ORANJESTAD – Durante e ultimo conferencia di prensa di AVP, nan Mike Eman un biaha mas a trece padilanti e asunto di e deficitnan creciente di AZV. Sinembargo – segun partido MEP - su persona t’asina ignorante cu te ainda e no ta conciente di e hecho cu AZV a ser introduci den forma descabeya door di Gabinete Eman y esaki como cabay di campaña pa eleccion 2001. Tur e consehonan e tempo ey tabata mustra cu e prima di AZV lo mester a bira por lo menos 15 porciento, sinembargo partido AVP a prefera di practica oportunismo politico y a introduci un prima di solamente 7.5%. Te cu awe e pueblo den su totalidad ta sintiendo e consecuencianan directo di e decision descabeya tuma e tempo ey, ya cu desde 2001 te cu awe AZV a conoce solamente deficitnan structura, cu ta suma te na casi 300 miyon florin.
Awe Mike Eman – cu nunca a yega di produci algo drechi pa e pais aki – ta grita tur caminda cu e gobierno actual lo bay introduci un contribucion propio (‘eigen bijdrage’) pa e aseguradonan di AZV y cu esaki lo ta algo inhumano.
Sinembargo partido MEP un biaha mas kier a refresca memoria di Mike Eman di e Protocol cu su ruman Henny Eman, Tico Croes, Ike Posner, Lily Beke, Henny Eman un biaha mas, Mary Wever y Glenbert Croes a firma hunto cu Camara di Comercio, AHATA, ATIA, ARMA y SNBA riba 15 december 2000 cu ta bisa entre otro: “indien de bepaling van de geprognosticeerde jaarlijkse Landsbijdrage door de onder sub f. bedoelde commissie zou moeten leiden tot verhoging van de AZV-premie zullen eerst alternatieven worden onderzocht, zoals de introductie van eigen bijdragen en een eigen risico voor de verzekerden, met het oogmerk de kostenontwikkeling van de AZV en daarme de hoogte van de premie verder te beheersen”.

ORANJESTAD - E campaña di bumpersticker di SETAR ta continua cu hopi éxito. Setar den celebración di su 5 aña como NV a lansa un campaña specialmente pa e automobilistanan di Aruba, clientenan di SETAR cu nan por participa door di plak un sticker di SETAR di Bo Tambe riba nan auto y nan por gana premionan hopi atractivo di nan compania di telecomunicación preferi.
Otro campaña cu ta tur luna ta esun cu tur cliente cu cumpra na SETAR ta ricibi un ticket cu nan por yena y participa pa gana Awg. 300 na yamadanan gratis local of internacional. E ganador di luna di Augustus a resulta di ta sra. Lilian Heidweiller di e districto di Noord cu ta un cliente di SETAR desde cu a introduci e Celularnan Primo riba mercado Arubano. Pronto e bus di SETAR di Bo Tambe ta pasa den otro bario di Aruba regalando premio na tur e casnan ganador cu tin sticker na un lugar bisto poni.
Tur luna y den tur districto tin ganador di automobilistanan y nan ta pasa na diferente Teleshop serca di nan cas pa busca nan premio.
Recientemente algun di e ganadornan di e bumpersticker luna di Augustus a ricibi nan regalo. Nan ta Francisco Solognier y su Señora di e bario di Savaneta y Janine Rodriguez di bario di San Nicolas.
Ganadornan di Bumpersticker di Luna di Juli y Augustus cu no por a pasa busca nan premio por pasa ainda na SETAR Seroe Blanco cu un prueba di identificacion hunto cu nan papelnan di e number di auto durante oranan di trabou. Otro numbernan ganador cu ainda falta pa busca nan premionan ta: Autonan Ganador den luna di Augustus: A-12926,A-11543 y A-26005. Autonan Ganador den luna di July ainda falta di pasa pa nan premio ta: A-37402 y A-41261.

ORANJESTAD - Minister drs. Marisol Lopez-Tromp ta informa cu Scol Basico Kudawecha lo habri Dialuna 25 Augustus 2008. Na e momento aki e compania di construccion ta haciendo e ultimo detayenan na e construccion pa entrega e trabao. Alaves Departamento di Enseñansa ta percura pa instala muebles y e maestronan ta preparando nan klas y materianan.
E scol basico na Kudawecha lo ta situa net patras di e veld di Kudawecha. E scol basico lo conta standard cu 12 klas y un gymzaal. E inversion di construccion di e scol aki ta di 6.45 miyon florin.
Gobierno a opta pa construi un scol nobo na Noord a base cu e poblacion den e distrito di Noord a crece hopi den ultimo añanan y e scol basico publico di Washington na Noord a surpasa su capacidad maximo.
E scol ta conta ademas cu un prisma lokaal, remedial teacher lokaal, computer lokaal y un “dokterskamer” cual ta un lokaal multifuncional pa entre otro trahadornan social di e scol.
E prisma lokaal ta pa yuda esnan cu mester fortificacion den e idioma Hulandes. E remedial teacher lokaal ta un lokaal den cual ta duna guia special pa alumnonan cu tin mester di dje. Scol basico Kudawecha lo conta cu varios klasse assistenten pa yuda e maestro y alumnonan.
E scol lo conta tambe cu un biblioteca y ademas tin tres rampa pa esnan cu den rolstoel tin acceso pa e lokaalnan. Desde 25 di Augustus proximo tambe lo tin Traimerdia na scol basico Kudawecha, cual ta pa guia e muchanan den ora di merdia despues di scol.

Esaki lo yuda e dunador di trabou y e buscador di trabou

ORANJESTAD- Manera ta conoci, un di e objetivonan di Departamento di Labor y Investigacion ta pa trece ekilibrio den e mercado laboral. Pa loke ta trata e objetivo aki Departamento di Labor y Investigacion a cuminsa cu un investigacion pa asina inventarisa e posibilidad pa aumenta e oferta di e mercado laboral door di promove e participacion di cierto gruponan di enfoke den e proceso laboral.
Departamento di Labor y Investigacion den su plan di maneho a pone direccion na un maneho sostenibel, efectivo y integral cu tin tres meta:
1. Promove un balansa y un structura diverso den e mercado laboral;
2. Mehora e condicionnan di trabou;
3. Pa upgrade na un demanda specifico y un miho afiliacion entre enseñansa y e mercado laboral.
Un manera pa logra esaki ta pa promove e forza laboral door di e participacion laboral di desempleadonan- y esnan economicamente inactivo. Departamento di Labor y Investigacion kier haña un bista di nos populacion local cu ta economicamente inactivo of esnan activo buscando trabou sea fulltime como tambe parttime. For di analysis hasi Departamento di Labor y Investigacion ta deduci cu e grupo di enfoce aki ta consisti mas di hobennan y hende muhe.
Pa logra e meta aki, Departamento di Labor y Investigacion a lanza un projecto cu ta encera registracion di tur esnan desemplea of economicamente inactivo. Tambe lo forma parti di e projecto su totalidad, tur esnan cu den e ultimo anja aki a inscribi na Jobcenter na Departamento di Labor y Investigacion. For di luna di Juli Departamento di Labor y Investigacion ta asercando telefonicamente tur esnan cu a yega di inscribi nan mes como buscadornan di trabao na Departamento di Labor y Investigacion pa asina deduci nan interes den haya un trabao sea fulltime of parttime of esnan cu no por traha pa un of otro motibo. Departamento di Labor y Investigacion tambe ta asercando diferente dunadornan di trabao pa medio di un encuesta pa asina nan por duna un bista di nan nesecidad pa parttimers den nan compania.

ORANJESTAD - E Ordenanza pa Establecimento di Empresa (VvB) ta un ley di permiso pa negoshi y ta sirbi como instrumento importante pa maneha e desaroyo economico. Un permiso ta rekeri ora di lanta un negoshi bao di un sociedad anonima (naamloze vennootschap), irrespecto si e comerciante ta Arubiano o no. Solamente e persona stranhero mester di un permiso ora e kier lanta un “eenmanszaak” of kier fungi como “director” di un sociedad anonimo.
Via di e ordenanza ta percura pa un balance entre proteccion di e empresario local y e participacion di e inversionista stranhero na e progreso economico di Aruba. A base di reglanan obhetivo di tanto Departamento di Asuntonan Economico como di Camara di Comercio y Industria (KvK) ta evalua cada peticion pa
permiso individualmente si tin merito pa duna e permiso o no, y si tin cu stipula condicion(nan) na e permiso.
No tur peticionario lo ricibi un decision positivo locual ta conduci cu algun di nan cu no ta naci na Aruba y cu no tin nacionalidad Hulandes ta haci uzo di un “front” pa lanta su negoshi.
Esaki ta conoci como e fenomeno “stromanschap”, pa cual Camara di Comercio y Industria (KvK) ta adverti añanan largo caba y awor a constata algun caso reciente.
Un “stroman” ta un persona of dunador di servicio profesional local cu mayoria di vez ta worde aserca pa un stranhero pa lanta un negoshi na su nomber.
Usualmente e “stroman” no ta inverti placa den e negoshi, pero legalmente si ta carga responsabilidad total pa tur acto di e empresa den su funcion sea como doño o director di e negoshi. Hopi bes e stroman no ta directamente

 

WILLEMSTAD – Nos atleta nashonal Churandy Martina a presentá su kredensialnan awe mainta komo un di e faboritonan di 100 meter na Weganan Olímpiko di Beijing. E oloshi a para na 9.99 sekònde, un rèkòrt personal pa Churandy i rèkòrt antiano nobo. E mihó tempu sinembargo tabata pa Usain Bolt di Jamaica ku a marka 9.92 sekònde den e preliminarnan. Churandy a mustra masha optimismo despues di e enkuentro di awe i a bisa ku el a bai Beijing pa gana. Mañan e ta den e semi final i nos no tin duda ku e lo ta den e final mañan anochi den Stadion Nashonal na Beijing. Nos tin mas detaye di e esfuersonan di medaya di Churandy Martina den nos edishon di awe. (foto EPA)

WILLEMSTAD – Mester registrá e dama ku a muri ayera den un aksidente kaminda un vehíkulo a kai den laman na Caracasbaai, komo un morto di tráfiko? Te na e momentunan akí no tin niun motibu pa keda sin hasi esaki. Ta trata di un vehíkulo ku tabata koriendo i ku pa motibunan deskonosí a kai na laman.
E aksidente di ayera kousa morto di un dama kolombiano ku polis no a identifiká ainda. Tin indikashon ku e tabatin apénas tres dia na Kòrsou. E tabata huntu ku un otro dama latino mas i e shofùr E.M. di 59 aña di edat. Promé ku e outo a kai den laman e dama ku tabata sintá patras a logra bula for di e vehíkulo. E shofùr tambe a trata na sali pero a resultá tòg den laman kaminda e mes a logra sali. E dama ku a hoga tabata sintá dilanti i no a logra sali na tempu for di e vehíkulo.
Pa kontestá e pregunta si mester registrá e víktima komo morto di tráfiko, mester tene na kuenta ku e aksidente a tuma lugá riba un pir di kua ta konosí ku ta tereno di gobièrnu, pues kaminda públiko. No opstante esaki por spera un diskushon si e pir ta kaminda públiko sí òf nò. Den pasado tabatin un aksidente ku dos motosaikel riba e tereno di Koraal Tabak i a registrá e víktimanan komo morto di tráfiko, ounke ku e suseso a tuma lugá riba un tereno privá. Na Ulanda ta konosí, ku den aksidentenan kaminda un mayor a bèk su outo pa sali for di kurá i a heridá su yu mortalmente, ku ta registrá e víktima komo morto di tráfiko.

Skina di Sorti, awe djabièrnè 15 di ougùstùs di 2008, ta kuminsá ku deseá tur hende un bon dia. Komo studioso di e fenómeno “gobernashon polítiko” e kuadro for di kual mi ta aserka prosesonan di gobernashon (den esei e akshonamentu polítiko i gubernamental) ta diferensia for di esun ku spesialmente aktornan polítiko i nan respektivo fanatikada ta kontemplá i relatá nan akshonnan. Dor di un elevashon di makiavelismo (kreamentu di persepshon falsu pa intenshon real por pasa inatvertí) na patronchi kultural, hopi konsepto a haña un interpretashon ku mester wòrdu konsiderá un blasfemia.
****
For di un trabou sientífiko titulá “Politieke filosofie en westerse democratie” di S.W. Couwenberg, mi ke trese algun parti pa sirbi komo kuadro di reflekshon i kontemplashon di algun asuntu ku a bini ta sosodé den práktika polítiko lokal. Pa buena marcha ta bon pa komprondé ku e echo ku ta trata di un proseso di deterioro universal no ta kita ku e ta robes i ku mester kontené pa evitá ku bo ta haña bo ku tirania moderno.
****
E promé parti ku mi ke sita ta bisa: ”In westerse democratieën is er in principe wel sprake van een open competitie bij de verdeling van publieke functies op allerlei terrein. Maar tegelijk is er een sterke neiging tot beperking van die competitie door de vorming van netwerken en kartels om zodoende de belangrijkste publieke functies te reserveren voor degenen die tot het eigen politieke netwerk behoren”.

MOSKU, Rusia, - Rusia awe den tèrminonan fuerte a kritiká e akuerdo alkansá ayera entre Merka i Polonia pa ponementu di misilnan merikano di tipo Patriot n’e pais europeo aki.
“E kontenido di e akuerdo i kon lihé ámbos parti a sera e akuerdo ta pèrmití konkluí ku e proyekto realmente ta dirigí kontra Rusia!”, un bosero di e Ministerio di Relashonnan Eksterior na Mosku a bisa agensia di notisia Interfax.
Rusia, e bosero a agregá, no ta mira kon e eskudo antimisil ku Merka ta planiando instalá den sentro di Europa por ta “relashoná ku un menasa di Iran”.
Vários diputado ruso ta sospechá ku e desishon di Merka i Polonia di firma e akuerdo ta relashoná ku e konflikto na sùit di Cáucaso.
Segun opinion di presidente di e Komishon di Polítika Eksterior di Parlamentu ruso, Konstantin Kossachiov, e akuerdo no ta kontribuí pa mehorá seguridat na Europa, sino ta sirbi pa oumentá e tenshonnan den e relashonnan entre Rusia i Merka.
E echo di ku Washington i Varsovia a duna e akuerdo di konosé ayera posiblemente tin di aber ku e guera na Georgia, Kossachiov a konsiderá.
Den e último dianan, tantu Merka komo Polonia severamente a kritiká Rusia pa e guera kontra Georgia.
Kossachiov a suprayá ku ta sigui sin eksistí pruebanan di un menasa konkreto di parti di Iran òf otro paisnan, dor di referí n’e konstantemente argumento prinsipal di Merka pa hustifiká despliegue di un eskudo antimisil na Polonia i Repúblika Cheka.

WILLEMSTAD – Minister di Tráfiko i Telekomunikashon di Antia ingeniero Maurice Adriaens ayera a firma na Berlin un tratado di aviashon ku Alemania pa asina stimulá mas turismo entre Alemania i Antia. E firmamentu aki a tuma lugá na e ministerio di Relashonnan Eksterior di Alemania na Berlin. E Sekretario di Estado pa asuntunan di Tráfiko i Komunikashon aleman, Tieman tabata esun enkargá pa representá Alemania na e seremonia. E tratado aki ta pèrmití pa tin dos buelo semanal for di Alemania i igualmente dos for di Antia. Semper ta eksistí e posibilidat ku lo por amplia esaki. Lokual ta importante tambe den e tratado aki, ta pèrmití pa otro kompanianan di aviashon for di otro paisnan den Europa bula pa Antia via di Alemania.
Minister Adriaens ta sumamente satisfecho ku e logro aki. “Awor ta na e ofisinanan di turismo di kada teritorio insular pa kuminsá hasi e trabounan nesesario pa probechá di e merkado aleman. E tratado nobo aki ta un paso importante pa mundu di turismo na Antia,” asina e minister a bisa for di Berlin despues di e firmamentu. E minister tin speransa ku entrante zomer di 2009, un di e kompanianan di aviashon aleman, sea TUIFly of Condor lo hasi uso di e derechi aki pa por bula for di un aeropuerto aleman pa Antia. Anteriormente, e mandatario antiano a firma un tratado similar ku Bèlgika.
Despues di e seremonia na Berlin, e minister antiano a splika den un entrevista ku Radio Nederland Wereldomroep ku e tratado ku Alemania tin diferente benefisio pa e islanan di Antia. “No solamente t’asina ku kompanianan di Alemania por bula pa Antia. Kompanianan ku ta usa suela aleman a baha i hasi eskala tambe por realisá buelo pa Antia,” asina Adriaens a duna di konosé.

BEIJING – Ora rei Midas a bai tira un kabes, China a drenta den su kashi di oro.
E gigante asiátiko a probechá ku Michael Phelps no a efektuá niun final i ku sinku medaya di oro, inkluso su promé den landamentu, a alehá su mes mas di Merka riba tabla di medaya.
E atletanan chines a kologá sinku di e 15 medaya ku a repartí djaweps riba e di seis dia di e Olimpiada. Dos final den kanoa i kayak a keda suspendé pa awa, ku a obligá pa suspendé o retrasá otro kompetensianan na airu liber.
Cuba a laga tende su himno ku e triunfo di Mijaín Lopez den 120 kilo di lucha grekoromano, e promé latino ku a sa di subi mas haltu riba podio, miéntras ku Alemania a bolbe dominá den evento di kabai i a kue su di tres oro den e deporte ei, e biaha aki den kombinashon pa ekipo.
Pero e dia sin duda tabata di China mes, kua ku su kinteto di kampionnan arko i flecha, tiru, gimnasia, yudo i landamentu awor tin 22 oro, 12 mas ku Merka, repartí respektivamente den 22-8-5 kontra 109-15.
Alemania ta di tres ku 7 otro 7-2-3, sigui pa Nort Korea ku 6-7-3 i Italia 6-4-3.
Sin Phelps den akshon, Merka a sede pisina olímpiko na kuater pais. E chines Liu Zige a gana den 200m mariposa, e franses Alain Bernard 100m liber, e hapones Kosuke Kitajima 200m pechu i Oustralia den relevo 4x200 liber femenino.
Zhang Juan a gana oro pa China den arko i flecha individual femenino; su kompatriota Yang Wei a imit’é den ehersisio kombiná individual di gimnasia maskulino; Du Li den rifel di tres posishon den tiru femenino i Yanka Xiuli a gana den 78kilo di yudo femenino. Den e final aki e chines a derotá e kubano Yalennis Castillo (plata).

BEIJING – Federashon Internashonal di Hisamentu di Peso a habri afó kontra e máksimo dirigente di Agensia Mundial Anti doping, kende a proponé pa e deporte keda kitá di futuro weganan olímpiko a ménos ku nan para e drogamentu. John Fahey a bisa ku peso i siklismo, ku un registro grandi di skandalnan di doping, ta kore rísiko di keda ekskluí di e programa di kompetensia, si e hasidónan di trampa keda”.
Den un komunikado federashon internashonal a tilda e komentarionan ei komo “den ekstremonan lamentabel”.
Henter e tim di peso di Bulgaria ku 11 pesista, no por a bini Beijing despues di a tèst positivo pa steroid, i 11 griego tambe a keda ekskluí ora nan a ser gará den kòntròlnan previo. Diferente pesista a keda sorprendé den e weganan di 200 i 2004.
Presidente di Federashon, Tamas Ajan, alabes miembro di direktiva di AMA, a deklará ku Fahey no tin poder pa bisa kua ta e deportenan ku mester keda for di e programa olímpiko
Ajan a enfatisá ku federashon ta aplikandoman fuerte, ora el a bisa ku e violadónan griego i búlgaro a keda sorprendé den tèstnan hasí pa e federashon.

 

BEIJING – Michael Phelps tin un título nobo.
“E ta e símbolo di e weganan”, asina e presidente di KOI, Jacques Rogge a bisa riba e ekstraordinario landadó merikano ku a gana un sèt di medaya di oro kaba ku un sèt di rekòrtnan mundial.
Phelps djarason a gana su di 10 i 11 medaya di oro den su karera olímpiko, a bira e atleta ku mas medaya di oro di tur tempu.
Phelps ta na kaminda tambe pa trata di kibra e rekòrt di Mark Spitz di shete medaya di oro den mesun olimpiada
“E meta di tin mas medaya ku Spitz ta algu hopi importante”, Rogge a bisa na AP. “I e ta mantené e atenshon di públiko. E ta un gran atleta”.
Rogge a inkluí Phelps den un lista kòrtiku di leyendanan olímpiko.
“E Weganan Olímpiko ta yena di super héroenan. Tin Jesse Owens, Paavo Nurmi, Carl Lewis i awor Phelps. I ta esei ta loke nos tin mester”, el a afirmá.
Di otro banda, Rogge no a duna importante na e debate pa e doblahe di un kansion den e seremonia inougural di e Weganan, loke el a konsiderá ku tabata algu “sin importansia”.
E organisadónan lokal a enfrentá krítikanan ora nan a haña sa ku un mucha muhé di nuebe aña kende a aparesé kantando un kansion durante e seremonia, di bèrdat tabata ei na nòmber di un otro, pasobra e bos tabata di un otro mucha muhé.

WILLEMSTAD – Fin di ougùstùs Kòrsou lo konosé un evento nobo bou di e nòmber di “The Sand Event”. Kòrsou ta un isla rondoná pa santu, p’esei e idea pa presentá un festival kaminda lo traha eskulturanan di santu, piesanan grandi di mas ku 2 meter largu. E evento aki lo dura 4 dia i lo tuma lugá na Megapir. Lo tin vários banda i entretenimentu pa mucha.
Pa esnan interesá ta ofresé oportunidat pa bende sierto artíkulonan durante di e evento aki, ménos paña i bijouterie. Pa mas informashon 517-2737.

WILLEMSTAD – Servisio di Salubridat Públiko di Kòrsou GGD konhuntamente ku 25 organisashon den e sektor di salubridat ta invitá habitantenan di Otrobanda i bisindario pa bishitá e Bùs pa Promoshon di Salú kual lo ta stashoná dianan 19, 20 i 21 di ougùstùs di 9or di mainta te ku 4or di atardi na Colon riba Roodeweg.
E organisashonnan ku e siman aki ta partisipá ta:
Djamars 19 di ougùstùs :
09:00-12:00: Curaçaose Hartstichting, Skuchami,
12:00-16:00: St. Witgele Kruis, GGD
Djarason 20 di ougùstùs:
09:00-12:00: Fundashon Lechi Mama
Fundashon Duna Lus
12:00-16:00: Famia Planiá
Fundashon Pro Bista
Djaweps 21 di ougùstùs:
09:00-12:00: Prinses Wilhelmina Fonds
Dietista (Ban Bario Bèk).
12:00-16:00: GGD i Curreuma
Durante tur e tres dianan por inskribí riba e bùs pa e proyekto “Kana pa bo Gana den bo Bario”. Kanando 30 minüt durante 5 dia den siman bo ta mehorá bo salú, kombinando esaki ku un alimentashon salú i balansa.

WILLEMSTAD - Stimul-IT konsiente di e importansia di uso i konosementu di kòmpiuter i Internet ta dediká kada 3 luna na un tópiko diferente. Ademas e grupo ku ta dirigí e luna na dje tambe ta diferente, di manera ku hopi sektor di komunidat ta bin na remarke pa partisipá i siña mas di uso di kòmpiuter i Internet.
Durante luna di ougùstùs te ku sèptèmber Stimul-IT ta organisá un seri di Charla dirigí riba diferente fishi den nos komunidat. Por ehèmpel, barberia, "nails studio", kapsalon, agrikultor etc. Durante di e variedat di charlanan aki kada grupo ta bai siña e importansia di uso i konosementu di kòmpiuter i Internet, kua programa tin pa e sektor na turno i hopi mas. Nan ta bira un seri di charla super aktivo.
E promé charla a tuma lugá 14 di ougùstùs ku enfoke riba “ kòmpiuter den negoshi di Beyesa (kabei,masashi, uña etc.” Un total di 35 persona a partisipá na e charla aki i a keda satisfecho. E charla ta tin un karakter interaktivo ku a sòru pa un anochi eksitoso. Hopi tabata e preguntanan ku e partisipantenan, ku ta sea empresario o ta traha den negoshi di beyesa ta tin pa e oradó di e anochi, sr. Ricardo Lochan. Sr. Lochan ta Kordinadó di Proyekto na Stimul-IT vèrsá riba e parti tékniko di Teknologia di informashon i komunikashon (ICT) i a duna un presentashon bon balansá. Durante di e parti di introdukshon el a para ketu na e importansia di konosementu i uso general di kòmpiuter i Internet. Mas leu den su presentashon el a trata diferente programanan (software) ku ta importante pa e tipo di negoshinan pa ken e charla ta dirigí. Tambe sr. Lochan a duna splikashon ku ehèmpelnan di kosnan esensial den negoshi manera: Maneho di Inventario, Maneho di relashon ku kliente i atministrashon. E tres puntonan aki ta hopi esensial, pero alabes usando teknologia moderno pa hasi e trabounan aki por ta hopi fásil i efisiente, sr. Lochan a mustra e partisipantenan esaki tambe.

WILLEMSTAD - Den e matutino Èxtra di djaweps, 14 di ougùstùs a sali un notisia ku e munisipio di Amsterdam ta inskribí matrimonionan polígamo tambe. I ku e partido VVD ta kontra di esaki, pasobra e tipo di matrimonionan aki ta ilegal na Ulanda. E situashon aki ta duna minister Leeflang rason ora el a argumentá, ku Ulanda ke imponé matrimonio homoseksual riba nos, maske ku esaki ta kontra di nos leinan aki na Antia i ora e wega bòltu nan ta skonde tras di nan leinan pa prohibí algu.
Awor e wega a bai rònt! E ‘Kaha di Pandora’ a habri hanchu hanchu! Ta premirá ku tur tipo di ‘matrimonio’ lo bira posibel na Ulanda i si nos no para duru aki na Antia, esaki lo ta e kaso serka nos tambe. E kos ta kuminsá dor di pone pia den porta pa medio di e maldito inskripshon di e matrimonio, ku e preteksto ku esaki ta algu atministrativo. E siguiente paso ta, ku for di e inskripshon e pareha por derivá derechonan legal tambe i e paso final ta legalisashon di e matrimonio mes. Asina el a bai na Ulanda i si nos no paga tinu, asina e lo sosodé na Antia tambe.
Iglesia Grasia Abundante ta kompletamente di akuerdo ku minister Omayra Leeflang ku ulandesnan ta purba di fòrsa nan moralidat degenerá riba nos. Pa logra esaki nan ta kana e kaminda di lei i verediktonan di wes, kaminda nan sa ku nan lo haña sosten debí na dominio di e filosofia di bida humanista den e gremionan ei.. Sin ningun eskrúpulo polítikonan ulandes, e minoria homoseksual ulandes i nan lòbi polítiko ta keda primi nan agènda den partinan di Reino ku no ta deseá esaki.

GURIBALDI
Johan Guillermo
Mihó konosí komo Janchi
A laga atras su yunan Ibi, Siegfried, Judith, Ruthsella, Meredith Guribaldi, Linchy Meuleman-Guribaldi, Eric Guribaldi i Karmen Gumbs, Gerry Guribaldi. Akto di entiero ta djadumingu 17 ougùstùs 3.30or for di misa Sta. Maria pa santana Sta. Maria. Bishita 1or.

SINT JAGO
Robin Henry Rufino
Mihó konosí komo Bench
A laga atras su kasá Milva Sint Jago-Schoobaar, yunan Angelo Sint Jago i Neyca Sint Jago-Yung, Luiggy, sherman, Kamilah Sint Jago. Akto di entiero ta djadumingu 17 ougùstùs for di Bottelier pa santana Berg Altena.

CAMELIA
Vivian Paulina
Mihó konosí komo Vivi
A laga atras su mama Madeline Floranus, yunan O’brein i Daisy Rosaria-Langenveld, Annette Camelia, Christefer Camelia, rumannan Signa, Ruthline, Ali, Wendel, eugene Camelia, Mafalda Camelia i Harri Bennick, Eithel Camelia i kompañera, Natasha Camelia i Vernel Kleinmoedig. Kremashon ta djasabra 16 ougùstùs 10or na Ulanda.

WILLEMS-LIBERIA
Maria
Mihó konosí komo Maria gordo
A laga atras su yunan Frida Willems-Weever, Sixto, Lourdes, Genaro, Wilfred, Olivia, Merelyn willems, Norma Alment, Felix i Stella Willems, Eduardo i Lucia Willems, Altagracia i Robby Buschabaum, Popy i Puk Oosthoek, Rose Maria i Roel Monpellier. Akto di entiero ta djaluna 18 ougùstùs 4or for di El Tributo pa santana Jandoret. Bishita 1or. Promé ku entiero tin un s.s. di misa na misa Jandoret.

LONDON / LAS VEGAS, - Madonna i Michael Jackson ta selebrá mei siglo e luna aki, pero miéntras e dama kantante ta yega 50 aña den forma físiko perfekto i artístiko, e rekòrdá “Rei di Pòp” parse tin ménos motibu pa festehá.
Madonna Louise Ciccone a nase 16 di ougùstùs 1958 na Michigan (nort) i Michael Joseph Jackson 13 dia despues i 450 kilometer ost, presisamente na Indiana.
Meimei di añanan 1980, ámbos a bira Rei di e temanan mas popular na mundu kompletu: Jackson ku e históriko “Thriller” (mas ku 50 mion álbùm bendé) i Madonna danki na “Like a Virgin”, un meskla di provokashon ku sekso i religion ku a bende 21 mion kopia.
Ounke Jackson a konosé éksito for di mucha huntu ku su rumannan, tantu e komo Madonna a benefisiá di e kadena musikal MTV, ku ta emití tur nan videonan di forma kontinuo, Robert Thompson, profesor di komunikashon oudiovisual i eksperto den kultura popular di Syracuse University (ost) a rekòrdá.
“Pa Michael Jackson, komo músiko, bailarin i artista riba esena, ta’tin 10 bia mas talento ku Madonna. E ta un persona ku ta rivalisá ku Sinatra, Bing Crosby i Elvis Presley”, Thompson a añadí.
Pero ku su retiro kompletu di skandalnan, Madonna ta esun ku a logra keda.
Geoff Mayfield, responsabel di e klasifikashonnan di e publikashon musikal profeshonal Billboard a bisa: “Semper por spera sorpresa di Madonna”.

Lorito ta yama tur hende un bonbiní kordial riba e djabièrnè aki. Ta un dia di sentimentu miksto. Di un banda tin e dushi sentimentu rondó di Churandy ku nos a mira ku a destaká masha aya na Beijing, di otro banda nos ta tristu pa loke ta pasando aki serka nos mes.
*********
Un di e kosnan ku a kousa tristesa ta e manera ku a atendé e kaso na Dòk. Ta hasiendo inhustisia ku hende sin ku esei tabata nesesario. Laga nos pone bon kla atrobe, ku e inhustisia ta sinta den e hecho, ku ta pidi tur esnan interesá pa solisitá. Despues ku proseso kaba i yega na un konklushon, esun ku solisitá i sali mihó ta bira un paria kompleto. Lorito no ta kere ku esei mester ta e kaso. Nos ta bisa semper ku mester kòrda ku bida tin su buèltanan pa tur hende!
*********
Nos lo bin bèk ampliamente riba e kaso un biaha mas, pa hinka tur kos den konteksto. Keda pendiente, pasobra nos tin mas detaye ku ta desenmaskará tur kos. Nos a mira tambe un remitido den korant, ku ta trese bèrdat kompletamente. E korant no a buska drechi i manda kos bai pèrdè! Un opinion di un remitente tambe mester ta basa riba basenan verídiko i no riba konhetura, manera nos a bira. Che! Anto nos ta kere ku si bo ta sufisiente machu i bo si tin e datonan konkreto, di kon skonde tras di un nòmber inventá?
*********
Un otro kaso ku tin nos disgustá un siman kaba, ta e hecho ku nos ta buskando opinion di Dienst Arbeidszorg pa un komentario riba e kaso di djasabra siman pasá. Diputado no ta hisa telefon. E direktor, un tal sra. Van der Biezen tabata den reunion djaluna, djamars, djarason, djaweps i awe. E no tabatin ni sikiera e desensia pa yama bèk. Sluis ku ta einan komo hefe di e departamentu a bai skonde tras di un sirkulario ku personal a haña ku ta hefe so por papia! Asina nos ta sigui chambuká den e pais aki.