Den un artíkulo ku nos koresponsal na Ulanda di e tempu ei, Bob Harms, a skibi tokante e asuntu aki na 2005, a mustra kaba riba e posishon hurídiko fuerte di Ulanda den e kaso aki. Awe LA PRENSA ta ripití e artíkulo aki, komo ku awor ku Raad van State a mustra ku no tin nada ilegal pa bini ku un banko di data speshalmente pa hóbennan antiano, no keda ningun estorbo legal pa stroba instrukshon di e otro leinan, esta esun pa manda hóbennan antiano bèk nan isla di prosedensha den kaso ku nan kometé un krímen.

DEN HAAG/WILLEMSTAD. – Apesar di tur e krítikanan di gobièrnu antiano/arubano i di e komunidat antiano/arubano na Ulanda kontra e medidanan ku ministernan Verdonk i Pechthold a anunsiá, mester bisa ku tòg e posishon hurídiko di gobièrnu di Ulanda ta mas fuerte ku loke na promé bista ta parse. Un análisis hurídiko ku LA PRENSA a hasi ta mustra ku tantu e aspekto pa ninga hóbennan sin perspektiva pèrmit di residensha na Ulanda, komo esun pa manda hóbennan ku a kometé un krímen bèk pa nan isla di nasementu tin debidamente un base legal den leinan eksistente den reino ulandes. Banda di esei, e intenshon pa bini ku un banko di data den kua ta registrá datonan di e asina yamá “risicojongeren” aki no ta ilegal, sigur si konsiderá ku e no ta kontra stipulashon di e leinan ku ta garantisá privasidat di siudadanonan, ni tampoko por konsiderá esaki komo rasial. Tur kos ta mustra ku Verdonk i Pechthold debidamente a hasi nan hùiswèrk den e asuntu aki.

WILLEMSTAD – Sr. Urny Floran ta yama e organisashon di “Crème de la Crème” masha danki pa e echo ku nan skohe sra. “Yaya” Klabeer komo e persona ku nan ta dediká e kampionato na dje. “Yaya” Klabeer ta miembro di direktiva di Liga Pariba i ta trahando 34 aña komo boluntario den Little League na Kòrsou.
Sr. Floran ta haña hopi importante ku “Crème de la Crème” ta e organisashon na Kòrsou ku ta duna oportunidat na hóbennan ku no a haña chèns pa partisipá na un torneo internashonal tòg e oportunidat di hasi esaki.
Sr. Urny Floran ta haña ku no mester balotá e importansha di “Crème de la Crème” den desaroyo di beisbòl den komunidat.
Sr. Floran a kuminsá yuda den e organisashon di “Crème de la Crème” durante e di dos torneo, sin ku ningun hende a pidié. Na aña 2005 riba petishon di sr. “Lando” Chirino, sr. Floran a fungi komo presidente. E ta haña ku “Crème de la Crème” tin éksito dor ku sr. Chirino a desaroyá un abilidat pa skohe su personanan pa fungi komo organisadó i tambe ayudante den e organisashon di “Crème de La Crème”.
Sr. Floran ta spera ku e torneo ta sigui i duna mas hóben oportunidat pa partisipá den e torneo. Ta kòrda ku durante di un spich komo presidente na 2005 el a enfatisá ku e hóbennan mester ta kampion riba tereno, na skol, na kas, den bario, na Kòrsou, den Antia i den Reino.

WILLEMSTAD – Djadumingu último tabatin e último buèlta di e Kampionato di Dam Individual Senior 2008 riba e promé piso di Hotel San Marco.
E partidonan den e último buèlta di e kampionato di Dam di Kòrsou tabatin e siguiente resultadonan:
Victor Miguel-Mijail Eisden 1-1
Raoul Alias-Gedion van Eiken 2-0
Nelsen Angela-Antonio Marquita 2-0
Franklin Maduro-Pino Wilson 2-0
Marvin Leocaria-Leonardo Cadeau 2-0.
Nelsen Angela a logra keda ku un punto di bentaha riba su konkurensia más serkano i pa asina bai ku e título di kampion di Kòrsou 2008.
Durante entrega di premio di e kampionato ku un biaha mas a keda di spònser pa San Marco Hotel i Fundashon Sedreko, señor “Cocochi” Prins a elogiá e hungadónan pa e ambiente deportivo i amikal ku semper ta reina den e sala di wega durante e kampionato i señor Prins a bisa tambe ku por lo pronto nan lo keda spònser e kampionato di Dam di Kòrsou.
E stènding final di e kampionato tabata lo siguiente:
1. Nelsen Angela 10-18
2. Raoul Alias 10-17
3. Marvin Leocaria 10-14
4. Antonio Marquita 10-13
5. Mijail Eisden 10-13
6. Glenn Monk 10-10
7. Pino Wilson 10-8
8. Franklin Maduro 10-7
9. Gedion van Eiken 10-5
10. Victor Miguel 10-3
11. Leonardo Cadeau 10-2
Ku e resultado final aki, Nelsen Angela, Raoul Alias i Marvin Leocaria a klasifiká pa bai representá Kòrsou den e Kampionato di Dam Pan-Amerikano ku lo tuma lugá den fin di òktober na Grenada.

WILLEMSTAD – Fundashon SMOC ta lamentá ku mester sera skolnan temporalmente pa motibu di e polushon di Refineria Isla. Ayera direktiva di Emmy Berthold College a hañ’é obligá na sera e skol, pa motibu di e oló di Isla ku tabata alkansá e skol. Den deklarashonnan ku Peter van Leeuwen, dje fundashon SMOC a hasi, el a indiká ku ta un situashon tristu, pero entretantu ta trata di un situashon konosí na Kòrsou. “E no ta sorpresá nos”. Miéntras ku no tin mantenshon pero ta wòrdu posponé, e situashon ta bira mas pió, van Leeuwen, a atvertí.
Van Leeuwen a bisa tambe ku Servisio di Medio Ambiente ta na altura ku tin problema. Tambe nan ta na altura ta kua parti di e instalashon di e Refineria no ta funshoná bon. Pero loke ku ta bai den airu i kuantu ta bai den airu, nan no por divulgá i naturalmente esei ta un asuntu lamentabel ora ku no ta konosí ofisialmente ta kiko ta polushoná e airu, pero sí ku muchanan ta bira malu.
E presidente di SMOC a indiká, ku e fundashon tin algun kaso ta kana tantu kontra Isla i gobièrnu. E preguntanan ku SMOC tin años ta hasi, ta wòrdu kontestá via di kasonan den Korte. I ta for di e kasonan ei, segun van Leeuwen, a resultá kon serio e situashon ta i ku Isla ta debidamente na altura di e situashon. Ta masha kla ademas, ku tin falta di tur kos, ku mester wòrdu hasí pa evitá ku asina tantu polushon ta bai den airu, ku e siman aki ta pone ku entre otro e muchanan mester bai kas. Ademas e skolnan por wòrdu evakuá, pero e muchanan ta biba tambe bou di e huma, loke ta nifiká segun van Leeuwen, ku e problema no ta wòrdu solushoná.

WILLEMSTAD - Raad van State, den apelashon a disidí ku Ulanda por instituí e banko di dato pa antiano i arubanonan problemátiko. E interpretashon di esaki mester ta, ku ta trata di un asuntu ku a bira un hecho. Asina presidente di Parlamento, Pedro Atacho, a splika. Manera ta konosí gobièrnu ulandes a bai den apelashon riba e desishon di Korte di promé instansha i e desishon di Raad van State ku ta ‘bindend’, ta duna gobièrnu espasio pa introdusí e índise di referensha pa hóbennan antiano. E presidente di Staten a trese dilanti ku e punto aki ta di lamentá, si tene na kuenta ku organisashonnan antiano na Ulanda, entre kua OCAN i MAAPP, a ekspresá nan mes fuerte kontra e registro aki. Ademas parlamento antiano tambe unánimamente a rechasá e índise aki.
Durante di e enkuentro parlamentario, tabatin algun frakshon ku a duna di konosé ku nan no ta masha di akuerdo pa introdusí e índise di referensha. Ta p’esei, segun Atacho, awor ta interesante pa mira kiko Tweede Kamer ta opiná riba e desishon di Raad van State. Mester warda pa wak si e miembronan di Tweede Kamer ta sostené e intenshon di minister Ella Vogelaar pa instituí e banko di data pa antiano i arubianonan. Pero segun e presidente di Staten tur frakshon ta di akuerdo pa ehekutá e proposishon di minister Rouwvout, ku ta proponé pa registrá tur hóben na Ulanda. Esaki, sin ku ta deskriminá ningun grupo.

WILLEMSTAD - Ayera a tuma lugá kontinuashon di e kaso di e dòkternan di kas, di 27 di mei último, kontra gobièrnu di Kòrsou. E médikonan di kas, ayera a sali viktorioso den e kaso aki. Manera ta konosí e kaso na mei a tuma lugá ku un bon akohida i presensia di médikonan den sala di Korte. Den deklarashon ku dòkter Yves Schoop, bosero di e médikonan di kas, a splika ku e dòkternan ta hopi satisfecho ku e veredikto i a resultá positivo pa nan. Esei ta nifiká segun dòkter Schoop ku despues ku minister Omayra Leeflang unilateralmente a baha e tarifa di médiko na 2001, hues a disidí ku ta ku fòrsa retroaktivo mester subié i mand’é kaminda e mester tabata for di 2001.
Promé ku sèptèmber 2001, e tarifa tabata di asegurado di SVB, pa aña, Nafl.133,38. E minister a baha e tarifa ku 10 florin, pa aña, pa pashènt i hasié Nafl. 123. E akto aki a wòrdu risibí komo algu hopi inhustu di parti di e minister. Ademas, segun Yves Schoop, esaki a tuma lugá despues ku e médikonan a firma un protokòl enkuanto bahamentu di gastu di salubridat. “Nos a haña un fastball despues di algun luna, despues di a firma pa yuda baha e gastunan den sektor di medisina”.
Schoop a ekspresá e satisfakshon relashoná ku e veredikto, pasobra manera el a splika, durante e añanan ku e tarifa redusí tabata vigente, e médikonan mester a usa for di e parti di salarial, pa nan por a kubri e parti di e subida di e gastunan ku ta hinká den e tarifa. Esei tabata nesesario pa keda mantené e mesun kalidat di servisio, ku e dòkternan ta deseá na duna e pueblo. “Nos ta kontentu ku esaki ta bai bèk, unda ku e mester ta. Pasobra esei ta e úniko forma ku e médikonan di kas por sigui garantisá e mesun nivel di kuido, ku e minister mes ta boga p’e”.

WILLEMSTAD - Fun Walk djadumingu mainta a inisiá su siman den kual e ta kumpli 12 aña, ku un Kaminata pa tur persona riba 60 aña. Ta asina ku dia 3 di sèptèmber, esta djarason awor, Fun Walk ta kumpli 12 aña.
Esaki ta un regalo na komunidat.
Lamentablemente no por a invitá henter pueblo di Kòrsou. P’esei Fun Walk a skohe pa e Grupo di 60 aña pa ariba.
Tur persona mas hóben mester tin un famia, padrinu, madrina, amigu òf konosí riba e edat ei ku nan por a inskribí pa e kaminata.
Kanamentu mainta tempran den airu fresku ku poko polushon ta saludabel i plasentero. I kanamentu no ta kosta kasi nada.
Tabata un plaser pa mira e hendenan aki kana na Caracasbaai bai te na e rotònde na Jan Thiel Beach i regresá e plenchi na entrada di Baya Beach.
E rutanan tabata di 1, 3 i 5 km.
E gran mayoria di partisipantenan a kana e ruta kompleto.
Na final a repartí awa, fruta, djus, sòpi i esaki no ta falta na kaminatanan di Fun Walk e pakete pa tur kanadó regresá kas ku ne.
E dia tabata tremendo i tur partisipante a gosa di e kaminata i nan a pidi pa mas.
E kanadó ku mas edat esta Francis Hoyer di 82 aña a risibí un premio di Fun Walk.
A lòt diferente premio entre e partisipantenan.
Promé ku tur lokual a ser bisá mas ariba tabatin orashon hasí pa Greta Jansen, siguí ku Himno di Kòrsou kantá pa Monica Pieternella kompañá musikalmente pa Signiel Felida.

NEW YORK – Nan ta kompartí famia i deporte. E spònsernan i e treiner ta nan mes, meskos ku un regularidat di logronan den Grand Slam ku ta superá nan rivalnan.
Pero Venus i Serena no ta hasi tur kos huntu. Den nan práktika djamars pa nan wega di kuart final di e torneo habrí di Merka, e rumannan a buska kanchanan pegá ku otro.
Nan sa trein huntu. Pero no e biaha aki. Klaru ku nò ku loke tin den e wega awe nochi ora nan topa pa di 17 bia komo profeshonal. Nan tata, kende huntu ku nan mama sa kambia ku otro pa trein nan.
Mas lat, ora e ensayo a kaba, e rumannan kada unu a bai nan mes direkshon di Flushing Meadows. Miéntras Serena tabata kana su so den e zona di parker, mirando mensahenan di teksto riba su selular, nan a puntr’é ku ya a stòp di ta duru di tin ku mira na e otro banda di nèt durante un wega i mira Venus. “Kada biaha ta bira mas fásil”, Serena a bisa.
E rekòrt di nan dos ta 8-8 i tambe ta empatá na 5-5 den weganan di Grand Slam.
Nan duelo pa e título di Wimbledon na yüli, ora Venus a kue su di sinku título den All England Club, el a ninga ku e tabata e di tres di Serena, a karakterisá su mes pa potensia i presishon. Nan ta hunga un tènis di nivel haltu ku kasi semper nan ta demostrá kontra e otro muhénan, pero kua a resultá duru pa nan mustra den e sitanan grandi.
Finalmente, o ta haña e impreshon, ku nan ta laga un banda e detaye di ku nan ta ruman i ta habri afó kontra otro.

WILLEMSTAD, - Gobièrnu ulandes tin mag di lanta un banko di informashon ku datonan personal di hóbennan antiano i rubiano problemátiko na Ulanda. Esei ta loke Raad van State a konkluí despues di a studia e asuntu aki.
Ku esaki, Raad van State, ku ta ser konsiderá komo e órgano hudisial di mas haltu di pais, a destruí e desishon di Korte di Den Haag den sentido ku e banko di informashon ta violá e prinsipionan di Wet Bescherming Persoonsgegevens.
Verwijsindex Antillianen, VIA, manera e areglo yama ofishalmente pa hopi tempu kaba, ta un sumpiña den wowo di tantu gobièrnu i Parlamento antiano i rubiano komo e organisashon di ulandesnan karibense na Ulanda, OCaN.
E argumento prinsipal ta ku e registrashon di informashon aki di hóbennan antiano i rubiano ta basá riba e aspekto ètniko i ta diskriminatorio.
OCaN, a papia den pasado di un banko di informashon di rasa.
Manera ta konosí, Antia ta fuertemente kontra e banko di informashon aki. Parlamento antiano den pasado a tuma un posishon skerpi, aseptá un moshon den forma unánime kontra e intenshon aki di gobièrnu ulandes.
Frakshonnan den Parlamento a kondená e hecho ku gobièrnu ulandes ta tratando kuesta loke kuesta, di introdusí un tipo di registrashon pa antianonan na Ulanda. E idea a nase tempu di (awor eks) minister Rita Verdonk ku kier a haña un bista di hóbennan antiano ku ta kousando molèster riba teritorio ulandes. Su argumento tabata ku e hóbennan aki ta masha ambulante i no ta inskribí na niun munisipio. Ta trata aki di hóbennan te ku 25 aña.

WILLEMSTAD, - Tur akshon di kompanianan anónimo di gobièrnu, mester bini bèk den man di gobièrnu. Ku e meta aki, Konseho Insular den forma unánime a tuma un desishon ayera nochi na final di e reunion pa diskutí desaroyonan na Aqualectra.
Mester remarká mesora ku diputado Humprey Davelaar, tabata hopi ekstenso den su krítika riba e forma ku otronan ta strob’é di funshoná.
El a ilustrá su ponensha mustrando ku ta konosí ku ámtenarnan, ku no ta di e mesun koló polítiko di su partido, ta pone traba konstantemente i ta pone ku kosnan no ta kana. El a papia aki spesífikamente di hefenan di servisio ku no ta hasi nan trabou manera debe ser.
Davelaar a referí tambe na Gregory Damoen, bisando ku tempu Damoen tabata direktor di Departamentu di Finansa, el a pone bastante traba pa mandatarionan bou di kua e tabata kai.
Den e reunion di ayera, frakshonnan den Konseho Insular a dediká basta tempu na e situashon kaminda ta StIP ta doño ekonómiko di kasi tur kompania di gobièrnu.
Algun aña pasá koalishon a tuma e desishon pa pone akshonnan di kompanianan di gobièrnu na un distansha, pa asina evitá ku polítika ta penetrá den e kompanianan aki. A yega na e konstrukshon di lanta un fundashon, Stichting Implementatie Privatisering (StiP) i a hinka tur e akshonnan aki den e fundashon.
Pero atrabes di añanan diferente partido polítiko a kuminsá nota ku esaki no ta funshoná manera nan a kere. A surgi e deseo pa revoká e desishon aki i for di algun koalishon atras, a fiha eliminashon di StIP komo un dje puntonan di salida.

WILLEMSTAD, - Promé minister di Antia no ta masha inkliná pa bolbe bai diskutí posponementu di kòmbersashonnan ku mester kondusí finalmente na desmantelashon di Antia.
E fecha ku nos a fiha pa e siguiente konferensha di mesa rondó ta keda para i nos lo hasi tur loke ta den nos alkanse pa logra esaki tambe, asina el a bisa den un promé reakshon riba sekretario di estado pa Relashon den Reino Ank Bijleveld-Schouten.
Ank Bijleveld a bisa e siman aki den entrevista na Radio Nederland Wereldomroep ku e ta preokupá pa e siguiente konferensha di mesa rondó ku ta programá pa tuma lugá dia 15 di desèmber awó. Tin hopi trabou ku mester tuma lugá, anto mi no ta weta kon esei ta kaba na tempu. Ku e komentario aki, Bijleveld a duna mas bida na rumornan di último dianan den sentido ku e konferensha di mesa rondó aki lo no sigui mas.
Por dedusí esei for di e relatonan ku Bijleveld a manda pa Parlamento ulandes resientemente, informando Tweede Kamer riba e último desaroyonan riba tereno estatal. Bijleveld a rekonosé ku tin motibu pa preokupashon. Tin basta kos ku mester hasi ku no ta kla ainda.
Kontrali na e impreshon ku ta reina sinembargo, no ta e saneamentu di debe ta e problema. El a bisa ku e preokupashon ta mas grandi kiko ta bai pasa despues ku fiha e fecha pa desmantelashon. Un preokupashon adishonal, segun Bijleveld a rekonosé, ta e situashon di St. Maarten. Ademas e lei di konsenso ku mester regla institushon di e kuerponan polisial nobo ta birando un menasa pa e kòmbersashonnan.

DEN HAAG / WILLEMSTAD, - Na Amsterdam i sinku otro siudat di Ulanda kaminda tin hopi antiano ta biba ku ta okashoná molèster, mester bin programanan ekstenso di yudansa pa e hóbennan aki. Ku esaki tin un montante enbolbí di mas o ménos 9 mion euro, asina Tasforce Antilliaanse Nederlanders a rekomendá gabinete Balkenende. Ta parse ku gobièrnu, den e kaso aki spesífikamente minister Ella Vogelaar ta reseptivo pa e pensamentu aki.
Taskforce ta papia di un programa masal, struktural di mas aña ku mester duna e resultado deseá. Taskforce ta bou di guia di Hans Andersson.
Aparte di Amsterdam ta trata di Rotterdam, Den Haag, Almere, Tilburg i Dordrecht. Den e siudatnan aki tin 95 porshentu di antianonan ta biba ku a yega Ulanda despues di 1995.
Taskforce ta konsehá pa konsentrá e programa di rehabilitashon riba e grupo di hóben antiano aki, ku ta konsistí pa un gran parti di hóbennan sin formashon for di Kòrsou.
Promé ku 1995, hóbennan antiano ku tabata bai Ulanda pa sea bai traha òf pa sigui un karera.
Gobièrnunan munisipal mester sòru pa e hóbennan aki òf ta bayendo skol, òf tin trabou, òf ta kai den e grupo ku ta hañando yudansa sosial òf ta den e trayekto hudisial.
Mester bin un programa ku ta karakterisá pa esfuersonan obligatorio pa di e forma aki hiba e hóben bèk riba e kaminda korekto.
Pa e trabou aki, Taskforce ta pidi un montante di 9 mion euro pa aña di gobièrnu federal. Tasforce ta pidi e mesun montante di e gobièrnunan munisipal.

CliniClowns a establesé su mes definitivamente na Kòrsou

WILLEMSTAD - CliniClowns tei pa laga e muchanan enfermo ser mucha atrobe. Esaki ta e mensahe prinsipal ku Fundashon CliniClowns Curaçao a laga resaltá durante di e konferensha di prensa ku a keda tené djamars 2 di sèptèmber. Pa medio di payasonan ku ta bishitá muchanan enfermo na hospitalnan distraishon i plaser ta keda ofresé na e muchanan aki ku ta den un situashon ferfelu.
E instalashon ofisial di e direktiva ku ta konsistí di Frank Kunneman (Partner di VanEps Kunneman Van Doorne), Steven Martina (Direktor di Fatum), Kenny Canword (Direktor di Orco Bank), Mike Willemse (Direktor di Antilliaans Dagblad) i Raiza Gönenli-Pardo (Asistente di Direktor Médiko / Hunta di Direktiva di St. Elizabeth Hospitaal) a keda efektuá i esaki ta nifiká e inisio ofisial di CliniClowns na Kòrsou.
Aparte di e instalashon di e direktiva tambe a firma un kontrakt di spònser ku CliniClowns Nederland. Parti di e kontrakt di spònser aki ta e asistensia artístiko pa CliniClowns Curaçao. E asistensia aki ta konsistí di prinsipalmente duna training i konseho na e payasonan di Kòrsou, ku pronto lo kuminsá bishita hospitalnan riba nos isla.
Dòkternan den diferente pais manera Hapon, Merka, Rumania i Ulanda ta rekonosé distraishon di muchanan enfermo komo un manera pa kontribuí na rekuperashon di e muchanan aki. E presensha di payasonan den hospitalnan ta duna muchanan ku un enfermedat òf un deshabilidat físiko òf mental distraishon i plaser i ta kontrarestá tambe nan isolashon òf ku nan ta fèrfelá nan mes.

WILLEMSTAD - Kiwanis Klup Kòrsou ta organisá un grandioso Wine, Cheese and Pasta fundraising festival djasabra 13 di sèptèmber 2008 na Villa Maria Skalo.
Ku e meta pa rekoudá fondo pa e diferente proyektonan sosial di Kiwanis Klup Kòrsou, e klup di servisio aki ta organisá e grandioso Wine, Cheese and Pasta festival aki.
E último Wine, Cheese and Pasta festival tabata un éksito rotundo i hopi tabata e hendenan ku a puntra ki dia ta bolbe organisá e evento aki.
Kumpliendo ku diferente petishon, Kiwanis Klup Kòrsou a disidí di bolbe organisá e aña aki e aktividat aki. E último biaha Villa Maria a resultá di ta e sitio ideal.
Durante di e anochi biñanan di diferente pais lo wòrdu sirbí i tambe lo tin masha hopi sorto di keshi i delisianan di keshi. Tambe lo tin un variedat di pasta i e públiko ta haña e oportunidat di strek e pianan, gosa i baila riba ritmo di dos banda ku ta Rydd ‘m i Son CC. Tambe Kiwanis a sòru pa tin algun premio di porta masha atraktivo. Henter Villa Maria lo ta dòrná den un ambiente akohedor i úniko. Lo tin vigilansha pa outo pa sigurá ku tur partisipante por gosa i bai nan outo trankil despues di e fiesta.
Tur fondo ku optené ku e fiesta aki ta bai pa e diferente proyektonan sosial ku Kiwanis Klup Kòrsou ta spònser. Pues asistiendo na e evenemento aki no solamente un persona lo pasa un anochi sumamente agradabel pero na mes momentu e ta koperá ku un bon kousa.

WILLEMSTAD - Tin problema ku resepshon di e kanalnan BVN i RNW (Radio Nederland Wereldomroep) den e region di Merka i Karibe. Pa algun tempu kaba televidentenan na e parti nort-, zùit-, sentro- Amérika i tambe Karibe, de bes en kuando ta enkontrá problema di resepshon di e kanal di televishon BVN i e señal di satélite di Radio Nederland Wereldomroep.
BVN i Wereldomroep ta bezig ta wak e orígen di e problema. Miéntras tantu ta konosí kaba ku e tempu malu ku tin den region di Washington por ta e kousa di e resepshon malu di e señalnan.
E señal di BVN ta wòrdu mandá via di Washington. BVN i RNW ta hasiendo nan máksimo esfuerso pa resolvé e problema aki mas lihé posibel, ya asina tur hende por sigui gosa di e resepshon kustumbrá di tantu BVN komo RNW.
Un fecha definitivo no por wòrdu duná ainda, dor ku TDS ta dependé di algun distribuidor.
Pero espektativa ta ku den algun siman esaki lo keda resolvé.
TDS ta pidi komprenshon pa e situashon aki i asina tin otro desaroyo lo informá pueblo esaki.

WILLEMSTAD - For di e aña aki den luna di yüni, Landhuis Brakkeput Mei Mei ta organisá un show di mucha, riba e di dos djadumingu di luna. E luna aki e show ta wòrdu presensiá riba e di promé djadumingu di luna ku ta 7 di sèptèmber.
E show di mucha aki, ta un fiesta pa muchanan ku tur luna ta wòrdu bishitá pa un públiko grandi. Esaki ta wòrdu hasí posibel ku e koperashon di Tanchi Millie, Tom Presti, Gini komo MC, Albert Hein i Bruna.
E show ta speshal pa mucha for di 3 aña, ku un programa di diferente parti ku ta konsistí di 10 minüt ku un pousa di mas o ménos 15 minüt.
E idioma prinsipal di e show ta ulandes, tin algun parti ku ta un kombinashon di papiamentu i ulandes. E MC ta presentá e show den tur dos idioma.
E show ta di 16:30 pa 18:00, karchi ta kosta solamente Naf.5,-- i ta disponibel na Albert Hein, Bruna, Landhuis Brakkeput Mei Mei i Marine Basis Parera.

WILLEMSTAD - Direktiva di Skolnan Katóliko (RKCS) ta muda e siman aki di Skèrpènè pa Julianaplein 23, St. Aloysius Trainingcentrum. Despues di a funda RKCS na 1974, nan ta situá den Abraham de Veerstraat 12. Promé di ougùstùs 1974 e internat na Skèrpènè a sera su portanan i RKCS a kuminsá nan mudansa pa Skèrpènè, kaminda pa 34 aña nan a biba.
Dia Fraternan a bai Ulanda na 1995, nan a pasa e edifisio monumental aki den man di Fundashon “ Sint Thomascollege”. Di nan RKCS ta hür henter e piso abou.
Originalmente e intenshon tabata, pa for di yanüari 2008 RKCS muda pa Julianaplein 23, pero pa motibu di asuntunan formal i hurídiko ku nan mester a atendé ta e siman aki numa e mudansa ofishal por tuma lugá.
Den nan edifisio nobo, RKCS ta ubiká muchu mas sentral, i nan ta mas fásil aksesibel pa nan klientenan i otro stakeholders. Den mesun rosea nan ta hopi serka di e otro institutonan di Obispado.
Anteriormente ta usa St. Aloysius Trainingcentrum pa duna tur sorto di training i tambe kursonan di rekapasitashon i e tabata kas pa Bureau Nascholing i tambe pa Fundashon Mantenshon di Skolnan.
En konekshon ku e mudansa aki, ofisina di RKCS lo ta será pa públiko riba djaweps 4 i djabièrnè 5 di sèptèmber.
Entrante 8 di sèptèmber Direktiva di Skolnan Katóliko ta alkansabel na Julianaplein 23 i number di telefòn: 465-2212.

WILLEMSTAD - Durante e konferensha anual di usuarionan di GIS, ku a tuma lugá na San Diego, a otorgá Aqualectra un premio pa su logronan den uso di GIS. Aqualectra a gana e premio internashonal aki pa e manera profeshonal ku e ta introdusiendo e sistema di GIS (Geographic Information System) den maneho di e ret di distribushon di awa. E vishon i liderato ku Aqualectra a demonstrá den uso di GIS pa maneho di e ret di distribushon por sirbi komo ehèmpel pa otro kompania.
ESRI, e proveedor di software pa GIS, tin mas ku 100.000 kliente rònt mundu. E konferensha na San Diego a konta ku mas ku 14.000 partisipante, ku a bin huntu pa interkambiá tokante uso i aplikashon di e sistemanan i tambe tuma nota di tur e desaroyonan nobo riba tereno di GIS.
Riba e foto por mira di robes pa drechi: E. Sussenbach (GIS4C), E. Cijntje (Aqualectra), F. Brandi-Dhorn (AED-SICAD), S. da Silva (Aqualectra), J. Dangermond (ESRI Inc.), B. Statia (Aqualectra), I. Dowling (Aqualectra) i D. Corsen (Aqualectra).

WILLEMSTAD - Ayera 2 di sèptèmber 2008 durante di un seremonia na Warda di Polis na Winston Churchillweg a selebrá hubileo di añanan di servisio di 6 empleado na Kuerpo Polisial Kòrsou.
Ta trata di:
- Sr. Karel J. Josefa, empleá na e Tim di O-Toleransia, 25 aña di servisio;
- Sr. Edsel A. Koster, empleá na Centrale Meldkamer, 30 aña di servisio;
- Sr. Equiles P. Gosepa, empleá na Wijkteam Mahuma/Seru Fortuna, 40 aña di servisio;
- Sr. Cirilo E. Brion, empleá na Bureau Tactische Recherche, 40 aña di servisio;
- Sr. Udemar J.L. Isidora, na disposishon di Hefe di Kuerpo Polisial; 40 aña di servisio;
- Sr. Pedro R. Schoobaar, empleá na Bureau Interne Zaken, 40 aña di servisio.

WILLEMSTAD – Lider di partido MAN i alabes Miembro di Konseho Insular Charles Cooper ta puntra kon ta pará ku e situashon na Las Almas. Segun Cooper, ya a pasa kasi 6 luna ku Bestuurscollege a sali ku yen di fanfar pa atendé e kaso di kuementu ilegal di tereno di gobièrnu den e bario di Las Almas.
“Den medionan di komunikashon a duna amplio kobertura i informashon di parti di Gobièrnu ku lo aktua pisá den e kaso di Las Almas aki. Ta parse awor ku BC a kue e organisashon di bario aki kabes abou, pasobra despues di 6 luna ku e organisashon aki a drenta akshon i pone pia abou pa BC atendé e asuntu aki, simplemente nada no a bini afó. Hasta e miembronan di e organisashon a bai BC pa atendé a asuntu aki. Nos tur ta kòrda kon den pasionan di BC tabatin interkambio di palabra fuerte entre e diputado enkargá ku tereno i un miembro di e organisashon di bario. BC a primintí ku lo solushoná e asuntu di konstrukshon ilegal den Las Almas. Mas bien lokual ku e habitantenan ta mira ta nada mas ku un kuerpo di S.K.S. ku ta patruyá 24 ora pa dia den Las Almas, pues invertiendo rekursonan balioso di forma no efektivo.”
Pa e motibunan akí Cooper a puntra Bestuurscollege si e por informá frakshon di MAN den Konseho Insular kiko ta e status di e solushon di e problema di Las Almas, dikon ta tarda asina tantu pa solushoná e problema i kiko a sali for di hinter e proseso i registrashon i inventarisashon ku a tuma lugá. “Nos a komprondé ku e konsehonan pa atendé e asuntu di Las Almas ta kla for di 30 di Mei 2008 i esaki ta pegá serka un diputado; BC por informá ta dikon e diputado aki ta sinta brui riba e konseho aki, kiko gezaghebber por hasi den e kaso aki pa saka e stùk for di man di e diputado p’asina solushoná e problema? Afterall e pago di overtaim di S.K.S. ta kai riba presupuesto di kual gezaghebber ta responsabel p’e.”