WILLEMSTAD – Drechamentu di e kasnan ku a sufri daña dor di e warwarú siman pasá, no mester dura hopi. Segun Elvio Carmela di Fundashon pa Penshonadonan, gobièrnu por hasi uso di e hóbennan ku ta studia na FEFFIK aktualmente. E hóbennan akí por haña hopi eksperensia di práktika, si nan yuda drecha e kasnan.
Carmela a bisa, ku dor di su eksperensia kon FEFFIK a lanta 30 aña pasá i e situashon ku tabatin na Mijn Maatschappij, tempu tabatin kobamentu di wama, gobernantenan aktual por siña hopi. “Tempu di kobamentu di wama tabata asina ku famianan kompletu tabata koba wama. Nan tabata traha ku nan yunan i e muchanan no por a desaroyá. No por a krea perspektiva pa e hóbennan akí i mandatarionan di e tempu ei a kometé erornan grandi.”
Segun Carmela, mandatarionan aktual mester siña di e fayonan di nan antesesornan i krea perspektiva pa nos hóbennan. “Mester regla ku D.W.I. por hasi uso di e hóbennan di FEFFIK bou di guia di Arbeidszorg i Veiligheidsinspectie. Mester inkluí D.O.W., D.R.O.V. i F.K.P. pa guia e proseso. FEFFIK por pone e hóbennan akí disponibel pa e trabounan di rekonstrukshon i asina kontribuí na nan futuro a base di e eksperensia ku nan lo haña den práktika, drechando e kasnan.”
Finalmente Carmela a bisa, ku esaki por sirbi komo un lès tambe pa nos mandatarionan, ya komo ku na vários okashon el a lansa e krítika, tempu ku tabatin trabounan di BOO, ku no a krea perspektiva pa nos hóbennan. “No por bisti kòl ku dashi so. Awor akí tin konstrukshon di hotèl i proyektonan di turismo. Mester hasi uso di tur e hóbennan akí di FEFFIK i otronan ku no tin empleo.”

WILLEMSTAD – Ora un pipa di awa riba kaya kibra den un bario i hopi awa bai pèrdí, Aqualectra no ta kobra e habitantenan den e área kaminda e pipa a kibra, pa e pèrdida. Esaki ta loke e mènèdjer di distribushon di Aqualectra a splika LA PRENSA. Ayera LA PRENSA a publiká un relato di un pipa di awa ku a kibra den un bario. Den e artíkulo a kuestioná si ta habitantenan di e bario mester paga e pèrdida.
Aqualectra a splika ku den e tarifa di awa ku tur su klientenan ta paga normalmente, ya kaba Aqualectra ta kobra tur kliente tur luna un porsentahe èkstra pa kubri eventual ‘lekverlies'. Esaki ta nifiká ku tur kliente di Aqualectra ta paga tur luna outomátikamente un porsentahe èkstra pa kubri pèrdida di awa ku surgi rònt Kòrsou. No ta ora un pipa kibra so tin ‘lekverlies', sino tambe pèrdida di awa dor di ladronisia ta kai bou di ‘lekverlies’. Aqualectra a splika ku tur kliente ta paga solamente pa e kantidat di awa ku a pasa dor di su meter i ku nunka e kliente no ta paga pa awa ku a basha promé ku e pasa dor di su meter di awa. Si awa ku no a pasa dor di su meter basha riba kaya, e no ta paga èkstra pa e awa akí. Sinembargo e ta kontribuí semper ku e gastunan di pèrdida dor di e porsentahe èkstra ku e ta paga tur luna.
Tur aña Aqualectra tin problema ku ‘lekverlies’ ku ta surgi rònt Kòrsou. Na aña 2004 e pèrdida di awa tabata 35%. E aña akí e ta na e momentu akí 27%. Segun Aqualectra nan ta hasiendo tur nan esfuerso pa kombatí e problema akí, pasó si no tin ‘lekverlies’, lo no mester kobra e kliente e porsentahe èkstra tampoko. Esaki ta nifiká ku e tarifa di awa tambe lo por baha. Sinembargo e total di e porsentahe ku tur kliente ta paga Aqualectra tur luna, no ta kubri e gastunan di pèrdida ku Aqualectra ta sufri.

 

WILLEMSTAD/ ULANDA – Un pareha bibá na Ulanda i víktima di ladronisia na nan kas na Kòrsou, ta menasá di hiba un kampaña kontra Kòrsou na Ulanda i Bèlgika. E kampaña ta pa mustra riba e inseguridat ku turistanan ta konfrontá ora nan ta ku vakashon. Ladronnan a hòrta 5 biaha kaba e aña akí na kas di e pareha.
E pareha, un dama yu di Kòrsou i su kasá bèlga, ta doño di e kas ‘Miramar’ na Westpunt. Nan mes ta biba na Bèlgika i nan ta bishitá Kòrsou sigur dos biaha pa aña, for di 1972. Djamars último ladronnan a hòrta den e kas pa di tres biaha den tres siman i pa di sinku biaha e aña akí. E último tres biahanan e ladronnan a hòrta pertinensianan di turistanan oropeo ku tabata keda den e kas. Segun e pareha, ta parse ku polis ta man mará, pa loke ta trata kombatimentu di kriminalidat, si polítika no sostené nan. Polis sa ku den e kaso akí ta trata di dos hóben di mas o ménos 14 aña. Polis di Bándabou konosé e kaso.
E pareha ta sigui bisa, ku nan ke pa via di medionan di komunikashon pone públiko na altura di loke ta pasando. E promé, pasó den e proseso di konsientisashon nan ke pone na Kòrsou mes, ku e speransa ku e personanan outorisá por reakshoná i asumí nan responsabilidat. Si esei no logra, nan ta pensa pa hiba un kampaña na Ulanda i Bèlgika tokante e inseguridat pa turista na Kòrsou. “Nos ta spera ku esei no mester yega dje leu ei, pero nos ta kansá di e falta di responsabilidat di e personanan ku ta responsabel pa seguridat riba e isla. E situashon akí no por dura mas largu.”

Skina di Sorti, awe djasabra 30 di ougùstùs di 2008, ta kuminsá ku deseá tur hende un bon dia. Den kestion di maneho nan ta identifiká un sierto siklo di akshonamentu, esta ku bo ta konsipiá un konsepto, pa despues krea struktura pa por realis’é, seguidamente reklutá e rekurso humano pa hasi lokual tin di sosodé den e manera ku e tin di sosodé, i durante di e proseso menshoná bo ta inspirá i motivá e hendenan pa trese e mihó esfuerso, miéntras ta kontrolá i koregí a medida ku ta bini “feedback” riba e manera ku kosnan ta kana den direkshon di e ophetivonan stipulá.
****
Den e proseso estatal, e promé aspektonan di maneho a kana hopi robes kaba. E inisiativa no tabata serka nos pero serka e ulandesnan. Nos puntonan di salida básikamente a disparsé na momentu ku e ulandesnan a benta nan “monkey wrench” nan den e proseso i finalmente nan a usa e koutiverio ku e situashon finansiero a resultá pa nos hendenan, pa dikta un manera di atendé kos ku a bin resultá den un situashon kaótiko sin legitimidat demokrátiko for di kual nan oso por saka benefisio.
****
Tin hende ku a rabia dia ku mi a parafresa riba un ponensia di Nelson Mandela: "Only free men can negotiate. Prisoners cannot enter into contracts" pa splika ku nos “state of mind” a pone ku nos a maniobrá nos mes den un “uitzichtloze positie”. Pa kolmo nos a delimitá e espasio mas ainda dor di tene na Statüt komo “eeuwig edict”. Hamas i nunka bo no por ta liber i outéntiko den bo pensamentu i negosiashon, si bo mes enkadená bo mes. Ora ku bo enkadená bo mes, bo ta delimitá bo posibilidatnan i bo postura pa definishon ta defensivo.

BERLIN – Despues di a pèrdè peleanan tras di otro na Alemania, John Ruiz ta regresá Berlin pa rekuperá su korona peso pisá di Asosiashon Mundial den un pelea djasabra kontra Nicolai Valuev.
“Mi ta kere ku e di tres bia kos lo ta otro”, Ruiz a bisa.
E merikano di orígen portorikeño (43-7-1 ku 29 nòkout) lo enfrentá e ruso Valuev (48-1 ku 34 nòkout), pa trata di gana e korona di AMB pa di tres biaha kontra e kampion di peso máksimo mas haltu i pisá di historia.
Lo ta e di dos enkuentro entre nan dos, ku a topa na dezèmber 2005 tambe na Berlin. E pelea ei a kaba ku un desishon diskutí ku a favoresé Valuev. E desishon a ser protestá pa e 10 mil fanátikonan ku a mira Ruiz gana.
“Nos a bini bèk Berlin pa nos logra loke nan a hòrta nos”, Ruiz a bisa den konferensha di prensa.
Ruiz, notorio pa su estilo straño poko popular, a primintí e fanátikonan ku nan lo mira un pelea diferente.
“E no ta bai hañami a bia aki”, el a trese dilanti. “M’a bini pa bringa”.
Su konsehero Toni Cardenale a presentá e treiner nobo di e bòksdó, Manuel Siaca jr., kende a trein 27 bòksdó kendenan a gana títulonan i a primintí ku Ruiz lo ta e di 28.
“Nos no ta aki pa e plaka”, Cardenale a bisa. “Nos ta aki pa gana un pelea. Esaki ta e pelea di su bida”.
Valuev di 35 aña i Ruiz di 36, e dos promé retadornan di e lista di AMB, a haña un pelea pa e título, despues ku AMB a deklará Ruslan Chagaev komo “kampion den reseso” debí ku el a sufri un leshon na su hilchi ku a obligué suspendé su pelea di revancha ku Valuev.

We are in a mood of competition. In 1952 the California coast was blanketed in fog the fourth of July morning. Twenty one miles to the west, on Catalina island, Florence Chadwick, a thirty four year old long distance swimmer, waded into the water and began swimming toward California. She had already conquered the English Channel, swimming both directions. Now she was determined to be the first woman to swim the Catalina Channel.
Millions of people were watching on television. As the hours ticked off, Chadwick fought bone chilling cold, dense fog, and sharks. Several times, sharks had to be driven away with rifles. Fatigue never set in, but the icy waters numbed Chadwick to the point of desperation. Straining to make out the shore through her swimmer’s goggles, she could only see dense fog. She knew she could not go on. Although not a quitter, Chadwick shouted to her trainer and her mother in the boat and asked to be taken out of the water. They urged her not to give up, but when she looked toward the California coast, all she could see was thick fog.
So after fifteen hours and fifty five minutes of fighting the elements, she was hauled out of the water into the boat. Frozen to the bone and her spirit defeated, Chadwick was devastated when she discovered she was only a half mile from the California coast! She felt the shock of failure. The fog had done it. “Look I am not excusing myself”, she told a reporter, “but if I could have seen land, I know I could have made it”.
She had been licked, not by fatigue or even by the cold. The fog alone had defeated her because it had obscured her goal. It had blinded her reason, her eyes, and most of all her heart!

WILLEMSTAD – Ayera tabata un dia históriko pa Sentro pa Guia Edukashonal ku firmamentu di nan promé CAO. Pa tal motibu a selebrá e memorabel dia aki i vários tabata esnan presente.
Sentro pa Guia Edukashonal a ser fundá komo fundashon di Gobièrnu na aña 2000 ku e meta pa duna guia i sosten na edukashon di nos muchanan i hóbennan na Kòrsou.
E firmamentu di ayera a tuma lugá den un ambiente festivo. Riba e foto por mira momentu di e firmamentu. Un pabien di parti di LA PRENSA na tur e empleadonan ku e logro importante aki.

WILLEMSTAD - Luna di sèptèmber ta luna tradishonalmente luna di limpiesa. Meskos ku aña anterior, Selikor lo intensifiká su trabounan di limpiesa.
Tema di e aña aki ta Redusí, Reusá i Resiklá. Durante e konferensha di prensa ayera dirigí pa Selikor i Kòrsou Limpi Bunita a introdusí e logo nobo.
Un otro aspekto ta, ku a keda disidí ku supermerkadonan lo no parti saku di plèstik mas entrante luna di òktober. Tur kliente mester bin ku na mes saku òf kumpra un duradero.
Despues di vários reunion entre Suveko i Selikor a disidí pa tuma e medida aki pa asina protehá nos medio ambiente.
Den e luna aki di limpiesa, sèptèmber ya kaba lo kuminsá bende e asina yamá sakunan duradero, pues ku por keda usa na vários okashon i ni mester wòrdu tirá afó. Esaki sigur ta un paso importante pa protehá medio ambiente.
Manera tur hende mes por nota e sakunan di plèstik aki ta bula bai i riba término largu ta daña suela i laman i ta forma peliger pa bestianan i piská. Plèstik ta sumamente difísil pa deshasí di dje.
Den luna di sèptèmber, luna di limpiesa, lo bai tin tambe vários proyekto manera kompetensia di glas, unda skolnan ta spar glas. Ta bai tin limpiesa den bario.
Lo bin un kampaña di informashon pa tene henter pueblo al tantu di e último desaroyonan relashoná ku luna di limpiesa.

WILLEMSTAD – E Asosashon di Gruponan di Karnaval Kòrsou (AGKK) a tuma nota di e último desaroyonan i desishonnan ku Gobièrnu a tuma relashoná ku Karnaval di Kòrsou i pa tal motibu ta kere ku ta nesesario pa yama un reunion urgente pa atendé ku vários tópiko.
Pa tal motibu AGKK ta invitá tur e lidernan tantu di gruponan hubenil, tiner i grupo grandi pa ta presente mañan djadumingu 31 di ougùstùs na SSK (sala di reunion) pa 7or di anochi pa e reunion urgente i di sumo importansia aki.
E reunion aki lo ta pa duna miembronan splikashon di e forma ku Gobièrnu ta tratando ku Karnaval i lidernan di grupo. Awor tin e asuntu ku ruta i tur e kosnan mas ku kier hasi kontra di Karnaval.
P’esei, AGKK ta urgí tur lider pa ta presente mañan na e reunion importante aki pa keda na altura di e último desaroyonan.

ORTELA
Felix (repentino)
Mihó konosí komo Keetji
A laga atras su yunan Mildred Koenraad, Filomena Lopez, Irene Hermalina, Glenda Ortela, Ana Chantalou, Felix, Robert, Patrick, Margareth, Levy, Caresse, Clifford Ortela tur ku nan yunan. Akto di entiero ta djamars 2 di sèptèmber for di El Señorial pa santana Veeris. Bishita 1or-4or.

MARTINA
Charles Feliciano (repentino)
Mihó konosí komo Pa Chachi
A laga atras su kasá Swinda Martina-Leito, yunan Angelo, Gregory, Natalie Martina, Charinda i Rodney Bourne-Martina tur ku nan famia, ñetunan Savita, Tanisha i Sunita Martina, ruman Hiriberto Martina. Akto di entiero ta djadumingu 31 di ougùstùs for di Bottelier pa santana Hòfi Bottelier. Bishita 9or. Promé ku entiero tin un s.s. di misa 11or.

DE LA MERCED-PURIËL
Myrna Pelagia
Mihó konosí komo Meris òf Ma Mina
A laga atras su kasá Oscar de la Merced, yunan Shahaira i Toy Felomina, Shurman de la Merced, Shamrila de la Merced i Richard Karmelia, Shannon i Amirel de la Merced-Gerard, yu di kriansa Marilyn Seferina. Akto di entiero ta djaluna 1 sèptèmber for di misa Steenrijk pa santana Pietermaai. Bishita 1or. Promé ku entiero tin un s.s. di misa 3.30or.

VAN THIJS
Wilfred Adolfo Florentino
Mihó konosí komo Freddy ku tabta traha na Palais Royal
A laga atras su kasá Ida van Thijs-Isenia, yunan Ingrid van Thijs i Edsel merced, Alida van Thijs, Henrich i Milouschca van Thijs-Margarita, ñetunan Ingemar Brion, Connor van Thijs, Shawná van Thijs. Akto di entiero ta djadumingu 31 ougùstùs for di El Tributo pa santana Gr. Kwartier. Bishita 12or i 4or tin un respòns.

ZURICH, SUISSA, - Ayera na Zurich, Suissa, tabatin e kompetensia AF Golden League ku tabata hiba di nòmber Weltklasse Zurich.
Den e kompetensia aki tabatin un kareda di 100m ku partisipashon di vários atleta ku a kompetí na Weganan Olímpiko na Beijing, China.
Esaki ta un kompetensia di e mihó atletanan na mundu.
Tabatin tres kareda riba 100m. No tabatin un kareda final.
Den e promé kareda riba 100m a partisipá Usian Bolt di Jamaica, Water Dix di Merka, Richard Thompson di Trinidad, Travis Padgett di Merka, Churandy Martina di Antia, Michael Frater di Jamaica, Emmanuel Callander di Trinidad i Marc Burns di Trinidad.
E kareda aki a bai riba nòmber di Usian Bolt ku a marka 9.83 sekònde.
Na di dos lugá a sali Walter Dix ku 9.99 sekònde. Richard Thompson a marka 10.09 sekònde, Travis Padgett di Merka a marka 10.11 i Churandy Martina a marka 10.13 sekònde.
Tabatin dos kareda mas. Unu a keda ganá pa Mario Forsythe di Jamaica ku tempu di 10.36 i e di tres kareda a ser ganá pa Emmanuel Callander di Trinidad ku tempu di 10.17 sekònde.
Ta un seri di kareda di Golden League ta bai tuma lugá na komienso di luna di sèptèmber awor.
Churandy lo bai kore próksimamente na Inglatera.

WILLEMSTAD – Un hòmber a hinka su pareha mata awe mardugá i despues a trata na kòrta su mes garganta. E kaso a tuma lugá awe mardugá den kareda di 4’or na un kas den Brievengat. E dama Darinka Williams di 23 aña a muri a konsekuensia di e hinkánan ku su pareha a propin’é.
Polis a informá, ku e pareha tabatin un pleitu i ku esaki a sali kompletamente for di man. Durante e pleitu e hòmber F.B. a heridá tantu e wela komo e tio di e dama ku kuchú. E tio tabatin dos hinká, un na su kustia i un na su man. E wela tabatin kòrtá na su man. Polis no por a bisa ta di ki manera e pleitu a kuminsá i kiko a pasa ku e hòmber a kuminsá hinka. Tampoko ta konosí si e hòmber a asesiná e dama promé ku el a heridá e wela i e tio. No ta konosí tampoko si ta un fòrsageo tabatin. Mester a transportá e hòmber ku urgensia pa hòspital, kaminda a oper’é mes ora. Su situashon ta delikado polis a bisa.
Informashonnan ku LA PRENSA a kompilá ta indiká, ku e dama tabata miembro di e grupo di baile Caché. Tambe e lo a yega di partisipá na un elekshon pa Reina di Seú. Williams ta bira e di 12 víktima di violensia e aña akí. E ta e di dos víktima ku ta muri a konsekuensia di heridanan kousá pa kuchú. Dia 9 di mei deskonosínan a hinka e hòmber Melvin Kopra (42) mata den e bario Marchena.

WILLEMSTAD – Servisio pa Komunikashon i Informashon ta partisipá, ku den kuadro di yudansa na víktimanan di warwarú i áwaserunan pisá di fin di siman último, tin mester di personanan komo boluntario ku por yuda hasi trabounan di limpiesa di bario i kas i tambe di reparashon di kas.
Relashoná ku esaki Servisio pa Trabou i Entrada, enkargá ku guia di e “Tim di Yudansa na Víktimanan di Warwarú”, ta hasi petishon i apelashon na personanan komo boluntario ku fishi di: karpinté, mètsla, elèktrishèn, pipefitter i tambe personanan ku por yuda karga i transportá kos, pa yama òf pasa registrá na Krus Kòrá Suffisant.
Pa mas informashon i pa registrá, por yama parti mainta entre 8’or pa 12’or na Krus Kòrá Parera via e number di telefòn 461-4630. Mèrdia por yama di 2’or pa 5’or na Krus Kòrá Suffisant na number 869-1026. Tambe por pasa registrá personalmente awe nochi entre 8’or pa 10’or na pòst di Krus Kòrá Suffisant.
Servisio pa Trabou i Entrada, na nòmber di Gobièrnu di Kòrsou, ta yama di antemano danki na tur boluntario ku a i lo duna un man di yudansa na nos rumannan den nesesidat.

WILLEMSTAD – Archivo Nashonal ke partisipá na tur usuarionan di fuentenan di nos historia ku ta wardá na Archivo Nashonal:
Den kuadro di trabounan di restorashon di e edifisio Bolo di Batrei i konstrukshon di e depósito nobo di archivo, Archivo Nashonal ta informá, ku konsulta di dokumentunan original lo ta limitá entrante 1 di sèptèmber próksimo. Servisio di sala di estudio ta sigui den Scharlooweg 75, edifisio Arends.
“Nos ta pidi pueblo en general pa por fabor tene kuenta i komprenshon pa ku e situashon aki. Esaki ta un temporada transitorio pa despues por duna un servisio mas optimal.”

WILLEMSTAD – Djadumingu dia 31 di ougùstùs for di 9or di mainta te 4or di atardi na Landhuis Sta. Martha, Fundashon Tayer Sosial Sta. Martha huntu ku Girobank ta organisá un dia habrí kultural. Meta di e dia aki ta pa Girobank yega mas serka di su klientenan na Bándabou i alabes duna honor na nos patrimonionan kultural. Riba e dia spesial aki tin oportunidat pa habri kuenta di Òinki, SAM, kuenta koriente, petishon di credit card i tur otro servisio bankario. Ademas señor Garcia tambe lo duna algun seshon di kon manehá bo finansa di kas mas mihó.
Demostrashon di limpiamentu di kadushi, korementu den Nanzi i kitoki. Tin diferente presentashon kultural manera grupo Karabela, kai òrgel, grupo Konchemba i gruponan di baile folklóriko. Ta bai ta un dia dushi kaminda famia kompleto por bin pasa dushi ku Fundashon Tayer Sosial Sta. Martha i Girobank. Pa muchanan lo tin pintamentu di kara, bouncer, hotdog, suikerspin i popcorn. Pòpchi Solly tambe ta bai t’ei. Di 10or pa 11or i di 2or pa 3or tin demostrashon di hala lechi di baka, por keiru den kitoki i disfrutá di e hòfi.
Ta bai tin diferente stènt di kos dushi, grill, kuminda krioyo, tas, obra di man, mashin di LVV, mara lensu, cd, sòpi . Un total di mas ku 30 stènt. Pa nos grandinan tin dominó i por pasa na tur departamentu di FTS i apresiá nan demostrashonnan di kurti kueru i artíkulo di e kueru. Trahamentu di pòpchi di klei, flèktu i hopi mas.

WASHINGTON, Merka, - E kantante merikano Michael Jackson a afirmá ku el a pasa su 50 kumpleaño trankil i a primintí ku e lo saka un álbùm nobo.
E “Rei di Pòp” den un entrevista ku e kadena merikano ABC a señalá ku alkansando mei siglo e ta sinti su mes “hopi sabí i huisioso, pero n’e mesun momentu e ta sinti su mes hopi hóben”.
Ora a puntr’é kon el a selebrá su mei siglo, Jackson a detayá: “Ku un bolo chikitu den kompania di mi yunan (Paris Catherine, di 9 aña i Prince Michael II, di 5 aña) i nos a sinta wak algun ‘cartoon’.
“Mi ta disfrutando hopi di ta ku mi yunan. Mi ta siña nan kore baiskel i lesa buki, i tur esaki mi ta gusta”, e kantante a apuntá.
“Mi ta sinti mi emoshoná ora mi mira ku nan ta pasando momentunan maravioso”, e Rei di Pòp a añadí.
“Ora mi mira ku nan ta sinti nan mes felis den un paseo, mi ta mira nan ta grita. I pasobra nan ta felis, esaki ta emoshoná mi, pasobra mi ta mira ku nan ta pasando hopi bon!”, e artista a konfesá.
Apesar ku ainda e no a presisá fechanan, e intérprete di “Thriller” a revelá ku pronto e lo lansa su produkshon musikal nobo.
“Ainda mi por hasi mas kos!”, Jackson a sigurá.
Nasé 29 di ougùstùs 1958 na Gary (Indiana, Merka), e di shete yu di 9 ruman, Jackson tabata kasá dos bia, ku entre otro yu muhé di Elvis Presley, Lisa Marie.

WILLEMSTAD - En realidat no ta na benefisio di niun hende, si desentralisá Departamentu di Meteorologia di Antia. E ta nifiká básikamente un desperdisio di medio finansiero i di kapital humano.
Un departamentu asin’aki desentralisá, ta nifiká ku mester di mas hende ku e ekspertisio nesesario i mester di mas fondo pa e diferente dependensha di meteorologia insular. Konkretamente, e ta nifiká ku kada pais mester bai pone 3.2 riba mesa, si e ke su mes organisashon meteorológiko.
E mensahe aki direktor di Departamentu Meteorológiko Albert Martis a duna parlamentu di Antia e siman aki, durante un presentashon ekstenso di mas ku un ora ku ela tene.
E reunion a tuma lugá riba petishon di e parlamentario Glenn Liqui Lung (di profeshon meteorólogo) di frakshon di PAR. E tema tabata, kon mester bira Departamentu di Meteorologia unabes desmantelá e pais ku yama Antia.
Meteo ta eksistí kasi 100 aña kaba. Martis a duna Staten un splikashon amplio di tur e tareanan ku ta responsabilidat di e departamentu aki.
Tirando un bista den futuro, el a bisa ku Meteo ya a formulá su “position paper” pa gobièrnu for di aña pasá, kon e ta weta e struktura nobo.
Punto di salida ta, ku Meteo ta proponé pa e entidatnan nobo sigui traha huntu pero kaminda ta tene kuenta si, ku e aspekto di gastu, segun Albert Martis.
Un kos tambe masha importante ku mester tene kuenta kuné, ta e asuntu di miembresia internashonal. Si bo no ta miembro mas, tin hopi servisio ku awor aki komo Mete bo ta duna, pero den futuro bo no por duna mas, el a atvertí.

WILLEMSTAD - Wes komisario ayera tardi a prolongá detenshon di tantu Tio Felipe komo Andres Everitz, ku 8 dia mas. Ku esaki, e kaso awor a haña un buèlta mas serio. Ta akusá tur dos shofùr di tabata enbolbí den manifestashonnan violento ku a tuma lugá den e anochi di 26 di yüni último.
Mester bisa ku anteriormente a detené Tio Felipe kaba, sospechá di e mesun kos, pero a lag’é bai despues. E desaroyonan aki a okashoná basta tenshon den seno di shofùrnan di bùs, ku ke sali awor na protekshon di nan kompañeronan.
E sindikato di shofùrnan di bùs STU, Sindikato Transporte Uní entretantu a pone tur kos den man di su abogado. Próksimamente, direktiva di STU lo tende kiko lo bira e siguiente paso, asina Giovanni de Caster, miembro di direktiva di STU ku ta fungiendo ku e bosero awor aki a revelá.
E sindikato a reuní na dos okashon kaba ku su miembronan, entre otro na Koredó pa trata di kalma tur hende. E miembronan tabata kla pa bai akshon pa sali na defensa di e dos shofùrnan di bùs detené e siman aki.
Polis a arestá tantu Tio Felipe komo Andres Everitz, bou di sospecho di tabata enbolbí den e disturbionan ku a tuma lugá e anochi di reunion di Konseho Insular dia 26 di yüni, disturbionan ku a tuma lugá den Nieuwestraat kaminda a heridá e hóben Carlos Morerno seriamente na altura di Café De Nachtwacht i a kousa vários destrukshon.

WILLEMSTAD - Frakshon di MAN no ta komprondé pakiko tin tantu beheit rondó di e dokumentonan relashoná ku investigashon den awanan teritorial di Antia pa weta si tin gas i òf petroli.
Nos no ta weta nada konfidensial den e dokumentonan aki, asina ingeniero Dwigno Puriel a deklará, despues di a tuma nota di e kontenido.
Manera LA PRENSA a informá den su edishon di ayera, tabatin bastante diskushon, mas bien riba nivel emoshonal den Staten riba e asuntu aki djaweps último.
Parlamentu antiano finalmente a reuní pa gobièrnu por duna Staten informashon riba último desaroyonan rondó di e investigashon pa weta si tin gas òf petroli den nos awanan teritorial.
Staten, dos siman pasa a disidí di posponé e reunion ku mester a tuma lugá pa diskutí e desaroyo aki.
E motibu ta e hecho ku Staten e tempu ei no a tuma nota ainda di e rapòrt ku profèsòr Simon Mitchell a traha riba e investigashon di University of Texas riba posibel presensia di gas i petroli den nos awanan.
Despues di e trabou di University of Texas a keda kla, a aserká e eksperto di Jamaica profesor Simon Mitchell ku a hasi un análisis di e investigashon di University of Texas. Gobiernu entretantu a pidi i haña un memorandum ku e eksperto lokal riba asuntunan petrolero Clarck Gomez Casseres a traha riba e investigashonnan.
Durante e reunion públiko di djaweps último di parlamentu, frakshon di MAN tabatin masha problema ku esaki, pasobra segun e frakshon, el a konstatá un diskrepansia den loke Gomes Casseres ta bisa den su nota i loke profèsòr Mitchell a konstatá. E parti ferfelu ta, segun tur dos a trese dilanti, ku bo no por papia riba e diskrepansha aki públikamente, pasobra ta trata aki di informashon ku segun gobièrnu ta konfidensial.

WILLEMSTAD - E gobièrnu aki no ta bai sigui sinta despues ku su 4 añanan di gobernashon pasa. Gobièrnu kompleto, inkluso parlamentu di Antia lo bai kas na mart di 2010. Pero si bin elekshon, esei no por ta pa Antia pero pa Pais Kòrsou, asina promé minister di Antia Emily de Jongh-Elhage a pronostiká. Ketu bai tin diskushon si nos ta bai alkansá tur e trabounan ku mester tuma lugá pa desmantelashon di Antia, na tempu.
Na desèmber awor tin un konferensha di mesa rondó den kua ta evaluá e trabounan ku a tuma lugá te ku awor I si mester adaptá e strategia di traha.
Nos ta trahando masha duru pa alkansá e metanan ku nos a pone nos dilanti, asina e promé minister antiano a sigurá.
Na fin di sèptèmber awor, lo tin den e mesun kuadro aki otro konsulta polítiko aki na Kòrsou.
Dia 26 di mart 2010, lo ta nèt 4 aña ku e gobièrnu aki ta sintando. Di akuerdo ku lei, mester bin elekshon nobo. Pero e elekshon aki no por ta pa Staten. Si bin elekshon mes, esaki solamente lo por ta pa pais Kòrsou.
Manera ta konosí, frakshon di partido MAN den pasado resien a indiká un pensamentu den mesun direkshon. MAN tabata bou di e impreshon e tempu ei ku gobièrnu no tabata masha inkliná pa trese kambio den e situashon aktual. Lider di MAN Charles Cooper a bisa ku en todo kaso, e situashon no por sigui mesun kos, unabes e kuater añanan pasá. Si no tin elekshon pa Staten, laga e elekshon ta pa Pais Kòrsou anto, Cooper a bisa na e okashon ei. E ekspreshonnan di e promé minister antiano, awor ta bayendo den e mesun direkshon.