ORANJESTAD- For di oranan tempran di mainta e tempo a cuminza forma na e parti noord di Aruba, y despues el a sigui plama pa cubri henter e isla, bashando awa na tur caminda.
E parti panord y pariba di e isla a wordo azota for di banda di 7’or di mainta cu un torencial awacero mientras cu pa banda di 8’or e sector di pabou di brug tambe a wordo cubri pa un yobida formal, cu a percura pa bastante incomodidad.
Camindanan den centro di Oranjestad tabata colma di awa, percurando pa stagnacion tur caminda mientras cu varios cas a wordo inunda cu awa na gran cantidad.
Cuerpo di Bombero mester a duna varios asistencia ora cu algun cas a bin haya nan mes cu problemanan serio, causa pa e incomodidad formal y caminda algun hende di edad avanza, mester a wordo atendi.
Algun caretera a ricibi daño formal y trafico a keda mal pega mientras cu e cayanan habitual cu ta yena cu awa, a percura tambe pa un stagnacion den trafico masha formal.
Na Pos Chikito e situacion tambe a mustra serio pa un rato, ora cu e nivel di awa a cuminza subi pero despues esaki a baha mes rapido cu el a subi y e problema di antes, nos a surgi mas.

ORANJESTAD – Pa medio di e communicado aki Servicio di Aduana ta a haci un apelacion na tur negoshi cu ta traha producto aki na Aruba pa nan manda un lista di e productonan cu nan ta traha y cu nan ta exporta pa Antiyas Hulandes.
Ta’sina cu dia 4 di maart 2006 a sali un anuncio di Douane den corant. E anuncio ta encera un suplica na tur negoshi cu ta traha producto(nan) aki na Aruba pa manda un lista di e productonan cu nan ta traha y exporta pa Antiyas Hulandes.
E lista tin di contene e sorto y marca di e producto cu e compania ta traha aki na Aruba.
Dor cu ta yegando serca na e fase final pa cu e firmamento di e “protocol ” cu Antiyas Hulandes, ta haci un suplica pa manda e lista atrobe, si acaso e negoshi a traha producto nobo y cu ela exporta pa Antiyas Hulandes. Un “up date” mester wordo haci e ora ey.
E lista mester wordo entrega no mas tarda cu dia 15 di september venidero na e departamento Technico na oficina principal cu ta situa L.G. Smith Boulevard 84/88, serca sr. Alexander Koolman of via e-mail afkoolman@siad.aw.
Pa mas informacion por yama libremente e Servicio di Aduana na telefoon 5821800 ext. 233.

Gobierno di MEP acusando sindicatonan cu pensionadonan a Sali perhudica


ORANJESTAD – Partido MEP ta señala cu pa 7 siman largo, gobierno a trece varios proposicion dilanti cu tawata favorece henter Aruba, pero SDA a nenga nan rotundamente. SDA a boga pa e fl.105.= di indexering.
Un proposicion hopi atractivo pa tur empleado y pensionado tawata esun di fl.1.344,=, es cu nos a haña tende di un cantidad di hende cu nan lo a prefera esey, pero cu nan ta para nan so y no ta haña oido di parti di SDA. SDA tawata kier e fl.105,= .
Na varios ocasion minister di Finanzas Nilo Swaen a bin dilanti y duna splicacion amplio ariba esaki pa henter comunidad. Ainda SDA no kier a compronde, of nan a compronde, pero pa capricho no kier a tuma e proposicion di gobierno. Nos tur sa masha bon cu ta un wega politico esaki tawata di parti di oposicion.
Nos por a wak den medionan di comunicacion potretnan di esnan afilia cu partido berde y hasta politiconan tawata den e manifestacion. Un dia despues di e manifestacion, nos por a mira den e mesun medionan di comunicacion comprometi titulonan grandi ta bisa: “Gobierno a dobla, SDA a sali gana” y hasta tambe a ser bisa “Magaly Brito, women of the year”.
Awor nos ta haña un Parlamentario di nivel di tanto bal bo tey o lag’e tey, den oposicion, ta bin cu sentimentonan falso! Na unda e Parlamentario Alexander Tromp tawata den e 7 siman di huelga? E Parlamentario aki no a sigui e asunto di huelga? No ta su propio medionan di comunicacion a skirbi cu SDA a gana?

ORANJESTAD - Fundacion Accion Ambiental organizacion ambiental y alaves como un institucion no-gubernamental hopi importante den nos comunidad y cu ta traha ariba e tereno atmosferico y climatologico aki na Aruba y cu for di Aña 1993 Accion Ambiental a cuminsa traha oficialmente y profundamente pa loke ta e cambio climatologico y calientamento global y e problema di e capa di ozone, pa medio di Sr.Marcos Bislip den calidad como presidente di e directiva di e fundacion y experto cu masha hopi experiencia den e tereno ambiental pa cu cambio climatologico y calientamento global y pa cu e problema cu e capa di ozone y bou quia di Professor y Dr. Jay Anderson di Meteorologist di Canadian Environment Agency ta informa cu nos ta den e temporada di calor esta na final di luna di Augustus pa e luna di September.
Mester menciona cu na Aruba ta hopi calor pero na otro paisnan cu tin olanan di calor manera Grecia, Albania y otro paisnan di Europa Occidental y Oriental e calor ta hopi mas sofocante paso no tin biento mes.
Temperatura registra na ATSOC paden ta alcansa 31ºC minimo y maximo 33ºC esaki ta entre 90ºF pa 91ºF paden.Esta 90ºF=32.2ºC y 91ºF=32.7ºC= 33ºC
E Heat Index den e dianan aki ta basta sofocante y activo.
Pafor temperatura ta 33ºC y tin biaha ta alcansa 34ºC maximo.
Tabata na Aña 1999 den luna di Augustus cu Sr.Marcos Bislip a experiencia dos evento
unico na Grecia un tabata e ola di calor sofocante y e otro tabata e temblor di magnitud 7.0 ariba escala di richter.

CMB ARUBA 10-BALL CLASSIC SU PREMIO GORDO A BAI LONDON

ORANJESTAD - Federashon di Biyar Arubiano por mira atras riba un evento super eksitoso ku a keda organisá den e fin di siman ku ta tras di lomba.
E Caribbean Mercantile Bank Aruba 10-Ball Classic 2008 a keda dediká na un baluarte di biyar na Aruba: Chicho Erasmus.
Dieseis hungadó a bini di eksterior inkluyendo e delegashon di Kòrsou ku a konsistí di Anthony Wever, kampion Pan Amerikano Bola 9 Hubenil 2008, Johnny Hellmund, Bryan Farah, Bryan Landskind i Badi Nazhat i huntu ku dieseis hungadó lokal.
Ku yudansa di CMB, Classic Billiards i Lotto pa Deporte, Aruba a logra pone riba pia un evento ku a hala basta públiko i representashon di ocho pais.
E torneo tabata unu ku trabukonan grandi di e mundu di Biyar.
Asina aki pues e hungadónan lokal por a pòls nivel ku pro-playernan i tambe e krèm de la krèm di Aruba. Pero mester bisa si ku tur e trabukonan tabatin kompetensia fuerte di e hungadónan di Kòrsou i Aruba.
E faborito grandi pa bai ku e título e pro-player di Chicago, Ike Runnels ta keda na di 5 lugá despues ku Allan “Zero Thunder” Aanholt ta mand’é e buèlta di pèrdèdó i einan otro hungadó tòp di Aruba Ransley “Psychoman” Tromp ta gan’é pa e keda na di 5 lugá.
Otro pro-player di Peru residensiá na Chicago Leo Campos ta keda na di 9 lugá ora ku Ditto “Top Gun” Acasto ta gan’é 8 pa 3.

TRA’I SERU, - Tur hende por bai Cirilo Chirino Ballpark trankil paso lo tin un bar i kushina tremendamente bon surtí.
E organisashon, ku tin e bar i kushina na su enkargo, a bisa ku nan tin un bar bon surtí ku e serbes mas puru na mundu bon friu.
I naturalmente e refresko number 1 na mundu Coca Cola i Fria.
Lo tin un servisio rápido, di manera ku bo no ta pèrdè nèt nada di weganan den akshon.
Kushina lo ta na enkargo di e konosido i popularísimo Carlos “Fonfonè” Ruiter i e dínamiko Ruben “Sigui Swa” Clifton i tambe Carlos “Kushina” Evertsz.
Nan tres a primintí ku e kushina lo bai ta mihó ku nunka i asta ta papia ku lo tin sorpresa.
E pia di galiña lo ta manera biaha pasá i tur hende ta kòrda e tremendo sous di pinda.
Tabatin un pan ku bakiou tambe ku a pone hende lembe boka.
Fuera di esei e sòpi estilo “Crème de la Crème” tambe mester tei.
Ta spera famianan kompletu pa bin pasa un torneo agradabel na Cirilo Chirino Ballpark i disfrutá di e tremendo plato i bibidanan na preis di famia, manera ya ta kustumber pa años kaba.
I lógikamente disfrutá di e gran hugadanan di nos tremendo peloteronan.
Lo tin hopi animashon musikal na vèlt i entre otro “Lando” Chirino ku lo ta esun enkargá pa animá i nara algun wega di un forma chistoso i apart!!
Por a komprondé ku ya “Lando” a bai lès di spañó, pa na momentu ku e torneo internashonal start e nara na spañó!!!

WILLEMSTAD – Gezaghebber tin seis siman di tempu, pa manda un kontesta aseptabel pa SITCOM, relashoná ku preguntanan ku e sindikato a hasi. E preguntanan ta relashoná ku kobransa di diputadonan ku ta presidente komisario di kompanianan anónimo di gobièrnu.
Segun SITCOM, e ta disponé di un dokumento ku ta indiká ku gezaghebber a partisipá na tur diputado, ku nan no tin mag di kobra un ‘fee’ serka e kompanianan, ku nan ta traha pe. Despues di a tuma nota di esaki, SITCOM a manda un karta pa gerensia di UTS, pa puntr’é si e ta na altura di e karta aki. I ku e kompania mester tuma medida mesora, pasobra e sindikato tin e informashon ku e presidente komisario di UTS, si ta risibí e pago aki.
Emilio Brunken, presidente di SITCOM, a splika ku ora ku SITCOM no a haña kontesta serka gerensia di UTS, el a dirigí su mes na Bestuurscollege, i a manda un karta pa gezaghebber. “Nos a pidi gezaghebber pa wak e kaso i tuma un medida”. Sinembargo, SITCOM a risibí un kontesta serka gezaghebber, ku a desapunt’é. E ofisina di gezaghebber a manda un karta pa SITCOM, den kua e ta partisipá ku e statutonan di UTS no ta deskriminá tokante di e miembronan ku ta forma parti di Hunta di Komisario, ku ta risibí un ‘fee’ na UTS. Tambe e karta ta bisa ku ta AVA mester tuma un desishon riba e asuntu aki.
SITCOM di su banda ta insistí ku Bestuurscollege a manda bisa su diputadonan ku nan no ta pèrmití pa haña rekompensa serka e kompanianan, na kua nan ta presidente komisario. “Ta p’esei nos a keda straño ku gezaghebber su ofisina ta manda e partisipashon aki na tur e kompanianan anónimo i ora ku e kaso bin dilanti, gezaghebber ta purba di skùif’é i mand’é riba AVA”.

WILLEMSTAD – Federashon di Futbòl di Kòrsou, FFK, den kuadro di e selebrashon di 50 aña eksistensia di FFK, un dia di estudio a wòrdu organisá djasabra último dia 30 ougùstùs 2008 na FEKOSKAN.
Temanan ku a keda tratá tabata e maneho general di futbòl, tantu atministrativo i tékniko, finansas, arbitrahe, struktura i reglamentonan.
Riba kada tópiko a presentá sugerensha pa kambio/adaptashon dor di e miembronan presente i na final di e dia por a konkluí ku e dia di estudio tabata hopi eksitoso grásias na e kontribushon i partisipashon di e miembronan konhuntamente ku e panelistanan ku a duna un introdukshon riba nan tópiko.
FFK ta gradisí sinseramente tur panelista i miembronan presente i tur e puntonan presentá lo keda tratá pa e direktiva ku na su debido tempu lo konvoká un reunion general èkstra ordinario pa tuma e desishonnan nesesario.
SANTU SAKRIFISIO DI MISA:
Riba djabièrnè 5 sèptèmber próksimo federashon ta kumpli 50 aña di eksistensha i komo tal ta bai gradisí Señor pa deporte rei di futbòl i e Santu Sakrifisio di Misa aki ta tuma lugá na Klooster Alverna pa 6’or atardi.
Direktiva FFK ta invitá tur miembro, hungadónan, dirigentenan, ofisialnan di wega, fanátiko, prensa deportivo i pueblo en general pa asistí na e akshon di grasia aki.
E selebrashon mes di e hubileo di oro lo tuma lugá despues.

GONAIVES, Haiti – Forsanan di pas di Nashonnan Uní, djaweps a protehá un depósito ku kuminda pa evitá sakeo na e siudat haitiano aki, gran parti di kua ta sigui inundá o kubrí di lodo despues di paso di e tormenta Hanna, ku a kousa por lo ménos 61 morto.
Gonaives, e di kuater siudat di Haiti, ta okupá un sektor plat di un ‘kuenka’ (un sitio manera un buraku grandi ku mata) situá entre laman i e serunan ku no tin plantashon, ku ta laga kantidat di lodo bini abou ku e mas poko awa ku kai. Hanna a keda kuater dia riba Haiti, ku yobidanan pisá, ademas di a ranka palunan di fruta i kitando daknan di kasnan di bleki di hopi bibienda pober i dañando kuminda di hopi negoshi.
Hopi di e míles di persona ku a buska refugio kaminda tabatin dak, balkon i teranan na haltu tin vários dia sin kome i masha tiki awa di bebe. Ademas, den e kayanan bou di awa tin kadavernan ta drif di hopi animal di kas.
E tormenta a bandoná Haiti djaweps, i ku bientunan kasi di orkan a kue direkshon sùitost di Merka. Tambe e meteorólogonan a atvertí ku un di kuater tormenta – e orkan Ike – próksimo siman lo por bari e pais mas pober di hemisferio oksidental.
Gobièrnu haitiano no tin e medionan pa yuda e pueblo pegá na Gonaives; e konvoinan di reskate a keda blòkiá pa enorme lagunanan di awa ku a kòrta e kamindanan ku ta duna akseso na e siudat.
Diferente periodista di AP a move ku e promé grupo di ‘hèlmunan blou’ pa yega na e siudat den lanchanan inflabel Zodiac.

WILLEMSTAD - Hòfi Alzheimer ta un evenementu kaminda hende ku demensia, nan partner, miembro di nan famia i amigu ta topa otro. Dunadó di kuido i otro interesadonan tambe ta bon biní. Kliente ta kòmbersá ku otro riba nan eksperensianan, ta interkambiá informashon ku otro tokante demensia i ta papia di posibilidat pa yudansa i kuido. No ta importá si ta pa promé biaha ta bini òf si no por bini tur biaha. Semper ta bon biní.
Tópiko di e djadumingu akí ta: E sintimentunan di un famia ku tin un hende ku alzheimer.
Un famia ta splika kiko nan ta eksperensia ku un persona ku ta lubidá, depresivo i ku demensia. Den pousa tin algu di kome i bebe.
Despues di pousa por hasi pregunta i diskutí riba tópiko di e atardi akí.
Ta tene Hòfi Alzheimer e biaha akí na Mi Amparro, situá riba kaminda di Weg naar Welgelegen,
Entrada ta grátis. Hòfi Alzheimer ta di 10:30 or te 12:30 or di mainta. Pa mas informashon yama Stichting Alzheimer Curaçao: 462-8840.

WILLEMSTAD - Youth Junior Chamber Curaçao (YJCC) ta invitá tur miembro invitado i interesado na su promé reunion general pa e aña eskolar aki. Esaki lo tuma lugá riba djabièrnè 5 di sèptèmber 2008 na CCC (skol di muzik) den Emmastad di 6.45-9’or p.m.
Durante e reunion aki lo tin traspaso di e puestonan di direktiva di 2007-2008 pa e direktiva di 2008-2009. Tambe lo tin un lektura sumamente interesante riba motivashon. Den e reunion aki e miembronan lo brainstorm riba aktividatnan pa hasi durante e aña nobo aki di 2008-2009.
Manera ta ampliamente konosí e kapítulo hubenil ta afiliá na e organisashon adulto di Curaçao Female Junior Chamber. YJCC ta un organisashon di hóben entre edat di 13-20 aña. E hóbennan mes ta dirigí nan reunionnan bou di supervishon di adulto.
Pues direktiva di Youth Chapter ta spera tur hóben interesá pa asistí i partisipá na e promé reunion di e temporada aki.
Pa mas informashon por tuma kontakto ku presidente di BOC Kiffer Losiabaar na telefòn 565-7499.

WILLEMSTAD - Albert Heijn Supermarket ta sigui pone atenshon riba nos muchanan. Ta for di su lansamentu aki na Kòrsou Albert Heijn Supermarket a bin ta kosechá hopi éksito ku nos muchanan. Asina por menshoná kampañanan di klùrmentu ku a keda organisá, hasta durante di selebrashon di Albert Heijn su aniversario e énfasis tabata riba nos muchanan. Djasabra próksimo, dia 6 di sèptèmber Albert Heijn ta tene un ‘kids day’, lo pone un bouncer riba e lugá di parker di e supermerkado for di 3’or te ku 7’or, i e muchanan ta risibí limonada Pepsi grátis. Tambe tin un speshal riba potrèt, na unda ku mayornan por laga Beterfoto saka potrèt di nan yu na e preis preferensial di 4,95. Naturalmente no ta lubidá riba e mayornan, ainda e kampaña ‘Hopi bon den tòn’ ta brinda oportunidat pa tur siman tin un ganadó di un garoshi yen di komestibel. Pues hasi kompra na Albert Heijn realmente ta bentahoso i sumamente plasentero.

WILLEMSTAD – MIO Group ta doño i operador di e ret mas nobo i avansá di telekomunikashon den Karibe. MIO su ret IP di komunikashon basá riba fibra óptiko i selular ta duna servisio na tantu konsumidó, komo empresa chikí, mediano i grandi den Karibe. MIO ta tambe e promé kompania pa ofresé solushonnan avansá pa komunikashon di bos i dato i e ta e úniko kompania ku ta ofresé EV-DO Rev A i WIMAX.
E teknologia aki di MIO ta operá den mas merkado ku di kualke otro operador Karibense i e ta duna su klientenan akseso na un ret internashonal ekstenso ku partnernan di roaming.
E fin di siman aki MIO lo eksponé e detayenan di e produktonan aki i di otronan ku ta na kaminda den nan stènt den e bolsa Living na WTC.
Despues ku a lansa MIO na 2004, el a bira proveëdó di komunikashon mobil broadband ku ta krese mas rápido den Karibe. Ku mas ku 1.5 mion kliente (inkluso roaming internashonal) na 12 pais, MIO ta ofresé e mihó ret di bos den e region aki. Na Kòrsou MIO su ret dediká i avansá di CDMA REV A i WIMAX ta pèrkurá pa e mihó kobertura i yamadanan hopi kristalino.
“MIO su INET ta un servisio tremendo ku hopi den Karibe ta enkantá kuné. Bo ta haña un karchi portátil pa bo laptop òf un USB modem (wak ilustrashon) i bo por subi Internèt kasi tur kaminda. Ku e karchi aki ta manera henter mundu ta forma parti di un ret grandi di Wifi. Si bo tin un kòmpiuter ku ta aseptá modem di EVDO, ta rekomendabel pa buska un pa bo mes”, segun Marc Dinee, Vise Presidente di Merkadeo i Benta di MIO. “E teknologia aki ta hasi posibel pa nos klientenan sùrf riba Internèt, baha músika, manda mensahenan di e-mail i multi-media, i di un forma mas konfiabel i na un spit di broadband hasta mas haltu i haña akseso na otro servisionan avansá wireless”.

WILLEMSTAD - E sentimentu di por sinti bo sigur den bo propio kas ta inigualabel.... Un sistema di seguridat so, lo no hasi e trabou... un seguro ku por dunabo un kobertura kompletu ta loke ta dunabo ‘pas’ i siguransa ku hasta den posibel ‘mal tempu’ bo por sinti bo protehé pa un seguro di ENNIA. Nan ta e kompania di seguro mas grandi den Caribe, pues bo por tin konfiansa total ku unabes ku ENNIA bo tin un seguro di bèrdè mes!
E aña aki Expo Living tin e tema di ‘Green Ideas for a Green Life’ Living 2008 Green Edition, ENNIA tin e koló bèrdè den su logo i ta duna kontenido na henter e estilo di ‘green living’ dor di entre otro aportá ku proyektonan ku ta yuda salbaguardiá nos naturalesa, manera e donashon ku resientemente a keda hasí na Fundashon Carmabi. ENNIA a duna e fundashon 10 mil florin durante di su konsierto públiko na Brion Plein. “Henter e konsepto di ‘green’ (bèrdè) no tin nifikashon si bo no por sostené esaki ku akto. ENNIA ta kere ku huntu nos por hasi i mantené nos mundu bèrdè di bèrdat. Esaki ta bon pa nos mes i pa e futuro generashon. Tur anochi nos lo tin premio pa por ‘raffle’ entre esnan ku a bishitá nos na e expo i a yuda nos yena un enkuesta di ENNIA. E fin di siman aki nos ta warda nos klientenan i/òf potensial klientenan na nos ‘booth’ na Living 2008”, asina Patrick Thissen marketing manager di ENNIA a komentá djaweps anochi durante e promé anochi di Living 2008.

WILLEMSTAD - Despues di a haña e garantianan nesesario ku ayera tardi e trabounan di limpiesa ta kla, Gobièrnu di Kòrsou a disponé ku skolnan lo sigui normalmente awe den e área di Shop & Save. Tòg mester bisa ku diferente mayor a keda preokupá pa e dianan ku e muchanan a falta lès pa motibu di e kandela grandi ku a destruí e kompleho.
No solamente skolnan básiko a sufri e impakto di e konsekuensha di e kandela, pero tambe skolnan mas avansá den e área. En total 12 instituto eskolar a sufri di e impakto for di despues ku e kandela a surgi djadumingu dia 24 di ougùstùs último.
Miéntras tantu e investigashonnan relashoná ku e kaso aki ta sigui. E siman aki outoridatnan huntu ku ekspertonan di seguro a evaluá e situashon ku a presentá i ku ta nifiká un pèrdida multimionario ku seguro lo mester kubri.
E doñonan di e kompleho a anunsiá ku nan lo bolbe konstruí un supermerkado na e sitio. Ta di dos bes ku kandela ta destruí edifisionan riba e mesun tereno. Den pasado e supermerkado Belo Horizonte a kima kompletamente. E biaha aki tabata Shop & Save.

WILLEMSTAD – Ku un interes enorme tabatin apertura ayera di LIVING 2008 na World Trade Center. Na e seremonia di apertura dr. Dolfi Debrot di Carmabi a mustra un biaha mas riba e impakto serio ku nos ta kreando pa nos medio ambiente na Kòrsou. LIVING 2008 ta den kuadro tambe di aspektonan ambiental. Diferente di e partisipantenan a haña e mensahe bon kla i nan a adaptá e tema aki kompletamente den nan presentashon ayera.
LIVING 2008 ta e sitio adekuá pa haña informashon riba diferente servisio di kompania. Tambe por mira di serka inovashonnan pa kas, ofisina i hasta industrial. Un aspekto e aña aki tambe ta e impakto di digitalisashon den mundu komersial. LIVING 2008 ta sigui henter e fin di siman aki. Awe i mañan Living ta kuminsá 6’or di atardi. Djadumingu LIVING 2008 lo ta di 10’or di mainta pa 10’or di anochi.

WILLEMSTAD – FUDEKA no ta asumí responsabilidat pa e situashon ku a surgi rondó di organisashon di Karnaval 2009. Segun e organisashon, ta Gobièrnu di Kòrsou mes a krea e situashon di konfushon ku a surgi, asina Corine Djaoen-Genaro di FUDEKA a bisa relashoná ku e kontroversia ku a surgi.
Manera LA PRENSA a publiká, Gobièrnu di Kòrsou a disidí for di tres grupo pa asigná FUDEKA ku organisashon di Karnaval 2009. Pero FUDEKA a gradisí pa e honor despues di a tuma nota ku e desishon ta konta pa un aña so. Gobièrnu di Kòrsou a anunsiá ku ta buskando un alternativa.
Den un konferensha di prensa ayera, FUDEKA a bin ku dokumentashon i grabashon ku ta mustra bon kla ku gobièrnu mes a krea e situashon ku a surgi. “Gobièrnu ta papia ku dos lenga. Di un banda bèrdat Bestuurscollege a saka un aviso ku organisashon di Karnaval ta pa un aña, pero un dia promé ku mester a entregá oferta, diputado di Kultura a bisa entre otro na televishon ku lo traha riba organisashon di Karnaval pa un periodo di 10 aña”, asina sra. Djaoen-Genaro a bisa.
El a splika ku e dia pa entregá oferta lo a vense dia 1 di mei. Komo ku e dia ei tabata un dia liber, e dia ofishal pa entregá oferta tabata dia 29 di aprel. (dia 30 tambe tabata liber).
Un dia promé ku e fecha pa entregá oferta a ekspirá, diputado Marilyn Alcalá-Wallé a bisa na televishon ku gruponan interesá por hasi nan oferta komo ku Gobièrnu ta pensa riba un maneho di tèrmino largu. E diputado a menshoná den e entrevista reprodusí ayera den e konferensha di prensa na un tèrmino di 10 aña. Ta einan e konfushon a surgi, asina sra. Djaoen-Genaro a splika. Ku otro palabra: Bestuurscollege ta papia di un aña i un miembro di e Kolegio ta papia di 10 aña. “Nos no ta papia pa loko pero nos tin tur e pruebanan di loke nos a trese dilanti i klaramente por mira ku nos no ta kreando bòmbòshi. Ademas nos no ta interesá pa bai Korte tampoko, anke mi ta kere nos tin bon chèns”, asina sra. Djaoen-Genaro bisa. Por sierto ku e dirigente di FUDEKA tabata flankea na e konferensha di prensa di ayera pa presidente di Asosashon di Grupo di Karnaval Stanley Ignacio i Manfred “Feco” Gomes di Asosashon di Músiko.

WILLEMSTAD – Raad van State a manda e partidonan ku ta trahando riba e lei di reino pa Supervishon Finansiero pa bai hasi nan hùiswèrk mas mihó. Anke den e dokumento di e órgano di konseho mas haltu den reino, Raad van State no ta bisa eksplísitamente ku e ta kontra Supervishon Finansiero, e entidat ta haña ku mester trese diferente kambio importante den loke tin riba mesa awor. “De Raad van State van het Koninkrijk heeft blijkens het vooraanstaande bezwaar tegen de inhoud van het ontwerpbesluit en geeft U in overweging niet aldus te besluiten”, asina vise presidente di Raad van State van het Koninkrijk prof. dr, Tjeen Willink ta bisa den e konseho di dia 14 di ougùstùs último. LA PRENSA tin un kopia di e dokumentu.
Den seno polítiko tin e impreshon ku e kambionan ku Raad van State a sugerí ei ta aspektonan ku por manehá. Tin alivio ku Raad van State no a bisa ku Supervishon Finansiero no por. Aktualmente ta papiando riba e diferente kambionan ku Raad van State a proponé. Komo ku no por a sali afó a disidí ku ta manda e kaso pa e grupo di diskushon polítiko di kambionan estatal ku lo reuní na Sint Maarten dia 26 di sèptèmber awor.
Siman pasá tabatin un konferensha via di e sistema videoconferencing kaminda a papia riba e asuntu aki. A disidí ku lo manda e diskushon na un nivel polítiko mas haltu pa sigui diskutí. Parse ku e diskushonnan ta basta fundamental ainda.
Diputado di struktura Estatal di Sint Maarten Sarah Wescot-Williams a bisa ayera ku e lei ta kasi kla pero ku a base di e Slotverklaring di dia 2 di novèmber 2006 tin dos aspekto ku mester tene kuenta ku ne. Un di nan ta un lei di supervishon pa e periodo di transishon i despues un otro lei di supervishon ku lo drenta na vigor na momentu ku e statusnan definitivo di e diferente islanan drenta na vigor. Mester tin diferensha den kontenido di e dos aserkamentunan aki pasobra ta dos situashon diferente, asina e dirigente polítiko a bisa.

Prof. dr. Lorito ta yama tur hende un felis djabièrnè. Lorito mester a kustumá bula atrobe tur kaminda. Ayera nochi mes nos mester a bula bai den e área di WTC pa nos kapta algu di Living 2008. Hopi hende tabata presente i esei sigur ta bon notisia pa e organisadónan. Living 2008 ta sigui awe, mañan i djadumingu. Tin masha kos di wak!
****
Nos ta sinta hopi tempu ku un pregunta masha klave. Imaginábo bo ta independentista i bo haña un distinshon di Kas Real. Kiko lo bo hasi? Ta masha poko hende di prinsipio nos a topa, anti-monarkista (ku nan derechi!) ku a disidí ku nan no ta aseptá. Un di nan ku nos ta kòrda ta Adriaan Moen. Nos konosé hopi hende ku ta bisa ku nan no ke dil ni ku gobièrnu ni gobernantenan ulandes, pero finalmente ta haña nan ta baha pa nan prinsipio.
****
Awe tabatin entrega di Zilveren Anjer na un di e personanan mas destaká den nos komunidat ku ta Òmpi Elis. Despues di morto di Prens Bernhard a bin masha detaye riba su bida bruá ku a pone e prens den un otro lus. E pregunta ta surgi: mester aseptá e distinshon di su fondo na su nòmber si òf no? E ta un pregunta masha interesante ku por ta tin hende tin pensamentunan riba dje. Laga nos sa kiko bo ta pensa!
****
Na Ulanda mes a diskushon rondó di Kas Real ta masha fuerte. Enkuestanan ta indiká ku mas i mas hende ta haña ku Kas Real no ta pas mas ku nos tempu moderno. E kos mas remarkabel ta ku nan ta papia liber tokante di e tema (sin miedu). Ántes tòg tabata otro, por sierto na Kòrsou tambe. Sigur e ta un tema ku meresé mas diskushon aki tambe!

ATLANTA – Shairon “Shai” Martis a debutá ayera ku Washington Nationals kontra Atlanta Braves.
Su debut den Liga Grandi tabata akseptabel.
E promé dos entradanan a bai bon, pero den di kuater ining el a bin hañ’é ku problema di kòntròl kaminda el a regalá tres base por bola kontra e promé kuater bateadónan ku el a enfrentá den e entrada ei.
Un “fielder’s choice” a empuhá e di dos kareda pa Braves, 2-0.
Promé den di tres ining Braves a anotá un kareda riba un tripel i un flai di sakrifisio.
Martis a tira sinku ining en total, pèrmití dos hit, regalá sinku base por bola i a pèrmití dos kareda limpi.
Un bon amigu di Jair Jurrjens di Braves, “Shai”, ayera mèrdia tabata di bishita serka Jurrjens promé ku wega.
Pa di promé bes ku Nationals tabatin un nobato tras di plato, den persona di e hungadó Luke Montz i Martis. Ámbos a hunga ku otro for di 2006, primeramente den Klas A ku Potomac Nationals i tambe despues ku Columbus Clippers.
Martis a sabi di saka su barbulètenan for di su sistema, mas lihé despues ku el a poncha Gregor Blanco. Martis no tabata sa ki signifikashon e promé out ei tabata, te ora ku e coach di picheo di Nationals, Randy St. Claire, a bis’é pa tira e bala p’e den dugout i warda esaki komo un rekuerdo.
“Mi ta kere ku mi a picha hopi bon. Mi a bai sinku ining”, asina Martis a bisa. “Mi tabata hopi eksitá. Mi tabatin algun barbulètè den e promé ining. Pero despues mi a haña mas konfiansa. Ku Luke Montz tras di plato tabata hopi bon, ya ku nos ta ku otro pa tres aña. Nos konosé otro hopi bon.