BEIJING – A pasa kasi un kuart siglo for di e último biaha ku un mèksikano a gana un medaya di oro den sektor maskulino di e Weganan Olímpiko. Guillermo Perez a enkargá su mes djarason di pone un fin na e sekura ku su viktoria den taekwondo, dunando Mexico e promé oro na Beijing.
I taekwondo a bringa alegria tambe na dos otro pais latino ku ta awor no a logra subi podio.
Gabriel Mercedez, derotá pa Perez den e final di 58 kilo, a kue un medaya di plata pa Repúblika Dominikana. Venezuela a kue bròns ku Dalia Contreras den 49 kilo, kompartiendo esaki ku a kubano Daynellis Montejo. E último oro olímpiko di un baron mèksikano tabata tempu ei Andarin Raul Gonzalez a imponé den e kanamentu di 50 km na Los Angeles 1984, Ku su konkista na Sydney 200, e pesista Soraya Jiménez tabata e último atleta ku a kue oro.
Tabata e di 53 medaya olímpiko di historia pa Mexico, su di diesun di oro, i na Beijing e ta uni na e bròns lográ pa e klavadista Tatiana Ortiz i Paola Espinosa den sinkronisá di plataforma di 10 meter.
E pruebanan di kanamentu sa ta asuntu garantisá di título mèksikano, pero awor taekwondo parse ta bira nan mihó karta, huntu ku Klavado. Tantu asina ku Perez a laga na kas Oscar Salazar, plata na Atenas, ora el a gana e torneo nashonal di klasifikashon.
“Boso warda un ratu ku e triunfo aki ta e promé, taekwondo ta bai duna mas”, Perez a afirmá refiriendo na su kompañeronan Idulio Islas i Maria Espinoza.

BEIJING – Djarason Brazil a aplastá China den tres set i lo enfrentá Italia den semi final di vòlibòl maskulino.
Rusia i Merka ku a gana di Bulgaria i Serbia, lo topa otro den otro seri semi final.
E brazileronan number un di e lista mundial i aktual kampion olímpiko, a desplegá tur nan poder pa suta e tim chines 25-17, 25-15 i 25-16. Italia di su parti a regla kuenta di Polonia den 5 sèt.
Rusia a gana Bulgaria den kuater sèt 20-25, 25-16, 25-22 i 25-21 i Merka di su parti a dal Serbia ku 20-25, 25-23, 21-25, 25-18 i 15-12.

--
Brazil kontra Merka den final di vòli di playa hòmber

BEIJING – E brazileronan Marcio i Fabio a derotá nan kompatriotanan di Atenas Emanuel i Ricardo 22-20 i 21-18 i a pasa pa final di e torneo maskulino di vòlibòl di playa.
E rivalnan di a pareha brasileño den pelea pa oro lo ta e kampionnan mundial Todd Rogers i Phil Dalhaussser di Merka, kendenan den e otro semi final di djarason a vense George, representá pa e brazileronan Renato Gomes i Jorge Terceiro ku 21-11 i 21-13.
Gomes i Terceiro a haña pasport pa representá Georgia ya ku nan no por a hunga pa Brazil debí na e sistema ku ta limitá e partisipashon na dos ekipo pa pais.
E final lo hunga djabièrnè.

WILLEMSTAD - Ku tur probabilidat lo sigui instrukshon di e reunion general di akshonistanan di DOK djabièrnè pa nombra un direktor interim ku tin konosementu di astiero manera DOK.
Hopi spekulashon tabatin último lunanan si ku diputado Rhuggenaath lo bandoná filanan di partido PAR si nombra sr. Sluis komo direktor general i hasta direktor finansiero na DOK. Hecho ta, ku for di kuminsamentu tantu e reunion general komo Hunta di Komisario i e diputado ku defakto no tin tomo di desishon den su man pero BC, a mustra preferensia pa un direktor interim ku eksperensia riba tereno di astiero. Ta kontra tur regla a bini despues ku solisitut habri kaminda finalmente a bini ku konseho pro-Sluis.
Si mira e struktura di DOK i e repartishon den AVA no por yega na ningun otro konklushon ku diputado Rhuggenaath su voto ta kasi insignifikante den tomo di desishon. Den AVA Gobièrnu Sentral tin 30% di akshon ku e ta delegá na e Stichting Administratiekantoor, miéntras ku Gobièrnu Insular tin 70% i den esaki ta Bestuurscollege su voto ta konta. Hasta t’asina, ku den e reunion ta Gezaghèber ta representá BC i si e ta deseá, e por bai ku e diputado, loke a pasa tambe resientemente. DOK Holding ta na kabes di e organisashon i e tin e outorisashon di nombra un direktor. Dor ku no tin direktor aktualmente e Raad van Commissaris presidí pa sr. Vink ta fungi komo direktor.
Pues Gobièrnu Sentral (Land) ta delegá e outorisashon na e Stichting pa disidí ku representantenan di akshonistanan.

BEIJING – Usain Bolt tabatin un inolvidabel kumpli aña ora el a konfirmá su mes djarason komo e titan grandi di velosidat ku un triunfo den 200 meter den e Weganan Olímpiko ku un rèkòrt mundial nobo di 19.30 sekònde, despues ku el a destruí e marka di 100 meter tambe.
I danki na su triunfo i na esun di Melaine Walker den 400m ku opstákulo femenino, Jamaka a bari ku e tres pruebanan di velosidat puru ku nan tin realisá.
Di otro banda, e kubano Yipsii Moreno a kue un medaya di plata den tiramentu di martin.
Ounke Bolt tabata falta algun ora pa kumpli 22 aña, apénas el a gana e prueba via spikernan di stadion Nèshi di para nan a kanta Happy Birthday p’e.
Bolt a gradisí tirando sunchi aki aya den tur sektor, meimei di aplousonan i gritunan.
Bolt a klaba 19.30 den loke tabata su di dos rèkòrt na Beijing, despues ku el a kibra esun di 100m ku tempu di 9.69. E rèkòrt anterior di 200m tabata di 19.32 di Michael Johnson, kende a imponé esaki na Atlanta 1996.
“Mi ta den un shòk, te ainda mi ta den shòk”, Bolt a bisa. “Pa hopi tempu mi kier a kibra e rèkòrt mundial”.
“Nunka m’a spera e kos aki, mi no a pensa ku e lo tabata posibel”, el a agregá.
E hamaikino ta e promé hòmber for di tempu di Carl Lewis na Los Angels na 1984 ku ta logra doblete den 100 i 200m den un olimpiada.
“Inkreibel, Johnson a deklará. “E tabatin un salida notabel. Hòmbernan ku e altura ei no por sali bulá manera el a hasi. I e tin e kurpa largu ei, ku ta permitié kore muchu mas distansia ku e otronan”.

WILLEMSTAD – Den e reunion di Bestuurscollege di awe, Bestuurscollege ta tuma un desishon, ken ta organisá karnaval 2009. Asina diputado di Kultura, Marilyn Alcalá-Wallé, a bisa LA PRENSA. E diputado a splika, ku e preparashonnan pa karnaval 2008 ta bai hopi bon.
E grupo miksto di trabou ku a lanta mester kaba su tarea na mei i el a hasi un apelashon riba Bestuurscollege, pa haña mas di tempu. Na yüni e Komishon Miksto a entregá e dokumento final. Na e momentu ei, segun Alcalá-Wallé, gobièrnu a tuma diferente desishon. Tabatin medida ku gobièrnu no por a tuma mesora. Un di nan tabata esun relashoná ku e parti organisatorio. Relashoná ku e aspekto aki, tabatin diferente grupo ku a duna di konosé, ku nan ta interesá pa organisá karnaval otro aña.
E Servisio di diputado Alcalá-Wallé a hasi un investigashon, a base di e petishonnan ku a drenta. Na fin di siman pasá, e diputado a risibí e resultado di e proposishon. Awe den e reunion semanal di Bestuurscollege esaki lo wòrdu tratá pa tuma un desishon. E diputado ta spera, ku na final di e reunion, lo haña sa ta kua ta e organisashon ku gobièrnu a skohe pa keda enkargá ku e organisashon di karnaval di 2009.
RUTA
Pa loke ta trata e ruta, diputado Alcalá-Wallé a bisa ku e ainda e servisionan konserní ku mester duna gobièrnu konseho riba esaki, no a manda nan reakshon.
Ademas, segun e splikashon di e diputado, gobièrnu no tin atenshon solamente pa ruta i organisashon di karnaval, ta puntonan di atenshon di Bestuurscollege. Alabes tin e aktividatnan di karnaval, entre kua jump-in, jump-up, jouvé morning, konsentrashon di aktividatnan karnavalesko, kon ta hasi generá mas fondo, ku gobièrnu ke haña mas klaridat riba dje.

WILLEMSTAD – No opstante ku e asistensia na e reunion di urgensia di Asosashon di Grupo di Karnaval Kòrsou, no tabata grandi, e reunion a bai hopi bon. Stanley Ignacio a splika LA PRENSA, ku e presentenan a aportá grandemente na e pensamentunan ku tabatin. E Asosashon ta bai manda un karta na gobièrnu, ku e petishon pa promé ku dia 31 di ougùstùs, haña klaridat riba e desaroyonan di karnaval 2009. Entre otro e gruponan ta ansioso pa sa, kua desishon gobièrnu a tuma enkuanto di e ruta di karnaval pa otro aña i tambe e reglanan ku mester tene kuenta kuné, relashoná ku jump-in. Mester bin mas klaridat riba e eksigensia ku e miembronan mester kumpli kuné. E orario ku e jump-in por tuma lugá, tambe ta un asuntu ku e gruponan ta pendiente di dje. Ignacio a sigui splika ku loke ku e Asosashon di Grupo di Karnaval di Kòrsou ta boga pe, ta pa e karnaval wòrdu organisá den trankilidat. ‘Nos ke un trankilidat ora ku nos ta den e ambiente di karnaval. No ta e momentu ei mester tin diskushon, pleitamentu atrobe’. Esei tabata e palabranan di Stanley Ignacio pa LA PRENSA, kende a indiká tambe, ku karnaval ta un aktividat pa uni pueblo di Kòrsou i ku loke ku e gruponan ta deseá ta pa kumpli ku su petishon di for di dos aña pasá, ku ta pa gradualmente introdusí trankilidat den karnaval. Esei ta krea e espasio pa e partisipantenan por konsentrá riba e detayenan di último ora, entre kua e trahe i dekòrnan.

WILLEMSTAD - Pa medio di e instrukshon ku Aqualectra a duna su abogado, pa manda un karta pa gobièrnu, e kompania a kuminsá ku un trayekto hudisial kontra gobièrnu di Kòrsou.
Direktor interino di Aqualectra, Anthon Casperson a splika ku ketu bai, Aqualectra no tin e adaptashon di e tarifa di awa, ku ainda ta basá riba preis di 53 dollar pa barí di aña pasá yüli. I mientrastantu e preis di krudo a yega riba 113 dollar.
Ketu bai Aqualectra ta pre-finansiá fuel, loke ku e ta paga Curoil i na e terseranan, ku ta e entregadónan di fuel na Aqualectra. “Den e sentido ei nos ta pèrdiendo plaka.”
Casperson a splika, ku e situashon a yega na un kaminda ku realmente e no por wòrdu wantá mas. “A yega e momentu pa para ketu, na bo posishon hurídiko komo empresa, den un situashon asina aki”. E direktor interino di Aqualectra a sigui splika, ku ta nesesario pa wak e situashon for di un aspekto hurídiko. “E diskushon a yega na un kaminda ku no tin sentido mas”. Den e kuadro ei, segun Casperson, e abogado di Aqualectra lo manda un karta pa gobièrnu. Pa loke ta trata e kontenido dje karta, Casperson a indiká, ku básikamente ora ku alkansá e situashon unda ku ta envolví abogado den e kuestion, ta trata di un rekordatorio na gobièrnu, ku tur e rèspèt nesesario, enkuanto e palabrashonnan hasí den pasado. Aqualectra ta referí na e akuerdo di novèmber 2002, basá riba kua e struktura di Aqualectra a wòrdu stipulá. Den e konsepto di Aqualectra e palabrashon aki no ta wòrdu mantené di parti di gobièrnu. Komo tal Aqualectra ta pidi gobièrnu pa denter di algun siman tuma un desishon. Den kaso ku e desishon no wòrdu tumá, no ta sobra Aqualectra ningun otro rekurso ku no ta esun di entamá un kaso den Korte kontra di gobièrnu. E eksigensia den un situashon asina lo ta, ku Aqualectra ke haña su tarifanan di awa stipulá.

ARIES: Ser mas selektivo den tur loke bo disidí. Envolví bo mes den pasa tempunan manera skirbi, toka, balia i kanta. Bo tin ku ekspresá bo mes, demostrá bo talento. 06,10.

TAURO: Plaka ta yega pa bo paga bo debenan, regalo, loteria, pero sigur ta ku e ta ponébu gasta sin kòntròl. Kuidou. Bo profeshon ta a la mil maravia. 20,08,15.

GEMINIS: Ta tempu di bria, di destaká i yama atenshon. Kuida di bo aparensia personal. Pensa pa aktua, ya ku loke kuminsá awor ta keda pa hopi tempu. 16,40,13.

KANSER; Hustisia ta na bo banda. Bo a superá bo odionan i bo ta liber di sentimentunan negativo, rekuperando balansa den bo bida. 12,06,23.

LEO: No mas engaño ni traishon den bo bida. Bo ta wòrdu guiá emoshonalmente. Nunka bo tabata mas sabí i mihó orientá pa biba bo bida na bo manera i gana. 22,18,51.

VIRGO: Den amor esnan positivo ta pone den bida romántiko na kla i formalisá unionnan felis. Tin un di dos i hopi romántiko luna de miel. Hasi kontakto ku bo mi interior.

LIBRA: Hasi un estudio profundo di bo i di bo pareha ántes di komprometébu. Bo bon amigunan ta sigui na bo banda apoyando bo. 19,05,56.

SKORPION: No tene miedo pa kambionan i duna e promé paso den un proyekto riskante. Bo ta libra di preshon ku no ta pertenesé manera sakrifisio inútil. 04.

SAGITARIO: Nada di loke bo mester ta faltabu. Bo ta mas preokupá. Ponébu den kontakto ku Señor. Papia ku bo alma, ku fe i muy pronto bo ta mira resultadonan positivo.

WILLEMSTAD – “Servisio di Arbeidszorg (DAZ) ta sintá ku un problema hopi ferfelu. E kantidat di trabou a bira asina tantu, ku ya no ta posibel mas pa responsablemente traha ku e kantidat di hende ku tin awor aki. P’esei mes nos ta preparando un proposishon ku pronto lo bai Bestuurscollege den kua nos ta pidi pa mas hende”, asina Christina van der Biezen, hefe interino ku a apuntá na Servisio Arbeidszorg a anunsiá ayera.
LA PRENSA, den kurso di e simannan tras di lomba a dediká atenshon amplio na e problemanan na DAZ. Nos a señalá ku tin un kantidat basta grandi di petishon ku ta kedando atras di hendenan ku ke haña sea un pèrmit di estadia òf pèrmit di trabou.
DAZ e tempu ei a splika ku e situashon no ta asina krítiko manera e ta parse den promé instansia. “Ademas”, asina Van der Biezen a splika na e okashon ei, “ta trahando hopi duru pa eliminá e retraso ku tin den otorgamentu di pèrmit”.
Van der Biezen, durante un enkuentro ku prensa ayera, a splika ku DAZ a sigui traha riba e aspekto aki, pero ku tin un fenómeno ku tambe ta preokupá e servisio. Esei ta e hecho ku tin un kantidat di pèrmit ku entretantu ta kla, pero ku ta ketu bai den poder di DAZ.
Nos a ripará ku hende ta pidi pèrmit, pero no ta bin tuma nan dokumento. Pa e motibu aki mes, DAZ a tuma e desishon ku e ta bai publiká e number i nòmber di e pèrmitnan ku ta kla riba Internèt, sperando asina ku ta bin un kambio den e situashon aki.

WILLEMSTAD - Loke vários miembro di oposishon a sugerí ayera, esta pa diputado Marilyn Alcalá-Wallé ofresé su diskulpa pa kontenido di un email ku el a manda pa Defensor di Pueblo algun siman pasá. Mi ta para’riba ku e forma ku Defensor di Pueblo a dirigí su mes na Bestuurscollege no ta e forma korekto, e diputado a laga komprondé ayera, durante reunion públiko di Konseho Insular.
Konseho Insular ayera a kontinuá ku e reunion públiko den kua mester a trata e desaroyonan ku a surgi rondó di Defensor di Pueblo i diputado Alcalá-Wallé.
Durante e reunion di ayera por sierto ku kada frakshon den Konseho Insular a probechá pa ekspresá palabranan di elogio i pabien pa nos atleta Churandy Martina pa su logra den Weganan Olímpiko. Esei tabata promé di e notisia teribel ku a laga komunidat kompleto ku un desilushon grandísimo.
Alcalá-Wallé, evidentemente fadá pa loke el a yama e kantidat di email ku Defensor di Pueblo a bin ta manda regularmente pa Bestuurscollege a kontestá mr. Fred Wiel ku un email den kua e ta puntra e funshonario si e no tin nada otro di hasi ku su tempu.
Den esaki el a hasi uso di palabranan manera Jan Joker, pa indiká ku e ta konsiderá e emailnan di Wiel komo inútil.
Tur kos a kuminsá, na momentu ku a sali na kla ku Defensor di Pueblo a kuminsá un investigashon rondó di lantamentu di un entidat Traffic Board i a bin dal den aspektonan privá di gezaghèber di Kòrsou, mr. Lizanne Dindial. Alcalá- Wallé no ta di akuerdo ku Defensor di Pueblo mester a bai asina leu di ta investigando bida privá di e promé mandatario di Kòrsou.

WILLEMSTAD - Parlamentu d Antia próksimamente lo bai trata un kambio di lei di tal manera, ku esaki ta amplia e posibilidat ku un siudadano tin na e momentu aki pa defendé su mes.
Kada siudadano e ora ei lo haña mas posibilidat pa defendé su kurpa, ora e bira víktima di un akto kriminal den su ambiente direkto, asina presidente di parlamentu Pedro Atacho a anunsiá ayera durante un enkuentro ku prensa.
Ta trata aki di un proposishon di lei ku tin algun aña kaba den diskushon pa duna kada siudadano mas espasio pa defendé su kurpa.
Esaki, den kuadro di oumento di kriminalidat riba nos isla. Ta konosí, ku vários hende a bira víktima di violensia den e periodo tras di lomba, entre otro di atrakadó ku ta drenta nan kas.
E proposishon di lei aki a konosé vários trabuko den su kaminda.
Raad van State por ehèmpel, tabatin krítika riba e lei aki ku parlamentu a trata pa oumentá e posibilidat pa un siudadano defendé su kurpa den su kas i den su kura. Raad van State ta haña ku e lei, en bes di oumentá e posibilidatnan aki, hustamente ta limitá nan.
Esei a sali na kla na momentu ku parlamentu di Antia tabatin un enkuentro ku e Komishon Revishon Kódigo Penal.
Ora tur hende a kere ku e lei tabata den fase final, sperando riba konseho di Raad van Advies, a resultá ku e lei a keda pegá na Departamentu di Hustisia. Asina e lei a hañ’é konfrontá ku vários opstákulo.

WILLEMSTAD - Aqualectra ta preparando pa introdusí e mashin di prepago pa awa, un mashin ku a bira konosí komo Pagatinu.
E kompania Aqualectra ayera a firma un Memorandum of Understanding ku e kompania Johannesburg Water pa den futuro introdusí e mashin aki.
Aqualectra a introdusí e Pagatinu pa koriente algun aña pasá, mester bisa ku basta éksito. E sistema aki ta pèrmití un hende kontrolá su uso di koriente i evitá ku e por hañ’é den un situashon kaminda e no por paga su kuenta di koriente fin di luna.
Esaki ta un dje faktornan ku ta pone ku hopi hende a haña nan den e situashon ku Aqualectra a kita nan koriente. Unabes ku esei sosodé, hopi biaha ta bira difísil pa e siudadano haña konekshon bèk riba e ret di Aqualectra, pasobra den hopi kaso, e no por paga su debe.
Ku introdukshon di e mashin di prepago, e siudadano por tin mihó kontrol riba su situashon.
Aqualectra a firma e kombenio ku Johannesburg Water, pasobra e kompania aki tin eksperensia amplio riba tereno di mashin prepago di awa.
Johannesburg Water a instalá komo 100 mil di e aparatonan aki na Suráfrika. Segun direktor interino di Aqualectra Anthon Casperson, e kompania lokal por hasi bon uso di e eksperensia ku e kompania surafrikano tin awor aki, pa introdusí e mesun kos na Kòrsou.
El a enfatisá ku ainda no ta asina leu ku por papia di fecha pa introdusí e ekipo aki pasobra tin algun preparashon ainda ku mester tuma lugá.

WILLEMSTAD - “Kerwin Duinmeijer tabata un mucha simpel ku tabata na e kaminda robes, na e momentu robes,” asina alkalde di Amsterdam Job Cohen a bisa ayera, na konmemorashon di 25 aña di asesinato di e hóben antiano aki.
Algun shen hende a partisipá na e konmemorashon aki ayera nochi den Vondelpark, entre otro e mama di e víktima. E fundashon “Vrienden van Kerwin” a organisá, meskos ku esei tabata e kaso den e añanan anterior, e di 25 konmemorashon pa rekordá e hóben antiano aki ku nan a asesiná na 1983.
E enkuentro por sierto a sirbi mesora komo un protesta kontra e aktual intoleransha den sosiedat ulandes.
E grupo di hende a tene e enkuentro riba Dam, kaminda entre otro alkalde Job Cohen tabata presente. Den su diskurso, Cohen a bisa ku Kerwin Duinmeijer tabata un mucha simpel ku tabata na e kaminda robes, na e momentu robes. Segun Cohen, e asesinato a tuma lugá pa “falta di aseptashon di loke no tabata konosí”.
Ounke e wes e tempu aya no a haña niun motibu pa konsiderá e asesinato komo un asesinato motivá pa rasismo, hopi ta konsiderá e asesinato aki komo unu rasista.
Kerwin Duinmeijer, un hóben antiano di 15 aña e tempu aya, tabata kana riba kaya ku un amigu ora di ripiente un grupo di e asina yama “skinheads”, gainan kabes limpi-limpi feitá, a kuminsá molesti’é.
Despues di un interkambio di palabra ku a surgi, un di e “skinhead”nan aki, Nico Bodemeijer ku tabatin un tatuahe riba su brasa ku ta bisa “100 porshentu blanku” a hink’é, un hinká ku despues a resultá fatal.

 

WILLEMSTAD – E fundashon ku ta rekonosé grandinan den nos komunidat, a selebrá su promé lustro ayera. Fundashon Nos Grandinan ya tin 5 aña kaba ta sòru pa e hende grandi ta den publisidat konstantemente.
E fundashon a lanta den promé instante pa duna rekonosementu na tur grandi ku kumpli 100 aña di bida. Den un tempu kòrtiko grandinan di otro edat tambe a kuminsá haña rekonosementu serka e fundashon. E motor tras di Fundashon Nos Grandinan, Geselle Coffie, no ta laga niun grandi ku kumpli 100 aña òf mas, keda sin haña e atenshon ku e meresé. Tambe grandinan ku kumpli 80, 90 i otro edatnan respetá ta bin na remarke pa haña atenshon di e fundashon.
E fundashon ta konta ku sosten di entre otro siudadano Edsel Papi Jesurun ku ta fungi komo vise presidente i konsehero. Ayera nochi a selebrá e echo ku un Santu Sakrifisio di misa.

BEIJING – Ku un sonrisa riba su kara Churandy Martina awe tabata presente na un rueda di prensa den e sentro di prensa internashonal di e Weganan Olímpiko na Peking.
Riba su kara no por a lesa ku el a bin pèrdè su medaya di plata dor di deskualifikashon.
“Mi ta keda positivo i lo bai kore otro aña mas duru”, tabta e palabranan di Martina sin niun tristesa den su stèm.
E tristesa ei a pasa kaba. Solamente por a mira falta di soño den kara di tur esnan presente awe mèrdia.
“Pa kuat’or ainda nos tabata huntu pa pone tur kos riba un rei”, asina e agente Caroline Feith a bisa.
Te ainda e “feitnan” no ta muchu kla. Sigur ta ku Churandy Martina a yega na e di dos lugá ku tempu di 19.82 sekònde.
Despues ku Wallace Spearmon a keda deskualifiká, e merikanonan tabata kore ariba i abou buskando e teip pa mira si tabata bèrdat. Ora ku nan a mira ku Wallace a kore for di su ban, nan a bai buska otro kos.
Despues di dos ora Martina a bin tende ku su soño olímpiko a bira un pesadia.
Ken a bisa e merikanonan riba Churandy Martina, niun hende no sa. Martina na dos okashon a trapa riba e liña di su ban ku su pia robes.
“Mi a bin tende di e kos aki ora ku mi tabata den e kòntròl pa doping”, asina Martina a bisa awe. “Mi no por a komprondé e kos aki na promé instante i a pensa ku ta esun di Spearmon. Si tabata asina, e ofisialnan di ban mester a deskualifiká mi mesora. E prosedura aki no tabata bon”, asina Martina a bisa.

WILLEMSTAD – Direktiva di Partido MAN ta manda palabranan di felisitashon na Churandy Martina, ganador di medaya di plata awe na e kompetensia di 200 meter den Atletismo.
Pueblo di Kòrsou durante 19.82 sekònde a keda paralisá i tabata huntu ku Churandy Martina na momentu ku el a kore su kareda.
Pueblo di Kòrsou a keda sumamente emoshoná pa e resultado i pa nos Churandy Martina no ta ganadó di plata, pero ganadó di medaya di oro, pasobra e loke ku el a hasi ta algu tremendo.
Pa Partido MAN, e logro aki ta demostrá ku yu di Kòrsou por, basta nos dediká na loke ku nos ta hasi.
Na e mes un momentu tambe Partido MAN ta manda palabranan di felisitashon na nos ekiponan di beisbòl tantu Junior ku a titulá kampion mundial i Senior League ku a titulá sup kampion mundial.
Partido MAN ta deseá nos ekipo di Little League tambe tur klase di éksito awor ku nan a pasa pa e semi final di divishon Internashonal.
Partido MAN

PROVENCE-WHITFIELD
Mary Henriette Coward
Mihó konosí komo Mechi
A laga atras su kasá Kenneth Coward, yunan Kenneth Coward Jr. i mavis, Edner Coward, Earlyne Gillhaus-Coward i Marcel, Clive Coward tur ku nan famia. Akto di entiero ta djasabra 23 di ougùstùs for di Bottelier pa santana Bottelier. Bishita 9or. Promé ku entiero tin un respòns 10.30or.

JACKSON-ROMNEY
Enid Gestine (92 aña)
A laga atras su yunan Patricia, Joyce, Yvette, Winston Jackson, Calton i Livia Jackson. Akto di entiero ta djasabra 23 di ougùstùs 4or for di Bottelier pa santana Bottelier. Bishita 1.30or-3.30or. Promé ku entiero tin un respòns 3.30or.

TEIXEIRA
Manuel Rodrigues
Mihó konosí komo Manuel di plantage Groot Piscadera òf patron di Fortuna Mini Market
Akto di entiero ta tuma lugá na Madeira.

CABRAL
Agostinha Rodrigues
Mihó konosí komo Maria
A laga atras su kasá José Vieira Alves, yunan Teresa Cabral Alves Brazao, José Cabral Alves, Rayl Vieira Alves. Akto di entiero ta djasabra 23 di ougùstùs na Madeira.

HASETH
Manuel Arcángel
Mihó konosí komo Mani
A laga atras su kasá Lucila Haseth-Vivas, yunan Irene, Luilinda, Rigia, Philip Haseth, Dulcela Josefa, Edomar Smit. Akto di entiero ta djabièrnè 22 ougùstùs for di El Consolador pa santana Janwe. Bishita 9or-11or den sala Celeste.

Mester siña enfrentá situashonnan ku otro tono i no manera ta e kustumber pa instigá i venená e pueblo. Den kaso di Churandy Martina no tabata na su lugá e tono ku medionan di komunikashon a usa, sin tene kuenta ku tin un masa ku por kai pa e tipo di frasenan ku a keda usá. Esaki un biaha mas lo por krea rabia i desgustu pa otro nashonnan. Esaki pa añanan kaba a sirbi pa e pueblo di Kòrsou lanta kontra tur e otro islanan di Antia, meskos tambe Ulanda. Sigur tipo di ekspreshonnan manera a keda hasí den sierto medionan di komunikashon lo no faboresé nos, teniendo kuenta kon e muchanan i sobrá di e komunidat lo tuma esaki i avansá ku esaki. Lo por krea tur sorto di kos awor kontra e merikano ku nos ta deseá pa bin yena nos hotèlnan.
E pueblo mester ta mas atento den nos forma di husga i para ketu na e lès ku mester siña for di kada situashon. Den e kaso di Churandy, tin hopi kos ku nos tin ku para ketu i stòp ku e aktitut i mediokresia ku nos ta boga pa biba den. Mira kon na momentu di deporte e pueblo ta hala huntu i riba otro nivelnan importante esaki si no ta e kaso i esaki sigur un biaha mas ta demostrá ku por. Meskos tambe ku Dios ta konta na momentu di kompetensia, pero nos ta laga e mesun Dios aki for di tur otro situashon na nivel di pais.
Hopi ta papia di Dios, pero ora tin ku demostrá di bèrdat ku Dios ta importante, ta laga Dios kai pa kualke kos. Tuma un ehèmpel di e kareda ku Churandy a partisipá, ya ku a pidi pa hasi orashon (mi mes ta un di nan), pero despues di kareda a lubidá i a habri bòternan di zjampaña na su lugá. Mi ta kere ku pastor Simon Wilson tambe lo ta kompartí e mesun pensamentu ku Dios ke pa nos siña, ku despues di e kareda a tuma e gloria ku ta pertenesé na dje, pero e mes por laga algu tuma lugá pa kita esaki for di hende. E pueblo aki mester bira mas konsiente ku Dios ta kontestá orashon, hasí di kurason puru.

WILLEMSTAD – “Ta un Churandy Martina so tin, pero tin mas medaya pa konkistá”, ta loke minister Omayra Leeflang a deklará na LA PRENSA. Segun minister Leeflang, ayera un enkurashamentu inkreibel pa e kareda final di 200 meter, ya ku henter un pueblo tabata tras di Churandy pa konkistá e medaya. E sosten duná aki ta demostrá, ku e pueblo aki positivamente a drenta den un union inkreibel berdadero, despues un suseso asina por a tuma lugá. E suseso aki a surpasá kualke medaya òf gloria, ya ku pa un ratu por a gosa asina tantu ku e triunfo di Churandy i dun’é e onor i rekonosementu ku e tin derechi riba dje.
Minister Omayra Leeflang ta splika, ku Churandy a rekuperá awe rápidamente, despues di tabata hopi down despues di desishon ku a ser tumá kontra di su partisipashon. Pa minister Leeflang apesar di e desapunto, Churandy a demostrá ku e ta un kampion i ku a kompetí ku grandinan di mundu i a logra pa kontinuá pa kompetensianan muchu mas grandi ainda. Den su propio deklarashonnan na prensa internashonal Churandy a deklará, ku ya loke a tuma lugá a pasa, pero e ta motivá i inspirá pa algu mas grandi ainda. E ta deklará, ku e tin kompetensianan mas fuerte pa bai logra i lo bai traha pa krese i surpasá espektativa. Churandy a deklará na prensa internashonal, ku bida ta sigui, e lo sigui i lo bira mas grandi ainda pa konkistá kompetensianan grandi.
Pa minister Leeflang esaki ta demostrá ku Churandy a regenerá, reedifiká ku ta yen di motivashon pa algu grandi. Prensa internashonal su reakshon a keda asombrá i a deklará ku “Churandy is a great man”. Tur esnan ku a sostené i motivá Churandy ku mas di 2000 msn, kompañá ku orashon pa lag’é krese yega na e haltura inkreibel. Minister Leeflang mes no a drumi e anochi ei, ya ku e suseso aki tabata un peso i ku durante hinter anochi mester a keda atendé yamada i motivá otro pa keda mira riba éksito i no laga e suseso aki kita nan bista for di e logronan di Churandy.

WILLEMSTAD – E sosiedat di akountent i konsehero Deloitte di Antia Ulandes i Aruba, ta bai afiliá na e klùster di e ofisinanan Karibense di Deloitte. Huntu ku esnan na shete otro pais den área di Karibe i na Bermuda, e ofisinanan Antiano i Arubano di Deloitte lo forma e klùster.
“Klientenan ta deseá un servisio konsistente, unda ku ta na mundu. Ku e klùster aki no únikamente nos por sirbi nos klientenan ku ta aktivo na mas ku un isla mihó, pero e klùster ta ofresé tambe hopi posibilidat pa nos sigui profeshonalisá i krese”, asina señor Alex Møllen, Managing Partner di Deloitte di Antia Ulandes i Aruba, a deklará. E ta premirá hopi bentaha, manera ku huntu nan por forma tim pa ta na servisio di kliente, un merkado muchu mas amplio, sentronan regional di perisia, entrenamentu, un forma kordiná pa atendé ku kliente, interkambio di personal i riba hopi otro área mas.
“Nos ta hopi positivo pa loke ta e posibilidatnan ku e klùster aki ta brinda nos i e rekursonan ku ta bira disponibel asina”, segun señor Møllen. “E proseso di integrashon ta andando tur ku tin. Por ehèmpel, mañan mes señor Frank Paredes, e Chief Executive Officer di e klùster, lo bishitá nos pa algun seshon di informashon ku nos staf”. E klùster aki ta kuadra kompletamente den e vishon di Deloitte, esta “To be the standard of excellence”.
Den e proseso di transishon di e sosiedat pa e klùster señor Anthony Cijntje RA lo retirá komo sosio. Señor Marcelino Quant CPA, sosio di e ofisina na Aruba, lo muda bini Kòrsou pa garantisá kontinuidat di servisio na kliente. Marcelino Quant tin 22 aña ku Deloitte i ya ta asistí hopi kliente na Kòrsou. Pa sobrá Deloitte su tim di servisio na kliente lo keda meskos, bou di guia di pa Alex Møllen, Managing Partner, i Freddy Curiel, konsehero di e sosiedat.