ORANJESTAD- Cuerpo Policial pa medio di un comunicado di prensa emiti pa vocero di Polis, John Larmonie, ta participa cu ayera mainta, pa mas o menos 11’or y cuarto, recherche a detene e homber C.J.D. naci na Hulanda di 27 aña, como sospechoso di a comete un amenaza cu acto di terrorismo na Aruba.
Ta asina cu manera ya a sali publica den medionan di comunicacion un par di dia pasa, pa ser exacto dia 1 di augustus 2008, e sospechoso lo a yama un compania di utilidad y amenaza cu ya cu prijs di petroleo mundial a baha y na Aruba so esaki no ta e caso, si no baha e prijs di awa cu coriente, lo e comete un acto di terrorismo den un centro comercial cerca di un area turistico y lo causa daño na imagen di Aruba internacionalmente.
E team di recherche a hasi investigacion via tur medionan legal y a bin pone man riba e sospechoso en cuestion.
E investigacion penal lo tin cu saca afor awo te con lew e amenaza aki tabata serio pero si, mirando e leynan nobonan anti terrorismo cu a ser introduci despues di 9/11, mester hasi nos comunidad mas consciente cu tur amenaza cu actonan terroristico lo ser trata cu seriedad y cu e lo por tin consecuencianan serio legal pa esnan cu ta amenaza di e manera ey.

ORANJESTAD- E iritacion cue sleeping policenan a crea den comunidad, a pasa over awor pa e propio seno di Conseho di Minister.
Minister di Hustucia Rudy Croes lo a ordena instalacion di e spons duro aki na tur zebra pad den centro di Oranjestad y dilanti di scolnan, na momento cu Minister di DOW, esta Marisol Lopez Tromp, a bai cu vacacion.
Informacionnan ricibi ta mustra cu tin un conseho negativo di DOW pa cu instalacion di e sleeping police aki y cu Minister Lopez Tromp ta na altura di dje, y consecuentemente nunca a permiti e proyecto aki wordo ehecuta.
Awor a surgi un situacion caminda DOW lo bai retira algun di e sleeping policenan for di caminda DOW a conseha caba cu nan no ta apto pa wordo poni y cu ta stagnando trafico mas cu normal.
Pa colmo ta bin aserca cu awor ta resulta cu no tin un Decreto Ministerial cu ta legaliza e sleeping policenan aki, pues nan a ser poni den forma cu no ta cuadra cu ley y cualkier ciudadano cu sufri daño na su auto ocasiona pa e sponsnan preto aki, por inicia un caso pa daño y perhuicio contra Gobierno.
Pues un situacion realmente confuso caminda Minister di Husticia hunto cu algun miembro di parlamento di fraccion di MEP, a presenta e proyecto di sleeping police como algo grandi y efectivo.

ORANJESTAD- Den e prome mitar di aña 2008 a registra un aumento leve den e cantidad di empresa na Registro Comercial di Camara di Comercio y Industria (KvK), compara cu prome seis luna di 2007. Na 2007 tabatin 667 ins cripcion di januari te cu juni, y e aña aki a registra 696.
E aumento leve aki a bin despues di e caida di e cantidad di inscripcion desde 2004. Di e 696 registracion 30 ta un filial di un compania existente (2007:39).
Banda di esey durante periodo januari te cu juni 2008 tabatin 31 fundacion nobo registra den Registro di Fundacionnan compara cu 35 den e mesun periodo na 2007.
Inscripcion di negoshi
E aña top pa inscripcion di negoshi den ultimo decada tabata 2004: a registra 1451 empresa cu ta opera localmente (“onshore”), acompaña e tempo ey ainda pa 214 empresa “offshore”, pa un total di 1665 inscripcion.
E caida general desde 2000 , cu excepcion di aña 2004, ta acopla na e fenomeno “offshore” cu ya ta pertenece practicamente na pasado.
Den e prome seis luna di 2008 tabatin solamente 1 inscripcion di compania cu ta declara cu nan actividadnan ta bay ta estrictamente offshore, aunque e situacion legal no ta limita nan mas na esaki. Aña 2007 a marca e punto mas abao di inscripcion den ultimo decada cu solamente 1328 inscripcion en total.
Cancelacion di negoshi
Den e registracion di cancelacion di negoshi mester haci distincion entre offshore y onshore tambe.
Te den 2008 e cancelacion di AVV y NV offshore ta sigui tuma lugar, mientras practicamente no ta bin tanto AVV nobo acerca, ni NV cu ta bay opera offshore. Desde 2006 un AVV por opta pa un status transparente, loque a haci cu nan por opera como compania na Aruba tambe.

BEIJING- E delegación Arubano a hasi su entrada oficial den e Villa Olimpico na Beijing, China, cu un ceremonia solemne riba e Plaza Internacional di Banderanan.
E Alcalde di e Villa a expresa cu pa Beijing y e Comité Organizador, presencia di delegacionnan di 205 pais di tur parti di mundo ta representa e unión di humanidad, na ocasión di e evento deportivo mas grandi di mundo.
E Ceremonia di Bonbini ta un momento masha special pa cualquier delegación durante e Weganan Olimpico. Den presencia di autoridadnan di e país organizador, invitadonan special y naturalmente integrantenan di e delegacion, e participantenan di cada país ta sinti nan mes berdaderamente “bonbini” den e país anfitrión.
Aruba a comparti su Ceremonia di Bonbini hunto cu delegacionnan di Paraguay, Cuba y Tuvalu riba diaranson atardi. E tononan di “Aruba Dushi Tera” a resona na Beijing, mientras cu e bandera di nos país a wordo hisa orguyosamente pa militarnan Chines. Encabezando e delegación Arubano ta Hefe di Mision, Ling Wong, cu a entrega un regalo specialmente traha na e Alcalde di e Villa den nomber di e delegación di nos pais. E Alcalde na su turno a entrega un bunita obra, traha na man pa artistanan Chines, na nos delegación.
E ceremonia a wordo presencia pa diferente huésped di nos país, cu ta di bishita na Beijing: e rumannan Desiree y Shokyan Hoo, y e grupo di Lucas Croes y su 4 amigonan a biaha pa China na ocasión di e Weganan Olimpico y a disfruta di e ceremonia special na honor di nos delegación.

ORANJESTAD- Partido RED ta desaroyando su relacionan internacional cu otro partidonan politico, preparando asina pa e momento cu RED lo asumi gobernacion di Aruba na 2009.
Parlamentario Rudy Lampe a inicia e proceso pa RED por forma parti di e Foro di Sao Paulo. E Foro aki ta un red di partidonan di America Latina, cu ta defende justicia, cu ta lucha contra corupcion y cu ta defende e miho causanan di humanidad. E sede di e red di partidonan aki ta Sao Paulo, Brasil.
Algun partido famoso cu ta pertenece na e organizacion aki ta PT (Partido di Trahadornan) di Presidente Lula di Brasil, Frente Amplio di Presidente Fernando Lugo di Paraguay, PRD di e Presidente legitimo Lopez Obrador di Mexico, y PLD di Presidente Leonel Fernandez di Republica Dominicana. Nos ta spera cu pronto RED lo keda asepta como miembro di e Foro di Sao Paulo.
Riba e portret por mira lider di fraccion di RED hunto cu Lic. Saul Escobar, Secretario di Relacionnan Internacional di partido PRD di Mexico y miembro di e comision di coordinacion di e Foro di Sao Paulo.
Den e reunion aki, cu a tuma lugar na Mexico City riba propio gasto di partido RED, a discuti e detalles di e posibel ingreso di partido RED di Aruba den e Foro di Sao Paulo.
E prome comunicacion di e secretaria di Foro di Sao Paulo a keda manda pa partido RED. E Secretario di Relacionan Internacional di PT, sr. Valter Pomar, a confirma cu ta prioritario pa e Foro di Sao Paulo trata e peticion aki di partido RED, mirando e bon nomber cu lider di fraccion di RED tin na America Latina.
Ta di suma importancia desaroya e relacionnan internacional di partido RED, mirando e internacionalizacion di e retonan den e mundo global.

ORANJESTAD- Partido MEP a emiti un comunicado di prendsa ayera mustrando entre otro cu constantemente durante e ultimo 7 añanan nos tur por a tende integrantenan di AVP ta papia cu Gabinete Oduber a yena e aparato gubernamental cu ‘family and friends’ y consecuentemente cu lo tin 1500 ambtenaar di mas cu mester wordo kita di inmediato for di trabao.
Cu esaki partido AVP a demonstra cu nan tin rabia y ta contra pa yiunan di tera haña trabao y ta dispuesto pa si - pa desgracia fatal di Aruba – nan drenta gobierno nan lo masacara e cuerpo di empleadonan publico, mescos cu nan a haci na 1985 ora cu nan a kita malamente mas cu 800 tata y mamanan humilde cu tabata gana un salario chikito na TAV for di trabao.
Sinembargo – aunque cu integrantenan di AVP ta di pensamento cu tin 1500 ambtenaar di mas – nos no por a tende ningun critica for di nan, ora cu den e ultimo simannan mas ambtenaar a bin aserca, esta 15 polis, 15 cuidador di preso y 17 miembro pa Cuerpo di Bombero. Den tur e 47 ambtenaarnan extra aki tin cu ta vota pa MEP, AVP, MPA, RED etc.
Tur hende a puntra nan mes, ta kico a pasa cu e lider di AVP Mike Eman no a core grita, zundra y zapatia cu Gabinete Oduber un biaha mas a yena e aparato gubernamental cu mas ambtenaar ‘family and friends’ y cu awor lo mester tin por lo menos 1547 ambtenaar di mas y cu nan tur mester bay cas.
Asina pues nos ta mira cu e gobierno actual den un forma planifica ta percura pa tur e departamentonan di gobierno – sin distincion di color politico - haña e empleadonan necesario y ta construyendo y renovando na tur parti di Aruba careteranan cu ta na beneficio di henter comunidad.

ORANJESTAD- Partido PPA a emiti un comunicado di prensa, den cual Minguel Koolman, miemgro di e partido, ta vocifera e vision di e partido Oranje, riba e impuesto cu ta ser para riba gasolin y diesel.
“Nos Pueblo di Aruba a bolbe experimenta un sla duro den nos cartera, awor cu Gobierno a duna Panaderianan luz berde pa hisa prijs di pan aki na Aruba.
Tambe nos a hanja sa via di medionan di comunicacion cu awa y coriente lo conoce un aumente di no menos cu 10%.
Esakinan lo trese cune cu e costo di bida lo sigui subi sin misericordia y cu esnan mas humilde den nos comunidadlo bay pasa aun den mas duro cu locual nan ta pasando caba.
Nos di Partido Patriotico di Aruba. P.P.A., ya na varios ocasion a hasi yamada na Gobierno di Aruba, pero tambe na tur miembronan di Parlamento, pa saca un man pa yuda nos Pueblo, pero te dia di awe, ningun no por a duna nos Pueblo e balor di purba yuda e Pueblo di Aruba, cu asina hopi nan ta stima durante campaña.
Awor cu Parlamento ta den recesion, tin cierto Parlamentarionan cu bo no ta tende ni mira di nan, pasobra mientras cu nos pueblo ta sclama pa un ayudo, nan ta hopi dushi cu vakantie, y algun te hasta ta pafo di Aruba.
Nos ta hopi contento si, cu tin cierto medionan di comunicacion cu tin e mesun pensamento cu nos, cu mesterbin un rebaho of eliminacion completo di accijns riba gasolin y diesel, y esaki mas pronto cu ta posibely cu sigur hunto cu e Pueblo, nos lo logra e meta aki cual lo ta un alivio pa nos Pueblo.
Nos di P.P.A. lo no cansa y un biaha mas ta hasi un apelacion riba Gobierno y tur Parlamentarionan, pa pone man na boso curazon y pensa riba nos Pueblo, y no solamente ora ta tempo di campanja pa eleccion so, pero awor,

WILLEMSTAD - E protokòl firmá entre SVB, gobièrnu Sentral i Taams Kliniek pa proveé tratamentunan kardiológiko ku aktualmente ta posibel den eksterior ta enserá ku Taams Kliniek ta haña pèrmit pa hasi diagnóstiko koronario, tratamentu di kurason, operashon di kurason, implantashon di pacemaker i sirugia di kurason pa tur asegurado di SVB komo tambe otro pashèntnan. Pa esaki Taams ta garantisá, ku lo sòru pa e material, pèrmitnan i tur loke ta nesesario pa ehekutá e tratamentunan kardiológiko dos luna promé ku kuminsá ku e tratamentunan. Tambe Taams lo sòru di tin sufisiente personal i manera direktor Karel Bade a bisa durante konferensha di prensa, Taams lo buska spesialistanan for di eksterior (vlieg in). Ayera durante konferensha di prensa, Bade a bisa, ku e invershonnan inisial di infrastruktura lo ta alrededor di 1,5 mion florin i ku e proyekto total lo ta entre 5 pa 10 mion, suma ku nan lo mester pidi finansiamentu pe.
E partidonan, esta Taams, SVB i Gobièrnu Sentral a yega na e akuerdo aki, pasobra tin nesesidat urgente di solushon duradero i finansiero ekonómiko pa e problemanan den kuido médiko pa loke ta trata tratamentunan kardiológiko. Manera konosí for di 1 aprel SVB mes a keda enkargá di kuido médiko den eksterior pa su pashèntnan, algu ku tabata na enkargo di BZV den pasado. Promé ku esei ta GGD tabata na enkargo. Pa e pashèntnan di SVB, SVB tabata restituí e gastunan médiko na BZV.

WILLEMSTAD – Djasabra awor lo bai tin weganan di All-Star den stadion Johnny Vrutaal for di mitar di 1 di mèrdia kuminsando ku e All-Star Game Hubenil.
FeBeKo, e Federashon di Beisbòl di Kòrsou, ayera tardi mediante di e miembro di direktiva sr. Kenneth Pieter, den Chips & Ribs, a tene un rueda di prensa pa e dia di All-Star.
E All-Star Game di Klase AA ta tuma lugá ya ku e temporada a yega su mitar.
Federashon huntu ku e dos kuerpo téknikonan a forma dos selekshon, Pariba ku ta konsistí di e timnan Sta. Rosa Indians/Ennia, Wild Cats/Fatum/Kambes, Groot Kwartier Stars/Mangusa i Curaçao Yankees.
E tim di Pabou ta konsistí di e timnan: Sta. Maria Pirates/Chippie, Royal Scorpions Mr. Baseball/Banco di Caribe i Blue Hawks/Aqualectra.
Federashon kier a gradisí e spònsernan ku a koperá ku e fecha aki.
Insel Air a pone un deurprijs di un pasashi pa Repúblika Dominikana. Tambe tin un estadia na Savanah Resort pa e MVP di e wega. Lo tin trofeo pa e Home Run Derby, pa e ganadó di e tim Hubenil, e ganadó di e wega di Veterano I medaya pa tur hende. Amstel, Heineken, Sedreko i Pepsi Cola tambe ta spònser e evento.
Tambe GIO Fuertísimo lo animá e fanatikada ku bini promé ku e All-Star Game di AA i Aya lo kanta huntu ku Zoyoyo despues di wega.
E wega di Hubenil i esun di Veterano, lo ta grátis, pero pa e wega di AA entrada lo ta fl. 5,- general. Lo tin un sekshon di VIP ku lo kosta fl. 50,-, ku drinks i snacks.

 

Algun aña pasá, Bill Clinton, e tempu ei presidente di e nashon mas poderoso di mundu, a hañ’é den un labatiba formalmente. Un skandal di marka mayor, ku a drenta historia komo e “skandal Lewenski”. Ora ku e skandal aki a kue dimenshonnan ku kasi a kosta su presidensia, Clinton a buska yudansa di Lanny Davis, kende banda di ta un tremendo abogado, ta un berdadero “guru” riba tereno di relashon públiko i komunikashon den momentunan di krísis. Su eksperensianan di e skandal aki el a skibi den un buki ku el a yama “Truth to Tell: Tell It Early, Tell It All, Tell It Yourself: Notes from My White House Education”. E dianan aki mi no por yuda di pensa riba Lanny Davis. Sigur ora mi mira mi amigu direktor di Curoil, Gensley Capella su reputashon spat na wèrki. Esaki danki na un situashon ku den tur sentido di palabra, e por a kontrolá for di kuminsamentu.

E título di e buki di Lanny Davis ta deskribí e promé regla ku kapitannan di industria, direktor di empresanan grandi òf dirigentenan institushonal òf polítiko MESTER apliká ora nan haña nan den un situashon di potensial krísis. Bisa e bèrdat, bis’é tempran, bisa tur kos i bis’é bo mes! Lamentablemente nos den e huki di mundu aki ta sigui kere ku skonde kos, tapa kos òf purba duna bèrdat un “koló propio” ta e mihó manera pa atendé un situashon di krísis. Nada ta mas leu di bèrdat!

SHANGHAI – Esaki ta e resultadonan di weganan pa futbòl maskulino olímpiko di awe:
Oustralia 1, Serbia 1
Merka 1, Hapon 0
Brazil 1, Bèlgika 0
Italia 3, Honduras 0
Argentina 2, Costa di Marfil 1
Ulanda 0, Nigeria 0
China 1, Nuevo Zelandia 1
Sur Korea 1, Camerún 1

BEIJING – E pleitu enkuanto presensia di Lionel Messi, Diego i Rafinha den futbòl olímpiko a dal un buèlta masha grandi djarason ora Korte di Arbitrahe Deportivo a disidí na fabor di e klupnan den e kaso ku FIFA, i mesora despues dos dje klupnan ku tabata resistí pa entregá su hungadónan a kambia di idea i a outorisá nan partisipashon den e torneo.
Poko despues ku e desishon di korte (TAS) a bira konosí na fabor di Barcelona, Werder Bremen i Schalke, e klupnan aleman a kambia nan posishon i a outorisá Diego i Rafinha pa hunga ku Brazil.
Apesar dje desishon, Messi ke hunga pa Argentina na lugá di regresá serka su klup Barcelona, asina e treiner argentino Sergio Batista a bisa.
Barcelona a posponé e desishon enkuanto di e lo eksigí pa Messi regresá te ora ku e treiner papia ku e hungadó. Outoridatnan dje tim no por a tuma kontakto ku Messi na China, asina e direktor deportivo dje klup, Manuel Estiarte, a bisa na New York.
E treiner di Barcelona Pep Guardiola tabatin intenshon di bolbe yama Messi promé o despues di e wega amistoso di djarason anochi kontra Red Bulls di Liga Merikano. Barcelona tabatin programá pa regresá Spaña mesora despues dje wega.
Di su parti, Batista a bisa ku e delantero lo hunga djaweps kontra Costa de marfil, na kuminsamentu dje torneo.
E máksimo korte deportivo a señalá ku no tin un statüt ku ta obligá e klupnan pa entregá nan hungadónan menor di 23 aña pa hunga den Olimpiada

WILLEMSTAD – Partido Frente Obrero Liberashon 30 di Mei i su lider Anthony Godett kier a gradisí tur ku a koperá i asina e plan di vakashon Frente Obrero den kombinashon ku Fundashon Kontra Kriminalidat i Pobresa tabata eksitoso durante tres siman.
E promé dos simannan e muchanan partisipante a partisipá den diferente aktividat variá manera entre otro konosé otro, presentá nan mes i trese nan deseonan dilanti i traha den grupo.
Tambe e muchanan a bishitá diferente lugá manera The MOVIES, Giro Bank, Bestuurscollege, Estatua di Tula na Rif, KAE, Piskadónan na Rif, Marriot Hotèl, Rancho Herberg, Natuurfarm Scherpenheuvel, a bishitá tambe diferente playa i tambe kamper dos dia na Caracasbaai.
Den e último siman di e plan di vakashon, e muchanan entre di 12 pa 18 a sigui den un proyekto di fakansi di labor, kaminda e mucha repartí den diferente grupo i a bai limpia diferente skolnan públiko bou di kordinashon di Juniel Carolina i asina risibí un kompensashon i ku nan por a kaba di kumpra nan artíkulonan di skol.
Partido Frente Obrero Liberashon 30 di Mei ta di opinion, ku na solamente den temporada di fakansi mester organisá aktividatnan di plan di vakashon i asina kita muchanan for di kaya den temporada di fakansi.
Mester tin programanan di aktividat variá di henter un aña i ta bai kuminsá bini ku aktividatnan tur luna pa eduká e muchanan riba balor, rèspèt, disiplina, rekreashon i tambe kombiná ku aktividatnan labor.

ARIES: Tur e simianan ku bo a sembra den pasado ta duna su frutanan muy pronto. Bo ta mas serka pa dediká bu na bo asuntunan personal. 07,49,14.

TAURO: Bo bon suerte ta bin den e próksimo dianan si bo ta positivo. Tur kosnan soñá ta kosta trabou i lo ta hopi ku ta keda maravioso ku bo briante ideanan. 25,13.

GEMINIS: Bo ta lusi mas fuerte den bo eksterior, pero den bo interior bo ta sigui siendo tierno i komprensivo. Laga ku mundu ta disfrutá di kosnan bunita di bo. 08,40,21.

KANSER: Enemigunan ta trata di afektá bo imágen, pero mas bon ta enkubrí bo komentarionan. Nada i niun hende por lagabu rabia. Dera tragedianan di amor. 11,05,38.

LEO: Desaroyá un gran pasenshi i komprenshon. Rekonosé ku ta inútil sigui den guera kontra mundu. Korigí e kosnan ku ta afektábu. 33,26,41.

VIRGO: Kontrolá bo mes mentalmente, no inventá loke no ta realidat, ni alimentá pensamentunan robes. Skucha konsehonan i sugerensia di tur hende. 09,31,14.

LIBRA: Kuidou ku kompliká bida ku problemanan o trata di ser un dios tratando di salba mundu. No permití ku nada mester bai robes pa e motibu ei. 32,46,16.

SKORPION: Erornan di ayera ta wòrdu drechá ku un aktitut mental nobo. Duna mayor importansia na bo profeshon. Éksito ta yega sorpresivamente. 44,03,29.

SAGITARIO: No permití ku miedu ta parilisábu pa lansa aventuranan profeshonal nobo. Plania asuntunan di kompra i benta. Bo amigunan ta awor manera bo angelnan di lus.

WILLEMSTAD – “Djamars otro siman parlamentu di Antia ta reuní riba petishon di Gobièrnu Sentral, pa diskutí e último desaroyonan di e investigashon riba eventual presensia di petroli i gas den awanan teritorial di nos pais”.
Esei ta loke Pedro Atacho, presidente di Staten di Antia a konfirmá durante un enkuentro ku prensa ayera. Staten di e forma ei ta reanudá su aktividatnan despues di un resès di algun siman.
“Ta na su lugá pa nos sigui atendé e investigashon aki”, asina Atacho a bisa ayera.
Manera LA PRENSA a informá den forma ekstenso kaba ayera, e promé indikashonnan ta mustra ku tin bon posibilidat ku tin gas den e awanan rondó di nos islanan. Manera ta konosí, University of Texas a hasi un sondeo i análisis pa weta si tin petroli i gas natural den nos awanan teritorial.
E promé indikashonnan ta alentador, segun e promé mandatario di Kòrsou. El a bisa sinembargo, di no ke bai den detaye riba loke ta riba mesa, pero ke informá Staten ofisialmente promé.
“Esei lo tuma lugá djamars awor”, asina Atacho a informá.
El a bisa, ku lo papia riba posibel presensia di gas i petroli den nos awanan teritorial, riba inisiativa di promé minister Emily de Jongh-Elhage.
Atacho a splika despues di e trabou di University of Texas a keda kla, a aserká e eksperto di Jamaica profesor Simon Mitchell ku a hasi un análisis di e investigashon di University of Texas. E análisis aki di profesor Mitchell entretantu a yega gobièrnu antiano.

WILLEMSTAD – “Gobièrnu antiano ta bai stòp di manda pashènt di kurason eksterior. Ayera tardi, minister di Salú Públiko Omayra Leeflang, direktor di Banko di Seguro Sosial drs. Philip Martis i direktor di Klínika Taams Karel Bade a firma un protokòl pa lanta un departamentu pa duna kuido kardiológiko aki na Kòrsou mes”, asina partidonan a anunsiá ayera tardi.
For di 1 di aprel di e aña aki, Bestuurscollege di Kòrsou a informá Gobièrnu Sentral ku e no ta manda pashènt mas pa eksterior pa trato di kurason atraves di Bureau Ziektekostenvoorzieningen, BZV.
“Esei a hasi naturalmente ku nos mester a tuma akshon pa atendé ku e pashèntnan aki”, asina e minister a informá.
Pa luna, ta manda un promedio di 10 pashènt ku problema di kurason pa tratamentu eksterior. E paisnan kaminda e pashènt ta bai ta Ulanda, Venezuela i Colombia.
E 10 porshento aki ta mas o ménos 25 porshento di tur kaso kaminda ta manda pashènt eksterior.
Esaki ta sali gobièrnu un suma di mas o ménos 25 mil dollar pa kada kaso. Ta un montante hopi haltu ku nos situashon finansiero en realidat no por produsí, segun e minister.
El a bisa, ku e desishon pa duna tratamentu lokalmente, ta kumbiní e pashèntnan mes, ku ta keda den su ambiente di kas i famia. Ademas e ta kumbiní gobièrnu finansieramente, pasobra tratamentu aki lo no kosta asina tantu manera ora di manda hende afó. Ta bin aserka, ku tur devisa ta keda Kòrsou.

WILLEMSTAD – “Tur shofùr di ministernan lo pasa finalmente pa Landelijke Beveiligingsdienst, LBD. No a privilegiá e shofùr di promé minister den esaki. Loke ta pasa ta, ku el a kana dilanti den e trayekto di traspaso, anto p’esei el a bira e promé ku a pasa over”, asina minister di Hustisia di Antia David Dick a deklará.
Minister Dick a konsiderá nesesario pa aklará e punto aki, despues ku ayera a sali den vários medio di komunikashon ku lo a nombra e shofùr di e aktual promé minister na un puesto na LBD, sugeriendo ku e nombramentu aki lo no a kana manera mester ta.
Minister David Dick a splika ku Konseho di Minister a tuma un desishon di prinsipio for di 18 di mart, ku e shofùrnan lo pasa pa e entidat LBD. Esaki, en konekshon tambe ku desaroyonan riba tereno di struktura estatal, el a bisa.
Segun minister Dick, a tuma e desishon for di mart ku tur shofùr lo pasa over sea komo shofùr òf komo bode. A tuma e desishon aki tambe basá riba e hecho, ku e shofùrnan de fakto ta funshonando kaba den sierto sentido riba tereno di protekshon pa e mandatarionan.
Un punto importante mas ta e hecho ku e kantidat di shofùr ta bira mas grandi, di manera ku den futuro e mandatario tin e eskoho entre mas hende.
Ta konosí ku awor aki tin diputado ku tin preferensha pa traha ku sierto hende si i otronan no. Mirando e desaroyo aki pa futuro, ta bon ku awor un mandatario asina tin mas eskoho, e titular di hustisia a enfatisá.

WILLEMSTAD – “Gobièrnu a bolbe demostrá, ku e no por planifiká na drechi. Kon bo por anunsiá den porta di un aña eskolar ku un studiante mester bai paga 3 mil florin, na lugá di 300 ku el a paga semper?” asina Sidney Justiana kende ta presidente di e sindikato di trahadónan den enseñansa SITEK a puntra relashoná ku loke a sosodé ku studiantenan di Akademia Pedagógiko.
“Mi ta spera ku partidonan por sinta na mesa manera hende grandi i resolvé e asuntu aki, na benefisio di nos muchanan”, asina e presidente di SITEK a deklará.
Firmamentu di e protokòl entre UNA, APK i Bestuurscollege a tuma lugá dia 9 di yüli último, Na e okashon ei diputado Alcalá- Wallé a sigurá, ku e kombenio lo no tin efektivo negativo pa e aktual studiantenan di Akademia Pedagógiko.
Pero ta parse awor ku ta nèt kontrali, segun e presidente di SITEK.
Ta parse ku aña eskolar no por kuminsá sin problema, asina Justiana a remarká. El a mustra, ku kambio por tin semper. Esei riba su mes no ta problema.
“Pero si gobièrnu bai di akuerdo ku un kambio, ta mas ku lógiko ku gobièrnu ta informá esnan konserní promé tòg? Nos ta haña, ku mester a informá e studiantenan tempran, pa nan por a disidí kiko nan ta hasi. Bo no por anunsiá un kos asina fundamental dos dia promé ku skol start. Esaki ta un ehèmpel kla ku gobièrnu no ta planifiká manera mester ta,” e presidente di SITEK a bisa.

WILLEMSTAD – Debí na e All-Star Game di Klase AA ku lo tuma lugá djasabra awor den stadion Johnny Vrutaal, e weganan di Klas A, ku tabata programá pa djasabra awor a keda kanselá.
E weganan aki tabata:
Sta. Maria Pirates/Chippie kontra di Curaçao Yankees na Tio Daou, Real Athletics kontra di Groot Kwartier Stars/Mangusá, na Bonam i banda Abou City kontra di Wild Cats/Fatum/Kambes, tur tres programá pa kuminsá pa mitar di 3 a keda kanselá.
E weganan di djadumingu sí ta sigui normal konforme e skèdjel.