WILLEMSTAD – For di awe mainta pueblo di Kòrsou tabata pendiente pa Churandy Martina su kareda di 200 meter. Asta e reunion di Konseho di Minister i e reunion públiko di Konseho Insular a para dado momentu pa e ministernan, diputadonan i miembronan di K.I. por a disfrutá di e hazaña di Churandy. Kòrsou tabata ariba’bou. Finalmente Churandy a sali di dos den e kompetensia pero a deskualifiká pa motibu ku su pia a mishi ku e liña blanku ku ta parti e ban di dje i esun di e atleta banda di dje. Entretantu e delegashon antiano a entregá un protesta.

WILLEMSTAD - Omega College ta masha kontentu ku resultado i ta algu ku nan a spera, asina presidente di Omega Anthony Eustatius a duna di konosé. Manera e kaso a kondusí den Korte, el a bai durante e kaso. No a hasi ningun investigashon, a konstatá sierto diskrepansha i nan a sugerí ku lo tabatin algu robes. Riba pregunta di hues kon nan a yega na desishon pa suspendé e rekonosementu no por a kontestá. Hues a bisa nan ku e solo hecho ku tin diskrepansha no ta nifiká ku tin ‘misbruik’. A keda rekonosé ku tur kaminda tin diskrepansha, pero esaki no ta nifiká. Eustatius a bisa ku e mensahe mester bai pa Inspectie. E instansha mester formulá kriteria, asina tur skol sa na kiko mester tene nan mes. No ta e skol mester formulá kriteria. Awor e kaso ta bai den un proseso mas largu, prosedura di fondo, mas amplio, pero básikamente mesun prosedura ta tuma lugá. E mayornan tabata den un kompletu euforia i Omega ta bisa ku tur kos lo sigui normal i tur hende por keda trankil.
Eustatius a bisa durante e konferensha di prensa ku a premirá e resultado aki pasobra den tratamentu di e kaso a ripará ku representantenan di gobièrnu a bin ta papia mentira i trose palabra. E argumentashon di hues ta duna tur indikashon ku den prosedura di fondo tambe lo haña mesun resultado. E presidente di Omega a bisa ku e ta spera ku Minister a siña su lès i no bai den prosedura di fondo pasobra esaki ta nifiká un Segundo derota sigur. Gobièrnu simplemente no por a proba ku Omega a hasi mal uso di e dekreto ku e skol a haña. No por a proba ku a hasi ningun investigashon ni ku a hasi esaki na otro skolnan sekundario riba mesun nivel. Hues a konsiderá ku gobièrnu no a duna e skol oportunidat pa reakshoná riba e puntonan di problema i ta p’esei mes a anulá e desishon di e minister pendiente un prosedura di fondo.

BEIJING – Argentina, ku dos gol di Sergio Agüero, a likidá Brazil 3-0 i a avansá pa e final di futbòl olímpiko ku lo tuma lugá djasabra kontra Nigeria.
A triunfo argentino ku hopi fasilidat, a kibra e ambishon brasileño di konkistá oro olímpiko, e úniko trofeo ku e falta den su glorioso historia.
“Kun” Agüero, novio di un di e yunan di Diego Maradona, ídolo argentino kende tabata presente den stadion, a anotá na di 52 i 59 su promé dos golnan den e torneo, Juan Rooman Riquelme a sera e kuenta ku un pinalti na di 75.
Kibrá pa e sota, un Brazil impotente a kaba ku dos hungadó ménos pa ekspulshon di Lucas na di 78 i Thiago Neves na di 84, tur dos pa wega shushi.
“Realmente un 3 pa 0 kontra Brazil no ta un kos di tur dia. Esaki ta hasi nos hopi kontentu dilanti e final” ku Nigeria, e bolante argentino Javier Mascherano a komentá. E partido ei lo ta un ripitishon di e final di Atlanta 1996, ku e “Aguilanan” afrikano a gana.
Demasiado rèspèt pa e rival. Esei tabata un salida komun ora e wega a kuminsá dilanti 60.000 hende ku a pasa krusá den un papiamentu: Nan a pas’é ta bati man pa un bon hugada di Ronaldinho o Lionel Messi, o un rechaso di Nicolas Pareja ku direkshon pa e Muraya Chines.
Tabata un goso pa mira Ronaldinho i Messi hunga, prinsipalmente den e promé parti: nan ta dal’é, mustr’é i skondé, ku ternura i un kalidés den tratamentu ku e bala.

SHANGHAI – Argentina atenshon: Nigeria ta den final atrobe i ku forsa di gol
E “Aguilanan” afrikano a avansá pa e final pa medaya di oro den futbòl maskulino ora nan a bati Bèlgika 4-1.
Nigeria ku a gana Argentina den e final di Atlanta ’96, un biaha mas lo hunga pa e oro ku e selekshon albiseleste.
E bèlga- i brazileronan no a keda nada mas pa hasi ku hunga pa e medaya di bròns.
Olubayo Adefemi a habri e goliada na di 17, Chinedu Ogbuke a enkargá su mes pa oumentá na di 59 i 72 i Chibuzor Okonkwo a sera na di 78. Laurent Ciman a deskontá na di 88.
Velosidat, gana i pòlbu den nan sapatu. Eseinan tabata e tributonan di e nigerianonan, ku a hasi nan rivalnan loko ku nan baile.
I awor un Nigeria ku yen di sanger hóben a keda na un paso pa bolbe yega na gloria.
Na Atlanta, ku Emmanuel Amunike i Nwankwo, entre otro, a eliminá Brazil den semi final i despues a gana oor den e final ku Argentina.
“Tur nos hungadónan ta hopi hóben i a kontribuí hopi”, e treiner Samson Siasia a bisa, despues di a bisa ku e no por kompará nan ku esnan ku a gana oro 12 aña pasá.
El a indiká ku “nos lo hasi tur loke nos por pa sali ku e oro”.
For di salida, e velos afrikanonan a preshoná e bèlganan i na di nuebe minüt a duna e promé atvertensia ora e kapitan Victor Obinna a habri wega na banda robes ku hopi spit i a pasa pa Peter Odemwingie, kende ku e gol na su posishon a tira den shelu.

WILLEMSTAD - “No ta hasi falta gana un medaya pa bo ta viktorioso, Churandy a demostrá ku pa motibu ku el a perseverá i tabata determiná pa alkansá éksito ya kaba e ta un kampion!”, asina representante di Banco di Caribe a komentá ayera nochi na momentu ku a instalá e ‘banner(nan)’ gigante na e toren di Banco di Caribe riba Schottegatweg Oost.
“Banco di Caribe semper a apoyá deporte lokal, ku e homenahe chikitu aki na nos sukursal prinsipal nos ke felisitá Churandy Martina pasobra pa nos e ta kampion kaba, e ta un ‘role model’ pa nos hóbennan i dor di alkansá su metanan e ta un modelo di dedikashon i disiplina”, asina representante di Banco di Caribe a finalisá. “Churandy pabien...di Caribe!

WILLEMSTAD - E reunion a bai hopi bon, e partisipashon i diskushonnan a bai bon. A trata kolchon sosial i forsa laboral, salario mínimo i lei di retiro. Un karta ta bai pa gobièrnu, pa rekòrdá Bestuurscollege riba e promesanan di kolchon sosial. Asina Alcides Cova, di Plataforma Sindikal a informá.
Durante di e reunion ayera di e sindikatonan a bin tambe hopi kla dilanti, e asuntu di bahamentu di preis di krudo. Esei tambe ta algu ku e sindikatonan ke haña aklarashon di dje, di parti di gobièrnu.
Un otro karta ku Plataforma Sindikal ta manda pa gobièrnu, ta esun relashoná ku salario mínimo i lei di retiro. “Ta trata aki dos asuntu apart”, asina Cova a indiká. Pa loke ta trata e salario mínimo, Plataforma Sindikal ta di opinion ku e 15 porshento di oumento ta muchu tiki. Pero loke ku mester tuma lugá ta, ku mester realisá e subida di 15 porshento tan pronto posibel. Esei mester tuma lugá konforme e promesa, ku ta dia 1 di sèptèmber e ta bira efektivo. E reunion general di e sindikatonan afiliá na Plataforma Sindikal, a konkluí ku e posishon asumí dor di Raad van Advies, ta hopi kuestionabel. Enkuanto e lei di retiro, e sindikatonan a kumbiní ku no ta kuminsá un diskushon riba e asuntu aki. “E lei di retiro ta enserá un protekshon pa mundu laboral”. E sindikatonan ta konvensí sinembargo ku mester kambia algun aspekto di e lei manera e ta awor aki, pa e por funshoná mas mihó na interes di e klase trahadó.

WILLEMSTAD - E direktor di Curoil, mester keda ku su kuater siman di fakansi, konforme e petishon di Hunta di Komisario, pa por konkluí e investigashon imparsial. Esaki ta loke ku a keda disidí ayera despues ku wes a indiká e partidonan pa konsultá ku otro, despues ku Gensley Capella, a entamá un kaso kontra di Curoil. Motibu di e kaso tabata, pasobra ku a skòrs e direktor, pa por hiba un investigashon relashoná ku e kaso di negoshi den negoshi na Curoil.
Despues gobièrnu lo risibí e informashonnan, pa STIP por informá gobièrnu komo doño di e kompania. Na e nivel ei, gobièrnu lo ta den posishon pa tuma e medidanan ku mester wòrdu tumá.
“Mi tin pas ku loke nan a yega na dje”, asina diputado Humphrey Davelaar, a bisa awe mainta. Davelaar a splika, ku algun dia pasá ora ku e Hunta di Komisario a pidi Gensley Capella, pa tuma fakansi obligatorio i ku e direktor a rechasá esaki i Hunta di Komisario a skòrs’ e, tabata su persona, ku riba petishon di Capella a intermediá.
E diputado tabata esun ku mes a yama e presidente komisario di Curoil, pa sinta na mesa den un esfera trankil. Esaki sin ku for di tempran mester kuminsá indiká den direkshon di un skòrsing. ‘Pero di un parti Capella mes no a duna espasio tampoko na e Hunta di Komisario pa por a hasi su investigashon imparsial’.
Davelaar: “Ami tin pas ku esaki, pasobra kon ku bai bini hasiendo e investigashon esei no ta mustra mi ku un hende ta kulpabel ta nifiká ku laga e ora ei si tantu señor Capella, komo e Hunta di Komisario komprondé ku loke nos komo akshonista ke, ta un investigashon imparsial pa nos por haña un bista for di un instansia ku no ta partido den Curoil’.

ARIES: Ta ora di deklará bo independensia. Bo tin bo punto debil, ya ku hopi ta warda pa topa un víktima pa saka probecho. 44,19,21.

TAURO: Un hende ta yudabu den algu ku bo mester ku urgensia. Loke un hende ninga bo, awor ta duele inmensamente. Ku dulsura bo ta logra bo ophetivonan. 29,05,09.

GEMINIS: Evitá tur triángulo amoroso. Bo ta entre spada i pared pa bo por komplasé otro i sali di e situashon den kual bo ta awor. 46,13,07.

KANSER: Bo trabou ta laga hopi di deseá. Plaka no ta faltábu, ya ku suerte ta na bo banda pa bo desaroyá algu ku tabata stanká. 10,41,08.

LEO: Bo trabou ta pasa na promé lugá. Bo ta sintibu satisfecho di bo logronan i bo hasi nan a la pie de la letra. Hasi bo bèst pa bo logra den bienestar ekonómiko. 05,14,30.

VIRGO: No falta fruta i berdura den bo menú. Hasi un reseta nobo i lo bo mira kon bon e ta bai. Hasi plannan ku bo pareha o bo amistatnan pa pasa tempu. 38,04,01.

LIBRA: Si bo ta soltero(a), no komprometé bo mes fásilmente. No hasi wega ku amor. Ser franko i evitá problema. Bo plannan ta kambia hopi. 50,23,41.

SKORPION: Traha un lista di bo prioridatnan i un pa un ta wòrdu hasí. No pasa e raya. Ahustá bo nesesidatnan na bo presupuesto. 32,12,06.

SAGITARIO: E seguridat ku bo tin den bo mes i ku bo ta proyektá lo ta bo mayor atraktivo. Un enkuentro romántiko ta riba agènda pa bo. 02,12,07.

WILLEMSTAD – “Nos vishon pa Refineria Isla mester ta, un refineria ku no ta kousa polushon pa nos poblashon E mester ta un refineria ku ta produsí mas pa Kòrsou. E mester ta un refineria ku ta mas kompetitivo posibel, sigur pa e produktonan ku e ta pone riba merkado. Anto den esaki mester kuminsá pensa tambe riba e senario di un Kòrsou sin un refineria”, asina diputado Humphrey Davelaar, responsabel pa asuntunan ku ta toka Refineria Isla a bisa ayera, den kontestashon di pregunta di miembronan di Konseho Insular.
E tema di e reunion, ku por sierto ta kontinuashon di un reunion ku a kuminsá for di promé ku Konseho Insular bai ku reses, ta bisa “Ròl di gobièrnu ulandes i gobièrnu antiano den buskamentu di un partner stratégiko pa Refineria Isla”.
Diputado Davelaar a bisa, ku si e weta e kantidat di pregunta ku gobièrnu a risibí di miembronan di Konseho Insular riba e tema aki, ta bisto ku Konseho Insular ke haña un bista muchu mas amplio ku e tema mes di e reunion.
E mandatario a bisa ku su kontestanan en realidat lo no kontené masha kos nobo. Ta kontestanan ku mi a yega di duna den pasado kaba, el a bisa.
E mandatario a relatá tur loke a sosodé for di 1986, despues ku SHELL a disidí di bandoná Kòrsou te ku awor, mustrando ku ta un desaroyo “on going” tabatin for di e tempu ei, den kua buskamentu di un hürdó i mantenshon di e refineria habrí tabata e dos elementonan mas importante.

WILLEMSTAD – “Tur matrimonio ku sera na Ulanda, ta konta igual pa kualke otro parti di Reino, inkluso pues Antia”.
Esei ta loke minister Ronald Plasterk a kontestá Tweede Kamer ayera, riba preguntanan di frakshon di VVD al respekto. VVD a hasi pregunta riba e tema, relashoná ku e desishon di gobièrnu antiano pa sigui oponé matrimonionan homoseksual na Antia.
Luna pasá, minister Omayra Leeflang a aksentuá públikamente ku e ta rechasá matrimonio homoseksual i a rekomendá BZV pa no inskribí un pareha lesbiana.
Ta trata di e kaso konosí kaminda un pareha lesbiana kier a hasi uso di Bureau Ziektekostenverzekering, BZV, pa sigurá su partner i nan yunan na ofisina di BZV pa gastunan médiko. Riba rekomendashon di minister di Salú Públiko, BZV a ninga di aseptá e miembresia aki, riba kua e pareha a disidí di skohe kaminda di korte.
E argumento di BZV tabata, ku un matrimonio di e mesun sekso, no ta ser aseptá den nos komunidat. Korte, klaramente a pensa otro i a dikta ku debidamente BZV tin e deber di sigurá e pareha pa gastu médiko.
Ta konosí kaba di pasado, ku Omayra Leeflang, semper tabata kontra matrimonio di e mesun sekso. Pa minister Leeflang, e kaso ta un kaso di prinsipio. El a mustra, ku na Antia nos no konosé matrimonio di e mesun sekso. Segun e definishon pa Antia, un matrimonio na Antia ta monogamo i heteroseksual, ku ta nifiká ku un matrimonio ta entre un hòmber i un muhé. Un muhé tampoko por tin mas ku un hòmber komo kasá, un hòmber tampoko por ta kasá ku mas muhé.

WILLEMSTAD - Direktor di Curoil Gensley Capella lo bai ku fakansi obligatorio, pero lo mantené tur su derechinan manera el a gosa di dje semper komo direktor di e kompania.
Esei básikamente tabata e desishon di korte ayera tardi, ora mester a trata e kaso ku Capella a kuminsá kontra di Curoil pa e medida ku a tuma kontra dje.
A suspendé e direktor, ounke ku el a insistí, ku e no tin falta den e skandal ku ta birando dia pa dia mas grandi na e kompania ku ta distribuí produktonan petrolero pa e forma ei por hasi un investigashon kiko realmente a sosodé.
Dos eks empleado di e kompania tabata hasi negoshi den Curoil ku benefisio personal, un kos ku a shòk komunidat kompleto dia el a sali na kla.
Capella, no tabata di akuerdo ku e medida pa suspendé komo direktor di e kompania, pasobra e ta konsiderá, ku e no a hasi nada i el a entamá un kaso den korte.
Durante tratamentu di e kaso aki, korte a laga komprondé mesora ku e no ta weta pakiko e kaso mester a bai para te dilanti mesa bèrdè.
Despues di a papia ku partidonan, el a instruí tur dos banda pa sinta na mesa ayera tardi mes, weta kon por sali for di e impase. Den esaki el a laga komprondé, ku e ta konsiderá e aktuashon di hunta di komisario komo infantil.
Esei a sosodé tambe. Gensley Capella a bai di akuerdo pa revoká e kaso ku el a entamá den korte. Hunta di Komisario, ku tabata representá den korte ayera pa su presidente Earl Balborda i komisarionan Pieternella i d’Abreu de Poulo a proponé Capella e ora ei pa e bai ku fakansi obligatorio for di 31 di yüli te di 1 di sèptèmber awor. Den esaki, Capella ta mantené tur su derechinan, esta su salario, su dianan di fakansi (ku lo keda intakto, no opstante e fakansi obligatorio) pero ku e mester keda disponibel si den e periodo aki. Den e periodo aki e no mag drenta edifisionan di Curoil pa asina no stroba e investigashon ku ta kanando. Di e forma aki, partidonan a yega na un akuerdo sin ku wes mester a dikta sentensia.

WILLEMSTAD/ AMSTERDAM - Awe lo ta di 25 biaha ku ta rekòrdá asesinato di e hóben antiano Kerwin Duinmeijer. Esaki lo sosodé ku ponementu di krans na e monumento den Vondelpark ku a haña e nòmber di Mama Baranka, Moeder Aarde.
Ounke e wes e tempu aya no a haña niun motibu pa konsiderá e asesinato komo un asesinato motiv’é pa rasismo, hopi ta konsiderá e asesinato aki komo uni rasista.
Kerwin Duinmeijer, un hóben antiano di 15 aña e tempu aya, tabata kana riba kaya ku un amigu ora di ripiente un grupo di e asina yamá “skinheads”, gainan kabes limpi limpi feitá, a kuminsá molesti’é.
Den Damstraat, Duinmeijer a kana drenta un snackbar. Ora el a sali atrobe, el a topa kara kara ku un dje miembronan di “skinheads” ku a kuminsá zundr’é. Den un interkambio di palabra ku a surgi, e “skinhead” aki, Nico Bodemeijer ku tabatin un tatuahe riba su brasa ku ta bisa “100 porshento blanku” a hink’é, un hinká ku despues a resultá fatal.
Un shofùr di taksi, ku tabata na e sitio di e hinkamentu, a ninga di transportá Duinmeijer pa hospital, pa miedu ku sanger lo a susha su kusinchi di outo.
Un ambulans ku a presentá despues a transportá Duinmeijer pa hospital, pero ela muri korto tempu despues.
E outor di e delito, ku a deklará, ku el a hinka Duinmeijer, pasobra esaki “a wak’e ku un kara fis” a ser sentensiá na tratamentu obligatorio pa hubentut.

LOS ANGELES, Merka, - E kantante di asendensia portorikeño, Jennifer López, di 39 aña, ta preparando pa partisipá den Triatlòn Anual di Malibú pa rekoudá fondonan pa e Hospital Infantil di Los Angeles.
Solamente seis luna despues di a bira mama, Jennifer López ta preparando pa un reto nobo, esta, partisipá den e entrega 22 di Triatlòn Anual di Malibú, 14 di sèptèmber benidero.
E kantante di asendensia portorikeño lo kore, landa i kore baiskel pa rekoudá fondonan pa e Hospital Infantil di Los Angeles.
“Tur kos a kuminsá ora mi ta’tin ocho luna di embaraso. Ora mi tabata asina gordo manera un bayena”, e kantante Jennifer López, kende tambe ta aktris, a relatá durante un entrevista den e programa di TV Good Morning America (ABC).
“Mi tabata mirando televishon i mi a mira un triatlòn i m’a bisa, mi ta kere ku lo mi por hasi esei... Kisas nos lo por rekoudá sèn i hasi algu maravioso”. López a konta.
Esaki lo bai ta un berdadero reto pa esposa di e kantante Marc Anthony, kende a deklará ku e no ta asina bon landadó.
“Pero sí mi ta un bon atleta. Pero landamentu no t’ami kos”, e dama intérprete a ekspresá, kende pa revista ‘Self’ a keda eligí komo e Muhé Mas Inspirante di 2008, p’esei el a aparesé riba portada di su edishon di sèptèmber.
Riba e ‘website’ di dicho publikashon ta mustra un video riba kua por mira e Diva di Bronx ta train na Parke Sentral di New York huntu ku e dama direktor di e revista, Lucy Danzinger, i un entrenadó spesialisá.

WILLEMSTAD - Direktiva di Sentro di Bario Montaña ta organisá den kuadro di su siklo di charla “Bo ta prepará pa Orkan”, bin skucha kon i kiko ta pasa ora bo no ta prepará pa un kalamidat di un magnitut grandi manera orkan. Djaweps awor 21 ougùstùs pa 7or pa 9.30. E charla, ku tin komo titulo Bo ta prepará pa orkan un interesante anochi informativo ku 5 eksperto riba e tópiko aki;
Frank Capello (Servisio Meteorológiko NA&A),
Herbert Djaoen (Rampenbureau)
Hugo Rafaela (Krus Kòrá),
Riba e anochi lo bai tin informashonnan hopi balioso, tokante Orkan i su konsekuensianan, pa bario i su habitantenan. Wak pa no pèrdè.
Sentro di Bario Montaña ke yuda konsientisá mas, di sigur nos habitantenan di Montaña i besindario. Entrada ta kompletamente grátis. Ta sugerí un i tur pa bini tempran pa e no keda afó kantidat ta limitá.
Di e forma aki Sentro di Bario Montaña ta kere di duna kontenido real na balor di sa kon nos tur mester ta prepará pa orkan i kiko bo tin ku hasi ora e toka na nos porta.
Un boka bisa otro.
Si tin kualke informashon, pregunta tuma kontakto ku Sentro di Bario Montaña na telefon 767-1600 entre 8 or pa 11 òf atardi 5or pa 8or.

WILLEMSTAD - Ku e donashon di Fondo Shon We Evertsz, Kas di Kultura ta eksperensiá apoyo total di parti di pueblo di Kòrsou. Sinku aña di trabou pa promové union bou di pueblo pa medio di kultura di Kòrsou a krea konfiansa. Konfiansa den kultura, konfiansa den Kòrsou i den trabou di Kas di Kultura.
E konfiansa aki a kulminá den un donashon di FL. 389.750,- di parti di Fondo Shon We Evertsz.
Tarea di Kas di Kultura ta ehekutá maneho di kultura pa gobièrnu di Kòrsou. Esaki Kas di Kultura ta hasi ku tur su energia i konvikshon ku e lema: Kultura e motor pa desaroyo duradero.
Ku Siman di Kultura, Kas di Kultura ke motivá pueblo di Kòrsou pa lanta kara i biba kultura di Kòrsou sin niun klase di miedu ni bèrguensa. Kultura mester uni nos pueblo pa nos traha huntu pa i hiba Kòrsou dilanti pa nos mes, nos yunan i nan ñetunan.
Fondo Shon We Evertsz dirigí pa señor L. Capriles i sra. X. Trotman a hasi e donashon generoso aki basando nan mes riba e lema: “Mas bo konosé bo kultura, mas bo stima bo Kòrsou”. Esaki ta un bèrdat sin mas.
Kas di Kultura ta gradisí Fondo Shon We Evertsz pa e gesto tan bondadoso i ta sigurá nan ku lo e sigui karga i kuida kultura di Kòrsou.
“Mas bo konosé bo kultura, mas bo stima bo Kòrsou.”

WILLEMSTAD – E siman aki un grupo di studiante di CURISES a biaha pa Miami (Florida) pa finalisá nan estudio di Hospitality Management na Florida International University. RBTT Bank a finansiá esaki. E studiantenan a risibí un pakete atraktivo ku un porsentahe di interes èkstra abou. RBTT a malkriá e hóbennan siman pasá ku un happy hour i un regalo di despedida. Esaki ta e di tres aña konsekutivo ku RBTT ta finansiá e estudionan ‘bachelor’ di Hospitality Management den eksterior pa studiantenan di CURISES.
Riba e potrèt e studiantenan huntu ku Mr. Carl Camelia (UNA), disfrutando di nan Happy Hour organisá pa RBTT na Salads & Co.

WILLEMSTAD – Ofisina di Turismo di Kòrsou konhuntamente ku CHATA, riba 15 di Ougùstùs último a lansa un kampaña di promoshon den e merkado Merikano yamá Curaçao Now. Curaçao Now lo tin un efekto ‘wow’ riba konsumidónan ku ke plania un vakashon den Karibe na un destinashon ku ta nobo i diferente, ku tin entretenementu na preis simpátiko i ku ta yená di aktividat.
Banda di un krédito pa bishitantenan i un anochi di estadia grátis, Curacao Now ta ofresé dilnan ku balor agregá di kasi 70 hotèl i resort, kompanianan di hür outo, atrakshonnan, museo i otro entidatnan ku ta duna servisio turístiko.
Bishitantenan biahando pa Kòrsou entre 15 di ougùstùs pa 15 di desèmber 2008 òf entre 1 di mei i 1 di yüli 2009 por probechá di e ofertanan aki rònt Kòrsou.
Ta ampliamente konosí ku ekonomia di Merka ta pasando den un tempu difísil i ku e turista merikano na e momentunan aki ta hopi fiha riba preis. E programa aki ta duna Kòrsou un chèns pa kompetí efektivamente riba e merkado merikano. Ya kaba e programa aki a hala hopi atenshon serka Tour Operators, Agentenan di Biahe, Liñanan Aéreo, revistanan turístiko i otro medionan di komunikashon.
Ademas di krea mas konsientisashon pa Kòrsou e ophetivo prinsipal pa e aña aki ta pa krea mas demanda i stimulá tráfiko di bishitantenan pa Kòrsou riba término kòrtiku. Mirando e akohida amplio ku e programa ta hañando Ofisina di Turismo ta kere ku sigur lo mira e resultadonan positivo den un tempu relativamente kòrtiku.

WILLEMSTAD - Kas di Kultura ta gradisí tur e instansianan ku a hasi donashon pa promé Lustro Siman di Kultura. E apoyo di parti di pueblo i su instansianan ta di gran balor pa Kas di Kultura.
Kas di Kultura ta konvensí, ku Kòrsou mester di union pa yega na bienestar pa tur siudadano. “Nos ta konvensí ku e union aki por realisá solamente pa medio i rondó di e úniko elementu importante ku ta uni nos. Esaki ta nos kultura.”
Ta pa e motibu aki Kas di Kultura ta organisá Siman di Kultura. Ta pa yuda nos yega serka otro i haña otro den harmonia mediante aktividat positivo.
Kas di Kultura ta konvensí, ku e yu di Kòrsou por traha strukturá, por prepará su futuro i por traha den union. “Nos ta konsiente ku e yu di Kòrsou tin deseo pa konosé su kultura i su historia.” Pa e motibunan aki Kas di Kultura ta mobilisá tur yu di Kòrsou pa lanta kara i biba kultura di Kòrsou durante Siman di Kultura.
E instansianan ku a hasi donashon pa Siman di Kultura ta:
Fundashon Shon We Evertsz, Curaçao Ports Authority, Aqualectra, Refineria Kòrsou Curoil,Curinde, Kompania di Tou Kòrsou, Prins Bernhard & Cultuurfonds, Selikor, Korpodeko, Broeders van Dongen, First Caribbean Bank, Orco Bank, Banco Mercantil Venezolano, TeleCuraçao, Banco Caribe, SOAB, Post Spaarbank van de Nederlandse Antillen i Antillean Billboard.
Kas di Kultura ta gradisí tur e instansianan ariba menshoná i ta sigurá nan di lo hasi bon uso di e fondonan pa e meta ku nan ta duná i segun e reglanan vigente.

ORANJESTAD – Tiara Air ta orguyoso di por introdusí Jeffrey Deswert & Fernando Gomes komo su kapitannan nobo, despues ku nan a kompletá nan sertifikashon formal resientemente. Ademas di kapitan Deswert i kapitan Gomes, e kompania tambe a yama bonbiní bèk na promé ofisir Raoel Wijngaarde & promé ofisir T.J. Ahlip, kendenan éksitosamente a pasa nan asina yamá Air Transport Pilot License, un èksamen skirbí, kual ta e promé paso na kaminda pa e futuro promoshon komo kapitan.
E selebrashon a tuma lugá na e ofisina prinsipal di Tiara Air na Wayaca, den presensia di e aerolinea su direktornan gerente, Alejandro Muyale i Raymond Maduro, komo tambe gerente di kontabilidat Hubert Zievinger i direktor komersial di Benta i Merkadeo, Camilo Muyale.
Kapitan Fernando Jose Gomes a kuminsá traha ku Tiara Air komo promé ofisir na sèptèmber di 2005. El a entrená ku e Shorts SD3-60 ku Flight Safety na LaGuardia New York na òktober di 2005. Riba dia 1 di mart, 2006, e tabata un di solamente tres ko-Pilot operando pa Tiara Air, kual e tempu ei a kaba di lanta for di tera. El a distinguí su mes komo un persona ku hopi potensial komo un futuro kapitan, ora el a bai La Guardia New York na aprel di 2007 pa e entrenamentu nobo. Riba promé di mei, 2008, kual por sierto tabata su di 28 kumpleaño, Gomes a bandoná Aruba pa kuminsá ku e proseso largu i difísil di entrenamentu pa bira un kapitan. El a regresá Aruba dia 31 di yüli 2008, 3 luna despues di su salida, komo un komandante di avion kompletamente entrená i kapas, logrando su soño personal komo tambe esun di su famia.

WILLEMSTAD – “Gobièrnu mes no ta traha bon riba su instrumentonan pa kontrolá konstrukshonnan kantu di kosta. No semper mester tuma e hendenan ku ta konstruí na malu. Gobièrnu mester tin instrumentonan bon pa kontrolá i mester tin sanshon tambe. Nunka mi no a tende di un desaroyadó ku a haña un but.” Esaki ta loke Yvette Raveneau, presidente di Amigi di Tera, a bisa LA PRENSA.
Raveneau a konstatá djadumingu último kon un kontratista tabata dèmpel na kosta Sur na altura di e proyekto Renaissance. “E kos remarkabel ta, ku ta e dèmpelmentu so tabata tumando lugá. No tabatin niun otro trabou di konstrukshon ta tumando lugá e momentu ei djadumingu mainta tempran. Esaki ta pone mi pensa, ku tabatin un kos ta tuma lugá ku no tin mag. A basha pieda i tur sorto di potoshi na e kosta pa dèmpel e awa. Awa di lodo, ku ta polushoná laman, a yega te na altura di Holiday Beach Hotel. Mester tene kuenta ku lodo ta tapa refnan di koral i mata nan.”
Raveneau a splika tambe ku entretantu ta bon konosí ku e ref di koral na e parti di kosta di Holiday Beach Hotel ainda ta den bon kondishon. “Mi ta haña ta straño ku ta usa tera, santu i tur sorto di porkeria pa dèmpel. E lodo akí ta baha na laman i e laman ta laba tur esaki bai kuné. E tera ta bai den laman i afektá e refnan di koral. Refnan di koral ta importante pa henter e isla pa su sobrebibensia. Refnan di koral ta tambe un ‘esset’. Nan tin un balor sumamente grandi pa e isla. Esunnan pabou di Rif ta den bon kondishon ainda i no mester mishi ku nan. Ora manda lodo riba e ref di koral, e awa ta bira trubel i e no ta haña bastante lus. Mester di lus pa nan biba. Manera mi ta mira, por lo pronto e konstrukshon na Renaissance ta bai sòru pa un fluho di awa trubel.”