ORANJESTAD- Minister di Finansa y Asuntonan Economico, sr. N. Swaen, ta anuncia nombracion di sra. Jane Semeleer como President di Banco Central entrante 1 di September 2008. Ariba proposición di hunta di comisario di Banco Central a presenta esaki na Conseho di Ministro cual a bai di acuerdo cu dicho proposición y asina a presenta esaki na Gobernador di Aruba. Sra. Semeleer, despues di a termina su estudionan na Universidad di Toledo, Ohio riba tereno di economia, a inicia su carera den sector publico na 1984 como consehero economico na Departamento di Asuntonan Economico y despues na Departamento di Relacionnan di Exterior.
Na 1990 sra. Semeleer a bai traha na Banco Central di Aruba como Adjunct-Manager di Research Department y na 1994 e a asumi e puesto di manager di e departamento menciona anteriormente, principalmente responsabel pa prepara y conseha Gerencia di Banco Central riba maneho monetario, ehecuta estudionan y prepara notanan riba topiconan financiero-economico relevante pa un banco central y coordina e publicacionnan periodico di Banco Central di Aruba.
Na 2000 sra. Semeleer a wordo apunta como director ehecutivo, formando parti asina di e Gerencia, cual funcion e ta eherce te na fin di Augustus venidero. Banda di su tarea pa duna sosten na e President di Banco Central di Aruba riba tereno di maneho y operational, e ta encarga cu e supervision di e trabownan di e departamentonan di Accounting, Operations, Cash & Vault, IT y Archive& Secretariat. Parti di e trabownan aki ta prepara e cuentanan anual y presupuesto manera prescribi door di ley, e operacion financiero (cual ta encera entre otro e maneho di e reserva di devisa), circulacion di placa di papel y moneda y IT en general. Tambe e ta encarga cu e presidencia di e comision di coordinacion di cual varios departamento di Gobierna ta forma parti di dje pa intercambia informacion riba tereno fiscal, monetario, laboral y economico. Recientemente sra. Semeleer a wordo apunta door di Gobierno pa presidi e comision cu ta encarga cu vigilacion di e implementacion di e recomendacionan di e Comision Nacional di Finansa Publico. Sra. Semeleer durante di su carera profesional a atende diferente training y cursonan na varios institucionnan internacional, entre otro IMF, Federal Reserve of New York y DNB. Sra. Semeleer ta casa cu sr. Jossy Figaroa y nan tin dos jui muher Aveline y Celeste.

ORANJESTAD - Miembro di AVP, Marlon Sneek ta declara cu nos tur por corda con mas di 5 luna pasa un grupo basta grandi di studiante di Maria College a bay oficina di minister Marisol, “bestuurskantoor” y oficina di Gobernador pa hiba nan preocupacion pa cu nan scol cu ta completamente na werki.
Nos por recorda tambe con nos minister president a sali risibi e studiantenan den un forma masha mahos mes. Despues e minister di enseñansa a bin cu yen di fanfaria, manera semper, y a bisa e muchanan pa no preocupa paso e siguiente dia mes e lo pasa na nan scol, pa tuma nota di e situacion y pa percura pa un solucion. Pero lamentablemente te dia di awe esaki no a pasa.
KIKO TA PASANDO ANTO???
Siman pasa nos por a tuma nota di e conferencia di prensa cu a ser duna pa e directora suplente di S.K.O.A., e institucion bou cual Maria College ta resorta. E directora suplente a bisa bon cla cu te cu e dia ey cu nan ta dunando e conferencia di prensa nan no a haña ningun confirmacion di e minister concerni Marisol Lopez Tromp si Maria College lo bin na remarca pa haña un renovacion. Ironia di bida pa renoba un scol caminda nos muchanan tin cu forma nan mes, pa mañan nan por enfrenta e retonan cu e pais lo bay encontra, ta tuma asina hopi tempo. Pero pa pone y kita algun “polis drumi” regalando asina Afl 200.000 na un primo a tuma solamente algun minuut. Unda e vision di e gobierno aki ta? Kico ta pasando cu nos minister di enseñansa. E gobierno aki ta regala primo placa y laga nos educacion desampara.
Segun miembro di AVP, Marlon Sneek su conclusion ta masha facil. Minister Rudy Croes a tuma un decicion contra tur conseho, gastando asina Afl 200,000 di e pueblo aki na “polis drumi” cu awe ta “polis difunto” benta den cura di D.O.W. Sr. Sneek ta haya cu ta na su lugar pa parlamento yama e minister aki aden y hacie personalmente y finacieramente responsabel pa e hecho aki y lag’e paga e placa aki bek for di su saco pa asina Maria collage por haña esaki. Haciendo uso di un dicho cu e minister aki ta usa tur ora esun cu comete eror mester sinta ariba su blarnan. Awel awor ta e momento pa e sinta ariba esunnan di dje.

ORANJESTAD - Gerencia N.V. ELMAR ta anuncia lo siguiente na comunidad di Aruba en general: Na inicio di Augustus nos a anuncia e aumento drastico den e “brandstofclausule” di 33,5 cent pa 38,6 cent pa cada kWh. Tambe nos a indica ariba e aumento di e consumo mensual pa motibo di e calor den lunanan nos dilanti.
Desde weekend cu a pasa nos ta experenciando dianan cu ta sumamente calor y unda hopi consumidor lo hasi uso di nan “airco” pa alivia e calor insoportabel aki. Actualmente ta yegando na nos consumidornan e recibo di luna di Juli 2008, den cual e “brandstofclausule” ta 33,5 cent pa cada kWh. E recibo di luna di Augustus, cu e “brandstof- clausule” di 38.6 cent pa kWh, lo wordo reparti na inicio di luna di September.
Por medio di e anuncio aki nos kier a pone enfasis un biaha mas ariba e hecho cu e consumidor mester cuminsa tene den consideracion cu fuera di e aumento di e “brandstofclausule” cu ta di 5 cent, tambe e consumo mensual mes lo aumenta drasticamente. Sea conciente desde awor cu e recibo di luna di Augustus 2008 lo ta mucho mas halto cu esun di Juli 2008.
E unico solucion a corto plazo pa reduci e gasto mensual aki, ta door di reduci lo mas posibel e consumo.
Informacion con pa reduci e consumo ta obtenibel na nos empresa y por medio di nos programa, conoce bo consumo, den cual nos techniconan por asisti e consumidor den cual forma por reduci e consumo.

ORANJESTAD- Lotto pa Deporte ta desea di aclarea cierto rumornan incorecto cu ta circulando rond. Recientemente bestuur di Lotto a dicidi pa laga haci un control y audit interno den Lotto cual ta algo masha normal den tur compania transparente. E control den Lotto ta pa aclarea un que otro. Asina cu e control termina, e resultado lo wordo presenta na bestuur cual lo mester atende cu esaki na e manera apropia.
Enberdad Lotto a tuma nota cu cu Sr. Dochi Lee a pidi su retiro di bestuur, pero esaki no tin nada di haber cu locual ta tumando lugar, esta e control y audit, pero mas bien un decisión personal cual mester wordo respeta.
Restructuracion:
Alaves Lotto ta informa cu e fundación ta pasando den un proceso di restructuración pa cual ta bay amplia y splica un poco di e cambionan interno. No obstante cu masha hopi hende casi tur dia ta gana premionan gordo di cualkier producto di Lotto pa Deporte unda tur ta cobrando nan cheque garantiza, Lotto ta inverti tambe di acuerdo cu su statuto den Deporte, Cultura y su facilidadnan deportivo.
Durante e proceso di restructuracion a tuma nota cu tin hopi speculacion incorecto ta wordo publica. E proceso di restructuracion a tene debido cuenta cu raportnan y consehonan di companianan di accountant profesional y cu tin hopi experencia riba e tereno aki. Comoquiera cu Lotto desde 2001 a cuminsa crese cu pasonan gigantesco, mester a ahusta e sistema di operación y admistracion.
A introduci un departamento cu nunca antes Lotto tabata conose esta e departamento di Human Resources y tambe mas despues a inclui un internal auditor kende mester percura pa e control debido den e Fundacion. Lotto a introduci un Business Development team kendenan tin contacto estrecho awor cu tur rebendedor y ta brindando un servicio incomparabel. A inicia pa skirbi y documenta tur proceduranan y procesonan den e compania. Un ehempel ta ora un recibo drenta Lotto te ora cu pago tuma lugar, tin un proceso y procedura awor documenta con esaki tin di tuma lugar y door di cuanto control esaki mester pasa promer cu bay over na pago.

BEIJING – Dos ansiana a keda sentensiá na un aña di re-edukashon den un kampo di trabou, despues ku nan a presentá un petishon pa tene un protesta durante e Olimpiada pa motibu ku nan a ser obligá pa bandoná nan kas.
Tur dos muhé tabata keda djarason den nan kas nobo, tres dia despues di a risibí e òrdu, pero nan ta bou di opservashon di un grupo di bisiña di vigilansia, asina un dje muhénan a bisa.
Li Xehui a bisa ku nan no a dun’é un motibu pa e òrdu di detenshon di su mama, Wu Dianyuan, di 79 aña, i su bisiña Wang Xiuying di 77.
El a bisa ku parse ta trata di un medida táktiko di intimidashon.
“Wang Xiuying ta kasi siegu i inválido. “Ki tipo di re-edukashon e por tin mediante trabou?”, Li a puntra den un entrevista na telefòn. “Nan por bai ku nan na kualke momento”.
E òrdu a bini despues di intenshonnan ripití di ámbos ansiana pa protestá na un di e tres arianan designá pa outoridatnan mes pa hasi protesta durante e weganan.

E bielorruso Aksana Miankova ku su oro den tiramentu di martin.

Melaine Walker di Jamaika a resultá ganadó di oro den 400m ku opstákulo.

WILLEMSTAD – Antia Ulandes a apelá e kontroversial deskualifikashon di Churandy Martina kende a gana medaya di plata riba 200m.
Manera ta konosí, a keda deskualifiká pa motibu di a keda akusá di a kore for di su ban.
E delegashon di Antia a bini ku solamente tres persona di e direktiva di e Komité Olímpiko di Antia, kende nan ta furioso ku e deskualifikashon despues di dos ora despues ku ofisialnan merikanonan a mira e teipnan.
“Kon tabata posibel ku ofisialnan no tabata sa ku tabata tin un fayo tékniko”, asina e mènedjer di Martina, Caroline Feith, a bisa. “Merka tin e derecho di protestá. Pero dikon e ofisialnan a deskualifiká Spearmon. Nan a nota e fayo di Martina?”
E velosista a bisa, ku tabata imposibel pa bisa for di e evidensia di video ku si tabatin un violashon.
“Mi tabatin un spaik blanku bistí. Nan no por mira nada”, asina Martina a bisa. “Mi no ta komprondé e kos aki. Si mi a trapa riba e liña, dikon e hurado no a deskualifiká mi na mes momentu ku Searmon? Tabata kasi 90 minüt despues ku nan a deskualifiká mi. Nan no a mustrami niun prueba. Nada”.

YUNNAN, China, - Un temblor di 5.9 grado riba eskala Richter ku a asotá e provinsia sùitwèst chines di Yunnan a kousa 3 morto i mas ku shen hende a resultá heridá, mas o ménos 20 di nan ta grave.
E temblor fuerte a okurí na e distrito di Yingjiang di e estado di Dehong, situá hopi pegá ku e frontera ku Myanmar (Birmania) i habitá pa minorianan ètniko, e agensia Xinhua a detayá.
E temblor a sembra pániko entre e poblashon lokal, i hopi di nan a pasa anochi resando p’e temor p’e réplikanan.
E mesun zona di e episentro djarason último a sufri un temblor di 5 grado, ku ya a motivá evakuashon di 3.400 persona i a hasi dañonan na 4.000 kas, i na e zona a registrá mas ku 100 réplika riba 3.6 grado.

Foto: China temblor 2208

E temblor a sembra pániko entre e poblashon.

WILLEMSTAD – Den kaso ku Aqualectra no ta den posishon mas pa hasi e ganashi ku pa e kompania ta hopi nesesario pa por hasi su invershonnan, e kalidat i konfiabilidat di suministro di awa i koriente lo ta na peliger.
Direktor interino di Aqualectra a splika, ku e empresa tin hopi komprenshon pa e doló ku kada subida di preis ta okashoná den komunidat. Ta p’esei, segun Casperson, Aqualectra ta sostené gobièrnu tambe ora ku e wòrdu pidí pa identifiká e gruponan den nos komunidat ku ta sufri mas a konsekuensia di un subida di preis di awa. “Aqualectra ta dispuesto pa huntu ku gobièrnu, buska un fórmula kon por sigui atendé e asuntunan aki”.
Sinembargo, segun Casperson, di e otro banda méster tene kuenta ku e posishon di e empresa, ku apesar di e situashon difísil aki mester sigui hasi ganashi, pa e por sigui bira mas efisiente i finansiá e asuntunan ku ta nesesario. “Si no por logra splika komunidat e nesesidat aki, lástimamente nos lo mester konstatá den futuro, ku e kalidat i konfiabilidat di e suministro dje produktonan di Aqualectra no por wòrdu garantisá. I esei tambe ta loke ku Aqualectra a konstatá, esta ku ya kaba, koriente ta kai afó, muchu mas, kompará ku e loke ku e mester ta. Esei ta hustamente loke ku Aqualectra tabata atvertí for di dos aña pasá.”
Den e sentido, Casperson a splika, mester laga Aqualectra hasi su trabou, pa e hasi e ganashi pa e por hasi su invershonnan na tempu. Den e kaso ku e kompania no logra e propósito aki, e no por invertí na tempu, ku e konsekuensia ku e ta konfrontá problemanan ku lo reflehá riba nos komunidat . “Esei mi ta lamentá”, segun direktor interino di Aqualectra, Anthon Casperson.

WILLEMSTAD - E hecho ku Caracasbaai, a wòrdu habrí pa públiko, sin ku tabatin un maneho, a pone ku awe por konstatá ku e área a bira un hopi sushi. E situashon aki a hala atenshon di Amigu di Tera, ku ta atvertí ku den kaso ku no tuma medida rápidamente, e situashon ta sali for di for di man. “Esei ta un situashon hopi lamentabel,” segun e splikashon di señora Raveneau. E representante di Amigu di Tera, a indiká, ku bèrdat ta boga pa kostanan ta liber i asesibel pa tur habitante, pero ku por a antisipá for di tempran, ku si habri Caracasbaai manera a hasié, ku e lo bira un porkeria. “I esei ta hustamente ta loke ku ta tumando lugá”. Amigu di Tera a konstatá, ku Caracasbaai ta sushando rápidamente. I esei ta tuma lugá tantu riba tera komo bou di laman.
Yvette Raveneau a splika, ku en general por mira e sushedat riba tera, pero ku e shushi bou di laman, ta algun bia mas tantu ku loke e tin riba tera.
Mas aleu, Raveneau a remarká, ku e área di Caracasbaai, meskos ku ta e kaso ku e área di Janthiel, ta wòrdu bishitá pa hopi turista i hendenan lokal. E konsentrashon aki ta konsekuensia di e hecho, ku no tin mas lugá na kosta pa bai. Esaki ta pone hendenan ta bòsha riba otro, loke ta pèrkurá pa e konsentrashon. E mesun situashon por konstatá na e península, segun Raveneau. Amigu di Tera ta di opinion, ku e ‘schiereiland’ aki ku semper tabata será pa Isla, ku tabatin su tankinan riba dje i ku despues ku Isla a bai, a pasa pa gobièrnu, su vegetashon ta wòrdu menasá. Ora ku e tabata será, e schiereiland a keda vírgen, pasobra nada no por a subi ariba. Ta p’esei e tin vegetashon bieu ku no tin ningun otro kaminda na Kòrsou, loke a kombertié den un lugá partikular. Entretantu un parti a wòrdu destiná pa naturalesa i un otro parti pa turismo. Segun Amigu di Tera, mester reevaluá e situashon di nobo, pa determiná si e kombinashon naturalesa i turismo, tabata un bon desishon.

WILLEMSTAD - Den kaso ku en bèrdat Aqualectra hiba gobièrnu Korte pa oblig’é oumentá e tarifa di awa, e chèns ta grandi ku e kompania ta haña rason. Direktor interino di Aqualectra, Anthon Casperson a deklará, ku Aqualectra a kuminsá un proseso hudisial kontra di gobièrnu, pa logra subi e tarifa di awa, algu ku segun Casperson, lamentablemente na e momentu aki ta hopi nesesario.
Den deklarashonnan ku diputado Humphrey Davelaar a hasi promé ku e partisipashon di e direktor interino di Aqualectra, el a antisipá, ku Aqualectra ta hiba gobièrnu korte. Segun Davelaar, mester realisá, ku dos luna pasá, ora ku a adaptá preis di produktonan di Aqualectra, a adaptá solamente koriente. ‘Te na e momentu aki, awa for di aña pasá, a konosé solamente un adaptashon. Esei ta nifiká ku a purba mantené e mesun tarifa di awa, no opstante tur e desaroyonan negativo i oumento di petroli i su derivatonan ku Aqualectra mester kumpra pa produsí awa. ‘Nos a purba mantené tantu abou posibel, ounke Aqualectra na algun okashon a indiká, ku esei ta hasié hopi daño. E kompania a indiká kaba, segun Davelaar, ku si gobièrnu no duna un adaptashon ku nan lo bai korte. “I si nan bai korte, nan lo gana sigur”. Pero awor ku e petroli ta baha, te na 113 dollar, gobièrnu ta kalkulando kuantu e pre-finansiamentu di Aqualectra tabata den e último lunanan, pa por a kubri e parti di pre-finansiámentu di e asina yamá ‘brandstofprijs’.

ARIES: Pone mas énfasis na bo salú maske bo ta sinti bon. Tur loke bo hasi ta sigui un diet saludabel. Bo aktitut nobo ta relashoná ku personanan ku interes. 25,34,13.

TAURO: Bo ta iresistibel den amor. Bo sentido di beyesa i e estilo di moda ta eksaltá. Invertí plaka den bo persona, den bo físiko i kon bo ta lusi ku bo personalidat nobo. 28, 09.

GEMINIS: Bo no tin mester di tantu ayudo di otro personanan pa sali dilanti. Bo ta sigur di loke bo ke i unda bo ta top’é. Spera rekonosimentunan i honor pa bo esfuerso. 37.

KANSER: Abo ta esun ku ta pone ultimatum i kondishonnan ku ta akomodá mihó ku bo. Ta momentu di negoshá, invertí i bende. 14,18,05.

LEO: Enfoká riba loke berdaderamente ta hasibu felis. Aseptá e defektonan di bo sernan kerí kontra bo armonia spiritual. Bo seguridat ekonómiko ta relashoná ku bo stabilidat. 37.

VIRGO: Ekspandé bo horizonte na nivel intelektual i spiritual. Estudio, lesa, biaha i kompartí bo eksperensia spiritual ku otronan. 08,20,10.

LIBRA: Bo salú mester di atenshon i esei ta rekerí hopi trabou i preokupashon. No sigui trata imposibel i duna tempu pa bo energia stabilisá. 14,33,47.

SKORPION: E interes i empeño ta e ingredientenan klar pa optené e éksito. Sa ku e benefisionan di bo akshon, bo tambe ta benefisiá. 50,13,02.

SAGITARIO: E energia ta manifestá den bo hasiendo mas aktividatnan físika i involukrábu den mas di un aktividat sosial. Loke bo ta hasi awor, bo ta hasié en grande.

WILLEMSTAD - Diputado Zita Jesus-Leito, enkargá ku e kartera di Struktura Estatal ta spera ku tur frakshon den Konseho Insular lo ta representá awe tardi ora tin e reunion di Komishon Sentral pa diskutí último desaroyonan riba tereno estatal, na kaminda pa e Konferensha di Mesa Rondó na desèmber awor.
Jesus-Leito a bisa esaki na bispu di e reunion ku ta tuma lugá awe tardi 2’or.
Lo ta e promé reunion riba tereno estatal, despues ku Konseho Insular a regresá di reses siman pasá. E reunion ta tuma lugá meimei di deklarashonnan di sekretario di Estado pa Relashon den Reino Ank Bijleveld, ku asta 1 di yanüari 2011 ta kuestionabel, si no kaba ku e trabounan di preparashon na tempu.
Bijleveld ta para’riba ku e leinan di konsenso mester ta kla promé ku por papia di e proseso di desmantelashon di Antia. LA PRENSA a informá ampliamente di esaki den su edishon di ayera.
Ta konosí ku gobièrnu di Kòrsou a bin ta prepará ekstensamente pa e siguiente Konferensha di Mesa Rondó ku ta programá pa dia 15 di desèmber di e aña aki.
Durante e konferensha aki, lo evaluá te kon leu teritorio insular di Kòrsou a yega ku e trabounan ku mester tuma lugá den kuadro di e konferensha aki.
Faltando 4 luna pa e tuma lugá, ainda tin vários punto ku mester kaba di atendé. Un di nan ta e konsepto di konstitushon ku tin riba mesa ku mester kaba di refiná. Ta trata di e konsepto produsí pa Komishon Konstitushon presidí pa mr. Gilbert de Windt.

WILLEMSTAD - Situashon i maneho finansiero di e islanan ta bayendo bon. Pero, ainda tin diferente kos ku mester kambia. Mi ta kere ku nos tin un kaminda largu pa kana ainda,” asina profesor Hans Weitenberg, presidente di Kolegio pa Supervishon Finansiero (Cft) a revelá ayera durante un enkuentro ku prensa.
Último dos simannan aki e kolegio a papia ku representantenan di e islanan pa weta kon e proseso pa pone òrdu den situashon i maneho finansiero ta bayendo.
Kontrali na e forma di hasi kos te ku awor, e kolegio a opta pa no bishita e islanan unu pa uni, pero pa konvoká un enkuentro na Kòrsou ku representante di tur e islanan, partikularmente e diputadonan di finansa.
Di e forma aki, nos por tabatin un interkambio posibel entre e islanan, partikularmente entre e islanan BES i e dos entidatnan nobo ku ta bai lanta, esta Pais Kòrsou i Pais St. Maarten. E diputadonan di finansa por a splika nan eksperensha, kanando e trayekto aki, segun Weitenberg. El a bisa ku den e simannan ku a pasa, e kolegio no tabata tur dia riba e islanan, pero si tabatin kontakto diariamente ku e sekretariado.
Nos mester konstatá ku tin progreso den e esfuersonan aki pa drecha kos, asina Weitenberg a deklará. E rapòrt di e di dos kuartal tabata mihó ku e promé kuartal, asina Weitenberg a konstatá.
El a bisa, ku ela ripara ku e respektivo gobièrnunan ta hasiendo nan trabou, ounke aki i aya tin kos pa drecha ainda. Weitenberg a splika ku el a pidi e respektivo islanan pa ora nan ta raportá, nan hasi esaki pa tur hende por komprondé. E ta importante, segun Weitenberg pasobra e kolegio mester por huzga ku kambionan proponé den presupuesto, ta kambionan temporal òf kambionan permanente, pero mas ku tur kos, ku ta kambionan nesesario, segun Hans Weitenberg.

WILLEMSTAD - Gobièrnu di Kòrsou no a tuma desishon ken finalmente ta organisá karnaval 2009. Miembronan di Bestuurscollege ke mas informashon promé ku e tuma un desishon, asina diputado di Kultura Marilyn Alcalá-Wallé a konfirmá.
Tur hende tabata pendiente pa e desishon ku gobièrnu lo mester a tuma ayera riba e asuntu aki.
Ta konosí ku e asuntu aki tin basta hende, partikularmente esnan ku ta enbolbí den mundu di karnaval preokupá kiko ta bai sosodé.
Reportadamente tin tres grupo ku ta interesá pa organisá karnaval di otro aña, ku ta Fudeka, esun ku último añanan a bin ta hasi e trabou aki, Foka 2 ku den pasado tambe a yega di organisá e evento i e grupo enkabesá pa e konosido Armando Huerta.
E asosashon di gruponan di karnaval, pa medio di nan bosero Stanley Ignacio a bisa na diferente okashon kaba ku e gruponan ke trankilidat durante temporada di karnaval 2009.
Nos no ke habri aña ku diskushon i pleitamentu, ta loke ela bisa.
Ayera sinembargo, no a tuma un desishon. Mester bisa si, ku e instanshanan ku mester a konsehá gobièrnu riba e materia aki a hasi nan trabou i e tópiko tabata motibu pa diskushon amplio den Bestuurscollege.
A resultá sinembargo ku e konseho di e instanshanan aki tòg no tabata kompleto, a lo ménos, Bestuurscollege tabata ke mas informashon al respekto. Entre otro miembronan di Bestuurscollege tabata ke sa ta a base di kiko a skohe, esta kua tabata e kriterionan.

WILLEMSTAD - E kantidat di droga ku Marina Real a konfiská e siman den laman Karibe tin un balor di mas di 200 mion euro, si bende esaki riba merkado na Oropa. Esei ta loke ekspertonan ta kalkulá, despues di evaluá e lote ku nan a konfiská den un barku tabata nabegá bou di bandera panameño.
Manera LA PRENSA a informá ayera kaba, e barku di guera Hr. Ms. Van Speyk a interseptá e barku ku a sali di Venezuela i tabata rumbo pa Oropa. A detené e barku na e parti sur di Puerto Rico.
E droga tabata skondí di 167 bulto i ta representá 4200 kilo di kokaina.
E droga tabata skondí den kompartimentunan bon protehá i ta despues di 36 ora di buska, a logra pone man riba e droga.
Balor di e droga aki ta dependé unda bo pone riba merkado, asina analistanan ta mustra.
Na Oropa por ehèmpel, un kilo di koka tin e balor di 50 mil euro. Ku otro palabra, e droga konfiská aki lo tin balor di mas di 200 mion euro riba merkado oropeo.
Kon ta sigui atendé e asuntu aki ta den man di un organisashon internashonal ku tin su sede na Key West, Florida. Merka ta traha huntu den esaki ku e paisnan ku tin interes den e region manera Mexico, Venezuela, Fransia, Ulanda i Antia.
Manera ta konosí, ta e di tres lote di droga ku marina a konfiská den tempu kòrtiku último simannan. Manera ya nos a informá na kuminsamentu di e siman aki, a konfiská un lote di droga di 160 kilo di kokaina den awanan na e parti ost di Kòrsou.

LOS ANGELES, Merka, - E aktris i komediante merikano Roseanne Barr a akusá Angelina Jolie i su pareha Brad Pitt den un atake kruel durante kua el a bisa ku Jolie ta diabóliko i Pitt ta hende kèns.
Riba su website ofisial, Barr direktamente ta papia ku tata di Jolie, Jon Voight.
“Bo yu muhé diabóliko i su amante kèns kada aña ta generá mas o ménos 40 mion dollar den pelíkulanan violento i sikópata.
Nan ta regalá sèn solamente na 3 mucha ku hamber.
Nan ta trata di aparentá ku humanidat ta importá nan, miéntras nan ta kria muchanan kèns ku lo hasi mas daño na mundu”.

Foto: Angelina Jolie i Bradd Pitt 2208

Angelina Jolie i Brad Pitt huntu ku yunan ohochi Knox Leon i Vivienne Marcheline, kendenan a nase 12 di yüli último den un klínika na Fransia.

Foto: Roseanne Barr 2208

Roseanne Barr

WILLEMSTAD – Aña eskolar a kuminsá tur ku tin i studiantenan di klas 3 i klas 4 di Scholengemeenschap Otrobanda (SGO) lokalidat Goslinga ta wak bèk ku smak riba nan siman di introdukshon pa loke ta aña 2008/2009.
Esaki a tuma lugá djabièrnè último i a konta ku un programa masha variá mes. Studiante i dosentenan por wak bèk riba un tremendo dia, kaminda sektor di Ekonomia, Kuido i Bienestar a klousurá nan siman di introdukshon.
E programa interesante i edukativo a konta ku palabra di bonbiní di yùfrou Fullinck, charla di Gita Römer riba balor di ta hóben, charla di DARE riba konsekuensia di sèks, charla riba motivashon pa logro, charla di M. Carolina riba sektor di ekonomia di Banko Sentral i un charla riba kuido i bienestar.
Henter e klousura di siman di introdukshon a kana masha bon i ta bai sigui motivá e hóbennan dor di laga hendenan eksitoso di nos komunidat papia un biaha pa luna ku nan. Den e evaluashon ku tabatin na final e hóbennan a demostrá ku nan ta hopi satisfecho ku henter e programa di introdukshon pa e aña eskolar aki. E hóben studiantenan tabata asina entusiasmá ku nan mes a bin ku e idea pa bai Boneiru ku un grupo di nan klas pa interkambio ku un VSBO di Boneiru. Turesten a lanta un komishon di studiantenan ku ta bai traha riba esaki. E hóbennan ta spera, ku nan lo por haña tambe di hendenan den komunidat e sosten pa yuda nan realisá e proyekto aki.

COPRA
Verginio R.R. (15 aña)
A laga atras su mama Shirley v. Der Leeuw i yu, tata Rudsel Copra, welanan Claudette Copra i Virginia v. Der Leeuw, welonan Carol Arrendell i Rignell Graanoogst. Akto di entiero ta djabièrnè 22 di ougùstùs na Ulanda.

FRAAY-ILARIA
Vilma Rosita (76 aña)
A laga atras su kasá Sixto Fraay, yunan Rudsel Fraay i Maybelline Leolina, Luthwina, Sidney, Sheila Fraay, Sidney i Rutsela Fraay, Gwendell Fraay i Sharnella Ible, Arlison Fraay i Amarilys Prudensia, Marlon Fraay i Lidia Puriël. Akto di entiero ta wòrdu anunsiá despues

FANEIJTE
Edison Narciso
Mihó konosí komo Bòmbò
A lga atras su mayornan Sila i Claudio Faneijte, Julia Panneflek i Olga Rojer, ruman Frank, Yvonne, Urvin Faneijte, Helga Delle, Linda Suares, Indra i Sherman Rosalie tur ku nan famia. Akto di entiero ta djasabra 23 di ougùstùs for di El Consolador pa santana Gr. Kwartier. Bishita 9or. Promé ku entiero tin un respòns 11or na El Consolador.

NG-SEBELON
Ines Martina (90 aña)
Mihó konosí komo Mai Chita òf Mai Ines
A laga atras su yunan Humphrey Ng, Frank i thelma Ng-Bisschop, Beatrice i Stnaley Cijntje-Ng, Marlene i Ronnie Bekker-Ng, Raymond Ng. Akto di entiero ta djaluna 25 di ougùstùs for di misa Brievengat pa santana Consolador Brievengat. Bishita 1or. Promé ku entiero tin un s.s. di misa 4or.

ASIEDU
Jaleesa Maria (trágiko)

WILLEMSTAD – Servisio di Salubridat Públiko di Kòrsou GGD konhuntamente ku 25 organisashon den e sektor di salubridat ta invitá pueblo di Kòrsou pa bishitá e Bùs pa Promoshon di Salú kual lo ta stashoná dianan 26, 27 i 28 di ougùstùs di 9or di mainta te ku 4or di atardi na Waaigat.
E organisashonnan ku e siman aki ta partisipá ta:
Djamars 26 di ougùstùs:
09:00-12:00: Curaçaose Hartstichting, Skuchami,
12:00-16:00: St. Witgele Kruis, GGD
Djarason 27 di ougùstùs:
09:00-12:00: Fundashon Lechi Mama
Fundashon Duna Lus
12:00-16:00: Famia Planiá
Fundashon Pro Bista
Djaweps 28 di ougùstùs:
09:00-12:00: Prinses Wilhelmina Fonds
Dietista (Ban Bario Bek).
12:00-16:00: GGD i Curreuma
Durante tur e tres dianan por inskribí riba e bùs pa e proyekto “Kana pa bo Gana den bo Bario”. Kanando 30 minüt durante 5 dia den siman bo ta mehorá bo salú, kombinando esaki ku un alimentashon salú i balansa.

WILLEMSTAD – Servisio pa Asuntunan di Enseñansa, SAE, for di djaluna 25 di ougùstùs te ku 29 di ougùstùs i di 1 di sèptèmber te ku 5 di sèptèmber próksimo, lo atendé petishonnan di mayornan pa transporte eskolar, den oranan di mainta so. Esaki debí na e kantidat di tareanan atministrativo pa loke ta trata otorgashon di transporte públiko pa skol na e alumnonan ku tin derechi ariba.
Pa por sirbi komunidat mas mihó posibel, mester sera un kantidat di ora pa dia, pa hasi trabounan interno i pa por sigui brinda mayornan, muchanan i shofùrnan un mihó servisio. SAE lo ta habrí parti mainta di 8or pa 12or, pa atendé ku tur hende ku presentá ku un petishon pa haña transporte eskolar. Esaki ta posibel di djaluna pa djabièrnè.
SAE tambe ta yama danki na tur envolví, inkluso mayornan i shofùrnan, pa nan pasenshi durante di e último tempu aki.