Minister Presidente mesora a yama sindicatonan pa un reunion urgente awe mainta

ORANJESTAD- Te na ciera di e edicion di La Prensa Aruba di awe, ainda e reunion entre sindicatonan di trahadornan di Elmar, esta UEA y di WEB, esta SIWA, ta den reunion.
Unico topico di discusion ta e intencion di Gabinete Oduber IV pa cambia statutonan di e companianan di utilidad, pa asina por eherce mas presion riba e Hunta di Comisario y directornan, pa por haya placa di e companianan aki, ora cu Gobierno kier.
E conflicto di mas grandi ta cu e director di compania Elmar, esta Freddy Rafini, kende pa algun tempo caba ta den clynch formal cu Minister Presidente Nel Oduber y su gobierno, ya cu no kier coopera pa duna Gobierno voorschot riba ganashinan di e aña entrante.
E decision di Nel Oduber pa bai trece cambio den e statutonan di e companianan di utilidad, ta simplemente pa su Gobierno por yega na fondonan di e companianan aki, pa cubri e crisis financiero di su gobierno.
For di siman pasa SIWA y UEA a mustra Gobierno cu nan no ta acepta pa Gobierno introduci cambio den e statutonan, ya cu ta for di algun tempo caba principalmente Premier Oduber, a bin ta criticando e salario di trahadornan di e dos companianan di utilidad aki, y di nan directornan.
Na varios occasion Nel Oduber a cuestiona e placa cu e trahadornan aki ta cobra y cuanto nan ta bai cas cune, mientras cu otronan den e sector di Gobierno, no ta alcanza e nivel di salario aki hamas.
E sindicatonan for di prome cu fin di siman a mustra Nel Oduber y su gobierno, cu nan no ta bai tolera ningun cambio di ningun statuto y si Gobierno sigi cu e intencion aki, pa e siman aki lo tin un “blackout” completo na Aruba.

Gobierno ta acusa AVP y RED di ta tras di sindicatonan

ORANJESTAD- Den un comunicado di prensa emiti ayera tardi, partido MEP ta acusa sindicatonan di trahadornan di companianan di utilidad, di kier goberna e pais y kita mando for di Gabinete Oduber IV.
“Den tur estado di derecho y democratico bo tin derecho y obligacionnan y cada un den comunidad mester carga su responsabilidad. Den nos pais tin lidernan sindical cu a lubida cu nan tin cu sali na vanguardia y interes di e trahador y no di e hendenan cu kier defende nan propio interes.
Un di e ehempelnan clave ta e actitud di e presidente di UEA y e presidente di SIWA, kendenan ta menasa henter un pueblo, un comunidad, un pais y un gobierno legitimamente eligi den un eleccion democratico, cu cada rato si no duna nan nan kier, nan ta bin cu e menasa di kita awa y coriente, esta poniendo henter un pais plat.
Hecho ta cu na final di 2001 un bari di petroleo tabata costa apenas 17 dollar y awe esaki ta 135 dollar – un aumento di 118 dollar! – cu ta nada menos cu 800% di aumento. Bo por ta AVP, REDashi y contra tur proyecto di Gabinete Oduber, pero pa absorba 800% di aumento si ta algo cu nos tur mester tuma hopi na serio, pasobra e factor externo aki tin su multiple efectonan ariba henter nos bida.
Mientras tur otro caminda a tene cuenta cu e efectonan dramatico como cu no tin competencia den produccion di awa y coriente, nos tin hende na Aruba ta pensa solamente ariba probecho politico, pasobra si bo mira nan salario compara cu cualkier otro compania, nan a ser recompensa grandemente den salario y beneficionan secundario.

ORANJESTAD- Den luna di october 2008 Diocesis di Willemstad ta organisa un Conferencia na Curaçao na unda un plan strategico pastoral lo wordo compila pa e Obispado di Willemstad pa e aña 2008 – 2011.
Punto di salida di e proceso aki ta e documento di Aparecida di Brazil cu a keda cla na aña 2007.
Den conclusion di e documento aki ta para: “Nos mester un Pentecoste nobo! Nos mester sali na e encuentro di e personanan, famianan, e comunidadnan y e pueblonan pa comunica y comparti e don di e encuentro cu Cristo, cu a yena nos bida di “sentido”, di berdad y amor, di alegria y di speransa!”
Pa yega na e plan aki a usa e metodo di refleccion teologico-pastoral: “MIRA, HUSGA Y ACTUA”.
Diocesis di Willemstad tambe kier a camina e plan strategico pastoral usando e mesun metodo.
Pa motibo aki den lunanan mei, juni y juli 2008 a tene un encuesta y entrevista bow di e catoliconan di Antias y Aruba, como parti di e fase “MIRA” ; na tur e islanan e ehercicio aki a tuma lugar.

Por menciona cu tin e siguiente resultado:
ENCUESTA ENCUESTA ENTREVISTA
ISLA ADULTO HOBEN
Aruba 259 359 7 cu un total di 11 persona
Bonaire 105 18 3 cu un total di 13 persona
Curaçao 599 206 4 cu un total di 24 persona
Saba 35 33 4 cu un total di 6 persona
St Eustatius 29 10 7 cu un total di 8 persona
St Maarten 52 59 3 cu un total di 22 persona
TOTAL 1079
685
84 persona

E resultado final di e encuesta ta cla y awor ta den su fase di analisis.

ORANJESTAD- Aruba Basketball Bond kier a recorda tur organizacion-clubnan, pa bin haci nan inscripcion pa e campeonato Cadet-Junioren 2008 mas pronto posibel.
Ultimo dia pa haci inscripcion di ekiponan pa e dos campeonatonan lo ta dia 9 di augustus 2008.
Lo cuminsa cu e campeonato dia 29 di augustus 2008, si logra di haya tur inscripcion na tempo.
Lo haci uzo di tres biaha pa siman pa wega caminda diahuebs lo hunga na YMCA San-Nicolas, diabierna na Aruba Jrs. y diasabra, un bez na Aruba Jrs. y otro diasabra na YMCA-San-Nicolas.
Como cu ta cuminsa e campeonato un poco laat, lo no tin e division di Pasarela pa 2008, otro aña lo planea e campeonato pa cuminsa mas tempran y lo tene cuenta cu e division di Pasarela.
Edad pa Cadet ta 13, 14 y 15 aña, no mag di haci 16 aña durante cu tin campeonato.
Edad pa Junioren ta 16, 17 y 18 aña y no mag di haci 19 aña durante e campeonato.
Por haci inscripcion via e-mail: arubabasketball@hotmail.com y tambe por pasa na oficina di A.B.B. durante dia.
A.B.B. ta spera cu tur organizacion-clubnan por cumpli, y entrega nan inscripcion
na tempo y cu A.B.B. por cuminsa riba e fecha planea, esta 29 di augustus 2008.

ORANJESTAD- Den cuadro di e maneho di minister di Enseñansa, Asunto Social y Infrastructura Drs. Marisol Lopez-Tromp, Departamento di Asunto Social ta traha segun un vision di formacion di hoben den nan abilidadnan social, creativo y fisico.
Esaki lo yuda na enrikece y fortifica e hoben y alabes ta siña e hoben un actitud social.
D.A.S. tin como tarea pa desaroya projectonan riba tereno di diverticion liber pa hoben. Especialmente den temporada di vacacion ta sinti falta di mas actividad pa hobennan cu ta stimula nan desaroyo.
E summer camp aki ta brinda oportunidad na 250 hoben, di cual 150 di e participantenan ta cliente di D.A.S, pa pasa nan tempo liber di un forma sano y educativo.
Durante e siman aki e hobennan ta haya varios workshop riba diferente tereno y di e forma aki descubri nan talento.
Diasabra 9 di augustus 2008 e hobennan lo duna un presentacion di tur loke nan a siña riba Plaza Betico Croes di 7’or pa 9’or di anochi.
E summer camp 2008 ta un iniciativa cu a bin di comunidad y D.A.S. ta sostene esaki den su totalidad.
Di e forma aki ta keda demostra cu Departamento di Asunto Social, Departamento di Cultura, Fundacion Desaroyo Educativo Comunitario y Fundacion Mision Cantaro ta traha na bienestar di nos hobennan uniendo forza y treciendo actividadnan cu ta sigui stimula e desaroyo di nos hobennan.

ORANJESTAD- Cu un cordial saludo deportivo directiva di “Federacion Liga Mayor di Softbal Arubano” ta participa pa medio di esaki inicio di e cuater campeonato di softball Liga Mayor.
E campeonato lo inicia diadomingo 10 di augustus 2008 cu un duracion di 8 diadomingo y lo finalisa segun programmacion diadomingo 28 di september 2008 cu participacion di 12 clubmiembro bou auspicio di “Federacion Liga Mayor di Softbal Arubano”.
Pa cu e campeonato aki lo hasi uso di tereno di bala di Aruba Jrs na Socotoro Oranjestad.
E campeonato ta wordo dedica na sr. Minguel V. Tromp y Sr. Juancho Arcaya kendenan tin trayectoria bastante largo den e ramo di softball den e parti di Liga Mayor aki na Aruba.
Pa 12’or y 45 di atardi lo duna inicio na e parti oficial di e campeonato.
E campeonato aki ta wordo gesponsor dor di Playa Liquor N.V. cu su famoso cerbes “Budweiser” y e programma pa cu e prome dia di campeonato ta lo siguiente:
10 di Augustus 2007:
09:30 – 11:00: Budlight Braves v/s San Nicolas Movers
11:15 – 12:45: Astros Budweiser v/s Aruba Juniors LG
13:00 – 14:30: Marine Dolphins v/s Valero Boomerang
14:45 – 16:15: Kenro Jewelers v/s Kibaima A.I.S.
16:30 – 18:00: Surprise Balashi v/s Starcon Racketeers
(Centraal Clippers y La Moderna Sluggers – liber)
Ricibi alavez adhunto e schedule completo pa locual ta trata Campeonato 2008 bow di auspicio di Federacion Liga Mayor di Softball Arubano.
Pa medio di esaki henter pueblo di Aruba, principalmente amantenan di softball ta wordo invita pa atende y presencia bunita partidonan cu lo ser brinda door di nos baluartenan di antes.

WILLEMSTAD – Falta di konosementu profundo di reglanan i leinan di tráfiko ta pone, ku hopi bia hende ta kometé eror ora nan ta papia di e materia. Pa por splika un aspekto di e materia, e persona ku ke splika mester ta informá di tur aspekto. E materia ta manera un pùzel i si bo no tin tur e pidanan bo splikashon nunka por ta kompleto.
Den e INFO-dosis ku Ombudsfunctionaris a emití ayera, el a skibi entre otro; “De bestuurder van een outo dient zich dus ingevolge de bepalingen van de WVVC in beginsel steeds aan de rechterzijde van de rijbaan te bevinden (behalve bij inhalen of voorbijrijden van op de rijbaan rijdende of staande weggebruikers en bij voorsorteren). Sinembargo Ombusdfunctionaris a lubidá riba e prinsipio di ‘keep your lane’. E prinsipio akí ta propagá mas trankilidat posibel riba kaminda. Esei ta nifiká, ku outomobilistanan mester trata na kambia di via mas ménos posibel. Esaki en prinsipio ta hasi posibel ku un outomobilista por kore na su man robes pa basta ratu kubriendo un distansia di hopi kilometer sin problema.
Por ehèmpel, un outomobilista ku subi Schottegatweg via di Gosieweg i bai den direkshon di Rio Canario, por keda kore na su man robes te Palu Blanku, subi Nijlweg i keda kore na su man robes, subi Dòmi i Brùg Juliana i keda kore na su man robes, baha brùg pasa Parera i yega na Amstel, subi Nieuwe Haven na su man robes i keda kore na su man robes te ora e yega na altura di Asiento, kaminda finalmente e ta lora i subi Regentesselaan. E outomobilista akí a mantené su via, (keep your lane), pasó for di ora el a subi Schottegatweg e tabata sa ku ta Regentesselaan e ta bai. Ounke ora el a sali Gosieweg i subi Schottegatweg e por a drenta Emmastad mes ora, e echo ku el a keda kore riba su man robes i pasa kasi rònt Schottegat no ta nifiká ku el a kometé un infrakshon di tráfiko. I esaki ta e pida di e pùzel ku Ombudsfunctionaris a falta. E ta skibí den paragraf 8 artíkulo 30 punto 2. “ Indien de weg bestaat uit twee gescheiden rijbanen, bestaande uit meer dan één rijstrook in dezelfde richting, mogen andere bestuurders, dan die genoemd in artikel 32 tot en met 35, de rijstrook blijven volgen waarin zij zich bevinden.”

BOGOTA – Presensia di un konvoi ku fanátikonan di Atlético Nacional den un zona reservá pa siguidónan di e klup lokal Atlético Bucaramanaga a ser interpretá komo un provokashon i a kousa un bataya kampal ku saldo di ocho herido, dos di nan di gravedat, i 20 detenido, polis a bisa.
Polis a promové un akto di pais entre e barranan di ámbos banda, pero e akuerdo a ser kibrá djadumingu promé ku e wega na momento ku shofùr di e konvoi a separá su mes di e karavana.
E bochincha a dura asta despues di e wega ku a empatá 1-1, pa di tres fecha di e torneo Klousura di futbòl kolombiano i e Skuadron Móbil Antidisturbio di Polis a hañ’é ku problema pa pone òrdu bèk.
Wilson Múnoz Vélez di 18 aña a sufri heridanan ku kuchú den pechu, un di nan a afektá un pulmon, i Sebastian Alvarez a risibí un gòlpi den wowo drechi i el a afektá su retina, Krus Kòrá a bisa.
Komandante di polis metropolitano, general Orlando Pineda, a anunsiá na prensa ku un di e detenidonan tabatin un revòlver i el a lòs diferente tiru i otro, un menor di edat, tabatin tres arma blanku di plak na su lomba.
“Algun persona no por a drenta e stadion pasobra nan tabata fuma i den estado eksitá al pareser pa efekto di sustansianan ku ta manda nan haltu”, Pineda a bisa.
E duelo na Manizales entre e lokal Once Caldas i América tambe a kousa enfrentamentunan entre e fanátikonan, i un di nan, Richard Andres Bautista, a ser heridá ku arma blanku.

Skina di Sorti, awe 5 di ougùstùs di 2008, ta kuminsá ku deseá un i tur un bon dia. E panorama polítiko di Kòrsou ta keda mustra e mesun tendensia di polítika reakshonario ku demasiado hungamentu di e persona ku konfrontashon di kontenido. E mesun antagonismo i e mesun divishon. Ni e posishonamentu polítiko ni e aserkamentu gubernamental, spesialmente na nivel insular no ta sirbi komo instrumento pa hiba un gobernashon efektivo i efisiente. Temanan importante no ta yega na e debate públiko for di kual por lo general tin ku bini e sosten masal pa e direkshon ku tin di kue.
****
Nos ta keda ku un desperdisio enorme di e rekursonan skars di komunidat ku por ehèmpel yamamentu di reunion ku sea no ta tuma lugá, ta keda deskontinuá òf ta resultá den diskushon riba futilidat en bes di debate serio. Ku desaroyo pa lokual ta kosto di krudo i komestibel ketu bai un fuente di preokupashon pa su impakto riba ekonomia global, “de politiek” no por yega na un debate serio riba e materia.
****
Djis despues di e promé konfrontashonnan riba e tema di proseso estatal a papia un ratu riba e nesesidat pa yega na un rekonsiliashon. De facto nada no a kambia. E mesun rantnan skèrpi a keda i te hasta por papia di un situashon ku ta bai empeorá. Denter di koalishon e diferensia grandi den kultura di gobernashon ta kuminsá manifestá. Kestion ku FOL ke sa di PNP kiko ta kiko riba konstelashon di gerensia di Selikor ta muestra di esei.

WILLEMSTAD – E organisashon di Sòftbòl SV Rising Trotters ku a kumpli 51 aña di eksistensia dia 27 di yüli último a organisá un torneo mix di Sòftbòl, dediká na un èks miembro ku a traha pa hopi aña pa e deporte di Sòfbòl, ku ta sr. Andre Chance.
Tabatin kuater sekshon durante di e torneo aki: Liga 40, Hende Muhé Fast Pitch i Komersial tantu maskulino komo femenino, repartí den kuater pul.
Den Pul A, Liga 40:
Den e partido final e ekipo di Jaws ta logra triunfo di 12-6 riba Rising Trotters i titulá kampion.
Rudsel Wilson a bira e MVP di e sekshon aki.
Den Pul B, Fast Pitch hende muhé:
The One ta logra un triunfo grandi di 14-4 riba Rising Trotters. Ruthmaye Boelijn a bira MVP.
Na di tres lugá a sali Eagle Softex.
Den Pul C, Komersial maskulino:
Coca Cola a sabi di wanta Duana i sali kampion ku skor di 11-9. Edwin Thielman a bira e MVP.
Na di tres lugá a sali MLS.
Den Pul D Komersial femenino, Konseho Insular ku un blankeo di 10-0 di Amicorp pa titulá kampion.
Anushka Cadeau a sali MVP
Na di tres lugá a sali Duana/CEMS
Un pabien na tur e ganadornan i un gradesimentu na e fanátikonan i spònsernan ku a yuda e torneo bira un éksito.

WILLEMSTAD – Bastante mayor a akudí na Ofisina pa Finansiamentu di Estudio (SSC) awe mainta pa pone preshon, pa por haña e plaka di fiansa pa studiantenan ku ta keda studia na Kòrsou. Ku e fondonan aki e muchanan por haña nan entrada na e diferente skolnan.
E siman aki skol lo habri djaweps, pero ku bastante problema, debí ku tin skol ku no ke aseptá e studiantenan sin plaka na man. Un kantidat di 600 studiante a bin na remarke pa un fiansa di SSC. Nan a risibí un karta, den kua e fundashon ta konfirmá e aprobashon i e studiante mester yena ku e ta bai di akuerdo ku e kondishonnan. E karta aki mester ta sufisiente pa skolnan por duna atmishon na e studiantenan, ya ku e karta aki ta un konfirmashon ku e fiansa ta den proseso. Esnan ku a logra yena e formulario i entregá e dokumentu aki, lo risibí un karta definitivo ku e skol ta mira ku e studiante tin su fiansa. Pero e studiante no ta risibí e suma awor aki. Tur aña SSC ta entregá e fiansa na fin di ougùstùs, pero e aña aki skolnan ta hasiendo ferfelu ku e studiantenan i ta eksigí e plaka for di awor.
LA PRENSA a komprondé, ku mayornan a akudí na ofisina di SSC pa supliká pa risibí e plaka, di manera ku nan yunan por kuminsá nan aña eskolar djaweps awor. Den kombersashon ku un funshonario di SSC el a splika, ku a trata tur petishon i ku mas o ménos 600 studiante lo risibí un fiansa. Tur e muchanan a risibí un karta pendiente e areglonan, den kua kada studiante mester kompletá e formulario di kondishon. Despues ku e formulario keda entregá, e studiante ta risibí su karta di aprobashon.

WILLEMSTAD – Mirto Grandillo, eks direktor di Aruba Tourism Authority na Latino Amérika, aktualmente ta trahando ku Tiara Air komo representante di e kompania na Venezuela. Tiara Air ta hopi kontentu di por a reklutá un ehekutivo eksperensiá, bon respetá i hopi kualifiká pa enkabesá e ekspanshon di e kompania di aviashon na Venezuela i mas despues pa Sur Amérika, segun Muyala ta deklará.
Grandillo tabata na kabes di Aruba su promoshonnan di benta i merkadeo na Latino Amérika, for di 1976 pa 2006 i tin un kontakto ekselente den aviashon i komunidat biahero pa e parti sur di mundu. Grandillo por dominá vários idioma i e ta perfektamente kapas pa traha na nòmber di Tiara Air.
Grandillo a keda eduká na Mexico, Santo Domingo i Cornell University na Merka. Finalmente Grandillo ta tresiendo un kantidat di talento pa agregá na e inteligensia komersial i ekspertisio di Tiara Air ku ya kaba ta espektakular.

WILLEMSTAD – Federashon di Otrabanda ta lamentá ku gobièrnu di Kòrsou un biaha mas no ta mustra desensia di por atendé e asuntu di keho ku nan tabatin riba e prosedura di área di Rif. E federashon lo a konfia ku gobièrnu sikiera lo a duna oido pa kontestá e keho ku a keda entregá na Ombudsman. Den kombersashon ku Marushka Manuel ta splika LA PRENSA, ku durante e reunion di federashon Otrabanda a analisá e diferente puntonan, di kua a para ketu na e aktitut di gobièrnu pa e falta di desensia.
Tabata den medionan di komunikashon ku a tuma nota di e instalashon di un komishon, miéntras ku nan tin un protesta aden pa duna kontenido na loke nan ke mustra na e komunidat. Segun Manuel, e forma ku e instalashon di e komishon a tuma lugá sigur mester diskutí ariba, ya ku ta indiká den entrevista, ku federashon Otrabanda lo keda aserká sin mas. E punto kardinal di federashon Otrabanda ta kiko ta bai ku e kriterianan di Plan Mayó ku a keda presentá ku si esaki ta keda ehekutá den e plan ku mester keda desaroyá.
Manuel ta kere, ku no mester sosodé manera den pasado ku gobièrnu ta disidí i no mester di konseho òf sugerensia di otronan. Federashon Otrabanda ta di opiná, ku gobièrnu ta sigui baila riba loke nan a hasi den pasado. No mester t’asina ku ta atendé ku dos invershonista òf tampoko ta disidí di bula bai pa kòmbersá ku invershonista den eksterior. Mester sinta pa hinka un bon plan den otro promé ku aserká invershonistanan.

WILLEMSTAD – Bastante mayor a akudí na Ofisina pa Finansiamentu di Eestudio (SSC) awe mainta pa pone preshon, pa por haña e plaka di fiansa pa studiantenan ku ta keda studia na Kòrsou. Ku e fondonan aki e muchanan por haña nan entrada na e diferente skolnan.
E siman aki skol lo habri djaweps, pero ku bastante problema, debí ku tin skol ku no ke aseptá e studiantenan sin plaka na man. Un kantidat di 600 studiante a bin na remarke pa un fiansa di SSC. Nan a risibí un karta, den kua e fundashon ta konfirmá e aprobashon i e studiante mester yena ku e ta bai di akuerdo ku e kondishonnan. E karta aki mester ta sufisiente pa skolnan por duna atmishon na e studiantenan, ya ku e karta aki ta un konfirmashon ku e fiansa ta den proseso. Esnan ku a logra yena e formulario i entregá e dokumentu aki, lo risibí un karta definitivo ku e skol ta mira ku e studiante tin su fiansa. Pero e studiante no ta risibí e suma awor aki. Tur aña SSC ta entregá e fiansa na fin di ougùstùs, pero e aña aki skolnan ta hasiendo ferfelu ku e studiantenan i ta eksigi e plaka for di awor.
LA PRENSA a komprondé, ku mayornan a akudí na ofisina di SSC pa supliká pa risibí e plaka, di manera ku nan yunan por kuminsá nan aña eskolar djaweps awor. Den kombersashon ku un funshonario di SSC e la splika, ku a trata tur petishon i ku o ménos 600 studiante lo risibí un fiansa. Tur e muchanan a risibí un karta pendiente e areglonan, den kua kada studiante mester kompletá e formulario di kondishon. Despues ku e formulario keda entregá, e studiante ta risibí su karta di aprobashon.

CLARCK-DJAOEN
Virginia Beata (82 aña)
Mihó konosí komo Bier
A laga atras su yunan Clifton, Ria, Rudy, Gonda, Marelene, Sherry, Raymond Theodra tur ku nan yunan. Akto di entiero ta tuma lugá na Ulanda.

VAN UYTRECHT
Herman Minguel
Mihó konosí komo Manchi
A laga atras su kasá Martina van Uytrecht-Koeyers, ruman Adolf van Uytrecht, subrinonan Sur Marieta, Elvia Albertus-Fabias, Diana Mariano, Marvis Bernadina-Manuel, Juliette Willems-van Uytrecht, Ralph van Uytrecht tur ku nan rumannan. Akto di entiero ta djabièrnè 8 ougùstùs 3.30or for di El Consolador Sala Kristal pa santana San Willibrordus. Bishita 12or. Promé ku entiero tin un respòns na El Consolador.

LEITO
Sherwin
Mihó konosí komo Brabra
A laga atras su mama rosa Leito-Roos, rumannan Beatirx Justina, Harold, Mayra, Edmundo, Meredith Leito, Lizeta Serberie-Leito tur ku nan famia. Akto di entiero ta djabièrnè 8 ougùstùs for di El Consolador pa santana Sta. Maria. Bishita 1or. Promé ku entiero tin un respòns 3.30or na El Consolador.

BOELIJN
Mario de Cevellon (repentino)
Mihó konosí komo Mayon
A laga atras su yu di kriansa Hensley Boelijn i sra. Mariella Boelijn,ñetunan Swendley, Sherienne, Remsley, Dayanara, Dayron Boelijn. Akto di entiero ta djarason 6 di ougùstùs 11or for di El Tributo pa santana Berg Altena. Bishita 9or. Promé ku entiero tin un respòns na El Tributo.

BEIJING – Ora ta falta un par di dia pa komienso di e Weganan Olímpiko, dos hòmber a kore drenta ku un trùk di shushi riba un grupo di polis ku tabata kore i nan a tira eksplosivo matando 16 agente na e parti ekstremo nort west di China, asina prensa estatal a informá.
E atake a oumentá e tenshon ku ta biba na e kapital pa e weganan internashonal.
E tabata un dje atakenan mas mortal i riská den vários aña na e provinsia di Xinjiang, lugá di un rebelion musulman violento di e zona kontra e régimen chines.
Ounke atake a tuma lugá den un region ketu di China, el a sosodé na momentonan ku e forsanan di seguridat tabata den estado di alerta máksimo, ku temor pa problemanan durante e Olimpiada.
Den e atake, dos hòmber a kore ku e trùk kontra e polisnan, miéntras nan tabata kore dilanti un hotèl durante e ehersisionan di mainta na e siudat di Kashgar, Xinhua a bisa. Al pareser e agentenan ataká ta pertenesé na un grupo paramilitar enkargá ku kuida frontera.
Despues ku e trùk a dal den un palu di lus, e dos atakantenan a bulá afó i a sende eksplosivonan trahá na kas i “tambe nan a hinka e polisnan”, Xinhua a agregá.
Un informe previo di e agensia a bisa ku nan a tira eksplosivo kontra un warda, pero Xinhua a kambia e informe despues, bisando ku e warda ta na un 200 meter di e lugá dje agreshon.
Segun Xinhua, 14 polis a muri einan mes i dos na kaminda pa hospital, miéntras ku komo 16 otro a keda heridá. Polis a arestá e dos atakantenan, un di nan heridá na un pia, el a agregá.

BEIJING – Un 20 persona rabiá pasobra nan a ser saká for di nan kas den sentro di Beijing a tene un protesta djaluna serka di Plasa di Tiananmen, bisando ku nan derechonan a ser violá na nòmber di e Weganan Olímpiko.
Polis mesora a sera e kaya residensial kaminda un video di AP Television News a mustra un grupo gritando ku nan a ser saká di nan kas i ku nan no a haña e kompensashon apropiá
E ofisialnan no a intervení, pero muhénan ku a identifiká nan mes komo miembronan di e komishon di e besindario a pusha e manifestantenan i a saka nan di e zona. E komishonnan di bisiña no ta parti ofisial di gobièrnu, pero ta traha huntu ku polis i otro agensianan.
E manifestantenan a bisa ku nan a ser saká di nan kas pa rekonstruí e zona. E aria ta den rekonstrukshon pa hasié un paseo komersial ku negoshinan manera Nike, Starbuck i Rolex.
E manifestashonnan den sentro di Beijing ta skars i normalmente polis ta para nan mesora. China no ke niun tipo di protesta públiko durante e Olimpiada i a pone agentenan di seguridat na henter e siudat.
Mesora no tabata konosí unda a biba e manifestantenan, o si nan a keda detené. Un ofisial na ofisina di prensa no sa na unda nan a bai.
“Nos no ta kontra e Olimpiada. Pero nan no mester tumba nos kas”, e manifestante Liu Fumei a bisa. Un video di APTN a mustr’é ta grita i den un pleitu ku muhénan bisti na sivil ku tabata trata di sak’é for di e lugá.

Lorito ta yama tur hende un felis djamars. Awor si tin manera un periodo di kònkòmber a drenta masha pisá. Ounke skol ta bai habri, Curoil ta sigui den notisia, e kasamentu entre hende di mesun sekso ta kombersashon tur kaminda, no tin un primisia ku ta sakudí tur hende. Ban wak ken ta haña sa algu den e dianan ku ta bin, pasobra un kos ta sigur: notisia tin!
*********
Lorito a haña sa un kos awe ku hopi hende no sa. Parse ku ora bo yega Merka nan por kita bo Ipod, selular i laptop for di bo sin puntra nada. E ta skibí den reglanan di entrada na Merka i ya kaba diferente hende a haña nan konfrontá ku e situashon aki. E medida ta relashoná ku henter e asuntu di terorismo i kòntròl riba entrada di stranheronan na Merka. Tene kuenta ku e desaroyo aki!
*********
Bo a tende e chiste kaba di e dama ku no por a drenta Merka. Parse ku e dama tabatin muchu líkido den su bustu drechá i el a pasa e límite di loke ta aseptabel. E dama a saka tur su koketeria riba e agentenan di imigrashon ku no por a hasi nada otro sino di bisa e dama buska un manera. Lorito di lebumai nos! Kòrda ku ta un chiste!
*********
Un kos ku por konsumí nos masha ta ora ta midi ku dos midí. Boso ta kòrda kuantu kos Gezag a hasi na Las Almas i pone pia abou. Las Almas a muri un morto silensioso, pasobra manera ta papiá den pueblo a yega na sierto interesnan i einan si no ta mishi. Mesun kos ta pasa ku e asuntu di playa. Masha tempu kaba tin moveshon ilegal na kosta, pero no ta presentá i para tur kos a lo macho. Ata pa para manifestashon si tin tantu polis i SKS riba pia. Di kon otro biaha no? Ta e kosnan aki ta duna pueblo rabia i despues ta puntra: ta kiko a pasa anto?

WILLEMSTAD – Ku hopi áimo a kuminsá ayera diferente aktividat eskolar, ounke skol pa nos hóbennan mes ta kuminsá mas lat e siman aki. Diferente direktiva di skol a reuní ku su personal pa atendé diferente aspekto di e aña eskolar nobo. Mas ku 1400 maestro a partisipá na e seshon di World Trade Center.
Direktiva di Skolnan Katóliko manera a bira kustumber, a tene su enkuentro anual ku un tema spesial. E tema di e aña aki ta “Bienestar di e mucha”. E tema sigur ta relevante si konsiderá ku útimamente tabatin diferente kaso ku a bin dilanti di maestronan ku a abusá di alumnonan. Dos kaso partikular a hala atenshon últimamente, inkluyendo un di nan ku a kaba den un krímen.
Di tur manera, tur kos ta prepará pa e aña eskolar nobo. Direktor di Direktiva di Skolnan Katóliko Lisette van Lamoen-Garmers a papia di preparashonnan ku ta kanando hopi bon. Pa enseñansa di fundeshi falta 9 maestro. Pa asignaturanan speshalisá manera bouwkunde atrobe no tin sufisiente dosente. A bin aserka e aña aki, ku reklutashon di maestro na Ulanda tabata difísil pa diferensha di pago. No opstante tur kos, e ánimo ta haltu atrobe pa e aña eskolar nobo. Remarkabel ta e aña aki ku diputado di Enseñansa Marilyn Alcalá-Wallé, lo no ta presente pa apertura di aña eskolar pa motibu di fakansi. E lo ta remplasá pa diputado Eugène Rhuggenaath. Riba e pòtrètnan por mira parti di e kantidat grandi di maestro ku a asistí ayera huntu ku staf di Direktiva di Skolnan katóliko.

WILLEMSTAD – Universidat Nashonal di Antia (UNA) lo haña mas ku 500 studiante nobo aserka e aña aki. For di ayera a kuminsá e siman di introdukshon pa e studiantenan nobo.
Rector-Magnficus di UNA, Jeanne de Bruijne a bisa LA PRENSA awe mainta, ku e ánimo pa e aña universitario nobo ta grandi. Di e kantidat di 500 studiante nobo ku a inskribí te awor, 50 porshento ku ta mas o ménos 250 ta bai Fakultat Soshal-ekonómiko (SEF). E otronan ta repartí riba fakultat nobo di trabou soshal ku a haña mas o ménos 80 inskripshon, e fakultat general (ku lo inkluí probablemente Akademia Pedagógiko) tambe mas o ménos 80 kandidato, Fakultat Hurídiko mas o ménos 50 i Fakultat Tékniko mas o ménos 70.
Pa loke ta trata e diskushonnan ku a surgi na fin di e aña universitario ku CURISES, sra. De Bruijne a bisa, ku e punto ei no ta klarifiká ainda. “Nos punto di bista, ratifiká pa direktiva sinembargo ta konosí”, asina e rector-magnificus a bisa.
UNA mes a informá ku e Siman di Introdukshon manera tur aña e siman di introdukshon ta hopi bon bishitá. Alrededor di 210 di e studiantenan di e promé aña a akudí. Durante e siman akí e studiantenan lo haña guia i informashon serka e mèntòrnan, tokante tur loke ta trata siguimentu di un estudio na UNA. E programa ta konsistí di tambe diferente aktividat sosial kaminda e studiantenan por sera konosí ku otro. Manera ta kustumber, e aña akí tambe tin e ‘Proyekto di Komunidat’. E biaha akí studiantenan a eskohé “Museo nos Tula” na Lanthùis Knip.