WILLEMSTAD – E selekshon di Kòrsou di Little League ku a yega Williamsport, Pa., ayera mainta tempran, despues di a desayuná, a sosegá kurpa.
Mas lat nan a bai pas unifòrm di “Caribbean”. Despues nan a bai traha na “ID Badge” pa despues mas lat hiba nan promé práktika riba tereno.
Anochi e téknikonan mester a bai un reunion.
Kòrsou ku lo representá Caribbean a bin kai den Pul C.
Den e pul aki tin Mexico, Europa i Asia-Pasífiko.
Mexico lo ta representá pa Matamoros Little League, Europa pa Emilia Little League di Italia i Asia-Pasífiko pa Southern Guam Little League di Guam.
E promé partido di Kòrsou lo ta djasabra mainta pa 11’or kontra di Mexico den Lamade Stadium i lo ta un transmishon di ESPN.
E di dos partido lo ta djaluna 18 di ougùstùs pa 4’or kontra di Europa, ku transmishon di ESPN.
Nan di tres wega ta djamars 19 di ougùstùs kontra di Asia-Pasífiko pa 6’or di atardi i tambe lo ta un transmishon di ESPN-2.

WILLEMSTAD - E direktiva di CuBaFe ta partisipá ku djasabra awor 16 di ougùstùs nan lo tene un anochi di informashon.
Durante di e enkuentro aki e direktiva lo kier informá di e aktividatnan ku ta pendiente.
Direktiva lo kier pidi pa tur hende ta presente. Tin masha bon desaroyo andando, ku lo yuda e deporte di Basketbòl a término korto i largu.
Den kuadro di esaki direktiva lo kier pidi e klupnan pa inventarisá loke e klup tin mester i yena un lista mas kompleto posibel i trese esaki pa e direktiva.
Djarason 13 di ougùstùs e klupnan lo risibí un konsepto di e reglamentunan nobo di wega i transferensia. Por fabor, repasá esakinan i trese remarkenan.
E anochi di informashon ta tuma lugá djasabra 16 di ougùstùs na Feffik, na Brievengat pa 6’or di atardi.
E agènda ta lo siguiente:
-Apertura
-Partisipashon
-Entrega di premionan di e kampionato 2006/2007
-Kampionatonan di 2007/2008
-Informashon kon kosnan ta aktualmente.
-Entrega di formulario di inskripshon pa kampionatonan 2008/2009 i formulario di Intake pa TCR workshop
-Diskushon riba reglamentunan nobo di wega i transferensia
-Turno liber
-Klousura
Lo bai tuma kontakto telefónikamente pa sa di partisipashon di e klupnan.

LA HABANA, Cuba, - E presidente di Venezuela Hugo Chávez a regalá e eks gobernante cubano Fidel Castro kopia di un retrato di Libertador Simón Bolívar pa su 82 kumpleaño.
Un dia promé ku e festeho di kumpleaño di Castro, e gobernante venezolano a anunsiá ku e lo manda pa su aliado karibense kopia di un retrato di Simón Bolívar ku un eks ofisial venezolano a pinta.
“Esaki ta mi regalo pa Fidel. Mi mester yega mañan (awe) mainta. Segun mi kriterio modesto, esaki ta e mihó retrato di Bolívar ku mi a mira den henter mi bida”, Chávez a bisa, ora e tabata mustra e kuadro durante un akto na un teatro kapitalino.
“Awor aki mes mi ta bai biaha pa Cuba pa mi yega serka Fidel mañan (awe). Esaki ta regalo di nos tur pa 82 kumpleaño di tata Fidel”, e lider venezolano a añadí.
Despues di a pasa mas ku un aña i mei konfrontando problemanan di salú, na febrüari último Fidel Castro a pasa poder den man di su ruman hòmber Raúl Castro.

Foto: Fidel Castro 1308

Fidel Castro a kumpli 82 aña awe.

ARIES: Amor ta tuma un rumbo diferente pa bo. Bo tin dudanan i bo ke pensa kon tuma e kosnan di bo pareha na serio i awor bo tin ku disidí i tuma rumbo fiho. 05,09,18.

TAURO: Mehorá bo kalidat di bida. Invertí mas tempu den desaroyábu profeshonalmente. Bo enkanto ta enfatisá. 19,25,44.

GEMINIS: Ainda bo ta un tantu indesiso, pero pronto ta kuminsá aklará bo ideanan. Ta tempu di rekuperashon i sanashon. Si bo tin algun mal hábito, eliminá nan. 14,08,07.

KANSER: Bo independensia ta enfatisá i buska tur loke bo mester pa bo ta felis. Bo satisfakshon pa e kosnan di dia ta enorme. Bo komunikashon ta efektivo. 15,03,28.

LEO: Tur asuntu di famia ta tuma hopi importansia. Si bo papia di desakuerdo ta momentu di resolvé tur kos. Pone òrdu den bo kas i krea un ambiente kordial. 22,06,11.

VIRGO: Bo magnetismo i habilidat pa envolví bo mes den aktividatnan di grupo ta laga rekompensa i satisfakshonnan grandi. 07,36,12.

LIBRA: No sinta spera riba otronan, kuminsá bo kaminda i si berdaderamente tin kosnan ku ta hasíbu felis i awor bo sa loke bo ke. 03,14,35.

SKORPION: Balansiá bo obligashonnan pa bo no wòrdu provoká. Pone tur atenshon pa mehorá bo kalidat di bida. Sigui ku e kambionan den bo bida i bo pareha. 01,27,04.

SAGITARIO: Sigui e lucha pa establesé un balansa den bo bida pa bo sintíbu satisfecho. Skucha atentamente i tuma na kuenta e opinion di los demas. 09,23,06.

WILLEMSTAD - Staten a disidí ayera di posponé e reunion ku mester a tuma lugá ayera tardi pa diskutí desaroyonan riba eksplorashon di petroli i gas den nos awanan.
E motibu ta e hecho, ku Staten no a tuma nota ainda di e rapòrt ku profèsòr Simon Mitchell a traha riba e investigashon di University of Texas riba posibel presensia di gas i petroli den nos awanan.
Promé minister Emily de Jongh-Elhage a anunsiá algun siman pasá, ku Gobièrnu Sentral ke reuní ku parlamentu riba resultado di e investigashon aki di University of Texas.
Manera LA PRENSA a informá den forma ekstenso siman pasá, e promé indikashonnan ta mustra, ku tin bon posibilidat ku tin gas den e awanan rondó di nos islanan. Manera ta konosí, University of Texas a hasi un sondeo i análisis pa weta si tin petroli i gas natural.
E promé indikashonnan ta alentador, segun e promé mandatario di Kòrsou. El a bisa sinembargo, di no ke bai den detaye riba loke ta riba mesa, pero ke informá Staten ofisialmente promé,
Despues di e trabou di University of Texas a keda kla, a aserká e eksperto di Jamaica profesor Simon Mitchell ku a hasi un análisis di e investigashon di University of Texas. E análisis aki di profesor Mitchell entretantu a yega gobièrnu antiano.
Gobièrnu entretantu a pidi i haña un memorandum ku e eksperto lokal riba asuntunan petrolero Clarck Gomez Casseres a traha riba e investigashonnan.

WILLEMSTAD – “Belasting Accountantsbureau (BAB) ta preokupá kiko ta bai sosodé, unabes ku lanta Nieuwe Belastingdienst Curaçao, NBC.
BAB ke sigui funshoná komo un entidat independiente, tambe den e servisio nobo di belasting. Un argumento prinsipal pa esaki, ta e hecho ku no tin metementu polítiko den BAB”, asina Sherwin Casper i Benedict Bito, respektivamente direktor i presidente di BAB a duna di konosé den parlamentu ayera.
BAB a haña invitashon serka parlamentu pa diskutí integrashon di e organisashon aki den e Servisio Nobo di Belasting (NBC). E organisashon nobo aki lo mester bira un hecho den e pais nobo ku yama Pais Kòrsou den futuro. Fundashon BAB a duna un presentashon kompleto kon e ta weta funshonamentu di BAB den e konstrukshon estatal nobo.
Loke a resaltá tabata, ku BAB no ta kere ku e struktura estatal nobo lo bai kumbiní e fundashon.
Den e struktura nobo, BAB lo bai pèrdè un parti grandi di e independensha ku tin awor aki den su funshonamentu. Konsekuensia lo ta ku personal di BAB, lo por opta pa bai traha den sektor privá.
“Nos a krea nos mes kultura di organisashon. Nos tin miedu ku ora nos empleadonan, ku nos a tuma komo seis aña pa forma nan, mester bai funshoná den e struktura nobo, lo preferá di no sigui traha pa gobièrnu.
Gobièrnu, segun Casper, tabatin dos motibu pakiko e ke hinka BAB bèk den e struktura di gobièrnu. Na promé lugá, a surgi un diskrepansia asina fuerte entre BAB i algun servisio di gobièrnu ku empleadonan a entamá kaso kontra gobièrnu pa nan tambe haña e mesun kondishonnan (faborabel) di trabou. Un otro argumento ta, ku segun vários rapòrt, BAB lo por funshoná mas efisiente i efektivo, si e forma parti di e struktura di gobièrnu.

WILLEMSTAD - Parlamentario Glenn Liqui Lung (PAR) ke sa kon ta para ku e asuntu di inspekshon di labor riba e islanan. Si tur tempu esaki tabata un tarea di Gobièrnu Sentral, ku mira riba desmantelashon di Antia a desentralisá e servisio aki pa un gran parti kaba. Den un karta ku el a manda pa minister di Labor Elvis Tjin Asjoe, Liqui Lung ke sa kon ta para ku e tarea aki ku e islanan a tuma riba nan mes. “Nos ke sa, kon ta para ku e funshonamentu di e servisio aki”, asina Liqui Lung a puntra, relashoná ku e tragedia ku a tuma lugá na Mahuma algun dia pasá kaminda un trahadó haitiano a pèrdè su bida.
Un konstrukshon di betòn a bini abou i tapa e trahadó, kende a muri na e sitio di e aksidente mes.
Loke a sosodé a lanta un ola di preokupashon den komunidat, kon por ta posibel ku den tempu di awor aki, un aksidente asin’aki por pasa, mas ainda, si tuma na kuenta ku e promé indikashonnan ta mustra ku e konstrukshon tabata defisiente. Un kòntròl di inspekshon laboral posiblemente por a evitá e tragedia, segun analistanan.
Glenn Liqui Lung a puntra, ku for di despues ku a manda e tarea di inspekshon pa teritorionan insular algun aña pasá, ta kon esei a bai.
A hasi esaki, mandando e tarea bon ekipá pa e teritorionan insular?
Ta kon supervishon di trabou ta tuma lugá den práktika? ta otro pregunta ku e parlamentario tabatin.
El a bisa, ku e ke sa ta kon e kos aki ta hinká den otro, pasobra ta importante pa kada teritorio por ehersé e tarea di kòntròl aki na un manera adekuá.

WILLEMSTAD - Franklin Sluis komo direktor finansiero na Dokmaatschappij tampoko lo ta aseptabel pa diputado Eugène Rhuggenaath. Den un kaso asina tambe e lo tuma su retiro komo diputado, asina Rhuggenaath a duna di konosé, despues di vershonnan insistente di último dianan riba e posibilidat pa nombra Franklin Sluis den un otro posishon den gerensia di e astiero.
E reunion krusial di akshonista ku hopi hende a kere lo a bira determinante pa e asuntu di ken ta bira direktor di e kompania, no a resultá tòg asina desisivo. A tuma desishon ku ta nombra un direktor interino pa CDM Holding, pasobra manera ta konosí, ta esei ta e outoridat ku akshonista tin. Reunion di akshonista no por nombra un direktor pa e kompania di trabou Dokmaatschappij mes, pasobra esei ta un prerogativo di Hunta di Komisario.
Hopi a konsiderá, ku Eugène Rhuggenaath a sali viktorioso for di e promé bataya, pero ku no por bisa ainda ku el a gana e guera.
No ta masha kla ainda, kiko Hunta di Komisario lo hasi. Tin indikashon hopi fuerte ku Hunta di Komisario ke kana su mes kaminda den e asuntu aki i ku no nesesariamente, e lo sigui e proposishon di akshonista pa nombra tambe un direktor interino na Dokmaatschappij, un idea ku diputado Rhuggenaath a lansa komo solushon pa e impase serio ku tin awor aki.
Den e dianan ku a pasa, tabatin informashon insistente, ku promé minister Emily de Jongh-Elhage, den un reunion a proponé pa nombra un gerensia di dos kabes na e astiero i pa nombra Franklin Sluis komo direktor finansiero na e kompania.

WILLEMSTAD - Maduro & Curiel's Bank ta masha orguyoso di anunsiá lansamentu di su terminal wireless GPRS pa aseptá tarheta di krédito i débito. Maduro & Curiel's Bank a traha estrechamente ku UTS pa pone lo último den teknologia riba nos merkado, pasobra nan ke pa klientenan tin e mihó instrumentonan na nan disposishon pa manehá nan bentanan pa medio di tarheta di krédito i débito.
Tambe Maduro & Curiel's Bank ta masha orguyoso di ta un di esnan promé den nos region pa loke ta lansamentu di e terminal GPRS Wireless Verifone VX670. Negoshantenan lo ripará kon ekstremamente móbil, kompakto i fásil ta pa usa e terminal nobo aki.
Ku e terminal nobo aki negoshantenan por aseptá Visa, MasterCard, Discover, Maestro i nos tarheta di krédito lokal Kompa Leon.
E konektividat di e terminal aki ta pa medio di un GPRS data only SIM ku ta traha ku Chippie di UTS i ta kubri hinter nos isla. E terminal wireless Verifone VX 670 ta kompakto i ta masha fásil pa usa; e ta un di e terminalnan wireless mas kompakto na mundu i e ta perfekto pa oportunidatnan nobo den merkado, manera pagamentu di kuenta di restorant na mesa, servisio di pago na konsierto, eventonan sosial/deportivo òf eksposishon i e ta fasilitá pago pa empresanan ku ta hasi entrega na kas òf na trabou.
E terminal nobo aki ta hopi fuerte, e ta resistente kontra kaimentu i líkido ku por basha riba dje i ta keda bon bou di e sirkunstansianan mas eksigente. E aparato aki ku su pantaya grandi, skèrpi, ku lus blanku den fondo i tekla blou ku lus den fondo, ta fásil pa usa bou di tur sorto di iluminashon, espesialmente den restorant, bar òf lugánan pafó kaminda iluminashon ta limitá.

WILLEMSTAD – Kòmbersashonnan avansá ta tumando lugá aktualmente i ta kuestion di algun formalidat promé ku CliniClowns establesé su mes riba Kòrsou. E fenómeno, prosedente di Ulanda, ta duna e mucha ku ta malu, un chèns pa ta doño riba su mes situashon atrobe, dor di lag’é sinti su mes komo mucha. Pa medio di payasonan ku ta bishitá muchanan enfermo den hòspitalnan, distraishon i alegria ta wòrdu ofresé na muchanan enfermo ku ta den un situashon fèrfelu.
Shula Felomina, nasé na Kòrsou i ku a bai biba na Ulanda na un edat hóben ta un CliniClown. Diariamente e ta eksperensiá e efekto positivo di su presensia serka muchanan enfermo. Shula, disfrasá na ‘Zussie’, ta laga e muchanan aki hari atrobe i ta ofresé nan un distraishon. E reakshonnan di e muchanan, pero tambe nan mayornan, ta yen di entusiasmo. “Bo ta mira muchanan ku ta den un situashon difísil lora di harimentu atrobe. I e mayornan ta mira nan joya presioso, ku ta nan yu, ta gosa atrobe. E kos aki ta yenami ku un sensashon di hopi satisfakshon di por kontribuí na plaser di un mucha.”
E plannan pa kuminsá ku un Fundashon CliniClowns na Kòrsou ta den un estado avansá. Pero ta eksistí di bèrdat un nesesidat pa un fundashon asina riba nos isla? “En general muchanan mester bira adulto mas trempan na Kòrsou. Tin hopi famia di un mayor so na Kòrsou i ta wòrdu ferwagt ku muchanan ta asumí e responsabilidat di kuida nan rumannan,” segun Shula. “Pues muchanan tin ménos tempu na Kòrsou di ser mucha. I si ademas di esaki nan ta malu tambe nan tin ainda mas nesesidat na distraishon. CliniClowns na Kòrsou lo ta un solushon ideal pa esaki. Banda di e echo ku distraishon den forma di wega i komedia ta duna e mucha enfermo energia i konfiansa atrobe, pedagogonan i dòkternan ta rekonosé e efekto positivo di e trabou ehersé dor di ClinClowns.

WILLEMSTAD - Resientemente embahador èkstra ordinario i plenipotensiario di China na Caracas, señor Zhang Tuo i su kasá señora Lin Hai tabata na Kòrsou, pa na nòmber di Gobièrnu di China firma e akta notarial pa traspaso di e edifisio di Scharlooweg 53, konosí den boka di pueblo komo ‘Klup di Chines’.
E traspaso aki ta pa konfirmá ku ta Repúblika di China ta doño di e edifisio aki.
E traspaso aki ta hasi posibel ku pronto por kuminsá ku e trabounan di renobashon di e edifisio.
Di parti di Minister Presidènt i tur envolví, a hasi hopi esfuerso pa e traspaso aki tuma lugá. Riba e foto por mira d.r.p.d. señora. Lin Hai, kasá di Embahador Zhang Tuo, minister presidènt señora Emily de Jongh-Elhage i embahador di China na Caracas señor Zhang Tuo.

WILLEMSTAD - Djadumingu 17 di ougùstùs lo tin Open house na Dierenasiel na Parera di 10.00 - 13.00 or.
Fundashon Dierenbescherming ta invitá un i tur pa pasa un ratu agradabel na Dierenasiel kaminda hopi kachó i pushi ta warda riba un doño nobo.
Durante Open House lo duna informashon tokante kuido di bestia. Tin diferente aktividat pa hóbennan manera un “speurtocht” i un “prijsvraag”. Muchanan por laga pinta nan kara i tambe tin un “grabbelton”.
Bishitantenan por bai wak riba fèlt kaminda boluntarionan ta bezig ku e kachónan i tambe por drenta kouchi di pushi pa karisiá nan i hunga ku nan.
Na e stènt di Dierenbescherming por kumpra buki, poster, sticker i artíkulo leuk i bunita den ambiente di bestia. Entrada ta grátis. Na entrada bishitante ta haña un bale pa un refresko. E di 100 bishitante ta haña un pakete di sorpresa i e di 200 bishitante ta risibí un bale pa un sterilisashon grátis pa su kachó òf pushi.
Dierenbescherming ta spera ku hopi bishitante di e Open House lo regresá despues pa adoptá un di e kachó òf pushinan ku tin mester di un doño ku ta dispuesto pa duna nan e kuido i e atenshon ku nan mester.
Kòrda ku Dierenasiel mester sirbi komo un estadia temporal i no pa bida largu.

WILLEMSTAD – Tiara Air a anunsiá un pakete spesial di 200 florin pa pasashinan te ku 17 di ougùstùs entre Aruba i Kòrsou i entre Aruba i Boneiru pa 274 florin. Gastunan èkstra manera ‘fuel charge’ i ‘airport tax’ no ta inkluí.
E tarifanan spesial aki a keda introdusí riba e tres islanan pa selebrá e hecho ku e avion di Tiara Air a regresá bèk. E avion a pasa un inspekshon di ‘C-check’ ekstenso i a keda sertifiká segun stándar tantu merikano komo europeo i por sigui hasi ku servisio entre e islanan.
E avion a risibí un pintura totalmente nobo i por sigui mantené e tradishon di e marka Bombardier, kende ta un di e kompanianan di aviashon kanades mas grandi i mihó na mundu.

WILLEMSTAD – Un sospechoso ku rekobrá su libertat despues di tabata detené pa interogashon, no nesesariamente ta inosente. Na momentu ku Ministerio Públiko laga e sospechoso bai, esaki no ta nifiká outomátikamente ku e no tin nada di aber ku e kaso.
Regularmente ta sosodé ku Ministerio Públiko ta laga detené un persona ku e ta sospechá di un krímen. Hopi bia ta sosodé tambe ku e persona akí ta bai kas despues di algun dia di interogashon. Den boka di pueblo ta bisa e ora ei ku O.M. a lag’é liber. Pero no nesesariamente un persona ku O.M. laga bai kas ta inosente. Sa sosodé ku despues di algun dia di interogashon O.M. ta akumulá sufisiente informashon i no ta nesesario mas pa keda ku e sospechoso detené. Ta lag’é bai pendiente e investigashon. Normalmente e mester tene su mes tambe disponibel pa mas investigashon i no tin mag di bandoná Kòrsou.
Últimamente Ministerio Públiko a laga detené un kantidat grandi di sospechoso. E detenshonnan akí tabata relashoná ku entre otro e asesinato di e komersiante Nanick Daryanani, e asesinato di Pim Timmermans, e atrako riba un dama bendedó di number den Oosterbeekstraat, e sekuestro di e komersiante Walid Omeis, e maltrato di e siudadano Carlos Moreno i e asesinato di Roly Sambo. Den e kasonan akí a detené un kantidat di 27 sospechoso segun relatonan ku polis a manda pa prensa.
E sospechosonan detené den e kaso di Daryanani tabata (1) M.P. (37) i (2) H.E. (45). Den e kaso di Timmermans a detené (3) H.M. (15) i (4) R.H. (20). Den e kaso di atrako na Oosterbeekstraat a detené (5) F.P. (16) i (6) I.C. (19). Tambe a detené pa poseshon di arma ilegal (7) S.R. (16). Pa e maltrato den Nieuwstraat a detené (8) J.F. (36), (9) G.A. (43) i (10) M.W. (53). Den e kaso di sekuestro di Walid Omeis a detené (11) J.M., (12) G.R. (54), (13) R.A. (31), (14) J.M. (25), (15) A.H. (37), (16) L.O. (49), (17) R.M. (53), (18) A. de A. (52), (19), W.S. (22), (20) J.L. (17), (21) O.P. (27), (22) L.G. (20), (23) T.B. (32) i (24) S.B. (24). Finalmente a detené den e kaso di homisidio di Roly Sambo e hóbennan (25) J.C. (16), (26) J.H. (18) i (27) N.A. (17). Entretantu a laga algun sospechoso bai kas pendiente e investigashon. E sospechoso G.A. sospechá di maltrato durante e disturbionan di 26 di yüni entretantu a bai kas ayera. Den e kaso di Daryanani tambe O.M. a laga un di e sospechosonan bai. No ta konosí eksaktamente kuantu di e sospechosonan den e diferente kasonan akí ta detené ainda.

WILLEMSTAD / DEN HAAG – E fundashon Ulandes Voedingscentrum Nederland no ke pa mas snèkbar establesé nan mes den barionan kaminda ya tin sufisiente di e tipo di establesimentunan akí.
Voedingscentrum ta un fundashon ku ta propagá komementu salú, dushi, seif i konsiente. Den e kampaña e fundashon ta boga pa prohibí mas snèk pa establesé nan mes durante di 1 aña, den barionan kaminda ya kaba tin sufisiente snèkbar. En todo kaso nan no tin mag di establesé nan mes den besindario di skolnan, ya komo ku mucha ta suak pa e tentashonnan.
E sentro di nutrishon ta haña ku siudatnan Ulandes mester sigui e maneho di Los Angeles kaminda entretantu tin un maneho pa desanimá establesementu di “fast food”.

WILLEMSTAD – E kompanianan anónimo di gobièrnu aparentemente ta hasiendo mas i mas esfuerso pa drecha nan imágen den komunidat. Den e kuadro aki, nan ke ta tambe kompanianan ku sentido síviko. A base di esei nan a konvoká un seremonia pa djabièrnè awor pa duna un kontribushon “reimu” na e aktividatnan relashoná ku Siman di Kultura 2008. Kuantu eksaktamente nan lo duna no ta masha kla. E kompanianan ku lo hasi entrega di e donashon “reimu” aki djabièrnè awor ta Curaçao Ports Authority (CPA), Curoil N.V. , Refineria di Kòrsou NV i Curinde N.V. E direktornan di CPA Richard Lopez Ramirez i Agustin Diaz a firma e invitashon pa e seremonia di entrega ku lo tuma lugá na ofisina prinsipal di CPA.
Ayera organisadónan di Siman di Kultura a anunsiá ku tur kos ta kanando bon pa e aktividat aki ku aña pa aña ta kresiendo. E aña akí Siman di Kultura ta tuma lugá di 12 di sèptèmber pa 21 di sèptèmber 2008. Esaki ta e di sinku ‘Siman di Kultura’ ku e lema “Lanta bo kara i biba bo kultura”. Ta trata di un siman kaminda durante 10 dia largu ta duna atenshon na nos propio kultura. Durante e siman akí Kas di Kultura ta laga aktonan kultural brota den tur skina i ángulo di nos isla pa laga suidadanonan topa kultura unda ku nan bira. Ta duna atenshon na nos mes i ta enfatisá kultura di Kòrsou den ‘Siman di Kultura’.
Direktor di Kas di Kultura Rene Rosalia a splika di kon a instituí un Siman di Kultura. Segun Rosalia, Kas di Kultura a konstatá ku no ta duna sufisiente atenshon na nos mes kultura, no tin orguyo propio, tin bèrgwensa di kultura propio i tin un krísis di identidat.

WILLEMSTAD – Despues di tur e víktimanan tantu fatal komo esnan ku a keda ku leshon pa semper di kambionan estétiko sin kòntròl, e fenómeno ta sigui plama mas i mas na Kòrsou. Den pasado tabatin grupo di hende, prinsipalmente hende muhé, ku tabata rekurí na operashonnan den nos área mes (Colombia, Venezuela i Brazil) pero pa mas barata awor aki a disidí ku nan ta hasi kambionan estétiko aki nan mes. Pero nan ta hasié den lugánan ku no tin pèrmit ni personal kualifiká pa hasi esei. E problema ta meskos ku benta di droga: por lo general tur hende sa ta na unda pero ta outoridat so no sa. No ta masha kla si ta mas víktima outoridatnan ta warda pa intervení. Por sierto LA PRENSA tin entendí ku no ta aktua pasobra e doñonan di e salonnan aki ta bon konektá ku polítika i ku supervisornan. Banda di esei ta negoshi di hopi plaka ta papiando di dje. Miéntras tantu mas i mas víktima ta kayendo pa trabounan ku no ta kumpli ku stèndertnan médiko profeshonal. Tin un otro persona mas den hospital tratando di rekuperá di fayonan ku a hasi ku ne den e fenómeno di “body reconstruction”. Relashoná ku e desaroyonan aki e miembro di Staten di PAR, sra. Jacqueline Spencer, a manda un seri di pregunta na Minister di Salubridat Públiko & Desaroyo Sosial, Sra. Omayra Leeflang.
Den su karta e parlamentario ta bisa ku frakshon di PAR den Parlamento a tuma nota ku e fenómeno mundial di body reconstruction a hasi su entrada aki na Antia tambe. “E fenómeno aki a wòrdu bon akseptá den nos komunidat antiano, mirando e echo ku hasta nos bankonan lokal ta brinda fiansanan na e kliente ku kier bai hasi e tipo di body reconstruction ku e ta deseá aki na Antia o den eksterior. Nos frakshon a tuma nota i ta lamentá ku atrobe un persona despues di a bai pa un tratamentu aki ku ta kai bou di body reconstruction, a haña un infekshon, ku konsekuensia ku el a sufri komplikashon i aktualmente e ta drumí den e departamento di kuido intensivo. Nos kier apuntá tambe ku den pasado na mas ku un okashon ta tin kasonan kaminda e kliente/pashènt a pèrdè su bida despues di a bai hasi un tratamentu ku ta kai bou di “body reconstruction”. Nos frakshon ta hopi preokupá ku e fayonan aki ta wòrdu okashoná den sierto kaso pa motibu ku tin un kantidat di salon di beyesa i di estétika establesé aki na Antia, ku tambe ta ehersé sierto práktika ku ta kai bou di “body reconstruction”, miéntras ku e personal no tin e kapasidat, kualifikashon ni outorisashon konforme e lei di salubridat públiko di Antia pa ehersé e tratamentunan aki riba e kliente/pashènt. Ta pa e motibunan aki frakshon di PAR den Parlamento, kier a hasi nos Minister di Salubridat Públiko algun pregunta relashoná ku e fenómeno di “body reconstruction” ku ta birando un problema i menasa pa e komunidat di Antia”, asina e parlamentario ta bisa.

Konmemorashon ta sigui sin supsidio 

WILLEMSTAD – Progreso ekonómiko i soshal pa tur Yu di Kòrsou lo ta e tema prinsipal di konmemorashon di Dia di Lucha pa Libertat djadumingu awor. E organisadónan a anunsiá ku nan lo sigui ku nan aktividat sin supsidio di Gobièrnu di Kòrsou. Gobièrnu di Kòrsou a ninga supsidio e aña aki komo ku e organisadónan a entregá nan petishon lat. E organisadónan ta rekonosé ku esei enbèrdat tabata e kaso.
Di tur manera e aktividat di djadumingu 17 di ougùstùs ta bai sigui. Riba e dia ei lo konmemorá e echo ku 213 aña pasá a tuma lugá na Kòrsou e gran rebelion di katibu bou di liderato di Tula i su kompañeronan. Ta e fecha ku gobièrnu di Kòrsou na 1984 a proklamá ofisialmente komo “Dia di Lucha pa Libertat”. E aña aki atrobe Asosiashon Promoshon Konsenshi Istóriko ta organisá e importante konmemorashon akí na Parke Lucha pa Libertat na Rif riba djadumingu 17 di ougùstùs di 7’or pa 10’or di anochi pa rekòrdá e fecha istóriko aki pa henter pueblo i komunidat di Kòrsou. Lo tin un programa hopi variá ku diskurso na enkargo di entre otro sr. Oswin Chin Behilia i sr. Don Martina. Tambe lo tin presentashon di Grupo Akanni, Grupo Poetic Colours, baile di D’ Art i presentashon di Doble Klásiko. E aña aki e konmemorashon ta den kuadro di e lema:

WILLEMSTAD - Un kompania nobo ku ta pretendé di bai bula ku tarifa abou, lo bula riba Kòrsou tambe. E kompania AirOne a anunsiá, ku e lo kuminsá bula riba Kòrsou, Trinidad, Barbados, Cayman Islands, Grenada, Antigua i Jamaica. Outoridatnan di Jamaica a ninga e grupo di invershonista for di Irlanda, den kua tin tambe un ehekutivo di Digicel, pèrmit te awor. E kompania sinembargo ta optimista ku e lo haña e pèrmitnan nesesario.
E loke nan ta yama “low budget carrier” ta e promé ku a anunsiá ku e ta bai bula den Karibe. E lo bula riba 9 destinashon den nos region i Merka. E buelonan lo kuminsá na mart/aprel 2009, asumiendo si nan haña e pèrmitnan nesesario. Nan ta papia di tarifanan ku lo varia di 10 dollar te sumanan mas haltu, pero di tur manera 40 pa 70 porshento mas barata ku kompanianan eksistente, asina e direktor di merkadeo Tara Playfair a bisa den e edishon di Business Observer ku a sali ayera.
Aña pasá, outoridatnan a ninga e kompania pa pone su sede prinsipal na Jamaica. Esei a pone ku nan a bai ku e sede Barbados. Nan ta sigui insistí pa haña un lisensia di Jamaica, pero gobièrnu di Jamaica tin miedu, ku e kompania lo bai kompetí fuertemente ku Air Jamica ku ta pasando den momentunan difísil.

Lorito ta yama tur hende un felis djarason. Awa a kai dushi asina aki den mardugá, Lorito a dobla su alanan i por poko a pèrdè ariba. Por poko no tabatin e kolumna aki awe. Ta kon hopi hende lo a hasi. Ta kon otronan lo a haña notisia?
*********
Lorito a papia riba e hecho, ku struktura estatal tambe a bai ku reseso, pero a bin un kontra-atake mesora ku esei no ta bèrdat. Nos ta keda para ariba, ku a laga hopi tempu bai pèrdí atrobe pa entre otro duna informashon. Por ta bèrdat ku internamente a sigui atendé yen di aspekto, pero aki afó e impreshon ta ku e proseso ta kanando lento.
*********
Laga nos menshoná djis un ehèmpel. A papia riba mil i un kos, pero te awe nos no a tende kon a para ku e konstitushon pa Pais Kòrsou. A bisa despues di e buèltanan di konsulta públiko, ku lo ta kla den 2007, despues a bisa yanüari, despues febrüari i finalmente sèptèmber. Djis aki ta sèptèmber i nos tin gana di sa kon leu a yega. Wak bo tende ku e proseso aki tambe ta mal pegá. Por sierto nos ta di opinion, ku si konstitushon di Pais Kòrsou ta fundeshi di e Kòrsou nobo, di kon a kuminsá traha riba e dak promé?
*********
Nos ta kontentu ku sikiera un persona a hasi pregunta riba henter e asuntu di hasimentu di kurpa bunita ku ta un preokupashon pa Lorito. Lorito no ta hasi nada ku su alanan. Ta esei nos tin i esei nos ta keda kuné! Hopi hende no ta realisá kon peligroso henter e asuntu aki di drecha kurpa ta. Ata nos a topa algun hende ku nan kara a kuminsá hala kaba. Den promé instansia ta keda manera un pòpchi, despues kara ta trèk pa finalmente nan keda manera un mumi. Ta ki delito bo tin. Nos ta kere mas den e aserkamentu di bira grandi ku dignidat i responsabilidat. Wak bon kiko ta kome, drumi na ora i atendé tur kos manera mester ta! Asuntu di drecha kurpa si nos no ta den!