Ta un echo inegabel ku nos kultura di komunikashon ta unu basá riba krísis. Sea di un forma pro-aktivo òf pasivo, hopi ta e instansianan, organisashon, grupo, empresa, partidonan polítiko òf polítikonan individual ku kada biaha atrobe ta haña nan den un situashon di krísis innesesario, ku tur e konsekuensianan ku esaki tin pa sea nan imágen, reputashon òf benta di nan produktonan.

Pa esnan aktivo riba tereno di relashon públiko i komunikashon, e dianan aki ta un berdadero “nirvana”. Situashonnan di krísis ku a surgi un tras di otro, kada un di nan revelando e ingredientenan klásiko di un situashon di krísis. Ingredientenan ku pa e eksperto riba e tereno aki, pero sigur tambe pa kualke persona ku un granito di “common sense” ta instrumentonan ku e por manehá pa sea minimalisá e efektonan di e krísis pa e imágen òf reputashon di e instansia, organisashon, grupo, empresa, partidonan polítiko òf personanan individual òf hasta bòltu esaki na nan benefisio.

Mi ta bai tuma dos ehèmpel. E promé na Aruba. Na e úniko hospital di e isla aki un dama 9 luna na estado a duna lus na loke ta yama un “angelitu”, esta un beibi ku a nase morto. E ginekólogo ku a atendé a mama, mesora a kue kaminda pa prensa pa, usando mil i un argumento, mustra ku morto di e beibi, en todo kaso, no ta su falta. Ta falta di e asegurado general AZV ku tin yen di eksigensia arkaiko ku ta stroba spesialistanan duna un kuido na drechi, ta falta di hospital ku no tin personal, mashin bieu, etcetera. E asegurado general no a pèrdè pa gana i e tambe a kohe kaminda pa prensa pa splika ku ta e ginekólogo a faya, pasobra e reglanan di e asegurado no ta stroba un spesialista aktua den un kaso di emergensia. Den tur e diskushon, niun hende no tabatin e kordura i pasenshi pa warda un investigashon di hospital kiko a sosodé. E resultado, ni e ginekólogo, ni e asegurado ni hospital no tabatin falta den nasementu morto di e beibi. Konsekuensia? E imágen di e dòkter a sufri, miéntras e imágen i reputashon di e asegurado AZV a bolbe haña un sla. Tur esaki, innesesario si kada un a opservá un di e promé reglanan di komunikashon den momento di krísis: GET ALL THE FACTS FIRST! Bo skohe pa bai publisidat solamente ora bo tin TUR echonan riba un rei i no solamente pasobra bo kier defendé bo reputashon. Echo ta, ku den tipo di kasonan asina bo ta hasi mas daño na bo mes, pasobra bo ta drenta publisidat ku datonan ku bo tin sigur si nan ta klòp, si òf no. Rektifiká bo propio deklarashonnan den momento di krísis ta un piká mortal!

E di dos ehèmpel, e supuesto infrakshonnan kontra reglanan di tráfiko ku minister di Hustisia David Dick a kometé. Eks presidente di Merka, Bill Clinton, durante di e krísis ku a haña e nòmber di “Monica Lewensky”, a konta ku servisio di un tremendo abogado, Lanny Davis. Aparte di ta un gran konosedó di lei, Davis ta tambe un eksperto riba tereno di relashon públiko. Den un buki ku el a skibi relashoná ku e kaso aki, “Truth to tell”, Davis ta hasi menshon di e echo ku Bill Clinton por a evitá ku e kaso aki a bòltu bira un krísis, si for di kuminsamentu el a (bisa e bèrdat) “Tell It Early, Tell It All, Tell It Himself. Si for di dia e asuntu aki a drenta publisidat David Dick a bisa e bèrdat di loke a pasa, bisa eksaktamente TUR loke a pasa i bis’é e mes, en
bes di via di otro boseronan òf komunikado, su reputashon i imágen lo a haña un “deuk” ménos grandi. I keremi, e asuntu aki no a kaba ainda. E ta e tipo di “issue”-nan ku kontrinkantenan gusta warda pa bini bèk kuné den tempu di kampaña!

E dos ehèmpelnan aki ta un frakshon di e totalidat di “issue”-nan den nos komunidat ku innesesariamente ta resultá den un krísis. Un situashon ku pokopoko a krese e noshon ku e kultura di komunikashon di esnan ku papia e lenga papiamentu, sea na Aruba, Boneiru, Kòrsou òf na Ulanda ta komuniká den forma optimal ku otro, solamente si e loke nan ta diskutí ariba redunda den un krísis. Un berdadero kultura di krísis.

Te otro siman ku poder di Dios

(Bo opinion, remarke, kritika of opservashon ta bon bini. Manda un mail na bobharms1@gmail.com)