ORANJESTAD- Aña escolar no a habri drechi cu e unit di EPI Salubridad y Servicio ta confronta stagnacion. Directiva di Simar a manda minister di Enseñansa un telegram pa un reunion di urgensia pa trata e situacion cu a surgi, pero no a haya ningun reaccion ainda.
Tur cos ta stagna na e unidad pa motibo cu no a percura pa remplaza e 2 managers, cu a bai. Ta un unit manager so tin, en bes di 3, cu ta e exigencia pa e scol tin su reparticion di ora di docente y alumno y otro asunto den ordo pa tur cos cana manera mester. Riba dj’e un docente cu ya pa 6 aña ta traha na e scol a haya diabierna ultimo di 22 di augustus un carta firma pa sra. Minister drs. Marisol Tromp, den cua e ta duna conoce cu e contract di e docente no ta wordo prolonga for di 1 di augustus 2008, pues retroactivo.
Bruhacion den e reparticion di ora , ya cu awor 32 ora di studiantenan no tin docente p’e !! Directiva di Simar a keda sorprendi pa e informacion ya cu pa algun aña caba ta purbando regla concretamente e posicion huridico di 7 di su miembronan na e unidad aki. E docente cu su contract no a wordo prolonga ta pertenece na e 7 personanan aki.
En total di e 21 maestronan cu ta trahando na e sector aki 14 di nan nan posicion huridico no ta regla. Pa straño cu e por sona di e 14 di e maestronan aki solamente 1 persona a wordo kita for di trabou.
Diaranson, 6 di augustus ultimo, a reuni cu e directiva di scol (CBOO) y den e reunion e director di CBOO a splica cu como BGD (SVB) ya pa algun aña no tin un keuringscommissie nan posicion no por wordo regla. Den e reunion ey tambe a papia di e posicion huridico di e docente cu awor no a haya prolongacion di su contract, como su caso ta data di mas cu 6 aña caba. Na ningun momento a haci mencion cu lo no prolonga hende su contract y directiva di Simar a accentua ta pakico un grupo grandi ta opone pa firma cada aña atrobe un contract.

ORANJESTAD - Minister drs. Marisol Lopez-Tromp ta informa cu renobacion di Biblioteca Nacional a bay bon. Tur trabao di renobacion a termina y e resultado ta hopi bunita y digno di e Pueblo di San Nicolas. Biblioteca Nacional San Nicolas lo habri mas grandi pa publico especialmente pa mucha & hobennan di San Nicolas pues e biblioteca lo tur tres piso di e edificio disponibel.
Na e momento aki e personal di Biblioteca Nacional di San Nicolas mes ta haciendo tur trabao di mudamento di buki y mobilario. Ademas e personal ta hopi ocupa poniendo tur buki na nan lugar y den nan correspondiente categoria.
Una bes tur e trabao aki keda finalisa Biblioteca Nacional San Nicolas lo funciona como un centro multifuncional den cual e usuario lo por lesa buki, studia, siña y biba un experiencia di aprendizahe den un solo edificio.
E Biblioteca Nacional di San Nicolas lo habri cu un espacio pa haci exposicion, un sala cu computer y acceso pa Internet, un sala pa reunion of conferencia, un sala pa estudio y tambe un espacio especial pa mucha & hoben.
Ademas e biblioteca Nacional di San Nicolas ta conta cu un coleccion mas amplio di bukinan ingles especialmente pa e Pueblo di San Nicolas y vecindario.
Gastonan di e reparacion, mantencion y renobacion aki a suma mas cu AWG 300.000,- E trabaonan di mantencion na edificio di Bibilioteca Nacional na San Nicolas a encera entre otro: instalacion di porta y bentanan nobo, reparacion di e pleisterwerk, drechamento di e dak, instalacion di un trapi di emergencia (brandtrap), cambio di plafond y adaptacion y renobacion di e ductonan di airconditioning pa evita cu sushi, pluma y insectonan etc. causa door di paloma y otro parhanan drenta den e sistema di airconditioning y den e edificio.

ORANJESTAD– Aruba a pasa den un susto inespera awe mainta y San Nicolas a sinti e susto ariba tera. Varios cas a perde dak y a sostene dañonan material. Danki Dios cu no tabata tin daño humano. Pero e susto entre habitantenan di San Nicolas tabata algo hopi mas preocupante.
Fraccion di AVP a interumpi un reunion y a tuma direccion pa San Nicolas. Lider di AVP, mr. Mike Eman y coleganan parlamentario Mike de Meza, Otmar Oduber y consehero Mito Croes a bai bishita e victimanan na diferente cas.
A duna presencia pa sostene esnan damnifica. Segun Mike Eman ta hopi doloroso cu esnan cu tine asina dificil caba ta haya nan den mas problema. Eman a aprecia pa mira con bisinjanan y otro bon samiritano a bin rapido pa duna asistencia.
E fraccion a duna sosten den diferente manera, entre otro regla asistencia social pa e personanan damnifica.

ORANJESTAD- Recientemente Kiwanis Club of Aruba a hasi donacion na La Salle College y Club Don Bosco. La Salle College a ricibi un donacion den forma di un water cooler y Club Don Bosco un donacion di un check, pa mantencion di nan edificio y otro proyectonan.
Kiwanis ta un organizacion global di boluntarionan dedica na cambia e mundo pa via di un mucha y un comunidad cada biaha. E movimiento di Kiwanis ta activo na Aruba desde 1965 y tin como lema: sirbiendo e muchanan di mundo.
Pa mas informacion di Kiwanis Club of Aruba y of su actividadnan, por acudi na su website: www.kiwanisaruba.org
Riba e potret adhunto por mira e President sr. Ebby Shwengle y e secretario sr. George Croes di Kiwanis Club of Aruba huntu cu e alumnonan y cabesante di La Salle College.
Riba e potret adhunto por mira e miembronan di Directiva di Club Don Bosco y e president sr. Ebby Schwengle di Kiwanis Club of Aruba.

WILLEMSTAD – E aktual presidente di e sindikato pa maestronan di skol, Sidney ‘Bicho’ Justiana, a postulá su mes pa presidente durante e próksimo periodo di dos aña. Durante un reunion, resientemente, Justiana a informá esaki.
Tabata durante e reunion tan komentá ku un miembro di e sindikato a pidi. “E reunion ku Marbella Felipa a pidi riba funshonamentu di Sitek a bai bon i a debatí dos ora i mei riba diferente punto. Na final a konkluí ku tin kosnan ku ta sumamente bon pa Sitek”, asina presidente Sidney Justiana a duna di konosé na LA PRENSA. E promé kos ku a konkluí ta ku Sitek ta keda Sitek i ku ta hasi tur loke ta posibel pa e sindikato ta mas fuerte ku tin. Felipa a manda un seri di pregunta ku lo keda kontestá por eskrito i lo manda kopia pa tur miembro. Mas aleu a disidí ku kada dos luna lo tene reunion kaminda miembronan por papia riba funshonamentu di Sitek i kon ta mira funshonamentu di direktiva i konseho sindikal. Durante e reunionnan di evaluashon aki, seis biaha pa aña, tur miembro tin derechi di presentá kon nan ta mira ku e organisashon por funshoná mas mihó.
Manera ta konosí, e miembro Marbella Felipa na luna di yüni a entregá un karta na Sitek, kaminda el a hasi un petishon pa un reunion general ekstraordinario pa trata funshonamentu di Sitek, direktiva i presidente pa loke ta trata enseñansa, pasobra el a bisa ku mester trata e deterioro ku diferente miembro a señalá den Sitek.

WILLEMSTAD - Minister di Enseñansa, Omayra Leeflang a wòrdu informá di e problemanan na Universidat Nashonal di Antia, for di ora ku e tabata na Ulanda, riba kaminda pa Kòrsou for di Beijing. E minister di Enseñansa, a topa na Schiphol ku presidente di Hunta di Supervishon di UNA, Herman Behr. Behr na e okashon ei a splika e minister ta kiko ta pasando na UNA. A base di esei a yega na e konklushon, ku lo ta bon, pa hasi un investigashon imparsial. Esaki ta nesesario, pasobra tin hopi vershon di e kousa i situashon na UNA. Tambe a base di e kombersashon ku Behr, segun minister Leeflang, e no tin ningun motibu pa duda den e sinseridat ni tampoko kapasidat di Hunta di Supervishon i Rèktòr Magnífiko di UNA.
Pero gobièrnu ta insistí riba e investigashon ku mester tuma lugá. “E investigashon aki mester determiná ta kiko a kousa e situashon di tenshon na e fakultat sosial ekonómiko”.
Enkuentronan na Kòrsou
Despues di su yegada ayera na Kòrsou, minister Leeflang a manda un karta pa presidente di Parlamento, pa inform’é dje investigashon ku ta bai tuma lugá. E minister a indiká den e karta pa presidente di Staten, ku e ta dispuesto pa kompartí resultado dje investigashon ku Parlamento.
Un reunion tambe a wòrdu konvoká ayera mainta ku e Konseho di Studiante di UNA. E konseho aki, huntu ku e Organisashon di Studiante, di e fakultat Sosial Ekonómiko, a splika e minister di nan esfuersonan enbano pa solushoná e situashon. Segun e partisipashon di Konseho di Studiante na minister Leeflang, ku tin un frikshon di komunikashon serio entre esnan ku ta responsabel pa maneho di UNA. A base di e esei, e Konseho a entregá minister Leeflang un karta, unda ku e ta proponé pa hasi un investigashon imparsial. E minister a splika e Konseho di Studiante, ku e ta riba e mesun liña di pensamentu ku e mandatario ya ku el a tuma e desishon ei kaba.

WILLEMSTAD – Na e momentu aki, e úniko grupo ku na Universidat di Antia, su kabes ta friu, ta esun i e Konseho di Studiante. Esei ta e konklushon di minister di Enseñansa, Omayra Leeflang, kende for di ayera na su yegada for di eksterior, a kuminsá traha intensivamente riba e problemátika. Entretantu e minister a duna instrukshon pa kuminsá hasi un investigashon dje situashon.
E minister a hasi un apelashon, pa miéntras ku ta pendiente dje investigashon i su resultado, tur hende envolví den e problemátika, konsentrá riba bienestar di e studiantenan.
“Mi ta hasi un apelashon riba tur esnan envolví pa legumai, e ta mashá importante,” segun Leeflang, pa tan pronto posibel, e studiantenan por disponé di un roster, informashon tokante ‘drempelregeling’ i pa e studiantenan haña tambe e detayenan tokante e fakultat sosial ekonómiko su struktura nobo.
Leeflang: “Awor aki no tin sentido mas pa zundra i tilda otro, pasobra ta bin e investigashon imparsial. Na e momentu aki e lus na Universidat ta e studiantenan. E konseho di studiante, ta kabes friu, ophetivo, ku un meta ku studiantenan mester kuminsá ku nan estudio”.
Mas aleu e minister a indiká, ku no ta importante ta ken a faya, pero ku awor mester planiá i informá studiantenan i laga e investigashon bin kla, pa mustra ta na unda no a wòrdu kumplí.
Por spera, segun minister Leeflang, ku otro siman por fèrwagt ku e studiantenan por kuminsá ku nan estudio. “E guera di buskamentu di rason no ta nesesario mas. Ta importante pa kontinuá ku e proseso pa e muchanan por bai skol”.

SLM mester paga ganashi na Insel Air...

WILLEMSTAD - Insel Air ta rechasá redondamente e akusashonnan di SLM, ku ta e kompania Sürnam di aviashon, a wanta e koperashon ku tabatin entre dje dos empresanan. E siman aki, direktor di Insel Air, Edward Heerenveen a konfirmá, ku e akuerdo di koperashon entre Insel Air i SLM a wanta, entre otro pa e ‘aspektonan kultural’ di parti di SLM, ku tabata influensiá e funshonamentu di e koperashon. Heerenveen a mustra tambe riba e hecho, ku SLM ta un kompania di gobièrnu i kontrali na Insel Air ku ta un empresa privá, toma di desishonnan ta tarda hopi.
Entretantu SLM a reakshoná riba e partisipashon di Insel Air, indikando ku e koperashon di trabou a wòrdu di fris, riba insistensia di SLM. Un di e asuntunan ku ta hunga un ròl den esaki, segun e direktor Henk Jessurun, ta un debe grandi ku Insel Air tin serka e kompania Sürnam. E suma ku mester paga, ta relashoná ku kuenta di pasaheronan ku SLM ta transportá pa Insel Air.
Saka kurpa
Den un reakshon, Edward Heerenveen a bisa ku e ekspreshonnan di Jessurun no ta bèrdat. “Awor aki tur hende ta buska un manera pa saka nan kurpa”. Segun Heerenveen, Insel Air ta disponé di email, ku ta proba ku el a anulá e ‘joint-venture’. Esaki a tuma lugá a base di problemanan ku Insel Air a konfrontá ku SLM. A trata di problemanan, segun e direktor di Insel Air, ku bou di ningun sirkunstansia e kompania di aviashon lokal, no por a sigui ku e buelonan, den e forma ku SLM tabata duna kontenido na e koperashon.

ARIES: Evitá diskutí pa kos di kèns. Bo ta kuidando eksageradamente di no kometé erornan. No pone tantu preshon, ya ku no ta kumbiníbu, spesialmente pa bo salú. 11,03.

TAURO: Pone spesial atenshon na bo finansa i probechá e dia di awe pa hasié i mira di ki manera bo por spar i balansá bo presupuesto. 35,44,66.

GEMINIS: No kana konta bo asuntunan íntimo na niun hende. E lokual ku tantu bo ta deseá ta rekerí hopi parti. Lo ekonómiko ta stabilisá. 18,01,04.

KANSER: Sali di kueba i riska di ser felis. Permití ku otronan ta atmirá i stimábu. Inseguridat lo ta responsabel di bo frakshonnan amoroso. 35,09,17.

LEO: Bo ta pasando den momentunan difísil, pero nada no por tumbabu. Bo ta un persona dushi, kariñoso i bo tin un gran fortalesa spiritual. 37,14,09.

VIRGO: E dia di awe ta parse slou i ku no ta pasa lihé, no ta importá kiko bo ta hasiendo. Di bo ta dependé poko di akshon pa e oranan pasa rápido. 07,47,11.

LIBRA: E seguridat ku bo ta buskando a yega. Saturá di bo pensamentunan i afirmashonnan positivo i den bo bo ta haña tur e poder di mundu pa triunfá. 20,50,30.

SKORPION: Sali di duda, intriga i tormentonan mental. Desakuerdo i konfliktonan ku un persona ta krea problemanan serio den bo sírkulo familiar. 05.

SAGITARIO: Organisá eventonan sosial, ya ku tin algu spesial pa hasi ku tur por dibertí i stima sin problema. Disfrutá di bo pareha. 08,15,03.

WILLEMSTAD - E palabra independensia ta un palabra relativo. Kiko realmente ta independiente? Si analisá kiko Belasting Accountantsbureau (BAB) ta boga p’e, nos ta yega na e konklushon ku esaki no ta realista.
Bo por ta independiente, pero den bo lugá ku bo mes sèn. No ku sèn di komunidat, asina minister di Finansa Ersilia de Lannooy a deklará ayera den parlamentu di Antia.
Manera ta konosí, Belasting Accountantsbureau (BAB) tabata wéspet di parlamentu algun siman pasá pa duna su punto di bista relashoná ku kambionan estatal ku ta na kaminda i kon BAB lo mester bai funshoná den esaki. BAB ta preokupá kiko ta bai sosodé, unabes ku lanta Nieuwe Belastingdienst Curacao, NBC.
BAB ke sigui funshoná komo un entidat independiente, tambe den e servisio nobo di belasting. Un argumento prinsipal pa esaki, ta e hecho ku no tin metementu polítiko den BAB, asina Sherwin Casper i Benedict Bito, respektivamente direktor i presidente di BAB a duna di konosé den parlamentu.
Loke a resaltá tabata, ku BAB no ta kere ku e struktura estatal nobo lo bai kumbiní e fundashon.
Den e struktura nobo, BAB lo bai pèrdè un parti grandi di e independensha ku tin awor aki den su funshonamentu. Konsekuensia lo ta ku personal di BAB, lo por opta pa bai traha den sektor privá.
“Nos a krea nos mes kultura di organisashon. Nos tin miedu ku ora nos empleadonan, ku nos a tuma komo seis aña pa forma nan, mester bai funshoná den e struktura nobo, lo preferá di no sigui traha pa gobièrnu.

WILLEMSTAD – “Mi ta kondená ku ta falta rèspèt di e forma aki kontra hendenan ku ta hasi nan trabou korekto. Mi no sa kiko ta pasando, pero mi ke pa oposishon sa ku gobièrnu no ta aseptá e kos aki”, asina promé minister Emily de Jongh-Elhage a bisa,
E promé mandatario a bisa esaki, relashoná ku ekspreshonnan di dos miembro di oposishon ku na su konsepto, a falta ku étika den nan forma di presentá ayera.
Parlamentu antiano finalmente ayera a reuní pa gobièrnu por duna Staten informashon riba último desaroyonan rondó di e intentonan pa weta si tin gas òf petroli den nos awanan teritorial.
Staten, dos siman pasá a disidí di posponé e reunion ku mester a tuma lugá pa diskutí e desaroyo aki.
E motibu ta e hecho ku Staten no a tuma nota ainda di e rapòrt ku profesor Simon Mitchell a traha riba e investigashon di University of Texas riba posibel presensia di gas i petroli den nos awanan.
Promé minister Emily de Jongh-Elhage a anunsiá for di algun siman pasá kaba ku Gobièrnu Sentral ke reuní ku parlamentu riba resultado di e investigashon aki di University of Texas, promé bai afó ku e resultadonan.
Manera LA PRENSA a informá den forma ekstenso kaba, e promé indikashonnan ta mustra ku tin bon posibilidat ku tin gas den e awanan rondó di nos islanan. Manera ta konosí, University of Texas a hasi un sondeo i análisis pa weta si tin petroli i gas natural.

WILLEMSTAD - E sindikato di shofùrnan di bùs STU, Sindikato Transporte Uní a pone tur dos den man di su abogado. Den oranan di awe tardi, direktiva di STU lo tende kiko lo bira e siguiente paso, asina Giovanni de Caster, miembro di direktiva di STU ku ta fungiendo ku e bosero awor aki a revelá.
Ayera nochi e sindikato a reuní ku su miembronan, despues ku anteriormente ayera mainta a tene un promé reunion na Koredó pa kalma e miembronan. E miembronan tabata kla pa bai akshon pa sali na defensa di e dos shofùrnan di bùs detené e siman aki.
Polis a arestá tantu Tio Felipa komo Andres Everitz, bou di sospecho di tabata enbolbí den e disturbionan ku a tuma lugá e anochi di reunion di Konseho Insular kaminda a herida e hóben Carlos Morerno seriamente i a kousa vários destrukshon.
STU mester a hasi hopi esfuerso pa konvensé e miembronan ku no ta tur kos bo ta logra ku akshon, segun De Caster.
E miembronan a bai finalmente di akuerdo pa laga nan abogado sigui hasi e trámitenan nesesario pa weta si en todo kaso por saka e dos shofùrnan detené liber.
Ayera nochi a trata tambe e dokumento ku diputado Anthony Godett a presentá na e sindikato pa yega na un restrukturashon di transporte públiko, e asina yamá “visiedocument” di gobièrnu
E posishon ta mesun kos, segun De Caster. STU lo fiha su mes posishon i presentá esaki den forma di un dokumento na gobièrnu, el a agregá.

WILLEMSTAD - Ku plantamentu di un mata den un dje bakinan di mata a lo largo di e ruta, diputado Anthony Godett a duna señal pa kuminsá ku drechamentu di e fasilidatnan na Koredó. Esei a tuma lugá ayera tardi, den presensia di un kantidat di kolaboradó di LVV I algun invitado.
Koredó a bai drástikamente atras.
Ya pa algun aña kaba Koredó no ta loke e tabata ántes, esta un pista bunita kaminda hende por kana pa sea distraí òf pa drecha e kondishon físiko.
Ántes tabatin masha hopi hende ta hasi uso di e fasilidatnan tur atardi, hopi biaha anochi i tambe den dia.
Falta di mantenshon a pone Koredó bai atras formalmente. E palunan di koko tur a muri, e fasilidatnan pa rekreá a kai den dekadensia i último tempu no tabatin asina tantu uso di dje mas.
E hecho ku e sentro pa kondishon físiko Sun Dance tambe a kai den dekadensia kompleto, no a yuda e kousa i a krea un aspekto mas di e deterioro di e área.
Diputado Anthony Godett, den su diskurso a lamentá ku kosnan por a yega asina leu.
“Tur e diputadonan ku a sinta promé ku mi, por a hasi algu pa drecha e kondishon físiko di Koredó. Pero niun tabatin interes pa esaki, ku ta propiedat di pueblo,” segun Godett.
E mandatario a anunsiá ku lo bini un kantidat di mehorashon. Lo planta mata den tur e bakinan kaminda ántes tabatin pal’i koko ku a muri.
Lo drecha e fasilidatnan kaminda hende ta hasi barbekiú. Lo drecha e playa kaminda hende por landa i ademas lo pone palapa na diferente sitio pa asina krea sombra.

DEN HAAG/ WILLEMSTAD - Partij voor de Vrijheid (PVV), e partido di Hero Brinkman i Geert Wilders ta bahando na popularidat, di akuerdo ku un resiente sondeo di opinion polítiko.
Si na yüli último e partido por a konta ainda riba 11 asiento, di akuerdo ku e sondeo di mas resien e partido lo tin apénas 6 asiento awor aki, si awor aki lo tabatin elekshon.
Esaki ta tres asiento ménos ku loke e partido a saka den último elekshon general ku tabatin na Ulanda.
Esaki ta loke a sali na kla den e sondeo realisá pa Poltieke Barometer di e siman aki.
PVV ta konosí komo e partido ku a bin ta akshoná fuertemente kontra Antia. Ainda ta fresku den tur hende su memoria kon e miembro dje partido aki den Tweede Kamer Hero Brinkman tabata bati e islanan ku un kantidat di ekspreshon denigrante.
Ta konosí ku Geert Wilders a proponé pa pone e islanan riba Internèt, riba e sait www.marktplaats.nl pa bende e islanan na findishi na esun ku ta dispuesto pa paga mas tantu.
E ekspreshon “roversbende”, referiendo na e islanan ta un kos ku Brinkman tabata usa konstantemente i un kos ku el a ripití na diferente okashon, inkluso aki na Antia mes.
E aktitut di Brinkman a pone ku asta un enkuentro ku tabatin di parlamentu di Antia, di Aruba i Ulanda aki na Kòrsou no por a sigui pasobra parlamentu a eksigí di Brinkman pa e pidi dispensa pa su palabranan, loke ela ninga terminantemente di hasi.
Diferente polítiko a bisa na e okashon ei ku nan ta konsiderá ku Brinkman i su partido ke tene lanta ku nan atakenan kontra Antia.

WILLEMSTAD - Skol básiko St. Paulus College kaminda e.o. diferente persona konosí di nos komunidat a haña e base pa nan formashon ta di fiesta dia promé di sèptèmber 2008. St. Paulus College a konta ku diferente alumno manera: Big Leaguer Andruw Jones, Ivanon Coffie, Ing. Steven Martina, Richard Colastica, dr. Rach, dr. Saleh, dr. Booi, Idelfons Simon, rumannan Colastica e.o. Roy, Ersilia, van Wilgen e.o. Imro, Wanga e.o. Canisio, Adams, Ravenstein, Grootens, Garmers e.o. Dito i Ravello Antoin, Morrison Isenia, Archell Calister, Glen i Carl Camelia, Taffy de Jongh, Hershell Rosario. E tim di maestronan a konta tambe ku sra. Emily de Jongh-El Hage kende a laborá aki na skol. Eks minister di Enseñansa Phyllip Nieuw a fungi komo kabes di skol di St. Paulus College.
E promé alumno ku a wòrdu inskribí na skol ta na bida ainda den persona di Harold Adams.

ROTTERDM - Mariano ‘Pitòsh” Heyden II a gradua djárason dia 27 di ougùstùs 2008, ‘cum laude’ dentro di e periodo stipulá, pa su titulo di MPhil in Business Research, ku spesialisashon den maneho stratégiko na Erasmus Universiteit Rotterdam (EUR).
MPhil ta e programa di masters di mas prestigioso den ekonomia i management na e universidat. E estudio ta kompletamente na ingles i ta mas rigoroso i intensivo ku otro estudionan di masters na universidatnan en general. EUR su fakultat di maneho ta klasifiká den e tòp 5 na mundu pa su programa doktoral despues di Wharton, Manchester, Bocconi i Stanford.
Pa drenta den e programa di MPHil ta un proseso sumamente selektivo. Pa aña ta atmití un máksimo di 25 studiante di kua mas ku 95% ta studiantenan internashonal. Pitòsh tabata promé i te ainda úniko studiante antiano ku tabata atmití den e programa prestigioso di estudio avansá aki despues di a gradua na aña 2006 pa su titulo di Bachelor of Science in Business Administration na Universidat Nashonal di Antia.
El a gradua ku un 9 pa su tésis ku a karga e título di “The Transformation of Externally Acquired Knowledge into Strategic Renewal: An Upper Echelon Perspective”. E supervisornan tabata e.o. vise dekano i hefe di departamento di maneho stratégiko prof. dr. Henk W. Volberda, prof. dr. ing. Frans A.J. van den Bosch, dr. Justin J.P. Jansen i dr. Tom Mom. E supervisornan despues di defensa di Pitòsh a papia di un tésis i un hóben eksepshonal, ku meresé tur elogio.

WILLEMSTAD - Djarason último pastor Carlos di parokia di Brievengat a selebrá huntu ku su parokianonan e hecho ku 25 aña pasá el a wòrdu ordená komo saserdote.
Huntu ku pastor Carlos, nuebe otro pastor di diferente parokia di Kòrsou a konselebrá e santu sakrifisio di misa.
Parokianonan di Brievengat i demas amigunan di pastor Carlos a yena misa di Brievengat, pa huntu gradisí Todopoderoso pa e logro grandi aki.
Ta bon pa remarká ku di e 25 aña di saserdosio di pastor Carlos, 21 aña el a traha na Kòrsou. Pastor Carlos a bini Kòrsou dia 15 di desèmber 1987 komo pastor di misa di Koral Specht kaminda el a keda 5 aña. Despues e tabata pa 12 aña Pastor na Katedral di Pietermaai. Na novèmber 2004 pastor Carlos a bira pastor na Brievengat kaminda te ainda e ta pastor.
Pastor Carlos ta un persona masha stimá den su parokia i manera sra. Baby den representashon di parokia a trese pa dilanti, un persona trankil, simpátiko i semper dispuesto pa yuda kaminda ta posibel. Su predikashi tin hopi kontenido ku ta pone ku un hende ta skucha ku masha atenshon.
Durante di e 4 añanan ku pastor Carlos ta na Brievengat, e parokia a konosé un kresementu hopi grandi. No solamente e misanan di djadumingu ta yen, pero hasta e misa den siman den kapèl a konosé un oumentu. Anto ni di papia mes di e kantidat di boutismo ku tambe a subi masha hopi.
Pa sra. Baby, pastor Carlos durante di su 21 añanan ku e ta sirbiendo Obispado di Willemstad, el a konbertí su mes den un bon yu’i di Kòrsou ku konosé nos mentalidat di un manera masha bon mes.

WILLEMSTAD - Minister Presidènt na nòmber di Gobièrnu di Antia Ulandes a anunsiá ku pa dia 29 di ougùstùs 2008 lo dekretá e oumento di sueldo mínimo ku 15%.
Ku esei definitivamente a pone Kòrsou bou di kuratela. Por sierto e oumento di sueldo mínimo ta konta solamente pa Kòrsou. Pa e otro islanan e oumento ta drenta na vigor na e momento ku esakinan haña ku esaki ta oportuno.
Ta masha remarkabel ku Gobièrnu i Staten a haña ta bon pa no hasi kaso ètòl di e petishon i maneho di Teritorio Insular di Kòrsou pa oumentá sueldo mínimo ku maksimalmente 5%, miéntras ku di otro banda si a tuma na konsiderashon petishonnan di e otro islanan. De hecho na St. Maarten a redusí belasting ku 5% pa kompensá oumento di sueldo mínimo aña pasá.
Kon por ta posibel ku meimei di e proseso di restrukturashon estatal kaminda oumento di outonomia di e islanan ta para sentral, Gobièrnu i Staten ta di opinion ku mester intervení den e maneho di sueldo na Kòrsou. Esaki no solamente ta un total falta di rèspèt pa Bestuurscollege di Kòrsou, pero hasta mester konsiderá esaki komo un moshon di deskonfiansa.
Ta unda e partidonan di oposishon di Kòrsou a keda ku nan gritunan ku no por tòrnu na outonomia di e isla. Hopi remarkabel ku aparentemente nan ta di akuerdo pa e otro islanan disidí kiko ta bon i kiko no ta bon pa Kòrsou.
Pa habitantenan di Kòrsou esaki ta e bòm di un spektakel polítiko i altamente tristu.

LAMP
Rosa Yolanda (78 aña)
A laga atras su rumannan Idis Emers, Marcial Lamp, Maurits emers, Madeleine, Irine, Swinda, Judith, Poppy, Saida i Harold Lamp. Akto di entiero ta djasabra 30 di ougùstùs 10.30or for di misa San Francisco (Aruba) pa santana Caya Ernesto Petronia. Bishita 8.30or.

MARTINA
Charles Feliciano (repentino)
Mihó konosí komo Pa Chachi
A laga atras su kasá Swinda Martina-Leito, yunan Angelo, Gregory, Natalie Martina, Charinda i Rodney Bourne-Martina tur ku nan famia, ñetunan Savita, Tanisha i Sunita Martina, ruman Hiriberto Martina. Akto di entiero ta djadumingu 31 di ougùstùs for di Bottelier pa santana Hòfi Bottelier. Bishita 9or. Promé ku entiero tin un s.s. di misa 11or.

DE LA MERCED-PURIËL
Myrna Pelagia
Mihó konosí komo Meris òf Ma Mina
A laga atras su kasá Oscar de la Merced, yunan Shahaira i Toy Felomina, Shurman de la Merced, Shamrila de la Merced i Richard Karmelia, Shannon i Amirel de la Merced-Gerard, yu di kriansa Marilyn Seferina. Akto di entiero ta djaluna 1 sèptèmber for di misa Steenrijk pa santana Pietermaai. Bishita 1or. Promé ku entiero tin un s.s. di misa 3.30or.

VAN THIJS
Wilfred Adolfo Florentino
Mihó konosí komo Freddy ku tabta traha na Palais Royal
A laga atras su kasá Ida van Thijs-Isenia, yunan Ingrid van Thijs i Edsel merced, Alida van Thijs, Henrich i Milouschca van Thijs-Margarita, ñetunan Ingemar Brion, Connor van Thijs, Shawná van Thijs. Akto di entiero ta djadumingu 31 ougùstùs for di El Tributo pa santana Gr. Kwartier. Bishita 12or i 4or tin un respòns.

DENVER, Colorado, - Dilanti mas ku 80.000 persona ku pankartanan blou ku e palabra “CHANGE” (Kambio), e kandidato demókrata pa presidensia di Merka, Barack Obama, ku profundo gratitut i gran humildat a aseptá su nominashon.
E abogado di Harvard i senador pa estado di Illinois a papia dilanti su simpatisantenan eksaktamente 45 aña despues ku Martin Luther King Jr. a duna su diskurso “I Have a Dream” na siudat di Washington.
“Nos ta mihó ku e último ocho añanan”, Obama a sigurá dilanti míles di asistente ferviente na stadion di futbòl Invesco di siudat di Denver, pa referí na e mandato dòbel di e aktual presidente George W. Bush.
“Ta basta!”, Obama a bisa, i el a agregá ku 4 di novèmber tin ku vota pa bisa “ocho aña ta sufisiente!”
Obama a dediká inisio di su diskurso pa ataká su kontrinkante, e republikano John McCain.
El a kuminsá atak’é dor di afirmá ku el a vota “90% di e bianan” p’e leinan patrosiná pa Kas Blanku, i Obama a agregá ku esaki no por ta un kambio.
E kandidato demókrata a sigurá n’e Konvenshon Nashonal di su partido ku e lo hasi tur loke ta na su alkanse pa mantené bibu e “soño merikano” di oportunidat pa tur hende.
“Nos ta un mihó pais!”, Obama a sigurá.
Obama ta e promé hende pretu ku a keda nominá pa okupá presidensia di Merka.