ORANJESTAD - Diabierna awor, 15 di augustus 2008, Guardacosta di Aruba y Antiya Hulandes (Kustwacht) lo tene un presentacion na Centro di Pesca Hadicurari pa tur piscado y doño di boto cera conoci cu nan trabou y tareanan. Tambe representantenan di Guardacosta lo uza e oportunidad pa intercambia cu esnan presente tocante varios asunto relevante pa nan trabou y esnan cu ta haci uso di lama. Kustwacht ta eherciendo trabounan di mantencion di ordo y control di leynan relevante na bienestar di henter comunidad, pesey ta importante pa tur piscado, doño di boto y comunidad general siña mas con nos por coopera cu e instancia importante aki pa un miho resultado.
PRESENTACION
Kustwacht lo cuminsa e anochi cu presentacion di un video cu ta ilustra e trabounan di Guardacosta den pleno accion. Despues lo papia di aspectonan specifico cu ta regarda Aruba y di interes particular pa esnan cu ta navega. Lo pasa siguientemente pa papia di leynan specifico cual Guardacosta ta enforcando actualmente tocante di navegacion, na costa y lo amplia riba aspectonan di watersport y con Kustwacht ta controlando esakinan. Lo parti copia di tur e leynan corespondiente pa esnan presente pa asina tur hende ta na altura di leynan vigente y reglanan cual mester tene cuenta cu nan, sino e doño di boto ta core risico di haya boet of haya su boto confisca.
INVITACION
Porta di e di dos piso di e centro lo ta habri pa publico for di 7:30 di anochi y lo ta proyectando riba pantaya imagennan di e diferente evento y actividadnan di e centro. E presentacion di Kustwacht ta programa pa cuminsa pa 8’or di anochi. Invitacion ta bay particularmente pa tur piscado di e centro, como tambe piscado, watersport operator y doño di boto, di henter Aruba. Publico en general ta mas cu bon bini, e invitacion ta habri pa tur publico. Entrada ta gratis.

ORANJESTAD - Managementteam di Colegio EPI unit Ciencia y Tecnologia na Sero Blanco ta participa na studiantenan cu diamars 19 di augustus 2008 lo ta e prome dia di scol.
Nos ta spera e studiantenan pa 8.15 or di mainta bisti cu uniform di skol.
Studiantenan lo haya informacion general, rooster, buki y stencil.
Loke ta concerni e pago di ‘collegegeld’ 2008-2009 nos kier recorda e
studiantenan cu no a entrega nan recibo di pago di e ‘collegegeld’ pa aña 2008 -2009 pa entrega esaki ainda na administracion di scol personalmente of mand’e via fax.
E studiantenan cu no a paga e ‘collegegeld’ ainda , mester paga esaki na banco C.M.B. ariba cuenta #122251007 y trece copia di e recibo di pago na administracion di scol. Pa mas informacion por tuma contacto cu Colegio EPI Ciencia y tecnologia Tel: 5258750 Fax: 5258755

ORANJESTAD- Chabod Academy of the Arts for di New Holland, Pennsylvania kier a hasi uso di e oportunidad aki pa extende nan mas sincero palabra di gradicimento na full e team organisatorio cu a hasi posibel e campamento: “Descubri bo joyanan scondi”.
Chabod Academy of the Arts ta un centro di entrenamento den diferente areanan di artenan creativo. Nan ta dedica nan mes pa train y juda hendenan di tur edad desaroya e talentonan cu Dios a duna nan, y na mes un momento door di comparti balornan moral haya den Dios, dor di expresionan creativo.
Chabod Academy of the Arts, anteriormente conoci como: Capitol Academy of the Arts, a biaha Aruba na Augustus 2007 pa e camp: Breaking down, Breaking out!! Cual a tuma lugar cu colaboracion di Iglesia Aliansa Nobo na Certified Megamall. Y a bin for di Merca un grupo di 24 persona.
E aña aki, pa nan di dos aña consecutivo, Chabod Academy of the Arts, bao di nan mes forza voluntario un biaha mas a establece fecha pa organiza un di dos summer camp na Aruba, e aña aki bao di e nomber: “Discubri bo joyanan scondi”.
Cu colaboracion di Sra. Rebeca Donascimento-Geerman di Mision Cantaro, Sra. Elvira Maduro di Fundacion D.E.C., Departamento di Asuntonan Social y Departamento di Cultura, y Sr. Ishwar y Kenia Daryanani kendenan a traha cu Chabod Academy pa 5 aña na Merca, a cera un team pa ehecuta e campamento aki.
E campamento aki tabata tin un exito rotundo, den tur e lesnan cu nan a presenta duranti e camp: lesnan di guitara, drums, coro, scrapbooking, hip hop dance, lyrical dance, worship dance, gymnastic, street art, deporte, entre otronan.

Pa motibo cu e ta cuestiona maneho di Minister Briesen

ORANJESTAD – Partido MEP ta bisa cu na Aruba tin un politico cu tur dia ta ijlo caba cu e ta proximo Ministro di Turismo y esaki – si pa desgracia fatal di e pais aki – su partido forma un gobierno gelapi cu 3 otro partido chiripero. Aki nos di MEP ta referi na e parlamentario di AVP sr. Otmar Oduber, kende no sa kico mas pa haci pa trata di venena mente di pueblo cu e mentira flagrante cu turismo di Aruba ta pasando den su peor momentonan. Durante 7 aña largo e profeta di disaster aki ta reza tur dia pa turismo di Aruba bay malo, cu lo tin desempleo den e sector hotelero y p’asina despues su persona sali padilanti como un supuesto salvador, esta como Ministro di Turismo cu ‘porfin’ lo bay laga e industria di turismo florece den e pais aki.
Sinembargo locual sr. Oduber no ta conta pueblo ta con desastroso su gobierno di AVP a laga nos turismo na 2001, caminda e crecemento di turismo tabata negativo di -4.1%, cu yen di desempleo den e sector hotelero, cu conflicto grandi entre A.T.A. y AHATA y cu un cantidad di debe pa loke ta promocion di turismo di nos isla, entre otro un debe di mas cu 10 miyon dollar pa promocion di turismo for di Merca.
Ta danki na Gabinete Oduber cu a drenta gobierno net na e momento oportuno y p’asina salba loke ta di salba ainda. Un maneho dinamico a ser hiba durante e ultimo 7 añanan aki y e cifranan di e crecemento drastico den nos turismo ta papia pa nan mes.
Den e tabel compila di cifranan oficial di Banco Central nos por comproba cu tanto den e entradanan di turismo, cantidad di turista, ocupacion di hotelnan, prijs diario di hotelnan y entrada pa camber di hotel nos a conoce un crecemento substancial na 2007 y esaki compara cu 2001.

WILLEMSTAD – Direktiva di ASPAFICO ta rekordá tur miembro riba e reunion di sumo importansia dj djaweps 14 di ougùstùs.
Ta trata di un reunion general kaminda tambe lo eligí un direktiva nobo pa e periodo 2007/2008. Tambe ta partisipá na miembronan ku tin algun kambio den aspektonan relashoná ku miembresia ku ta importante pa atendé durante di e reunion aki.
E miembronan ku a pone nan mes eligibel/re-eligibel pa e direktiva nobo ta:
Stanley Ignacio, Fans Keunen, Jamel Luuyendo, Gilbert Manuel, Eddy Phelipa, Tony Prins, Charly van de Sande, Michael Soliano, Earny Schoop.
E reunion ta tuma lugá na Rancho De Herberg awe djaweps mitar di 8 di anochi.
Tambe direktiva di ASPAFICO kier a rekordá no solamente miembronan, pero kabayistanan en general riba un reunion kaminda por inskribí i alabes tuma informashon relashoná ku Inter 2008.
E reunion aki ta 22 di ougùstùs pa mitar di 8 na Craidero El Hijo de David na Seru Loraweg.
E fechanan di e kompetensia ta 29 i 30 di ougùstùs próksimo.

BARCELONA – Barcelona a dal un paso firme pa buska su klasifikashon pa Liga di Kampionnan di UEFA, ora el a derotá Wisla di Krakovia 4-0, viktoria ku tabatin su base den un ekstraordinario promé mitar, den kua el a hinka dos gol den shete minüt, ounke e strea grandi di anochi tabata Samuel Eto’o, dòbel goliadó i ku Nou Camp a kaba ta grita su nòmber den koro.
E debut di e Barcelona di Josep Guardiola riba un esenario ofisial no por tabata mas satisfaktorio, ya ku e bon wega demostrá pa e hungadónan di Barsa, tabata kompañá pa golnan ku a pèrmití e tim katalan bai hopi kómodo den e di dos wega otro siman na Polonia.
Intenso promé mitar di Barsa ku a subi kancha den su kamisa di suplente i dispuesto pa kue bentaha riba Wisla ku a sali poko kobardiá, ku un hòmber so dilanti, Pawel Brozek, kende apesar ku e tabata su so tabatin dos bon chèns pa fayonan di Carles Puyol i e mèksikano Rafael Marquez, e dos sentralnan.
Barcelona a pone tur kos den akshon riba e yerba ku a ser batisá: preshon, velosidat den pase, movementunan den atake i tirunan for di pafó di aria.
E velosidat den movementu dje bala i e desplasamentu largu a pèrmití ku Marquez a manda un pase presis pa Eto’o, kende na di 18 minüt a superá e salida dje kiper i a tira djabou pa anotá.
E gritunan di alegria den tribuna na fabor dje afrikano tabata un kontraste ku e gritunan kontra dje tres luna pasá ora el a ser reklamá den e wega kontra Mallorca riba e mesun kancha.

ARIES: Bo ta defendé manera nunka ántes bo konsepto di bida, siendo kuidadoso pa ekspresá bo mes. Ta bon momentu pa buska den bo mes i pone bo sentimentu na pas. 08.

TAURO: Bo ta sinti nesesidat di duna forma na bo ideanan i pensa profundamente kua ta bo ekspektativanan pa futuro. Evitá diskushonnan. 46,12,05.

GEMINIS: Tempu di hopi tenshon den bo bida. Bo enemigunan ta sali na kla pa enfrentábu. Ekspandé mas bo horizonte, asina pa bo logra finansieramente. 14,06,09.

KANSER: Pone tur bo energia na bo trabou i hasi tur e lokualnan bo tin pendiente. Ta tempu di studia, eduká bo mes mihó i hasi algu pa bida. 30,44,03.

LEO: Trata na hasi deporte òf hinka bo mes den aktividatnan atlétiko. Den bo relashonnan sentimental ta mas agresivo, pero na un manera positivo. 17,50,02.

VIRGO: Bo ta traha mas de la kuenta relashoná ku bo kas. Si bo ta den konflikto ku bo pareha, bo ta den bo mihó momentu i pone tur kos na kla. 25,13,41.

LIBRA: Bo ta identifiká bo mes komo nunka ántes ku bo ideanan, loke ta lagabu kai den diskushonnan. No trata los demas di manera pa nan pensa manera bo. 11,28,04.

SKORPION: Plaka ta ponébu pega na lo material ku bo a gana ku esfuerso i sakrifisio. No laga ku nada ta tuma bentaha. Ta atento pa tur engaño. 32,24,19.

SAGITARIO: Bo tin tur loke bo tin mester pa bria i destakábu. Tur proyekto ta falisitá pa kas. Realisá ku kada kual ta den su derecho. 12,20,10.

WILLEMSTAD – “No a hasimi niun pregunta, mi no a haña chèns pa sikiera kuminsá splika e resultado dje investigashon ku nos a hasi den awanan teritorial, en buska di petroli i gas”.
Un promé minister bastante desapuntá a splika prensa ayera tardi ku e reunion di Staten di djamars último pa interkambiá ku parlamentu riba kiko gobièrnu a bin ta hasi riba e tereno aki, no a duna e resultado ku e tabata deseá. Ta komo si fuera kier a hinka e asuntu aki den un ambiente polítiko, el a agregá.
University of Texas a hasi un investigashon den awanan teritorial di nos pais, pa weta si tin sentido pa sigui ku intentonan pa weta si tin petroli i/òf gas den nos suelo supmarino.
E investigashon ta duna motibu pa sierto optimismo, pero mi no ke adelantá riba nada, asina e promé minister a bisa e tempu ei, pidiendo pasenshi, pasobra e kier a papia ku parlamentu promé riba e tema aki.
A laga un eksperto di Jamaica, profesor Simon Mitchell formulá su komentario riba e rapòrt di University of Texas i a laga e eksperto lokal traha su anotashonnan tambe riba e mesun rapòrt.
“Mi ta kere ku ta mas ku étiko pa mi informá Staten promé ku tur otro hende,” asina e promé mandatario a bisa algun siman pasá.
Hustamente pa e motibu ei mes, el a lamentá loke a sosodé djamars último. T’asina, ku parlamentario Dwigno Puriel a para riba pa e weta kontenido di e rapòrt di Simon Mitchell, promé drenta debate ku gobièrnu riba e asuntu aki. Gobièrnu, despues di a splika ku e kontenido ta konfidensial, a bai di akuerdo pa pone e rapòrt “ter inzage” na parlamentu. Pero esaki ta nifiká, ku nos mester di tempu pa por weta e kontenido, segun Puriel, riba kua presidente Pedro Atacho a disidí e ora ei – despues di a konstatá ku tin un mayoria na fabor di esei – pa posponé e reunion te aki dos siman, ora Staten tin su siman di reunion atrobe.

WILLEMSTAD - Munisipio di Leeuwarden i polis di Friesland a disidí, ku nan lo sigui pèrsigui i fèrfelá un grupo di mas o ménos 80 antiano ku ta kedando den e siudat Leeuwarden. Nos lo sigui kana nan tras. Esei ta loke alkalde di Leeuwarden Fred Crone a anunsiá ayera, despues ku a bira konosí ku polis resientemente a detené 7 antiano problemátiko den e siudat.
Na detenshon di e 7 personanan aki polis a konfiská dos arma di kandela mas un kantidat di kokaina ku por usa pa trafikashon.
Polis a disidí di aktua despues ku a bira konosí ku dentro di e komunidat antiano na Friesland tabatin vários kaso kaminda tabatin menasa ku arma di kandela.
Segun polis, e víktimanan di menasa aki tabatin miedu di hasi denunsia.
“Ta hustamente pasobra nos a sigui fèrfelá i pèrsigui, ku nos por a detené e hòmbernan aki ku tin e edat di entre 18 pa 19 aña riba kaya.
E redadanan ku a tene despues na diferente kas, a kondusí na detenshon di e otro hòmbernan i e kantidat di kokaina ku nos a konfiská. E kos aki ta un éksito pa nos, pero tambe pa e miles di antiano ku ta bibando den e siudat aki i ku ta komportá nan mes manera mester ta, sin okashoná problema,” asina Fred Crone a agregá.
“Nos sa ta ken nan ta i nan ta bira kada bes mas i mas bisto pa nos. Esei ta hasi mas fásil naturalmente pa nos por aktua. Nos por aktua mas dirigí tambe. Nos tin un tim spesial ku ta enkargá ku e forma di vigilá e grupo,” asina Crone a indiká.

WILLEMSTAD - Miembro di direktiva di COPDA, sekretario Norman Perry no por kaba di komprondé di kon awor ku tin indikashon ku preis di petroli ta bahando, no ta papiando kon ta bai redusí preis di kombustibel den nos pais.
Perry a referí aki na e hecho, ku den e siman tras di lomba, a bira konosí, ku preis di krudo a baha bastante, despues di un periodo hopi largu ku nos tabata konosé oumento tras di oumento.
Si e preis di krudo tabata den kareda di 140 dollar pa barí, el a baha supstansialmente te na 120 dollar pa barí. No tin indikashon si esaki ta un desaroyo insidental temporal òf si por papia di un desaroyo un tiki mas duradero.
En bèrdat tin chèns ku preis ta bolbe subi, asina Norman Perry a indiká, pero ta un hecho ku awor aki el a baha.
“Anto meskos ku ora e subi, ta informá pueblo mesora ku el a subi i mester subi preis di kombustibel, di kon awor no ta papiando riba un eventual redukshon di preis?” Perry a puntra.
Norman Perry ta haña, ku gobièrnu debe komunidat un splikashon di su maneho riba e tereno aki.
El a ripití su ponensia di semper ku mester bin mas klaridat riba tereno di kompra i benta di produktonan petrolero.
Banda di esei, Perry a bisa ku te awe, e no ta konvensí ku gobièrnu a eksplorá tur posibilidat ku tin, pa redusí preis di kombustibel den nos pais.
Ta un hecho ku tin diferente oferta ku nos a haña i ku gobièrnu no a investigá sufisientemente. A lo ménos na mi konsepto, asina e sekretario di COPDA a añadí.

WILLEMSTAD – Djarason atardi señornan Ron Gomes Casseres di Maduro & Curiel’s Bank i Nic Møller di Avila Hotèl a desvelá den Museo Octagon dilanti un grupo selekto un obra di arte ku te ainda ta poko konosí di e pintor Luigi Pinedo, ku aña pasá a fayesé. Ku e akto aki su yu muhé Karin Isidora-Pinedo a mira un deseo ferviente di dje bira realidat.
Mas ku 40 aña pasá e pintor lokal Luigi Pinedo a partisipá na un kompetensia internashonal di kuadro ku nan a lansa na Caracas pa konmemorá e libertador i héroe Sur Amerikano Simon Bolívar. Señor Pinedo a hinka hopi tempu i energia den e kuadro di e tamaño di 1.96 pa 1.22 meter ku el a manda aden na aprel 1966 pa e kompetensia na kua alrededor di 100 artista a partisipá. E obra di Luigi Pinedo a finalisá na e di 5 puesto i a haña menshon honroso. Seguidamente nan a kologá tur obra eskohido den Museo de Bellas Artes na e kapital venezolano, pero despues di esei masha tiki hende a mira e obra aki. El a keda den man privá i e pintor a laga esaki atras pa su dos yunan muhé, Muriel i Karin.
Tabata e yu muhé mas hóben Karin ku tabata ke pa nan restorá e kuadro pa despues eksponé esaki na un sitio sentral. Su tata mes a kuminsá ku e trabou di restorashon, pero malesa a impidi’é pa e kaba e enkargo aki. Despues di su fayesementu na mart 2007, atraves di intervenshon di doño di galeria Pòpi Verboom a enkargá Joes Wanders pa finalisá e trabou di restorashon. Huntu ku Luigi su amigu Lionel Janga a hasi un estudio di e materia aki promé ku Joes Wanders den seis luna di tempu a logra restablesé e pintura den su estado original.

WILLEMSTAD - Den luna di òktober 2008 Diósesis di Willemstad ta organisá un Konferensha na Kòrsou ku partisipashon di representantenan di tur seis isla ku ta forma Obispado.
E Konferensha aki lo aprobá un Plan Pastoral yamá Mishon Diosesano 2008 – 2011.
Punto di salida di e Plan Diosesano aki ta e Dokumento di Aparecida ku ta pidi tur fiel katóliko di Amérika Latino i Karibe pa realisá un “Pentekòste nobo ku mester sali na enkuentro di kada persona, famia, komunidat i pueblo pa komuniká i kompartí e don di e enkuentro ku Hesukristu, ku ta yena nos bida di “sentido”, di bèrdat i amor, di alegria i di speransa!”
Obispado di Willemstad kier tuma e Dokumento di Aparecida komo base di inspirashon pa elaborá e Plan Pastoral Mishon 2008 – 2011.
Den lunanan mei, yüni i yüli 2008 a tene un enkuesta i entrevista bou di fielnan katóliko di Antia i Aruba komo promé fase pa studia e realidat di nos iglesia katóliko i asina logra un fuente di informashon sumamente balioso.
Pa prepará e Konferensha Diosesano, di 16 pa 20 di òktober 2008, Obispado ta organisá un Pre-konferensha riba tur seis isla den luna di ougùstùs ku e siguiente fechanan:
Saba: 18 – 19 di ougùstùs
St. Eustatius: 20 – 21 “
Sint Maarten: 22- 23 “
Bonaire: 25 – 26 “
Aruba: 27 – 28 “
Kòrsou: 29 – 30 “

 

WILLEMSTAD - Djasabra 2 di ougùstùs, tabatin e ban topa kustumbrá di “Bisiñanan Uni” di Sint Joris dilanti kas di Henky Antonisia na Weg Groot Sint Joris 257.
Ya ta di nuebe aña kaba, ku Henky ta invitá tur bisiña rondó di dje i ta manda aviso na otro bisiñanan tambe di Sint Joris pa nan asistí na e evenementu aki.
E biaha aki e selebrashon ta tin un toke diferente, den un kaya yená ku bisiñanan, Diana Daal i diputado sr. Hunfry Davelaar a duna un plakat na tres baluarte di nos bario.
E baluartenan aki ta Jose Paulina, Jan Girigorie i Maria Adriana.
E ambiente tabata hopi ameno i sosial, i a krese bai kulminá te despues di kuat’or di mainta.
Komishon organisadó kier a gradisí tur hende ku a koperá, prinsipalmente bisiña i famianan ku a asistí i a sòru pa engrandesé e evenementu aki.
For di awor aki nos kier a ekstendé un invitashon na henter bario di Sint Joris, pa reservá dia 1 di ougùstùs 2009, pa nos uni atrobe pa selebrá e di 10 aniversario di “Bisiñanan Uní” en grande.
Bisiñanan keda pendiente pa mas informashon.

WILLEMSTAD/ DEN HAAG – Outomobilistanan ku kometé un aksidente grave i haña un kastigu alternativo, mester kumpli ku esaki den un sentro kaminda víktimanan di aksidente ta revalidá. Esaki ta loke Ministerio Públiko i Reclassering Ulandes a palabrá.
E palabrashon akí ta konta pa esnan ku kometé un krímen di tráfiko serio i grave. Ku e palabrashon akí e piratanan di kaminda por ‘siña di nan kastigu’ i ta posishoná nan serka víktimanan di aksidente di tráfiko, segun O.M. i Reclassering Nederland. Den sèptèmber Reclassering Nederland ta kuminsá ku un prueba den e region Utrecht-Arnhem. Si esaki resultá eksitoso, ta implementá e método rònt Ulanda.
E kastigu no ta konsistí di kuido di e pashèntnan, pero di trabounan di mantenshon na e sentronan di revalidashon. Ta wak si kontakto entre e víktima di aksidente i e kousante ku a haña un kastigu alternativo ta posibel. Tur aña tin alrededor di 800 morto i algun mil herido den tráfiko na Ulanda.

WILLEMSTAD – Manera ta un kustumber Lettermen BBC durante di e fakansi grandi ta tene un Fakansi Plan, pa tur mucha i hóben di Kòrsou por siña mas dje deporte i haña deseo pa kuminsá praktiká básketbòl na un manera mas serio.
Durante di kuater siman dos biaha pa siman a duna e muchanan lès i siña nan e kosnan básiko. Esnan ku kier a siña mas a bai e kurso mas avansá, kaminda e hóbennan di e organisashon ku ta studia na Merka, a duna instrukshon pa nan mehorá e muchanan su téknika i táktika den e wega.
Durante e finnan di siman tambe a sali dibertí ku e muchanan kaminda a bai laman, a bishitá diferente sitio interesante ku e grupo i asina a disfrutá totalmente di e fakansi.
Pa e motibu aki e organisashon kier a gradisí tur spònser ku a koperá ku e organisashon den e Fakansi Plan aki i ku a hasi e muchanan kontentu pa algun siman. Un danki tambe na Sedreko pa nan koperashon.
Awor ta momentu pa bai skol bèk i dediká tempu na studio pa despues logra un bon resultado tambe.

WILLIAMSPORT/WILLEMSTAD – Informashon for di Williamsport, Pa, ta bisa ku ayera durante di dia tabatin un reunion ku e mènedjernan, kaminda a “toss” tambe pa e weganan den e pulnan.
Manera LA PRENSA, a skirbi ayera, Kòrsou a kai den Pul C huntu ku Mexico, Italia i Asia Pasífika.
Den e wega di djasabra kontra di Mexico i esun di djaluna kontra di Italia, ámbos fecha e selekshon di Kòrsou ta ekipo di kas.
Den e último wega kontra di e ekipo di Asia Pasífika djamars, Kòrsou lo ta ekipo bishitante.
Mas atardi e selekshonnan tabatin nan seshon di foto i tambe di televishon.
Awe mainta pa 10’or e selekshon lo bolbe praktiká i atardi nan lo ta den un parada den “downtown’ di Williamsport, Pa.
Riba e foto e muchanan rondó di un golf cart promé ku nan seshon di foto i televishon dibertiendo nan mes.

WILLEMSTAD – E proyekto di Herensia Kultural no ta pa turista so, pero pa nos mes tambe. Esei ta loke Ofisina di Turismo di Kòrsou a bisa relashoná ku e proyekto aki ku ta kore di 15 di ougùstùs pa 15 di novèmber awor. E meta prinsipal ta pa turistanan sera konosí ku nos kultura, pero di otro banda tin eventonan tantu pa nos bishitantenan komo nos mes, asina funshonarionan di CTB a bisa e siman aki den presensha di diputado Eugene Rhuggenaath ku enkargá ku turismo. Ta di kuater biaha ku ta organisá e aktividat aki. Ofisialmente e proyekto yama ‘Curaçao Culture, Cuisine Heritage & Experience (CCCH&E) 2008. E apertura ofisial aki ta tuma lugá djadumingu 17 di ougùstùs próksimo na Plasa Brion di 4’or pa 9’or. Ku e proyekto aki Ofisina di Turismo di Kòrsou (CTB) ta invitá turistanan di e diferente partinan di mundu pa bin Kòrsou entre 15 ougùstùs i 15 novèmber próksimo pa nan bin konosé nos kultura i historia. A lansa e programa pa promé biaha na aña 2005 i e mester sirbi komo un instrumento di promoshon pa atraé mas bishitante pa eksplorá e diversidat di Kòrsou su kultura, kushina i herensia, den interakshon ku Pueblo di Kòrsou. E aña aki tambe e programa lo tin un durashon di tres luna kuminsando for di 15 di ougùstùs te ku 15 di novèmber próksimo. Durante e periodo aki bishitantenan lo risibí e “Curaçao Culture Cuisine & Heritage discount booklet”, pa asina nan por risibí deskuento i entrada grátis na diferente restorant, galeria di arte, museo i otro eventonan kultural ku ta partisipá den e programa.

WILLEMSTAD – E proyekto Quickwins a kuminsá duna fruta. Dos proyekto importante pa enseñansa a bin den publisidat den último dianan, ku ta demostrá importansia di e proyekto aki ku ta haña su fondonan for di Ulanda. Ulanda a pone e fondonan disponibel, despues ku aña pasá Kòrsou a bira parti di e akuerdonan den kuadro di e Deklarashon Final (Transitie-akkoord) despues ku e gobièrnu anterior a oponé esei durante 7 luna largu.
Den e promé proyekto, Quickwins a sòru pa 519 alumno di skolnan públiko a haña nan unifòrm di skol supsidiá. E proyekto akí ta kai bou di supervishon di Servisio di Skolnan Públiko (DOS) i kordinashon tabata den man di Program Management Office (PMO). Na promé instante, e fondonan tabata adekuá pa 200 mucha di Kòrsou haña unifòrm nobo. Ku yudansa di 10 proveedor di unifòrm, a logra di amplia e kantidat di unifòrm, pa asina mas mucha den nesesidat di e unifòrm stipulá, por bai skol adekuadamente bistí.
E proveedornan ta: Happy Clothes, Cambes Uniforms, Casa Janina, Stacy’s Embroidery, ADM Embroidery & Promotions, Stitch On nv, Dorcas Embroidery NV, Bazar Mayra, Unlimited Polo and Tees, Freeport Jewelry & Giftshop. Finansiamentu di e proyektonan di Quickwins ta for di fondonan di desaroyo ulandes, manehá dor di USONA. Quickwins ta fungi komo ehèmpel di fondonan ku nos pais lo disfrutá di dje den kuadro di e trayekto di struktura estatal (toetredingsakkoord).

WILLEMSTAD – Direktiva di PAR a konvoká un reunion awe nochi ku diputado Eugene Rhuggenaath, enkargá ku Curaçaose Dokmaatschappij, pa wak si por sali for di e impase serio ku a surgi riba nombramentu di un direktor na e kompania i ku tin e diputado riba ruta di retiro for di e partido i polítika. Ta konsiderá e reunion unu di karakter sino fono komo ku ya kaba ta algun luna ku e kaso ta den publisidat sin konklushon te awor.
Despues ku a informá ku un reunion di akshonista djabièrnè último a tuma lugá den bon ambiente i a fiha puntonan di salida ku tur hende por biba ku ne, a surgi duda riba kiko a akordá. Entre otro LA PRENSA a pone duda den e vershon aki despues ku nos a haña sa ku loke a bin dilanti no tabata kompletamente korekto. Esmas, si tabatin un akuerdo entre e protagonistanan prinsipal, entre otro pa loke ta trata e eventual nombramentu di Franklin Sluis na kualke puesto, no tabatin e nesesidat pa diputado Rhuggenaath sigui insistí ku e lo baha dado kaso Sluis ta den tapara pa kualke puesto ehekutivo.
Loke a pasa den e reunion di djabièrnè ta ku diputado Rhuggenaath a bin e reunion ku un mandato di Bestuurscollege (ku ta e akshonista prinsipal pero no a úniko akshonista) pa trese kambionan den rumbo di e kompania i pa nombra un turn-around manager. Aparentemente ya kaba tin un kandidato na bista, anke ku e diputado mes a bisa na radio resientemente ku ainda no tabatin kontakto ofishal ku e kandidato aki, un penshonando ulandes ku a traha na e kompania di drechamentu di barku ulandes Damen Shipyard. E mesun kompania tabata interesá te algun siman ariba ei pa bira doño di e kompania pero aparentemente e animo di e kompania ulandes a baha último dianan. Den e reunion di djabièrnè e úniko kos ku diputado Rhuggenaath por a hasi ta pa anunsiá deseo di Bestuurscollege pasobra e responsabilidat pa tuma desishonnan na e kompania ta di Hunta di Komisario. Den e struktura aktual di kompania i fundashonnan di gobièrnu, Kódigo Sivil ta pisa masha tantu i ta bisa bon kla ku no ta gobernantenan ta responsabel pa desishonnan ku tuma pero e miembronan di Hunta di Komisario individualmente. A tuma e sugerensha di diputado Rhugggenaath na konsiderashon pero ku e punto di bista bon kla ku finalmente ta Hunta di Komisario ta esun ku ta tuma e desishon final. Riba esei a surgi un konflikto serio awor aki pasobra Hunta di Komisario ta pretendé ku el a kuminsá un proseso pa nombra un direktor nobo, e proseso guiá pa SOAB a yega na konklushonnan konkreto, a skohe i ya kaba informá e mihó kandidato (Sluis) pa despues e diputado bisa ku e no por aseptá nombramentu di e kandidato aki. E diputado tin duda den kandidatura di Sluis pa motibu di su kontakto ku hustisia den pasado. E kaso a bin ta hunga pa algun luna kaba i awor a yega e momentu pa wak kon ta bai sali afó òf si finalmente e kiebro lo bira definitivo. Niun hende no kier komentá e reunion di awe.

PWFC ta siguiendo e desaroyonan di serka:

WILLEMSTAD – Trahadónan di Refineria Isla di ariba te abou ta preparando pa manda un mensahe kla mañan ku no por hunga ku futuro di Refineria Isla. Informashonnan ku LA PRENSA a haña ta hasi menshon ku ya kaba diferente miembro di gerensia i staf a anunsiá nan partisipashon na e reunion di mañan atardi na Club di Shell. E organisadónan a sigui ku nan proseso di mobilisashon interno serka e kasi 1500 hende ku ta trahando na e Refineria. Banda di esei ta mobilisando tambe e kontratistanan di e kompania.
Miéntras tantu e sindikato PWFC ta siguiendo e desaroyonan di serka. Visepresidente di e sindikato Angelo Meyer a bisa LA PRENSA awe mainta ku e organisadónan di e aktividat di mañan a papia ku un komishon di direktiva di e sindikato riba e evento di mañan. “Nos lo sinta mira. Nos no lo hiba palabra komo direktiva pero nos por bisa un kos si ku nos no ta bai partisipá na nada ku ta fo’i sla”. Meyer a bisa mas aleu ku e sindikato mes tambe ta preparando un aktividat grandi pa duna su opinion riba e desaroyonan na e kompania.
Miéntras tantu LA PRENSA a haña un karta di Movementu Solushon Isla ku ta bisa ku LA PRENSA di 13 ougùstùs 2008 a menshoná ku Norbert George, lider di Partido Democraat, i miembro di Movementu Solushon Isla, ta hibando un kampaña pa sera e refineria. Movementu Solushon Isla a pidi LA PRENSA pa korigí e informashon. E Movementu ta splika ku Norbert George no ta miembro di e direktiva di Movementu Solushon Isla. Ademas, Movementu Solushon Isla no ta hibando un kampaña pa sera Isla. Movementu Solushon Isla ta kampañá i ta na fabor, pa no sigui e kontrakt ku PDVSA despues di aña 2019 i pa PDVSA kuminsá refiná su produktonan segun leinan ambiental internashonal inmediatamente.