ORANJESTAD- Dia 15 di juli 2008 tabata exactamente 25 aña pasa cu Sr. Jessy Beukenboom a drenta servicio di gobierno y a cuminsa eherce su labornan na Instituto pa Deporte Educacion Fisico y Recreacion (IDEFRE).
Despues di a gradua cu un Bachelors Degree den educacion fisico y deporte na Whittier College na California, Sr. Jessy Beukenboom a regresa Aruba na luna di juni 1983 y dia 15 di juli 2008 el a drenta servicio di gobierno como instructor di deporte y a bai traha na San Nicolas Sportcentrum na unda e a keda encarga cu organisacion y ehecucion di programanan di deporte pa scolnan y hobennan den e centro deportivo. Siguientemente un resumen di su carrera como empleado publico.
Juni 1983-1985 instructor di deporte na San Nicolas Sportcentrum;
Mei 1986 Hefe di San Nicolas Sportcentrum, coordinador di programanan pa deporte escolar y ehecucion di instruccion di deporte den bario y na institutonan manera Servicio di Bombero, Instituto Coreccional y Fundacion pa Personanan cu limitacion mental;
1989 nombra como hefe interino di IDEFRE banda di su funcionnan como hefe San Nicolaas Sportcentrum, instructor di deporte y coordinador di programana deporte escolar;
1990-1996 hefe interino di IDEFRE, hefe di San Nicolas Sportcentrum, hefe di instructornan deportivo y coordinador di actividadnan deportivo;
1993-1996 encarga cu maneho diario di IDEFRE pa motibo di traslado di director
1997-2006 encarga cu maneho diario di IDEFRE pa motibo di traslado di director y for di 2003 te cu 2006 pa motibo di vacatura di funcion director IDEFRE

 
A extende participacion den maximo organisacion mundial di post

ORANJESTAD- Sr. Maurice Adriaens, Minister di Transporte y Communicacion di Antiya a bishita su colega Minister di Aruba, sr. Tai Foo Ramon Lee. Intencion principal di e reunion tawata pa delibera y dicidi pa, conhuntamente, Aruba cu Antiya aplica pa bira miembro di e conseho administrativo di Universal Postal Union (UPU), e maximo organisacion mundial cu ta regarda asunto di post. Na e reunion tambe tawata presente dos conseheronan di maneho, esta sra. Martines di Ministerio di Transporte y Communicacion di Antiya y sra. Tromp di Ministerio di Labor, Cultura y Deporte.
Manera ta conoci Antiya y Aruba hunto ta miembro cu derecho di un voto den Universal Postal Union (UPU). Ta conoci tambe cu e entidad combina di Antiya Hulandes y Aruba (NA&A) tabata envolvi cu e fundacion y desaroyo di e union desde e tempo di su establecimento.
Den e capacidad aki NA&A semper a hunga un papel importante den e proceso di desaroyo postal den e region di Caribe. Tanto Aruba como Antiya Hulandes ta tambe, miembronan fundador di e Caribbean Postal Union (CPU) y tabata instrumental den promocion di cooperacion postal den espirito y observacion di e actonan di UPU. Como miembro di CPU, ambos pais tambe tabata envolvi den actividadnan cu meta di desaroyo di administracion di post den region Caribe.
NA&A a pasa recientemente den un proceso rigido y exitoso di reforma postal cual actualmente ta pone ambos den un posicion di ehempel den region Caribe pa loke ta stimula e efecto di cambio global den e region tocante post. Basa riba nos experiencia regional NA&A ta sinti e necesidad di extende su contribucion na comunidad global di post.

ORANJESTAD- Dialuna 4 di augustus e orkesta synfonico lo tene un concierto na YMCA San Nicolas.
Hunto cu Biblioteca Nacional nan lo ta anfitrion di e orkesta di Conservatorio di Amsterdam "Ricciotti" y e cantante stima Izaline Calister. Lo tin un conferencia di prensa cu ta cuminsa 3 or na YMCA tambe.
E concierto mes ta cuminsa 4 or di atardi y entrada ta completamente gratis.
Tur anya orkesta Ricciotti ta tene un gira y ta trece musica na lugarnan caminda normalmente no sa tin concierto, manera na PAAZ.
E anya aki a toca Korsow y Aruba e suerte di por hanya un orkesta di no menos cu 41 integrante y un cantante "de primera" manera Izaline Calister. Ken no conoce e cantica "dushi mi ta stimabo hopi ...wow' i carinyo.." y hopi otro cancion mas.
E gira aki jama "Barbulete" y a cosecha tanto na Hulanda como na Korsow hopi exito caba. E orkesta a studia specialmente pa e gira aki musica di Caribe, di Sur America y lo bini cu sorpresa!
Dialuna tin oportunidad di scucha musica, contenta curason na YMCA San Nicolas y anochi 8 or na Cas di Cultura tambe.
Tur hende, muy en especial amante di bon musica ta mas cu bonbini!

ORANJESTAD- Brahma Kumaris Aruba ta invita Bo persona pa un curso di “Raja Yoga Meditashon” na ingles y ta tuma lugar na e Centro di Brahma Kumaris Aruba na Santa Cruz 113, E curso completo ta ariba e siguiente dianan:
Dialuna, 04 di Agosto 19:00 – 20:30;
Diarason, 05 di Agosto 19:00 – 20:30;
Diabierna, 07 di Agosto 19:00 – 20:30;
Dialuna, 11 di Agosto 19:00 – 20:30;
Diarason, 13 di Agosto 19:00 – 20:30;
Diabierna, 15 di Agosto 19:00 – 20:30;
Dialuna, 18 di Agosto 19:00 – 20:30; y
Diarason, 20 di Agosto 19:00 – 20:30.
Brahma Kumaris Aruba ta pertenece na Brahma Kumaris World Spiritual University. Brahma Kumaris World Spiritual University ta un organisashon
internashonal y unda bo por desaroya bo parti spiritual. E organisashon aki ta reconoce e bondad intrinsico den tur ser humano.
Kiko ta Raja Yoga?
Raja Yoga ta un sistema antiguo di meditashon. E ta dunabo comprendemento spiritual y ta siña bo e habilidad pa stabilisa bo mente, reduci stress, saca tenshon y dolor, pues ta engrandece bo salud y bienestar. Raja Yoga ta ofrece un acercamento, paso pa paso con pa practica meditashon. Bo ta siña un metodo practico, simpel y natural pa medita basa ariba conekshon cu e Fuente Digno.
Bo ta cuminsa biba for di paden pa pafor cu ta hasi cu bo ta expresa bo cualidadnan y podernan spiritual den un forma masha natural.
Bo ta siña comprende diferente nivel di conciencia y ta dunabo e poder pa scoge bo pensamentonan, sentimentonan y contestanan conecta cu e Ser Divino. Asina nos por hasi meditashon y spiritualidad un parti di nos bida diario. E ta yudabo tin mihor relacion den bida.

 
ORANJESTAD- Manera ya ta conoci sr. Richard Maxwell a viaha riba 24 di Juli ultimo pa Guadeloupe pa atende e Conferencia di Caribbean Nurses Organization. Despues di e reunionnan plenario, a toca e tema di eleccion di un directiva nobo pa Caribbean Nurses Organisation. Esaki como cu cada dos anja tin eleccion pa un directiva nobo. Na e ocacion aki sr. Maxwell kier a postula su mes como vice-presidente pero el a wordo aserca dor di miembronan di CNO cu e peticion pa e considera e candidatura di president di CNO pa e periodo di 2008 – 2010. Sr. Richard Maxwell a tuma contacto cu su directiva na Aruba y a obtene e respaldo di e directiva di ODEA pa accepta dicho proposicion.
Esaki pa varios motibo :
como cu aruba lo bay ta cede di e conferencia na 2010, ta si suma importancia pa tini cu contacto directo den e directiva di CNO,
pa duna un empuje na enfermeronan di aruba pa nan por tin un idea con leuw nan lo por bay den futuro,
pa ataca diferente aspectonan cu ta regarda enfermeria y cuido di salud en general di aruba pa hanja un sosten di caribe pa sostene enfermeria y cuido di salud di aruba
pa pone e nomber di aruba halto den caribe riba aspectonan di enfermeria y cuido di salud.
pa duna sr. Maxwell e merito cu e merese como un enfermero cu a y ta lucha duru y incansable pa e posicion di e enfermero/a tanto na aruba como riba nivel internacional.
Ta cu hopi orguyo ODEA ta informa tur miembro cu su president Sr. Richard Maxwell a keda postula como un nominado pa e candidatura di Presidente di CNO pa e periodo di 2008-2010. Nos ta desea sr. Richard Maxwell hopi exito.

ORANJESTAD- pa medio di un comunicado di prensa, Aruba Astro Research International ta mustra cu dia 29 di Juli 2ultimo, pa mas o menos 10:22 di anochi cu un bola di candela a keda reporta na e centro di observacion ATSOC, na e asociacion nacional arubano di astronomia y na Sr.Marcos Bislip como astronomo y pa cual a procesa e informacion aki hopi lihe y cu a bin resulta di ta un resto di un meteorito cu a drenta atmosfera y a explota y tabata masha bunita mes pa por awordo observa.
Tur e discripcionnan a wordo duna pa e persona cu a observa e evento aki y pa cual a yuda e centro di observacion ATSOC, e asociacion Aruba Astro Research Int y Sr.Marcos Bislip como astronomo pa saca afo kico e obheto tabata.
Tanto e centro di observacion ATSOC, e asociacion nacional di astronomia arubano Aruba Astro Research Int y Sr.Marcos Bislip a keda masha gradicido cu e persona aki a reporta e evento aki via SMS na 9644559@mas.aw cual a yuda nos investiga e caso aki hopi lihe mes.
Mester menciona cu esaki ta un di e meteoritonan cu a drenta den atmosfera esaki ta en coneccion cu e actividad di yobida di meteoro Perseids, cu lo bai tuma lugar diamars dia 12 di Augustus den oranan di marduga pa mainta prome cu solo sali mainta aki na Aruba y den e hemisferio aki.
Tambe ta bon pa menciona cu por observa dos obheto como strea blanco cla prome cu solo baha den oranan di atardi esta un pariba y un pabou esun pariba ta Planeta Jupiter y esun pabou ta Planeta Venus.
Un biaha mas si por observa algo den shelo cu ta di importancia porfabor reporta esaki na e centro di observacion ATSOC of na Sr.Marcos Bislip na telefon 9644559 / 5657884

 

BEIJING – E sensura riba prensa, doping i kontaminashon ta e prinsipal preokupashonnan di e presidente di Komité Olímpiko Internashonal (KOI), Jacques Rogge, i otro dirigentenan di e organismo ku lo reuní e fin di siman aki pa un último revishon riba e preparashonnan promé ku inougurashon di e Weganan Olímpiko di Beijing otro siman.
KOI i e organisadónan chines a ser kritiká ku e no ta kumpli ku su promesa di pèrmití akseso sin restrikshon riba Internèt, libertat total na prensa i airu limpi.
E Weganan di Beijing supuestamente lo por mustra China komo un super potensia habri pa mundu. Pero hopi aspekto di e evento ta sigui kousa problema i e posibel menasanan terorista a ser usá pa hustifiká un seri amplio di seguridat di komo 500.000 persona.
E mancha mas resien riba e Weganan a bini e siman aki ora Kevan Gosper, un di e máksimo lidernan di KOI i hefe di e komishon di prensa a hala atras di un promesa ku el a hasi kuater luna pasá pa eliminá tur sensura riba Internèt pa e periodistanan durante e weganan.
E kadenanan di televishon a reklamá di ku e organisadónan a ninga promesanan similar, loke a produsí batayanan pa e kubrimentu direkto, e movementu di e trùknan di satélite i e repartishon di frekuensianan.
Djaweps, dunando di konosé ku tin divishon den seno di liderato di KOI, Gosper a bisa ku Rogge mester tabata sa di un akuerdo ku outoridatnan chines pa sensurá e akseso riba Internèt pa periodistanan ku ta kubri e Weganan.

WILLEMSTAD – E skarsedat di maestro di skol, ta keda un problema agudo, apesar ku pa e aña eskolar nobo, gobièrnu a kontratá 21 maestro penshonado. Esei ta loke ku Sidney Justiana, presidente di SITEK, a bisa LA PRENSA. Segun Justiana, e hecho ku algun luna pasá, gobièrnu a kuminsá e trayekto pa buska dosente for di Sürnam, ta indikashon ku e skarsedat ta un problema serio.
Den kòmbersashon ku LA PRENSA, diputado di enseñansa, Alcalá-Wallé, a partisipá ku pa e aña eskolar ku ta bai kuminsá, no tin skarsedat mas, despues ku a haña 21 maestro di skol ku a baha ku penshun, pa bai traha.
E presidente di SITEK a sigui bisa LA PRENSA ku e informashon ku e sindikato ta disponé di dje ta indiká ku tin sufisiente maestro di skol, pero ku e ta realista ku nunka no tin sufisiente dosente pa tur nivel di material. Manera ta tradishon, e sindikato di enseñansa, despues di algun dia ku skol habri, ta reuní ku su shopstewardnan. Durante dje enkuentro aki, direktiva di SITEK ta pone su mes na altura di e situashon di okupashon di dosente na e skolnan. Asina Justiana a sigui splika. Ademas den e reunion general di e sindikato ku ta tuma lugá dia 15 di ougùstùs awor, e sindikato ta evaluá e situashon. Justiana a mustra riba e realidat, ku na komienso di skol por tin sufisiente dosente, pero ku segun dia ta pasa, e disponibilidat por kambia.
E sindikato tambe a tuma nota, di e hecho ku pa e aña eskolar aki, gobièrnu no a logra reklutá maestro di skol for di Sürnam. Segun Justiana, SITEK ainda tin su reservanan riba e reklutashon aki i ta keda insistí ku un reklutashon asina, méster ta kompañá pa un proseso di familiarisashon pa e dosentenan for di Sürnam.

 

LOS ANGELES, California, - Pa prekoushon a hospitalisá e aktris Elizabeth Taylor den un hospital merikano, pero e ta bon i pronto e lo regresá su kas, su representante Dick Guttman a bisa, desmintiendo e rumornan riba su supuesto estado grave di salú.
Guttman a splika den un komunikado ku e rumornan ku a kuminsá na Inglatera ta eksagerá i ireal.
E publisista di e protagonista di e pelíkula “Cleopatra”, ganadó di dos premio Oscar pa su ròl den “Butterfield 8” na 1960, i “Who’s Afraid of Virginia Woolf” na 1966, no a revelá den kua hospital a interná Elizabeth, ni pa ki motibu.
Solamente den un komunikado kòrtiku el a bisa, ku e aktris di 76 aña “ta bon”.
“A intern’é pa prekoushon i pronto e lo regresá su kas.
Na e momentunan aki e ta kompañá pa famianan, amigunan i hoyanan fabuloso”, Guttman a señalá ku un toke di humor.
Elizabeth Taylor a sufri di vários problema di salú den último añanan, inkluyendo un atake di kurason na aña 2004, frakturanan na wesu di lomba i e efektonan di un “escoliosis” ku a lag’é kasi riba kama.
Na 1997 a oper’é di un tumor selebral maligno.
Tambe e ta’tin úlsera, bronkítis agudo, dos pulmonia serio i un problema di adikshon di droga i alkohòl.
Elizabeth Taylor, kende tabata hopi den notisia pa su romansenan, ta bibando su so den su mansion di e bario eksklusivo di Bel-Air, un sekshon di Los Angeles, kaminda mayoria figura élite di Hollywood ta biba.

MUNDU, - E amantenan di astronomia, semper si nan ta na e lugá indiká, lo por disfrutá awe djabièrnè di un eklipse total di Solo, ora e Luna ta entre e estrea i nos planeta.
E fenómeno úniko aki ta pone ku ta mira e Solo komo un ‘renchi’ di lus i parti meimei ta totalmente skur pa e sombra di Mundu.
E eklipse lo kuminsá na ártiko canadiense mas o ménos 9:45 GMT (15:45 ora lokal).
E sombra lo move i lo mira un ‘renchi’ di lus na Groenlandia, Siberia oksidental i Mongolia pa tèrminá den sentro di China, mas ku un ora i mei despues.
Su rekorido total lo bai ta di 10.200 kilometer.
Gran parti di Europa, Asia i nort di Nort Amérika lo por opservá un eklipse parsial.
Manera sa sosodé den e kasonan aki, turistanan, hendenan kurioso, astrónomonan profeshonal i amatùr a inundá e poblashonnan kaminda e eklipse lo bai ta total.
Na Novosibirsk, e kapital kultural i sientífiko di Siberia, ta spera mas o ménos 5.000 bishitante.
E sientífikonan a rekòrdá e públiko ku nan no tin mag di mira e Solo direktamente, inkluso den e kaso di un eklipse parsial sin protekshon, ya ku esaki por daña e retina di forma permanente.
Solamente por mira e Solo ku yudansa di un teleskop solar òf brelnan spesial.

Foto: Eklipse luna 0108

Luna ta pasa dilanti Solo durante e eklipse solar total banda di e krus di St. Bazil’s Cathedral, man robes, na Mosku awe.

ARIES: Bo ta riska di ser felis sin sintibu kulpabel. E poder pa vensé ta yega di gran forma spiritual. Probechá di e kualidadesnan. 01,28,29.

TAURO: Indesishonnan a kaba. Ta ora di tuma riendanan di bo bida. Bo tin bo dilanti e ayudo pa kuminsá un bida nobo. Relashonnan amoroso a ponebu na prueba. 15,22,32.

GEMINIS: Siña hari di bo erornan i no eksigí tantu. E bon humor mester ta presente den bo famia. Un persona ta dunabu posiblemente problemanan ekonómiko. 12.

KANSER: Ta momentu di spera ku pasenshi resultadonan bon i positivo. Bo ta topa algu mas fuerte den bida. Usa hopi diplomasia pa bo relashonnan resultá eksitoso.

LEO: Ta den bo man pa kambia e kosnan ku no ta agradábu. Ya bo no ta sinti malu pa nada i bo por logra tur loke bo ta proponé. 28,15,32.

VIRGO: Bo propósito di kambia rumba di e kosnan ta hasi ku tur kos ta kuminsá tuma kosnan faborabel pa bo. Kamponan nobo di interes ta habri pa bo. 17,03,51.

LIBRA: Bo ke tin tempu pa bo mes, kumpra i invertí den bo persona. Mester ser aseptá ku nan ta stimábu, ya ku bo ta meresé. 07,40,25.

SKORPION: Pone atenshon na detayenan i no hasi mil i un kos na mes momentu. Bo enkanto ta enfatisá ku e energia positivo. 06,45,50.

SAGITARIO: Bo ta gusta di ratunan trankil, di naturalesa, bon músika i e bon lektura. Tin komiensonan nobo pa bo i esei lo ser un estilo nobo. 27,14,07.

KAPRIKORNIO: E dianan aki ta trese suerte den amor, pero bo ta wòrdu konsehá pa tene pasenshi. Intensidat enkuanto amor ta referí i esei lo kompliká kosnan un tiki. 01,28.

WILLEMSTAD - Gensley Capella, presidente direktor di Curoil no ta aseptá niun medida kontra dje den kuadro di e investigashon ku ta tumando lugá den e negoshi ilegal ku a tuma lugá ku benta di disel. Ela bisa ayera tardi ku e ke sa ofishal dentro di 24 ora ta kiko ta e motibu ku ke pone su persona temporalmente un banda.
“Si tuma medida kontra mi, ami ta bai korte”, asina Capella a sigurá ayera tardi durante un enkuentro ku prensa.
E kaso na Curoil dia pa dia ta haña aspektonan mas interesante.
Capella a splika ku presidente komisario Earl Barborda, kompañá pa komisario Pieternella a presentá serka dje ayera mainta ku e petishon ku nan ke reuní kuné.
Na e momentu ei nan a present’é nan desishon ku e mester bai ku fakansi obligatorio pa asina por hasi un investigashon imparsial.
“Ami a bisa nan ku ta esei nos di gerensia di Curoil tambe ke. Pero pa evitá tur spekulashon, nos ke pa hunta di komisario realisá e investigashon aki. Nos a bisa nan ku nos no ke pa nan raportá, ni na e direktor, ni na e tim di maneho,” asina Capella a trese dilanti.
El a bisa ku no ménos ku 5 miembro di gerensia a firma pa e benta di diesel en kuestion tuma lugá. Ningun di e 5 miembronan aki, no a ripará ku tabatin algu straño, anto esei no ta asina sorprendente tampoko. E negoshi ku diesel aki ta un negoshi masha normal, Capella a enfatisá mas aleu.
Na e momentu ei sinembargo, e komisarionan a inform’é ku nan ke pa e bai ku fakansi obligatorio, loke ela ninga redondamente.

WILLEMSTAD - Ainda tin hopi pregunta kiko realmente a sosodé na e kompania Curoil.
Partido Nashonal di Pueblo en todo kaso ta para kompletamente tras di su diputado Humphrey Davelaar den e kaso aki i ta para ‘riba pa bin un investigashon imparsial den e kaso aki.
Davelaar a tuma nota di e kaso despues di a regresá di su biahe pa Cuba kaminda el a bai negoshá pa haña spesialistanan pa traha den unidat di Kuido Intensivo di Hospital St. Elisabeth.
Segun presidente dje partido mr. Faroe Metry, loke a pasa ta inaseptabel pa Partido Nashonal.
“Ainda tin hopi pregunta ku mester haña kontesta. Nos ta kere ku e asuntu aki definitivamente a perhudiká Curoil. Nos tin sigur ku e kompania aki por a gana mas tantu plaka, si el a atendé direktamente ku e suministrado di diesel. Pero nos no sa por ehèmpel si tabatin mas intermediario entre Curoil i esun ku a suministrá e produkto. Nos no sa di unda e diesel ta bini, si ta trata di diesel ilegal, diesel hòrtá i asina tin mas pregunta ku meresé kontesta. E asuntu di negoshi den negoshi aki, nunka por ta na benefisio di Curoil,” Metry a bisa.
Segun e presidente di PNP, ta p’esei e partido ta na fabor pa gerensia hala un banda temporalmente pa asina krea espasio pa un investigashon imparsial por tuma lugá.
“E hecho ku ta pidi gerensia pa hala un banda no ta nifiká ètòl ku ta poniendo kulpa riba niun hende. Nos no ta bisa ku ta fiha un dede akusatorio kontra gerensia di e kompania, pasobra ta e investigashon mester determiná kiko realmente a sosodé. E ta simplemente un medida di órden pa evitá ku gerensia ta sikiera krea e impreshon ku e ta strobando e investigashon,” segun Faroe Metry.

WILLEMSTAD – “Ami ta bai korte, pasobra ami no a hasi nada. Ta dos chabalito a hinka mi den e problema, den e bochincha, e baina aki. Anto un di nan a manda algun dia pasá un mail p’ami, kaminda e ta pidi mi dispensa pa loke el a hinkami aden. Awor, kiko mi por hasi ku e dispensa ei?” Gensley Capella a puntra.
Capella tabata referí na loke a sosodé na Curoil ku benta di diesel, un kaso ku a haña hasta e nòmber di Curoil-gate serka sierto medionan di komunikashon.
Den un nota ku Capella a traha relashoná ku loke a sosodé, e ta bisa ku aki por papia di un kaso kaminda hende a abusá di un konfiansa ku a pone den nan.
Jason Debrot, un di e personanan konserní tabata konosí komo un eksperto riba tereno di negoshi di diesel. E tabata e wowo i orea di Curoil den esaki.
Komo ku Debrot a logra establesé konekshonnan importante ku e mundu ku ta suministrá e produkto aki, Curoil tabata konfia siegamente den dje. Curoil a konfia dje tantu ei ku asta a pone un montante mionario na su disposishon pa e hasi negoshi pa e kompania, pero ta aki kosnan a bai robes, pasobra el a hasi uso di e plaka pa logra benefisio propio. Ademas t’asina ku niun hende por a maginá nan mes ku tin un laso entre Debrot i e kompania RCM Holding, ku ta propiedat di Roberto Carlos Maldonado.
E direktor di Curoil ta bisa ku masha énfasis ku no tabatin asuntu di ladronisia.
Loke nos por konkluí ta ku nos a pèrdè di gana. Nos mes por a kumpra e produkto aki na un preis mes, òf mas faborabel asta serka e kompania en kuestion.

WILLEMSTAD -
“Mi no ta komprondé unda tin kompetensia inhustu kontra UTS. Ta nan mes lo mester splika mi kiko nan ta komprondé bou di esei. P’esei mes nos a palabra den reunion di Konseho di Minister ku nos lo sinta na mesa pronto ku gerensia i hunta di komisario di UTS pa diskutí e asuntu aki.
Tantu direktor di UTS Paul de Geus komo e sindikato di trahadónan di e kompania Sitkom a ekspresá nan desakuerdo i preokupashon profundo pa e eminente desishon di minister Adriaens pa duna Columbus Network Curacao pèrmit pa establesé riba nos isla.
Columbus ke establesé pa duna servisio di tantu konekshon internashonal komo e servisio di Internèt.
Segun UTS, esaki ta kompetensia inhustu, pasobra Columbus ta poseé e kabel atraves di kua UTS mes ta kumpra e konekshon internashonal. Si Columbus bai ofresé su servisio riba merkado lokal, esnan ku ta kumprando esaki awor aki serka UTS lo bai Columbus, loke ta perhudiká UTS, segun e kompania.
Minister Adriaens sinembargo ta refutando esaki. El a mustra ku Columbus mester bai paga e mesun tarifa ku otro suministradonan di servisionan tin ku paga. E kos aki no por ta kompetensia inhustu kontra UTS, di akuerdo ku e mandatario.
Minister Adriaens anteriormente a bisa ku e ta mira bentaha so ku yegada di Columbus.
“Presensia di e kompania Columbus lo tin un kantidat di benefisio pa nos pais. E ta nifiká realisashon di un deseo grandi ku mi tin, esta pa redusí preis di Internèt di manera ku tur kas di famia ta disponé di Internèt,” asina Adriaens a bisa.

WILLEMSTAD - “Mi ta haña ku korte a papia palabra kla: Ulanda awor aki mester obligá Antia pa kumpli ku loke korte a dikta riba rèspèt pa derechinan di hendenan homoseksual. Si Antia no kumpli, kisas ta bon pa rekonsiderá e asuntu di pagamentu di debe di Antia”, asina miembro di Tweede Kamer pa partido VVD Anouchka van Miltenburg a deklará den entrevista ku Tania Fraai di Radio Nederland Wereldomroep.
Den e programa “Linea Recta” e parlamentario a para ketu na último desaroyonan den e asuntu aki. Miltenburg a manda un seri di pregunta pa minister Ronald Plasterk den kua e ta kuestioná aktitut di gobièrnu i ta boga pa akshon.
Miltenburg a bisa ku e ta sorprendí pa e aktitut di gabinete Balkenende den e asuntu aki. Korte a dikta sentensia i ta parse mi ku el a papia palabra kla. El a bisa, ku loke e ke no ta djis un deklarashon ku gobièrnu ta pidi Antia pa respetá derechi di esnan ku seksualmente tin otro sintimentu.
“Gabinete ulandes mester manda un señal fuerte den direkshon di gobièrnu antiano. Mester ta kla pa Antia, ku no por sigui ku e tipo di wega[nan aki mas,” Van Miltenburg a bisa.
Manera ta konosí, minister antiano Omayra Leeflang a anunsiá, ku gobièrnu antiano lo apelá e sentensia ku ta bisa ku gobièrnu antiano ta obligá pa inskribí e pareha lesbiana na ofisina di BZV.
Ta konosí kaba di pasado, ku Omayra Leeflang, semper tabata kontra matrimonio di e mesun sekso. Den pasado tabatin e kaso ku a hunga prinsipalmente na Aruba pa kua e mandatario antiano tabatin e mesun pensamentu i punto di salida.

WILLEMSTAD - “Presensia di e kompania Columbus lo tin un kantidat di benefisio pa nos pais. E ta nifiká realisashon di un di mi deseonan, esta pa redusí preis di Internèt, di manera ku tur kas di famia ta disponé di Internèt,” asina minister di Telekomunikashon ingeniero Maurice Adriaens a bisa, despues di e anunsio ku e kompania tin intenshon di establesé su mes na Kòrsou.
Adriaens a enfatisá ku ainda mester tuma un desishon final riba establesementu di Columbus. Esei lo sosodé durante un reunion na fin di ougùstùs awor.
Mester bisa ku último dianan a surgi asta un frikshon leve entre e mandatario antiano i lider polítiko di partido Frente Obrero Anthony Godett, kende ta diputado den e aktual Bestuurscollege.
Godett a kritiká e hecho, ku e minister no a pone e na altura di e plannan pa Columbus establesé na Kòrsou. Tur hende sa ku tur tempu mi a sali na defensa di e kompania lokal di telekomunikashon UTS, ela bisa.
Minister Adriaens a informá entretantu, ku Columbus a kumpli ku tur rekisito i ku e ta spera ku fin di otro luna, lo tuma un desishon al respekto. Adriaens a refutá e akusashon ku el a sòru pa kompetensia inhustu pa UTS. Riba término largu, nos lo haña prueba di esei tambe, el a pronostiká.
El a referí na loke a sosodé algun aña pasá ku e introdukshon di un di dos kompania ku tabata bai dediká su mes na e negoshi di telefon selular.
“E tempu ei tambe mi a tende ku un di dos kompania lo mata e negoshi di selular ku UTS a kaba di kuminsá kuné. Mi ta kòrda kon UTS tabatin den kuminsamentu apénas algun mil abonado di telefon selular.

WILLEMSTAD - Gobièrnu Sentral debidamente ta trahando ku e diligensia nesesario riba introdukshon di e lei di sueldo mínimo ku parlamentu a aprobá resientemente. Pa gana tempu, a disidí por ehèmpel ku ta manda e lei pa konseho pa Raad van Advies, huntu ku otro instansianan, asina promé minister di Antia Emily de Jongh-Elhage a anunsiá ayera tardi.
Manera ta konosí, Gobièrnu Sentral, Gobièrnu di Kòrsou i partnernan sosial a reuní e siman aki riba un pakete di medida ku mester kompañá e lei di sueldo mínimo.
Un aña i mei pasá, parlamentu a bin ku e lei pa subi sueldo mínimo.
Nos tur ta kòrda e historia di e intenshon pa subi sueldo mínimo, segun e promé minister.
Promé t’asina, ku gobièrnu di Kòrsou a proponé pa subi sueldo mínimo ku 5 porshento, pendiente un pida maneho ku el a keda di formulá. Despues minister di Ekonomia Elvis Tjin Asjoe a lansa e idea pa oumentá sueldo mínimo ku 18 porshento, pero pa hasi esaki den fase.
A pidi Banko Sentral un konseho, mirando e diferente deseonan ku tabatin riba mesa. Banko Sentral a rekomendá un oumento di 8 porshento, argumentando ku ta esei ekonomia por karga.
E punto ta, segun promé minister De Jongh-Elhage ku tur hende tabata ke pa e oumento bira mas tantu posibel.
E desishon definitivo pa gobièrnu a bin despues di e rekomendashon di Fondo Monetario Internashonal. E instituto aki a rekomendá 15 porshento, pero a rekomendá tambe pa papia ku partnernan sosial riba e pakete ku mester kompañá esaki.

WILLEMSTAD - Djadumingu 3 di ougùstùs benidero lo tuma lugá na Seru Grande 85, inougurashon di un proyekto di hortikultura (tuinbouw) ku a haña e nòmber ‘Tera t’e Floria’. Ta trata aki di un joint-venture-project entre Grupo di Seú Den Kosecha pa Futuro i Fundashon Seú Kòrsou, representá respektivamente pa sr. Mayron Maduro i su Komishon i sr. Pacheco Domacassé. Meta direkto di e proyekto ta pa familiarisá i lanta interes di hubentut pa plantamentu, miéntras ku e meta final ta formashon mental di nos hubentut; Siendo ku e proyekto aki ta krea e posibilidat kontinuo pa den forma di akshon direkto, e mucha i hóbennan ku tuma parti, lo por atkerí karakterístikanan mental baluroso manera: Sentido di inisiativa, di laborá, di pro-aktividat, di prestashon positivo, di determinashon pa logra su meta, di responsabilidat, kon-funshonamentu, self-supporting i tambe sentido sosial en general. Pues, kada hóben ku partisipá na e proyekto tin e obligashon di kuminsá algu di plantamentu den su mes kurá di kas. Konsekuentemente, e proyekto aki ta kuadra eksaktamente den filosofia di Fundashon Seú Kòrsou, ku ta konvensí ku desaroyo berdadero ta tuma lugá solamente den akshon kontínuo i di sierto intensidat i volúmen. Den lus di e pensamentu aki, e proyekto aki den forma di un proyekto piloto, por fungi komo ehèmpel pa otronan manera e.o. e mas ku 80 gruponan di Seú. Inisio di e proyekto a bira posibel, grásias na un aporte di Giro Bank, Banko Maduro, LVV den forma di konseho i tambe e pareha Bèto i Ma Chaya ku a pone pida tereno disponibel.

WILLEMSTAD - Segun minister di Hustisia David Dick, lamentablemente nos ta biba den un kultura kaminda tin un porsentahe haltu di mayornan ku no ta kumpli ku nan obligashon di duna alimentashon. Esaki ta e motibu ku Ofisina pa Bienestar di Mucha a adaptá e proseso pa garantisá e obligashon aki. Entrante promé di ougùstùs tur mayor kaminda e yu ta keda i ku tin problema pa risibí alimentashon mester buska un desishon di Korte. A base di e entrada di ámbos mayor Wes lo stipulá e montante korespondiente pa e alimentashon. Lei no ta hasi distinshon di yu rekonosé òf nò. Tur mayor mester kria nan yu.
Práktika na Ofisina di Bienestar di Mucha a mustra ku den mayoria kaso mester komprometé e tatanan legalmente pa nan kumpli. Hopi ta e kasonan tambe ku ta kuminsá kumpli boluntariamente, pero na kaminda ta stòp òf no ta kumpli debidamente. Ku e desishon di Korte Ofisina pa Bienestar di Mucha por tuma pasonan legal pa risibí e pago i sòru pa esaki yega su destino. Ta bon pa bisa ku tin vários tata ku si ta kumpli kabalmente i nan mes ta kana e kaminda di Ofisina pa Bienestar di Mucha pa atendé e pago. Di e forma aki nan tin un komprobante ku nan a paga pa evitá kualke konfushon òf informashon ku no ta kuadra.
I naturalmente tin mayornan ku tin bon palabrashon ku otro i ku no mester di intervenshon.
No tin ningun gastu mará na e desishon di Korte. En prinsipio no tin mester di un intervenshon di abogado ni otro instansia pa yuda ku e petishon. Korte lo trata e kaso i tuma un desishon denter di algun siman. Esaki ta nifiká ku e yu lo no ser perhudiká pa un temporada largu manera ta e kaso aworakí. Den kaso ku un mayor ta preferá di haña yudansa, Ofisina pa Bienestar di Mucha lo sigui duna sosten na e mayor den forma di yudansa pa yena e petishon, ku informashon i otro konsehonan. E Ofisina lo kontinuá ku su tarea di kobra i paga alimentashon.