendé di ta outónomo den nan tomo di desishon i posishon. Pero den realidat, nan ta un sorto di “puppet on a string”. No nesesariamente di un determinado persona òf un grupo, pero tòg inkapasitá pa akshoná a base di un plan propio. Pa referensia mi ta bolbe trese un definishon di outonomia kaminda nivel mental ta basta eksplísito: ”Autonomie betekent dat mensen zelfstandig keuzes kunnen maken en zelf de vrijheid hebben hun leven in te richten zoals zij dat willen”.

MADRID, Spaña, - E ritmo di su konosí sensual movementunan di su hep, Shakira a sa di pone 75.000 persona bira loko loko.
E artista colombiano aki, di fama internashonal, a pone e públiko grandi ariba abou.
E kantante di Colombia a sera ku su konsierto e terser hornada di festival “Rock in Rio”, konsiderá un di e mas potente di e festival di Arganda del Rey, e lokalidat situá pegá ku Madrid.
Tambe ta’tin entre otro hopi bon presentashon di e kantante britániko Amy Winehouse, pero Shakira a sa di gana tereno.
Shakira, ganadó di dos premio Grammy i shete Grammy latino, a bolbe demostrá kon bon artista e ta.

Foto: Shakira 0507

Shakira durante su presentashon n’e festival “Rock in Rio” ku a tuma lugá na Madrid.

HAARLEM - Ayera a tuma lugá e promé partido di e di 24 edishon di Haarlemse Honkbalweek.
E partido aki a bai entre Cuba i Antia/Aruba.
E ekipo di Cuba a bini ku tur su peloteronan ku lo bai hunga Weganan Olímpiko na Beijing.
Loke tambe ta remarkabel ta, ku e ekipo aki tin diferente pelotero ku a hunga “World Baseball Classic”.
E partido aki di un manera òf otro tabata unu di esun mas difísil. Pero al kontrario e selekshon di Antia/Aruba a sali ku un ekipo hopi fuerte i un picheo sólido.
E prospekto di draft pa Cincinati Reds kende ta Juan Carlos Sulbaran a sali tira un wega formidabel. Juan Carlos a permití apénas 1 hit den 6 inning i a sali for di e wega ku e skor empatá 1-1.
E defensa di Antia/Aruba tabata sólido i e bateo a produsí loke tabata pidi di dje. Pero al final Cuba a derotá Antia/Aruba ku skor di 2-1.
Loke ta hopi remarkabel ta ku e ekipo di Antia/Aruba aki ta un ekipo ku apénas a train 6 luna i ku masha tiki rekurso mes a logra yega Ulanda i buta un resultado kontra e ekipo ku ta sup kampion Mundial.
E selekshon Dutch Caribbean manera nan a nombr’é na Ulanda a haña basenan yen na un okashon, pero no a probechá.
Despues ku Cuba a bai dilanti den di kuarto ining e selekshon lokal ta empatá riba un doblete i un sensio den di seis ining.
Randolph Kirindongo a konektá dos hit den tres turno den e partido aki.
Juan Carlos Sulbaran su aktuashon ayera a pone ku mesora mènèdjer di e selekshon ulandes Robert Eenhoorn a hasi un invitashon pa e forma parti di e selekshon di Ulanda ku lo bai Weganan Olímpiko. Pero Sulbaran tin kompromiso ku su skol na Merka. E mester tuma un desishon den e próksimo dianan.

WILLEMSTAD- Fundashon Sedreko ku gran sosten di AMFO ta hasiendo preparashonnan grandi pa komienso di e “Plan di Fakansi 2008” ku ta primintí bira algu “nunka bisto”.
E “Plan di Fakansi” aki ta pa tur muchanan di entre 6 pa 19 aña, sigur e muchanan ku no tin e privilegio pa den fakansi por bai eksterior.
Djabièrnè mainta e tim di maneho di Fundashon Sedreko enkabesá pa sr. “Tony” Bakboord a reuní ku 31 boluntario ku lo traha den e plan di fakansi aki.
E promé 3 fechanan lo ta djamars 8 di yüli, djarason 9 di yüli i djaweps 10 di yüli na Sentro Deportivo Kòrsou.
Tur e fasilidatnan di Sentro Deportivo Kòrsou lo ta den uso i na disposishon di hubentut. Na tur lo por ofresé e hóbennan den kareda di 50 aktividat deportivo simultáneo.
Ta start 9’or di mainta i ta finalisá 1’or di mèrdia.
Fundashon Sedreko i AMFO ta hasi un invitashon na tur muchanan pa nan ta presente entrante djamars awor mainta.
Nos muchanan lo haña e bon trato di kustumber i tambe un djus i un pandushi manera semper.
Kòrda ku tur aktividat ta kompletamente grátis.
Fundashon Sedreko i AMFO ta spera tur mucha entrante djamars awor 8 di yüni na Sentro Deportivo Kòrsou.

There are so many minds in this world that has no ends. You have the narrow minded, the broad minded, and finally the absent minded.
We all go through these phases, and with experience and knowledge we acquire one of them. Hopefully for all concerned, it is the broadminded. We are not judged by our opinions, but rather what our opinions have made us. In the beginning we are narrow minded, for thinking everyone else has to share our judgment, even though we don’t share their judgment. With time we grow up, and hopefully we understand the other points of view. Time goes on and we try to understand one another, or try to be in someone else’s shoe. Perhaps we will change our mind as we go along. Some of us are stubborn, and refuse to do so, despite explanations that require us to do so, for to be understood is a luxury. In order to act wisely it is not enough to be wise. Thoughts without actions are just that: “thoughts”, and they never become reality. For vows begin when hope dies.
We go through life in three stages, learning, yearning, and finally searching. In the end what counts is what we have achieved, not only physically, emotionally, but spiritually. For the simple reason is when we do leave this old earth, we leave behind everything we had, and take with us whoever and whatever we are. Either we travel lightly, or heavily depending on the burden we carry in our minds, hearts and souls. Because of this some will not reach their goals, others will lose their souls, and others will reach their great destiny despite their enemies envy.
The mind is a powerful entity, it takes us where we guide it, and hopefully guidance from the past will steer it to the very last. Hope has a good memory, gratitude a bad one. For experience is not what happens to us, it is what we do with what happens to us. For the greatest mistake we can make in life is to be continually fearing we will make one. Mistakes are always initial, but we have to forge forward. Fear gives sudden instincts of skill.

WILLEMSTAD – Un periodista stranhero, resientemente a drenta den Fòrti i hasi masha familiar ku promé minister Emily de Jongh-Elhage, mishiendo ku e promé mandatario antiano. E mandatario no tabata konosé. E kaso a pone ku a tuma mas medida di seguridat ku por mira tur e dianan aki. Ademas a surgi e pregunta, si no a bira tempu pa akreditá periodistanan internashonal pa nan por bin sede di Gobièrnu.
Bishitantenan di Fort Amsterdam, kaminda Gobièrnu di Antia ta sinta i Gobernadó di Antia ta biba, por a opservá den último simannan ku tin muchu mas seguridat i kòntròl pa drenta den e fòrti. Informashon ku LA PRENSA a haña ta mustra, ku a tuma mas medida pa wak ken ta drenta den vehíkulo den Fòrti relashoná ku aserkamentunan dudoso na mandatarionan. Luna pasá por ehèmpel tabatin un persona estranhero ku a yama su mes periodista ku a aserká i mishi ku promé minister di Antia, Emily de Jongh-Elhage, loke a resultá mesora den un akshon di personal di seguridat ku a sali na defensa di e promé mandatario. Niun kaminda na mundu no ta posibel pa aserká mandatarionan sin mas i sigur no e promé mandatario. Aki na Kòrsou i na Antia tin seguridat pa mandatarionan, pero den niun forma komparabel ku loke por opservá internashonalmente.
E suseso resien tabata pues un bon rason pa a oumentá seguridat den Fòrti mesora. Awor aki ta poniendo aksento ta riba hendenan ku ta drenta Fòrti den un vehíkulo. Pero ainda tin regularmente turistanan na pia, ku ta drenta Fòrti pa nan saka pòtrèt di e monumentonan históriko. Lo no stroba nan, a ménos ku tin sierto indikashon òf sospecho.

PETRONIA
Egberto Marcelo
Bihó konosí komo Boechi òf Boeis ku tabata kore taksi 170
A laga atras su kasá Mercelina Petronia-Allée, yunan Herbert i Maruka Petronia-Goeloe, Nelson i Sheryl Petronia-Simmons, Myrtha Petronia, Orlando Petronia, Allan Desiré, Egberto Pantophlet. Akto di entiero ta djarason 9 di yüli. Bishita 1or na misa Sta. Famia. Promé ku entiero tin un s.s. di misa 4or i despues pa santana Roodeweg.

STATIE
Santo Umberto (84 aña)
Mihó konosí komo Shorumbu,
A laga atras su ruman Timoteo Statie i famia, yu Alexander Statie, suegra Arlene Statie-Wout, Gino i Selly. Akto di entiero ta djasabra 5 di yüli for di misa Coromoto pa santana Playa. Promé ku entiero 3or tin un s.s. di misa na misa di Antriol.

SPROCK
Vilma Isabel
Mihó konosí komo Mima òf Vilma di Deurwaarderskantoor Cratsz
A laga atras su yu Jacqueline i Herbert Copra-
Timmer, ñetu Diego Pontelira i Tivainy Betrian i yu, rumannan Lucille i Edgard Camelia-Sprock, Elia i Hubert Maynard-Sprock, August i Shirley Sprock-Louisa. Akto di entiero ta djadumingu 6 di yüli 4or for di Bottelier pa santana Bottelier. Bishita 1or. Promé ku entiero tin un respòns 4or.

PUCHI
Yolanda Beatriz (54 aña)
A laga atras su mayornan Luis i Luteria Puchi-Lourens, rumannan Mayra, Gustavo, Nancy, Raul Puchi, Laura Arvelo Puchi i Randolph Arvelo, Luis Puchi Jr. I Evangeline Puchi-Vos, Ana i Ronald Zuidgeest-Puchi. Akto di entiero ta djasabra 5 di yüli 4or for di Bottelier pa santana Bottelier. Bishita 1or. Promé ku entiero tin un respòns 3.30or.

Lorito ta yama tur hende un felis djasabra. Awa a kai un poko awe mainta i a muha nos alanan.
*********
Parse ku tin un enkuesta nobo ta bai sali ku ta nifiká un sla duru pa Aliansa Patriótiko. Lorito a tende, ku e enkuesta a kosta mas ku 10 mil florin. Nos a tende tambe ta ken ta tras di e enkuesta aki pa midi e situashon aktual. E promé konklushonnan ta, ku e partidonan di Aliansa Patriótiko lo bai haña sla duru. E úniko ku ta bai un poko dilanti ta PS. Sobránan mester wanta nan kurpa pasobra e sla ta devastador.
*********
Awe De Telegraaf a habri afó kontra e situashon ku a surgi siman pasá na Kòrsou. E korant ta papia di “blankenjacht”. Asina e akshon di e grupito ta sigui hasi daño na nos komunidat. Nos a lesa ku Helmin a bisa den e entrevista, ku e “makambanan” a saka nan atras pa e manifestantenan. Ta promé biaha ku nos a tende esei, a ménos ku e mes tabata den e área ta wak! E kos a keda manera buska argumentu pa suavisá e asuntu. Den e kasonan aki, maske kiko bo ta pensa (loke tur hende ta respetá), bo mester wak bon kiko bo ta bisa!
*********
Ounke ku un enkuesta ta algu temporal, semper partidonan ta tene kuenta ku e resultadonan den nan strategia. Interesante pa sa kiko partidonan manera MAN, Forsa Kòrsou, Niun Paso Atras i otronan (PLKP no ta konta masha tempu!) lo bai hasi. Lorito ta bulando ta wak pa nos ta e promé ku ta pone man riba e enkuesta aki. Nos lo tene bo na altura.

WILLEMSTAD --
Durante e próksimo 24 ora, no ta antisipá kambio signifikante den kondishon di tempu aktualmente.
Un ola tropikal ta moviendo den direkshon di Karibe i lo pasa ku mayoria aktividat na e parti nort di nos isla. Awe mainta awa a kai na diferente parti di Kòrsou.
Shelu lo ta por lo general parsialmente nublá i tempu lo keda generalmente seku. Sinembargo durante oranan di mardugá i mainta temporalmente lo por bira hopi nublá ku chèns pa algu di áwaseru breve lokal.
Bientu lo supla ku forsa moderá te basta fuerte for di un direkshon entre ost i sùitost; forsa 3 te 5 (12 te 39 km/ora, 7 te 21 nudo). De bes enkuanto ráfaga te fuerte; forsa 6 (40 te 50 km/ora, 22 te 26 nudo).
Sentro di tormenta tropikal "Bertha" tabata situá awe mainta 5' or na 16.5 grado nort i 35.3 grado west loke ta mas o ménos 1205 kilometer west di islanan di Kabo Verde. "Bertha" ta move den direkshon west nortwèst ku un velosidat di 33 kilometer pa ora i bientunan sostené mas fuerte rònt di e sentro di mas o ménos 85 kilometer pa ora. Ta antisipá ku "Bertha" lo sigui desaroyá gradualmente durante e próksimo dianan. "Bertha" no ta forma ningun menasa pa nos islanan.

CARACAS – E konsorsio Petroleos de Venezuela (_PDVSA) a subi su ganashi ku 80.2 porshento den e promé trimèster di e aña aki kompará ku e mesun periodo di 2007.
Durante e periodo tres lunanan di e aña aki, e kompania tabatin un entrada di 31.404 mion dollar, superando ku 52 porshento e entradanan di e mesun periodo di aña pasá ku e kompania a generá 20.709 mion dollar.
PDVSA den su informe konsolidá ku a sali publiká riba nan wepsait e siman aki, ku e ganashi ta debí pa gran parti na e oumentu di preis di barí di petroli di Venezuela ku a subi ku 81 porshento. Na mart último, un barí di petroli venezolano tabata bende na 87.89 dollar.
E empresa ta bisa, ku e oumento di entrada a pone ku por a kompensá e oumento di gastu di e kompania i kompensá tambe redukshon di eksportashon ku a bai ku 1 porshento. Eksportashon di petroli den e promé 3 lunanan tabata 2.82 mion barí pa dia, pero benta di produkto (petrolero) a baha, asina PDVSA ta bisa.
No ta masha kla kuantu e refineria na Kòrsou a gana den e promé tres lunanan di e aña aki, pero si konsiderá e ganashi sustansial ku e empresa total a hasi, no ta eksagerá bisa ku e ganashi tabata hopi grandi.
Por sierto e siman aki a lanta un Movementu ku ta bogando pa sera e instalashonnan. Na lugá di e instalashonnan, lo mester bin un área turístiko amplio. E promotornan di e idea pa sera e Refineria ta bisa, ku loke Kòrsou ta generando awor aki pa kada meter kuadrá ku e Refineria ta okupá, no ta den balanse ku loke Kòrsou lo generá den futuro (tantu den empleo komo entrada) ku e mesun kantidat di meter kuadrá, si impulsá desaroyonan turístiko. LA PRENSA lo bin bèk riba e ponensianan di e grupo Movementu Solushon Isla.

WILLEMSTAD – Hibiscus Business Center for di e siman aki ta habrí pa hür fasilidat di ofisina na empresanan chikí òf mediano. Hibiscus Business Center ta ofresé diferente tipo di ofisina ku tur fasilidat. E ofisinanan ta segun e konsepto all in, nifikando ku un komersiante chikí por drenta ku su kòmpiuter so i tur kos ta inkluí.
For di muebel te ku telefòn, koriente, servisio di resepshonista i tambe limpiesa di ofisina.
Esaki ta duna e komersiante e posibilidat di dediká su mes na su negoshi sin tin mester di preokupá ku otro aspektonan di e ofisina. Hibiscus Business Center ta keda na Perseusweg 14 serka di Pizza Hut Salinja. E promé negoshinan ku ta establesé den Hibiscus Business Center ta Paybiz ku ta hasi payroll i tambe Probiz ku ta duna servisio di atministrashon finansiero.
Hibiscus Business Center su telefòn ta 465-6400.
E desaroyadónan di e proyekto ta konvensí, ku loke nan ta ofresé ta un bon proyekto pa kua tin nesesidat na Kòrsou. E proyekto ta un prueba mas di e konfiansa grandi ku tin últimamente na Kòrsou.