Kòrsou, bo yunan di puru sepa ke sá si esnan ku nan trikinan di Kompa Nanzí lo por ta na kabes di niun organisashon den e Kòrsou òutónomo den Reino.

Kòrsou, bo yunan di puru sepa ke sá si esnan ku ke ta na kabes di organisashonnan, pero no ta kapasitá pa por ta na kabes, lo siguí uzá nan trikinan di Kompa Nanzi pa kita esnan mas kapasitá, pero bòu di nan fo'i kaminda pa nan por siguí ku nan chakénan di mal astusia.

Kòrsou, bo yunan di puru sepa ke sá k'esnan inkapasitá pará na kabesnan di organisashonnan lo siguí demonstrá nan ínkapasidat dor di schuif nan propio responsabilidatnan ku nan tin komó kabesante riba esnan swak asina yamá bóu di nan.

Kòrsou, bo yunan di puru sepa ke sá si esnan inkapasitá na kabes di organisashonnan lo siguí hasí mal uzo di nan poder pa kedá yená nan saku, ku òf sin ayudo di nan amigunan korupto na kabes di otro organisashonnan.
Kòrsou, bo yunan di puru sepa ke sá, si esnan inkapasitá na kabesnan di organisashonnan lo siguí molestiá otronan bou di nan, den nan trabounan, demostrando nan mal astusia di skonde maldat i siguí hasí maldat ku ta kumbiniente pa nan, nan saku i nan hamber pa "status".

Kòrsou, bo yunan di puru sepa ke sá, si esnan ínkapasitá na kabesnan di organisashonnan lo kedá uzá otronan pa por skapá nan propio kueru, p'asina nan no tin nodi di duná responsabilidat pa nan propio inkapasidat  i bulá pipa p'e responsabilidat ku nan tábata ké i ku nan ta wòru pagá bon p'e kompará ku otronan, pero ku esnan ku responsabilidat no sa unda nan tin ku kuminsá pa kué e responsilidat akí na un manera hustu, proporshoná, correcto, transparente i integro.

Kòrsou, bo yunan di puru sepa ke sá, si esnan ínkapasitá na kabesnan di organisashonnan lo kedá buská otronan pa molestiá nan den nan trabounan, ora ku ta nan mes t'e problema i no e otronan, ya ku nan no sá mes kiko ta dirigí, ora ku nan ta kaptá dirigimentu komó hungamentu di diktador, faltamentu di rèspèt pa otronan su trabóu,  faltamentu di rèspèt pa derechonan di otronan, "inhaligheid" di nan propio persona pa ku nan saku, falta di nan integridat, trapamentu di derechonan di otronan strukturalmente komo parti di nan struktura pèrsonal pa hasí otronan malu i pèrhudiká otronan pa benefisio di nan propio pèrsona i saku, demotivamentu di otronan pa nan propio interesnan maligno, bruashon di otronan pa kitá atenshon fo'i nan pa nan por siguí pèrhudiká otronan i siguí benefisiá nan propio pèrsona i saku, aktuashonnan formal eksagerá ora ku nan fayá, aktuashonnan paniko pa no tin ku buská e fayonan den pasado serka nan mes, insinseridat, aktuashonnan elitario pa por skondé ínkapasidat, falta di integridat, metementu sin konosementu ku kontenido di profeshonalismo di otro ora ku nan no ke òf por aseptá nan propio ínkapasidatnan,  símplemente pasó nan tin e kerensia eroneo ku ser kabesante ta kontené e konduktonan akí, enbes di konosé kapasidatnan di "stuur", motivá, manehá un bon "human resource", rekompensá, di ta transparente i apsensia di abuzu di poder, loké ta nifiká ku bo no por kulpá otronan pa bo propio apsensia di maneho komó kabesante òf apstenensia di ponementu di medionan ku ta kondishonnan pa otronan por ehekutá nan profeshon na un manera bon, papiá sin niun base i èksiguí hopi di otro, pero no hasí nada nan mes.

Kòrsou, bo yunan di puru sepa ke sá, ku, ya ku nan dí ku Dios ta di Kòrsou, i ku Dios ta hasta papiá Papiamentu també, ku Dios lo wòrdu duná un lectorado/profesorado den su univèrsidat pa siñá esnan ku ta maluzá su nòmber pa nan propio interesnan, nan propio saku, nan falta di integridat i nan korupshon,  pa Dios por siñá nan di nobo den su universidat ku nan no tin ku probechá riba lomba di otronan, ku nan no tin ku okupá nan mes ku maldatnan pa pèrhudiká otronan i pa benfisiá nan propio saku i nan pèrsona, pasobra bo no por alabá Dios okupando bo mes ku maldat al mismo tiempo.

Kòrsou, bo yunan di puru sepa ke sá.