WILLEMSTAD – Konsierto “Laga nos ta Un” ta birando mas grandi di loke a spera, ya ku e partisipantenan ta preparando den un forma eksepshonal. Ku konfirmashon di e último agrupashon D-One ta sera e kapítulo di agrupashonnan musikal ku lo forma parti di e konstelashon di agrupashonnan ku lo bai kanta gospel den e konsierto menshoná. E konsierto aki lo tuma lugá djaweps 20 di mart próksimo den Curaçao Festival Center, den kua e konstelashonnan musikal manera GMO, Tune, Rumba Band, Show, Guess, ERA, D-One i GIO huntu ku e kantantenan Ilvia, Mammy, Ephrem J i Reinir Lijfrock lo bai kanta na Dios. Ademas lo tin presentashon di Dj Renzo ku lo presentá un meks di gospel, miéntras ku e maestronan di seremonia ta Mark Seferina i MC Monty.
Pa loke ta trata Mark Seferina tambe ta preparando un rèp pa wòrdu lansá durante e anochi di “Laga nos ta Un”. E formashon Guess tambe a prepará su mes i a drenta studio di Zion Music & Academy pa un kantika spiritual ku lo bai keda lansá pa promé biaha den e konsierto aki bibu.
Loke siman pasá na momentu ku e konferensha mester a tuma lugá, Claudius Phillips tambe a afirmá ku e tambe lo bai forma parti di e konsierto aki.
E konsierto aki ta uni pa rekoudá fondonan pa restourá e oula di Huize Habaai ku ta será for di 1995. Ministerio Bida Abundante for di aña pasá tabata traha riba kontaktonan ku agrupashonnan pa logra haña nan tur huntu pa e selebrashon grandi aki. E fecha di 20 di mart ta un fecha den kua lo no tin fiestanan bailabel na Kòrsou, motibu pa kua a skohe un fecha den kua un i tur por bin huntu pa reflehá riba e motibu ku Kristu Hesus a muri pa hende.
E anochi aki e agrupashonnan lo bai interpretá musikal kristian konosí i ku un i tur por kanta durante e konsierto aki. Lo ta un anochi den kua lo bai tin un mensahe pa asina ku esnan ku lo bai t’ei e anochi aki por para ketu riba amor di Dios demostrá pa medio di e morto di Hesus. E diferente miembronan di e agrupashonnan ya ta preparando kaba i ku ta biba un interes grandi pa e anochi aki. Karchinan a drenta e diferente lugánan ku ta bende esaki i na algun skolnan tambe lo bai tin karchinan pa e hóbennan por kumpra.
E karchinan ta únikamente 10 florin pa persona den un anochi di unidat inkomparabel den Curaçao Festival Center djaweps 20 di mart próksimo. E konsierto aki lo kuminsá pa 8’or di anochi i buska karchinan na Tik Tak, Mensing’s Caminada, Kas di Beibel, Beep Beep Eternity Beauty Salon i MAS 99.