WILLEMSTAD – Kasi tur outomobilista ku a haña un klèm di wil serka S.K.S. riba e kaminda dilanti di The Movies i F.K.P., por bai reklamá e plaka ku nan a paga pa kita e klèm. S.K.S. a pega e klèmnan akí inhustu, ya komo ku for di despues di e zebrapad te na e brùg di Skalo ta pèrmití pa stashoná na man robes. Esaki por konkluí for di loke Ombudsfunctionaris a skibi den su INFO-dosis di awe. Pa algun tempu kaba S.K.S. ta pega klèm di wil na vehíkulonan ku ta stashoná dilanti di The Movies. LA PRENSA na diferente okashon a skibi, ku esaki ta inhustu, pasó na e banda robes di kaminda, for di despues di e zebrapad te na e brùg di Skalo, no tin un bòrchi ku ta prohibí pa stashoná. No opstante e informashon akí di LA PRENSA, S.K.S. a sigui pone klèm di wil, alegando ku ta prohibí pa stashoná na man robes di kaminda. Awe Ombudsfunctionaris ta skibi den su boletin: “De bestuurder mag dus ook links op een parkeerstrook of parkeerhaven stoppen en parkeren.” Tambe e ta skibi: “Parkeren links van de weg, waar zulks gevoeglijk mogelijk is, zou dus door de wegbeheerder moeten worden bevorderd door middel van de aanleg van parkeerstroken e.d.” E frasenan akí ta parti di henter un splikashon di Ombudsfunctionaris ku LA PRENSA no a publiká integral. Ta asina, ku nos lei di tráfiko ta bisa en bèrdat, ku ta prohibí pa stashoná na man robes. Pero e mesun lei ta bisa ku bòrchinan di tráfiko tin preferensia riba reglanan di tráfiko (verkeerstekens gaan boven verkeersregels art. 4 kap. II Verkeerstekens). Na e sitio dilanti di The Movies i F.K.P. tin bòrchi di tráfiko pone na man drechi dilanti di e edifisio di F.K.P. ku ta indiká, ku ta prohibí pa stashoná. E bòrchi akí ta konta solamente pa e banda di kaminda ku e ta poné. Entre e zebrapad dilanti di The Movies i e brùg di Skalo no tin bòrchi ku ta indiká ku ta prohibí pa stashoná, loke outomátikamente ta krea e espasio pa stashoná.
WILLEMSTAD – Karanan sosegá, algun turdí ainda (pasobra fakansi a pasa), karanan ku intenshon firme di traha na bienestar di e mucha, tur tabata presente awe mainta na apertura di aña eskolar nobo. Meskos ku añanan anterior, Direktiva di Skolnan Katóliko (RKCS) a habri su aña eskolar nobo ku su personal. E tema sentral di e aña aki ta “Bienestar di e Mucha”. A enfatisá riba abuso di mucha i algun wega ku por ta masha peligroso pa mucha. Glen Helberg a bin for di Ulanda pa papia riba maltrato i abusu di mucha, miéntras ku DARE a papia tokante algun wega di mucha peligroso. Tambe a hiba palabra Monseñor Luis Secco. Riba e pòtrèt por mira parti di e apertura di awe mainta ku representantenan di Direktiva di Skolnan Katóliko, promé minister Emily de Jongh-Elhage i obispu i Monseñor Luis Secco. Tambe tabata presente diputado interino di Enseñansa Eugène Rhuggenaath ku a remplasá diputado Marilyn Alcalá-Wallé ku ta ku fakansi. Diputado Rhuggenaath tabata sintá na e otro banda di sala. Mañan nos tin mas detaye di e aktividat aki.
Skina di Sorti, awe djaluna 4 di ougùstùs di 2008, ta kuminsá ku deseá un i tur un bon dia. E opservashon kritiko di SOAB, riba e falta di diligensia serka gobernante i kuerponan representativo den atendementu ku kuentanan anual, ta un afirmashon di e deterioro molestioso i peligroso den konosementu, rèspèt i bibamentu di regla, prosedura i kustumber di nos estado di derecho. De “politiek” a krea un ambiente di un klase sosial riba su mes ku gradashon a base di voto optené, puesto okupá i tempu den funshon. **** En bes di e preshon pa sirbi i duna kuenta i rason ante elektorado, bo ta mira mas i mas mal uso di posishon, pa gloria personal i lokual ta mas molestioso ainda un ignoransia grandi pa lokual ta e papel ku polítika tin denter di un estado di derecho. Hopi ta sinti nan mes miembro di un klase sosial ku tin privilegio legal. En bes di kuida i protehá derechonan fundamental, trapamentu di derecho a bira mas regla ku eksepshon. **** Mal uso di imunidat parlamentario pa saka sla kontra di hende, intimidashon di miembro di kuerpo representativo i miembro di prensa pa eskivá dunamentu di kuenta i rason, matamentu di e debate polítiko (entre otro ku e wega eterno di keda sin forma quorum) i faltamentu ku reglanan di bon gobernashon ta mas regla ku eksepshon. **** En bes di un oumento den e sensashon ku nos ta asumí mas responsabilidat i inisiativa pa atendé nos propio asuntunan, e sensashon kontrali di mas dependensia i sometementu na influensia aheno ta gana tereno. Nada di un preshon eterno pa kuida i mantené un identidat propio pero un ansha pa solushon fásil ku ta pone hendenan ku kapasidat pa rasoná ku normalmente ta riba e nivel promedio rekurí na argumentashon ku ta bergonsoso.
WILLEMSTAD - Manera ya ta bon konosí, SOKUDI, e organisashon di pashèntnan diabétiko, ta organisá un par di biaha pa aña un kaminata, pa asina stimulá tur hende pa hasi moveshon i tene kurpa den kondishon i asina tambe kontribuí na bo salú positivamente. Próksimo kaminata ta djarason dia 6 di ougùstùs awor, den naturalesa ku luna yen. E kaminata aki ta tuma lugá den e naturalesa intachabel di Sta. Catharina. Na e okashon aki tambe tin guia profeshonal ku ta kompañá tur kanadó. Pa stimulá moveshon, SOKUDI ta organisá vários tipo di kaminata. Tin kaminata mainta tempran, kaminata den naturalesa i tambe kaminata ku luna yen. E aña aki tabatin un kaminata mainta tempran ku a sali for di koredor ku gran partisipashon di hendenan ku sa kana kaba i a kana nan ruta largu i tambe esnan ku no sa kana, kendenan a kana ruta kòrtiku. Tur esaki ku e “warm up” i “cool” down nesesario bou di guia profeshonal. Pa partisipá ta fásil, djis kumpra bo T-shirt i kla ta. Por kumpra flanèl pa solamente fl. 12,50 ku ta inkluí bo partisipashon, guia profeshonal, bibida i sòpi, na ofisina di SOKUDI, di djaluna te ku djaweps di 8’or di mainta te ku 5’or di atardi, serka miembronan di direktiva, òf tambe serka Henri Filipie (tel: 737-8672 / 562-0159) òf Eduardo Wout (tel: 868-1235 / 560-8458). Kantidat ta limitá, p'esei ta esun ku kompra promé ta bebe awa limpi.
Ku masha interes mi a sigui e relato den fin di siman na BVN, kaminda a trata e problema ku tur hende ku hasi denunsia di kosnan iregular i ilegal ku nan nota den empresa, organisashon i Gobièrnu di Ulanda, ta haña nan mes aden. Esaki maske ku ta stimulá na Ulanda pa hende ku sa di algu ku no por i ku ta kosta kaha di gobièrnu hopi plaka, pa denunsiá esaki. Realidat sinembargo ta, segun deklarashonnan di esnan ku a hinka nan kurpa den problema dor di bisa kiko nan sa; ku na momentu ku nan hasi denunsia, nan tur a haña nan den asina tantu doló di kabes, ku loke nan a hasi ni ta kos di rekomendá. Tur e hende hòmbernan ku a presentá den e relato a bisa ku nan a hasi e denunsia di froude i iregularidatnan, pasobra nan ke a biba ku nan konsenshi. I tur su denunsia a resultá tambe den gobièrnu kobra mas plaka di belasting ku lo e no a haña, si e iregularidat a kontinuá. Loke a bin dilanti tambe den e relato ta, ku na Ulanda no tin sufisiente protekshon pa loke nan mes ta yamá ’klokkenluiders’, batidó di bèl pa alertá ku tin kos ta pasando ku no por mira lus di dia. A konkluí, ku e aktual areglonan pa protehá un hende ku bin dilanti i bisa loke e sa ku ta iregular, no ta funshonando. Ta bèrdat ku tin parlamentario ulandes ku a hasi pregunta na Gobièrnu Ulandes pa haña sa dikon no ta atend’é e asuntu di alertamentu mihó. Dikon no ta protehá esun ku ta alertá. Te asta tin na Ulanda un konsepto di lei pa protehá e siudadano konsiente ku denunsiá loke e ta opservá i eksperensiá komo iregular.
WILLEMSTAD – Un total di 24 kasamentu lo tuma lugá djabièrnè awor 8 di ougùstùs 2008. E aña aki tin un kantidat rèkòrt di kasamentu ku lo tuma lugá den kua funshonarionan sivil mester lo tin enkargá pa e akto sivil aki tantu den edifisio di Registro Sivil (Kranshi) komo pafó di esaki. Den kombersashon ku direktor di Registro Sivil Harold Daal ta konfirmá, ku 24 pareha lo kasa na sivil djabièrnè awor. Esaki ta un fecha den ku hopi a enfoká pa nan drenta enlase matrimonial. E fecha aki ta 8 di dia, 8 di luna i aña 2008, ku ta skohe un bon fecha memorabel pa un desishon ku lo duna fruta. Di e 24 matrimonio lo tin 15 ku lo kasa pafó di Kranchi i 9 lo ta paden di Kranshi. Importante riba e fecha aki lo ta, ku riba e promé pareha lo keda kasá pa e funshonario Sebastiana ku riba e fecha aki lo kumpli su 50 aniversario di bida. E seremonianan na Kranshi lo ta for di 8or di mainta, miéntras ku e último lo ta 7’or di anochi.
WILLEMSTAD – “Gobièrnu mester analisá tur skol privá, ya ku tin mas skolnan ku tin kosnan ku no ta funshonando manera mester ta. Mester investigá ku skolnan privá ta kumpli ku eksigensianan ku tur instituto di formashon mester por kumpli pa garantisá kalidat pa alumnonan”. Esaki ta deklarashon di presidente di Sitek, Bicho Justiana den kombersashon formulá pa LA PRENSA awe mainta. Justiana ta splika, ku e problemátiko di Omega College tambe ta mará na e opinion di Sitek ku ta mustra, ku mester analisá skolnan privá spesialmente ora nan ta pidi rekonosementu, pa evitá ku esaki tin un konsekuensia negativo pa e studiantenan. Justiana ta revelá, ku tin dos punto importante ku Sitek ke mustra riba dje ta, ku te ainda no ta konosí e kontenido di e problemátiko aki i ku na di dos lugá ku ta e propio mayornan ta responsabel pa nan yunan. E asuntu ku sifranan ta mustra ku e alumnonan no a slag konforme e standartnan di edukashon, ta Omega College mester kana e kaminda pa mustra ku nan a keda atendé inhustamente. Di e forma aki Omega College mester demostrá, ku e sifranan di eksamen ta semehante na e loke gobièrnu tin stipulá. Sitek ta kontentu ku mayornan ta luchando pa tin futuro sigurá, pero final di kuenta mester bin reevaluashon pa pone kondishonnan den kua Omega College mester funshoná i no kita pèrmit sin mas. Pa Sitek, pa gobièrnu mester ta importante, pa analisá no e skol ei so, pero tur skol privá, ya ku tin mas skol ku no ta kumpli ku eksigensianan stipulá di standart edukativo.
WILLEMSTAD – Djasabra último Girobank a selebrá manera ta un tradishon riba tur último djasabra di fakansi ku tur e muchanan ku tin un kuenta di spar di Òinki na e banko. E aña aki selebrashon di Òinki tabatin e tema di deporte i for di 10or di mainta te ku 4or di atardi e muchanan por a praktiká mas ku 20 diferente deporte na Stadion Ergilio Hato (SDK). Un konklushon tin ku "Weganan di Òinki" tabata un bunita i impreshonante. Mas ku 3000 mucha a haña kaminda di SDK pa “Weganan di Òinki”. "Weganan di Òinki" ta inspirá riba e echo, ku luna di ougùstùs e aña aki ta luna di weganan olímpiko. Girobank a transformá SDK ku tur su fasilidatnan den un paraiso di deporte, un paraiso di Òinki. Girobank a sòru pa un dekorashon masha bunita mes di e kompleho di SDK. Míles di bandera, banderin i blas a duna e mas ku 20 tèntnan rònt SDK un toke úniko. Tabatin un Òinki grandi di 5 meter tambe ku tabata impreshonante. For di na entrada muchanan a keda yamá bon bini pa hostessnan masha bunita mes bistí na trahe típiko di China. Direktor di Girobank señor Eric Garcia a bisa ku e fiesta aki na promé lugá ta pa pone den lus e poder di spar. "Kada un biaha ku tin un aktividat di Òinki, e mucha ta pasa dushi. E mesun sentido dushi aki nos ke pa e muchanan asosiá ku sparmentu. Anto ta p’esei tur aña di nobo nos tin un selebrashon di Òinki: pa e mucha por eksperensiá ki dushi ta pa spar".
VICTORIA Francisco Salomon Mihó konosí komo Momon pegadó di mosaiko A laga atras su yunan Eric Victoria i Gladys Rodriguez, Mariana i Urny Florán-Victoria, Herbert Victoria, Stephen Dunlock, Carol Dunlock, Paul Ignacio. Akto di entiero ta djarason 6 di ougùstùs 11or for di misa Janwe pa santana Janwe. Bishita 9or-10.30or. 10.30or tin un s.s. di misa.
RAPHAËL Milva Bernadette (repentino) Mihó konosí komo Milva di Bus 244 A laga atras su yunan Marlon i Shirima Raphaël-Francisca, Dick Raylon i Angelina Raphaël, Marfaline Raphaël i Uristen Acosta Raylon Raphaël, Mayfaeline Raphaël i Jutsella Bilioso Taylon Raphaël, Maylon Raphaël i Jutsella Bilioso, Taylon Raphaël, Merfeline Raphaël i Eric Valentijn. Akto di entiero ta djarason 6 di ougùstùs for di misa Buena Vista pa santana Sta. Maria. Bishita 1or i 4or tin un s.s. di misa.
HENRIQUEZ Willem Augusto Mihó konosí komo Weis di Esquina Boca dushi òf Weis Barbero A laga atras su kasá Crisia Henriquez- Balentina, yunan William Henriquez, Jose i Sulaica Henriquez-Rojer, Maximiliano i Sharline Henriquez-Isenia, ñetu Dunai Henriquez, bisañetu Dario Kirindongo, rumannan Ruby Henriquez, Henry Henriquez. Akto di entiero ta wòrdu anunsiá despues.
WELHOUS Hubert Romualdo A laga atras su yunan Mayra Welhous, Jeanine Lipman-welhous, Leana Welhous i nan mama Elsa Quandus, rumannan Swinda Welhous, Ada Sprock. Akto di entiero ta djarason 6 ougùstùs, for di El Consolador pa santana Berg Altena. Bishita 1or den sala Crystal. Promé ku entiero tin un s.s. di misa na misa Steenrijk 4or.
Lorito ta yama tur hende un felis djaluna. Kòrda ku Lorito ta bisa un djis ta djaluna, un djis ta otro djaluna. Bo por imaginábu ku ya kaba nos a pone 7 luna nos tras. ********* E siman aki tin un espektativa dushi, komo ku djis aki Weganan Olímpiko ta kuminsá. Ounke Lorito ya kaba a mira un ñapa di loke ta spera nos djabièrnè awor, nos ta pendiente pa sa kon e shou kompleto lo ta. Ta parse ku China lo bai duna nos un trit global i oriental kompleto. Ban wak si e asuntu di libertat pa move i ekspresá lo no resultá un opstákulo grandi. ********* Na Ulanda por ehèmpel tin krítika, ku despues ku tabatin tantu diskushon riba Tibèt, Ulanda a yega ku su delegashon sin masha remarke. Niun pia di palabra riba e opreshon chines na Tibèt. Otro mandatarionan ku a bisa ku nan lo no ta presente pa motibu di e situashon na Tibèt, lo t’ei manera un bolo, manera presidentenan di Merka i Fransia. Esei ta un konfirmashon mas ku tin biaha tin polítiko ku dos lenga. ********* Siman a habri i hopi punto di siman pasá ta ketu bai pendiente. Un di nan ta por ehèmpel e situashon na Curoil ku sigur ketu bai ta di atenshon. Miéntras tantu ku tin masha poko atenshon pa e tema, mester keda riba dje, pasobra mester sa ta ken ta bai hasi investigashon. Nos a atvertí kaba ku no por hasi eror den eror. Nos ta pendiente pa sa si ta kualke kompania lokal òf internashonal ta bai hasi e investigashon (nan), si a tene destaho promé ku a duna nan e enkargo. E asuntu di “very good friend(s)” den destahonan tambe mester kaba!
WILLEMSTAD – E kompania di e eks funshonario tòp di e Sentro di Transakshon Inusual (MOT) Benno van Leeuwen i su kompania, lo investigá e kaso na Curoil. E i su kompania mester raportá riba término kòrtiku. Van Leeuwen no kier a duna komentario awe mainta na LA PRENSA riba e enkargo ku su kompania Forensic Services Caribbean a haña den e kaso aki. El a bisa, ku e ta den un reunion i e no por a kontestá nos preguntanan na e momentu ei. LA PRENSA a komprondé sinembargo, ku no tin nada ta stroba e kompania pa haña e enkargo. Es mas, otro kompanianan di konsultant no ta bin na remarke, pasobra si nan haña e enkargo mes, nan lo mester buska personal spesialisá riba e tereno aki. Ta bin aserka, ku presidente komisario di Curoil Earl Balborda den bida diario, ta traha na un di e kompanianan di konsultant aki ku ta (PriceWaterhouseCoopers) i kier evitá a todo kosto ku e mesun sektor lo haña e enkargo pa no krea e impreshon di falta di independensia den e investigashon. LA PRENSA a bai wak riba e wepsait di e kompania Forensic Services Caribbean i nos en bèrdat a topa ku foto di Van Leeuwen komo un di e sosionan importante di e kompania. Te algun tempu pasá, Van Leeuwen tabata direktor interino di MOT. Den pasado Van Leeuwen a traha tambe na Banko Sentral di Antia. Na Ulanda el a traha na polis na Politie Haaglanden. Huntu kuné tin diferente eksperto mas den investigashon forénsiko i kriminal ku ta traha na e entidat. E wepsiat ta menshoná, ku e kompania ta establesé na Kòrsou for di 1998. Te yüli 2005 e kompania tabata un supsidiario di Ernst & Young Nederlandse Antillen & Aruba, pero despues a independisá e kompania. Ta konsiderá, ku e kompania tin ekspertisio amplio riba e tereno aki i lo ta den posibilidat no solamente pa detektá kiko a pasa den e transakshonnan na Curoil, pero tambe pa wak kon e korientenan di plaka a kore den e kaso aki. Ademas nan por detektá tambe si tin kasonan similar a i ta tumando lugá na e kompania Curoil.
WILLEMSTAD – E asesinato di un pareha ingles na Antigua/Barbuda ta un mal propaganda pa henter Karibe. Esei ta loke ekspertonan di turismo den Karibe e koinsidí awe, despues ku e hòmber di e pareha tambe a muri den fin di siman. E dama a muri anteriormente siman pasá durante loke ta pasa un atrako ku a tuma lugá na Antigua. E hòmber ku nan a hiba Gran Bretaña a muri djasabra último. Lo dera e pareha huntu den un servisio di despedida ku lo tuma lugá na e mesun misa kaminda nan a kasa tres siman pasá. E mesun hendenan ku tabata na nan kasamentu tres siman pasá, awor lo regresá e mesun misa pa atendé nan entiero. Dr. Catherine Mullany, un médiko i su kasá Benjamin Mullany ku ta birando un siko-terapista, a muri durante di un atrako ku a tuma lugá den nan bùngalo di luna di miel na Antigua. Nan tur dos ta di e parti sùit di Wales na Gran Bretaña. Polis a detené un rastafari di Antigua, relashoná ku e kaso aki. Polis a bisa, ku e ta sospechoso prinsipal den e kaso, ounke amigu i famianan ta bisa ku no por ta. Scotland Yard a manda un delegashon spesial Antigua pa yuda den investigashon di e kaso. E mishon di Soctland Yard a haña un rabu sinembargo pasobra Gran Bretaña no ta rekonosé kastigu di morto. Antigua si tin kastigu di morto den su leinan i ta probabel, ku si haña e sospechoso kulpabel, ku e lo por haña kastigu di morto (ku pal’i horka) na Antigua. Durante di e atrako ku a tuma lugá na Antigua siman pasá, Catherine a haña un herida di bala na su kabes i el a muri mesora. Su kasá a haña un herida di bala tambe na su kabes i a bai den koma. A warda algun dia promé ku a mand’é Gran Bretaña. Djasabra sinembargo dòkternan a konstatá ku no tin chèns mas pa su rekuperashon i nan a stòp e mashinnan di funshoná. Ya na Antigua dòkternan a konstatá ku su chènsnan pa rekuperá ta mínimo i básikamente e tabata klínikamente morto.
WILLEMSTAD – Den fin di siman un empresa di demolishon a yega na e sitio kaminda ántes tabata e fábrika di muebel Nooyen riba Rooseveltweg i a basha loke a sobra di e empresa abou. Den último tempu e edifisio tabata habitá pa drogadiktonan molestoso (chòler). Awe mainta mayoria di nan tabata sintá na e otro banda di kaya ta wak nan dilanti, sin pariba sin pabou. E empresa ku a bati bankrut algun aña pasá, a bai laga e edifisio pa su kuenta. E edifisio tabata den bista di un gran kantidat di hende lokal i bishitante ku ta pasa tur dia ei dilanti. Hasta tabatin menshon ku turistanan tabata saka video di e área aki pa mustra nan disgustu. Algun hende ku nos a papia kuné awe mainta a bisa, ku t’asina aki mester hasi ku tur edifisio ku ta den estado di dekadensia i ku den último añanan a para bira sitionan kaminda aktividatnan ilegal ta tumando lugá. Rònt Kòrsou tin e tipo di edifisionan aki.
WILLEMSTAD – Tin hopi kaso di abuso di mucha skondí ku poko poko ta sali na kla. Un problema nobo ta abuso seksual di hende hòmber kontra muchanan hòmber. Ta p’esei awor ku e fundashon a haña e finansiamentu di AMFO lo bai instalá ofisialmente un Sentro di denunsia di Abuso i Maltrato di Mucha. Asina mr. Louise Reed di e fundashon a splika LA PRENSA. Entrante 1 di ougùstùs lo kuminsá brinda komunidat un servisio strukturá i optimal den kombatimentu di abuso i maltrato ku muchanan ta konfrontá diariamente. “E lucha tabata largu i de bes en kuando desepshonante. Pero e no tabata enbano. Dedikashon i perseveransia a lo largu a vense tur opstákulo”, Reed a deklará.
ta indika ku komunidat tin hopi problema spesial mucha homber
tin ku traha apart riba nos hendena homber
Kinderbeonderhoudsplicht ta keda kore te 21 aña
na sierto momentu ta sali for di nul lijn/ ta kuminsa duna info i hasi hende konsiente
a tuma basta anja pa ahasi esei
bbo ta mitra stijgende lijn
dor ku hende ta mas konsiente nan ta ,meldu mas tantu
WILLEMSTAD/DEN BOSCH – Hustisia i polis ta harma pa próksimo añanan, un ofensiva kontra e mafia di mariwana. Ounke ku na kuminsamentu di e aña akí e presidente di e bònt di polis NPB a boga pa stòp ku tur akshon, pasó tòg no por a gana e guera kontra mariwana, ku lantamentu di un taskforce hustisia ke propiná plantamentu ilegal di mariwana un sla fuerte. E èks presidente di NPA, Hans van Duijn a bisa durante su diskurso di despedida, ku e maneho pa kombatí mariwana a duna komo resultado ‘nul komma nul’, i ku no por gana e guera kontra mariwana. Tambe el a bisa, ku ta kosta polis hopi plaka, tempu i esfuerso, aspektonan ku ta pone ku no por atendé ku krímennan mas pisá. Sinembargo hustisia i polis a disidí, ku no ta tira e sèrbètè den rin, pero ta bin ku e taskforce pa kaba ku e kultivamentu ilegal di mariwana na Ulanda. Fiskal Mayó Gerrit van der Burg a bisa, ku e ta spera ku e kastigunan pa e krímen akí lo oumentá. El a bisa, ku e ta basa su speransa riba e artíkulo ku ta atendé ku mafia, den e kódigo penal di Ulanda. “Si pèrsiguí nan komo miembro òf lider di un organisashon kriminal, e kastigunan ta gai un poko mas pisá kaba. Banda di esei lo kita nan propiedat, esaki semper ta dal duru.”
WILLEMSTAD – Segun CAP, ta notabel ku e aña aki “airlift” (ku ta midi na e kantidat di stulnan den avion ku ta sali for di Kòrsou) a subi ku aproksimadamente 40% kompará ku e aña promé ku apertura di e terminal nobo. Durante e mesun periodo aki aeropuerto a konosé un kresementu similar di 40% den e kantidat di pasahero ku ta yega Kòrsou i esnan ku ta bai for di Kòrsou. E oumento aki a tuma lugá den tur e merkadonan grandi, pero ku un subida signifikativo den e merkado ulandes, di Sur Amérika, di Nòrt Amérika i di Karibe. E kantidat di avionnan ku ta sali for di Kòrsou a subi ku 56%. E tráfiko aéreo di Kòrsou su merkado ta konsistí di e siguiente destinashonnan: 28% pa Amsterdam, 23% pa e islanan ABC, 19% pa Venezuela, 14% pa Nòrt Amérika, 11% pa destinashonnan den Karibe i 5% pa otro destinashonnan den Sur i Sentro Amérika. Apesar ku Amsterdam ainda ta e merkado mas grandi di Kòrsou, kresiendo ku 7% kompará ku e aña anterior, tin otro merkadonan ku ta ekspandiendo kompará ku e aña anterior manera Venezuela ku 176%, Nòrt Amérika ku 15% i Sur i Sentro Amérika ku 33%. Desaroyo di e terminal nobo a inkluí tambe negoshinan nobo i fasilidat di benta di kuminda i bibida nobo pa pasaheronan i tambe pa públiko lokal. Den e terminal bieu e nogoshinan tabata bende aproksimadamente US$. 14.04 pa kada pasahero saliente i den e terminal nobo esaki a subi te na US$. 34.55 pa pasahero. E sifra aki ta representá un subida di 146%. E subida mas drástiko tabata di e negoshinan di kuminda i bibida ku a subi di aproksimadamente US$ 0.13 pa pasahero te na US$. 5.64 pa pasahero den e terminal nobo. E terminal nobo ta ofresé mas surtido i mas espasio pa aktividatnan komersial kompará ku e terminal bieu.
WILLEMSTAD - Fundashon pa nos muchanan ta preparando un tremendo Foodfestival, ku un meta ku pronto lo duna publisidat na dje. Pa por hasi e foodfestival aki kompleto ta buskando personanan ku ta interesá den un stènt pa bende kuminda. Interesadonan por yama pa mas informashon na number di telefòn 520-3050 òf 868-2072 puntra pa sra. Daralice. Tin oportunidat pa inskribí te mas tarda djarason awor 6 di ougùstùs. Naturalmente tin un límite di stènt ku ta tuma pues esun ku yega promé ta bebe awa limpi.
WILLEMSTAD -- Curaçao Airport Partners (CAP) a kontribuí ku kasi 40 mion florin den kaha di gobièrnu di Kòrsou te awor. Asina e kompania ta bisa relashoná ku progreso i desaroyo di Aeropuerto Hato despues di e di dos aniversario di apertura di e terminal nobo ku a risibí e promé pasahero dia 31 di yüli 2006. Dia promé di ougùstùs último tabata e di 5 aniversario ku CAP a tuma e operashon i desaroyo di aeropuerto. Direktor di CAP, Walter Abernathy ta bisa, ku durante e periodo di 5 aña aki CAP a desaroyá aeropuerto invertiendo mas ku 100 mion florin pa traha un terminal nobo ku ta efisiente i ku tin kapasidat pa ekspandé den futuro i den renobashon di e edifisio di e terminal bieu. “Tambe nos a paga Curaçao Airport Holding N.V. 39.7 mion florin na pago di konseshon i otro pagonan. Promé ku CAP a tuma e operashon di aeropuerto over, Curinta tabata eksperenshando problemanan finansiero di défisit i Gobièrnu no tabata risibí pago manera ta e kaso awor. CAP a trese un kambio den e situashon finansiero aki pa Gobièrnu di Kòrsou i a la bes a alsa aeropuerto riba nivel di stándartnan internashonal i tambe a aportá na e oumentá supstansial di tráfiko aéreo”, asina Abernathy a bisa. CAP a anunsiá tambe un seri di mehorashonnan ku a wòrdu hasí /òf ta na kaminda pa wòrdu hasí entre otro: • Pone mosaiko den tur tualèt • Protekshon kontra di áwaseru kaminda ta eksperensiá problema den e terminal
BEJING – Un kantidat di 20 manifestante molestiá pa motibu ku nan a wòrdu saká for di nan kas den sentro di Beijing, a realisá e protesta serka di Plasa Tiananmen. Nan ta alegá, ku nan derechinan a wòrdu violá na nòmber di Weganan Olímpiko. Polis a yega rápidamente na e sitio i a pone un kordón rònt di e manifestantenan. E agensia di prensa AP a mustra imágennan di e manifestantenan ku tabata grita ku nan a wòrdu saká for di nan kas i nan no a risibí kompensashon apropiá. No tabatin intervenshon ofisial, pero muhénan ku a identifiká nan mes komo miembro di e komishon di bario a pusha e manifestantenan i a saka nan for di e zona. E komishonnan di bario no ta forma parti ofisial di gobièrnu, pero ta traha huntu ku polis i otro agensianan. E manifestantenan ta alegá ku nan a wòrdu ekspulsá for di nan kasnan pa rekonstruí e zona. E área di rekonstrukshon lo wòrdu kombertí den un paseo ku negoshinan manera Nike, Starbuck i Rolex. Manifestashonnan den sentro di Beijing ta hopi raro i normalmente polis ta hasi detenshon mesora. China no ke ningun tipo di protesta durante Weganan Olímpiko i tin agentenan di seguridat den henter e suidat. No ta konosí unda e manifestantenan a wòrdu hibá òf si nan a wòrdu detené. Un bosero polisial no tabatin kontesta riba e preguntanan aki. “Nos no ta oponé e Weganan Olímpiko pero no mester destruí nos kasnan tampoko,” asina un manifestante a bisa. “E desaroyadónan no mester usa e weganan pa kende ku nos kasnan. Nos mester defendé nos kas i nos no por keda sin defendé nos derechinan djis pa Olimpiada.”
Minister Plasterk: Minister Leeflang ta bruha konseptonan den otro
WILLEMSTAD – “Minister Omayra Leeflang ta bruha konseptonan den otro. Un matrimonio di hendenan di e mesun sekso ta un matrimonio serio”, asina minister di emansipashon di Ulanda, Ronald Plasterk a bisa relashoná ku komentarionan di su kolega antiano. Minister Plasterk tabata un di e karanan konosí di gabinete ulandes durante Gay Pride 2008 ku tabatin djasabra na Amsterdam. Den un entrevista ku Radio Nederland Wereld Omroep, minister Plasterk a bisa ku e tin masha konfiansa pa loke ta trata kaso di apelashon ku Gobièrnu di Antia a kuminsá kontra e hecho, ku mester rekonosé matrimonionan di mesun sekso será na Ulanda. “E posishon di gobièrnu ulandes ta masha kla. Ora sera un akta den Reino Ulandes i esei ta konta pa aktanan di matrimonio tambe, esei ta konta segun artíkulo 40 di Statüt di Reino pa Reino Ulandes kompleto”, asina e minister a bisa. Segun e minister, su kolega antiano Leeflang ta bruha dos kos den otro. “Di un banda tin e drechi di Antia pa tin su mes legislashon riba tereno di matrimonio. Otro ta matrimonionan será na Ulanda. No ta un chiste, “flauwekul”, pero matrimonionan real. Nan tin konsekuensia hurídiko na Ulanda, pero tambe den Reino”, asina e minister a bisa. Plasterk a bisa, ku e lo boga pa Antia tambe habri su matrimonionan pa hendenan di mesun sekshon. “Pero einan parlamentu di Antia tin e derechi pa rechasá e proposishon aki loke parlamentu ulandes si a aseptá algun aña pasá”, asina e minister a bisa.
