WILLEMSTAD - Tur hende a koinsidí awe ku Churandy Martina a hasi un trabou sobresaliente den e disiplina di 100 meter na Weganan Olímpiko. Churandy a kibra tantu e rèkòrt nashonal, komo su propio tempu ku un marka di 9.93 sekònde. Por poko Churandy a kai den medaya si no tabata pa un kuminsamentu un poko lento na e evento ku a konta ku asistensia di mas ku 91 mil fanátiko den Stadion Nashonal di Beijing. Churandy a laga grandinan su tras manera Asafa Powell i Tyson Gay, pero mester a mira kon Ushain Bolt (Jamaica) a bai ku e medaya di oro den un rèkòrt mundial impreshonante. Pueblo di Kòrsou (Antia) por ta hopi orguyoso ku e presentashon magnífiko di Churandy. Un bonbiní kaluroso ta na su lugá. Churandy pabien, Gobièrnu ku a yuda pabien, asistentenan pabien i pueblo kompleto pabien! Nos tin mas detaye den nos edishon di awe (foto AP).

Skina di Sorti, awe djasabra 16 di ougùstùs di 2008, ta kuminsá ku deseá tur hende un bon dia. Den polítika tin algun kos ku bo tin di siña lihé si bo ke profilá komo progresivo, kombatiente i inovador. Un di nan ta ku bo akshonamentu no mester krea e persepshon di un intento pa trese kambio den struktura di poder denter di partido. Na momentu ku e persepshon ei visualisá serka esnan den posishon di poder, bo a hinka bo mes den un lucha di poder ku pa definishon konosé pèrdèdó i ganadó. Lucha di poder no konosé otro resultado. E pèrdèdó tin ku dobla rabu i move.
****
Ta un realidat universal den práktika polítiko. Apesar ku partidonan polítiko ta un instrumento den kuadro di e proseso di gobernashon demokrátiko, e organisashon mes ta unu ku ta funshoná mas tantu segun e modelo klásiko di liña di outoridat, señoridat i struktura di “netwerk”. Kaminda un partido su posishon di poder ta determiná pa forsa elektoral di e lider di tendensia karismátiko, e aspekto di struktura di “netwerk” ta haña mas forsa. Pa buena marcha mi ke ripití ku ta un fenómeno universal.
****
Laga sita atrobe for di “Politieke filosofie en westerse democratie” di S.W. Couwenberg. “De morele imperfectie van de mens, zijn neiging tot het kwade, manifesteert zich in het bijzonder zodra machtsposities in het geding zijn. Macht werkt als een harddrug. Men raakt er meer aan verslaafd naarmate men er meer en langer van proeft. Ook een democratisch bestel is in de praktijk geen afdoende remedie tegen dit alles en ontaardt eveneens in meer of mindere mate in politieke corruptie en feodalisering van de staatsmacht”.

BANGOR, MAINE – E selekshon di Florida, East Boynton Beach, Florida ayera a kometé seis eror kontra di e selekshon di Kòrsou den e Seri Mundial di Senior League, pa Kòrsou wanta duru i logra un triunfo di 8o-7.
Despues di tabata ganá 1-0 riba honron di Dursley Ignacio, den di dos ining un seri di toke, kombiná ku tres hit i tres eror di Florida, Kòrsou a amplia nan bentaha na 6-0.
Jurickson Profar i Curtney Doran, a permití te ku e di seis innig solamente un hit i tabatin un bentaha di 8-3.
Pero den bòm di shete ining Florida ta anotá kuater kareda, riba kuater hit, un “hit by pitch” i un eror, pa pone e skor 8-7.
Mènedjer Roque Bernadina ku a saka Profar pa motibu di un brasa un tiki kansá a trese e mesun picher bèk pa terminá e wega.
Despues di wega mènedjer Bernadina a bisa ku awe nan a usa tur kos, toke di bala, sakrifisio i tur tabatin resultado.
“Den di sinku ining nos a masashi su brasa i esei a yuda ku e por a bini bèk di relevo”, asina Bernadina a bisa.
“Tabatin un rumor ta kore ku despues di e wega di djaweps vários hungadó a biaha pa Williamsport, Pa., pa mira e Seri Mundial di Little League. Pero mènedjer Bernadina a bisa: ”E kos ei no ta bèrdat, ta un rumor, tur mucha a keda aki i e kos ei ta keda un rumor”.
Awe Kòrsou ta enfrentá Upper Deerfield N.J. den e final.

When you handle yourself, use your head; when you handle others, use your heart! (Donna Reed)

Whom can we trust? So often misery is explained by the words, “But I trusted them!” Ultimately the only person we can trust is ourselves. It may take some time to develop a solid connection with our intuition, but it is worth it. It forms the basis of a true, lasting and reliable trust. Over time we can use our judgment to know whether someone is being truthful with us or lying to cover their own shortcomings. We have to leave the world a better place than it was when we arrived in it. If you want to know the nature of a person place him or her in authority. The truth will finally come out. For when the snow melts, you can see the dark earth. That is where the truth is and there is no snow to cover it. The truth shall make you free, but some of us have their hands and feet tied, because of their stubbornness and cannot be free. Any one climbing a ladder must start at the bottom, but if they skip some steps, when they reach the top they will falter and land on their back at the bottom, never to recuperate.
The nail that sticks up, with time gets hammered down. Forget goals, instead value the process, and enjoy the journey. You will meet your enemies on the road side, for they cannot see, they are blind with false pride.
Take a lesson from the river as it twists its way around the boulders, hills and mountains, winding its way to the sea. The goal is the sea. The river does not “demand” to travel in a straight line, because life like the river has curves and bumps to the very end. Have faith and add hope, believing and knowing that something will get better. St. Paul said “Faith without works is dead!”

WILLEMSTAD – Mas ku 100 hóben antiano a wòrdu yamá pa servisio militar, pero únikamente 30 a keda selektá. Pa e minister di Asuntunan Konstitushonal, Roland Duncan tin un problema ku e situashon aktual, pa loke ta e proseso aki. E ta kere ku e kambionan konstitushonal ku ta tumando lugá, kada isla mester bai tuma un desishon al respekto.
“No tin un duda ku tin un problema ku servisio militar,” asina Duncan a duna di konosé durante un konferensha di prensa na St. Maarten ayera. El a duna komo ehèmpel, ku tur e 16 hóbennan di St. Maarten ku a wòrdu yamá pa drenta servisio militar a keda rechasá.
Segun Duncan, e problema ta sinta den e proseso di selekshon i esaki ta kontra di lei pa e manera ku e ta keda hasí pa Marina Ulandes.
E minister ta kere, ku aktualmente ta skohiendo i prinsipalmente esnan di St. Maarten ta wòrdu mandá bèk, pasobra nan no por papia ni papiamentu ni ulandes. Tambe kontrali na su instrukshon, ta hasiendo tèstnan físiko, promé ku drenta e proseso di servisio militar.
E problema ta sintá den e hecho, ku ta rechasando un gran kantidat di hóben, pa motibu di un areglo ku Ulanda ku nan tin ku paga dos biaha pa aña pa 75 hóben partisipá den e asina yamá ‘Toekomst Antilliaanse Militie’ (TAM). Pasobra Gobièrnu Sentral no ta paga kasi nada pa servisio militar, Ulanda ta tene e kantidat di hóbennan abou, di akuerdo ku Duncan.

Beijing – E presidente di e Komité Olímpiko di e Weganan Olímpiko di Londres 2012, no ta impreshoná ku loke el a mira awor na Beijing.
“Den liñanan general, hopi bon”, tabata e veredikto di Sebastian Coe, e direktor di e komité organisadó di Londres 2012el.
“Nada no a sorprendémi”, a deklará. “Nos tabata sa ku e instalashonnan lo tabata fenomenal i ku e organisashon lo ta intachabel. Mi ta tistigu di un siudat ku a bisti su mes di gala pa e Weganan. E siudat a trese serka dje e espektákulo mas impreshonante di e planeta”.
E espektakular seremonia di apertura di Beijing, mas e magnitut di e Weganan na China, lo ta esnan di mas difísil pa igualá, pero Coe a señalá ku e kapital ingles tambe lo organisá un sèt di weganan memorabel.
“Nos no ta impreshoná pa loke nos a mira”, el a señalá ora el a rekordá ku Barcelona i Sydney tambe a laga un rekuerdo notabel.
Londres tin na Beijing 100 opservador atento riba tur e fasetanan di organisashon.

--
Bush a bisa ku e weganan a yena su espektativanan

BEIJING – E presidente di Merka , George Bush a bisa ku e Weganan Olímpiko di Beijing a yena su espektativanan i a resultá den un “eksperensia riku ku hamas lo e lubidá.
“Tur kos ta real”, Bush a bisa despues di a keda un siman na Asia. “Esei ta bon dje weganan. Tabata hopi dibertido”.

BEIJING – Merka a dominá den pisina i China tabata invensibel den hisamentu di peso.
Michael Phelps a bini bèk den awa pa sigui skibi su nòmber de buki di rekòrtnan i Merka a gana 4 medaya di oro djabièrnè, tres di nan den landamentu, ku no a yega pa kòrta distansia ku China, ku a kue su di shete i di ocho ora den hisamentu di peso i a presentá un kuarteto di kampionnan.
Di e 18 medaya di oro den kompetensia e di shete dia, chines- i merikanonan a parti ocho den nan dos. Ukrania i Eslovakia a gana dos kada un, i Polonia, Fransia, Inglatera, Etiopia, Hapon i Alemania a tuma e otronan.
China a keda na kabes di tabla ku 26 di oro, 12 mas ku Merka. Alemania ta di tres ku 8 oro, djei Sur Korea, Italia i Hapon ku 6 kada un
Den asuntu di total, Merka tin 46 (14-13-19), China ku 41 (26-9-6) i Oustralia ku 20 (5-7-8).
E aktuashon di Phelps pa historia ya no ta sorpresa i kasi a bira un rutina: e tribon di 23 aña a kue su di seis oro, e biaha aki den 200m kombiná, ku mes tantu rèkòrt mundial. Awe e ta buska su di 7 den 100m mariposa, i si e gana lo e empatá e marka di su kompatriota Mark Spiz di mas medaya di oro den e mesun olimpiada.
Phelps ya tin e honor di ta e atleta ku a gana mas oro den historia dje weganan, ku 12 oro, na kua e por agregá un par mas promé ku su marcha triunfal kaba na Beijing.
E no a kompetí den finalnan djaweps, i Merka a sinti esei. Su regreso e dia siguiente parse a inspirá su kompañeronan ku a bai ku dos otro medaya di oro entre e kuater ku a repartí den pisina. Ryan Lochte a gana den 200m lomba i Rebecca Soni den 200 pechu femenino, tur dos ku rekòrt mundial

BEIJING – Un luchadó sueko ku a tira su medaya di bròns na suela lo por ser kastigá pa Komité Olímpiko Internashonal.
KOI a bisa djabièrnè ku el a start un investigashon disiplinario riba e aktitut di Ara Abrahamian, kende a benta e medaya di bròns na suela despues di a pèrdè e oro kontra e italiano Andrea Minguzzi den divishon 84 kilo.
Durante e seremonia di premiashon, e luchadó sueko a kita e medaya for di su garganta i a tira esaki rabiá riba suela.
“Komishon disiplinario ta revisando e situashon aki”, asina e bosero di KOI, Emmanuelle Moreau a bisa. “Nan ta den kontakto ku e Federashon Internashonal”.
Moreau a bisa ku no ta konosí ki kastigu e atleta lo por haña.
Abrahamian mester a ser kontrolá ora el a bai rabiá riba e wesnan ku a duna e italiano komo ganadó.
Despues el a bai furioso i a dal e porta duru ku a sakudí e muraya di e parti di kamerinnan.

BEIJING – Un norkoreano kende a gana un par di medaya den tiru i un gimnasta vietnamita a tèst positivo den kontròl anti doping den e Weganan.
Komité Olímpiko Internashonal a informá djabièrnè ku tur dos a keda ekspulsá di e weganan pa uso di sustansia prohibí.
Di e tiradó norkoreano Kim Jong Su nan a kita e medaya di plata ku el a gana ku pistol riba 50m i e bròns di pistol di airu di 10 meter, despues ku el a tèst positivo pa uso di propanolol, un supstansia ku ta usa pa evitá temblamentu di man den algun prueba, manera tiru ku arko.
E medaya di bròns den e prueba di 10m kitá for di Kim a bai pa e merikano Jason Turner. Den 50m, e chines Tan Zongliang a subi pa e plata i e ruso Vladimir Isakov pa esun di bròns.
E gimnasta Thi Ngan Thuong Do a keda último den 82 kompetidó den e prueba riba suela den gimnasia femenino.
E bosero di KOI, Giselle Davies, a bisa ku tur dos deportista a keda ekspulsá di e weganan i nan kredensialnan olímpiko a ser kitá for di nan.
Nan dos a subi na tres e sifranan di atletanan gará pa doping na Beijing. E siklista spañó Maria Isabel Moreno a keda ekspulsá djaluna pa EPO.
Presidente di e komishon médiko di KOI, Arne Ljungqvist, a bisa ku e ta konsiderá Kim “kulpabel di uso konsiente” di un sustansia prohibí, pasobra propanolo ta ofresé benefishinan spesífiko na e tiradónan.

...Pa promé bia ámbos senador lo partisipá na mesun evento...

LAKE FOREST, Merka, - Meimei di un kontienda pa Presidensia di Merka ku ta kuminsá krese den e tono di e diskursonan i e kantidat di sèn rekoudá pa e kampañanan, e kandidatonan pa presidensia pa Partido Demókrata i Partido Republikano, Barack Obama i John McCain, respektivamente, awe lo bishitá iglesia kristian evangéliko no devoshonal Saddleback, situá sùit di kondado di Orange.
Ámbos senador pa promé bia lo partisipá, na e okashon aki na Foro di Liderazgo i Kompashon organisá pa e pastor influyente Rick Warren, fundadó di e iglesia aki situá na Lake Forest, ku ta agrupá mas o ménos 22.000 integrante i konsiderá e di kuater iglesia mas grandi di e pais.
Rick Warren a sigurá ku ta un honor pa su iglesia ku ámbos kandidato a eligí e evento aki pa hasi aparishon dilanti e mesun oudiensia, loke el a kalifiká komo “un oportunidat sin presedente pa Merka”.
“Tempu ta krítiko pa e nashon i e pueblo merikano ta meresé skucha ámbos kandidato papiando for di nan kurason, sin interupshon, den un formato sivil i sin e preguntanan engañoso di e partidonan, ku típikamente ta iritá e animonan na lugá di aklará”, Waren a bisa.
Di akuerdo ku e pastor, e preguntanan ku lo keda formulá n’e kandidatonan “lo bai ta mas ayá di loke tradishonalmente e reporteronan sa puntra”, inkluyendo temanan ku ta generá puntonan di bista kontrali segun largura di e pais, manera pobresa, AIDS, kambio klimátiko i derechonan humano.

WILLEMSTAD – Kompanianan privá di gobièrnu CPA/KTK, Aqualectra, Curoil, Refineria di Kòrsou, Curinde i Selikor a reuní pa hasi un donashon na Kas di Kultura pa organisá Siman di Kultura. E aña aki Siman di Kultura lo selebrá su promé lustro i ku ta primintí di bira aun mas grandi pa loke ta trata organisashon. E evento aki a bira esun ku mas a logra hala atenshon di e pueblo kompleto pa uni pa ekspreshon kultura di Kòrsou. Añanan anterior a demostrá ku Siman di Kultura a logra di penetrá den sektor komersial i gubernamental ku partisipashon di skolnan ku tambe ta para ketu pa duna atenshon na tur ingrediente kultural ku e pais aki a produsí atrabes di añanan.
Tabata un delegashon di Kas di Kultura a duna un presentashon na CPA riba e proyekto aki, despues por a hala tur e kompanianan huntu pa yega na mas ku 40 mil florin pa Kas di Kultura kubri gastunan di organisashon. Durante e entrega di e donashon ayera, Agustin Diaz a trese dilanti ku Kultura ta manera fundeshi pa sigui konstruí pa mehorá, pa bai dilanti, pa stima otro, pa bo yuda otro, pa apoyá otro, pa ta orguyoso di loke nos huntu por logra den e mundu aki.
Den un ambiente pa elogiá Siman di Kultura, kaminda a keda probá ku e ta un proseso di konsientisashon, di enfatisá e norma- i balornan di apresiá e hende, di apresiá su desaroyo, su motivashon pa bai dilanti, rekonosementu di su historia, tabata e motibu ku e kompanianan CPA/KTK, Aqualectra, Curoil, Refineria Kòrsou, Curinde manera den un koro a disidí di hasi un gesto konhunto na Kas di Kultura pa organisá Siman di Kultura.

BEIJING – E spañó Rafael Nadal a keda na porta di otro título grandi djabièrnè ora el a pasa pa final di tènis, kaminda e ta warda e chileno Fernando Gonzalez, kende a sobrebibí un wega ku tabata parse pèrdí.
Nadal a derotá e serbio Noval Djokovik den semi final 6-4, 1-6, 6-4 i Gonzalez a dal e merikano James Blake 4-6, 7-5, 11-9.
Gonzalez a gana medaya di ordo den dòbelna Atenas i mester a konformá su mes ku bròns den singel.
E chileno a sigurá medaya di plata kaba i pa keda ku e oro e tin ku derotá un Nadal imparabel, kende a gana e torneonan habri di Fransia i Wimbledon derotando e suizo Roger Federer den e final i e ta e number un di klasifikashon mundial.
Nadal a bisa ku e tabatin suerte di e gana Djokovic riba un kancha rápido.
Den sekshon di hende muhé Dinara Safina a gana e serbio Jelena Jankovic i awor e ta bai topa e chines Li Na i den e otro semi final Elena Dementieva i Vera Zvonareva lo topa otro.

CRAANBERG
Ingrid Marjorie
A laga atras kompañero di bida Rudy Leonard, yunan Madeleine Mercelina i Derwin Valks, Gwendolyne Mercelina i Gilbert Martis, Juny Mercelina i Nair Davelaar, Remy Mercelina i Jeanine Thodé. Akto di entiero ta djaluna 18 ougùstùs na Ulanda.

ROSALIA
Rignaldo Regian Cicilio (trágiko)
Mihó konosí komo Thomas lider di Grupo di Seú Hóbennan alegre
A laga atras su mama Eminta Thomas, tata Rignald Rosalia i esposa, yunan Reinaldo, Rodion, Janelia, rumannan Thurchell Rosalia, sigmadette Zink, Elmerswindo Zink, Jurriendelo Maduro tur ku nan famia, Juriette Maduro i yu, Hieldriendelo Thomas, Rtigchielo Rosalia i rumannan. Akto di entiero ta djamars 19 ougùstùs na Ulanda.

GILMOOR
Ewald George
Mihó konosí komo Sjori òf Shors
A laga atras su kasá Gleontine Gilmoor-Pool, yunan Carmen Gilmoor, Robert Gilmoor, Johan i Mavis Gilmoor-Comenencia, Marlene i Milo Amzic-Gilmoor, Carlo i Sisline Gilmoor-Martis, Frank i Jolanda Gilmoor-v/d Veenken. Kremashon ta djamars 19 ougùstùs den sírkulo familiar. Bishita na Crematorium Brievengat 9or-11.3oor.

JARDINIER-KOOTS
Leonita Obispo
Mihó konosí komo Núnú
A laga atras su yunan Angelica Jardinier, Elvia Jardinier, Liliaan Jardinier i Ronny Bernadina, Ronald i Astrid Jardinier, Maritsa Antonia, Judith Dometilia, rumannan Maximo Koots, Serapio Martin De Pablo. Akto di entiero ta djamars 19 ougùstùs for di misa Sta. Rosa pa santana Sta. Rosa. Bishita 1or-4or. Promé ku entiero tin un s.s. di misa.

BEIJING – Awe pa banda di 10:20 di mainta, Kòrsou tabata paralisá pa un ratu, ora ku tabatin e final di 100m di Atletismo di Weganan Olímpiko na Beijing.
Despues di a kore e semi finalnan awe mainta pa banda di 08:05am, kaminda ku Churandy Martina a logra marka un tempu di 9.94.
Esaki a pone ku den e final Martina mester a kore kontra di e mihónan riba 100m.
Den e final a kore ocho atleta ku ta Michael Frater di Jamaica, Darvis Patton di Merka, Usian “Thunderbolt” Bolt di Jamaica, Richard Thompson di Trinidad & Tobago, Weater Dix di Merka, Asafa Powell di Jamaica, Marc Burns di Trinidad & Tobago i Churandy Martina di Antia Ulandes.
Tabatin vários atleta ku a kore impreshonante den e eliminatorionan.
Promé ku e final na televishon por a mira kara di tur e atletanan.
Por a mira kara di Churandy Martina ku su smail kustumbrá.
E kareda a sali bon, ku Usian Bolt for di komienso dilanti i a kore bai laga restu di e atletanan markando un tempu rekòrt mundial di 9.69 apesar di no tabatin un “reaction time” hopi bon 0.165.
E tempu ei ta pone ku e tabata penúltimo entre e atletanan aki, ku Churandy Martina markando 0.169 komo último.
Tabatin vários ku un “reaction time” di 0.133, komo e mihó nan.
Richard Thompson di Trinidad & Tobago a sali na di dos lugá ku tempu di 9.89 ku ta su mihó tempu personal.
Walter Dix di Merka a sali na di tres lugá ku tempu di 9.91, ku ta su mihó rekòrt personal.

Lorito ta yama tur hende un felis djasabra. Awe tur hende ta den un “ambiente” deportivo konsiderando e hazañanan di nos deportistanan den eksterior. Un biaha mas esei ta konfirmá, ku deporte ta nos salbashon. Danki Dios diferente sektor tambe a kuminsá kere den esei!
*********
Un pabien pa e reportahe tremendo ku Eugène Maduro a hasi for di Beijing ayera ku Churandy, mayornan di e atleta, minister Leeflang i otronan. Meskos ku nos a kritiká e dia anterior pa un produkshon mediokre, mesun kos no ta hasi awe: e produkshon di ayera tabata sublime!
*********
Hopi krítika Lorito a haña riba e manera ku e presentadó Rein a hasi su trabou ayera i awe. E krítika tabata varia di su bistí te na su narashon. Parti di e krítikanan nos ta kompartí. Nos no ta haña por ehèmpel ku e komentarista den studio na Willemstad mester papia riba e komentario bibu i direkto for di Beijing. Ta nan ta aya (sea NOS òf NBC) i ta nan sa! Ademas e kamisa kòrá di awe mainta a keda un poko laf. Nos ta komprondé ku kòrá ta un koló olímpiko, pero niun hende no por a bis’é ku kòrá na TV ta un insulto pa e imágen?
*********
Anto asuntu di bin bisa ku no sa ainda i por ta, ta transmití tambe a kai un poko laf. Bo mester sa for di adelantá si bo ta haña e imágen si òf no! Esei ta televishon profeshonal di awendia! For di momentu ku bo propagá algu, bo mester tin garantia ku bo tin e señal! Masha hende mes a reklamá e asuntu aki. Lorito no a sigui wak awe mainta, pasobra nos a bula bai Beijing pa wak e final. Nos lo bin ku mas komentario riba kon kos a bai awe. Un kos ta sigur: Churandy a hasi un trabou ekstraordinario i e meresé tur nos elogio!

WILLEMSTAD – LA PRENSA komo un di e poko medionan a bin dilanti a mustra kon kaótiko e atministrashon di Gobièrnu di Kòrsou i Antia ta, pa loke ta trata e manera ku ta registrá entrada i salida di trahadónan stranhero. LA PRENSA a informá, ku tin mas ku 3 mil pèrmit pendiente pa prosesá i ku tratando di kontrarestá e situashon aki ku nombramentu di un mènèdjer interino nobo na Dienst Arbeidszorg (DAZ). No opstante esei, e reklamonan ta sigui. Ta kalkulá ku lo mester di por lo ménos 7 pa 8 luna pa limpia e registro. E servisio ta kai bou di responsabilidat di diputado Eugène Rhuggenaath ku ta tratando di aktualisá e situashon, pa di e forma ei haña un mihó bista di e nesesidatnan real riba merkado laboral. Konsultant Christina van der Biezen a haña e enkargo pa limpia henter e registro huntu ku DAZ. Lógikamente ku den e proseso aki ta hasiendo masha purá i trabou purá por sali salu loke e kaso insólito ku LA PRENSA ta bai menshoná ta indiká konkretamente.
LA PRENSA a haña sa, ku poko tempu pasá a informá outoridatnan ku un panadero ku tabata den servisio di un panaderia na Kòrsou no ta traha mas. (E panadero di orígen kolombiano a disparsé pa basta tempu i ta parti di un investigashon rigoroso ku ta tumando lugá na e momentunan aki i tin indikashon ku e tabata víktima den un krímen). Banda di esei a hasi petishon pa un pèrmit di estadia di un panadero nobo pa remplasá esun ku no t’ei mas. Esnan ku a hasi e petishon a warda masha tantu pa nan haña un kontesta, pero di tur manera nan a warda ku santu pasenshi. Pa nan sorpresa Gezaghèber i sekretario di Teritorio Insular a informá nan resientemente, ku a prolongá e pèrmit di estadia di e panadero ku hustamente nan a informá ku no t’ei mas. Komo ku ya kaba e empresa tin huntu ku esun ku no t’ei mas 7 panadero den servisio, Gobièrnu di Kòrsou a ninga e petishon pa e panadero nobo drenta den servisio. Ku otro palabra, ta ninga e petishon pa un panadero nobo, siendo ku e otro no ta den servisio mas i por ta hasta no ta riba nos mundu mas.

SANTO DOMINGO, República Dominicana, - E presidente Leonel Fernández, kasá ku abogado Margarita Cedeño, awe ta hura dilanti Asamblea Nashonal pa su di tres mandato konstitushonal i di dos di manera konsekutivo, meimei di e ekspektativanan di e poblashon frente un diskurso durante kua e lo mester anunsiá su plannan di gobièrnu, spesialmente den márgen di un krísis global ku reperkushonnan interno serio.
E seremonia di huramentashon di Fernández i e vise presidente Rafael Alburqueque lo tuma lugá na Palasio di Kongreso awe mainta, na Centro de los Héroes, kaminda promé ku e akto di huramentashon lo bai ta presente un batayon miksto di Forsanan Armá ku lo bai rendi e honornan di estilo, ku tokamentu di Himno Nashonal i lo lansa 21 kañon.
Tin medidanan estrikto di seguridat tantu alrededor di e sede di Kongreso komo na Palasio Nashonal ku ta inkluí desviashon di tránsito vehikular i presensia di agentenan di seguridat i di polisnan.
For di djaweps último delegashon di gobièrnunan i organismonan estranhero tabata yegando e pais pa asistí na e aktonan.
A konfirmá presensia di 14 hefe di Estado i di gobièrnu.
Tambe ta inkluí Prínsipe di Asturias, den representashon di Rei Juan Carlos di Spaña, dos vise presidente i numeroso kongresista, tambe delegashon di organisashonnan polítiko aliado di Partido de la Liberación Dominicana (PLD).
Leonel Fernández, abogado di 53 aña, a optené e re-elekshon den e elekshonnan di 16 di mei último ku poko mas ku 53 porshento di e votonan i a enkabesá un gobièrnu ku entre su desempeño mas luminoso ta destaká e rekuperashon i stabilidat makroekonómiko.

WILLEMSTAD - Spoiled Brats Child Daycare Centre i Spoiled Brats Afterschool Activities no ta djis un negoshi pa gana sèn. E ta un konsepto ku a pensa hopi riba dje i e tin un filosofia su tras. Esaki ta loke e fundadó di e konsepto, Erica Ruiter Chayadi a splika LA PRENSA.
Despues di hopi aña di preparashon i di akumulá eksperensia riba e tereno di kuido di yu chikí i mucha, e skol a habri. E filosofia di esnan tras di e konsepto ta, ku nan ke trata yunan di otro hende mes bon ku nan ta trata nan mes yunan. Esaki ta sosodé den koperashon ku un tim skohé ku masha koutela. E tim ta ofresé un ambiente di higiena optimal ku tin ku parse mas tantu posibel esun ku e mucha indudablemente tin na su mes kas. Seguridat ta haltu riba e lista di eksigensianan.
“Nos muchanan ta pará sentral i nos ta hasi esfuerso pa logra satisfakshon serka e muchanan. Esaki na su turno ta sòru pa satisfakshon serka e mayornan tambe. Ta p’esei e mayornan ta un skakel importante den e kadena di edukashon di e mucha i nos ta konsiderá e mayornan komo sosio den edukashon di e mucha”, Ruiter a splika. Mas el a bisa tambe ku ta konosí ku investigashonnan sientífiko a mustra ku 80% di e edukashon i formashon di e mucha ta sosodé ora ta atendé ku e mucha. E ambiente den kua e ta krese ta un vèlt pre formá ku mester hasi uso di dje optimalmente. I mirando ku mayornan ta forma parti di e ambiente den kua e mucha ta krese, nan ta importante.
“Nos ta inkluí mayornan ora nos ta bai keiru ku e muchanan i tambe durante otro aktividatnan na skol i nos ta tene regularmente anochinan di informashon. Tambe nos ta aserká un mayor individualmente si tin nesesidat. Nos no por lubidá niun momentu ku nan ta konfia nos i ta laga den nos man, nan propiedat tan balioso. E konsepto di Spoiled Brats ta ofresé kuido pa un yuchi for di 6 siman. E sala pa e yuchinan tin kapasidat pa 7 kama. Einan ta reina trankilidat i higiena pa e yuchi su nesesidat grandi di soño. Nan tin na disposishon un flur grandi i limpi pa nan por gatia i hunga. Ora nan alkansá e edat di 1 aña i mei, e yuchinan ku entretantu a krese, ta pasa pa e siguiente grupo kaminda nan ta haña un programa ku ta kumpli ku e nesesidatnan den e fase di kustumbrá. Esaki ta un balansa entre momentonan di aktividat i momentunan di sosiegu. Ora nan hasi 2 aña i mei nan ta bolbe bai un otro grupo kaminda ta bai traha mas dirigí riba aktividatnan kaminda ta hasi kos ku ta eksigí ku mester sinta mas largu tras di otro. Atrobe balansá segun e nesesidat, i interkambiá ku wega i rekreashon. Finalmente ora nan hasi 3 aña nan ta bai den e programa di preparashon pa bai Enseñansa di Fundeshi (grupo 1), ántes kleuterschool. Akí tin un programa di 1 aña ku ta konektá perfektamente ku e promé aña di Enseñansa di Fundeshi.”

WILLEMSTAD / AMSTERDAM – E maneho di droga na Ulanda ta saliendo ménos for di e punto di bista di salubridat i mas for di mantenshon di lei. E konsepto di tolerá (gedogen) a haña un lus negativo riba dje entretantu, segun Tim Boekhout van Solinge dosente universitario den kriminologia di Willem Pompe Instituut voor Strafrechtwetenschap.
E notisianan rondó di e maneho di sero toleransia pa uso di droga durante fiestanan di ‘dance’, tabata motibu di e investigashon di Van Solinge. Segun e investigadó e kambio di klima den polítika, polis i hustisia lokalmente ta ofresé e oportunidat pa hasi e maneho di droga mas skèrpi. Den Amsterdam, Haarlem, Arnhem i Best tin kòntròlnan severo ta tuma lugá durante festivalnan di ‘dance’. Pero Boekhout ta bisa tambe ku e maneho di sero toleransia pa droga ta bai muchu leu. Sinembargo segun konosedónan e maneho di sero toleransia ta kondusí na uso di mas tantu droga promé ku e evenementu kuminsá. Groen Links, PvdA i D66 ta preokupá pa e riesgonan di salubridat di e maneho akí. Despues ku e notisianan di e maneho di sero toleransia a sali den prensa nan a hasi un apelashon riba minister Klink (Salubridat) i Hirsch Ballin (Hustisia) pa pone salú di e baidónan di fiesta na promé lugá. “Nos tin ku paga tinu pa sieguedat ideológiko. E meta di nos maneho di droga mester ta ku ménos hende posibel ta bira adikto na droga i fayesé”, miembro di Tweede Kamer pa D66 van der Ham a bisa.

WILLEMSTAD – Kòrsou lo konmemorá abolishon di katibu ku diferente aktividat e fin di siman aki. Tur aña riba 17 di ougùstùs ta konmemorá e lucha pa libertat bou di guia di Tula. Dia 17 di ougùstùs 1795 a kuminsá e gran rebelion di katibu aki na Kòrsou. E rebelion aki ta símbolo di e komienso di e lucha ku a kondusí na abolishon di sklabitut riba 1 di yüli 1863, 145 aña pasá. Den kuadro di e pensamentu akí, gobièrnu di Kòrsou den estrecho koperashon ku Konseho di Iglesia, a invitá hinter komunidat pa para ketu na e konmemorashon di 213 aña di lucha pa libertat i 145 aña di abolishon di sklabitut na Kòrsou. Esaki lo tuma lugá riba djadumingu 17 di ougùstùs 2008, den un forma sobrio den tur iglesia di Kòrsou. Tambe lo tin un misa eukuméniko na misa di Sta. Ana, kaminda entre otro Mgr. Pader Amado Römer ta prediká. Esaki ta tuma lugá pa mitar di dies di mainta. Misa di Sta. Ana tabata e promé misa kaminda despues di proklamashon di dia 1 di yüli, ku a otorgá libertat na katibunan, a selebrá i alabá (Te Deum) e momento históriko i konmemorativo aki. Tema di e konmemorashon ta ‘Lucha pa libertat: Di historia pa futuro’. Djadumingu anochi riba Rif lo tin e konmemorashon tradishonal. E anochi aki organisá pa Asosashon Promoshon Konsenshi Istóriko a resultá den un kontroversia e aña aki komo ku Gobièrnu no a duna supsidio komo ku e petishon tabata lat. Di tur manera e organisadónan a anunsiá ku e konmemorashon lo sigui.