ORANJESTAD – Recientemente RBTT Bank Aruba N.V. a duna pabien na dos hubilario: Sra. Sandra Tromp y Sra. Rose-Ann Vasquez-Vrolijk.
Sra. Sandra Tromp a recorda cu 30 aña pasa e a cuminsa traha den e sector bancario. Sandra a cuminsa traha na 1978 na ABN-AMRO Bank como Kassier.
Despues Sra. Tromp a ocupa diferente puesto entre otro: Hoofd Kassier, Supervisor Kas, Supervisor Customer Representation y Department Manager Retail Operations. Na October 2006 Sandra a wordo apunta como Manager Transfer na RBTT Bank Aruba N.V.
Sra. Rose-Ann Vasquez a recorda cu 12 aña y mey pasa, e a cuminsa na 1995 na First National Bank of Aruba N.V. como Statement clerk.
Despues Sra. Vasquez a ocupa e puesto di Credit Card Input clerk. Actualmente Rose-Ann ta trahando como Card Center Assistant na RBTT Bank Aruba N.V.
Riba e portretnan ahunto por mira e hubilarionan hunto cu gerentenan di nan respectivo departamento di RBTT Bank Aruba N.V.
RBTT Bank Aruba N.V. ta desea e hubilarionan tur clase di exito. Pabien!

ORANJESTAD – Diabierna anochi dia 4 di Juli, a tuma lugar e apertura di un exposicion na RBTT Bank Aruba N.V. su oficina den Caya Grandi – Caya Betico Croes 89, Oranjestad. E exposicion masha unico mes ta trata di obranan di arte produci pa e artista Sra. Ossyth Henriquez.
E exposicion ta keda presenta bou di e mesun nomber di e artista esta “Osyth” y ta consisti di diferente expreshon di arte colorido. Durante e apertura e invitadonan por a aprecia un splendido recital di Piano pa Sr. Jonathan Vieira.
Con un artista ta bira un artista? Osyth ta bisa: “Tempo cu mi tawata tin 8 aña, mi a descubri cu bida tin yen di color y mi a pinta mi mes! Mi sa cu abo tambe tin bo color, por ta ta preto, blanco, cora of otro color. Cada hende tin su spectrum di color cu ta influencia su bida y den cual e ta landa. Ami a dicidi di landa den e coriente artistico, y mi ta invitabo bin wak e gama di color, cu mi arte tin bisti y den cual abo tambe ta forma parti”.
Osyth ta un persona reconoci aki na Aruba pa tur su bunita trabaonan artistico. Nos por menciona su creatividad den arte di decoracion, diseño, pintura y mucho mas. Osyth ta conta cu desde chiquito e la explora diferente forma di arte, naturalmente den e abilidad y limitacionan di e mundo di un mucha. Pero ora e mira bek, ta e exploracion aki tabata e simia pa e explosion artistico den su bida di adulto. Pesey e ta di opinion cu cada mucha ta un artista riba nan mes, y Osyth ta bisa: “pa mantene e arte bo mester mantene e mucha den bo!” Dor di acudi na diferente tayernan internacional Osyth a perfeciona y desaroya su propio estilo. Den e estilo aki e pintor Romero Britto a hunga un rol hopi grandi. Tambe su retreatnan na Italia y New York a influencia e melting pot di colornan cu ta asina caracteristico pa e obranan di Osyth.

ORANJESTAD - Durante e vakantie grandi di scol, Simadanza lo ofrece diferente curso di baile, specialmente baile moderno pa hobennan. Por menciona entre otro Jazz, , Tap, Hip Hop y Streetdance.
Un ex-alumno di Simadanza, Tracy Pietersz lo duna diferente les p’asina traspasa cu conocimento cu nos hobennan. Tracy ta un alumno cu a sobresali na Simadanza y despues a scoge pa bai studia baile na Rotterdamse Dansacademie na Hulanda.
Aki el a studia entre otro Ballet clasico, Baile moderno, Jazz dance, Breakdance, Flamenco, Tap, Hip Hop y Streetdance.
Na 2005 y 2006 Tracy a presenta e proyecto di baile “Got moves” cu cooperacion di ATV.
Tur persona interesa, specialmente e hobennan, cu ta interesa pa participa na e cursonan di baile durante vacacion, por inscribi na Simadanza den Dakota Shopping Paradise of yama tel 582-6072 durante oranan di atardi.
Por yama entre 1.30 y 5.30 di atardi. Edad pa participa ta di seis aña pariba te cu adulto y tanto mucha muher como mucha homber por participa.

ORANJESTAD- Diabierna, 5 di juli ultimo, tawata un dia hopi special y festivo na ELMAR, pasobra no menos cu 10 empleado a celebra nan aniversario.
Un total di 7 empleado, a celebra 15 aniversario:
Sr. Frederick Krozendijk
Sr. Gilbert Dirksz
Sr. Leslie Hernandez
Sr. Irving Franken
Sr. Erwin Rafael Maduro
Sr. Sherman de Windt
Sr. Lyndon Naddall
Sr. Ferdinand Croes, miembro di Staf di ELMAR, a celebra su hubileo di 25 anja, Sr. Reynaldo Semeleer a celebra 35 anja den servicio di ELMAR, mientras cu sr. Estanislau Bislik a celebra su hubileo di 40 anja.
E celebración aki a tuma lugar na “La Dolce Vita” Restaurant, na unda Sr. Rafiné a ricibi e hubilarionan, acompanja pa nan distinguida familia.
Sr. Rafiné a graidici cada un di empleadonan pa nan dedicacion y nan bon trabao y a presenta nan certificado, pin di hubileo, como tambe nan envelop cu contenido.
Después e personal a brinda cu e hubilarionan y nan familia y un y tur pasa un atardi hopi agradable y alegre na “La Dolce Vita” Restaurant.

Un pensamento o guia pa e crisis di Energia

ORANJESTAD- Pa un comunidad sigi funciona cu e gastonan halto di awa y coriente ta necesario pa bin cu un plan y direccion pa uso di energia pa Aruba.
E subida drastico di prijs di crudo, cu lo sigi subi, lo bai exigi hopi di nos comunidad chiquito cu ta depende 100% di e crudo.
Accionan cu por tuma lugar riba corto y medio plazo ta e.o. conseha y concientisa nos comunidad pa spaar riba awa y coriente e.o door di spotnan na radio, television, foldernan y guia professional, nos mester cambia nos lifestyle pa por sobrebibi e crisis di energia aki.
WEB NV mester cambia su maneho di inversion pa no mara nos comunidad cu debenan den periodo di crisis cu ta bai ta basta largu, wak den direcion di alternativanan di decentralisacion di energia, responsabilidad propio;
decentralisacion di producion di energia e.o., hotel grandi cu ta usa mas cu 2 MegaWatt, mester por genera nan mes energia, pues bira Energy Selfsupporter, nan por genera nan mes energia via nan Build-in Powerhouses cu nan tin caba, of cu nan mes instalacion di energia alternativa segun nan escogencia; decentralisacion di energia den forma Sectorial (Barionan).
Si nos tuma cu un cas na Aruba ta usa un average di coriente di 750 KiloWatt pa luna, por instala turbina di biento cu un capacidad di 1.5 MegaWatt cu ta duna coriente na 1442 cas den e barrio of un turbine di biento di 2 MegaWatt cu ta duna coriente na 2404 cas den e barrio; Option ‘Waste to Energy” ta keda riba mesa!
Aki ta minimalisa desperdicio y ta genera energia, tin diferente posibilidad cu e tecnologia aki.

ORANJESTAD- Un pelea serio a tuma lugar awe mainta den e edificio bieuw di Texas Furniture Store den centro di Oranjestad, cu a laga un persona seriamente herida.
Ta trata aki di e conocido choller Tico Spanner, kende lo a haya su mes envolvi den un pelea cu otro choller, y esaki a pasa man pa un cuchiu y a corta Spanner na su garganta cu e arma.
A pidi presencia di ambulans cu urgencia cu a transporta e choller cu urgencia pa dr Horacio Oduber Hospitaal pa tratamento.
Polisnan a logra di detene e agresor kende lo a admiti di a corta Spannner.
Awe mainta tambe autoridadnan a ser avisa cu a haya un persona morto den un mondi chikito na Noord, pero a bin resulta cu aki lo ta trata di un persona di edad kende lo a muri un morto natural.

EUGENE, Oregon, Merka – Allyson Felix no a sinti preshon den e eliminatorio merikano di e pruebanan di atletismo pa e Weganan Olímpiko.
Wallace Spearmon, Jennifer Stuczynski i Marshevet Hooker tambe ta bon, pero tur a sufri opstákulo i dolónan promé ku nan a logra e klasifikashon pa Beijing.
Mas lat, Alan Webb, tripel kampion merikano riba 1.500 meter, a kaba di sinku den un dje pruebanan mas bringá. E selekshonadonan merikano tabata Bernard Lagat, original di Kenya, Lopez Lomong di Sudan, i Leonel Manzano, kende a nase na Mexico.
Un dia despues ku e kaida di Tyson Gay a rekordá tur hende no tin nada skibí riba pista, e dos velosistanan i Stuczynski, spesialista den bulamentu ku palu, a lucha mas duru di loke lo a imaginá pa bai Beijing.
Wallace Spearmon, kende a pensa ku e lo tin un viktoria fásil den 200m, mester a primi pia pa superá Rodney Martin i logra e di tres puesto.
Stuczynski a logra un rèkòrt nobo merikano den bula ku palu, ku un altura di 4,92 m (16 pia i 1,75 inch), pero despues di a frakasá den e dos promé buladanan ku altura mas abou. El a logra klasifiká den su di tres i último oportunidat.
Hooker, di su parti, kende fin di siman pasá a kore 100m ku un velosidat sin presedente (e tabatin bientu na su fabor) pa di sinku bia, a haña e último pasashi den 200m pa 0,01 sekònde. E tabatin mester di esei pasobra e no a klasifiká su mes pa 100m apesar di su tempunan rápido.

HAARLEM – Ayera Hapon a anotá seis kareda den kabes di e di sinku ining pa totalisá 12 kareda i a logra un triunfo di 12-5 den un wega ku a hunga solamente seis entrada, debí na áwaseru.
Picheo ta loke e selekshon di Antia/Aruba tabata falta.
Despues di dos bon prestashon di Juan Carlos Sulbaran i Simon Pantophlet, ayera e picheo di Alfred van der Linden i di Revelien Elisabeth a pèrmití kasi tur e karedanan.
Hapon a anotá dos kareda den di segundo, terser i kuarto ining i sinku den di sinku.
Den bòm di seksto ining Dutch Caribbean ta anotá su sinku kareda.
Pa Hapon: 12 kareda, 12 hit, 1 eror.
Pa Dutch Caribbean: 5 kareda, 7 hit, 3 eror.
Awe Dutch Caribbean ta hungando kontra Hapon i ta pèrdiendo 11-0 den di kuater ining.
Raymond Martis ta habri e partido aki.

MIAMI, Florida, Merka, - E orkan Bertha ku ayera a transformá den un siklon poderoso di kategoria 3, awe a oumentá su bientunan mas o ménos 195 kilometer pa ora den su avanse pa nortwèst riba awanan di Atlántiko.
“Awor aki nos ta studiando si Bertha lo bira un menasa pa Bermuda, pero ainda ta muchu trempan pa bisa ki tipo di impakto lo bai tin n’e isla aki”, un meteorólogo di Sentro Nashonal di Orkan (CNH, abreviashon na ingles) a bisa.
Orkan Bertha, ainda ta leu for di tera, asina e sentro di orkan merikano a informá.
E sentro di e siklon tabata lokalisá 1.855 kilometer sùitost di islanan Bermuda.
E orkan tabata avansá mas o ménos 19 kilometer pa ora i ta fèrwagt un kambio gradual pa nortwèst i asina e lo alehá for di kostanan di Caribe den direkshon sùit di islanan Bermuda, segun Sentro Nashonal di Orkan, ku sede na Miami, Merka.
Bertha a bira un orkan di kategoria 3 riba eskala Saffir-Simpson ku tin komo máksimo 5.
Bertha ta e promé orkan di temporada di siklonnan na Atlántiko, ku a inisiá 1 di yüni último i ta ekstendé te 30 di novèmber benidero.
Durante e temporada di orkan di Atlántiko a forma dos tormenta tropikal, esta, “Arthur” i “Bertha”, i un siklon.
Na aña 2007, mas o ménos 200 persona a muri pa orkannan ku a gòlpia kostanan di Caribe, Mexico i Sentro Amérika.
Biniendo bèk riba orkan Bertha, el a haña fòrsa ku hopi mas rapides di loke a keda pronostiká, i su sentro ta sigui move den direkshon nortwèst ku 27 kilometer pa ora.

WILLEMSTAD – Ulandesnan europeo ta sobre-representá na Kòrsou. Esaki ta loke ku e presidente di e Plataforma di Polítikonan Antiano i Arubano na Ulanda, Ed Gumbs, a remarká na Ulanda. Gumbs a reakshoná riba e akshon di e manifestantenan algun dia pasá na Kòrsou, unda ku entre otro un yu di Kòrsou, a wòrdu agredí. Gumbs, ku ta aktivo tambe den polítika na Ulanda, tabata orador di órden durante e konmemorashon di 30 di mei 1969 ku a tuma lugá den Pietermaai na mei último.
Segun Gumbs, e tin sierto komprenshon pa e inseguridat ku ta reina na Kòrsou. Entre otro Gumbs a bisa di tin problema ku e hecho ku tantu na Ulanda komo na Kòrsou, mesora ta papia di un akto di rasismo. ‘Mi ta haña hopi tristu, ku por ehèmpel ta hasi komo sifuera e manifestantenan tabata riba un yagmentu riba ulandesnan europeo’.
Gumbs ta rekonosé ku tin algun problema na Kòrsou.
Pero e ta konvensí ku esaki tin di haber tambe ku e hecho ku e ulandes europeo ta demasiado representá na Kòrsou. ‘Mi ta haña ku polítika mester tene kuenta ku e situashon aki i puntra su mes ku si ta algu bon ku tin un kantidat grandi di stagiaire for di Ulanda ta bon. ‘No ta pasobra e situashon aki ta tuma lugá pa basta tempu kaba, mester asumí ku e ta korekto.
Ademas, e situashon ta birando mas pió, segun Ed Gumbs. ‘Ta birando mas kla, ku ta trata di un situashon di ‘dominio’ i esaki ta bisto tambe den e bista di kaya, segun Ed Gumbs. E situashon tin influensia tambe riba e trabou regular, unda ku e stagiairenan ta kita trabou for di hendenan lokal. E trahadó lokal no ta haña chèns pa traha. ‘Esei ta un problema. ‘ I segun Gumbs sigur tin un relashon entre e situashon aki ku e situashon di struktura estatal nobo. E relashon ta simpel, segun Gumbs kende a splika ku e pueblo di Kòrsou masalmente a skohe pa keda den Reino, pero ku un status apart. Ta un realidat ku no ta tur hende ta satisfecho ku e kontenido ku ta duna e status aparte. Pero pa haña e status aparte, tin sierto medida di protekshon ku nos tabatin ántes, pa protehá ekonomia i trabou pa hendenan lokal, nos a laga bai, Gumbs a splika na Ulanda.

WILLEMSTAD - Gobièrnu di Kòrsou a risibí 400 opheshon dokumentá relashoná ku e petishon pa destiná un parti di e área konservá na Jan Thiel, pa e proyekto di Jan Thiel Bay Destination Resort. Ta trata di e kantidat mas grandi di opheshon ku Gobièrnu a haña te awor aki pa un proyekto spesífiko for di tempu ku a introdusí e Plan di Desaroyo di Kòrsou (EOP) den dékada 90.
Fundashon Amigu di Tera, algun dia pasá a hasi un yamada públiko na komunidat, pa promé ku e último fecha ku ta posibel, ku tabata 2 di yüli, protestá na gobièrnu kontra dje intenshon pa konsedé parti di e área konservá pa e proyekto turístiko. Durante di un konferensha di prensa ku a sigui algun dia despues, e desaroyadó di e proyekto, Eduardo Halabi, a splika ku ta solamente tres repi di e tereno enkuestion, ku ta forma un total máksimo di 1 porshento i mei, e proyekto ta deseá di haña aserka. Ademas di Fundashon Amigu di Tera, Fundashon Kuido Humano di Norbert George, tambe a kritiká fuertemente e posibilidat ku gobièrnu lo librá parti di e tereno konservá, pa dedik’é na un proyekto turístiko.
Segun e splikashon di diputado Anthony Godett, kende ta enkargá ku e kartera di infrastruktura, mayoria di e opheshonnan entregá ta den forma di un karta stándart ku a formulá i repartí, entre otro riba Internet. Diputado Godett a indiká ku gobièrnu ta laga e proseso aki kana manera mester ta i ku a kanalisá e protestanan pa e servisio konserní ku ta DROV. E servisio aki ta enkargá pa duna gobièrnu un konseho riba e asuntu aki. Seguidamente gobièrnu lo disidí kua ta e siguiente trámitenan ku mester sigui den e kaso aki.

WILLEMSTAD - FAC i su Komishon Organisadó ta gradisí henter e públiko, fanátiko, koredónan, Safety Safari, ofisialnan di pista, Polis, Brantwer i Ambulans pa esun dia di karedanan di Drag titulá “Kareda di Drag di Himno i Bandera 2008” ku tabata eksitoso.
Tabatin vários oildown, esta vehíkulonan ku tabata kibra laga zeta riba pista ku a kousa algun tardansa, pero esaki no a para e éksito di e evenementu.
Ta un kareda lokal, pero no por a evitá ku el a bira International.
Di Merka tabat’ei Pat Musi ku a blas “King Kong 4” pa un mihó E.T. di 6.802 sekònde. A bini di Venezuela pa kore Enrique Mansera ku su “Nitrous Trick”, Rafael Villalobos ku “El Buyi” i Javier Casanova ku “El Chivo”, di Boneiru a bini pa motosaikel e veterano Mack Thode, Hendrick Emerencia i nan ídolo ku ta Fittifaldi Pietersz i por último di Aruba a kore Junior Fingal ku a kore e motosaikel di Jerrel Jansen.
Ta tin hopi kareda emoshonante ora e 3 orguyo nan nashonal nan di Kòrsou kore.
Promé ta e Mazda Miata di Ingomar Meyer ku tin e rekòrt di un E.T. 7.842 sekònde. Ki ora Meyer t’ei públiko ta riba pia i di dos tabata “King Kong 4” ku su pass nan ku a hisa e emoshon i di tres tabata Raishell Maduro ku e “wheelstand” nan masha great mes.
Lamentablemente djasabra e karedanan a keda suspendé na momentu ku Johannes “Mr. Holley 4” De Boer a hañ’é den un aksidente despues di pa final di e pista na momentu ku el a benta su parashut pa e por bai na break. Tabata un kareda gana ya ku su kontrinkante Osman Osman den “Baloul Special” a bula ”Red Light” ku ta un foul.

ARIES: Ta momentu di enfrentá bo problemanan. No kobardiá, abo si por vense lo negativo. Konsultá ku personanan eksperto si bo tin miedu di kiboká. 07,31,45.

TAURO: Bo tin awor e magia pa atraé i logra realisá bo soñonan. Bisa si na tur oportunidat di biahe si suerte ta na bo fabor. 30,05,19.

GEMINIS: E aktitut pasivo i laga di hasi ta asuntu di pasado pa bo. Awor bo mente ta saturá di ideanan pa hasi e realidat di trese fama. 28,14,29.

KANSER: Ounke nan ta papia tras di bo lomba, nada ni niun hende por hasíbu daño. Unda ku bo bai lo tin atenshon na bo. No komprometé ku niun hende. 17,05,49.

LEO: No papia malu di niun hende, ni kritiká tampoko niun hende. Evitá na konspirá kontra otro personanan. Ser mas sosiabel i tolerá ku otronan. 18,15,19.

VIRGO: Bo mundu di kreatividat i di disfrutá di bida ta eksaltá. Bo ta rekuperá di tragedianan, enfermedat, problema i desepshonnan. 44,01,37.

LIBRA: Bo tin awor e balor i e agresividat pa defendé bo mes i defendé otronan. Ya niun hende por sakabu di loke ya bo a disidí pa bo mes. 10,03,21.

SKORPION: Bo gustunan pa e kosnan kèns ta aksentuá manera nunka ántes, pero no lubidá ku bo no tin ku kuida bo saku, bo gastunan. 50,14,03.

SAGITARIO: Kuida bo asosashonnan. No konfia den kualkier hende ku bini pa ofresébu gloria. Amigu i famia serkano ta awor bo fuente di apoyo. 02,33,16.

WILLEMSTAD - Pa fin di e aña aki, e promé konsepto pa yega na un maneho di energia a Kòrsou ta riba mesa. Nos ta spera ku di e forma aki nos por duna kontenido na loke semper nos a para p’e, esta base pa un maneho dirigí riba energia, asina diputado Humphrey Davelaar, bou di kende e kolumna di energia ta kai, a anunsiá.
Ayera, preis di gasolin i diesel a bolbe subi. Kontrali na e impreshon ku ta reina, no ta un oumento aprobá awor aki atrobe pa Bestuurscollege, asina e diputado a bisa. Aki ta trata di e desishon ku a tuma na kuminsamentu di luna di mei, kaminda a palabrá ku gasolin ta subi ku 20 sèn na mei, 20 sèn na yüni. Diesel en kambio ta subi ku 20 sèn na mei, 20 sèn na yüni i 30 sèn na yüli. E oumento di 10 sèn ku a drenta na vigor ayera ta parti di e trayekto pa yega na un preis ku ta konforme preis di merkado.
Pa hopi tempu kaba gremionan den komunidat a bin ta boga pa yega na un maneho di energia. Ku un maneho asin’aki, gobièrnu por dirigí e asuntu di energia aki mihó. COPDA, e asosashon di doñonan di pòmp di gasolin pa basta tempu kaba ta bogando pa yega na un maneho di energia.
“Un maneho di energia sinembargo ta rekerí preparashon. Bo no ta yega na un manera asin’aki den dos, tres òf seis luna. Nos ta trahando diligentemente riba esaki i nos ta spera di tin e promé konsepto kla na luna di novèmber awor,” e mandatario a anunsiá.
Un realidat ta di otro banda, ku preis ketu bai ta subiendo, asina e diputado a atmití. Esei ta nifiká ku ainda no a yega e máksimo na oumento.

WILLEMSTAD – “Esnan ku tin kustumber di kumpra piská na barku, mester paga bon tinu e dianan aki. Tin di e barkunan aki ku ta bendiendo piská ku a daña i ku por perhudiká salú di hende.
Fundashon pa Konsumidó por konfirmá esaki”, asina René Trinidad, direktor di e fundashon a anunsiá.
“Resientemente”, segun Trinidad, “a drenta keho serka e fundashon ku lo tin barku ta bendiendo piská, ku aparentemente no ta bon.
Nos mes a bai hasi un investigashon i nos a konstatá ku en bèrdat tabatin un barku ku tabatin piská ku no tabata kumpli ku reglanan di higiena. E piská, tipo purunchi tabata poné pa bende, sin ku e tabatin eis riba dje. Ademas, e piská tabata saka un holó malu i tabatin partinan ku klaramente tabata mustra ku e piská no ta bon mas pa hende kome,” Trinidad a splika.
El a bisa, ku lo ta bon pa hendenan ku tin kustumber di kumpra piská na e sitio aki, pa paga tinu iI kontrolá bon promé.
“Mi mes a topa un señora na e sitio ku a kaba di kumpra su piská, pero ora nos a bai averiguá, e piská no tabata bon,” Trinidad a agregá.
El a bisa, ku e situashon ta difísil, pero ku e konsumidó por ehersé un kòntròl mas skèrpi posibel.
Ounke no tin garantia riba kontestanan sinsero, pero ta bon semper pa hasi pregunta, ora e konsumidó tin duda. E por puntra por ehèmpel kuantu tempu e piská tin.

WILLEMSTAD – “Central General di Trahadónan di Kòrsou CGTC no ta aseptá mas oumento, si no bin e pakete di medida sosial ku gobièrnu a primintí pa aliviá situashon partikularmente pa esnan ménos pudiente.
Esei ta posishon ofisial di CGTC den e situashon aki”, asina Ronald Ignacio, kende ta sekretario general di e organisashon a deklará.
Ignacio tambe ta un djesnan ku ta hopi preokupá pa e desaroyo di preis den nos komunidat.
Ignacio a hasi e deklarashon aki, despues di e oumento di mas resien di preis di kombustibel den nos pais.
“Nos tur sa ku si preis di kombustibel subi, preis di práktikamente tur kos ta subi igual. Pa gruponan vulnerabel den nos komunidat, e desaroyo aki ta funesto, pasobra dia pa dia ta bira mas difísil pa karga ku oumento,” asina e dirigente sindikal a opiná.
Segun sekretario general di CGTC, tur hende por kòrda kon gobièrnu a primintí di lo bin ku un kolchon sosial ku mester sirbi pa suavisá e impakto di oumento pa esnan ménos pudiente den nos komunidat.
Esei sinembargo a keda na promesa, pasobra te awe nos no a mira nada siendo ku preisnan si ta sigui subi, el a bisa.
Pa Ignacio, loke tambe ta inaseptabel ta, ku preis ta sigui subi, anto no ta mira niun akshon di parti di gobièrnu.
Manera LA PRENSA ta informá den un otro artíkulo, segun diputado Humphrey Davelaar, gobièrnu niun ora so a floha riba intentonan pa bin ku e medidanan di suavisashon.

WILLEMSTAD - Minister pa Relashon Eksterior di Ulanda Maxime Verhagen e siman aki ta bishitá tantu Antia komo Aruba. E lo papia ku promé minister di tantu Antia komo Aruba riba futuro struktura di maneho ku eksterior, riba e relashon ku Union Oropeo i e relashonnan den region di Karibe.
E dos promé ministernan ta atendé ku maneho eksterior nan mes, pero Verhagen ta esun ku finalmente ta responsabel pa maneho eksterior na nòmber di Reino.
Verhagen tambe lo bishitá e base di Marina Real na Parera durante su bishita. E base aki ta sostené outoridatnan sivil, pero alabes ta aportá na stabilidat i na siguridat den region di Karibe.
Marina Real ta hasi esaki, entre otro riba tereno di kombatimentu di trafikashon di droga dilanti kosta.
E bishita di Maxime Verhagen ta dura di 9 pa 11 di yüli awor.

WILLEMSTAD / DEN HAAG – Sekretario di Estado Nebahat Albayrak (Hustisia) ta haña seramentu di prezunan den sèl huntu un forma regular i digno di deprivashon di libertat. Asta awor akí ku no tin problema ku kapasidat den prizònnan, Albayrak ta mantené uso di sèlnan pa mas ku un detenido.
E sekretario di estado a reakshoná riba un konseho di e Hunta di Implementashon di Kastigu i Protekshon di Hubentut (RSJ), relashoná ku uso di sèlnan pa mas ku un persona. Uso di e sèlnan lo ta nesesario pa disposishon flèksibel di e kapasidat. Banda di esei e sèlnan akí ta nesesario pa por ubiká mas tantu detenido posibel den e region kaminda e persekushon ta tuma lugá òf den e region kaminda e detenido ta regresá despues di su kastigu. Di e manera akí por organisá e post-kuido i e konekshon riba fasilidatnan sosial mas mihó.
Den e akuerdo di koalishon tambe a proveé intensifikashon di uso di sèlnan pa mas ku un persona. E posibilidatnan pa esaki ta detayá den e masterplan pa kapasidat, ku na kuminsamentu di 2009 ta bai Tweede Kamer. Albayrak ta kontradesí e krítika di RSJ ku den e aktual implementashon e chèns ta grandi ku ta pone detenidonan inhustamente den un sèl huntu. Pa yega na un desishon pa sera detenidonan huntu ta konta kontra indikashonnan, manera salú di e detenido òf orígen di e krímen kometé. Inspekshon pa Implementashon di Sanshon (ISt) ta kontrolá ora ta skrudiñá institutonan penitensiario si tin por ehèmpel instrukshonnan di kolokashon lokal i si e sèlnan pa mas ku un persona ta kumpli ku e eksigensianan. Den e Relato Anual 2007 inspekshon ta indiká ku nan ta tende mas zonido satisfaktorio ku problema tokante uso di e sèlnan.

WILLEMSTAD/ HULANDA – Un grupo di 90 antiano na Hulanda a skapa na momentu ku e bùs den kua nan tabata a kima kompletamente. E grupo tabata na kaminda pa Alemania kaminda nan lo a bai keiru i hasi kompra. Mester a hiba 11 di nan hòspital pa opservashon.
Dos di e pasaheronan a manda un e-mail pa LA PRENSA den kua nan a splika kon serio e situashon tabata. Nan relato ta bisa ku nan tabata riba kaminda pa Alemania na altura di e siudat Hagen ora un outomobilista a kuminsá pita nan i bisa nan pa hala kantu di kaminda. “Ora e shofùr di e bùs no kier a reakshoná, e outomobilista a kòrta dilanti di nos i a bai kore dilanti di e bùs pa obligá e shofùr pa hala na kantu. Mes ora e shofùr a nota ku for di e parti patras di e bùs, probablemente e motor, tabata sali huma. El a bisa nos pa baha mes ora, pero den promé instante e no por a habri e porta. Un di e pasaheronan finalmente a logra habri e porta pa nos por a baha.”
Mas aleu nan a splika den nan e-mail ku nan tabata den un bùs dòbel dèk i e pasaheronan ariba ya a drenta pániko. “E portanan di emergensia no kier a habri i e parti ariba di e bùs ya a kuminsá yena ku huma. Nos mester a kibra e bentananan pa e huma sali sino nos lo a stek. Tabatin hende ku a bula for di bentana i pafó tabatin otronan pará pa fangu e muchanan ku tabata sali for di e bentananan. Nos a skapa nèt. Danki Dios.”
Entre e 11 personanan ku mester a bai hòspital tabatin tambe un dama na estado i algun hende ku herida leve. Un bùs remplasante a buska e grupo di antiano i hiba nan Hulanda bèk.

WILLEMSTAD - Frakshon di partido PAR den Parlamento a tuma nota di e intenshonnan di minister di Hustisia pa hiba kombersashon ku e kompania di helikòpter Blue Sky. Mirando ku den pasado e asuntu di helikòpter a terminá den diferente kaso den korte, e frakshon ta atvertí pa ta kouteloso ku kualkier intenshon.
Pa e motibu akí e frakshon a hasi un seri di pregunta na minister David Dick. Mas aleu e frakshon ta bisa ku, saliendo for di e punto di bista ku durante tratamentu di presupuesto 2008 minister Dick a duna di konosé ku no tin e plaka disponibel pa paga un helikòpter i ku un helikòpter na e momentunan aki no ta su prioridat, ta bon pa e minister konfirmá e siguiente preguntanan:
A risibí un oferta di e kompania di Helikòpter Blue Sky pa hasi uso di su servisio?, KPC ya a hasi uso di e servisio di Blue Sky?, ta e intenshon pa riba un base no kontraktual hasi uso di e servisio di Blue Sky?, tin negosiashonnan andando ku e kompania di helikòpter Blue Sky?, ainda minister ta di opinion ku e servisio di helikòpter na e momentunan aki no tin prioridat?, tin e fondonan reserva pa paga servisio di helikòpter?, kon ta bayendo ku e servisio di helikòpter ku tin na e momentunan aki na St. Maarten?, tin un vishon pa futuro pa loke ta trata henter e servisio di helikòpter?