WILLEMSTAD - Stichting Studiefinanciering (SSC) ta lamentá, ku nan mes no a haña un karta/email ku un studiante a manda pa prensa lokal, reklamando ku nan no a haña nan plaka di luna na tempu, asina direktor Jonathan Jukema a reakshoná serka LA PRENSA awe mainta. “En bes di buska prensa ta bon pa a tuma kontakto ku SSC. Ta bèrdat ku a kai un par di ora lat i en bes di ayera tardi a paga awe mainta.” Pues, e studiantenan lo haña nan plaka awe tardi di Ulanda, pasobra na e momentunan ku LA PRENSA a hiba e entrevista ku sr. Jukema ainda nan tabata traha riba e pago ku no a tuma lugá pa un fayo tékniko. “Pa hasi un kos grandi asina ta eksagerá,” segun Jukema.
Jukema ta bisa, ku ta paga tur luna rònt di 25 di luna, pero serka SSC e ta varia pa kada un grupo pa logra tur luna mesun fecha. E diferensha di tempu tambe ta hunga un ròl. “Ta di lamentá, ku el a bai asina, e mes no por papia di pasado. For di yanüari te awor ta kustumber di paga rondó di mesun fecha. IBG ta stort pa SSC i SSC ta tene su mes na e fecha di 25. No t’asina, ku tin ningun problema finansiero, pasobra esaki a keda solushoná.” Den pasado tabatin problema. Tin biaha e sèn no tabat’ei den pasado, pero awor e problema ta solushoná. E problema aktual ta unu puramente tékniko, pasobra despues di sierto ora e sistema ta lòk. Pa loke ta trata e komunikashon ku SSC, Jukema a bisa ku den temporada drùk tin hopi liña i tiki hende, mester sigui purba. A skohe konsientemente pa no pone un aparato pa kontestá, p’asina tin kontakto direkto. “Ta trata di atendé tur studiante debidamente,” segun Jukema.

TEGUCIGALPA, Honduras, - E presidente di República Bolivariana di Venezuela, Hugo Chávez, ayera tabata na Tegucigalpa, e kapital di Honduras na Sentro Amérika, firmando integrashon di e nashon sentroamerikano aki, na “Alternativa Bolivariana de las Americas” (ALBA).
E presidente hondureño, Manuel Zelaya, a bisa ku sin temor el a firma, di e manera aki kontestando e krítikonan kendenan a ekspresá su temor p’e integrashon di Honduras na ALBA i ku lo provoká e no ratifikashon di e status di permanensia temporal pa 40.000 hondureño na Merka.
E akto tabata un kumbre presidensial na Tegucigalpa na kua a asistí e presidente di Nicaragua Daniel Ortega Saavedra, presidente di Bolivia Evo Morales, vise presidente di Cuba Carlos Lage i e propio presidente venezolano Hugo Chávez Frías.
E presidente di Venezuela a referí na e gòlpi di Estado di e militarnan di kua e tabata opheto i komo reakshon di e pueblo na fabor di su permanensia na poder tabata determinante pa aplastá e plannan di un sektor di militarnan golpista.
El a probechá di e eksperensia venezolano pa hasi un yamada na e militarnan hondureño pa nan aktua konforme e espíritu di Francisco Morazán, e héroe di e integrashon i unidat sentroamerikano i no na fabor di e imperio.
“E oligarkia semper ta buskando militarnan pa nan hasi e ròl ku Pinochet a hasi na Chile”, e mandatario Chávez a enfatisá, kende a primintí Honduras ku su integrashon na ALBA, ta haña suministro di petroli pa 100 aña, pasobra e rikesanan petrolero ademas di ta di pueblo venezolano a keda rekuperá pa e pueblonan di Amérika Latina, Chávez a bisa, kende a haña ovashon di míles di hondureño ku a reuní na plasa di solidaridat ubiká dilanti e palasio presidensial.

DENVER, Merka, - Kuater persona a keda arestá na Denver, sospechoso di a pretendé asesiná e kandidato demókrata pa Kas Blanku, Barack Obama, asina televishon lokal a informá.
Segun kadena CBS34, un di e hòmbernan arestá a atmití na outoridatnan ku nan tabata bai tira Obama mata ku un rifel for di un posishon stratégiko haltu, for di un distansia di 750 meter.
Parse, a plania pa realisá e asesinato djasabra, ora Obama lo presentá na e stadion Invesco di Denver, ku kapasidat pa yena mas o ménos 75.000 persona.
A arestá un otro hòmber djadumingu, ora polisnan a deskubrí dos rifel di alta potensia den un vehíkulo di hür ku e tabata stür, CBS34 a añadí.
Di otro banda, un di e detenidonan ta sospechoso di tin vínkulo ku gruponan rasista.
E supuesto plan ta investigá pa Servisio Sekretu merikano, ku kargo di kordiná e seguridat ku FBI i e forsanan konhunto di kombate kontra terorismo den márgen di Konvenshon Nashonal Demókrata na Denver.

Foto; Polis 2608

Polis ta arestá un persona durante e Konvenshon Nashonal Demókrata na Denver.

BEIJING – Beisbòl a yama e Weganan di Beijing ayó ku Sùit Korea komo kampion i un futuro insigur na horizonte.
Sùit Korea tabata e ekipo mas efektivo ora el a gana tur su weganan, inkluyendo su viktoria di 3-2 riba Cuba den final.
E picher Ryu Hyun tabata e figura di e sur koreanonan ku un par di triunfo. Ademas, el a tira ocho ining i un tèrsio den e partido pa e oro kontra e kubanonan.
KOI a disidí ku beisbòl lo ta afó di e programa di Londres 2012 i lo no ta te òktober di próksimo aña, den un reunion na Dinamarka, ku lo disidí si e ta bini bèk pa 2016.
Cuba (6-2), manera kustumber, a presentá su mihó kartanan na Beijing, ku aktuashonnan di hopi peso pa figuranan manera Alexei Bell i Michel Enriquez, kendenan tabata lider den ofensiva di e tim, i un picheo habridó ku kartanan manera Norge Luis Vera i Adiel Palma ku a lusi efektivo.
Pero e ayó di e relevista Pedro Luis Lazo, kende ta retirá di e Weganan Olímpiko ku dos medaya di oro i dos di plata i dos di plata den su saku, no tabata esun deseá.
“Mi tabata ke oro promé mi retirá, pasobra esakinan ta mi último Weganan Olímpiko, pero lamnetablemente no tabata posibel. Nos tabatin falta di ofensiva den final i nos a keda ku plata”, Lazo a bisa despues di su último aktuashon.
E kubanonan, kampionnan na Barcelona, Atlanta i Atenas i sup kampion na Sydney i Beijing, ta konfiá ku loke a presentá den e torneo aki lo yuda ku KOI lo duna beisbòl un di dos oportunidat.

Mi ta konsiderá mi mes un “kòktel” di pura sepa! Di banda di mi mama defuntu, mi tatara abuelo, esun ku a trese e fam Harms di Amsterdam Ulanda pa e skina di mundu aki, a bin Kòrsou rondó di 1860, bai traha komo “veldwachter” na Bándabou, kasa, bai biba na Boneiru i muri aya. Tata di mi abuelo a nase aya, meskos ku mi abuelo mes. Na Kòrsou el a topa un dama di Skalo, mi wela, e mes, desendiente di hendenan di Rincon, Boneiru. Mi tata defuntu su mama a nase na e isla di Montserat. Na edat yòn el a bai biba i traha na San Pedro de Macoris, Repúblika Dominikana. Aya el a topa un gai di desendensia spañó-cubano i nan a haña un yu, mi tata. Ku “barku di banana” mi tata difunto a yega Kòrsou na 1929. Den Punda a tuma lugá e enkuentro di destino entre e i mi mama. I, at’ami aki.

Di akuerdo ku datonan históriko, dia spañónan a yega aki alrededor di siglo 16, tabatin mas o ménos 800 indjan wahiri ta kana rònt na Kòrsou. Spañónan a hiba hopi di nan Hispañola (awe Haiti i Repúblika Dominikana) bai traha komo katibu. Esnan ku a keda a drenta servisio di e spañónan, a traha yu ku nan i pasa den e proseso di transkulturashon ku inevitablemente tipo di enkuentronan asina ta okashoná. Na 1634 Johan van Walbeeck a konkistá e isla na nòmber di West Indische Compagnie i a kore ku e chipichipi di spañónan ku sea forsa òf kondena, a keda biba riba e isla. Ku nan a bai e poko indjannan ku a sobra.

WILLEMSTAD - Sint Maarten a ekspresá e deseo pa instituí su propio ‘Meldingpunt Ongebruikelijke Transacties’. Minister di Finansa, Ersilia ‘Zus’ de Lannooy a konfirmá esaki pa LA PRENSA. Den e dianan ku a pasa, representante di mayoria di e ministerionan antiano tabata na Sint Maarten. E bishita di trabou, ta den kuadro di e preparashonnan pa e desmantelashon di Antia. E siman aki trahadónan di MOT, Antia, ku tin su ofisina na Kòrsou, ta na turno, pa duna entre otro un presentashon. E meta di e bishita di MOT na Sint Maarten, ta tambe pa informá tokante dje trabou di MOT i kon mester sigui ku e trabounan den futuro.
Minister de Lannooy a splika LA PRENSA, ku Gobièrnu Sentral den e sentido aki, a ofresé pa duna yudansa na tur isla. Pero ku Sint Maarten a indiká ku e ta preferá na lanta su propio servisio di MOT.
No opstante e situashon aki, segun splikashon di e minister di Hustisia, for di ayera, e empleadonan ta hasi nan trabou normal di MOT, ku ta enserá, duna informashon na e sektor finansiero, ku ta bankonan i duna informashon na e kasinonan. Na Sint Maarten, tin 15 kasino i ku eksepshon di un, nan tur ta disponé di e programa ku nan tin mester pa por hasi nan melding.
“Ta hopi importante pa nos pa tur isla ta riba e mesun nivel”. E minister di Finansa a sigui splika, ku tur e islanan, konforme stipulashon di lei, tin e obligashon pa nan kasino, duna e mèldu, ora ku esaki ta nesesario. Esaki ta ora ku nan haña un transakshon ku konforme e stipulashon di lei, lo por ta un transakshon ku no ta korekto.

ARIES: E lokual ku tantu bo ta deseá ta rekerí di hopi pasenshi pa bo logra. Plaka no ta problema. Saka tempu pa resa i relahá. 18,01,04.

TAURO: Ser mas agresivo den amor. Riska di ser felis, bo ta meresé. Permití ku nan ta atmirábu. Ekspresá sin miedu bo berdadero sentimentu. 35,09,07.

GEMINIS: Bo mester ta hopi kouteloso awe pa bo no kometé erornan. No pone tantu preshon, ya ku bo no ta salú. Disfrutá di e kalor di bo kas huntu ku bo famia. 11,03,44.

KANSER: Bo ta konsentrá pa haña kontesta riba e pakiko di bo akshonnan. Bo ta hasi algu ku ainda bo no a disidí pa hasi. Definí bo metanan. 21,42,19.

LEO: Pone na òrdu bo ideanan i aklará bo ophetivonan den bo trabou komo den bo bida sentimental, konfliktonan ku bo famia i bo ta haña oportunidatnan nobo di progresá. 11,50.

VIRGO: Pone spesial atenshon na bo finansa i probechá e dia pa poné tur kos na òrdu di bo presupuesto i mira di ki manera bo por spar. 36,44,26.

LIBRA: Dudanan relashoná ku bo karera ta oumentá. Bo solushon ta den kibra ku rutina. Tin algu e dianan aki ku ta yamando bo atenshon. Ojo! 20,50,30.

SKORPION: Dominá e kansansio promé ku e dominábu. Un seguridat ku bo ta buska ta yegando. Den bo tin tur e poder di mundu pa triunfá. 22,12,06.

SAGITARIO: Bo ta pasando den momentunan difísil, pero nada no por tumbá bu. Bo ta poseé un fortalesa ku hopi ta envidiábu. 37,14,09.

WILLEMSTAD - Kiko realmente nos ke ku nos astiero, Curaçaose Dokmaatschappij? Esei tabata e pregunta ku a kore manera un liña kòrá den e intervenshon di partidonan di oposishon den e reunion públiko di Konseho Insular ayera tardi.
Riba inisiativa di oposishon mes, Konseho Insular a reuní pa diskutí e último desaroyonan na e astiero. E punto ku a dominá último dianan aki tabata nombramentu di un direktor pa e kompania.
E asuntu di nombramentu di un direktor nobo por poko a kondusí na un krísis den gobernashon insular, pero finalmente partidonan a bai di akuerdo pa nombra un direktor interino, tal manera tabata deseo di diputado enkargá ku CDM Eugène Rhuggenaath.
Ayera por a nota ku miembronan di oposishon tabata bastante krítiko riba último desaroyonan na e astiero.
Gregory Damoen di frakshon di Forsa Kòrsou a bisa, ku desaroyonan na e kompania tin su frakshon bastante preokupá. For di kosnan simpel, te na problemanan di embergadura mas grandi, el a bisa.
El a mustra por ehèmpel, ku e ta na altura di hende ku a solisitá na e kompania komo hòmber di fishi, pero ni sikiera a haña kontesta di e kompania riba su solisitut.
Pero Damoen tin problema tambe ku e maneho en general. El a kondená e hecho ku CDM ta konfrontando awor aki un kleim mionario komo konsekuensia di e hecho ku CDM a pèrdè e kaso ku tres trahadó kubano a entamá kontra e astiero. Awor nan ta konsiderando pa entregá un kaso pa daño perhuisio. Ta un montante grandi. Ken ta bai para responsabel pa esaki? El a puntra.

WILLEMSTAD - Studiantenan ku a inskribí na Universidat Nashonal di Antia pa haña formashon pa bira maestro di skol, no tin nodi di paga e 3 mil heldu ku tabata kologá manera un menasa riba nan kabes. Partidonan, esta IPSO, teritorio insular di Kòrsou, Akademia Pedagógiko di Kòrsou i Universidat Nashonal di Antia a kumbiní ku pa e promé aña aki – awor ku formashon pa maestro di skol ta kai bou di UNA – partidonan lo kubri e montante aki.
Tur loke e studiante mester paga ta su suma di inskripshon i su plaka di kolegio, asina abogado mr. Saran Inderson a konfirmá.
Ayera henter mainta partidonan tabata na mesa ku otro riba e asuntu aki.
E asuntu aki a kuminsá algun siman pasá, komo konsekuensia di e desishon pa integrá APK den UNA.
Studiantenan di Akademia Pedagógiko Kòrsou a disidí ku nan ta bai korte pa eksigí un solushon pa e problema ku nan a haña nan mes aden. Manera ta konosí, e studiantenan ta haña nan dilanti e situashon ku den un tiru – literalmente di un dia pa otro – nan gastunan di estudio a bira konsiderablemente mas karu komo konsekuensha di e integrashon ya menshoná. Na lugá di paga 300 florin “collegegeld” awor mester bai paga 10 biaha mas tantu, ku ta 3 mil heldu.
E pregunta básiko ku a surgi naturalmente tabata, unda ta bai saka 3 mil heldu, den porta di un aña akadémiko nobo.
Esei mes tabatin emoshonnan hopi haltu durante e promé dianan di e problema aki. Minister Omayra Leeflang a sali bisa ku Gobièrnu Sentral ta garantisá e studiantenan un montante di 7900 florin, pero e studiantenan mesora a mustra riba e hecho, ku si nan a keda studiante na APK, ku ta responsabilidat di teritorio insular di Kòrsou, tambe nan lo a haña un montante similar den forma di un beka. Esei mes a pone ku nan a stipulá un ultimatum pa gobièrnu di Kòrsou i ora e ultimatum a vense sin ku nan a haña reakshon, a disidí ku ta bai korte.

WILLEMSTAD - Despues ku finalisá e investigashon na Curoil, lo ekspandé e investigashon na otro kompania i fundashonnan di gobièrnu tambe. Esei ta esensia di un moshon aseptá ayera pa Konseho Insular durante kontinuashon di tratamentu di desaroyonan na e kompania, un reunion ku a kuminsá for di siman pasá.
Pasobra si tin mas kompania di gobièrnu kaminda tin kosnan straño, entre otro hasimentu di negoshi den negoshi ta tumando lugá, nos tur sa, asina lider di frakshon di Pueblo Soberano den Konseho Insular Helmin Wiels a deklará ayera den su intervenshon.
Riba petishon di partidonan di oposishon, Konseho Insular a kuminsá diskutí siman pasá e desaroyonan ku a tuma lugá na Curoil ku e hasimentu di “negoshi den negoshi” ku diesel.
E situashon ta ku awor aki direktor di e kompania Gensley Capella ta ku fakansi (obligatorio) te dia 15 di sèptèmber awor, miéntras ku tin denunsia hasí kontra esnan enbolbí.
Turesten, e investigashon riba loke realmente a sosodé, ta kanando.
Despues ku diputado Humphrey Davelaar a kontestá preguntanan di e di dos buèlta, tres moshon a subi mesa.
E promé moshon, presentá pa partidonan di oposishon ta boga pa ekstendé e investigashon ku ta kanando awor aki na Curoil, na e miembronan di Hunta di Komisario tambe. E problema ta e hecho ku den Hunta di Komisario tin algun miembro ku ta famia di diputadonan den e aktual Bestuurscollege. Tin Hermando Davelaar, kende ta ruman hòmber di diputado Humphrey Davelaar i tin kasá di diputado Zita Jesus-Leito. Manera LA PRENSA a informá ekstensamente kaba algun siman pasá, diputado Davelaar no ta weta nada malu den esaki. Ta nan trabou nan mester hasi bon, tabata su argumento na e okashon ei.

ROTTERDAM/ WILLEMSTAD - E supuesto outor di un kaso di tiramentu fatal den un cafe na Franselaan na Rotterdam, un hòmber ku nan ta sospechá di ta esun ku a tira un hòmber antiano mata, ketu bai ta fugitivo. Esaki a sali na kla durante e promé tratamentu di e kaso ayera na Rotterdam.
Ministerio Públiko no ke duna masha detaye di e sospechoso, ni tampoko por bisa ku e sospechoso ta na Ulanda ainda òf a hui pa eksterior.
E sospechoso a logra for di despues di e tiroteo, di keda for di man di hustisia. Fiskal a bisa sinembargo, ku e ta fèrwaktu ku pronto lo pone man riba e sospechoso.
Un otro sospechoso, ku tambe ta enbolbí den e kaso di tiramentu aki, por a bai kas ayera, pendiente kontinuashon di e kaso en kuestion.
Ministerio Públiko no ta tene e mes responsabel pa morto di e antiano di 30 aña di edat.
E di dos hòmber aki di 29 aña di edat sinembargo mester aparesé dia 23 di sèptèmber awor den korte akusá di violensia públiko.
Promé ku e tiramentu den e cafe, tabatin un bringamentu ku a tuma lugá. Den e bringamentu aki, lo a hasi uso di bòter i krùk di bar pa dal otro kuné. E di dos hòmber a atmití, ku e tabata den e lugá durante e bringamentu i ku e tambe a parti sla, pero pa defensa propio.
Un di tres sospechoso, ku anteriormente tambe a rekobrá su libertat, mester aparesé tambe den korte dia 23 di sèptèmber awor pa e mesun akusashon, esta bringamentu den un lugá públiko.

WILLEMSTAD - Asosiashon di Mayor i direktiva di PSC ke invitá tur mayor pa asistí na un Ban Topa ku lo tuma lugá djárason 27 di ougùstùs 7.00-9.30 or di anochi na Peter Stuyvesant College.
Despues di informashon general riba plenchi di skol mayornan lo bai den lokal pa haña informashon mas spesífiko serka e mèntòr di klas. Ta pidi tur mayor pa asistí na e anochi akí pa asina por haña informashon balioso pa un guia optimal di e alumno.
Por sigui e sifranan di e alumno henter aña riba www.psc.an cijfers
PSC, kaminda e alumno ta sentral!

WILLEMSTAD- Den kuadro pa sigui yuda konsientisá komunidat di Kòrsou di e importansia di kuido di nos medio ambiente, Banko Maduro & Curiel’s Bank a start den 2008 ku e kampaña pa aportá di bèrdè mes na un mihó medio ambiente.
Djamars 22 di aprel ku tabata dia internashonal di Mama Tera (Earthday), tambe MCB a duna un aporte di bèrdè mes. Riba e dia aki a organisá un proyekto pa e 10 skolnan ku ta spar fielmente ku e Amiguitu Spardó, Lito. MCB a regalá i entregá den e siman di 22 pa 25 di aprel 2008 na tur e muchanan di skolnan ariba menshoná un saku di simia di kònkòmber òf promentòn.
Tambe kada klas a haña un saku di simia pa planta den klas kaminda e muchanan ta kuida e mata ku guia di e dosente. Huntu ku esaki banko a pone premio disponibel p’e skolnan ku skibi un relato riba un A-4 ku ta konsistí di máksimo 500 palabra ku ta splika i konvensé Lito i Bo Banko Amigu, kon nan skol tambe ke i ta bai aportá di bèrdè mes pa un mihó medio ambiente.
Despues di un periodo, huntu ku e relato, e skol mester a mustra kon e kuido di e simianan den e klasnan a bai i e resultado ku e skol a eksperensiá ku e simia su kresementu.
E proyekto aki a resultá di ta un éksito kompleto. E amiguitunan di Lito a traha ku hopi entusiasmo riba nan proyekto “Bèrdè”. Tur skol ku a kompetí tabata un ganadó, pero e tresnan ku mas a sobresalí tabata: Kolegio San Hosé, Kolegio Nechi Pieters i Kolegio Chaya Willems.

WILLEMSTAD - Fundashon pa nos muchanan, e fundashon ku pa e último dos añanan tabatin na su enkargo organisashon di yegada di Sanikolas, lo tin djadumingu awor 31 di ougùstùs un tremendo Foodfestival den Kurá di Museo di Kòrsou. Meta di e foodfestival aki kombiná ku un dia di famia ta pa rekoudá fondo pa yuda algun hóben pa asina den nan tempu liber nan por praktiká un deporte òf nan por siña toka un instrumènt. Mirando ku hopi biaha nos muchanan ménos pudiente ta haña ayudo pa kosnan básiko manera kuminda i paña, nos fundashon ta haña ku nos hóbennan mester di yudansa riba e parti sosial tambe pa nan desaroyo por ta kompleto.
Pespi, Auto City, Tele Curaçao, Radio Krioyo, Radio Mas, Selikor, Prakash, Bala i demas medionan di komunikashon tur a duna un man pa hasi e foodfestival aki grandi i eksitoso.
E foodfestival aki lo tin un kids corner kampion kaminda muchanan por keda pasa ratunan ameno miéntras ku e mayornan ta disfrutá di tur e dushi kumindanan i otro kosnan pa kumpra ku tin durante e dia aki. Den e kidscorner lo tin bouncers, pintamentu di kara, weganan pa gana premio, lèsnan di aerobics, grabbelton i hopi mas.
Durante henter dia lo tin tambe entretenimientu di Típiko Pasa Bon ku tambe kier a duna un aporte na nos muchanan, lo tin e hóbennan di Curaçao Talents ku a prepará un show masha bunita, lo tin un show di aerobics spesialmente pa mucha,lo tin presentashon di e grupo di baile Cyberclub, Mamy Luv lo deleitá tur presente ku su músika i pa sera e atardi Karabela lo trese su dushi músika rítmiko.

VAN PUTTEN
Mr. Limon A. Kent
Mihó konosí komo Kent dòkter di medisina Natural
A laga atras su kasá Rachel van Putten-Marsdin, yunan Dennis, Leonisia, Giovanni, David van Putten, Natasja i Rensley Lauffer-van Putten, Elsa Ralina van Putten, Valencia Libretto-Panthoplet, Andrés Schmidt i Lourdes Brown tur ku nan famia. Akto di entiero ta djabièrnè 29 ougùstùs 12or for di Seventh Day Adventist Church na Mundo Nobo.

SUART
Geraldine Gregoria
Mihó konosí komo Shirley
A laga atras su mama Otilia Suart i Victor Michel, yu Sue-Mary Foendoe, tata di kriansa Victor Hernandez, rumannan Nelis Suart i Aurora, Oswin Suart i Jacqueline Nicolaas, Mirugia i Emilio Monte, Sherwin Suart, Ettiene i Aylin Gijsbertha, Mayra Suart, Richel Betorina, ruman di kriansa Adelfa Florentina i famia, suegra(o) Emilda Foendoe i Rene Arduin. Akto di entiero ta djaweps 28 ougùstùs 5or for di misa gr. Kwartier pa santana Roodeweg. Bishita 12or. Promé ku entiero tin un s.s. di misa 4or. Trahe alegre.

VOLQUEZ
Maria Domingo (repentino 82 aña)
A laga atras su yunan Hector Volquez, Luisa Gumbs-Perez, Pilar Perez i Karel Liket, Rosmeris Perez i Daniel Zefrin, Julio Perez Volquez, Rudi Perez Volquez. Akto di entiero a tuma lugá djarason 20 ougùstùs na Santo Domingo.

KOEIMAN
Julian Antonio
Mihó konosí komo Jan òf Janchi eks shofùr 195
A laga atras su yunan Minelva i Humphrey Allee, Raymond, Raimuy, Royci Koeiman, Kenneth Bacuna, yu di kriansa Giani Koeiman. Akto di entiero ta djarason 27 di ougùstùs for di El Consolador pa santana Sta. Maria. Bishita 9or. Promé ku entiero tin un respòns 11or na El Consolador.

W’STAD/DEN HAAG - Ounke situashon finansiero i ekonómiko di Ulanda ta mustra den direkshon di un “slow down”, tòg desempleo bou di antianonan ku edat pa traha na e pais aki ta sigui abou, un di esnan mas abou entre estranheronan bibá na Ulanda. Kompará ku aña pasá na mesun momentu, e índise di desempleo bou di antianonan a keda igual, esta 8%. Esaki por dedusí for di sifranan ofisial di CBS, e ofisina sentral di statistik di Ulanda.
Antianonan ta pertenesé na e gruponan ètniko ku tin ménos hende sin trabou na Ulanda. Mas o ménos 10% di e poblashon marokano ku edat pa traha ta sin trabou na e momentu aki, miéntras ku e porsentahe di desempleo bou di turkonan ta 9%. Surinameñonan ta e grupo ètniko ku konosé ménos desempleo. E porsentahe bou di e grupo ètniko aki ta 6%.
Ekspertonan ta di opinion sinembargo ku e porsentahe di desempleo bou di turko i marokanonan ta muchu mas grandi ku loke sifranan di CBS ta indiká. Prinsipalmente bou di damanan marokano i turko ta eksistí un desempleo enorme, komokiera ku kulturalmente hende hòmber di e gruponan ètniko aki ta deskurashá nan partner, ruman òf mama di buska un trabou fiho. Komo ku den entrevistanan ku hasi ku e damanan aki, nan ta duna di konosé, ku nan no ta dispuesto pa traha, no ta inmakulá nan den e poblashon ku edat pa traha di e grupo ètniko na kua nan ta pertenesé.
Un detaye interesante ta tambe, ku antianonan ta grupo ètniko ku tin mas tantu hende ta traha trabou sientífiko, kompará ku kualke otro grupo di estranheronan na Ulanda. Miéntras ku 16% di e poblashon ulandes-oropeo ku edat pa traha ta hasi trabou sientífiko, bou di antianonan esaki ta 14%, apénas 2% ménos ku ulandesnan-oropeo i 4% mas ku surinameñonan.

WILLEMSTAD/DEN HAAG - Segun sifranan ofisial i resien di Ofisina Sentral di Estadístika di Ulanda (CBS) tin mas o ménos 60.000 negoshi na Ulanda ku ta den man di sea turko, marokano, surinameño, antiano o ganes/nigeriano. Di e kantidat aki apénas 1500 ta registrá komo ‘Antilliaans’. Banda di esaki, mayoria antiano bibá na Ulanda no ta na altura di eksistensia di organisashonnan sosial, karikativo o plataforma di yudansa riba tereno sosial o hasimentu di negoshi. Esaki apesar di e echo ku tin sentenar di organisashon i fondo disponibel pa esnan ku sea ke kuminsá un negoshi òf a start ku unu i mester di yudansa.
Un chekeo mas profundo ta indiká, ku den e 1500 negoshinan registrá komo antiano na Ulanda, tin hopi negoshi ku ta registrá komo tal, pero ku en realidat ta den man di sea surinameño o chines. Por ehèmpel, tin hopi restorant ku ta bende “Antilliaans” i ta registrá komo tal tambe na Kámara di Komersio, siendo ku tur loke “Antilliaans” ku nan tin ta saté ku batata, nasigori (stail di Kòrsou) o ‘cutlet’-nan ku batata manera nos a kustumbrá kuné na Kòrsou. Pero e doño di e establesimentu ta chines (o surnameo-chines), pues no antiano. Pa kolmo, un di poko restorantnan “chines-kurasoleño” na Ulanda, e famoso “Antilliaans Chinees Eethuisje” na Amsterdam, a sera su portanan despues di mas ku 30 aña.
Hasi kabei
Banda di restorant, tin hopi salon pa hasi kabei registrá komo antiano na di distinto kámaranan di komersio. Aki tambe m’a topa ku diferente establesimentu registrá komo antiano, pero ku en realidat ta den man di surinameño. Esaki, pasobra mayoria di e doñonan di salon ta merkadeá nan establesimentu pa antianonan, indikando ku nan salon ta spesialisá pa hasi ‘kabei antiano’. Pero tòg ta remarkabel, ku mayoria empresario antiano na Ulanda ta aktivo riba tereno di hasimentu di kabei i mayoria di nan, ta hende muhé. Di e salonnan den man di antianonan, 99% di e propietarionan ta hende muhé. Di e negoshinan di kua segun mi por a determiná, ta berdaderamente den man di antianonan, kasi 80% di e propietarionan ta hende muhé. Apénas 2 di kada 10 negoshante antiano aki na Ulanda ta hende hòmber! Segun sifranan ta mustra, ku 60% di negoshinan antiano na Ulanda ta salon di beyesa. Mas o ménos 20% ta restorant, miéntras ku sobrá 20% ta negoshinan manera hürmentu di vidio, benta di disko, garashi di outo, agensia di biahe, kompra i benta, cafe/sentro nokturno i (den Amsterdam) masashi korporal.

WILLEMSTAD – Miéntras ku aki na Kòrsou vários partido polítiko, espesialmente oposishon a bin ta hasi preguntanan ki dia ta baha preis di gasolin, na St. Maarten entrante awe preis di gasolin ta baha ku 20 sèn.
Manera ta konosí, último dianan e preis di krudo a bin ta kai riba merkado internashonal i esaki a lanta e pregunta mesora si no mester baha e preis di gasolin. Entretantu ayera preis di krudo a subi na 115 dollar pa barí, debí na presensia di e tormenta tropikal Gustav den Karibe.
Na St. Maarten si despues di tende pa simannan largu ku preis di petroli ta kai, awe outomobilistanan riba e isla aki ta bai sinti esaki tambe den nan saku. Gobièrnu Insular di e isla aki a aprobá un redukshon di 20 sèn ku ta drenta den efekto awe.
E preis di gasolin a St. Maarten ta baha na 2.40 kompará ku 2.60 ku e tabata. Diesel awor ta kosta 2.20, un redukshon di 40 sèn. Tur esaki a keda anunsiá pa diputado Sarah Wescot-Williams.
E preis di tantu gasolin komo diesel a keda e mesun preis pa kasi dos luna na St. Maarten. E redukshon ku ta drenta na vigor awe ta konta tambe pa gas, kual ta un alivio pa kasnan i restorantnan. Un bòter di gas chikitu ta bira 39.60 for di 50.40 i bòter grandi ta baha ku kasi 20 florin pa Fl. 130.
Gobièrnu di St. Maarten ketu bai tin speransa ku e petishon ku nan a hasi na minister di Finansa, Ersilia de Lannooy pa redusí e impuesto riba gasolin ku 15 sèn pa liter lo keda aprobá pronto. Wescot-Williams ta kere, ku tur e redukshonnan aki lo yuda pa baha e kosto di bida. El a añadí mesora, ku mester kompañá e redukshon di preisnan aki ku akshonnan mas konsiente di tantu e sektor komersial i pueblo pa tene esakinan abou. “E impakto di ekonomia mundial lo forsa kambionan fundamental den persepshon, komportashon i eskohonan disponibel.

Skina di Sorti, awe djamars 26 di ougùstùs di 2008, ta kuminsá ku deseá un i tur un bon dia. Den mundu di futbòl bo ta topa e fenómeno di hungadónan ku ta hunga kabes abou i konsekuentemente ta pèrdè e posishonamentu di demas hungadó riba e tereno di wega for di bista. Komo tal nan por hasi un hugada fenomenal den e bista limitá ku nan ta krea pa nan mes pero desastroso den kuadro di desaroyo di e wega. Den kestion di maneho i spesialmente den maneho di organisashonnan polítiko, bo ta topa e mesun sorto di fenómeno aki.
****
Den maneho di organisashonnan polítiko e bista ekstremadamente limitá ku ta karakterisá e dirigentenan (indikashon di esaki ta e rivalidat innesesario i e peso eksagerá di kestionnan gubernamental den desishonnan interno) ta pone ku e mayoria di organisashon polítiko ta drenta e proseso elektoral den posishon di desbentaha. Nan tin masha trabou di korekshon di hasi i ta sumamente vulnerabel pa un eventual mobilisashon nobo.
****
Un partido tin di wak desishonnan gubernamental komo akshon ku posibel impakto riba e posishon elektoral di partido. E alternativanan di desishon gubernamental ta bira un asuntu di partido na momentu ku e tin implikashon elektoral. Un partido meskos ku kualke organisashon tin di wak e aspekto di kontinuidat i esei ta mará na su atraktividat ante elektorado i fasilitadornan.
****
Atraktividat di un partido polítiko ta den su profiliamentu i eróneamente hopi ta kere ku esei ta dependé di e intensidat i dimenshon di su partisipashon den aspektonan di rivalidat polítiko. En realidat e profiliamentu tin di ta esun di krea i mantené bo mes komo un alternativa pa akomodá e inkomodidatnan di gruponan den komunidat. Ku otro palabra bo mester tin un vishon di gobernashon (no brua esaki ku posishon riba “issue”) i e postura di organisashon ku por entrega lokual e ta pretendé.

DENVER, Colorado, - Ayera ta’tin hopi emoshon na apertura di Konvenshon Nashonal Demókrata na Denver ku esfuerso pa superá e disputanan ku algun siguidó di senador Hillary Clinton. Sperá komo un orador estrea ayera nochi, Michelle Obama, esposa di kandidato presidensial Barack Obama, a sigurá dilanti mas ku 4.200 delegado ku su esposo lo bai ta un presidente ekstraordinario. Na klousura di su diskurso Michelle i e dos yunan Malia di 10 aña, man drechi, i Sasha di 7 aña, via un videokonferensia a keda komuniká ku Barack Obama, kende tabata den kampaña na Kansas. “Mi stima bo, papi!” e yu mas chikitu a bisa. Riba pòtrèt Michelle ku su dos yunan ta para wak Obama riba monitor despues di su diskurso. Pa mas detaye lesa página 17. (AP Photo)