Mi kier kuminsá mi promé kolumna pa 2008 deseando tur hende den Reino Ulandes ku ta papia, lesa i skibi papiamentu un felis aña nobo. Kòrda ku bo bida ta 100% produkto di bo pensamentu i aktonan. Pues ta mas ku lógiko ku pensamentu i akshon positivo lo redundá den nada otro ku kosnan positivo pa bo mes, esnan serka di ’bo i e komunidat ku bo ta biba aden.

I papiando di kosnan positivo, kasi tur mandatario i/òf polítiko antiano a koinsidí den nan spichnan di fin di aña ku 2008 lo bira un aña di hopi “perspektiva”, unu di “kresementu” i di “adelanto”. Despues di hopi hopi aña di tende un tras di otro promé ministernan den nan diskurso di fin di aña anunsiá kataklismo pa e aña ku ta bini, e biaha aki tabatin manera un kompetensia entre lidernan polítiko pa anunsiá e “bon notisia” pa e aña ku ta bini.

Kosnan lo kana bon pa Kòrsou, di esei no tin duda. E indikadónan ekonómiko tur ta duna señal di kresementu. Di parti di invershonistanan institushonal, tin un disponibilidat pa hasi invershon. Sektor di turismo lo sigui krese, miéntras ku sektor finansiero ta mustra señal di kresementu despues di añanan di redukshon. Esaki, ounke e kantidat di kuponan di trabou den e sektor aki lo bira ménos. Gobièrnunan, a debí na e eliminashon parsial di debe nashonal, tin mas sèn pa invertí den sektor sosial, miéntras tin sèn tambe pa invertí den loke a haña e nòmber di “inisiativa sosial-ekonómiko”.

Pero den tur e “sinfonia di bon notisia” aki, tin tambe tin algun realidat ku ta motibu di hopi preokupashon. Esaki ta e loke ami ke referí na dje komo e gran engaño di 2008. Kasi na final di 2007, mandatarionan di un forma sòlèm a anunsiá ku e kambionan estatal na kaminda lo no tin konsekuensia pa loke ta kuponan di trabou di ámtenarnan den servisio di Gobièrnu Sentral i/òf gobièrnu di e teritorionan insular. Imaginábu, kerido lektor. E loke TUR hende, TUR tempu a identifiká komo e problema prinsipal di funshonamentu di Antia komo pais, esta dos nivel di gobernashon ku demasiado ámtenar, direpente a somentá. Si. Direpente esei no ta e motibu òf un di e motibunan mas pa desmantelá pais Antia.

Tur hende ku dos dede di sinti por imaginá nan mes ku e loke e mandatarionan aki a anunsiá ta nada mas ku un gran engaño. Pasobra, pa lógika universal, ta imposibel pa e islanan, prinsipalmente Kòrsou i St. Maarten, karga un aparato di gobernashon ku asina tantu hende. Kiko e mandatarionan aki kier bisa nos? Ku e rekursonan èkstra ku redukshon òf eliminashon di e debe nashonal lo produsí, lo bai pa paga sentenar di ámtenar sintá pòrnada?

E loke ta mas iritante ainda ta e echo ku ta anunsiá ku niun ámtenar lo pèrdè trabou, pero no ta bisa mesora kon t’ei hinka e aparato gubernamental nobo den otro. Por ehèmpel, kiko t’ei pasa ku un kuerpo manera SKS? Lo integrá nan den kuerpo polisial? Òf nan lo sigui eksistí independientemente? Kiko lo pasa ku departamento di asuntunan hurídiko di gobièrnu antiano? Nan lo djòin esun di Kòrsou? Pero tin mester asina tantu hende pa hasi mesun trabou? Departamentu di Finansa? Asuntunan ekonómiko? Servisio di Belasting i Ontvanger di Kòrsou?

For di dia ku mi tin tinu polítiko mi ta tende polítikonan di tur sorto di pluma anunsiá ku mester redusí e aparato públiko. Na 1980 tabatin Berenschot. Despues a sigui “Kerntakenanalyse” i despues e redukshon masivo, pero altamente nesesario di 1999/2000. Awor e aktual gobièrnu lo bai bòltu henter e proseso. En bes di redusí e aparato públiko, ta bai kombertié den esun di mas grandi den historia di gobernashon di Kòrsou. Den un tiru gobernashon di pais Kòrsou t’ei krese di mas o ménos 2.000 hende pa un gobièrnu di kasi 5.000 ámtenar. Figurábu!

(Bo komentario, opservashon òf krítika ta wèlkòm. Djis manda un e-mail na: bobharms@setarnet.aw)