Skina di Sorti, awe djaluna 11 di ougùstùs di 2008, ta kuminsá ku deseá un i tur un bon dia. Apesar di krònkel i buèlta e kaso di nombramentu na DOK ta keda nada mas ku un intervenshon polítiko na kual e diputado konserní no ke mara konklushon polítiko, pero si ta mantené preshon polítiko riba direkshon den kual desishon denter di DOK tin di tuma lugá. Lokual ta pasando tin mas e karakter di akshonamentu makiavelista ku e tin di haber ku preparashon i ehekushon huisioso di maneho (“zorgvuldige beleidsvoorbereiding en besluitvorming”). **** Akshonamentu makiavelista ta karakterisá su mes pa krea i mantenshon e persepshon di ta aktua ku un interes mayó den mente, miéntras ku tras di e akshonamentu tin un interes partikular. Ora bo tin preparashon i ehekushon huisioso di maneho, kosnan ta transparente, sin krònkel i buèlta i kontrolabel. Por lo demas demokrasia ta eksigí responsabilisashon (“accountability”) ora ku fayonan ku implikashon serio tuma lugá. **** Ta insólito ku despues di asina tantu reunion i investigashon i intervenshon denter di DOK (ku entre otro retiru di Hernandez komo direktor despues di basta investigashon di aspektonan hurídiko) un reunion ku a keda posponé pa basta dia tin ku resultá den partisipashon ku a komprondé ku e reunion di akshonista no tin e kompetensia pa nombra un direktor pa DOK. Ta dikon e asuntu tabata un punto di diskushon anto? Ta a base di kiko diputado a haña ta bon di intervení den e proseso di nombramentu anto?
BEIJING – Un Ronaldinho iluminá a kita e ròl prinsipal for di Lionel Messi den un programa den kua Argentina, Brazil i Italia a sigurá nan pase adelantá pa kuart final di e torneo di futbòl. Ronaldinho a hinka dos gol i a partisipá den dos otro den e viktoria di 5-0 di Brazil riba Nueva Zelandia djadumingu, miéntras Argentina a derotá ku hopi esfuerso e tim gueriero di Oustralia 1-0 ku un gol di Ezequiel Lavezzi, i Italia a marka su di dos viktoria ku 3-0 riba Sur Korea. Argentino-, Brasileño- i italianonan a gana nan dos promé wega i tin nan pase pa kuart final sigurá. Ulanda, ku nan a pensa lo por a bringa pa e oro, a bolbe tabla, e biaha aki ku Merka 2-2 i a keda di tres den Grupo B, tras dje merikanonan i Nigeria, ku tin 4 punto, kontra dos ulandes i sero di Hapon. Nigeria a dal a haponesnan 2-1. Argentina ta lider di Grupo A kaminda Costa de marfil a biba su speransanan ku un viktoria di 4-2 riba Serbia. E afrikanonan tin tres punto i Oustralia ku Serbia 1. Awor lo sera e programa Argentina vs Serbia i Costa di marfil vs Oustralia. Brazil ta na kabes di grupo C, su tras Bèlgika ku 3 i China ku Nueva Zelandia ku unu. E bèlganan a hinka nan mes den lucha ku un triunfo di 2-0 riba China i lo disidí nan suerte ku Nueva Zelandia. Grupo D tin Italia na Kabes, ku su tras Camerun ku 4, Sur Korea ku 1 i Honduras ta bashí. Camerun lo tin ku saka sigur un empate kontra Italia pa e pasa. Si e pèrdè, lo e por keda likidá for di segundo puesto pa Sur Korea ku ta enfrentá Honduras.
BEIJING – E kampion aktual Brazil, djadumingu a likidá Egipto 3-0 den vòlibòl olímpiko maskulino, miéntras ku Venezuela a kita dos sèt for di Merka, pero no por a evitá ku e merikanonan a bòltu e wega e dia siguiente di ku suegro di su treiner a keda mortalmente hinká na Beijing. Titularnan di e último liganan mundial, Brazil a imponé ku 25-19, 25-15 i 25-18 den e wega di Grupo B. E seksteto dirigí pa e treiner Bernandinho a bari ku tur e kompetensianan internashonal di nivel haltu for di 2003 te e aña aki, ora e merikanonan a gana nan promé Liga Mundial, hustamente riba suela brasileño. Merka, di tres di mundu tras di Brazil i Rusia, a dal Venezuela 25-18, 25-18, 22-25, 21-25 i 15-10 den grupo A. Tabata e debut apsoluto di Venezuela den vòli maskulino di un Olimpiada. E próksimo wega di Brazil ta djamars kontra Serbia, ku a gana Rusia den 4 sèt 20-25, 21-25, 25-22 i 14-25. Venezuela ku a yega e wega ku 11 derota den su 12 weganan internashonal pasá, lo topa ku China djamars, miéntras ku Merka lo topa Italia. Den otro weganan Italia a dal Hapon 3-1 i Bulgaria a regla kuenta di China, tambe ku 3-1.
BEIJING – Tiru olímpiko parse tin China i Repúblika Cheko komo aspirantenan pa oro. Pa di dos dia sigui, tur dos pais a repartí medaya di oro den e weganan e biaha aki ku e chines Guo Wenjun ku ta gana ku pistol di aire riba 10 meter i e cheko David Kostelecky den fosa. Guo a bira kampion ku un rekòrt olímpiko despues di a logra 492.3 punto. E ruso Natalia Paderina, kende a kibra e rekòrt olímpiko den e etapa eliminatorio, a kue medaya di plata i e georgina Nino Salukvadze a keda ku e bròns. Guo no tabata e mihó kandidato di China den e modalidat, ya ku e krédito ei tabata korespondé na ren Jie, doño di e rekòrt mundial. Ren ni sikiera por a klasifiká su mes pa e final, pero Guo a saka kara pa e pais anfitrion, ku a kue su di dos ora den tiru olímpiko. Paderina i Salukvadze, kual nan paisnan ta den inmenso konfliktonan arma, a duna muestra di e spiritu olímpiko riba podio. “E medaya aki ta un kos bon pa Georgia, spesialmente den tempu manera esaki”, Salukvadze a bisa. “MI tabata hopi nervioso. Nos pueblo ta pasando den un momento hopi difísil”. Rusia a manda algun shen tanki i sòldánan na Sùit Ossetia i a bombardiá pueblonan bisiña djasabra, despues ku e gobièrnu sentral di Georgia a lansa un ofensiva pa rekuperá kontròl di e provinsia separatista. Kostelecky a gana e fosa ora el a marka 146, superando pa tres punto e italiano Giovanni Pellielo, ganadó di plata. E ruso Alexey Alipov a keda ku bròns ku 142, despues ku den un desempate el a superá e oustraliano Michael Diamond.
WILLEMSTAD – Un piskátrahá di foam di un largura di 12 pia i haltura di 6 pia ta loke ta warda turistanan krusero ku yega Kòrsou aki poko tempu. Den e korant Bradenton Herald, LA PRENSA a tuma nota di un artíkulo interesante ku ta indiká ku e pisk160 di foam aki su destinashon final ta Kòrsou. Ta asina ku e kompania AAA Architectural Elements & Coatings ta sintiendo efektonan di e krísis den konstrukshon na Merka i kasi tur nan proyektonan ta para ketu. Pa tal motibu nan a buska otro alternativanan kreativo i asina Kòrsou a drenta den notisia. E kompania aki ta trahando un gigantesko piská tropikal tridemeshonal. Segun e relato, e piská di foam aki a keda paketá kaba i transportá ayera pa Port of Miami, pa asina sali pa Kòrsou. Ku tur probabilidat e barku lo drenta aki na Kòrsou djarason awor. Huntu kuné lo tin un piská mas di foam un poko mas chikitu. Segun Bradenton Herald e piská aki lo wòrdu poné riba pipa i lo sirbi komo dekorashon na yegada di turistanan krusero, pues ku tur probabilidat na Megapir. “E krísis aki a pone ku nos kompania a pèrdè hopi trabou i esaki ta un manera pa diversifiká nos trabounan,” asina e gerente Jessica Carter ta indiká den e artíkulo. LA PRENSA lo trata di haña mas informashon di e piská gigantesko aki di foam ku lo bai dorna e área turístiko ku tur probabilidat na Megapir òf den serkania di Rif Resort.
Por wak dilanti pa progreso den bida si bo ta konsiente di kiko tabatin den bo pasado. Si bo por rekonosé ku kiko bo ta bayendo dilanti. I prinsipalmente si bo por komprondé i a siña di loke bo ta hibando ku bo. Esaki ta konta sin mas pa tur hende den nos komunidat sin hasi distinshon di ki gremio nan ta, ki rasa, ki religion òf kuantu tempu nan tin na Kòrsou.
Kiko nos huntu a siña i ta siñando di e dékadanan ku ta tras di lomba, kaminda a bira aseptabel, tolerabel i posibel pa por para ketu na konmemorashon di lantamentu di katibunan dia 17 di ougùstùs 1795? Tin hopi rason (komprendibel òf no i sigur diskutibel) ku asta hende desendiente di Tula no ta(bata) kómodo ku e echo ku ta duna atenshon na un tópiko asina doloroso i ku no ta duna rason pa ta orguyoso di un aspekto di nos historia. Hende desendiente di Tula te ainda ta inkómodo ku esaki, yudando esnan ku no ta niun famia direkto di Tula pa nan no koperá ku e konmemorashon ni e benefisio ku e komprondementu di motibu pa konmemorá mester trese kuné. Ta p’esei den nos komunidat, tin sierto progreso ku nunka por keda realisá. Hopi hende ku riska papia di e tópiko ta bira rondó di e loke ta realmente loke mester atendé kuné. E realidat di koló; di klase; di opreshon internalisá i sintimentunan di ta mihó ku otro. Niun hende den nos komunidat ku ta duna oportunidat na tur, no por reklamá ku e no ta logrando si e mes no atendé ku opstákulonan basá riba loke nos mes ta kere i loke nos ta laga otronan kere pa nos. E komunidat aki ta unu ku oportunidatnan inkreibel pa esun ku ke perseverá, ekselá i ku ke traha pa logra. Apesar di tur opstákulo visibel òf no i apesar di hende ku no sa mihó ku tur dia atrobe ta krusa nos kaminda.
WILLEMSTAD – Hopi reklamo a drenta riba kalidat di artíkulonan pa skol, meskos tambe reklamonan riba preis haltu di tas pa skol. Tambe hopi mayor ku a mustra nan malkontentu pa e trato ku nan a risibí den e prosedura di transporte pa skol. Mayornan ku a stens ku nan lo wòrdu supsidiá ku transporte pa nan muchanan por bai skol, i ku despues no a bin na remarke a pone ku nan tin problema pa kompletá e parti finansiero aki. Den kombersashon ku Rene Trenidad di Fundashon pa Konsumidó ta splika den e último dianan prome ku skol hopi reklamo a drenta riba diferente preis di artíkulonan ku tin riba merkado i prinsipalmente e kalidat a keda kuestioná. Segun Trenidad e kalidat ta hopi abou, miéntras ku e diferensia di preis ta muchu grandi kompará ku añanan anterior. “E kalidat tur kaminda ta kuestionabel, i ku e preisnan tabata varia hopi.” Fundashon di Konsumidó e aña aki no a logra publikashon di e preisnan, debí ku e funshonario di DEZ ku ta enkargá pa entrega esakinan na e fundashon tabata ku fakansi. DEZ ta e servisio ku por e kontrolá e preis i akumulá e datonan pa asina Fundashon di Konsumidó por tin esakinan pa por publiká pa e konsumidó por tuma nota unda nan por hasi nan kompranan. Trenidad ta indiká e peso riba mayornan ta pisa i ku e reklamonan mester keda atendé di un forma den kua lo konsientisá konsumidó pa spar i purba di organisá mas tantu. Mayornan mester tene kuenta ku ta bon pa kumpra artíkulo di skol pa e promé trimèster, enbes di un aña kompleto. Si mester hasi kompranan pa promé trimèster lo sosodé ku e mayor lo tin mas espasio den su presupuesto. Tin sierto eksigensianan ku skol ta duna pa mayornan kumpra sierto artíkulo di skol, pero ku ta bon pa tuma nota ku tin sierto negoshinan ku ta duna propaganda ku tambe ta bon pa uso na skol. No nesesariamente mayornan mester kumpra artíkulonan nobo, pero por hasi uso di artíkulonan di propaganda.
JOSEFINA Zulaika Maria (32 aña) A laga atras su mama Martha Hous, tata Pursibal Josefina, wela Jonita Josefina, yunan Remaichel, Remaisley, Iveron Josefina, rumannan Monica, Valeska, Valerie Josefina i famia, namorado Itienne. Akto di entiero ta djarason 13 di ougùstùs na Ulanda.
MARTINA Margaritha Nicolina (80 aña) Mihó konosí komo Nini A laga atras su yunan Stanley Crispulo, Rudy i Judith Crispulo, Sharine i Giovanni Cathalina, Edgard, Edseline, Astrid Martina, ruman Celia Martina i yunan. Akto di entiero ta djarason 13 ougùstùs for di misa Sta. Rosa. Bishita 1or. 3.30or tin un s.s. di misa i 4or pa santana Sta. Rosa.
PANNEFLEK Selita Maria (99 aña) A laga atras su ñetunan Azuncena Fairbairn i Raimy Trinidad, Renny Fairbairn i Tamara Wau, bisañetunan Susette Fairbairn, Raimay Trinidad, Rashanty Trinidat, Raimeline Trinidad. Akto di entiero ta djarason 13 ougùstùs pa santana Montaña. Bishita 9or. 10.30or tin un s.s. di misa.
JANZEN-GERARDUS Julianita Antonia Mihó konosí komo Ula A laga atras su yunan di kriansa Astrid Lourens, Ergad Janzen, Angelique Kirindongo, Chantal curial, Raysheline Regina, rumannan Lucia i Jan Fernando-Gerardus, Armando i Shon Ma Gerardus-Margaretha, Jose i Vilma Gerardus-Symester, Josefa i Cerilio Doran-Gerardus, Editha i Frido Kirindongo-Gerardus, Crisma Gerardus, Eddy i Swinda Regina-Brigitha, Ronny Regina i Edna Sintiago. Akto di entiero ta tuma lugá djarason 13 di ougùstùs 3or for di el Tributo pa santana Barber. Bishita 11or. Promé ku entiero tin un s.s. di misa na misa barber 3.30or.
Prof. dr. Lorito ta yama tur hende un bon siman. Un siman mas ta nos dilanti ku nos por usa pa produsí positivamente i hasi bon so pa nos isla. Si tur hende tin esei den mente nos lo yega hopi leu! ********* Un pabien pa mama di Doña Omayra ku a kumpli 80 aña ayera. Ora bo mira Doña Omayra kana ku su mama, bo ta kere ku ta ruman nan ta! Nos no ta den sírkulo di e famia, pero nos a bula wak di serka na Because kaminda tabatin un bunita selebrashon. Pabien, hopi aña mas! Nos no konosé e señora dje bon ei, pero nos sa ku e ta bon ten’é! E señora ta un ehèmpel ku ora bo ta kere den prinsipionan spiritual, Todopoderoso mes ta sòru pa bo kondishon físiko i mental ta óptimo! Kòrda riba nos bolo! ********* Un pabien tambe pa Rignald Maduro (Radio Direct) ku ta drenta boto matrimonial awe. Awe mainta Lorito a bai drecha su alanan i den kápsalòn (lugá di tur redu!) nos a mira e dama di suerte ta drecha kabei pa e boda di awe. Tur kos bon i felisidat! No laga e luna di miel dura largu, pasobra ya kaba nos ta sinti masha falta di Chaco! Si nos sinti bo falta tambe aserka, esei ta nifiká ku ta dòbel falta nos lo sinti! Hopi felisidat! Kòrda riba nos bolo pretu! ********* E karchi di invitashon di konmemorashon di Dia di Lucha pa Libertat ta bon intenshoná, pero e lema na final na idioma ingles si ta algu ku no masha bon pensá! E ta manera un falta di rèspèt pa emansipashon di papiamentu komo idioma ku a desaroyá i krese hustamente den kuna di sklabitut. Lorito ta kere ku Gobièrnu tin e prerogativa pa organisá algu di su mes, pero nunka si un Gobièrnu por bai kontra e sentimentu básiko di un pueblo ku stima su idioma. Fui! Lebumai nos!
WILLEMSTAD -- Mas ku Gerente di departamentu di Rekurso Humano, Mannik Dindial ta representá e kara humano, e sentimentu i rèspèt pa hende den Maduro & Curiel’s Bank, asina MCB ta bisa relashoná ku su 40 aniversario na e instituto. E kualidatnan aki sin duda ta ingredientenan prinsipal di su éksitoso karera na Banko Maduro. Gerensia di Maduro & Curiel's Bank a konmemorá e fecha memorabel aki gradisiendo Mannik pa su loyalidat, tremendo servisio na nos staf i pa e gran ehèmpel ku e ta pa nos tur. Riba pòtrèt por mira Mannik Dindial den kompania di su sra. esposa Raquel Dindial, Chicu Capriles (presidente) Lio Capriles ( presidente di Hunta di Komisario) i Ron Gomes Casseres, direktor gerente di Maduro & Curiel's Bank.
WILLEMSTAD – Un avalancha di pregunta miembronan di Konseho Insular, prinsipalmente di oposishon, a lansa awe den direkshon di Gobièrnu riba loke ta pasando na e kompania Curoil. Loke a kuminsá komo un kaso ku gerensia di e kompania a kere ku e tabatin bon dominá, a bira un kaso ku a kue proporshonnan serio. Akusashonnan tabata skeiru links i regts awe mainta riba diferente aspekto di e kaso aki. Miembronan a pidi klaridat riba ròl di gerensia i Hunta di Komisario (i den sierto sentido di STIP), e accountant di 20 aña di e kompania Deloitte & Touche tambe a haya su la, a surgi preguntanan serio riba ròl di duana den e kaso di importashon di gasoil for di eksterior den e instalashonnan na Motètè i e ròl di Vantage den pasado ku a mustra riba e dudanan ku tabata eksistí. Banda di esei a bin pregunta tambe kiko ta status di e direktor Gensley Capella, un status ku awe no ta masha kla. Prinsipalmente Hunta di Komisario di e kompania a haña krítika pisá di parti di oposishon. Mayoria den oposishon ta haña ku e Hunta mester hala un banda pa e investigashon na e kompania por ta mas parsial posibel. A bin krítika tambe riba konstelashon di e Hunta di Komisario, den kua tin kasá di un diputado (Zita Leito), ruman di un diputado Humphrey Davelaar) i kasá i di eks presidente di Partido Nashonal (Lelia Peternella-Pieters-Kwiers). Te na momentu ku nos a bai imprenta awe, ainda e promé tanda di e reunion tabata sigui i Bestuurscollege lo tin trabou duru pa kontestá tur e preguntanan. Mayoria di e miembronan ta pará tras di e desishon pa kuminsá un investigashon, pero nan ta kere ku e Hunta di Komisario tambe mester ta parti di e investigashon ku ta tumando lugá. P’esei oposishon ta haña ku e Hunta mester hala un banda i laga STIP hasi e investigashon den e kaso aki.
WILLEMSTAD – E Shap Polítiko di e siman aki lo atendé Dia di Lucha pa Libertat. E tema ta: “Lucha pa Libertat; kon serio nos ta tum’é?”. Lógikamente e diskushon tin di aber ku e forma ku Gobièrnu di Kòrsou a ninga supsidio pa e aktividat e añja aki. E organisadónan a entregá e petishon demasiado lat. Gobièrnu di Kòrsou, miéntras tantu a organisá su mes konmemorashon. E diskushon ta tuma lugá djarason awor di mitar di 6 di atardi pa 7’or di anochi na Café The Coach (Rooseveltweg den edifisio di Desi’s Minimall, na altura di Samira Shopping Mall/Palu Blanku). E invitadonan ta diputado Marilyn Alcalá-Wallé, dr. Jandie Paula i Frank Quirindongo (Asosashon Promoshon Konsenshi Istóriko). Lo tin un tramsishon di e panel na Radio Hoyer 101.9 FM.
WILLEMSTAD - Den fin di siman a drenta e notisia tristu ku e konosido Hector A. Rosario a bai sosegá na edat di 83 aña. Hector tabata pa hopi aña enbolbí ku LA PRENSA komo hefe di redakshon. E tabata un spesialista tambe riba asuntunan di deporte, prinsipalmente den futbòl ku tabata su pashon primordial. Hector a traha despues na CUROM 850, Tele-Kòrsou i Radio Hoyer den análisisnan di deporte. Pa hopi aña e tabata e kara di deporte na Tele-Kòrsou. Di parti di LA PRENSA ta bai palabranan di kondolensia na e famianan di Hector Rosario. Pas na su restunan!
WILLEMSTAD/ DEN HAAG – Algemene Inspectie en Veiligheidsdienst AIVD ta eliminando un retraso den skrinmentu di empleadonan di Ministerio Públiko. Ta trata di investigashonnan di integridat bou di trahadónan ku tin un funshon di konfiansa. Empleadonan nobo na O.M. ku haña un funshon kaminda nan ta traha ku informashonnan sekreto, ta pasa kaba dor di un kòntròl di AIVD. Esnan ku ya tin un funshon asina i ku no a pasa e kùrmentu, ta bin na turno den e próksimo lunanan. Tin algun 100 persona ta traha na O.M. den un funshon di konfiansa. Diferente di nan ta traha asina regular ku informashonnan sekreto ku nan ta haña preferensia durante e proseso di kùr. E informashon sensibel ku e empleadonan akí tin di aber kuné, ta trata di por ehèmpel krímen organisá òf terorismo. Un kòntròl di AIVD ta destiná pa wak si un persona por ta hasi su trabou bon bou di tur sirkunstansia. For di 1997 e servisio ta hasi e tipo di investigashonnan akí. Un hende ku no pasa dor di e kùrmentu, no por ehersé e funshon pa kua a selekt’é. Esaki a sosodé algun tempu pasá ku e hefe di polis di Zeeland, Fup Goudswaard. AIVD a haña ku e ta shantagiabel relashoná ku kòrtamentu di orea. Despues ku for di 2003 e tabata den e funshon, a kit’é resientemente. Entretantu el a kuminsá un kaso den korte ku e speransa pa por wak e dokumentunan di e investigashon.
WILLEMSTAD/ SOESTERBRG – Den 9 di e 10 aksidentenan ku trùk kaminda e shofùr ta e okashonadó, komportashon peligroso tras di stür ta hunga un ròl grandi. Den 25% di e kasonan e aksidente ta kousá dor ku algu a kita e shofùr su atenshon. Kansansio i keda sin paga tinu tambe ta hunga un ròl, segun e investigadónan di e departamentu ‘Verkeershandhaving’ di Ministerio Públiko. E departamentu di O.M. a konkluí ku kousanan prinsipal di aksidentenan ku trùk ta korementu muchu duru, tenementu di muchu tiki distansia entre e trùk i otro vehíkulonan i kambiamentu di via. E investigashon a kubri 351 aksidente ku trùk ku a tuma lugá na 2006 i 2007. Mayoria di e aksidentenan tabata dalmentu di parti patras (44%). Den 41% di e kasonan tabatin kambiamentu di via i den áreanan urbanisá (bebouwde kom) a sosodé hopi aksidente kousá dor di e ‘dode hoek’, e parti di e vehíkulo ku den e spil no ta visibel (34%). Aña pasá tabatin 115 morto den aksidentenan kaminda tabatin trùk envolví. Tabatin tres bia mas tantu morto bou di koredónan di outo. En total tabatin 791 morto. Ounke ku e kantidat di mortonan den tráfiko na Ulanda ta baha, esaki no ta konta pa koredónan di trùk. O.M. ke hasi huntu ku polis un prueba ku kòntròlnan spesífiko riba kaminda grandi. E kòntròlnan riba korementu muchu serka di e vehíkulo dilanti (bumperkleven), orario obligatorio pa sosegá i velosidat ta sigui.
WILLEMSTAD/ SOESTERBERG – Fiskal di tráfiko na Ulanda Koos Spee, ke prohibí papiamentu na telefòn ora ta kore baiskel. E lucha pa baha kantidat di morto den tráfiko ta asina serio, ku no ta laga niun oportunidat bai bentá afó. Miéntras tantu na Kòrsou no por baha e kantidat di outomobilistanan ku ta papia sin handsfreeset. Segun Spee, no ta den outo so papiamentu na selular ta peligroso. Siklistanan tambe ta kore peliger ora nan ta papia na selular i ta na gobièrnu pa tuma un desishon riba un eventual prohibishon. Anteriormente minister Camiel Eurlings (Tráfiko) a desaprobá e proposishon akí. Ekspertonan di su ministerio a bisa ku ta 1 morto pa aña tin bou di siklistanan ku ta papia na selular. E predesesor di Eurlings Karla Peijs tambe kier a prohibí papiamentu na selular riba baiskel. Segun Spee, ta bon kla ku e konsentrashon di koredónan di baiskel ta bira ménos. “Naturalmente nan tin nan mes responsabilidat, pero si bo puntra ami tin ku prohibí papiamentu na selular riba baiskel tambe. Partisipashon den tráfiko ta un asuntu serio, sea bo ta sintá den outo òf riba baiskel.”
WILLEMSTAD - Djasabra fundashon NAHAMBRI a sigui kontribuí ku su programa di medio ambiente den bario di Brievengat. Riba Kaminda Brievengat a hisa un trùk di shushi i tambe riba e plenchi di Kaya Thomas Henriquez. Riba Kaminda Brievengat e fundashon a bolbe traha riba un parti dje kaminata, dor di baha e tera i bari limpi. Algun habitante ta reklamá ta dikon NAHAMBRI no ta hasi Kaminda Brievengat kompleto! Riba esaki Nahambri ta indiká por a hasi e parti aki for dje premio di rekonosimentu di M.C.B. “Lamentablemente ni Selikor, ni D.O.W. no ke duna nos fundashon rekonosimentu ni apoyo.” Segun un dirigente te ainda ni Selikor, ni D.O.W. no a spònser nan ni un depchi den e proyekto di medio ambiente. “Kòrda ku nos no ta kritiká niun gobièrnu ni niun diputado. Gobièrnu mester bini ku un konferensha di medio ambiente pa tur organisashon di medio ambiente partisipá i pa bini ku kambionan konforme e krísis ku tin kambio di klima.” Finalmente nan ta bisa ku ohalá algun dia gerensia di Selikor i D.O.W. realisá ku represaya kontra e fundashon no ta solushoná niun problema i ta hasi situashon di pais pió.
WILLEMSTAD – Den un karta pa Komishon Oropeo, Sekretario di Estado di Finansa, sr. Alex Rosaria, ta urgí esaki pa aserká e paisnan di Union Oropeo ku ainda ta referí na Antia pais komo un ‘paraiso fiskal’ pa pidi nan pa eliminá nos for di nan listanan pretu. Ta trata aki di Portugal, Polonia, Italia i Gresia. Debidamente Antia Ulandes a kumpli ku tur regla i rekomendashon riba tereno di belasting, labamentu di plaka i finansiamentu di terorismo, pues ta tempu pa rektifiká e referensia inhustu aki. Manera ta konosí, na mei último sr. Rosaria a sinta na mesa ku representantenan di Komishon Oropeo kaminda e mandatario a indiká klaramente ku koperashon riba tereno di belasting ku Oropa mester ta un tráfiko di dos direkshon i ku no por ta posibel ku apesar di tur ehersisio ku Antia a hasi pa pone nos sistema di belasting konforme reglanan internashonal ku algun pais di Union Oropeo ta kalifiká nos komo un ‘paraiso fiskal’. Na e okashon aki, Komishon Oropeo a pidi sr. Rosaria pa pone e puntonan relevante den un dokumento. Miéntras tantu esaki a keda entregá siman pasá na e Bruselas. Hecho ta ku tantu Komishon Oropeo komo e Organisashon pa Desaroyo i Koperashon Ekonómiko ta kalifiká nos pais komo unu ku no ta un paraiso fiskal. Sinembargo Komishon Oropeo ta argumentá ku siendo ku asuntunan fiskal ta algu outónomo di kada pais miembro di Union Oropeo, Komishon Oropeo no por eksigí e paisnan ku ta konsiderá nos komo ‘paraiso fiskal’ pa kita nos for di nan listanan. Sr. Rosaria sinembargo no por traga e argumento aki pasobra ora Union Oropeo ke pa por ehèmpel Antia Ulandes bai di akuerdo ku nan reglanan fiskal, e ora ei si paisnan miembro di Union Oropeo ta delegá nan outonomia na Komishon Oropeo. Pues nos no por aseptá ku awor ku ta pidi Komishon Oropeo pa rektifiká un fayo, esaki kier skonde tras di outonomia di miembronan.
WILLEMSTAD – Di un forma masha spesial, otro luna Fondo kultural Prins Bernhard pa Antia Ulandes i Aruba lo para ketu na e di 55 aniversario di su eksistensia. E diferente islanan lo prepará nan mes programa di selebrashon. Pa Kòrsou e promé fin di siman di sèptèmber ta reservá pa un seri di evento di karakter kultural. E fin di siman festivo ta habri djabièrnè 5 di sèptèmber ora gobernador Frits Goedgedrag di Antia entregá e ‘Zilveren Anjer’ na e artista lokal multifasétiko Elis Juliana. E evento akí ta pa invitado spesial i ta tuma lugá na palasio di gobernador den Fòrti. Findishi di arte Djasabra dia 6 di sèptèmber den oranan di anochi lo tin na e edifisio di NAAM na Johan van Walbeeckplein un findishi di obra di arte for di e kantidat grandi di kuadro ku e fundashon a kumpra òf a haña den transkurso di tempu di hopi artista komo muestra di nan apresio pa e sosten ku nan a risibí di e fondo kultural Prins Bernhard. E plakanan ku lo rekoudá ku e findishi akí lo yuda generá medionan finansiero adishonal pa por sostené mas proyekto kultural. Buki di Brion Djadumingu dia 7 di sèptèmber e programa ta kontinuá na Teatro Luna Blou den Otrobanda. Promé tin un demostrashon di supla kachu, siguí pa presentashon di un buki riba bida di e héroe kurasoleño Luis Brion. E outor di e obra akí ta e historiadó outodidakto Rudy Riedel. Na final di e evento lo tin un ban topa sosial ku artistanan for di diferente disiplina.
WILLEMSTAD - Resientemente Albert Heijn Supermarket na Zeelandia a kuminsá ku su kampaña di fin di aña, e asina yamá “Hopi bòn den tòn!” ku a wòrdu masha bon risibí pa e klientenan di Albert Heijn. Spesial pa e kampaña aki Albert Heijn a agregá algun strepi abou di e bon di kassa, na unda ku e kliente por nota su nòmber, number di telefon, identifikashon bálido i despues depositá esaki den e tómbola spesial ku tin na e ‘skina di premio’ nèt na e entrada di e supermerkado. Tur siman klientenan tin chèns di gana garoshinan yen di komestibel na balor di 250 florin i na final di e kampaña (20 di desèmber) e premionan grandi lo keda entregá na e respektivo ganadónan. E premionan pa e kampaña aki ta konsistí di un Weber BBQ di Kooyman Gifts & Garden, un frishidèr marka General Electric di WIMCO, 100.000 Fun Miles òf un Kia Picanto nobo nobo di Universal Motors. Desde e inisio di Albert Heijn Supermarket, el a bin ta inová den e manera di aserká na e kliente, ku promoshon i kampañanan diferente ku a hasi e kliente i e supermerkado ‘amigu’ di otro. Pues pa e fin di aña aki, kuminsando for di awor sigui hasi bo kompra na Albert Heijn....un di e premionan aki por ta di bo!
