WILLEMSTAD- Djadumingu awor 4’or di atardi Pool Arena, banda di Bright Impex, ta bai ta esenario prinsipal pa e gran final di e Kampionato Nashonal di Bola 8 Pa Ekipo di Federashon Biyar Kòrsou.
Despues di dos buèlta 6 ekipo a avansá pa “Calle 6” kaminda siman pasá den un “Best of 3” dos ekipo ta avansá pa topa ku e otro dos ekiponan den playoff.
Den e promé seri den “Calle 6” tur lus pa The Predators ta paga ora den dos wega emoshonante nan ta kai vensí kontra e fuerte ekipo di The CUB Sharks, pero ku mester a bai tur ku tin pa avansá pe playoff, dos biaha 5-4 pèrta pèrta.
Playoff The CUB Sharks kontra di The Scorpions.
Den e promé wega djamars The CUB Sharks ta sali riba mesun pia ora ku nan ta sali for di e porta grandi ganando den e promé wega di playoff kontra di e kampionnan di kampionato regular The Scorpions ku skor pèrtá di 5 pa 4 kòrta tur ilushon di e skorpionnan.
Den e di dos wega djaweps tur kos tabata pinta di bai den e direkshon di e skorpionnan ku e skor 4 pa 2 faltando solamente 1 wega mas pa empatá e seri i forsa unu desisivo.
Pero den e wega final Bryan “One” Farah ta enfrentá un Ingemar “Indjo” Bernabela ku a bini desidido riba mesa tirando ku tur su alma i vense e kampion di Bola 8 Farah i hasi the CUB Sharks ta hasi Pool Arena di nan ganando The Scorpions pa avansá pe gran final.
E otro ekipo ku ta avansá pa playoff for di e “Calle 6” ta Biesheuvel Friends ku ta pasa relativamente fásil riba Hoi Bao Titans 5-2 i 5-1.

CARACAS, Venezuela, - E presidente di Venezuela, Hugo Chávez, ayera a mustra di ta partidario pa stòp yama Latinoamérika di e manera aki, i pa yam’é Indoamérika, na honornan di e raisnan indjan di su habitantenan.
“Nos ta bai kuminsá usa e término aki. A imponé e nòmber di Amérika Latina”, Chávez a señalá durante un akto na Caracas.
“Ora bisa Amérika India nos ta inkluyendo hendenan pretu afrikano i hendenan blanku europeo, pasobra nos no ta ekskluyente”, e mandatario venezolano a añadí.
“P’esei, kada dia, ami ta papiando ménos di Hispanoamérika, di Latinoamérika.
Indoamérika, Afroamérika, ta esei nos ta, promé ku kualke otro denominashon!”, Chávez a suprayá, segun prensa lokal a informá, rekohé pa Europa Press.
A realisá e referensia na e akto di klousura di “I Congreso Bolivariano Indoamericano Jóvenes Contra la Miseria y el Imperialismo”, ku a tuma lugá ayera nochi na Teatro Municipal di Caracas, despues di tres dia di deliberashon.

ARIES: Awe bo ta manera un antena rekohiendo señalnan di bo ambiente tantu positivo komo negativo. Pone spesial atenshon na tur presentimentu ku bo tin. 41.

TAURO: Sigui bo proseso di transformashon. Eksperensianan positivo ta bo mas balioso rekuerdonan. Risibí lus, sabiduria i pas. 15,39,05.

GEMINIS: Mi bida atraves di wowonan di amor ta topa kosnan bunita. Kibra ku e pasado. Biba e momentu presente. Loke ántes no tabata funshoná, no ta funshoná awor tampoko.

KANSER: Algu aparentemente imposibel ta realisá. Bo ta satisfecho di tur esfuerso i sakrifisionan ku bo a hasi den pasado. Saka for di bo bida un persona ku ta envidiábu.

LEO: No sigui siendo víktima di bo propio pena. Habribu pa amor, pero sin ekspektativanan eksagerá. Bo ta sirbi di inspirashon pa lucha i logra. 08,42,18.

VIRGO: Kosnan straño, erátiko por akontesé den bo mundu di romanse i plaser. Buska esensia di personanan i no lagabu wòrdu atraé pa aparensia. 30,09,27.

LIBRA: No ta importá unda bo ta. Amistatnan nobo ta drenta den bo sírkulo sosial. Bo ta sintibu yen di pashon pa tur loke ta arte, beyesa i dekorashon. 45,07,31.

SKORPION: Bo ta eksperimentá konfushon i inseguridat den bo relashonnan ku bo pareha. Relahá i kanalisá bo energia pa medio di bo talentonan. 33,20,04.

SAGITARIO: Konfrontá bo propio pensamentu i kreensianan. Enfrentá bo miedo pa bo por vensé i bo mester hasi pa superá den bida. 27,16,11.

WILLEMSTAD – “Gobièrnu di Kòrsou a bisa, ku e lo buska alokashon pa tur studiante di Kolegio Omega ku no ke bai e skol ei mas. Nos tin solamente un pregunta: unda gobièrnu ta kere ku e por pone e 260 studiante na un skol sekundario? Di e tres skolnan sekundario ku nos tin, no tin lugá ni pa tur esnan ku a solisitá”, asina Ludmila van Eps, miembro di direktiva di Kolegio Omega a deklará.
Ayera, korte a trata e huisio sumario ku direktiva di e skol a entamá kontra minister di Enseñansa Omayra Leeflang.
Gobièrnu, manera LA PRENSA a informá, luna pasá a revoká e rekonosementu ofisial ku Kolegio Omega tabatin. E desishon ta basa riba e nesesidat pa garantisá nivel na e skol, asina minister di Enseñansa Omayra Leeflang a anunsiá.
E skol tin algun aña ta funshonando. Inspekshon di Enseñansa a hasi un análisis di e situashon na e skol i a yega na e konklushon ku kos no ta kanando manera mester ta. Nos a bin konstatá, segun e mandatario, ku tin un diferensha grandi den e sifranan di eksamen, loke ta inaseptabel pa gobièrnu.
“Un mucha ku pasa eksamen na e skol, ta logra sifranan positivo, tin biaha hopi haltu, pero ora ta trata di eksamen sentral, e mesun mucha ei no por duna e mesun prestashon. Basá riba un análisis profundo di Inspekshon di Enseñansa, nos a yega na e konklushon ku no ta responsabel mas a mantené e skol aki komo un skol ku rekonosimentu ofisial,” segun e minister.

WILLEMSTAD – “Kontrali na loke a bin dilanti den e dianan ku a pasa, no ta korekto pa bisa ku un studiante ku studia pa bira edukador na Universidat Nashonal di Antia, ta kaba un estudio ku tin mas prestigio. Mayoria kaminda na mundu, formashon di maestro no ta tuma lugá den un universidat”, asina tantu Frank Qurindongo komo Humphrey Senior di Akademia Pedagógiko a deklará durante un enkuentro ku prensa ayera tardi.
E situashon di Akademia Pedagógiko ketu bai ta pendiente un solushon.
Studiantenan di Akademia Pedagógiko Kòrsou a disidí ku nan ta bai korte pa eksigí un solushon pa e problema ku nan a haña nan mes aden. Manera ta konosí, e studiantenan ta haña nan dilanti e situashon ku den un tiru – literalmente di un dia pa otro – nan gastunan di estudio a bira konsiderablemente mas karu. Na lugá di paga 300 florin “collegegeld” awor mester bai paga 10 biaha mas tantu, ku ta 3 mil heldu.
Ayera nan abogado a entregá un petishon pa e kaso na korte.
Dosente di APK tambe ta preokupá kiko ta bai sosodé, pasobra nan posishon hurídiko no ta reglá.
Durante e enkuentro ku prensa ayera, e dosentenan a mustra ku a krea e persepshon último dianan, komo si fuera ku studia pa maestro di skol na UNA ta algu ku tin mas prestigio ku si a studia na Akademia Pedagógiko.
Ë persepshon ei ta robes. Nada ta ménos bèrdat. E estudio ku e studiante ta haña tantu na APK komo na UNA ta di un profeshonal. Na UNA e formashon no ta un formashon akadémiko, pero riba un nivel profeshonal,” asina Frank Quirindongo a duna di konosé.

WILLEMSTAD - “Ami lo aktua ku man duru, pa drecha e imágen di Curoil i rekuperá mas tantu posibel e daño ku e kompania a sufri. Pero no fèrwaktu di mi pa bai ataká niun hende personalmente. E investigashon mester kana su kurso i e proseso mester kana hustu,” asina diputado Humphrey Davelaar a bisa ayera nochi, na momentu ku el a kuminsá kontestá e avalancha di pregunta ku Konseho Insular a hasi, relashoná ku loke a sosodé na Curoil.
Manera nos a informá ayera kaba, tabatin basta pregunta krítiko di miembronan di Konseho Insular riba e desaroyonan interno na Curoil. Notabel tabata, ku tantu miembronan di oposishon komo miembronan di koalishon, tabata riba e mesun liña, ku preguntanan fuerte ku un meta: pa haña mas tantu klaridat posibel riba loke a sosodé.
Diputado Davelaar a bai hopi ekstenso, na momentu ku el a kuminsá kontestá den kareda di 8’or di anochi.
“Trahadónan di kompanianan di gobièrnu mester ta un ehèmpel. Netamente den tempu di un krísis energétiko manera nos ta pasando aden aktualmente, un kos asin’aki ta surgi. E ta hasié mas kondenabel ainda,” segun Davelaar.
E mandatario a mustra, ku ta masha diskushon tabatin riba preis di energia. Tur konfiansa tabata dirigí riba Curoil komo e kompania ku mester a sòru pa mitigá mas tantu posibel e efektonan di oumento di preis di energia. Netamente bou di e sirkunstansia aki, dos trahadó ta hasi nan mes kulpabel na un akto asin’aki, segun e mandatario.

WILLEMSTAD - Direktor di Curoil Gensley Capella ta ku fakansi obligatorio. E mes a bai di akuerdo ku esei, despues ku a inform’é ku si e no aseptá esei, anto lo mester suspendé, p’asina e investigashon por kana manera debe ser. Diputado Humphrey Davelaar, di e forma aki a trese klaridat riba e posishon definitivo di e direktor di Curoil, despues ku durante último dianan tabatin tur sorto di spekulashon kiko a sosodé finalmente kuné.
Tabatin hopi pregunta kiko finalmente ta su status, si el a bai ku fakansi obligatorio òf si el a ser suspendé.
Diputado Humphrey Davelaar a splika ku básikamente tin tres investigashon ta kanando awor aki. Tin e investigashon di e kompania forénsiko, e investigashon ku e kompania mes a entamá internamente, pero tin tambe e petishon di direktor na abogado di kompania pa weta si tabatin algu a sosodé ku ta meresé persiguishon penal.
E mandatario a splika, ku tur kos a kuminsá despues ku el a regresá di un biahe di trabou (e mandatario tabata na Cuba en konekshon ku esfuersonan pa haña enfermero spesialisá pa traha den unidat di Kuido Intensivo di Hospital St. Elisabeth, red). Dia 28 di yüli, Bestuurscollege a reuní ku gerensia di Curoil pa tende kiko eksaktamente a sosodé. Bestuurscollege a tuma e desishon ku ta konvoká un reunion ku StIP, pasobra tabata bisto ku Hunta di Komisario tabatin su mes responsabilidat, pero gobièrnu a haña, ku ta urgente pa atraves di StIP urgí Hunta di Komisario pa laga hasi un investigashon independiente, kaminda mester determiná daño na e kompania den tur su aspektonan. A pidi StIP pa mas lihé posibel kuminsá ku e investigashon, segun diputado Davelaar.

WILLEMSTAD - E manifestashon tradishonal ku ta tuma lugá tur aña dia 17 di ougùstùs pa rekòrdá lantamentu di katibu na Rif, ta sigui normalmente e aña aki, no opstante ku e organisashon su tras no por konta riba supsidio di gobièrnu di Kòrsou.
Asosashon Promoshon Konsenshi Istóriko a haña tende di gobièrnu di Kòrsou, ku e no ta pone sèn disponibel pa e konmemorashon e aña aki.
Gilbert “Gibi” Bacilio a bisa di no por komprondé esaki.
T’asina ku for di añanan nobenta gobièrnu di Kòrsou mes a proklamá 17 di ougùstùs ofisialmente komo dia pa rekòrdá lantamentu di katibu i for di e tempu ei a bin ta duna supsidio. Ta solamente un biaha, den henter e periodo aki no tabatin supsidio di gobièrnu.
Den un reakshon ofisial, diputado di Kultura Marilyn Alcalá-Wallé a bisa ku for di despues di e konmemorashon di aña pasá – ku por sierto el a eksperensiá pa promé biaha – ku e ta sinti falta di mas profundidat. El a bisa ku despues di e konmemorashon di aña pasá, el a sinta ku Servisio di Kultura i Edukashon pa ekspresá su pensamentu kon gobièrnu lo ke weta e konmemorashon den futuro.
“Mi a manda karta, mi a ripití mi petishon, pero nada a sosodé”, segun Alcalá-Wallé.
Gilbert Bacilio a lamentá loke a sosodé. El a bisa, ku e no por kita for di e impreshon ku gobièrnu di Kòrsou no a gusta e posishon skèrpi ku e asosashon a asumí riba e asuntu aki. Ademas, asina el a bisa, ta parse ku gobièrnu tampoko a gusta e idea ku sierto oradornan den pasado a bin ta manifestá nan pensamentu na fabor di independensia di nos pais.

WILLEMSTAD – Djasabra último e empleadonan lokal di KLM a saka kara i huntu nan a perkurá pa e krèsh ‘Mi Amiguitu’ na Montaña Abou haña kolónan fresku atrobe. E proyekto aki, inisiá pa KLM su Sales Supervisor Ramiro Schotborgh, a tuma henter un dia pa nan a fèrf diferente klas, e lugá di hunga pafó, e sitio kaminda ta wak beibi i e parti pafó di e edifisio. Krèsh ‘Mi Amiguitu’ ta masha agradesido na KLM pa e gesto aki, pasobra ta sigur kuater aña pasá ku el keda di fèrf pa último biaha. E krèsh aki ta eksistí for di 1987 i nan ta wak mas di 70 mucha entre 0 pa 4 aña.
Ku sierto regularidat KLM huntu ku su empleadonan ke duna algu bèk na komunidat den forma di un proyekto sosial. E akshon pa fèrf ‘Mi Amiguitu’ ta un ehèmpel di un aktividat asina. KLM ta masha agradesido na Coca Cola ku a sòru pa e refreskonan ku tabata nesesario durante e ehersisio aki i na Goddard Catering ku e mèrdia ei a prepará un almuerso.
Riba pòtrèt: KLM su kolaboradornan Tsamira i Mizaida trahando ku kuashi di fèrf na man na Montaña Abou.

Ta organisá mangrove eco kayak tours

WILLEMSTAD - Marine Park Visitor Center na Carmabi ta organisá mangrove eco kayak tours bou di guia di Ryan de Jongh i Leon Pors. Tur djarason atardi for di 16.30 or ta kuminsá e tour ku un presentashon breve den kua ta splika kiko lo bai mira den e tour i tambe kon mester hèndel un kayak. Despues e grupo ta bai diskubrí e ekosistema de palu di mangel ku e guianan, i tur e animalnan spesial ku ta biba aki. E ekskurshon ta dura mas o ménos 3 ora, ta kosta Nafl.35 pa hende grandi i ta inkluí awa i un snèk salu. Mucha for di 12 te ku 17 aña ta paga Nafl.2. Personanan di 12 aña i mas ta haña un lugá pa rema. Mucha mas yòn ku 12 aña por partisipá solamente si tin un mayor presente den e tour i ta sinta meimei di dos remadó. Personanan si eksperiensha di kayak tambe por partisipá sin problema.
Reservashon ta nesesario. Manda un mail pa info@carmabi.org pa reservashon òf yama 561-0813.
Pòtrèt: Hende den kayak durante e tour!

WILLEMSTAD – Den fin di siman UNA a selebrá e hecho ku a logra alkansá e punto mas haltu den konstrukshon di e depósito di buki di e universidat. Segun programashon apertura ofisial di e edifisio aki lo mester tuma lugá na luna di òktober próksimo. Un parti di e edifisio aki lo wòrdu usá pa warda bukinan di e universidat, miéntras ku otro espasionan lo ser usá komo lokalidat pa duna lès.

WILLEMSTAD -- Representantenan di Direktiva di Sociedad Bolivariana de Curazao, Robert Willems (presidente), Silos Salcedo (tesorero) i sra. Laurita Broekman (direktor di evento) a entregá e kondekorashon máksimo di Sociedad Bolivariana, ku ta e Medaya Bolivariana den su klase úniko na direktor i gerente di Refineria Isla, sr. Pedro Jiménez Justi, den su ofisina prinsipal na Refineria Isla. Ta otorgá e kondekorashon aki na esnan ku a destaká pa nan servisio i kolaborashon duná pa progreso i bienestar di Sociedad Bolivariana. Riba e pòrtrèt por mira e momentu ku ta entregá e kondekorashon na Jiménez.

WILLEMSTAD / DEN HAAG – Minister Roland Plasterk ku tin e kartera di emansipashon a reservá 400 mil euro pa sòru pa empleadonan aseptá nan koleganan homoseksual mas tantu. Miéntras tantu akí na Kòrsou gobièrnu di Antia a pèrdè un kaso den Korte ora e kier a evitá ku BZV ta sigurá yu di un pareha homoseksual.
E manera ku Ulanda ta atendé ku emansipashon di homoseksualnan ta kompletamente diferente ku na Antia i Kòrsou. Plasterk mes ta bisa ku Ulanda ta relativamente tolerante ku homoseksualnan. “Basta e no yega muchu serka, aparentemente. Na trabou homoseksualnan ta paga tinu bon pa ‘sali for di kashi’ dor di e riesgo ku lo tenta nan, ekskluí nan i deskriminá nan”, segun Plasterk. Entretantu akí na Kòrsou resientemente un pareha homoseksual a entamá un kaso den Korte kontra Gobièrnu di Antia pa motibu ku BZV kier a evitá ku nan yu muhé lo a hasi uso di e benefisionan di seguro di un di e parehanan ku ta traha pa gobièrnu pero ku no ta mama natural di e mucha muhé. Gobièrnu a pèrdè e kaso i a apelá.
Company Pride Platform (CPP) den koperashon ku e sentral di sindikato FNV por disponé di e montante di 400 mil euro te 2011. CPP ta un nètwèrk di empleadonan homoseksual ku ta traha na empresanan manera ING, TNT i IBM. CPP i FNV ke kambia e mentalidat di empleadonan dor di stipulá un kódigo di komportashon i dor di ofresé treinen. Nan ta hasi un yamada na otro empresanan pa djòin nan. E dos organisashonnan ta investigá tambe e posishon di homoseksualnan na trabou.

Nan a reklamá ku hóbennan ta será den un prizòn

WILLEMSTAD – Polis a detené 2 hòmber awe, ku a menasá gerente di Kinderoorden Brakkeput djabièrnè último. E hòmbernan Yu di Kòrsou R.S. (25) i S.E. (24) a bai e sentro, huntu ku un mas hòmber, ku e preteksto pa hasi algun aktividat ku e hóbennan, pero despues a kuminsá kuestioná i finalmente menasá e personal.
Tabata djabièrnè mainta, ku e hòmbernan a yega na e sentro i a puntra si nan por a hasi algun aktividat ku e muchanan ku ta keda na e sentro. E personal a splika nan, ku e gerente ta den un reunion, pero ku nan por a papia ku e personal mes tokante e aktividatnan ku nan ke hasi ku e muchanan. E hòmbernan no a aseptá esaki i a palabrá ku nan ta bin bèk atardi. Den oranan di atardi ora nan a regresá, nan a topa ku e direktor di e sentro Godalys Kwidama Reina. “Mes ora nan a kuminsá puntrami ta ken mi ta i ki papel mi tin pa atendé ku e muchanan. Nan a akusá nos organisashon di ta un prizòn i ku nos ta disidí pa e muchanan ki ora nan tin ku drumi. Tambe nan a bisa, ku nan a bin pa libra e muchanan.”
Mas aleu Kwidama Reina a splika, ku entretantu un di e hòmbernan tabata kana rònt i bati na e portanan i bisa e lidernan pa nan saka e muchanan. “Un di nan a bisa ku nan ta matá mi. Nos a yama polis mas ku tres bia i 45 minüt a pasa sin ku polis a bin. E hòmbernan a keda terorisá nos tur e ora ku nos tabata wardando riba polis. Finalmente polis a bin i a papia ku e hòmbernan. Promé ku nan a bai, nan bisa nos ku nan ta bai i bin bèk. E polisnan a bisa nos, pa no wòri, pasó nan lo no bin bèk. Djabièrnè anochi nos a pone un bewaker pa tira bista i tur kos a keda trankil. Pero djasabra e hòmbernan a bolbe bini i e bewaker a mira ku un di nan tabatin un arma di kandela. Nan a pidi pa saka e muchanan i mes ora nos a yama polis i e kompania di bewaker a manda mas hende. E hòmbernan a bai e biaha akí promé ku polis a yega i a bolbe bisa ku nan ta bin bèk pa matá mi.”

WILLEMSTAD - Selekshon Little League a sali pa Williamsport, Pennsylvania, djaluna 11 di ougùstùs den oranan di mèrdia.
E selekshon ta partisipá na e Kampionato Mundial di Little League na Williamsport di 14 pa 25 di ougùstùs.
Amanda van Wilgen di RBTT tabata presente na aeropuerto pa duna e hóbennan sosten i deseá nan éksito na Williamsport.
Selekshonnan Little League di Kòrsou ta kampion di Karibe for di aña 2001, ke men 8 aña siguí kampion i representando Karibe den Seri Mundial di Beisbòl Little League.
Pueblo di Kòrsou por sigui tur e weganan via e kanalnan di Deporte ESPN i ABC.
Esnan ku ta forma parti di e selekshon ta:
Edmond Americaan, Jairly Argus, Junters Dossett, Sjeantienne Ersilia, Tyvon Faneyte, Dennis Gustina, Claycandy Hariquez, Sherlon La Roche, Jason Libert, Hensley Martha, Juremi Profar, Entwin Regina, Suenly Paulina i Sedwin Regina.
Mènedjer ta Vernon Isabella, asistí pa coachnan Michelangelo Celestina i Charlton Cijntje.

WILLEMSTAD - Curaçao Maritime Museum ta disponé di un tesoro grandi: e eksposishon Steam for Oil! E eksposishon ta trata e proseso di refiná zeta krudo i e influensia di e refineria di zeta riba e desaroyo sosial ekonómiko di Kòrsou. E punto kulminante di e eksposishon ta sin duda e maquette (6 pa 3 meter!) di e modelo di un refineria di añanan 50/60 trahá dor di Hunert Leonard Vos. Meskos ku tabata e kaso den refineria e tempu ei, stom ta e fuente di energia primaria den e modèl aki. E maquette ta disponé di dos unidat di destilashon i algun pòmp di stom, ku ta wòrdu poné den moveshon pa demostrashon, pa medio di un kòmprèsòr di airu. Un bista impreshonante! Steam for Oil ta un rekuerdo balioso pa èks trahadónan di Shell i partikularmente edukativo pa muchanan di skol. Re apertura di eksposishon aki tabata posibel dor di e spònsernan Aqualectra i CMTC (Capital Management & Trust Co. N.V.)
For di djasabra último, 9 di ougùstùs, Curaçao Maritime Museum ta organisá ekskurshon riba tur djasabra 10or di mainta dirigí pa Ludwig Muyden. Por hasi reservashon na telefòn 465-2327. Pa mas informashon por yama 666-1029. Entrada ta Nafl. 10,- i preis spesial pa gruponan ta posibel.
Tambe por bishitá e wepsait nobo ku ta www.curacaomaritime.com
Un di e personanan ku a bishitá e eksposishon ta Edgar Leito. Den un karta pa LA PRENSA e ta bisa, ku ta bale la pena mira e eksposishon ku ta mustra aktividatnan di Shell na Kòrsou di 1917-1985. “Kòrsou tin hopi atrakshon skondí ku e pueblo no ta hasi uso di dje, pasobra den hopi kaso pa un òf otro motibu no ta muchu konosí den pueblo. Un di e sitionan aki ta nos Maritime Museum ku ta situá na e otro banda, kaminda e barkunan di fruta ta mará, ku ta keda nèt dilanti di e brùg nobo chikitu ku ta Prensès Irene brùg. Ta interesante pa hasi un bishita na e Maritime Museum i spesial na e Master Oil Museum ku ta laga bo sera konosí ku e desaroyo for di aña 1917 ku Shell a establesé su operashon di un Rafinaderia riba e plantage di Asiento. Bo por mira kon despues ku Shell a establesé den Schottegat, kon viviendanan a krese rondó di e Rafinaderia i tambe e kantidatnan di barionan ku a wòrdu trahá dor di Shell pa tur esnan ku tabatin ku bai traha riba Shell. Por mira tambe kon Schottegat a wòrdu di bagger i traha tur e pirnan ku en total tabata 11. Ta bon pa opservá e sitio di Asphaltmeer i su historia. Durante aña Hunert Vos ku tabatin un hòbi di traha e partinan mas importante di e rafinaderia na miniatura i pone henter e planta funshoná riba stom ku e tempunan ei tabata e fuente prinsipal di energia. Bo por mira kada parti di e planta funshoná riba airu na e momentu aki ku ta duna un bon idea ku un planta ta den otro. Bo por mira tankinan ku e dak ta move. Bo por mira tambe e desaroyo riba plachi di Schottegat for di 1971 te ku 1985 ora Shell a bai. Bo por mira tur e sorto di produktonan derivá for di petrolio. Asina mi por sigui. Mi ta sugerí tur familiar hasi un bishita ku bo familiar un djasabra pa dos or pa mira e Museum i kaba hasi un paseo ku boto den Schottegat ku lo bo sinti un bon paseo informativo i edukativo pa bo i bo familiar”, asina Leito ta bisa den su karta. Huntu ku su karta el a manda tambe algun pòtrèt di e eksposishon interesante aki.

 

WILLEMSTAD – E miembro di Konseho Insular pa MAN, Gerrit Schotte, ke sa si Gobièrnu di Kòrsou si Ulanda tambe lo forma parti den e eventualidat ku haña gas i/òf petroli den awanan teritorio antiano. Durante e reunion pa trata e situashon na Curoil, Schotte tabata un di esnan ku a prepará su mes bon pa e reunion ku preguntanan skerpi i al kaso.
Anke ku e reunion no a trata e rapòrtnan sismográfiko ku ta den diskushon, el a hasi uso di e oportunidat pa hasi diferente pregunta na gobièrnu relashoná ku e diskushonnan ku tabatin últimamente. E miembro di Konseho Insular a rekòrdá ku den e kampaña di aña pasá a redikulisá e pensamentu ku den nos awanan tin gas i/òf petroli. Opviamente e tabata referí na e avisonan e tempu ei di e organisashon KKK. “Awe ta manera kos ku ta papia sin remordimentu di konsenshi ku e tempu ei a malinformá pueblo. Loke a pasa por lo tantu ta inkreibel”, asina Schotte a bisa.
Relashoná ku e situashon ku a surgi, Schotte a puntra kon ta bai para ku e asuntu aki den konteksto di e kambionan estatal pa disolvé Antia. “Den tur e investigashonnan ki ròl Kòrsou ta hunga? Ta overrule ta bai overrule Kòrsou tin tur desishon?”, asina e Miembro di Konseho Insular a bisa. El a referí na e hechu ku den e kaso di adaptashon di sueldo mínimo tambe ta e otro islanan a pasa riba Kòrsou poniendo posishon di Kòrsou un banda i sin tende posishon di representashon di pueblo di Kòrsou na nivel insular.

WILLEMSTAD – Un biaha mas oposishon a pidi un reunion riba e desaroyonan na Dòk. Den un karta ku a bai pa presidente di Konseho Insular, e miembronan di oposishon ta bisa, ku konsiderando ku despues di vários reunion di Hunta di Komisario i akshonistanan te ainda no por a nombra un direktor den Curaçaosche Dok Maatschappij N.V. (CDM); konsiderando ku resientemente tres persona di nashonalidat kubano a entamá un kaso kontra di CDM den korte na Merka i a gana e kaso sin ku CDM a presentá un defensa; konsiderando ku esaki ta trese kun’é, ku e tres personanan di nashonalidat kubano lo por kuminsá otro kaso den korte kontra di CDM i/òf Gobièrnu di Kòrsou pa kobra daño i perhuisio; konsiderando ku e situashon finansiero di CDM ta sumamente prekario; e miembronan ta pidi un reunion ku e punto di agènda: Situashon di krísis den CDM N.V.
E petishon ta firmá pa e miembronan Nelson Pierre i Aldebert Rooijer (NPA), Charles Cooper, Urvin Makaay, Hensley Koeiman i Eugène Cleopa di MAN. LA PRENSA a komprondé, ku otro miembronan di Konseho Insular tambe ta sostené e petishon.

Prof. dr. Chabelito Lorito ta yama tur hende un felis djamars. Lorito ta yama su mes chabelito, pasobra nos a komprondé, ku tin un siensia nobo chabelístiko na Curoil. Un di e miembronan den Konseho Insular a pidi gobièrnu ayera, pa duna un splikashon kiko e palabra chabelito ta nifiká. El a referí na e deklarashonnan di direktor di Curoil ku a bisa, ku ta dos chabelito a hink’é den e baina aki. Un formulashon ku nos mester remarká ku no ta masha bunita!
*********
E reunion riba Curoil tabata riba un bon nivel ku eksepshon di algun individuo ku aparentemente no por debatí den un otro forma. Ironia ta, ku nan mes ta pidi kada bes pa debate. Por lo general e miembronan di Konseho Insular a prepará nan mes masha bon ku preguntanan krítiko i skèrpi. Nos kier stimulá e miembronan di Konseho Insular pa sigui riba e rumbo aki. Esei mester ta meta di un reunion: pidi kuenta i rason. Gobièrnu awor mester duna kuenta i rason i tene e diskushon na nivel!
*********
Nos a tuma nota di e posishon di Raad van Advies pa loke ta trata e remarkenan di Norbert George. Norbert awor a keda ku boka yen djente, pasobra e bala ta den su teritorio. E ta na punto di haña un karchi...kòrá! Nos ta spera, ku e lo no keda ku boka yen djente! Papia awor! Nos kier sa i nos kier mira!
*********
Ku tur rèspèt pa e splikashon di Raad van Advies, nos no a gusta e tradukshon na papiamentu. Malísimo! Otro biaha laga un eksperto traha riba e vershon na papiamentu, pasobra frankamente bisá, nos no a sali afó kompletamente! Ta djis un sugerensia!

MARTINUS
Joseph Emanuel
Mihó konosí komo Djo
A laga atrs su kasá Ivy Martinus-Da Costa Gomez, yunan Nancy Chirino-Agustin, Esmiralda Archangel-Agustin, Luthnellis, Joseph, Hensley, Darsy Martinus. Akto di entiero ta djabièrnè 15 ougùstùs for di misa Sta. Rosa pa santana Pietermaai. Bishita 1or siguí pa un s.s. di misa. FARIES

Elix Sebastian
Mihó konosí komo Tito eks kabes di skol Kolegio Chaya Willems
A laga atras su yunan Elix Igor i Milousha Faries-Libeir, Sonja Magna Faries, Ariadne Estelle Faries, Rosâne Mariel i Samuel Ramirez-Faries. Akto di entiero ta djasabra 16 di ougùstùs. Bishita 8or na misa brievengat. 11or tin un s.s. di misa. Kremashon ta tuma lugá den seno familiar.

GALEANO
Pablo Emilio (89 aña)
A laga atras su yu Oneal Hewitt-Galeano, ñetu Noa Hewitt, sua i kuñanan Visia Martes, Frank, Henri, Esselyn, Magda Daal tur ku nan famia. Akto di entiero ta djarason 13 di ougùstùs for di El Señorial pa santana Memorial Park. Bishita 9or-11or.

BERNABELA-BEAUMONT
Helena Laura (72 aña)
A laga atras su kasá Juan Enrique Bernabela, yunan Harold i Lourdes Bernabela-Maduro, Getkon i Claudia Bernabela-Quintero, Davidson Bernabela, Adèle Bernabela. Akto di entiero ta djarason 13 ougùstùs 4.30or for di misa Suffisant pa Parke El Consolador. Bishita 1or. Promé ku entiero tin un s.s. di misa 3.30or.

ROSARIO