ORANJESTAD- Sr. Ruben Hooi di Corsow, kende ta residencia na Michigan, USA, recientemente a bai mira caredanan di drag cu a tuma lugar na Michigan, organiza pa International Hot Rod Association, esta IHRA, conoci como Northern Nationals na Martin Michigan , cu a tuma lugar den e fin di siman di 1 pa 3 di Augustus 2008.
Sr. Hooi ta mustra den su carta pa La Prensa, cu el a keda sorprendi di a topa cu un ekipo di drag for di Aruba, esta ‘Aruba Team’, ku ta pertenece a sr. Ven Eman, huntu cu su jiu Trevor y resto di nan ekipo.
E ta sigui mustra cu hopi amabilidad y profesionalismo el a wordo atende dor di sr.Ven Eman y su jiu y nan ekipo, mustrando cu e kipo di Aruba di drag a haci un hopi bon trabou den e dianan di e evento.
“ Mi tabatin solamente e oportunidad di ta eynan un dia so y por a disfruta di e presentacion di nos hendenan di Antias (Aruba). Un di e performance di Trevor Eman den e categoria di Pro Stock tabata momento cu el a core contra su contrincante Mericano caminda cu hopi facilidad a vence su oponente c’un tempo di 6.46 y mas di 210 mph. Mi kier a probecha e oportunidad aki pa felicita e Team Aruba pa nan logro y menciona tambe cu mi ta hopi orguyo di nan performance aki na Merca. Keep Up the Good Work Team Aruba!!!”

E cantidad di acidente pa dia ta alarmante y e inseguridad riba nos careteranan ta aumentando tur dia mas y mas
Un yamada na comunidad totalidad pa percura pa un trafico mas sigur

ORANJESTAD- Ultimo añanan pueblo por a tuma nota di e tantisimo accidente riba nos careteranan. Hopi hende ta mira con hopi famia ta wordo perhudica profundamente dor di perdida tragico di un of mas familiarnan. E situacion insigur riba nos careteranan na Aruba ya pa algun aña a para bira hopi alarmante!
E inseguridad aki ta wordo causa pa hendenan cu riba maneranan iresponsabel ta maneha auto bou di influencia di alcohol y/o droga. Tambe tin esnan cu ta core auto mucho duro sin pensa riba e posibel consecuencianan desastroso pa nan mes y otro cu ta haci uso di nos careteranan.
Nos comunidad mester percura pa un trafico mas sigur, nos tur mester yuda nos autoridadnan via di un control social. Cada un persona na Aruba mester desaproba y no acepta mal uso di nos careteranan! “Si nos mira un amigo, un familiar of un desconosi ta usa nos careteranan iresponsabel: nos mester sinti nos mes responsabel y haci nos maximo esfuerzo como parti di nos responsibilidad y/o deber civico pa preveni un posibel desaster humano.
Nos tur mester realiza y sinti nos mes co-responsabel y tambe yama na tur momento pa contrubui pa un trafico mas sigur. Esaki no ta nifica cu ora tin un accidente cu automaticamente tur hende tin falta, no! esun cu tin falta ta e persona(nan) cu lastimamente ta iresposabel y sin escrupulo cu aparentemente no tin amor y tampoco respet pa bida di nan mes ni di otro hende!! Ta esaki ta e hendenan cu tin falta!!”, Parlamentario Mike de Meza ta indica cu tono di preocupacion.

ORANJESTAD- Den un comunicado di prensa Comité Olimpici Arubano ta mustra cu durante un encuentro special cu Embahador di Reino Hulandes na Beijing, sr. Rudolf Bekink, y representantenan di Embahada di Reino na China a organisa pa e delegación Arubano, sr. Bekink a expresa palabranan di felicitación na atletanan Jan Roodzant y Fiderd Vis di Aruba pa nan prestación durante e Weganan Olimpico. Embahada a coopera cu e delegación di nos isla durante e Weganan, pero tambe durante e simannan prome cu esaki. Di parti di Comité Olimpico Arubano a expresa aprecio na Embahador Bekink y a gradici e representantenan di Embahada di Reino, entregando regalo y recuerdonan.
COA a splica cu e participación Arubano na e Weganan di Beijing a requerí un preparación amplio y largo. Pa logra e resultadonan cu tabata tin planifica, entre otro e promoción di nos isla durante e evento mundial aki, COA a hasi esfuerzo na diferente nivel. Awor, cu e Weganan Olimpico ta tumando lugar, por mira cu satisfacción con en berdad Aruba ta dignamente representa na e podio mundial di deporte.
Fiderd y Jan a gradici Embahador Bekink y a comparti nan experiencia cu e staff di Embahada cu tabata presente durante e encuentro na Beijing. Pa clausura e anochi, Jan Roodzant y Fiderd Vis a wordo presenta na e conocido na publico den e “cas di hospitalidad” di Hulanda durante e Weganan Olimpico, esta e Holland Heineken House, caminda tabata tin masha atención pa presencia di e dos hoben atletanan. Durante e anochi hopi tabata esnan cu e bin pidi autografia di Fiderd y Jan, y kier a tende di nan con e experiencia Olimpico tabata ta. Bisti den nan uniform di Aruba, e dos deportistanan a hasi un bunita propaganda pa nos isla, mientras cu periodistanan Hulandes tambe a mustra atención pa e atletanan Arubano.

ORANJESTAD- U comunicado emito pa Gobierno ta mutra c’un multitud di persona di tur skina di e comunidad Arubano a acudi dialuna atardi na Misa Inmaculada Concepcion na Santa Cruz pa e entiero di Sra. Vda. Felepa Oduber, mama di nos Ministro Presidente Nelson Oduber. Alavez varios mandatario a bin for di exterior p’asina duna respet y reconocimento na Mama Felepa. Entre otro tabata presente Ministro Presidente di Antiyas Hulandes, sra. de Jongh-Elhage y Minister di Transporte y Comunicacion, sr. Maurice Adriaans.
E gran cantidad di persona cu a asisti na e entiero aki ta un muestra palpable cu Mama Felepa ta un persona cu a gana aprecio y respet den henter comunidad pa tur locual el a haci riba tereno social y religioso.
Cu Dios Tata Topoderoso lo tin un bon lugar den su Reino y cu Mama Felepa sosega na paz.

Ora ta toca San Nicolas: hopi hende lamentablemente ta bisa cu no por

ORANJESTAD- Mike de Meza, Parlamentario di AVP ta haya locual ta pasa cu San Nicolas y vecendario hopi remarcabel! Tur hende por corda con hopi partido politico, gruponan ambientalista, oportunista politiconan y hasta algun comerciante cu no tin ningun interes na San Nicolas a boycotea y protesta contra e proyecto di race track y hotel na Seroe Colorado na aña 1999 y 2000. A bisa cu e medio ambiente na Seroe Colorado (pa nort y pariba di Seroe Colebra, exLago hospital) lo daña. Lo core cu shoco y lagadishi tambe a wordo bisa. Wel awe te ainda ta clip cu calichi so tin riba e localidad ariba menciona.
Gran parti di e shoco y lagadishi a wordo comi dor di boa y ningun momento a mira ningun di e personanan cu e tempo a protesta y boycotea e proyecto
Mas aleu de Meza ta comenta cu algun parlamentarionan di MEP na 1997 pa 2001 cu awe ta ministernan tambe a boycotea e proyecto y te hasta a argumenta fuertemente cu Aruba ya a yega su capacidad di carga y no mester ningun desaroyo mas.
Wel locual ta remarcabel cu for di 2001 ora cu e gobierno di MEP a tuma e maneho pa gobernacion por a mira un aumento di proyectonan duna cu a aumenta e capacidad cu Aruba mester carga sin cu tin un beneficio extra pa pueblo di Aruba.
Aruba den e añanan benidero mester bai importa mas cu 10 mil hende extra pa cumpli cu e proyectonan duna dor di Gabinete Oduber III y IV. Unda e argumento di capacidad di carga a keda cu hasta gremionan social y comercial tabata usa! Tambe si por ehempel bai wak cuanto naturalesa a wordo kita/rosa for di banda di Eagle y banda di Palm Beach anto cada persona obhetivo of cu realmente sa di medio ambiente lo keda babuca!

Productor Hulandes kier traha pelicula y studiantenan Mericano cu proyecto di investigacion

ORANJESTAD- E caso di desaparicion di Natalee Holloway ainda ta biba serca hopi hende y instancia y for di ayera tin dos informacion cu ta bolbe mustra con hopi e caso aki a mishi cu hende rond mundo.
Na Hulanda a bira conoci cu e productor di cine Hulandes, Hans Pos di ‘Shooting Star Film Company’, a anuncia su plan pa produci un pelicula riba desaparicion di Natalee Holloway, kende na 2005 a desaparece misteriosamente for di Aruba.
Pos mes lo dirigi e pelicula aki y a basa su produccion riba e buki ‘Vuurkoraal” cu a wordo scirbi pa e periodista Hulandes, Annet de Jong, mientras cu Simon de Waal ta trahando riba e scriptie di e pelicula cu mester wordo lanza na 2009.
PROYECTO
Na mes momento un grupo di studiantenan di Bauder College, hunto cu CNN, ta trahando riba un proyecto investigativo pa nan scol riba e casonan di Chandra Levy y tambe riba Natalee Holloway. E grupo di 4 studiante aki ta forma parti di e proyecto di CNN cu ta carga e nomber di “The Campus Crime Club” cu ta permiti studiantenan di diferente college na Merca pa participa den proyectonan di investigacion.
E studiantenan ya caba a reuni cu diferente instancia y nan ta acumulando tur informacion posibel riba e caso di Natalee Holloway caminda nan lo concentra mas tanto un investigacion den e laman rond Aruba.
Como parti di e proyecto ta cu nan lo bin Aruba pa drenta laman y haci nan investigacion necesario pa mira si lo recupera ainda e curpa di Natalee Holloway pero e grupo, pa medio di nan maestro, Sheryl McCollum, a mustra cu nan investigacion na Aruba ta permiti nan mete den ningun asunto legal di e isla y si mester yega e momentonan cu nan lo haya algo, nan tin cu bandona e investacion avisa autoridadnan di esaki, pa e ora autoridadnan di Aruba sigui atende cu e caso e ora.

WILLEMSTAD - E miembro di Sitek Marbella Felipa ta bisa, ku mester trata e deterioro ku diferente miembro a señalá den Sitek.
Dia 2 di yüni, miembro di Sitek Marbella Felipa a entregá un karta na Sitek, kaminda el a hasi un petishon pa un reunion general ekstraordinario pa trata funshonamentu di Sitek, direktiva i presidente pa loke ta trata enseñansa.
E karta a bai ku firma di alrededor di 200 miembro ku ta representá 10% di miembresia ku ta segun reglanan di Statüt. E miembro a ekspresá su malkontentu i desepshon, pa e manera ku a trata tantu e petishon komo un persona komo miembro den e karta ku el a mustra prensa durante un konferensha di prensa. Sinembargo, e ta kombensí ku funshonamentu di Sitek ta bon sirbí ku un debate habrí ku miembresia. Di e forma aki e ta trata e deterioro señalá pa un kantidat di miembro. Loke sin mas Felipa kier, ta konsiderá komo deterioro ta e insidente ku a sosodé kaminda a skirbi palabra malu tras di su nòmber riba e lista di presensia. Apesar di e diskulpa den e reunion e ta keda un mal señal, un señal di deterioro. I ta p’esei konforme artíkulo 8 insiso 6b e ta pidi reunion ekstraordinario pa trata funshonamentu, direktiva i presidente di Sitek pa loke ta trata enseñansa, posishon hurídiko, maneho general, maneho sindikal i desaroyo sosial den nos komunidat. E ta spera di haña un kontesta mas pronto ku ta posibel. Tambe e ta pidi pa konsulta kuné pa fiha e fecha di reunion promé ku yam’é por eskrito na tur miembro konforme art. 8 insiso 9 di statuto di Sitek. Finalmente e ta ekspresá su strañesa i malkontentu di no a haña ni sikiera un kontesta riba e karta fechá 23 yüni 2008, kaminda a pidi koperashon pa kumpli ku art. 8 insiso 6b di statuto di Sitek. P’esei pa kumpli ku esaki el a inkluí e kantidat di firma preskribí huntu ku su karta.

WILLEMSTAD – Djadumingu último a tuma lugá e di sinku buèlta di e final di kampionato di Dam Senior di Kòrsou.
Wilfred Daantje kende mester a hunga kontra di Antonio Marquita, a pèrdè su di dos wega konsekutivo pa default, lokual a nifiká ku outomátikamente su diskualifikashon.
Pa e motibu aki, segun regla, no a hunga ainda e mitar di e total di weganan di e final di kampionato, Daantje su promé tres partidonan a keda anulá.
E sobrá resultadonan di e di sinku buèlta tabata:
Eisden-Cadeau 2-0
Alias-Maduro 2-0
Wilson-Miguel 2-0
Angela-van Eiken 2-0
Leocaria-Monk 2-0
E standing despues di sinku buèlta ta:
-Raoul Alias/Mijail Eisden 5-8
-Nelsen Angela/Antonio Marquita 4-7
-Marvin Leocaria 4-6
-Glenn Monk 5-5
-Mario Wilson 4-4
-Gedion van Eiken 5-3
-Leonardo Cadeau 5-2
-Franklin Maduro 4-0
-Victor Minguel 5-0
Djamars anochi 19 di ougùstùs, e weganan lo kontinuá pa mitar di ocho, 19:30pm, den sala di wega riba e promé piso di San Marco Hotel.

WILLEMSTAD - E okupashon di hotèlnan na yüli tabata un oumento di 1.03 porshento kompará ku aña pasá. No ta un oumento grandi, pero mester realisá ku e oumentonan ta bira ménos, pasobra ku entre otro nos hotèlnan ta alkansando un okupashon di 90 porshento. “I pa bo ta riba 90 porshento di okupashon ta algu hopi bon”, asina Billy Jonckheer di CHATA a splika. E miembro di direktiva di CHATA a splika, ku na 2007 Kòrsou a logra e 90 porshento di okupashon tambe. Un otro faktor ku ta kondusí na e oumento chikí aki, ta e hecho ku for di Merka, pa basta dia a kuminsa konstatá un slow down den e kantidat di turistanan. Esaki ta konta pa Europa tambe i Venezuela. Jonckheer: “Mi ta kere ku awor aki Europa a kuminsa sinti e problemanan ekonómiko ku Merka a sinti. Ta notabel tambe ku euro a kuminsá baha i ketu bai tin sierto problema ku preis altu di krudo”.
Jonckheer ta mustra, ku no opstante e situashon aki, si mira en totalidat i kompar’é ku aña pasá, nos tin kasi dos i mei porshento mas haltu. “I mi no ta kere ku ningun otro isla den Caribe tin un average di okupashon di hotèl di kasi 86 porshento, den e promé seis lunanan di aña”. Ta p’esei CHATA ta konvensí, ku tòg tin un desaroyo hopi positivo. E realidat ta keda sinembargo, ku nos ta bai slow down te ora ku hotel Renaissance habri, ku lo perkurá pa mas kamber.
EUROPA
Pa loke ta trata e akuerdo di aviashon ku minister Adriaens a firma algun dia pasá na Alemania, Jonckheer a reakshoná bisando, ku kualke areglo ku por perkurá pa mas ‘airlift’ pa Kòrsou, ta algu hopi positivo. “Esei ta un di e problemanan ku nos tin, prinsipalmente pa loke ta trata e merkado merikano”. Segun Jonckheer, a kuminsá studia tambe e posibilidatnan pa haña mas airlift for di entre otro Alemania i Scandinavia.

WILLEMSTAD - E lidernan di Kolaborativo, den persona di Alcides Cova i Roland Ignacio, den un enkuentro ku Kámara di Komèrsio di Asosashon di Komèrsio i Industria, VBC, a tende e posishon di e instanshanan aki, relashoná ku e konsekuenshanan di oumento di sueldo mínimo. Den e reunion aki Kámara di Komèrsio i VBC a motivá nan posishon, dikon e oumento di salario mínimo mester bai flankeá ku sierto medida.
LA PRENSA a komprondé ku a trata di un reunion informativo, pero e lidernan sindikal a mustra e representantenan di tantu Kámara di Komèrsio komo VBC, ku e oumento di salario mínimo ta hustifiká i ku en realidat si apliká tur e korekshonnan nesesario, e oumento mester ta muchu mas tantu.
Manera LA PRENSA a indiká den un otro artíkulo den korant si awe, entretantu pa awe nochi, Plataforma Sindikal a konvoká un reunion general pa tur sindikato. Alcides Cova, di Plataforma Sindikal, a splika ku durante di e reunion aki lo informá e sindikatonan tokante di desaroyo di e reunion di ayera tambe.
Otro asuntunan ku lo haña atenshon den e reunion di awe nochi ku e sindikatonan lo ta e lei di retiro. E asina yamá kolchon sosial tambe lo haña atenshon, den e reunion di urgensia ku Plataforma Sindikal a konvoká. Un aklarashon ku sigur lo tin awe nochi, ta e mal informashon ku salario mínimo ta mará na e lei di retiro. “Nada di esei no ta bèrdat”, asina Cova a enfatisá. Pa loke ta trata e asuntu di kolchon sosial, segun Alcides Cova, e organisashon sindikal ta hopi desepshoná ku e aktitut di gobièrnu, pasobra e no ta hasiendo nada. E sindikatonan ta hasiendo un kantidat di esfuerso pa tene e komunidat trankil, pero gobièrnu na su turno, no ta kumpli ku su promesanan. Asina Cova a bisa, indikando ku awe nochi, lo disidí ta kon lo mester sigui atendé e asuntunan aki.

MIAMI, Florida, Merka, - E tormenta tropikal Fay tabata move awe pegá ku kostanan sùitwèst di Florida sin gana forsanan pa bira orkan, produsiendo áwaserunan fuerte na sùit di e península, Sentro Nashonal di Orkan di Merka (CNH) a informá.
E ‘wowo’ di e tormenta a krusa e kosta na Cape Romano, situá mas o ménos 90 kilometer sùit di e balneario Fort Myers, e sentro ku sede na Miami a agregá.
E tormenta su bientunan nunka a superá 96 kilometer pa ora miéntras e tabata pasa na Florida Keys i tabata menasá e zona sùit di Florida.
Ayera Fay a yega Florida provokando áwaserunan fuerte ku ta’tin e tendensia di fortalesé su mes den próksimo oranan den direkshon pa kosta sùitwèst di e estado.
Promé, e boletin di Sentro Nashonal di Orkan (CNH) a indiká ku Fay ta moviendo ku un velosidat di 19 kilometer pa ora i tabata spera ku den e promé oranan di awe mainta e lo bai ta serka di alkansá e kategoria di orkan 1, kier men, ku bientunan di 119 kilometer pa ora.
E yegada di Fay ayera práktikamente a paralisá sùit di Florida.
A sera skolnan, a redusí e aktividat laboral tantu na empresanan privá komo organismonan públiko.
Na e playanan di kosta ost di Florida mas ku shen ‘surfer’ a probechá di e olanan fuerte, miéntras outoridatnan a insistí riba peliger di e bientunan, e áwaserunan i e posibilidat ku por produsí tornadonan aislá i inundashonnan.

WILLEMSTAD – Partido Forsa Kòrsou ta manda un pabien kaluroso na tur e deportistanan ku atrobe a kontribuí na mantené e nòmber di Kòrsou na haltu den eksterior.
“Bosnan ta nos berdadero embahadornan deportivo”, e partido lila a splika. “Tambe Forsa Kòrsou ta gradesí i felisitá e mayornan, entrenadónan, coachnan i tambe tur e deportistanan ku no a haña e oportunidat di a bai representá nos pais den eksterior, pero ku si a kontribuí na e preparashon i pues e éksitonan di nos deportistanan”. Segun Forsa Kòrsou ta importante remarká i suprayá ku un biaha mas a keda probá ku Deporte ta un di e instrumentonan mas importante pa desaroyo di kurpa i mente di spesialmente nos hóbennan i ta pa e.o. e motibu aki partido Forsa Kòrsou lo sigui duna su kontribushon positivo na amplia i oumentá e fasilidatnan deportivo pa kontinuá i amplifika e desaroyo aki.

 

WILLEMSTAD – Mañan mainta Kòrsou lo ta paralisá totalmente pendiente di e gran final di 200 meter di Weganan Olímpiko 2008. E dos ganadornan di e semifinalnan di awe tabata e yu di Kòrsou, Churandy Martina den e promé kareda ku un tempu di 20.11 i despues Usain Bolt den e di dos semifinal ku un tempu di 20.09. Ku esaki e esenario pa e final di mañan ta kla. Kòrsou lo ta den espektativa pa wak si Churandy lo por gana e gran faborito Usain Bolt òf si e por logra su promé medaya olímpiko. Ban spera ku kontrali na awe ku pueblo di Kòrsou lo por mira e gran final aki bibu.

WILLEMSTAD - Desishon a kai. Gobièrnu Sentral mester drei bèk e desishon ku el a tuma pa revoká rekonosimentu di Kolegio Omega. Korte, ku dicho sea de paso a reprochá gobièrnu pa su manera di aktua den e kaso aki, a disidí ayera ku gobièrnu mester sigui rekonosé e skol aki.
E istoria ta konosí.
Gobièrnu, manera LA PRENSA a informá ekstensamente, luna pasá a revoká e rekonosementu ofishal ku Kolegio Omega tabatin.
“E desishon ta basa riba e nesesidat pa garantisá nivel na e skol”, asina minister di Enseñansa Omayra Leeflang a anunsiá.
“E skol tin algun aña ta funshonando. Inspekshon di Enseñansa a hasi un análisis di e situashon na e skol i a yega na e konklushon ku kos no ta kanando manera mester ta. Nos a bin konstatá”, segun e mandatario, “ku tin un diferensha grandi den e sifranan di eksamen, loke ta inaseptabel pa gobièrnu.
Un mucha ku pasa eksamen na e skol, ta logra sifranan positivo, tin biaha hopi haltu, pero ora ta trata di eksamen sentral, e mesun mucha ei no por duna e mesun prestashon. Basá riba un análisis profundo di Inspekshon di Enseñansa, nos a yega na e konklushon ku no ta responsabel mas a mantené e skol aki komo un skol ku rekonosimentu ofishal,” segun e minister.
Fundashon Kolegio Omega ku no tabata di akuerdo ku esaki, a kuestioná e desishon severamente. Ta kon nan por sigui ku nan estudio mas avansá, si nan no ta na e nivel adekuá? mayornan a puntra.

WILLEMSTAD - Wardakosta di Antia I Aruba, den e mardugá di ayera djaluna a logra konfiská un boto den awanan parti ost di Kòrsou den kua tabatin no ménos ku 160 kilo di kokaina.
Wardakosta a tuma nota di e boto na momentu ku e tabata nabegando den direkshon di kosta di Kòrsou.
Sinembargo, na momentu ku un unidat di Wardakosta a yega serka e boto sospechoso, e tripulantenan a bula den awa i a logra subi tera kaminda nan a disparsé.
No ta masha kla ta kuantu hende tabatin na bordo.
Den, e boto ku nan a laga atras, outoridatnan a haña bultonan di kokaina pa en total 160 kilo.
Huntu ku e kokaina, a haña tambe un arma di kandela i un kaha ku 100 bala. E investigashon ta kontinuando den e kaso aki.
Esaki ta otro bon trabou di Wardakosta, ku último añanan aki ta hasiendo esfuersonan grandi pa kontrolá i evitá ku droga ta drenta nos pais atraves di nos kostanan, algu ku a bin ta sosodé ku masha frekuensia último añanan.

WILLEMSTAD – “Partido PAR a demostrá klaramente, ku e no por goberná e pais aki. PAR de fakto, a sekuestrá futuro di e kompania Curaçaose Dokmaatschappij”, asina lider di Niun Paso Atras Nelson Pierre a deklará, despues di loke a sosodé ayera den Konseho Insular.
Ayera mainta mester tabatin e reunion públiko pa atendé ku e problemanan ku e astiero ta pasando aden.
E reunion a para, pasobra partidonan di koalishon no por a forma quorum. Gezaghèber a posponé e reunion te ku próksimo aviso.
Pa Nelson Pierre, esaki ta un kos di lamentá.
“Partido PAR, den su lucha interno ku ta afektando e partido seriamente, básikamente konosé tres koriente awor. Na promé lugá bo tin direktiva di PAR ku su sede na Fokkerweg ku na kabes lider di e partido Emily de Jongh-Elhage, bo tin e PAR den Bestuurscollege ku ta sostené diputado Eugène Rhuggenaath ku e posishon ku no por nombra Franklin Sluis komo direktor i mester nombra un direktor interino na e kompania anto bo tin e PAR representá den hunta di komisario, ku ta para’riba ku ta Franklin Sluis mester bira direktor nobo di CDM.
Dòk ta den problema serio, anto awor ta menasa di bira víktima tambe di un solo partido polítiko. Ta parse ku ta den PAR ta disidí destino di e pais aki. Awor aki, futuro di Dòk ta den man di partido PAR,” Nelson Pierre a afirmá.
El a mustra ku partido PAR tin komo seis luna ta reuní. A pone masha hopi reunion sin ku a sali afó. Anto ta e partido aki ta papia di bon gobernashon, di corporate governance i di saka polítika for di kompanianan di gobièrnu.

WILLEMSTAD – “Nos semper a mustra nos boluntat, koperando pa ora oposishon pidi un reunion públiko, yuda forma quorum ora esaki ta bai tuma lugá.
Pero no por t’asina tampoko ku oposishon ta bin ku yen di buèlta straño i wega dudoso pa purba hinka gobièrnu den huki. Nos a koperá hopi biaha, pero e kos aki no por sigui asina. Oposishon mester siña hiba un reunion den forma responsabel”, lider di frakshon di PAR den Konseho Insular drs. Dennis Jackson a deklará.
Ayera, e reunion públiko di Konseho Insular pa trata e problemanan rondó di Dokmaatschappij no por a sigui, pasobra no tabatin quorum.
Anthony Godett ta den eksterior e dianan aki, miéntras ku Renfred Rojer ta sufriendo kebrante di salu. Esei a pone ku koalishon tabatin apénas 9 miembro.
Dennis Jackson a splika ku ta un hecho ku oposishon so, no por logra e mayoria pa e reunion tuma lugá, pasobra ta 10 miembro oposishon tin. Esei ta pone ku ta tur biaha koalishon ta duna un man pa logra e mayoria aki.
“Awor, no por t’asina ku koalishon ta yuda forma quorum, anto partidonan di oposishon ta bin ku tur sorto di moshon, proposishon i kosnan straño ku nos no por aseptá i ku ta hinka mesun koalishon ku a duna un man den problema,” el a bisa.
Jackson a splika ku esei den pasado a yega di sosodé na diferente okashon ku konsekuensha, ku koalishon mester a bandoná sala di reunion i no partisipá mas na votashon.
“Anto ora nos bandoná sala di reunion, nos ta tende ku nos ta iresponsabel, ku nos no ta para pa loke nos ta kere aden i tur sorto di otro kos. Esei tampoko ta korekto,” Jackson a bisa.

WILLEMSTAD - Percy Yrausquin a muri di un atake di serebro. Su morto no tabatin nada ke ber ku aktonan kriminal manera rumornan a kore den e dianan ku a pasa”, asina su propio famia na Aruba a anunsiá.
Manera LA PRENSA a informá den su edishon di ayera, den promé instansia e famia a disidí ku nan no ta publiká resultado ofisial di e outopsia ku a realisá riba kurpa di e diseñadó arubiano Percy Yrausquin.
E famia arubiano di e diseñadó ku a muri den forma trágiko, a disidí ku nan ke tene e resultado den nan mes seno, asina Thijs Willekes, bosero di e defuntu a anunsiá.
Djabièrnè último a realisá e outopsia riba kurpa di Percy Yrausquin.
Den promé instansia, a asumí, ku Percy Yrausquin a muri, despues ku el a kai den baño di su kas i a dal su kabes na un opheto duru. Asta a tene kuenta ku den e aksidente aki e lo a kibra su garganta.
“No tabatin masha notisia, pero famia ke atendé ku e asuntu internamente anto esei ta algu komprensibel,” asina Willekes a bisa den promé instansia.
Famia a disidí finalmente tòg di anunsiá kousa di su morto. Percy Yrausquin aparentemente tabata sufri di doló di kabes fuerte, ku nan a kalifiká komo un sorto di migrèn, pero segun su famia, e no tabata papia di esaki ku su amigunan. El a yega di bai dòkter pa esaki den pasado. Polis anteriormente a desmentí tur vershon di un posibel krímen den e kaso aki.

WILLEMSTAD – Fundashon Konsiente ta kontinuá e siman aki ku su proyekto di konsientisashon pa asina ei kontribuí na un mihó komunidat di Kòrsou, ku un spòt oudiovisual ku ta keda transmití un luna largu na Tele Kòrsou i na TV11. Den e spòt ta duna un bista di kon influensianan internashonal ta influensiá nos tur na Kòrsou, pero ku kada siudadano por tuma desishon pa su mes i pa su komunidat basá riba informashon ku ta disponibel pa tur hende. E spòt ta enfoká e kara multi kultural i multi rasial ku ta Kòrsou.
Fundashon Konsiente a lanta ofisialmente na yüni último komo reakshon di enkuentro di siudadanonan konsiente preokupá ku ke duna un man pa informá komunidat i kontribuí kaminda por, pa yega huntu na un mihó Kòrsou. A sinti un bashí grandi, pasobra no tin realmente dunamentu di informashon pa asina ei duna i laga hendenan mes krea hèrmènt pa nan yuda nan kurpa pa asina ei eliminá òf sikiera suavisá situashonnan ménos positivo ku tin. Pa Fundashon Konsiente ta asina ku tur hende ku ke sa i ku ke realmente haña informashon konkreto, lo por tuma bon desishon pa benefisiá su mes.
E spòt konsiente ta pa Fundashon Konsiente un estímulo pa yega na un tópiko di kòmbersashon mas, kaminda hendenan ku ke Kòrsou bon por interkambiá di idea, formulá nan pensamentu riba e rumbo ku nos mester bai òf por bai i stimulá mas hende den nos komunidat pa nan ta konsiente. Importante ta pa tur hende komprondé ku ta kada un hende den komunidat por yuda pa nos tin i mantené un komunidat konsiente. Ke men ku ta e union den komunidat ta bai trese e benefishinan asina nesesario pa tur.

WILLEMSTAD - Dia 14 di ougùstùs último, sra. Lilian Conep, shofùr di ambulans, a selebrá e hecho ku el a kumpli 30 aña den servisio. Sra. Lilian Conep tabata un di e promé hende muhénan ku a drenta servisio di ambulans komo shofùr.
CEMS ta spera ku Lilian lo kumpli hopi aña mas ehersiendo e bon trabou ku el a bin ta hasi pa e komunidat i ku e lo sigui di ta un bon ehèmpel pa su koleganan. Un biaha mas masha pabien ku e logro aki.
Riba e foto di robes pa drechi: Sra. Liesbeth Luis-Calister hefe direkto, hubilario Sra. Lilian Conep i Sr. Sharlon Melfor direktor general.