WILLEMSTAD - For di mainta direktiva di skol Adventista ta papiando ku instansianan konserní pa evaluá kon e muchanan di e skol por kontinuá ku lès despues ku warwarú a asotá e skol di un manera indeskribibel, manera presidènt Castro Mercalina a bisa LA PRENSA djasabra mèrdia, djis despues di a tuma nota di e desaster. “E ta gradisí Dios, ku e desaster no a sosodé den siman ora tin skol. Si bo mira kon e skol a keda despues di e desaster ta realmente inkreibel, panchi di dak tabata skeiru rònt speelplaats i tambe dilanti di e skol, sin menshoná mes e edifisio komersial ku tin dilanti e skol kaminda muraya a bini abou kompleto. Un kas eibanda su porta di heru (hèkwèrk) tambe a basha abou.”
Den un kombersashon ku sr. Mercalina i tambe e funshonario Henry Isenia, e último aki a bisa, di ta evaluando pa duna lès na otro skolnan ku aktualmente ta papiando kuné.
Diputado Alcalá-Wallé den un kombersashon kòrtiku a indiká, di lo papia ku e direktiva awe mainta pa atendé un ke otro. Mercalina a bisa, ku e ta spera pa 12or di mèrdia por tin klaridat kiko ta bai sosodé pa loke trata lès na e muchanan di Adventschool. For di den fin di siman a limpia e skol i tapa e dak ku tapol, miéntras ku tambe ta purba repará esaki, pero e trabounan mes lo no keda kla kompletamente pa e siman aki. Tin algun klas ku ta posibel duna lès den dje, pero esaki sigur no ta konta pa tur klas.

PHILADELPHIA – Andruw Jones a hunga 1835 wega den Liga Grandi i un 324 wega mas den Liganan Menor sin nunka a hunga primera base.
Te ku djasabra anochi ora ku Jones ta na Las Vegas, tripel A, hungando den rehabilitashon a hunga primera base na su mes petishon.
Dodgers a invertí 36 mion dollar den Jones komo centerfielder. E direktiva di e ekipo i e staf médiko a aprobá e petishon, ku e rísiko di un leshon hungando un posishon no familiar no ta motibu pa tené for di aliniashon.
“Esei ta loke nos a hinka den balansa”, asina e gerente general di Dodgers Ned Colletti a bisa ayera. “Su rudia no ta sintiendo bon manera ku e kier, pero e no tabata kier a sinta un otro dia afó”.
Jones ku ta riba DL pa motibu di tendinitis na su rudia robes, a yega Las Vegas nuebe dia pasá i a hunga den tres wega promé dia a trapa den un buraku den outfield i a iritá su rudia drechi ku el a kaba di operá.
Las Vegas djasabra no por a hunga ku DH, ya ku ta dos filiashon di Liga Nashonal a enfrentá otro. Esaki a pone ku Jones a pidi ofisialnan di e klup pa lag’é hunga primera base, bisando ku e moveshonnan lo ta limitá einan i ku el a hunga e posishon ei algun biaha durante spring training ku Braves.
Jones tabatin dos hit, roba un base i a hunga seis ining na primera base promé di e bandoná wega pa un remplasante defensivo.
E no a hunga ayera djadumingu, den loke Colletti a bisa ku tabata un dia liber planeá kaba. Colletti a bisa, ku e posishon ku Jones lo hunga awe no a keda disidí ainda.

WILLEMSTAD - Curaçao Bodybuilding & Fitness Association, ta pidi tur amantenan di Bodybuilding i Fitness, pa reservá djasabra 30 di ougùstùs próksimo.
Esaki ta e gran dia pa presensiá un kompetensia i un shou espektakular.
E partisipantenan di diferente gymnan ta preparando den full swing, pa djasabra 30 ougùstùs próksimo nan por duna esnan presente un bon kompetensia riba nivel. Tambe lo tin un bon show di baile, presentá pa The Dancing Treasures i un Guestposer di sorpresa.
Gymnan ku ta partisipá ta lo siguiente: Bob Esprit Gym, Geoffrey,s Gym,
Body’s Evolushon, B-Fit Fitness Center, Sint Jozef Fitness Center, Diamond Gym i Fisical Gym.
Aparte di e kompetensia i show, Curaçao Bodybuilding & Fitness Association ta agregá e kategoria di veteranonan riba 40 aña di edat.
Tur e ganadónan di kada kategoria lo bai representá Kòrsou den Kampionato Antiano ku lo tuma lugá na hermana isla Boneiru dia 13 di sèptèmber próksimo.
C.B.B.F.A. ta invitá henter pueblo di Kòrsou, muy espesial e diferente gymnan ku tin partisipante pa bin apoyá nan atletanan.
E asosiashon C.B.B.F.A. ta hasiendo nan máksimo esfuerso pa bin presensiá un bon kompetensha i alabes un show riba nivel.
No por pèrdè e kompetensia i show aki.
Alabes C.B.B.F.A. ta rekordá tur e partisipantenan i esnan interesá pa e kompetensia ariba menshoná ku lo tin un reunion djasabra 23 di ougùstùs den sala di reunion di C.S.F. na Otrabanda pa 7‘or di anochi. Un boka bisa otro.

WILLEMSTAD – E kampionato di Dam Individual 2008, ku ta tumando lugá na e promé piso di San Marco Hotel a kontinuá.
Tabatin e siguiente resultadonan:
Alias-Cadeau 2-0.
Marquita-Miguel 2-0
Maduro-van Eiken 2-0
Monk-Wilson 1-1
Angela-Leocaria 2-0
Despues di shete buèlta e tabla di posishon ta lo siguiente:
-Raoul Alias 7-12
-Nelsen Angela 6-11
-Mijail Eisden/Antonio Marquita 6-9
-Marvin Leocaria/Mario Wilson 6-7
-Glenn Monk 7-6
-Franklin Maduro 6-4
-Gedion van Eiken 7-3
-Leonardo Cadeau 6-2
-Victor Minguel 7-0

WILLEMSTAD – Asosashon di Músiko di Kòrsou, AMAK, ta satisfecho ku e logronan di e Asosashon den su kuarenta aña di eksistensia. Feco Gomes, presidente di AMAK a splika, ku e satisfakshon aki ta eksistí serka e Asosashon, entre otro pasobra a bira posibel pa e organisashon músiko, realisá vários meta, no opstante e hecho ku e medionan disponibel tabata skars.
Komo éksitonan di AMAK, ku e fin di siman aki ta selebrá su di 40 aniversario, Gomes a menshoná entre otro e hecho ku a logra ku Festival di Tumba, ta kai bou di e Asosashon. Despues a sigui eksitoso festivalnan di tumba ku AMAK a organisá den Festival Center.
Un otro logro importante tabata na aña 1976 ora ku AMAK a haña rekonosimentu serka gobièrnu ku ta enserá ku ofisialmente Asosashon di Músiko ta e instansia ku mester duna konseho na minister di Hustisia enkuanto entrada di músikonan estranhero. E organisashon di diferente kurso di músiko den añanan setenta, tambe ta un di e logronan positivo di e Asosashon di Músika.
Feco Gomes, aktualmente tin un proyekto di 700 músiko pa hóbennan den bario. E proyekto, segun e splikashon di e presidente di AMAK, ta pa perkurá pa kontinuidat.
Den kurso di transkurso di e añanan di eksistensia AMAK, tin sierto problema ku a wòrdu atendé. “Por ehèmpel, resientemente esun di Aruba, kaminda nos a manda pidi gobièrnu respaldá nos”. Feco Gomes a bisa, ku Gobièrnu di Kòrsou a manda e karta di Asosashon pa Gobièrnu Sentral, pero ku e Asosashon no a konstatá ningun akshon rápido. “Nos mes a buska nos kanalnan serka outoridatnan arubano. I nos ta kontentu ku nos por a logra ku awor nos músikonan por drenta Aruba i haña un trato manera mester ta”.

WILLEMSTAD - E momentu ku Surinam Airways a laga pasaheronan di Insel Air na kaya na aeropuerto di Trinidad, tabata ora ku e kompania di aviashon di Kòrsou, rekonsiderá e koperashon ku e kompania sürnam. Esei tabatin komo konsekuensia, ku a surgi un kambio den e koperashon entre dje dos kompanianan, ku a kuminsá kasi un aña pasá. Den deklarashonnan ku Edward Heerenveen, direktor di Insel Air a hasi, el a konfirmá e status aktual di e koperashon entre dje dos kompanianan. Heerenveen a splika, ku e relashon entre Insel Air i Surinam Airways riba su mes ta bon, pero e koperashon di trabou ku tabata eksistí entre dje dos kompanianan no ta mesun kos mas, manera tabata e kaso kasi un aña pasá.
E motibu di esaki ta, ta basá riba e diferensha den kultura. Insel Air siendo un kompania kompletamente privá, versus un kompania di gobièrnu, manera Surinam Airways, ta konfrontá ku e situashon, ku tin tòg hopi asuntu ku no por wòrdu atendé, manera debe ser. Entre otro Heerenveen a splika, ku ora Insel Air mester tuma un desishon, esaki ta wòrdu tumá den Hunta di Komisario i gerensia, den lapso di algun ora òf un dia. Den e kaso di Surinam Airways, tin sierto asuntu ku mester bai parlamento promé. Den e kuadro ei, tabatin algun asuntu ku a pone ku e relashon no a kana kompletamente bon. E intenshon ta pa rekonsiderá pa determiná kon ta bai sigui.
Intenshonalmente
Intenshonalmente a skohe pa mantené e informashon, di e kambio den e relashon entre Insel Air i Surinam Airways, ku a tuma lugá mas o ménos sinku luna pasá, pasobra ta trata na promé lugá di un asuntu entre dje dos kompanianan. Segun e direktor di Insel Air, no t’asina ku e kompanianan no ta komuniká ku otro. “Ketu bai nos ta papia ku otro i nos ta evaluá ampliashon di e ruta. I nos ta investigá ta mira si tòg nos por yega na un fórmula, kaminda ku por konhuntamente riba algun asuntu.”

BEVERLY HILLS, California, - E pareha resien kasá Ellen DeGeneres, di 50 aña, i Portia de Rossi, di 35 aña, no a deskartá ku den futuro nan ke bira mama, asina e revista People a publiká.
“Mi no sa si esaki ta di inmediato, pero ta algu ku semper nos a papia riba dje. I si e yunan sali asina bunita manera esnan di Angelina Jolie i Brad Pitt, pakiko no?”, DeGeneres a bisa.
E dama presentadó di programa na televishon merikano no a aklará si nan lo adoptá yu òf si un di nan dos lo embarasá mediante un donante di spèrma.
E aktris Ellen DeGeneres resientemente a kasa ku su frei Portia de Rossi.
E evento a tuma lugá ku un seremonia íntimo, na kua a asistí solamente 19 invitado i na kua tabata presente nan famianan i amigunan mas serkano.
Despues di su relashon ku Anne Heche, Ellen DeGeneres pa mas o ménos kuater aña ta sali ku Portia de Rossi.
Nan tabata aparesé huntu na aktonan públiko.
Nan a kasa ku otro danki na e resiente lei ku ta pèrmití matrimonio homoseksual na California.
Ellen DeGeneres ta presentá e programa popular “The Ellen DeGeneres Show” i Portia de Rossi ta konosí pa su ròl den e seri “Ally McBeal”.

Foto: Portia de Rossi i Ellen DeGeneres 1 2508

Portia de Rossi, di 35 aña, i Ellen Degeneres, di 50 aña, riba portada di revista People.

Foto: Ellen DeGeneres i Portia de Rossi 2 2508

BEIJING – Ku un magnífiko seremonia estilo karnaval, China a klousurá su debut djadumingu komo anfitrion di mundu, despues di 16 dia di un programa kasi sin fayo pa organisá e Weganan Olímpiko na kua a pone aserka un logro atlétiko di e grado di mas haltu. E logronan grandi chines, a bai pareu, sin embargo, ku e koutela di e gobièrnu enkuanto e diferensha di pensamentu i libertat di ekspreshon.
E kresiente super potensia a logra den gran parti loke e tabata deseá ku e weganan aki: Un aktuashon dominante di su atletanan pa koroná e kosecha di medaya di oro pa promé bia i un organisashon kasi sin fayo ku a mustra instalashonnan di promé nivel i voluntarionan animá na e kongregashon pasífiko di mas grandi di bishitantenan strañero.
Komo èkstra, no unu sino dos atleta tabatin probablemente e dos mihó aktuashonnan den historia di Olimpiada – Michael Phelps ku ocho medaya di oro den landamentu i e hamaikino Usain Bolt ku tres oro i tres rèkòrt mundial den atletismo.
Komité Olímpiko Internashonal, kua su selekshon di Beijing komo anfitrion na 2001 a ser hopi kritiká, a para ariba ku su desishon tabata reinvidiká.
“Awe nochi, nos a yega na e final di 16 dia glorioso ku nos lo rekordá pa semper”, e presidente di KOI, Jacques Rogge, a bisa na e oudiensia den Stadion Nashonal. “Pa medio dje weganan aki, mundu a siña mas di China i China a siña mas di mundu”.

 

WILLEMSTAD – Despues di e kandela feros ku a kuminsá alrededor di 6or ayera tardi na Shop & Save, awe mainta ainda bomberonan tabata na e sitio. E kandela aki a kousa bastante molèster di huma i awe mainta sigur sinku skol no por a habri òf mester a manda e muchanan kas. Otro konsekuensia di e kandela aki ta, ku awe mainta empleadonan a yega boka di trabou i no por a hasi nada sino wak kon e kandela aki a destruí e supermerkadonan. Na e sitio por a mira tambe outoridatnan ku ta hasi investigashon i tambe funshonarionan di seguro.

WILLEMSTAD - Awor ku e proseso di saneamentu di debe lo no kuminsá pa e aña aki mas, Gobièrnu Sentral mester fia un montante di komo 515 mion florin èkstra pa por kumpli ku su kompromisonan finansiero. Ku e meta aki, parlamentu antiano lo reuní mañan djamars pa formalisá esaki.
For di momentu ku a bira konosí, ku 15 di desèmber 2008 no ta bira posibel mas pa desmantelá Antia i kada isla haña nan mes status estatal, tabata evidente ku mester trese kambio tambe den e struktura finansiero di pais, tantu di Gobièrnu Sentral komo di Gobièrnu Insular.
T’asina, ku e lei pa regla supervishon finansiero riba e islanan – kondishon promé ku Ulanda saka un sèn pretu pa Antia – no tabata kla tampoko.
Tantu riba nivel sentral komo riba nivel insular a stens ku Ulanda lo tuma un parti di e debe, ku lo a aliviá presupuesto di e montante supstansial di pago riba e debe aki. Esei mes a hasi posibel ku Gobièrnu Sentral por a presentá un presupuesto balansa na parlamentu, un kos ku hopi aña largu nos no a konosé. Pero e kambio a pone ku den práktika esaki ta nifiká ku ni e teritorionan, ni Gobièrnu Sentral no por konta mas riba e sosten di presupuesto ku Ulanda lo a brinda. Ku otro palabra, mester oumentá atrobe e plafònt pa fia riba merkado di kapital.
Pa Gobièrnu Sentral, esaki ta nifiká un montante kalkulá na 515 mion florin. Interesante ta pa menshoná ku Gobièrnu Sentral por konta riba un entrada adishonal basa riba mas entrada – entre otro di OB ku ta kobra riba gasolin – pero e entrada aki definitivamente no ta sufisiente pa por kubri e nesesidat finansiero di e aña aki.

WILLEMSTAD – “Loke a sosodé den fin di siman ta un warwarú ku a pasa riba sierto parti di nos isla. Djis maginábu ku tabata trata di un orkan. Mi ta kere ku loke a sosodé mester sirbi komo un lès pa nos. Pa nos realisá ku nos mester kuida mihó.” Na palabra gezaghèber di Kòrsou mr. Lisa Dindial ayera durante un enkuentro ku prensa.
E warwarú a sorprendé hopi hende den e área afektá. Ounke ku nos ta den temporada di orkan i maske e dianan aki tempu tin biaha ta straño, niun hende a spera e fenómeno aki den e forma ku el a presentá su mes.
Polis a haña 169 yamada di hendenan ku tabata solisitá yudansa. Di kantidat aki, 140 ta trata di daño na kas den área di Gibraltar, Grinoli, Souax, Juan Domingu i vários otro bario mas den serkania.
Atraves di e numbernan 911 i tambe 866-6174 por a yama i indiká na outoridatnan unda tin daño.
E bientu fuerte a ranka masha hopi dak bai kuné, el a basha waya di lus abou, ophetonan ku bientu a lanta di un kaminda bai depositá otro kaminda a okashoná daño entre otro na outo di hende.
Un pal’i áwaseru ku a kai den mesun área aki a hasi e daño mas grandi ainda, yenando kas di hende ku awa, kousando daño na nan mobilario i otro kosnan den kas. Ta masha trabou tabatin pa kubri e daknan ku a keda habri ku tapol i plèstik. Polis tambe tabatin su man yen ku direkshon di tráfiko.

WILLEMSTAD - Peter Cosster, esun ku ta manehá e sentro di rekreashon na Lagun, no ta interesá pa e asuntu aki bai kaba den korte. Esei ta loke el a informá gobièrnu di Kòrsou tambe ofisialmente. Gobièrnu di Kòrsou a pidi Cosster awor pa fiha un fecha pa partidonan sinta na mesa, promé ku dia 29 di ougùstùs awor.
E sentro a bira un punto di diskushon den temporada di fakansi ora a resultá ku muchanan ku tabata di bishita den e área pa un plan di fakansi, no por a hasi uso di e sentro.
A bin sali na kla ku esun ku tabata responsabel pa maneho di e sentro aki anteriormente Gilbert Libier, a traspasá e sentro – reportadamente kontra pago, pero no ta muchu kla ainda si esei en bèrdat tabata e kaso – pa Cosster. E hecho ku Libier entretantu a fayesé, no ta yudando e kousa pa trese mas klaridat.
A manda diferente karta pa Cosster den kua ta mustr’é ku e mester traspasá e sentro den man di gobièrnu atrobe pero el a ninga esaki terminantemente te ku awor.
Cosster ta argumentá ku el a invertí i no ta dispuesto pa pasa e sentro sin mas over pa gobièrnu. El a bisa ku e tin un plan ku e sentro ku lo benefisiá henter e área di Lagun. Ku esaki, tabata parse ku kos a stanka.
Diputado Marilyn Alcalá-Wallé a bisa ku entretantu tin un tiki mas klaridat. Den e dianan ku a pasa gobièrnu di Kòrsou a haña diferente karta di Cosster den kua e ta bisa di ta dispuesto pa entrega e yabi, pero ku mester tene kuenta ku palabrashonnan ku e tin hasi kaba. Komo ku maneho di e sentro tabata kai bou di dje, Cosster a yega na sierto palabrashonnan ku otro hende anto el a indiká di ke weta e asuntu aki bon, pa e no hañ’é ku kaso den korte riba dje.

WILLEMSTAD - E fondonan ku Ulanda a pone disponibel pa atendé ku e midimentu di polushon riba nos isla – un suma di mas o ménos mei mion florin – no ta sufisiente. Es mas: e ta hopi leu for di loke ta nesesario. Un aparato so pa midi ta kosta alrededor di 250 pa 300 mil heldu. Anto mester di kuater di e aparatonan aki. Mester buska finansiamentu pa e proyekto aki, promé ku nos por kumpli ku e palabrashon ku Ulanda.
Esei diputado enkargá ku Refineria Isla Humphrey Davelaar a enfatisá den su kontestashon di pregunta riba e refineria na Konseho Insular.
Partikularmente miembro di frakshon di Partido Demokrat Norbert George a hasi pregunta riba e punto spesífiko aki.
Ulanda a mara Kòrsou pa atendé e problema di polushon di Refineria Isla den e kombenio ku el a firma na luna di mei último ku nos pais, un kombenio ku ta karga e nòmber Sociaal Economisch Initiatief, SEI.
Pa desèmber 2008, Refineria Isla mester kumpli ku eksigensianan ku ta para den su pèrmitnan pa loke ta limitashon di polushon di Kòrsou. No tin diskushon: gobièrnu di Kòrsou mester sòru pa esei, asina sekretario di Estado enkargá ku Relashon den Reino Ank Bijleveld a bisa e tempu aya, despues di a firma e protokòl pa ehekushon di e Inisiativa Sosial Ekonómiko (SEI). Esei tabata djabièrnè 23 di mei último.
Tal manera nos a informá kaba, tin 237 mion florin disponibel pa 118 proyekto. Di e montante aki, Ulanda a pone 60.6 mion. Un dje proyektonan ku durante firmamentu di e protokòl, Bijleveld a enfatisá riba dje ta e provishonnan ku a pone den e trayekto di SEI pa atendé ku e problemátika di Refineria Isla.

AMSTERDAM/ WILLEMSTAD - Korte na Amsterdam a kondená Geoffrey N. di 37 aña na seis aña di kastigu di prizòn. Korte a konsiderá probá, ku e ta esun ku a tira Rick Holshuijsen di 44 aña mata den Cafe Familia na Amsterdam den e anochi di 25 pa 26 di yanüari.
Ministerio Públiko anteriormente a pidi 8 aña pa e akusado kende nan a akusá di a tira e eks praktikante di lucha libre Rick Holshuijsen di 44 aña di edat mata den Cafe Familia na Amsterdam Noord.
Fiskal a konsiderá, ku ta probá ku ta Geoffrey a mata e hòmber aki, ku ta un hòmber konosí pa su kurpa grandi.
Promé ku e insidente, Holshuijsen, ku tambe ta konosí komo “De Reus” a laga un granada eksplotá den e cafe, meimei di esnan presente. Un total di 12 persona a keda herida, di kua algun hopi serio.
Hustisia a tene kuenta ku esaki, na momentu di stipulá su eksigensha den e kaso aki, pero tòg ta haña asesinato proba.
N. tabata sa ku su arma di kandela tabatin bala aden i ku e ta funshoná, asina fiskal Lilian van Tilburg a insistí. Ademas t’asina ku N. a tira riba Holshuijsen for di un distansha kòrtiku.
Ministerio Públiko a bisa ademas ku e ta duda den deklarashon di testigunan. Di kon N. no a mek su arma riba partinan ku no ta vital di e víktima? ta loke Van Tilburg a puntra.
Abogado di N. ta haña di su parti ku aki mester papia di defensa propio i el a pidi pa deklará su kliente komo persona liber.

WILLEMSTAD – Segun informashon ku LA PRENSA a risibí serka esnan enbolbí resientemente a forma un komishon pa kordiná i proponé tur posibel, paso ku tin komo meta pa rehabilitá Tula i su kompañeronan pòsthumo.
Nòmber di e komishon ta ‘Komité Rehabilitá Tula’.
E komité tin un direktiva i un Grupo di sosten. E direktiva ta konsistí di e siguiente personanan: Don Martina, presidente; Lionel Janga, sekretario; Jandi Paula, Suzanne Camelia-Römer, Jaime de Sola, Charles do Rego, Carel de Haseth i Gibi Bacilio.
E Komité ‘Rehabilitá Tula’ ta desaroyando relashon di trabou i di sosten ku organisashonnan i institutonan relevante aki na Kòrsou i ku NINSee (Nederlands Instituut Slavernijverleden en Erfenis) na Amsterdam. Na su debido tempu e Komité lo duna pueblo mas detaye di aktividatnan di ‘Komité Rehabilitá Tula’.

KOEIMAN
Julian Antonio
Mihó konosí komo Jan òf Janchi eks shofùr 195
A laga atras su yunan Minelva i Humphrey Allee, Raymond, Raimuy, Royci Koeiman, Kenneth Bacuna, yu di kriansa Giani Koeiman. Akto di entiero ta djarason 27 di ougùstùs for di El Consolador pa santana Sta. Maria. Bishita 9or. Promé ku entiero tin un respòns 11or na El Consolador.

HU-A-NG
Rudiwald Eugène
Mihó konosí komo Eugène
Mihó konosí komo Chino òf Chikí
A laga atras su kasá Hélène Hu-A-Ng-Cannegieter, yunan Judith i Rodney Martis-Hu-A-Ng, Donald, Ferdinand, Selena, Radishak Hu-A-Ng. Akto di entiero a tuma lugá den seno familiar.

DE LIMA
Ronald
Mihó konosí komo Ronnie
A laga atras su kasá Norma de Lima-Minguel, yunan Ruthline i Richard Zimmerman, Ronald Jr. De Lima i Netty Andrea, Joyceline de Lima, Kenneth i Gabriëla de Lima, Liduska i Hensley Quirindongo, Omar de Lima, Elbert Clotida. Akto di entiero ta djasabra 30 ougùstùs 4or for di El Señorial pa santana Roodeweg. Bishita 12or. Promé ku entiero tin un respòns.

PIETERS
Remigio
Mihó konosí komo Micho
A laga atras su kasá Norma Pietersz-Yzer, yunan Tyrone i Nicole Pietersz, Marily Pietersz, Giovanni i Natali Pietersz, Heinrich Pietersz i Alma Kuster, Shamir i Monique Pieterdsz, D’Angelo i Sabrina Pietersz. Akto di entiero ta djaluna 25 di ougùstùs for di misa Steenrijk pa santana Berg Altena. Bishita 1or. Promé ku entiero tin un s.s. di misa 3.30or.

WILLEMSTAD - Ta bai hasi nuebe aña ku fachada di edifisio di Fatum a wòrdu tratá i di fèrf den kuadro di renobashon. E ora a yega pa hasi un trabou grandi tantu di mantenshon komo di fèrf pafó. Lo ta un kambio total!
Steven Martina, Managing Director FATUM Caribbean ta amplia ku e kolónan ku ta aparesé den e logo di Fatum ta e kolónan ku nos a skohe p’e. E kambio kompleto den e kolónan di e edifisio ta fit bon den e kambionan, ku pa medio di e FATUM Annual Report 2007 a wòrdu komuniká. E annual report tabatin komo tema “Changes”. Den esaki Fatum a amplia riba tópikonan manera entre otro financial performance; operational excellence; market outlook; high performance culture i mas. Tur ku mira i bista riba bienestar di e kliente final, nos akshonistanan i naturalmente nos komunidat en grande.
Awor aki ta ora pa mantenshon i fèrfmentu. E fachadanan maron lo wòrdu tratá pa despues haña kolónan blou i kòrá, kaminda alabes tur posibel entrada di awa dor di sker chikitu lo wòrdu drechá i eliminá.
E trabounan lo wòrdu hasí dor di Rowij Bouw Chemie N.V. bou di mando di señor Jack Antonissen. E kompania aki a hasi proyektonan grandi ku hopi éksito. Komienso di trabounan lo ta pa fin di ougùstùs 2008. Lo kuminsá ku e parti ost di e edifisio huntu ku e parti nort (padilanti), siguí pa e parti west i finalmente e parti zùit di e edifisio. Trabounan lo yega nan kulminashon den e último periodo di aña i naturalmente t’asina ku lo hasi tur esfuerso pa evitá molèster pa tantu trahadónan komo klientenan di Fatum. Naturalmente durante preparashon i ehekushon di trabounan lo tin hopi atenshon pa e seguridat di tantu empleadonan di Rowij BouwChemie komo bishitantenan i klientenan i empleadonan di FATUM.

WILLEMSTAD - E kresementu kontinuo di kliente i benta na Building Depot a pone, ku mester a ampliá e departamentu di muebel. Awor e kliente por hasi su kompra i eskoho mas agradabel ainda. E departamentu a bira un eksibishon realmente grandi i espasioso di muebel. Djabièrnè último tabatin un apertura interno, kaminda trahadónan a haña oportunidat pa atmirá nan espasionan nobo i alabes tur trahadó a haña un presentashon di tur e ekspanshonnan ku ta tumando lugá den Building Depot.
Apertura di ekspanshon aki tabata na enkargo di e propio presidènt propietario sr. Rodney Lucia huntu ku sr. Peter Luiten, CEO General Affairs i tambe sr. Roderick, Lucia CEO Commercial Affairs.
Sr. Peter Luiten tin tur e ampliashon i konstrukshon bou di su guia.
Peter ta kontentu ku tur kos a kana segun plan i di akuerdo ku e budget. Na e okashon aki a inougurá tambe e kantina nobo i e sala destiná pa reunion i trainingnan di personal. Tur esaki siguí pa un bríndis masha ameno pa empleadonan.

WILLEMSTAD - Resientemente un kantidat di kasi 200 miembro identi-fiká ku nòmber i firma a hasi un petishon pa yama un reunion general pa trata funshonamentu di Sitek.
Meta di e reunion pidí aki ta pa fortalesé Sitek i no pa polarisá, ni kibra e organisashon, manera último dianan den prensa a sali publiká.
Marbella Felipa ta lamentá, ku rondó di e petishon aki a krea un ambiente di guera ku no tin nada di aber ku e asuntu. Miembronan ta wòrdu yamá pa instigá nan kontra di esnan ku a manda yama e reunion ariba menshoná. Felipa ta indiká ku ta pa e tipo di kosnan aki un debate interno realmente demokrátiko, kaminda tur miembro ta haña oportunidat pa ekspresá nan preokupashon òf malkontentu, ta nesesario. Esaki lo sirbi Sitek den su totalidat, pa kuestioná kosnan ku ta kana robes ku e meta pa koregí esakinan. I netamente pa logra esaki a manda pidi e reunion ya menshoná.
Ta asina so e sindikato Sitek na un manera fuerte i konvinsente por sali na defensa di nos komo miembro, di nos enseñansa i di nos komunidat. Manera kisas ya bo a tuma nota den medionan di komunikashon (Extra, Último, LA PRENSA, Amigoe), Sitek a publiká konvokashon pa e reunion general ekstraordinario aki, ku ta tuma lugá djaweps 28 di ougùstùs pa 7or di anochi na sede di Sitek i tin komo punto di agènda:
Funshonamentu di Sitek, su direktiva i e presidente pa loke ta trata posishon hurídiko, enseñansa, komunidat, maneho general i maneho sindikal.

WILLEMSTAD - Manera ya a bira un kustumber tur aña, djasabra 30 di ougùstùs próksimo, Fundashon House of Worship lo bolbe tene su popularisimo ‘Feria’. E feria aki ta konosí i rekonosé pa su variedat, kalidat i kantidat di artíkulo na bon preis.
E aña aki tambe lo bai tin un kantidat grandi di komestibel, artíkulo pa kas, mata, kos di hunga pa mucha, paña pa grandi i chikí, produktonan di beyesa, cd, buki, prenda, asesorio pa kabei, hèrmènt, kos di boka dushi i…. hopi, hopi mas. Anto tur kos na preisnan super abou. Ta pa e motibu aki mes tur aña di nobo e feria aki ta atraé masha hopi hende mes.
Pa e chikitinnan tin huki ku diferente wega.
E aña aki tambe lo tin e sukulento bbq. (Pa kumpra karchi yama tel. 7372716).
Durante e feria lo tin diferente presentashon manera e.o di: Proskuneo, Suzy Juliet.
E feria lo tuma lugá entre: 9.00 am – te ku 18.00 riba e lugá di parker amplio di Iglesia House of Worship na Erosweg 52 (kaminda ántes tabata Freitas Jumbo Supermarket).
E suma rekoudá durante di e feria ta pa sostené i organisá diferente proyektonan sosial i spiritual den diferente bario. (Sosten na e trabou pa nos grandinan na banda bou i tambe fundashon speransa pa drogadiktonan, paketenan di kuminda pa famianan den nesesidat, proyektonan di rekapasitashon pa esnan sin trabou, pero tambe aktividatnan pa halsa e standarte tantu spiritual komo sosial na e.o. Ser’i Fortuna i demas barionan.