Kustwacht cu tremendo charla informativo 

ORANJESTAD- Diabierna ultimo, 15 di augustus 2008, Guardacosta di Aruba y Antiya Hulandes (Kustwacht) a tene un tremendo presentacion na Centro di Pesca Hadicurari. Cantidad record di publico a yena e sala multifunctional di Hadicurari te cu esaki a keda chikito. Tur esnan presente, tanto piscado, doño di boto, watersport operators y publico general, a cera conoci cu Kustwacht trabou y tareanan.
Tabata sr. Randolph Paskel cu a introduci e ekipo di Guardacosta kendenan a presenta den uniform cu varios ekipo y material, pa asina esnan presente familiarisa nan mes cu Guardacosta. Despues a sigui un video cual Guardacosta ta ilustra den forma hopi cla y informativo, e historia, motibo, tareanan y logronan di Guardacosta di Aruba y Antiya. Kustwacht ta un partnership entre e partnernan den reino y ta eherciendo trabounan di, combatimento di droga, mantencion di ordo y control di leynan relevante manera nabegacion, medio ambiente y otronan na bienestar di henter comunidad.
LEYNAN
Sr. Paskel a introduci srta. Patty Duncan, kende despues di a parti un compilacionnan di leynan relevante pa piscado y doño di boto, a elabora riba e detayenan cu tur hende mester atene cu nan ora di subi lama. E splicacion amplio tabata hopi profesional y al caso. Ademas a keda concorda cu lo entrega e compilacion di leynan aki na Centro di Pesca Hadicurari tambe pa asina tur esnan cu no por a haya un copia, por pasa busca esaki despues. Leynan di nabegacion, vaarbewijs y aspectonan di medio ambiente ta entre algun di esnan cu Guardacosta ta eherce control y si no cumpli cu esakinan, esnan cu kibra ley por conta cu boet, confiscacion di boto of ekipo, of asta por bay cera.

ORANJESTAD- Aruba Scholarship Foundation orguyosamente ta anuncia cu siman pasa otro di su becadonan, Angelique Sue-Ellen van der Horn, a obtene su BACHELOR OF SCIENCE IN BUSINESS ADMINISTRATION (BSBA) na University of Central Florida cu e bunita GPA di 3.664. Su major tabata den MANAGEMENT.
Angelique a drenta UCF pa e spring semester di 2007. Prome cu esaki el a studia na Palm Beach Community College caminda el a obtene su Associate Degree na Mey 2006. Angelique ta buscando un trabou awor y e ta spera di bolbe UCF pa busca su Masters Degree despues di a acumula experiencia na trabow. Angelique ta jiu di Cornelis y Vivian Storm-Croes y e ta nieta di e popular pareha Manchito y Nena Ponson.
Angelique a participa den e Latin America/Caribbean (LAC) Scholarship program cu ta duna e studiantenan Arubiano e derecho di paga mes tuition cu residentenan di Florida. Cu e ayudo aki di Aruba Scholarship Foundation e famia di Angelique a spar casi 4o mil florin den e dos añanan cu Angelique a tuma pa gradua.
Esnan cu kier sa con nan tambe por beneficia di e LAC program na UCF por contact clydeharms@setarnet.aw . Aruba Scholarship Foundation ta felicita Angelique y su mayornan cu e logro di nan princesita, y ta desea Angelique hopi exito den futuro.

WILLEMSTAD - Pader Amado Römer a enfatisá durante su diskurso na okashon di konmemorashon Dia di Lucha pa Libertat ku gobièrnu no a sòru pa nos komprondé e konsepto di libertat.
“Kuantu biaha libertat a wòrdu spliká pa nan sa i ta konsiente kon hende liber ta, ken a hasiele, nunka a hasié. Libertat ta ménos importante. Mester pone na disposishon di tur, no un grupo so, loke Dios a pone na nos disposishon,” asina el a enfatisá.
E pueblo aki no ta liber, e no sa ken e ta, e ta keda manehá i manipulá. “Nos mester di un Tula atrobe. Nos mester traha huntu no banda di otro. Pa gosa di e benefisionan ku Señor a duna. No imponé riba otro loke ta nos pensamentu personal. Ta ki sorto di lucha pa libertat esaki ta. E libertat di lucha di Tula, Karpata i Toussain ta e libertat di por pensa libremente, di por buska bèrdat. Un individuo responsabel i konsiente ku por disidí pa su mes. E problema ta hopi mas grandi ku nos ta kere. Nos sa kiko ta koperashon, kiko ta rèspèt pa otro?”
E ta sigui bisa ku nos kier imponé kada bes riba otro loke e ta. E libertat di por pensa libremente komo un individuo responsabel kon ta disidí pa bo mes. Awendia hóben ta bisa dal bai, b’a traha mundu anto. Biba pa biba, buska plaka posishon i gloria, esaki ta e aktitut robes. E problema ta hopi mas grandi. E individualidat ta lanta bini dilanti. Dia e lucha a tuma lugá ku tabata imposibel pa wanta mas, humanidat tabata despresiá e opreshon ku tabatin mas di 200 aña pasá, nan a dal kibra pa buska libertat tur kaminda. E katibunan ku no tabata wòrdu ni rekonosé komo hende a bisa no por mas, te aki mi ta bai, i nan a lanta. E fòrsa nobo ku a lanta a manda iglesia pa plakia nan. Pero mester tende na e bos di e pueblo.

Tin un dicho ku ta bisa: “Awakati tin un problema di identidat. E no sa si e ke ta fruta òf vegetal”. Mi kier sa ku e dicho aki ta aplikabel pa hopi yu di Kòrsou ku dia aden, dia afó ta hiba un lucha tenas ku nan mes pa loke ta nan identidat. I realidat ta ku 99.9% di e hendenan aki ta di desendiente afrikano. Mi ta afrikano òf latino? Mi tin nashonalidat ulandes òf mi ta makamba? Mi ta mulato òf mi ta un mestiso? Mi ta pretu òf mi ta neger? Mi tin koló kla òf mi ta un djuku? Mi tin kabei krin òf kabei las? Mi ta fruta òf vegetal?

Poko dia ei mi a tuma nota di deklarashon di direktor di Kas di Kultura, dòkter Rene Rosalia, enkuanto identidat. Segun e erudito aki, nos ta un pueblo ku ta den un krísis di identidat. Rason parsial! Dikon parsial, pasobra si tira un bista riba e diferente nashonalidatnan ku ta biba na Kòrsou, kasi tur, ku eksepshon di e asina yamá ‘afro-kurasoleñonan’ sa presis kiko ta nan identidat i desendensia ètniko. E indio ku nos ta yama hindú sa bon bon di unda e ta bini, ken e ta i unda e ta. Meskos pa e hudiu sefardiko òf askenazi, e ingles di islanan karibense (esnan ku nos ta yama ‘bedji’), e ulandes oropeo (ku nos ta yama ‘makamba’), e dominikano, e haitiano, e colombiano, e ‘paisa’ di Venezuela, e boneriano, e arubiano i tur sobrá di e ochenti’piku nashonalidatnan ku ta biba na Kòrsou. E úniko ku no sa, no ta interesá pa sa òf tin bèrgwensa di sa di unda e ta bini, ken e ta i na unda e ta, ta e afro-kurasoleño.

LONDRES – Chelsea a kuminsá su bida bou di direkshon di Luiz Felipe Scolari ku un viktoria djadumingu 4-0 riba Portsmouth.
Ethe Blues, ku temporada pasá a kaba di dos den Liga Premier i den Liga di Kampionnan tras di Manchester United, a gana fásil di e ganadónan di Kopa FA di 2008 den stadion Stamford Bridge ku golnan di Joe Cole, Nicolas Anelka, Frank Lampard i e debutante Deco.
Tabata un impreshonante aktuashon kontra un ekipo ku hopi a konsiderá kandidato pa e di sinku puesto i probablemente otro trofeo den kampaña, i Chelsea a demostrá muchu mas elegansia i imaginashon ku bou di e predesesor di Scolari, Avram Grant.
Grant a guia Chelsea na dos punto di e título di Premier i apénas un duelo di pinalti di e título di Liga di Kampionnan. E triunfo konvinsente di djadumingu por indiká ku Scolari ta e treiner pa hiba e tim den tòp.
“Tabata mas ku m’a spera”, e treiner brasileño a bisa, kende a mustra su mes típikamente animá den e ekipo. “Awe nan a hunga masha bon. Ta importante, pero mas importante ta ku e fanátikonan di Chelsea a mira un bunita wega”.
Den otro weganan di djadumingu Aston Villa mester a topa Manchester City i Manchester United ku Newcastle.
Djasabra, Arsenal a kuminsá habri temporada ku un valioso triunfo 1-0 riba West Bromwich ku a kaba di promové, pero sin masha kos.
Samir Nasri a anotá na di 4 minüt di su debut den liga pa duna Arsenal e tres punto.

BRNO, Repúblika Cheko – Valentino Rossi a gana e Gran Premio Cheko di motosiklismo despues ku Casey Stoner a dal i keda for di kompetensia.
E piloto di Yamaha a gana den 43 minüt, 28,841 sekònde i tin 50 punto riba e oustraliano Stoner riba tabla di posishon.
Stoner a sali den grupo den kondishonnan di solo i e tabatin un bentaha sólido riba Rossi promé ku el a dal den di seis buèlta, ora ku e wil dilanti di su motosaikel Ducati a sali for di pista. E oustraliano no por a sigui, pero e no a resultá heridá.
Stoner a sufri un aksidente tambe na Laguna Seca na Monterrey, California, dia 20 di yüli, ora e tabata dilanti. Rossi a gana e kareda ei tambe.
E spañó Roni Elias, tambe di Ducati, a kaba di dos djadumingu, 15,004 sekònde tras di Rossi, E italiano Loris Capirosi tabata di tres ku su Suzuki 21,689 sekònde tras di e lider.
Alex Debon di Spaña a gana pa Aprilia den 250cc i e aleman Stefan Brandl a kue su promé triunfo den 125cc.

--
Petrova a vense Dechy i gana torneo na Mason

MASON, Ohio – Nadia Petrova a dominá Nathalie Dechy 6-2, 6-1, pa gana e torneo habrí di tènis femenino na Mason.
Petrova, kende a yega kuart final di Wimbledon e aña aki, a sigurá su viktoria ku un bala di haltu den su di dos match point, pa gana su promé torneo for di esun bou di dak di Paris na 2007 i su promé na airu liber for di e habrí di Berlin na 2006.

WILLEMSTAD, - Despues di e inisio eksitoso di Digicel Caribbean Championships aki na Kòrsou ku e weganan di Grupo A, e prestigioso torneo aki a muda pa Guyana na unda e ekiponan di Sürnam, Guyana i Dominica a hunga e partidonan di Grupo B.
E hecho ku e partidonan di Grupo B a tuma lugá na Guyana tabata motibu pa hopi selebrashon.
No solamente e fanatikada di futbòl tabata ansioso pa presensiá e partidonan, pero henter Guyana tabata sumamente orguyoso di e hecho ku Providence Stadium a inougurá nan lusnan i pa promé biaha partidonan por a tuma lugá anochi i di e forma aki, Digicel, e kompania di selular ku mas ta kresiendo den Antia, Karibe i un partisipante nobo den e merkado di Sentro Amérika, a duna inisio na un era nobo den futbòl na Guyana.
E promé enkuentro di e grupo aki a tuma lugá dia 8 di ougùstùs i tabata entre e anfitrionnan di Guyana, e Jaguarnan di Oro, a enfrentá e ekipo di Dominica. Aunke ku e markadó final tabata 3-0 na fabor di Guyana, por bisa ku e fanatikada a gosa di un nivel haltu di futbòl.
E siguiente wega tabata entre e faborito di Grupo B, e ekipo nashonal di Sürnam i Dominica.
Mester bisa si ku e ekipo di Sürnam a hiba un sustu ya ku ta e ekipo di Dominica tabata esunnan ku a skor e promé gol, ora ku Prince Austrie a logra penetrá e arko defendé pa Ronny Aloema.
Dos karchi kòrá kontra e ekipo di Dominca a kambia e dinámika di e partido, ya ku Sürnam a kuminsá dominá i a logra gana e partido ku un skor final di 3 pa 1.

330 trahadó tabata presente na Klup di Shell 

WILLEMSTAD - Trahadónan di Refineria Isla no sa kiko lo bira di e futuro di e kompania. Esaki pasobra di ningun kanal, nan no ta hañando sufisiente informashon. Esaki ta konta tambe pa e sindikato PWFC i tambe e asosashon APRI, ku ta representá miembronan di staf di Isla. E situashon aki tabata motibu pa Allan Bouwland a yama un reunion ku e trahadónan djabièrnè último. E konklushon dje reunion aki tabata ku tur organisashon ku ta trahando na e momentu aki na bienestar di trahadónan di Isla, mester uni fòrsa. Asina Allan Bouwland a splika.
“Nos a yama e reunion pasobra tin hopi kos ta wòrdu papiá di Refineria Isla i no ta tur kos ta bèrdat”. Segun Bouwland, ni PWFC ni tampoko APRI no ta kontrarestá e kosnan ku ta inkorekto. “Ta p’esei mi ta haña ku ta muchu ketu”. Segun Bouwland, ta p’esei el a haña nesesario pa lanta e trahadónan for di soño.
E inisiadó di e reunion ta opiná ku tin hopi informashon ku mester wòrdu duná, pero ku no ta wòrdu suministrá. Entre otro ainda no ta muchu kla kiko a sali for di e enkuentro ku gobièrnu tabatin ku PDVSA na Venezuela. Mas aleu, Bouwland ta bisa ku for di e kòmbersashon ku tin entre e dos gobièrnunan, mester bira konosí kiko ta bira futuro di e refineria. Ademas ekspreshonnan menasante di Sekretario di Estado Ank Bijleveld, ku ta sera e refineria na desèmber, tambe ta motibu di preokupashon pa Allan Bouwland.

WILLEMSTAD - Na okashon di selebrashon di Dia di Savaneta ayera, Carmabi a sera parti di e parke na Savaneta, loke a pone ku e públiko ku a asistí, no tabatin akseso kompleto.
E aktividat tabata un dia di konmemorashon di Savaneta, di su plantage i tambe su katibunan. A konmemorá kon e bario di Savaneta a inisiá i kon a kuminsá traha e landhuis.
Rudy Cijntje, habitante di Savaneta, tabata e persona kende a proponé e idea pa organisá e dia. Cijntje a lanta un komishon ku a konsistí di entre otro Echi Cijntje, Astrid Cijntje i Nieves Mezas-Cijntje.
Durante henter dia tabatin hende ku tabata konta historia di Savaneta. Tambe tabatin eksposishon di pòtrèt na kua hopi hende a presentá. Muzik di zumbi tambe a forma parti di e aktividat di ayera na Savaneta.
Relashoná ku e disputa ku e komishon di Savaneta tabatin ku Carmabi, Echi Cijntje a splika ku originalmente e selebrashon na Savaneta mester a tuma lugá siman pasá. Pa motibunan fuera di alkanse di e organisadó di e aktividat mester a posponé e selebrashon pa un siman. Sinembargo no ta tur hende a risibí e informashon dje posponementu i nan a akudí siman pasá tòg na sitio. E hendenan aki a dirigí nan mes na Parke di Kristofel, pa informá kiko a sosodé. Segun Cijntje, e hecho ku tabatin algun hende ku a rabia pasobra nan no tabata sa ku a posponé e aktividat, tabata motibu ku Carmabi a sera e parke na e parti nort. Esei a pone ku e partinan ku e organisadó a propagá ku e hendenan por a bai wak, ku ta entre otro e posnan, kosnan dia, murayanan di katibu, no tabata aksesibel.

WILLEMSTAD - Ta debí na algun insidente ku a tuma lugá siman pasá, a disidí di na tene parke Kristòf será parsialmente ayera, pa bishita general. Asina Michele da Costa Gomez, manager di Kristofel Park, a splika LA PRENSA. Segun e manager di e parke na Savaneta, e insidentenan a tuma lugá riba e dia riba kua originalmente e Dia di Savaneta mester a tuma lugá. Parke Kristòf for di kuminsamentu tabata dispuesto pa duna su kontribushon na e dia aki. Esaki lo a tuma lugá pa medio di organisashon di sierto kaminata, bou di guia di e parke. Sinembargo e aktividat a wòrdu posponé pa 17 di ougùstùs. I e posponementu aki no a bai bon, den e kontakto ku prensa, loke a pone ku e parke a hañ’é ku un situashon hopi ferfelu dia 10 di ougùstùs.
Segun e splikashon di señora Da Costa Gomez, ademas di a yega Banda Abou pòrnada, serka esnan ku a yega a presentá pòrnada, tabata reina e impreshon ku e Dia ta wòrdu organisá dor di Carmabi. “Esaki a okashoná insidentenan ferfelu na e kaha di e frontdesk di Kristofel Park”. Michele da Costa Gomez a sigui bisa ku a trata di ekspreshon di hendenan rabiá ku a akudí pòrnada na Savaneta. Pero el a bira un situashon hopi inkómodo pa e personal di e parke na Savaneta.
Despues di a evaluá e insidente, ku e komité di Dia di Savaneta, den persona di señora Josette Cijntje, Carmabi a indiká kon lo kontinuá ku e selebrashon di dia 17. Einan a disidí ku e fluho di bishitante lo wòrdu kordiná na un manera ku ta garantisá seguridat pa tur hende ku ta na e parke riba e dia ei. Ta den e kuadro ei, a surgi e idea ku lo ta mihó pa sera un parti di e parke. E parti ku ta keda habrí, lo ta bou di guia di e parke mes, pa di e forma ei, dirigí e hendenan na un manera responsabel i pa evitá insidente. Tambe a aklará ku señora Cijntje, e persepshon ku ta Carmabi ta organisá e evenementu.

ARIES: Tur loke ku tin ke ber ku ganashi i invershonnan ta enfatisá favorablemente. Ta yega dianan di parti regalo. E dianan aki ta dia di atrakshon romanse. 05,08,11.

TAURO: No habusá di bo outoridat. Hasi ku nan ta respetábu, pero trata ku infinita kompashon asta esnan ku no tin bo bendishon. 43,29,01.

GEMINIS: Desaroyá e habilidat di por lesa sekretonan den kurason aheno. E lokual ku bo ta sospechá, ta un realidat. Pone spesial atenshon na bo kas. 05,12,16.

KANSER: Tur lokual ku bo a traha p’e i siña den añanan anterior ta duna su frutanan awor. Si bo pago pa hipotek ta preokupábu, porfin bo ta aliviá pa un plaka misterioso. 08.

LEO: Bo bida ta wòrdu transformá dramátikamente. Esun ku a destruíbu awor ta hasibu hari. Un hende ta dunabu plaka pèrdí i lokual ku no tabata bai bon, ta resultá. 07,09.

VIRGO: Den amor bo ta stima i ser stimá. Saka tempu di bo intimidat. Habri bo mes a la maravia. Bo kapasidat ta hasíbu un triunfadó. 11,20,39.

LIBRA: Kuidou ku bo nervio i bo konstante nesesidat di kambionan. Dieta, masashi, terapia natural ta afirmashon positivo ku ta hasi milager den bo. 18,33,21.

SKORPION: Un hende ta revelá un sekreto ku ta asombrábu i ta librábu di un sentimentu di kulpabilidat, ku ta buska den amor. 20,29,05.

SAGITARIO: Lo diferente i straño ta iluminá bo eksistensia. Bo ta sintibu hopi inspirá pa inventá, krea i logra. Traha un bida nobo pa bo. 14,20,36.

ARIES: Tur loke ku tin ke ber ku ganashi i invershonnan ta enfatisá favorablemente. Ta yega dianan di parti regalo. E dianan aki ta dia di atrakshon romanse. 05,08,11.

TAURO: No habusá di bo outoridat. Hasi ku nan ta respetábu, pero trata ku infinita kompashon asta esnan ku no tin bo bendishon. 43,29,01.

GEMINIS: Desaroyá e habilidat di por lesa sekretonan den kurason aheno. E lokual ku bo ta sospechá, ta un realidat. Pone spesial atenshon na bo kas. 05,12,16.

KANSER: Tur lokual ku bo a traha p’e i siña den añanan anterior ta duna su frutanan awor. Si bo pago pa hipotek ta preokupábu, porfin bo ta aliviá pa un plaka misterioso. 08.

LEO: Bo bida ta wòrdu transformá dramátikamente. Esun ku a destruíbu awor ta hasibu hari. Un hende ta dunabu plaka pèrdí i lokual ku no tabata bai bon, ta resultá. 07,09.

VIRGO: Den amor bo ta stima i ser stimá. Saka tempu di bo intimidat. Habri bo mes a la maravia. Bo kapasidat ta hasíbu un triunfadó. 11,20,39.

LIBRA: Kuidou ku bo nervio i bo konstante nesesidat di kambionan. Dieta, masashi, terapia natural ta afirmashon positivo ku ta hasi milager den bo. 18,33,21.

SKORPION: Un hende ta revelá un sekreto ku ta asombrábu i ta librábu di un sentimentu di kulpabilidat, ku ta buska den amor. 20,29,05.

SAGITARIO: Lo diferente i straño ta iluminá bo eksistensia. Bo ta sintibu hopi inspirá pa inventá, krea i logra. Traha un bida nobo pa bo. 14,20,36.

WILLEMSTAD, - Miembro di Konseho Insular Remco Gomez ke sa kiko gobièrnu di Kòrsou tin pensá di hasi pa krea e kondishonnan nesesario pa studiantenan ku kaba di studia na Ulanda, ta regresá Kòrsou i yuda edifiká nos pais.
Tur aña tin un kantidat di studiante lokal ta subi avion rumbo pa Ulanda pa sigui ku un estudio avansá. Lamentablemente un parti hopi grandi no ta regresá.
Frakshon di PAR ta sumamente preokupá ku e desaroyo aki, asina Gomez ta bisa den un karta ku el a dirigí pa gobièrnu di Kòrsou den kua e ta hasi vários pregunta riba e tópiko aki.
Entre otro e ke sa si e asuntu di debe ku e studiante ta keda kuné despues di su estudio, ta hunga un papel. E ke sa si e hecho ku euro ta hopi fuerte i e studiante mester paga e debe bèk den euro, por ta hunga un ròl. Gomez ta pensa ku mirando e hecho ku e debe ta asina haltu, e studiante ta preferá di keda traha na Ulanda kaminda e tin un mihó salario ku ta pèrmitié tambe di paga e debe bèk ku ménos problema.
Remco Gomez ke sa kuantu mucha tur aña ta bai Ulanda i kuantu ta regresá despues ku nan kaba di studia. Gomez alabes ke sa si e problemátika di un kas pa biba’den, por ta hunga un ròl den e desishon di e studiantenan pa tòg keda Ulanda.
Segun e konsehal, a bira tempu pa pensa kon ta hasi regreso di e studiantenan aki mas atraktivo. Un kos ku e mes a pensa riba dje ta, pa yega na un kombenio ku esnan konserní, den e kaso aki Stichting Studiefinanciering (SSC) i Ulanda pa pago di e debe tuma lugá den euro i pa palabrá un tipo di kambio fiho pa e moneda aki.

WILLEMSTAD, - Partido Nashonal lo no koperá pa bolbe kambia e situashon di Lei di Retiro. No por t’asina ku kada be ta hunga ku e lei aki, un biaha ta pon’é na vigor, otro biaha ta elimin’é. Awor, si sindikatonan no tin problema pa eliminá e lei aki, nos lo duna nos koperashon pa kit’é, asina presidente dje partido bèrdè mr. Farou Metry a anunsiá.
Metry a hasi e anunsio aki den kuadro di e diskushonnan ku tabatin siman pasá riba e lei ku mester drenta na vigor ku ta oumentá sueldo mínimo ku 15 porshentu.
Ta un hecho konosí, ku tantu gobièrnu komo sektor privá a mustra ku huntu ku e oumento aki, mester bin un pakete di medida pa suavisá e impakto di e oumento. Ta papiando en general riba fleksiblisashon di merkado laboral, den kua ta figurá tambe eliminashon di e lei di retiro.
E asuntu aki a kousa sintimentunan inkómodo den mundu sindikal i a provoká un reakshon tambe di dirigentenan sindikal.
Sindikalismo lo no koperá pa mata e klase trahadó. Nos no ta dispuesto pa bai sinta diskutí eliminashon di Lei di Retiro, asina presidente di Kámara Sindikal Sidney Justiana a bisa.
Ta konosí ku Lei di Retiro ta sagrado pa sektor sindikal. Sindikalismo a bisa enfátikamente tur tempu ku ta un lucha grandi i fuerte el a hiba den pasado pa haña e garantia aki pa klase trahadó. No por mishi ku e lei aki, segun sindikatonan di Kòrsou.
E punto aki lo bira un punto di hopi diskushon den e periodo benidero.

WILLEMSTAD, - Famia a disidí ku nan no ta publiká resultado di e outopsia ku a realisá riba kurpa di e diseñadó rubiano Percy Yrausquin.
E famia rubiano di e diseñadó ku a muri den forma trágiko, a disidí ku nan ke tene e resultado den nan mes seno, asina Thijs Willekes, bosero di e defuntu, a anunsiá ayera.
Djabièrnè último a realisá e outopsia riba kurpa di Percy Yrausquin.
Den promé instansha, a asumí ku Percy Yrausquin a muri despues ku el a kai den baño di su kas i a dal su kabes na un opheto duru.
Pero kiko outopsia a revelá, ta keda sekreto.
“No tabatin masha notisia, pero famia ke atendé ku e asuntu internamente anto esei ta algu komprensibel,” asina Willekes a agregá.
Ku tur probabilidat, lo dera Percy Yrausquin djasabra awor. Djabièrnè benidero, lo transportá e kurpa sin bida di e diseñadó pa Aruba, kaminda e entiero ta tuma lugá.
Durante e santu sakrifisio di misa, lo tei prinsipalmente su amigunan i su famia. “Pero tin un par di amigu na Ulanda ku tambe lo biaha pa Aruba pa asistí,” asina Thijs Willekes a agregá.
Morto di Percy Yrausquin a okashoná un shòk den mundu di diseño di moda, tantu na Ulanda komo pafó di e pais aki.
Hopi a lamentá e morto trágiko profundamente. Yrausquin tabata konosí komo un diseñadó masha popular.
Na kuminsamentu di sèptèmber, lo tin un misa di konmemorashon na Ulanda pa e defuntu.

WILLIAMSPORT, PA., - Despues di a yega Williamsports, pa., huntu ku su representante sr. Giovanni Viceisza i representante di CTB, Jair Jurrjens a tira e promé lansamentu pa despues bai un entrevista ku ESPN i sinta huntu ku e fanatikada, manera LA PRENSA a aportá for di djasabra.
Despues di wega ku Kòrsou a kai derotá 6-2 dor di Matamoros, Mexico, e picher di Liga Grandi yu di Kòrsou a bai bishitá e hungadónan lokal den nan kuarto.
Despues di a firma bala i algun artíkulo, el a papia ku e hungadónan pa enkurashá nan.
Tambe el a bai saka pòtrèt ku e hungadónan riba un seru di e parke.
“Mi kera bin e wega aki pa duna nan algun konseho i motivashon. No tin hopi scout di beisbòl ku ta bai Kòrsou, ke men mi ta spera ku mi presensia akinan i e echo ku mi a logra den Liga Grandi, lo enkurashá mas scout di beisbòl pa bishitá e isla”, asina Jurrjens a bisa durante di un rueda di prensa kaminda ku prensa lokal, nashonal i internashonal tabata presente despues di wega. “Ofisina di Turismo di Kòrsou a invitámi pa bini i mi tabata hopi kontentu ku e oportunidat aki”.

WASHINGTON – Rusia ta mustrando síntomanan di bai bèk na su pasado outoritario i su invershon di Georgia ta eksigí pa Merka bolbe saminá e relashon stratégiko entre e dos superpotensianan, asina e sekretario di Defensa Robert Gates a bisa djadumingu.
Uniendo su mes na e papiamentu intransigente, e sekretaria di Estado merikano Condoleezza Rice a eksigí djadumingu na e presidente di Rusia pa e someté su mes na un akuerdo di stòp ku tiramentu ku Georgia i e retirá su sòldánan di e eks repúblika soviétiko.
E presidente ruso Dmitry Medvedev a bisa ku e sòldánan di su pais lo kuminsá e retiro djaluna. Rice a señalá ku Medvedev a primintí e retiro di e trupanan ruso despues ku e presidente di Georgia a firma e tregua, pero esei no a sosodé te awor.
Rice a akusá Rusia di no ta respetá e akuerdo pa para tiramentu apesar ku djasabra el a anunsiá e retiro di e sòldánan ku a bai Georgia den un diálogo ku e presidente di Fransia, Nicolas Sarkozy.
E máksimo representante di diplomasía merikano a ekspresá su speransa di ku e biaha aki Medvedev lo kumpli su palabra.
Na su turno, Gates, den un referensha ku ta indiká mal notisia ku a rekòrdá riba e Guera Friu, a akusá Kremlin di “ta drentando den pasado na lugá di avansá pa futuro”.
E sekretario di Defensa a bisa ku “Nos ta trahando ku gran dedikashon pa e rusonan bai bèk na e komunidat di e paisnan”. Gates a agregá, “nos ta pensa ku Rusia ta bayendo den e direkshon ei”.

TIFLIS, Georgia – E kansier aleman Angela Merkel a ofresé un respaldo fuerte na Georgia, bisando ku e pais ta na kaminda pa bira miembro di Organisashon di Tratado d Atlántiko Nort (OTAN).
Merkel a bula djadumingu pa Tiflis, e kapital di Georgia, dos dia despues ku el a reuní ku e presidente ruso Dimitry Medvedev na Sochi, pegá ku Laman Pretu.
Den un diskurso Merkel a sugerí djadumingu ku OTAN lo por yuda rekonstruí e ehérsito di Georgia.
Merkel a apoyá e tregua ouspisiá pa Union Europeo bisando ku “e tin ku ser siguí “mesora” i ku e trupanan ruso mester sali di nan bisiña Georgia.
Merkel a reuní ku e presidente di Georgia Mikhail Saakashvili, meimei di diferente esfuerso diplomátiko di Wèst pa regla e konflikto eksistente.
Djabièrnè, Merkel a bisa ku algun akshon di Rusia na Georgia tabata “for di proporshon” i el a indiká ku e sòldánan ruso mester sali for di Georgia.

WILLEMSTAD - Sosiedat Antiano di Beibel den su esfuerso pa stimulá lesamentu i aplikashon di Beibel ta ofresé den e último siman di ougùstùs tres anochi di Seminario Bíbliko. E seminario akí ta pa tantu esnan ku ta nobo riba e tereno akí komo esnan ku ta konosí ku Beibel kaba.
E charlanan tur lo ta na enkargo di dos eksperto estranhero di United Bible Societies i un eksperto lokal, respektivamente Dr. Edesio Sánchez, Dr. Esteban Voth, i Dr. Marlon Winedt.
Dr. Edesio Sánchez ta un biblista spesialisá den Tèstamènt Bieu, ku hopi publikashon riba e tereno ei. Dr. Esteban Voth tambe ta un eksperto den entre otro Tèstamènt Bieu ku a kordiná e tim di tradukshon ku a tradusí henter e parti di Tèstamènt Bieu di ‘Nueva Versión Internacional’. I di Kòrsou tin Dr. Marlon Winedt ku ta konosí komo un biblista spesialisá den Tèstamènt Nobo i meskos ku su dos koleganan ariba menshoná ta traha komo konsultor di tradukshon di United Bible Societies.
E Seminario Bíbliko lo ta riba e siguiente fechanan:
Djadumingu 24 di ougùstùs: 18.00 - 21.00
Djaluna 25 di ougùstùs: 18.30 - 21.30
Djamars 26 di ougùstùs: 18.30 - 21.30
E promé anochi di e seminario bíbliko akí lo tuma lugá den ouditorio di Kurá Hulanda. Mirando e echo ku den museo di Kurá Hulanda tin un kolekshon respetá i interesante di tablèt di klei, i ku un di e biblistanan ku lo ta presente, esta Dr. Esteban Voth, ta un eksperto riba tereno di tablètnan di kuneiform, Sosiedat Antiano di Beibel a probechá di su presensia pa organisá e promé anochi den Tula Room di Kurá Hulanda.

WILLEMSTAD - Dia 23 di ougùstùs 2008 JCI IOBA Curaçao ta organisá na JCC Groot Kwartier di 9’or di mainta pa 12’or di mèrdia un tayer di “Mind Mapping”. Partisipantenan na e tayer aki lo sera konosí ku diferente téknika pa traha i usa e asina yamá “Mind Maps” (òf mapa mental”).
Awendia nos ta wòrdu konfrontá ku hopi informashon den nos bida diario. Na skol, na trabou i tambe den nos bida sosial, nos mester sa di tuma tur informashon, prosesá i memorisá esaki di un manera rápido i efisiente. E téknika di “Mind Mapping” a wòrdu desaroyá algun aña pasá dor di Dr. Tony Buzan i ta konsistí di pinta figuranan simpel ku ta ilustrá informashon ku nos ke tuma den nos mente. “Mind Maps” ta yuda prosesá tur informashon den nos mente di un forma efisiente. Ademas, e téknika aki ta yuda stimulá nos kreatividat i ta yuda nos kòrda tur informashon.
“Mind Mapping” ta rekomendabel pa studiantenan i tambe personanan ku den nan trabou tin ku strukturá, prosesá i kòrda hopi informashon. E tayer di “Mind Mapping” lo wòrdu duná dor di dos miembro di JCI IOBA Curaçao, Susan Vrolijk i Yuri Nicolaas. Partisipashon ta kosta ANG 5,- pa miembronan di JCI IOBA Curaçao i ANG 10,- pa introdusidonan. Pa registrá por tuma kontakto ku JCI IOBA Curaçao via di email jci.ioba.curacao@gmail.com òf via numbernan di telefòn 660-1497 / 527-8994.