WILLEMSTAD - Promé minister di Saint Kitts i Nevis, Denzil Douglas a manda un palabra di atvertensia durante e di 17 Konferensha Internashonal di Aids na Komunidat di Karibe (CARICOM) ku tur kos no ta kana den esfuersonan pa logra metanan pa ku akseso universal. Apesar ku tin basta historianan di éksito den e lucha kontra HIV/AIDS den Karibe, ainda tin hopi desafio.
Karibe ta keda riba number 2 despues di Sahara-Afrika, ku tin 67% di tur hende ku ta biba ku HIV mundialmente.
20 Mil persona a keda infektá den Karibe aña pasá ku e virus i algun 14 mil a muri di aids aña pasá. Tabatin hopi éksito ku programanan individual den paisnan den Karibe den área manera kuido i tratamentu i prevenshon tokante transmishon di HIV di mama pa yu. Kòrsou mes ta un trendsetter pa loke ta trata programanan di prevenshon struktural na enkargo di ASNA. Mas aleu e kuido i tratamentu na Kòrsou ta hopi avansá. Sinembargo komo region no ta sigur ku lo logra metanan pa akseso universal si kontinuá riba e ruta aktual, asina Douglas a deklará. E organisashon Karibense PANCAP ta kuminsá un aktividat mayor den kolaborashon ku UNAIDS i ko-sponsernan. Lo mester di informashon aksesibel pa sostené paisnan usando investigashon basá riba evidensia pa implementá akshon den konteksto nashonal, kaminda derechonan humano ta respetá i promové, stigma i diskriminashon ta dramátikamente redusí i populashonnan ku tin rísiko haltu di kontraé HIV tin prioridat pa programanan di prevenshon.

 

WILLEMSTAD - Curaçao Bodybuilding & Fitness Association, ta pidi tur amantenan di Bodybuilding i Fitness, pa reservá djasabra 30 di ougùstùs próksimo.
Esaki ta e gran dia pa presensiá un kompetensia i un shou espektakular.
E partisipantenan di diferente gymnan ta preparando den full swing, pa djasabra 30 ougùstùs próksimo nan por duna esnan presente un bon kompetensia riba nivel. Tambe lo tin un bon show di baile, presentá pa The Dancing Treasures i un Guestposer di sorpresa.
Gymnan ku ta partisipá ta lo siguiente: Bob Esprit Gym, Geoffrey,s Gym,
Body’s Evolushon, B-Fit Fitness Center, Sint Jozef Fitness Center, Diamond Gym i Fisical Gym.
Aparte di e kompetensia i show, Curaçao Bodybuilding & Fitness Association ta agregá e kategoria di veteranonan riba 40 aña di edat.
Tur e ganadónan di kada kategoria lo bai representá Kòrsou den Kampionato Antiano ku lo tuma lugá na hermana isla Boneiru dia 13 di sèptèmber próksimo.
C.B.B.F.A. ta invitá henter pueblo di Kòrsou, muy espesial e diferente gymnan ku tin partisipante pa bin apoyá nan atletanan.
E asosiashon C.B.B.F.A. ta hasiendo nan máksimo esfuerso pa bin presensiá un bon kompetensha i alabes un show riba nivel.
No por pèrdè e kompetensia i show aki.
Alabes C.B.B.F.A. ta rekordá tur e partisipantenan i esnan interesá pa e kompetensia ariba menshoná ku lo tin un reunion djasabra 23 di ougùstùs den sala di reunion di C.S.F. na Otrabanda pa 7‘or di anochi. Un boka bisa otro.

WILLEMSTAD - E problemanan ku tin awor aki na Universidat Nashonal di Antia, no tin nada di haber ku Curises. Asina Gilbert Cijntje, dosente di UNA a splika ayera tardi. E studiantenan di UNA ayera tardi a reuní i a menasá di drenta un akshon, pa protestá kontra dje problemanan ku tin na e Universidat. Entre otro e hecho ku ainda no tin un roster, ta e motibu di hopi preokupashon i malkontentu di e studiantenan. Den su kalidat di dosente di UNA, Gilbert Cijntje a rechasá e deklarashon di rèktòr magnífiko, Jeanne de Bruijn, ku e problemanan ta relashoná ku e eliminashon di koperashon entre Curises i UNA. Segun Cijntje, e base dje problemanan ku a eskalá ayera, ta e hecho ku Universidat ta hibando un maneho iresponsabel i deskabeyá pa ku UNA i tambe e fakultat sosial ekonómiko, ku ta konsistí di 1200 studiante.
Komo ehèmpel di e mal maneho, Cijntje a menshoná ku e fakultat ta sinti e doló di e hecho ku por ehèmpel no tin lokal. “UNA ta kuminsá traha un nieuwbouw nobo, miéntras ku ta splika gerensia ku mester bin ku lokal. Kiko gerensia ta hasi?...e ta kuminsá traha un biblioteka nobo. I ta esaki, SEF kier men ku maneho deskabeyá i mal maneho”.
Cijntje a sigui splika, ku dia 4 di yüni, e dekano ta informá e rèktòr magnífiko ku e no por sigui komo dekano na e forma aki. E ta dispuesto pa sigui, solamente si kambia e maneho ku ta perhudiká studiantenan di Universidat. Dia 10 di yüni, segun Cijntje, e rèktòr ta informá e dekano ku e ta bai di akuerdo i ku e ta respetá su desishon. For di 10 di yüni, segun Gilbert Cijntje, te ku 22 di ougùstùs, e rèktòr no por a buska ni haña un dekano. Cijntje: “Si un hende no por haña un dekano, e no por bai ku fakansi i bin bèk i duna otro falta. Señor van Bladel a bisa tempran ku e no por sigui i tur hende a bisa e señora pa bai papia, pasobra nan ta konvensí ku van Bladel, ta e mihó kandidato. Tin mas hende, inkluso mi persona ku ta dispuesto pa bira dekano, pero no bou di e sirkunstansianan aki. Ta esei ta e base di e problemanan na Universidat Nashonal di Antia. I e problemanan aki no tin nada di haber ku Curises,” segun Gilbert Cijntje.

WILLEMSTAD - Rollis Kleinmoedig ta nombrá ilegalmente komo dekano pa e fakultat sosial ekonómiko di UNA. Asina dosente di UNA, Gilbert Cijntje a splika. Segun Cijntje lei ta preskribí ku ora ku bo ta nombra un dekano, esei mester bai segun sierto prosedura. “I nan a violá e prosedura aki”. Segun Cijntje, a tuma ochenta dia pa nombra un dekano nobo i e hende ku a wòrdu nombrá, a tuma lugá na un manera ilegal. Esei ta nifiká, segun Gilbert Cijntje, ku kompará ku un siman pasá, e ta pará muchu mas leu for di un solushon pa e problemanan na UNA.
Cijntje a bisa di por komprondé ta dikon Rollis Kleinmoedig ayera no por a kontestá e studiantenan satisfaktoriamente, enkuanto e roster ku ainda no ta kla. “Ku tur rèspèt pa señor Kleinmoedig, e no por bai komprondé e fakultat den e próksimo un òf dos añanan”. Ta trata di un tarea hopi kompliká. Ta hendenan ku sa ta kiko nan ta papia i ku eksperensia, lo por kontribuí pa formulá un programa. “Si e input no bin bou di un guia kapasitá, e proseso lo bira aun mas largu.” Segun Cijntje e studiantenan tabata asina skèrpi den nan kontesta, ku a pone ku señor Kleinmoedig no por a duna kontesta mas.
Akshon
Un grupo di studiante a keda di hasi un súplika na minister di Enseñansa, Omayra Leeflang, pa pone su mes na altura di e situashon na UNA. Tambe Cijntje a komprondé ku miembronan di Staten a buska kontakto ku e studiantenan, pa haña sa ta kiko ta pasando, pa wak kon parlamento por intervení.

WILLEMSTAD – E playa eksótiko akí, situá na e ‘lenga’ na entrada di Fuik, ta kaminda e insidente entre Willy Maal, propietario di Ostpùnt i Pedro Jimenez Yusti, Gerente di Refineria Isla, a tuma lugá djasabra último. E playa aki ta aksesibel únikamente ku boto òf ku jeep via di tereno di Maal. E ta un pida playa chikitu ku santu blanku. Miéntrastantu Maal ta den detenshon ainda pendiente mas investigashon. Manera anteriormente LA PRENSA a publiká, Jimenez Yusti tabata detené durante di seis ora djamars, pero a lag’é bai pendiente mas investigashon. Foto Yves Cooper

...Miéntras tantu, e di 8 depreshon tropikal a forma den serkania di nos islanan...

LOUISIANA / CUBA / JAMAICA, - E gobernador di Louisiana, Bobby Jindal, a deklará estado di emergensia pasobra a pronostiká ku e tormenta tropikal Gustav por bira un orkan grandi, den tiki dia, ora e dirigí den direkshon di kosta merikano di Golfo di Mexico.
Miéntras tantu, Sentro Nashonal di Orkan di Merka (NHC, abreviashon na ingles) den su boletin a informá ku a forma, di otro banda, e di 8 depreshon tropikal di e temporada di orkan i a pronostiká ku e lo pasa hopi serka di nos islanan ku bientunan di 56 kilometer pa ora.
Biniendo bèk riba Gustav, a pronostiká ku e lo pasa entre Cuba i Jamaica awe, i ku e lo por transformá bira un orkan poderoso di kategoria 3, ku bientunan di 180 kilometer pa ora, ora e alkansá awanan lou di e Golfo.
E kosta di Louisiana i e siudat di New Orleans ta un di e posibel rumbonan ku Gustav lo tuma.
Segun e boletin mas resiente, Gustav tabata ubiká 130 kilometer ost-nortost di Kingston, Jamaica, i 165 kilometer sùit-sùitwèst di Guantánamo, Cuba.
E meteorólogonan a indiká ku Gustav por produsí asta 50 centimeter di áwaseru na algun área.
Gustav ta trese mal rekuerdonan
E estado di Louisiana i e siudat di New Orleans ya a anunsiá plannan di evakuashon p’e posibilidat ku e tormenta tropikal Gustav por yega e teritorio merikano transformá den un poderoso orkan.

ARIES: Den amor bo ta mas sensual. Ta tempu di bai tras di konkista di e persona interesá. Esei lo ta un di e dianan den kua e trabou ta mesklá ku plaser. 04,20,19.

TAURO: No spera e último momentu pa alegrá bo bida. Rekargá bo bateria físiko i emoshonal. Pa algun tempu bo tabata posponé pa evitá gastunan sin nesesidat. 01,34,27.

GEMINIS: Establesé prioridatnan i dividí bo tempu bon. Ku hopi kariño i pasenshi bo ta logra ku bo famia ta komprendébu i koperá ku bo. 02,06,03.

KANSER: Relahá bo mes pasobra awe ta sperábu un dia hopi plasentero. Analisá bon loke bo ke di bida. Ta oportunidat pa gana mas plaka. 05,21,45.

LEO: Ehersé kòntròl riba bo emoshonnan pa asina bo por komprondé bo pensamentunan. Bo ta suseptibel di lo normal, loke por lagabu sinti molestiá ku sierto persona.

VIRGO: No desesperá pa lokualnan ku pa e momentu aki bo no por kambia. Tene pasenshi, pero persistí pa bo logra bo deseonan. 34,25,07.

LIBRA: Uni forsa ku personanan responsabel i di konfiansa ku a laga nan frutanan. Ta momentu di kosechá i kompartí ku esnan ku a hasi posibel bo éksito. 37,11.

SKORPION: No sigui gasta den luho. Mantené bo kuentanan na òrdu, bo presupuesto i ekonomisá. Traha un plan pa ekonomisá. 42,33,08.

SAGITARIO: Ta momentu di kaba e lokualnan ku bo a laga pendiente. Pone un toke di alegria ora bo kaba ku e proyektonan ei. 02,50,16.

WILLEMSTAD - E oumento di sueldo mínimo ku 15 porshento definitivamente ta drenta na vigor dia 1 di sèptèmber awor. Esei promé minister di Antia Emily de Jongh-Elhage a garantisá, durante un enkuentro ku prensa ayera.
Ku esaki, asina el a agregá, gobièrnu ta kumpli tambe ku deseo di parlamentu, pa e oumento aki kuminsá konta dia 1 di sèptèmber benidero.
Metry, den un komentario pa LA PRENSA ayera, a bisa ku e ta konvensí awor, ku no tin nada mas ku por stroba introdukshon di e lei aki.
Introdukshon di e lei ku ta oumentá salario mínimo tabata tópiko di masha diskushon durante último lunanan.
Faroe Metry, parlamentario pa Partido Nashonal di Pueblo a presentá su proposishon di lei for di febrüari aña pasá, pero a pasa den masha opstákulo pa e lei aki por a yega tratamentu den Staten.
Dado momentu tabatin tres proposishon riba mesa pa e oumento aki: un oumento di 5 porshentu di teritorio insular di Kòrsou, un oumento di 8 porshentu ku Banko Sentral tabata rekomendá i e oumento di 15 porshento ku tabata deseo di Staten.
Un otro faktor ku tabata menasa e lei ta e posishon asumí pa gremio komersial, ku a para’riba ku mester bin medida pa kompañá e lei, pasobra di otro forma e oumento lo menasa e kresementu di nos ekonomia di último añanan. Pero Metry no tabata di akuerdo ku esaki.
Si nos ekonomia, ku a mustra un kresementu di 3.5 porshento aña pasá no por karga un oumento di sueldo mínimo ku 15 porshento awor aki, anto ta ki dia si, esei ta posibel?

WILLEMSTAD - Universidat Nashonal di Antia (UNA) ta pasando atrobe den tempunan turbulento. Problema ku roster ku no ta kla, problema ku nombramentu di un dekano pa Fakultat Sosial Ekonómiko ta entre otro e faktornan ku a kousa hopi intrankilidat entre e studiantenan ku ayera tardi, a tene un reunion general na UNA mes.
E situashon di krísis a kuminsá na momentu ku Paul van Bladel, ku tabata dekano di Fakultat Sosial Ekonómiko a duna di konosé ku e no ta pone su mes disponibel mas komo dekano.
Esei, huntu ku e echo ku niun otro dosente di e fakultat no tabata dispuesto pa asumí e kargo aki, a hinka direkshon di e instituto den un problema ferfelu.
Finalmente, a logra haña Roilis Kleinmoedig dispuesto pa asumí e responsabilidat aki, pero konsekuensia tabata ku tur preparashon pa e aña akadémiko nobo ta koriendo atras.
Por a skucha masha reklamo i krítika último dianan ku studiantenan a yega UNA, pero mester a bai kas bèk, pasobra ainda no tin roster pa nan por haña lès. Hopi di nan mester bini for di distansia leu, entre otro Bándabou, pa bin tende ku no tin lès.
“Anto den un tempu kaminda gasolin a bira karu, kaminda sèn di bùs a subi barbaramente,” asina mayor di un studiante a bisa LA PRENSA.
Esaki, kombiná ku otro faktornan a pone e studiantenan kuminsá rebeldiá, mustrando nan malkontentu ku e situashon.
Segun rector magnificus di UNA Jeanne de Bruijn, e problema a originá den e hecho ku Konseho pa Supervishon di UNA a kibra relashon ku CURISES.

WILLEMSTAD - No ta tur kos Departamentu Meteorológiko por pronostiká na tempu pa tur hende por haña chèns di prepará. Naturalesa ta keda naturalesa, anto ta ku e medionan ku bo tin, bo mester purba di traha bo trabou lo mihó posibel.
Esei tabata e mensahe di direktor di Departamentu Meteorológiko Albert Martis ayera, durante su presentashon den parlamentu riba futuro plannan di e departamentu, unabes kada isla skohe nan mes rumbo estatal.
Promé ku el a kuminsá, Martis a para ketu na e mal tempu ku a sorprendé hopi hende ántayera nochi aki na Kòrsou. Hopi kos a haña molèster serio di awa, piskadónan a haña nan na kareda pa hala nan boto na un lugá seif i e situashon a resultá un sorpresa kompleto.
E loke a sosodé ántayera nochi, segun Martis a splika ayera ta un kos raro ku no ta pasa tur ora. A surgi un bientu for di direkshon sùit.
Nubianan grandi ku tabata kologá riba Venezuela a move na un forma hopi rápido, krusa laman pa bin den direkshon di nos isla.
Ora nos a konstatá e nubianan aki tabata 8or di anochi. Pa 10or ya nan a yega serka nos ku e konsekuensia konosí pa tur hende.
E pregunta grandi ku ta surgi e ora ei, segun e direktor di Departamentu Meteorológiko ta kon bo ta alkansá esnan mas indiká i públiko en general na un manera rápido i efisiente.
El a bisa, ku ta bon pa tene kuenta ku ora ta papia di wer, nos ta papiando hopi biaha di situashonnan difísil.
Ora ta trata di un orkan, bo tin algun dia pa prepará bo mes anto bo por hasi esaki hopi bon. Pero no semper t’asina, el a indiká.
E fenómeno di ántayera nochi ta un ehèmpel di esaki. Den apénas dos ora, bo mester weta kon ta atendé ku dunamentu di informashon na públiko. Den kaso di un warwarú, esei ta pió. Por lo general esei ta dunabu maksimal 20 minüt, segun Martis.
Nos ke bai konsentrá den futuro serkano kon ta e mihó forma pa aserká komunidat den tipo di kasonan asin’aki, segun Albert Martis.

WILLEMSTAD - E skolnan ku tabata sera durante e promé dianan di e siman aki, lo keda sera pa restu di e siman aki tambe. Motibu di esei ta, ku gobièrnu ke garantisá salú di tur mucha ku ta bayendo e skolnan aki, asina diputado di Enseñansa Marilyn Alcalá-Wallé a konfirmá.
Djadumingu último e supermerkado Shop & Save a kima por kompleto.
E kandela ku a surgi a produsí den promé instansia un kantidat masha grandi di huma ku a pone ku tabata imposibel habri e skolnan i duna lès normalmente. Loke a sosodé ta, ku no tabata posibel – pa diferente faktor – di paga e kandela den forma definitivo. Kada biaha tabata surgi un foko nobo di e kandela ora ku brantwer a kere di a dominá e situashon. Esei a nifiká ku e situashon no a normalisá mesora.
E situashon ta bira mas serio pa muchanan ku ta sufri di asma. Si den promé instansia e problema tabata huma di e kandela ku tabatin, awor ta resultá ku e kandela ta produsiendo gasnan tóksiko ku por ta peligroso pa e muchanan i pa hende en general.
Komo tal, Bestuurscollege, huntu Brantwer, Servisio Ambiental, Direktiva di Skol i Polis a tuma e desishon ku ta mantené e skolnan aki durante restu di e siman aki sera.
Diputado Alcalá-Wallé a bisa ku en bèrdat tabatin mayor ku tabata yama i puntra pakiko e skolnan mester keda será durante un periodo asina largu. Pero nos a splika tur hende, ku no ta un desishon ku a tuma lugá ariba’riba, pero ta un desishon ku a tuma den konsulta ku tur partnernan enbolbí.

WILLEMSTAD – “Presupuesto di Gobièrnu Sentral no tin un maneho den dje. E presupuesto ademas, no ta kontené kosnan ku bo ta bisa pais ta bai dilanti kuné.
Si gobièrnu tabata mas realista, awe nos no ta sinta ku un presupuesto supletorio pa ahustá presupuesto 2008. Nos no por hasi nada otro sino vota kontra e proposishon pa kambia presupuesto, pasobra ni den e kambio aki nos no a weta un adelanto. Mi ta tene mi kurason pa presupuesto 2009. Lagami bisa for di awor, ku ami no ta kere tampoko ku Ulanda lo sanea debe di Antia”, asina parlamentario Dwigno Puriel di frakshon di MAN den Staten a remarká durante tratamentu di presupuesto supletorio 2008.
Parlamentu antiano, durante un reunion públiko djamars último a aprobá e presupuesto supletorio ku gobièrnu a presentá na Staten, un presupuesto supletorio den kua gobièrnu ta pidi parlamentu aprobashon pa por subi merkado di kapital pa fia plaka. Despues di remarkenan krítiko di partidonan di oposishon, a vota i un mayoria di 12 miembro a aprobá e petishon di gobièrnu.
Partidonan di oposishon (3) a vota kontra e ahuste di presupuesto. Oposishon ta haña, ku gobièrnu den pasado a presentá un presupuesto ku no tabata realista, sabiendo ku tabatin vários faktor di riesgo ku mester a tene kuenta kuné.
Tabatin, manera nos a informá kaba, un konfrontashon skèrpi den Staten entre oposishon di gobièrnu riba e asuntu aki.
For di momentu ku a bira konosí ku 15 di desèmber 2008 no ta bira posibel mas pa desmantelá Antia i kada isla haña nan mes status estatal, tabata evidente ku mester trese kambio tambe den e struktura finansiero di pais, tantu di Gobièrnu Sentral komo di Gobièrnu Insular.

WILLEMSTAD - Gobièrnu di Kòrsou ta partisipá, ku despues di a konsultá ku Servisio di Medio Ambiente a tuma desishon pa tene skolnan ku tin molèster di huma pa motibu di kimamentu di edifisio di Shop & Save será.
E skolnan menshoná lo habri atrobe 1 di sèptèmber próksimo.
E desishon aki a wòrdu tuma pa evitá kualke rísiko ku por tin pa ku salú di e alumnonan di e skolnan menshoná.
E skolnan ku ta será ta:
Prins Bernard School Helfrich School
St. Paulus College Lauffer School
Berg Carmel College Stella Maris VSBO
St. Ignatius College Kennedy School
Krijt School Marnix HAVO Emmastad
Divi Divi School Marnix FO + VSBO Rio Canario

WILLEMSTAD/ NIJMEGEN – E yu muhé di Ramfis Paulina, bosero di Hòspital, a kaba su estudio na H.A.N. Hogeschool van Arnhem en Nijmegen. Frondely Paulina a optené e titulo di ‘Bachelor Bedrijfs Economisch Informatica’. Frondely ta bai spesialisá su mes pa e titulo di Master den ‘Information Analist’ na universidat di H.A.N. Frondely ta un eks alumno di Marnix Mavo i di Peter Stuyvesantcollege VWO.
Frondely ta haña felisitashon di su mama Imelda, su tata Ramfis, su ruman muhé Genevieve i Stephanie i tambe di parti di tur su tio i tantanan i Royal Islanders Club. Nan ke yama danki den mes un rosea na sr. R.C. Pantoflet i dr. Sirving Keli pa tur lokual nan a hasi pa Frondely durante di su estudio. Nan tur ta deseá Frondely hopi éksito i bendishon di e Ser Supremo den su estudio nobo.

WILLEMSTAD / FORT LAUDERDALE – E dama Yu di Kòrsou Lusette Kwidama, ta detené na Merka riba petishon di Prokurador General Dick Piar. Kwidama mester a kaba di sinta un kastigu na Kòrsou pero a bai Merka sin bini bèk. US Marshall tin Kwidama aktualmente bou di su kustodia pendiente pa su ekstradishon..
Ministerio Públiko, den persona di fiskal Gisele Veen-Jonkhout, a deklará awe pa LA PRENSA ku for di 22 di febrüari e aña akí, Prokurador General a pidi su ekstradishon. Kwidama tabata sentensiá pa kómplise di estafa (oplichting), malversashon (oplichting) i falsifikashon di dokumento (valsheid in geschrifte) den e kaso di Pinnacle Insurance/ Pòst N.A. N.V. E tempu ei su aktual èks kasá Hedwig Komproe tabata direktor na Pòst N.A. A detené e tambe i sentensi’é despues. Anteriormente Kwidama a sinta un parti di su kastigu den detenshon preventivo, pero por a bai kas pendiente di e investigashon. E kaso a bai te Hoge Raad i einan el a risibí un sentensiá irevokabel. Seguidamente el a bai Merka ku su yunan. Entretantu su èks kasá a bai Merka pa buska e yunan.
Fiskal Veen-Jonkhout a splika ku O.M. ta hibando un maneho pa laga tur hende ku a haña un sentensia den pasado, sinta nan kastigu tambe. Pa e motibu akí a pidi ekstradishon di Kwidama, pasó e echo ku el a bai Merka no ta nifiká ku el a skapa di su kastigu. Tambe Veen-Jonkhout a splika ku e dama por apelá su ekstradishon i warda wak kiko ta pasa na Merka kuné. Loke e por hasi ta aseptá boluntariamente pa bin Kòrsou.

EUSENBIA
Luthmila Theresita
Mihó konosí komo Mina
A laga atras su yunan Solange Maria, Rodney Eusenia, Shalimar Eusenia i esposo, Dulce Eusenia. Akto di entiero ta djasabra 30 ougùstùs for di El Consolador pa santana Montaña. Bishita 1or. Promé ku entiero tin un respòns 3.30or na El Consolador.

ZIMMERMAN
Andres (repentino)
Mihó konosí komo Andres Chikitu
A laga atras su rumannan Astrid Maduro, Fransisco, Carmen, Catharina, Carlo, Maximiliano Zimmerman i nan famia, yu di kriansa Sherwin Juliana. Akto di entiero ta djasabra 30 ougùstùs for di El Consolador pa santana Jandoret. Bishita 9or den Sala Crystal. Promé ku entiero tin un s.s. di misa 11or na misa Jandoret.

MERCELINA
Jureny Zacarias
A laga atras su tata Freddy Mercelina, ruman Jadira Mercelina, tantanan Gladys, Alicia, Frida, Gloria Mercelina, Violeta Apostel, tionan Eligio, Harry Mercelina, Stanley, Henny, Carlos Apostel tur ku nan famia. Akto di entiero ta djabièrnè 29 di ougùstùs 11or for di misa Montaña pa santana Montaña. Bishita 9or.

STEWARD
Lilian Estelle (96 aña)
A laga atras su yunan Patricia Rostant, Archibald i Tineke Rostant, Kenneth Rostant, ñetunan Michael Mourillon i Saskia de Rijke Sergio Rostant. Akto di entiero ta djasabra 30 di ougùstùs for di Barrett Memorial Methodist Church na Abraham de Veerstraat pa santana protestant Oranjestraat. Bishita 9or-10or siguí pa un sirbishi di gradisimentu.

DENVER, Colorado – Animá pa gritunan di “Si nos por!”, e demókratanan ayera a nominá Barack Obama komo nan kandidato presidensial, den un hit históriko pa un afroamerikano, ku awor ta konta ku apoyo fuerte di Bill i Hillary Clinton.
Barack Obama a hasi aparishon sorpresa na e Konvenshon Nashonal Demókrata, saliendo riba esenario despues ku e senador Joseph “Joe” Biden a ataká e republikano John McCain miéntras e tabata aseptá e nominashon komo kandidato pa vise presidente.
“Mi ta kere ku e Konvenshon a sali hopi bon te ku awor aki. Kiko boso ta kere?”, Obama a puntra e multitut, saludando e delegadonan despues di brasa Biden i su esposa Jill na e esenario.
E eks presidente Bill Clinton kende a retrasá ofresé su apoyo na Obama despues di e bataya duru di e elekshonnan primario ku su esposa a pèrdè, a duna Obama su aprobashon firme den un diskurso pronunsiá dilanti un multitut.
E delegadonan demókrata a ovashoná aparishon di e eks presidente pa un periodo asina prolongá ku Clinton ta’tin ku pidi nan pa nan sinta.
“Mi kompañeronan demókrata, mi ta bisa boso: Barack Obama ta kla pa ta lider di Merka i pa restourá su liderazgo na mundu”, e eks mandatario a bisa e asistentenan kendenan tabata interumpié repetidamente ku nan gritunan.
“Barack Obama ta kla pa bira presidente di Merka!”, Clinton a sigurá.
Di su banda, Joe Biden a lansa krítikanan fuerte kontra John McCain.

WILLEMSTAD - Si ántes diabétis òf malu di suku tabata “kos di hende grandi”, awendia literalmente niun, pero niun hende ta skapa di e malesa aki. Dòkternan ta mirando muchanan bou di 12 aña ku diabétis tipo 2, ku ta e tipo di malu di suku okashoná sea pa herensia òf manera e ta den 75% di kaso na Kòrsou, estilo di bida. Esta kome hopi, kome kuminda ku hopi vèt, kome lat anochi i hasi poko ehersisio. Segun ekspertonan riba e tema aki, binimentu di restorantnan tipo “fast food” i e echo ku muchanan awendia ta move masha poko i ta pasa henter dia tras di un pantaya ta hunga “video game” ta pone ku e insidensia di diabétis serka muchanan bou di 12 aña kada aña atrobe ta subi.
Na Kòrsou tin ningun instansia ku por bisa ku eksaktitut kuantu mucha bou di 12 aña ta sufri di diabétis tipo 2. Sinembargo un kombersashon ku vários dòkter di kas i spesialista di mucha ta duna e indikashon ku ta trata aki di un kantidat ku kada dia ta krese. Tin di e spesialistanan aki ku hasta ta papia di un situashon di krísis. Esaki pasobra mas tempran un hende bira diabétiko tipo 2, mas e chènsnan pa e haña komplikashon na un edat yòn ta bira.
I e komplikashonnan di e malesa di diabétis ta hopi serio. Esaki por varia di pèrdida di bista te amputashon di un dede di pia, parti di pia òf un pal’i pia kompletu. Otro komplikashon ku malesa di suku por trese kuné ta pèrdida di funshonamentu di nir. Vários internista spesialista di nir ta indiká tambe ku tur aña nan ta mira ku e edat di personanan ku mester dialisá ta baha. Mas i mas hende yòn lamentablemente ta hañando nan kaminda pa un sentro di diálisis di nir, pasobra den 90% di kaso nan ta diabétiko ku no a kuida nan kurpa. Nan no a bebe nan remedinan, sigui ku un estilo di bida di komementu, bebementu i sin hasi ehersisio, ku konsekuensia ku awe nan ta pashènt di nir.

WILLEMSTAD - Sensia, den tur sorto di tipo, pero sigur esnan den forma di “incense sticks” potenshalmente por kousa kanser di e via pulmonar. Esaki a resaltá den un investigashon ekstenso ku sientífikonan danes, merikano i di Singapore a hasi riba efektonan di sensia. Resultado di e investigashon aki lo sali publiká den e revista médiko di renombre mundial, “Cancer”.
Pa e investigashon aki, ku a kulminá na aña 2005, a hasi prueba ku un total di 61.320 persona ku ta varia entre 47 i 74 aña di edat i biba na Singapore. Tur e personanan aki no tabatin kanser na momentu ku a kuminsá ku e investigashon. Atraves di añanan e sientífikonan a anotá e personanan ku si a desaroyá kanser.
Un total di 325 persona a haña durante e investigashon un òf otro forma di kanser di via pulmonar, manera kanser na nanishi, lenga, shelu di boka òf na nan stròt. Un total di 821 mas a desaroyá kanser di pulmon.
Sientífikonan pa hopi tempu kaba tabata sospechá ku sensia ta kousa kanser, pero te ku promé ku e investigashon aki, e resultado di e estudionan ku a laga hasi tabata kontradesí otro. For di e investigashon aki a konkluí ku huma di sensia ta oumentá di un forma signifikante e rísiko pa un persona haña kanser di via pulmonar. E efekto direkto di huma di sensia ariba desaroyo di kanser di pulmon si tabata ménos fuerte.
Manera ta konosí, sensia, prinsipalmente esun di forma di palitu, ta masha popular den paisnan asiátiko. Sinembargo, uso di e tipo di sensia aki kada dia ta birando mas popular, sigur aki na Kòrsou. Ta traha e sensianan aki a base vegetal mesklá ku zetanan etériko. Aparentemente e meskla aki ta produsí supstansianan ku ta produsí kanser, entre otro e supstansia konosí komo “benzene”. Ta trata aki di un di e kousantenan prinsipal di kanser.

W’STAD/GOLFO DI MEXICO - Pasashi di orkan Gustav den Golfo di Mexico por bolbe okashoná un subida dramátiko di preis di petroli, ku tur e konsekuensianan ku esaki lo trese kuné. Miéntras ku e orkan tabata banda di islanan Cayman djarason atardi, preis di petroli a sera riba merkado internashonal na 118 dollar i 15 sèn pa barí. Esei tabata e di tres dia siguí ku preis di barí di petroli a subi, despues di a baha konsiderablemente for di e preis sensashonal di 147 dollar na luna di yüli último.
Invershonistanan ta hopi preokupá ku e orkan lo por interumpí produkshon di petroli den e área. Den Golfo di Mexico tin alrededor di 200 plataforma ku ta bora petroli. E plataformanan aki ta suministrá kasi 40% di e merkado merikano ku Petroli. Pues kualke interupshon den produkshon lo nifiká oumento di e demanda pa krudo, loke na su turno ta tradusí den preisnan mas haltu di bari di zeta.
Informashonnan ku LA PRENSA a kompilá ayera den oranan di atardi ta indiká, ku tantu e empresa Shell komo e empresa British Petroleum (BP) a kuminsá ku evakuashon di personal di nan plataformanan den e área. Otro empresanan manera Exxon, Chevron y Hess a anunsiá ku nan lo sigui e pasonan di e orkan djaserka. Na momentu ku ta nesesario lo hiba e personal tera firme mesora.
Segun proyekshonnan di National Huriccane Center di Merka, Gustav lo drenta Golfo di Mexico djaweps den oranan di mèrdia. Tradishonalmente ora orkannan drenta golfo, nan ta kobra mas na forsa i den un ratu di ora ta transformá den orkannan di kategoria 4 i 5.